I.

Introduzzjoni

1.

Din il-kawża tkompli mas-sentenza Teglgaard u Fløjstrupgård  ( 2 ).

2.

F’dik is-sentenza, il-Qorti tal-Ġustizzja kienet mitluba tistabbilixxi jekk, skont il-leġiżlazzjoni inkwistjoni f’dik il-kawża, it-tnaqqis tal-pagamenti diretti dovuti lill-bdiewa minħabba n-nuqqas ta’ osservanza tar-regoli tal-kundizzjonalità  ( 3 ) kellhomx jiġi kkalkolati abbażi tal-pagamenti mogħtija inkonnessjoni mas-sena kalendarja li fiha kien seħħ dan in-nuqqas ta’ osservanza jew fuq dawk inkonnessjoni mas-sena li fiha l-imsemmi nuqqas ta’ osservanza kien ġie kkonstatat  ( 4 ). Il-Qorti tal-Ġustizzja ddeċidiet li kien meħtieġ li, bħala l-bażi għall-kalkolu, tintuża s-sena ta’ meta seħħ in-nuqqas ta’ osservanza  ( 5 ).

3.

Fil-mument meta ngħatat is-sentenza Teglgaard, ir-regoli inkwistjoni f’dik il-kawża kienu diġà ġew imħassra u ssostitwiti b’leġiżlazzjoni ġdida, li biddlet il-formulazzjoni tad-dispożizzjonijiet ikkonċernati. Din il-leġiżlazzjoni ġdida hija dik li għandha tiġi interpretata f’din il-kawża, fejn il-kwistjoni li tqum hija l-istess bħal dik li ġiet ittrattata fis-sentenza Teglgaard, iżda fil-kuntest tal-leġiżlazzjoni l-ġdida: il-bażi għall-kalkolu tat-tnaqqis tal-pagamenti diretti għandha tkun is-sena li fiha seħħ in-nuqqas ta’ osservanza jew is-sena tal-konstatazzjoni tiegħu? Id-dispożizzjonijiet li għandhom jiġu interpretati huma l-Artikolu 97(1) u l-Artikolu 99(1) tar-Regolament (UE) Nru 1306/2013  ( 6 ), kif ukoll l-ewwel subparagrafu u l-punt (a) tal-Artikolu 73(4) tar-Regolament ta’ Implimentazzjoni (UE) Nru 809/2014  ( 7 ).

4.

F’din il-kawża, il-Qorti tal-Ġustizzja hija għaldaqstant, essenzjalment, mitluba tistabbilixxi jekk il-leġiżlatur, permezz tal-leġiżlazzjoni l-ġdida, riedx ibiddel is-sena li fuqha għandu jiġi kkalkolat it-tnaqqis bħal dak previst mil-leġiżlazzjoni preċedenti.

5.

Fi tmiem l-espożizzjoni tiegħi, ser nipproponi li l-Qorti tal-Ġustizzja tirrispondi għal din id-domanda, fis-sens li jeħtieġ li tintuża sistematikament is-sena li matulha seħħ in-nuqqas ta’ osservanza bħala bażi għall-kalkolu.

6.

It-talba għal deċiżjoni preliminari li permezz tagħha saret din id-domanda tressqet mill-College van Beroep voor het bedrijfsleven (il-Qorti tal-Appell għall-Kwistjonijiet Amministrattivi fil-Qasam Ekonomiku, il-Pajjiżi l-Baxxi) fil-kuntest ta’ tilwima bejn bidwi u l-minister van Landbouw, Natuur en Voedselkwaliteit (il-Ministru tal-Agrikoltura, tan-Natura u tal-Kwalità tal-Ikel, iktar ’il quddiem il-“Ministru”) fir-rigward ta’ tnaqqis tal-ammont tal-pagamenti diretti dovuti lill-bidwi minħabba żewġ każijiet ta’ nuqqas ta’ osservanza tar-regoli ta’ kundizzjonalità, impost mill-Ministru fuq il-bidwi.

II.

Il-kuntest ġuridiku

A.

Id-dritt tal-Unjoni applikabbli fil-kawża Teglgaard (il-kuntest ġuridiku antik)

7.

Is-sistema ta’ kundizzjonalità ġiet introdotta permezz tar-Regolament (KE) Nru 1782/2003  ( 8 ), kif ippreċiżat permezz tar-Regolament ta’ Implimentazzjoni (KE) Nru 796/2004  ( 9 ) (Taqsima 1). Sussegwentement, dawn ir-regolamenti ġew imħassra u ssostitwiti, rispettivament, mir-Regolament (KE) Nru 73/2009  ( 10 ) u r-Regolament ta’ Implimentazzjoni (KE) Nru 1122/2009  ( 11 ) (Taqsima 2). Huma dawn ir-regolamenti li kienu inkwistjoni fis-sentenza Teglgaard.

1.

Ir-Regolament Nru 1782/2003 u r-Regolament ta’ Implimentazzjoni Nru 796/2004

8.

Essenzjalment, l-Artikolu 6(1) tar-Regolament Nru 1782/2003, kien jipprovdi, fil-verżjoni bil-lingwa Franċiża tiegħu, li, f’każ ta’ nuqqas ta’ osservanza tar-regoli ta’ kundizzjonalità, l-ammont totali tal-pagamenti diretti li għandhom jingħataw għas-“sena kalendarja li matulha ġie kkonstatat in-nuqqas ta’ osservanza” għandu jitnaqqas  ( 12 ). Min-naħa l-oħra, kważi l-verżjonijiet lingwistiċi kollha l-oħra kienu jsemmu s-“sena li matulha seħħ in-nuqqas ta’ osservanza”  ( 13 ).

9.

B’effett mis-sena 2008, ir-Regolament (KE) Nru 146/2008  ( 14 ) emenda l-Artikolu 6(1) tar-Regolament Nru 1782/2003 kif ġej:

10.

L-ewwel subparagrafu tal-Artikolu 66(1) tar-Regolament ta’ Implimentazzjoni Nru 796/2004 kien jipprovdi:

2.

Ir-Regolament Nru 73/2009 u r-Regolament ta’ Implimentazzjoni Nru 1122/2009

11.

B’effett mid-19 ta’ Jannar 2009, l-Artikolu 6(1) tar-Regolament Nru 1782/2003, kif emendat permezz tar-Regolament Nru 146/2008, ġie ssostitwit bl-Artikolu 23(1) tar-Regolament Nru 73/2009, u b’effett mit-30 ta’ Novembru 2009, l-Artikolu 66(1) tar-Regolament ta’ Implimentazzjoni Nru 796/2004 ġie ssostitwit bl-Artikolu 70(8)(a) tar-Regolament ta’ Implimentazzjoni Nru 1122/2009.

12.

L-ewwel subparagrafu tal-Artikolu 23(1) tar-Regolament Nru 73/2009 kien jipprovdi:

13.

L-Artikolu 70(8)(a) tar-Regolament ta’ Implimentazzjoni Nru 1122/2009 kien jipprovdi:

B.

Id-dritt tal-Unjoni applikabbli għall-kawża prinċipali

14.

B’effett mis-17 ta’ Diċembru 2013, id-dispożizzjonijiet fil-qasam tal-osservanza tar-regoli ta’ kundizzjonalità previsti mir-Regolament Nru 73/2009 ġew issostitwiti b’dawk previsti mir-Regolament Nru 1306/2013  ( 15 ) (Taqsima 1) u mir-Regolament ta’ Implimentazzjoni Nru 809/2014 (Taqsima 2). Huma dawn ir-regolamenti, li jifformaw parti mir-riforma tal-Politika Agrikola Komuni (PAK), li jeħtieġ li jiġu interpretati f’din il-kawża.

1. Ir-Regolament Nru 1306/2013

15.

Il-premessa 53 tar-Regolament Nru 1306/2013 hija fformulata kif ġej:

16.

Il-premessa 57 ta’ dan ir-regolament tipprovdi:

17.

L-Artikolu 91(1) tal-imsemmi regolament jipprovdi:

18.

L-Artikolu 97 ta’ dan l-istess regolament, intitolat “Applikazzjoni tal-piena amministrattiva”, jipprovdi fl-ewwel subparagrafu tal-paragrafu 1 tiegħu:

19.

L-Artikolu 99 tar-Regolament Nru 1306/2013, intitolat “Kalkolu tal-piena amministrattiva”, jipprovdi fil-paragrafu 1 tiegħu:

2. Ir-Regolament ta’ Implimentazzjoni Nru 809/2014

20.

Il-Kapitolu III tat-Titolu V tar-Regolament ta’ Implimentazzjoni Nru 809/2014 huwa intitolat “Kalkolu u applikazzjoni tal-pieni amministrattivi”. L-Artikolu 73 li jaqa’ taħt dan il-kapitolu, intitolat “Prinċipji ġenerali”, jipprovdi fil-paragrafu 4(a) tiegħu:

III.

Il-kawża prinċipali, id-domanda preliminari u l-proċedura quddiem il-Qorti tal-Ġustizzja

21.

Ir-rikorrent fil-kawża prinċipali huwa bidwi. Fl-2016, wara spezzjoni fir-razzett tar-rikorrent, in-Nederlandse Voedsel- en Warenautoriteit (l-Awtorità Olandiża għall-Kontroll tal-Prodotti tal-Ikel u tal-Prodotti tal-Konsum, iktar ’il quddiem in-“NVWA”) ikkonstatat żewġ każijiet ta’ nuqqas ta’ osservanza tar-regoli ta’ kundizzjonalità: każ li jirrigwarda l-qasam tas-saħħa, li seħħ fl-2015, u każ li jirrigwarda l-qasam tal-benesseri tal-annimali, li seħħ fl-2016.

22.

Fis-16 ta’ Frar 2017, wara skambju ta’ korrispondenza mar-rikorrent, in-NVWA tat deċiżjoni li imponiet tnaqqis lir-rikorrent ta’ 5 % fuq il-pagamenti diretti li kellhom jingħatawlu għas-sena 2016, minħabba n-nuqqas ta’ osservanza tar-regoli ta’ kundizzjonalità.

23.

Ir-rikorrent ippreżenta rikors kontra din id-deċiżjoni, li l-ministru ċaħdu bħala infondat permezz ta’ deċiżjoni tat-30 ta’ Ġunju 2017. Ir-rikorrent imbagħad ippreżenta appell kontra l-imsemmija deċiżjoni quddiem il-qorti tar-rinviju.

24.

Il-qorti tar-rinviju ssostni li l-Ministru huwa ġġustifikat jimponi tnaqqis fuq ir-rikorrent.

25.

F’dan ir-rigward, il-qorti tar-rinviju tosserva, l-ewwel nett, li l-ewwel każ ta’ nuqqas ta’ osservanza seħħ fl-2015, filwaqt li l-ieħor seħħ fl-2016. Il-konstatazzjoni tal-każijiet ta’ nuqqas ta’ osservanza seħħet fl-2016. Għall-ewwel każ ta’ nuqqas ta’ osservanza, is-sena li fiha seħħ in-nuqqas ta’ osservanza ma tikkorrispondix, għaldaqstant, għas-sena tal-konstatazzjoni tiegħu.

26.

Il-qorti tar-rinviju tikkonstata għaldaqstant li, għal kull wieħed miż-żewġ każijiet ta’ nuqqas ta’ osservanza, in-NVWA imponiet tnaqqis ta’ 3 % mill-ammont tal-għajnuna skont l-Artikolu 39(1) tar-Regolament ta’ Delega (UE) Nru 640/2014  ( 16 ). Peress li ż-żewġ każijiet ta’ nuqqas ta’ osservanza ġew ikkonstatati fl-istess sena, jiġifieri fl-2016, u jaqgħu f’oqsma differenti tal-kundizzjonalità, in-NVWA żiedet it-tnaqqis u stabbilixxiethom flimkien għall-massimu ta’ 5 %, skont l-Artikolu 74 tar-Regolament ta’ Implimentazzjoni Nru 809/2014. In-NVWA kkalkolat għaldaqstant, it-tnaqqis tal-pagamenti diretti billi bbażat ruħha fuq is-sena li matulha ġew ikkonstatati l-każijiet ta’ nuqqas ta’ osservanza (fl-2016), u mhux fuq is-snin li matulhom iż-żewġ każijiet ta’ nuqqas ta’ osservanza seħħew (fl-2015 u fl-2016, rispettivament).

27.

Il-qorti tar-rinviju tikkunsidra li dan il-metodu ta’ kalkolu tat-tnaqqis huwa konformi mal-Artikolu 99(1) tar-Regolament Nru 1306/2013, u mal-ewwel subparagrafu tal-Artikolu 73(4) u mal-Artikolu 73(4)(a) tar-Regolament ta’ Implimentazzjoni Nru 809/2014. Fil-fatt, hija ssostni li jirriżulta ċar minn dawn id-dispożizzjonijiet li t-tnaqqis tal-pagamenti diretti minħabba n-nuqqas ta’ osservanza tar-regoli ta’ kundizzjonalità għandu jiġi kkalkolat abbażi tal-pagamenti diretti mogħtija fuq il-bażi tas-sena tal-konstatazzjoni tan-nuqqas ta’ osservanza.

28.

Madankollu, il-qorti tar-rinviju għandha dubji dwar il-kompatibbiltà tal-imsemmija dispożizzjonijiet ma’ ċerti prinċipji ġenerali tad-dritt tal-Unjoni inkwantu, meta s-sena li fiha jseħħ in-nuqqas ta’ osservanza u s-sena tal-konstatazzjoni tal-imsemmi nuqqas ta’ osservanza tar-regoli ta’ kundizzjonalità ma jkunux jaqblu, it-tnaqqis jiġi kkalkolat abbażi tas-sena tal-konstatazzjoni. B’mod iktar partikolari, il-qorti tar-rinviju tistaqsi dwar il-punt dwar jekk, fid-dawl tal-motivi tas-sentenza Teglgaard, l-imsemmija dispożizzjonijiet tad-dritt tal-Unjoni għandhomx jitqiesu bħala li jmorru kontra l-prinċipji ta’ ugwaljanza fit-trattament, ta’ proporzjonalità u ta’ ċertezza legali.

29.

Huwa f’dan il-kuntest li l-qorti tar-rinviju, permezz ta’ deċiżjoni tat-23 ta’ April 2019, li waslet fir-reġistru tal-Qorti tal-Ġustizzja fit-3 ta’ Mejju 2019, iddeċidiet li tissospendi l-proċeduri u li tagħmel lill-Qorti tal-Ġustizzja d-domanda preliminari li ġejja:

30.

Osservazzjonijiet bil-miktub ġew ippreżentati mill-Gvern Olandiż, Daniż u dak Ġermaniż, mill-Parlament Ewropew, mill-Kunsill tal-Unjoni Ewropea u mill-Kummissjoni Ewropea. Barra minn hekk, dawn il-partijiet interessati, kif ukoll il-Gvern Svediż, irrispondew għad-domandi bil-miktub tal-Qorti tal-Ġustizzja tas-27 ta’ April 2020.

IV.

Analiżi

A.

Osservazzjonijiet preliminari fuq id-domanda preliminari

31.

Permezz tad-domanda preliminari tagħha, kif hija fformulata, il-qorti tar-rinviju tistaqsi lill-Qorti tal-Ġustizzja dwar il-validità tal-Artikolu 99(1) tar-Regolament Nru 1306/2013 u tal-ewwel subparagrafu u l-punt (a) tal-Artikolu 73(4) tar-Regolament ta’ Implimentazzjoni Nru 809/2014, u mhux dwar l-interpretazzjoni ta’ dawn id-dispożizzjonijiet. Hija ssostni fil-fatt li jirriżulta ċar minn dawn id-dispożizzjonijiet li t-tnaqqis tal-pagamenti għandu jkun ikkalkolat abbażi tal-pagamenti mogħtija fis-sena tal-konstatazzjoni tan-nuqqas ta’ osservanza tar-regoli ta’ kundizzjonalità  ( 17 ).

32.

Issa, jiena ma naqbilx mal-premessa dwar l-interpretazzjoni tal-Artikolu 99(1) tar-Regolament Nru 1306/2013 u tal-ewwel subparagrafu u l-punt (a) tal-Artikolu 73(4) tar-Regolament ta’ Implimentazzjoni Nru 809/2014, li fuqha hija bbażata d-domanda preliminari.

33.

Fil-fehma tiegħi, dawn id-dispożizzjonijiet ma jippermettux li jiġi stabbilit b’mod ċar, prima facie, jekk din il-leġiżlazzjoni tiħux is-sena li fiha jkun seħħ in-nuqqas ta’ osservanza jew is-sena tal-konstatazzjoni bħala l-bażi għall-kalkolu tat-tnaqqis. Għaldaqstant, jeħtieġ, qabelxejn, li tingħata risposta għal din id-domanda fil-kuntest ta’ din il-kawża.

34.

Għal dan il-għan, jeħtieġ li jiġu interpretati mhux biss id-dispożizzjonijiet imsemmija fid-domanda preliminari, imma fuq kollox, l-Artikolu 97(1) tar-Regolament Nru 1306/2013. Fil-fatt, jeħtieġ li wieħed jistaqsi dwar il-punt jekk il-kalkolu tat-tnaqqis huwiex irregolat mill-Artikolu 97(1) tar-Regolament Nru 1306/2013 iktar milli mill-Artikolu 99(1) ta’ dan ir-regolament u mill-ewwel subparagrafu u l-punt (a) tal-Artikolu 73(4) tar-Regolament ta’ Implimentazzjoni Nru 809/2014.

35.

B’din il-preċiżazzjoni, jidhirli fil-fatt, kif ser nispjega iktar ’il quddiem, li d-dispożizzjonijiet ikkonċernati jirrigwardaw is-sena li fiha jkun seħħ in-nuqqas ta’ osservanza bħala bażi għall-kalkolu tat-tnaqqis, ħaġa li timplika li l-kwistjoni tal-validità tad-dispożizzjonijiet imqajma mill-qorti tar-rinviju ma tqumx.

36.

Għaldaqstant, l-unika domanda li jeħtieġ li tingħata risposta f’din il-kawża hija għaldaqstant dik li tirrigwarda l-interpretazzjoni tad-dispożizzjonijiet ikkonċernati sabiex jiġi stabbilit liema sena għandha tintgħażel bħala bażi sabiex jiġi kkalkolat it-tnaqqis tal-pagamenti diretti.

37.

Fid-dawl tal-premess, sabiex tingħata risposta utli lill-qorti tar-rinviju, jeħtieġ li d-domanda preliminari terġa’ tiġi fformulata bil-mod kif ġej  ( 18 ): l-Artikolu 97(1) u l-Artikolu 99(1) tar-Regolament Nru 1306/2013 kif ukoll l-ewwel subparagrafu u l-punt (a) tal-Artikolu 73(4) tar-Regolament ta’ Implimentazzjoni Nru 809/2014, għandhom jiġu interpretati fis-sens li t-tnaqqis tal-pagamenti diretti minħabba n-nuqqas ta’ osservanza tar-regoli ta’ kundizzjonalità għandu jiġi kkalkolat abbażi tal-pagamenti mogħtija għas-sena kalendarja li fiha jkun seħħ dan in-nuqqas ta’ osservanza jew abbażi tal-pagamenti mogħtija għas-sena li fiha jkun ġie kkonstatat l-imsemmi nuqqas ta’ osservanza?

38.

Sabiex tingħata risposta għal din id-domanda, jidhirli li huwa utli, l-ewwel nett, li jsiru xi tfakkiriet dwar is-sistema ta’ tnaqqis f’każ ta’ nuqqas ta’ osservanza tar-regoli ta’ kundizzjonalità (Parti B). Imbagħad, ser infakkar it-tagħlim tas-sentenza Teglgaard (Parti Ċ) qabel ma nipproċedi bl-interpretazzjoni tad-dispożizzjonijiet applikabbli fil-kawża prinċipali (Parti D).

B.

Fuq is-sistema ta’ tnaqqis f’każ ta’ nuqqas ta’ osservanza tar-regoli ta’ kundizzjonalità

39.

Fil-qasam tal-PAK, sabiex ikunu eliġibbli għall-pagamenti diretti, il-bdiewa għandhom jissodisfaw il-kundizzjonijiet għall-eliġibbiltà. Sakemm ikunu qegħdin jirċievu din l-għajnuna, huma jkunu suġġetti wkoll għar-regoli ta’ kundizzjonalità  ( 19 ) li n-nuqqas ta’ osservanza tagħhom ikun issanzjonat permezz ta’ tnaqqis, f’perċentwali, mill-ammont totali tal-għajnuna.

40.

It-tnaqqis tal-pagamenti diretti minħabba n-nuqqas ta’ osservanza tar-regoli ta’ kundizzjonalità jsir f’żewġ fażijiet: il-kalkolu tat-tnaqqis u, sussegwentement, l-imputazzjoni tat-tnaqqis.

41.

Sabiex jiġi kkalkolat it-tnaqqis, l-għażla bejn is-sena li fiha jkun seħħ in-nuqqas ta’ osservanza u s-sena tal-konstatazzjoni tiegħu, bħala bażi għall-kalkolu, jista’ jkollha impatt kbir fuq il-portata tat-tnaqqis. Fil-fatt, iċ-ċirkustanzi materjali, bħalma huwa n-numru ta’ ettari maħduma, li għalihom jingħataw il-pagamenti diretti, jistgħu jvarjaw sostanzjalment minn sena għall-oħra. Minħabba f’hekk, meta n-nuqqas ta’ osservanza tar-regoli ta’ kundizzjonalità ma jiġix ikkonstatat fl-istess sena li fiha jkun seħħ, billi tintuża s-sena tal-konstatazzjoni bħala l-bażi għall-kalkolu, l-ammont tal-pagamenti li għalih japplika t-tnaqqis jista’ jkun ikbar minn dak tas-sena li fiha jkun seħħ in-nuqqas ta’ osservanza f’każ ta’ żieda fin-numru ta’ ettari jew, għall-kuntrarju, inqas f’każ ta’ tnaqqis fin-numru ta’ ettari  ( 20 ).

42.

Hija din is-sitwazzjoni, fejn l-ammont tal-pagamenti diretti huwa differenti fis-sena li fiha seħħ in-nuqqas ta’ osservanza mis-sena tal-konstatazzjoni, li kienet il-mertu tas-sentenza Teglgaard  ( 21 ).

C.

It-tagħlim tas-sentenza Teglgaard

43.

Għal din il-kawża, is-sentenza Teglgaard hija rilevanti minn żewġ aspetti b’mod partikolari.

44.

Fl-ewwel lok, il-Qorti tal-Ġustizzja kienet ikkonfrontata bi kwistjoni ta’ interpetazzjoni simili għal dik ta’ din il-kawża, jiġifieri l-għażla bejn l-użu tas-sena li fiha seħħ in-nuqqas ta’ osservanza u s-sena tal-konstatazzjoni bħala l-bażi għall-kalkolu tat-tnaqqis tal-pagamenti diretti.

45.

B’mod iktar partikolari, hija kienet tirrigwarda l-interpretazzjoni tal-Artikolu 6(1) tar-Regolament Nru 1782/2003. Il-formulazzjoni ta’ din id-dispożizzjoni ma kinitx ċara minħabba d-diverġenzi bejn id-diversi verżjonijiet lingwistiċi tagħha. Essenzjalment, il-verżjoni bil-lingwa Franċiża ta’ din id-dispożizzjoni kienet tipprovdi li s-sena rilevanti għat-tnaqqis tal-pagamenti kienet is-sena tal-konstatazzjoni tan-nuqqas ta’ osservanza. Min-naħa l-oħra, kważi l-verżjonijiet lingwistiċi kollha l-oħra ta’ din id-dispożizzjoni kienu jipprovdu li s-sena rilevanti għal dan it-tnaqqis kienet is-sena li fiha jseħħ in-nuqqas ta’ osservanza  ( 22 ).

46.

Quddiem dawn iż-żewġ possibbiltajiet ta’ interpretazzjoni, il-Qorti tal-Ġustizzja għażlet is-sena li fiha seħħ in-nuqqas ta’ osservanza. Sabiex tagħmel dan, hija bbażat ruħha b’mod partikolari fuq, min-naħa, l-għan tar-regoli ta’ kundizzjonalità, u min-naħa l-oħra, il-prinċipji ta’ proporzjonalità, ta’ ugwaljanza fit-trattament u ta’ ċertezza legali.

47.

Għaldaqstant, hija kkunsidrat l-ewwel nett li, huwa biss l-użu, bħala bażi għall-kalkolu, tas-sena li fiha jseħħ in-nuqqas ta’ osservanza li kien kapaċi li jiżgura t-twettiq tal-għan tar-regoli ta’ kundizzjonalità fil-każijiet kollha.

48.

F’dan ir-rigward, hija indikat li l-għan tar-Regolament Nru 1782/2003 fil-qasam tal-osservanza tar-regoli ta’ kundizzjonalità kien li jorbot il-pagament tal-għajnuna diretta mal-osservanza tar-regoli dwar l-amministrazzjoni u l-kundizzjonijiet agrikoli u ambjentali tajbin, li jifformaw ir-regoli ta’ kundizzjonalità. F’każ ta’ nuqqas ta’ osservanza ta’ dawn ir-rekwiżiti, l-Istati Membri kellhom jimponu tnaqqis fuq l-ammont tal-pagamenti diretti. Issa, skont il-Qorti tal-Ġustizzja, l-osservanza ta’ dawn ir-rekwiżiti tikseb is-sens kollu tagħha biss jekk is-sanzjoni għall-ksur tagħhom twassal għal tnaqqis tal-pagamenti diretti li għandhom jingħataw fis-sena kalendarja li fiha seħħ dan il-ksur. Fil-fatt, kienet biss tali korrispondenza li setgħet tiżgura ż-żamma ta’ rabta bejn l-imġieba tal-bidwi li jagħti lok għas-sanzjoni u s-sanzjoni nnifisha, peress li ċ-ċirkustanzi materjali li minħabba fihom jingħataw il-pagamenti diretti setgħu jvarjaw minn sena għall-oħra  ( 23 ).

49.

Sussegwentement, hija ddeċidiet li huwa biss l-użu, bħala bażi għall-kalkolu, tas-sena li fiha jseħħ in-nuqqas ta’ osservanza li kien kapaċi, fi kwalunkwe każ, li jiżgura l-osservanza tal-prinċipju ta’ proporzjonalità. Fil-fatt, it-teħid inkunsiderazzjoni tas-sena tal-konstatazzjoni tan-nuqqas ta’ osservanza tar-regoli ta’ kundizzjonalità sabiex jiġi kkalkolat it-tnaqqis tal-pagamenti diretti ma jistax jiżgura r-rabta bejn l-aġir tal-bidwi li wassal għal tali tnaqqis u dan it-tnaqqis. Għall-kuntrarju, l-osservanza tal-prinċipju ta’ proporzjonalità baqgħet dejjem żgurata meta t-tnaqqis tal-pagamenti diretti kien ikkalkolat fuq l-ammont tal-pagamenti diretti mogħtija jew li kellhom jingħataw għas-sena kalendarja li fiha seħħ in-nuqqas ta’ osservanza tar-regoli tal-kundizzjonalità, peress li tali rabta hija ppreservata  ( 24 ).

50.

Fl-aħħar nett, l-użu tas-sena li fiha jseħħ in-nuqqas ta’ osservanza kien tali li jiggarantixxi l-prinċipji ta’ ugwaljanza fit-trattament u ta’ ċertezza legali. Fil-fatt, l-għażla ta’ din is-sena bħala bażi għall-kalkolu kienet tippermetti l-eliminazzjoni tar-riskju li l-ammont tal-pagamenti li għalih japplika t-tnaqqis ikun ogħla jew inqas minn dak tas-sena ta’ konstatazzjoni tan-nuqqas ta’ osservanza tar-regoli ta’ kundizzjonalità, ħaġa li kienet tali li tiggarantixxi l-ugwaljanza fit-trattament bejn il-bdiewa u, min-naħa l-oħra, trendi prevedibbli għall-bidwi kkonċernat il-konsegwenzi finanzjarji li huwa jkollu jaffaċċja minħabba n-nuqqas ta’ osservanza tar-regoli ta’ kundizzjonalità  ( 25 ).

51.

Fit-tieni lok, fis-sentenza Teglgaard, il-Qorti tal-Ġustizzja interpretat id-dispożizzjonijiet kollha li jirrigwardaw il-kalkolu tat-tnaqqis li ppreċedew il-leġiżlazzjoni inkwistjoni f’din il-kawża. Għalkemm il-formulazzjoni ta’ dawn id-dispożizzjonijiet preċedenti nbidlet maż-żmien  ( 26 ), il-Qorti tal-Ġustizzja tathom interpretazzjoni identika. F’dan ir-rigward, il-Qorti tal-Ġustizzja għamlet distinzjoni ċara bejn il-kalkolu u l-imputazzjoni tat-tnaqqis. Skont il-Qorti tal-Ġustizzja, jeħtieġ li d-dispożizzjonijiet preċedenti jiġu interpretati fis-sens li t-tnaqqis jeħtieġ li jiġi kkalkolat abbażi tal-pagamenti mogħtija jew li għandhom jingħataw għas-sena li fiha jkun seħħ dan in-nuqqas ta’ osservanza, mentri t-tnaqqis tal-pagamenti diretti hekk ikkalkolati għandhom ikunu imputati fuq il-pagamenti mogħtija jew li għandhom jingħataw għas-sena kalendarja li fiha jkun ġie kkonstatat in-nuqqas ta’ osservanza tar-regoli ta’ kundizzjonalità  ( 27 ).

52.

Kif indikajt fl-introduzzjoni ta’ dawn il-konklużjonijiet, id-domanda li tqum fil-kuntest ta’ din il-kawża hija dwar jekk din l-interpretazzjoni tapplikax ukoll għal-leġiżlazzjoni ġdida, jew jekk il-leġiżlatur riedx ibiddel is-sena li fuqha għandu jiġi kkalkolat it-tnaqqis.

53.

Sabiex tingħata risposta għal din id-domanda, jidhirli l-ewwel nett li jkun utli li nibda bl-interpretazzjoni tad-dispożizzjonijiet previsti fir-regolament bażiku, jiġifieri l-Artikolu 97(1) u l-Artikolu 99(1) tar-Regolament Nru 1306/2013 (Parti D), qabel ma nipproċedi għall-interpretazzjoni tar-Regolament ta’ Implimentazzjoni Nru 809/2014 Parti E). Fil-fatt, bħala regolament ta’ implimentazzjoni adottat bis-saħħa ta’ awtorizzazzjoni li tinsab fir-Regolament Nru 1306/2013, ir-Regolament ta’ Implimentazzjoni Nru 809/2014 għandu jiġi interpretat skont ir-Regolament Nru 1306/2013 u ma jistax jidderoga mid-dispożizzjonijiet ta’ dan ir-regolament, li minnu huwa dderivat  ( 28 ).

D.

Fuq l-interpretazzjoni tar-Regolament Nru 1306/2013

54.

Għall-interpretazzjoni tar-Regolament Nru 1306/2013, l-Artikolu 23(1) tar-Regolament Nru 73/2009 huwa ta’ interess partikolari, peress li hija din id-dispożizzjoni tar-regolament bażiku li jippreċedi r-Regolament Nru 1306/2013 li l-Qorti tal-Ġustizzja interpretat bħala li tirreferi għas-sena li fiha jseħħ in-nuqqas ta’ osservanza bħala l-bażi għall-kalkolu tat-tnaqqis  ( 29 ). Id-domanda li tqum hija għaldaqstant dik dwar liema dispożizzjoni tar-Regolament Nru 1306/2013 issostitwixxiet l-Artikolu 23(1) tar-Regolament Nru 73/2009.

55.

F’dan ir-rigward, nikkonstata, l-ewwel nett, li r-Regolament Nru 1306/2013 ma fih ebda dispożizzjoni identika għal dik tal-Artikolu 23(1) tar-Regolament Nru 73/2009, imma żewġ dispożizzjonijiet, jiġifieri l-Artikolu 97(1) u l-Artikolu 99(1) li, mad-daqqa ta’ għajn, għandhom it-tnejn li huma formulazzjoni simili għal dik tal-Artikolu 23(1) tar-Regolament Nru 73/2009  ( 30 ).

56.

Imbagħad, ninnota li dawn iż-żewġ dispożizzjonijiet jagħmlu t-tnejn li huma riferiment għal sena partikolari imma differenti: l-Artikolu 99(1) tar-Regolament Nru 1306/2013 jirreferi għas-sena tal-konstatazzjoni, filwaqt li l-Artikolu 97(1) tal-istess regolament jirreferi għas-sena kalendarja li matulha l-benefiċjarju għandu josserva r-regoli ta’ kundizzjonalità, ħaġa li tikkorrispondi għas-sena li fiha jseħħ in-nuqqas ta’ osservanza  ( 31 ). Id-domanda li tqum hija għaldaqstant dwar liema minn dawn id-dispożizzjonijiet tirrigwarda l-kalkolu tat-tnaqqis u, b’mod iktar ġenerali, jekk il-leġiżlatur riedx għall-fini ta’ bażi għall-kalkolu, ibiddel l-użu tas-sena li fiha jseħħ in-nuqqas ta’ osservanza kif jipprevedu l-leġiżlazzjonijiet preċedenti.

57.

Il-partijiet interessati fformaw essenzjalment żewġ opinjonijiet differenti fuq dan il-punt.

58.

Min-naħa, il-Gvern Ġermaniż u dak Olandiż kif ukoll il-Kummissjoni jsostnu li l-leġiżlatur ried, permezz tal-leġiżlazzjoni l-ġdida, ibiddel is-sena li abbażi tagħha jeħtieġ li jiġi kkalkolat it-tnaqqis. Huma jikkunsidraw li l-Artikolu 23(1) preċedenti tar-Regolament Nru 73/2009, dwar il-kalkolu, ġie ssostitwit bl-Artikolu 99(1) tar-Regolament Nru 1306/2013. Peress li din l-aħħar dispożizzjoni tirreferi għas-sena tal-konstatazzjoni, jeħtieġ għaldaqstant li t-tnaqqis jiġi kkalkolat abbażi ta’ din is-sena.

59.

Min-naħa l-oħra, il-Gvern Daniż, il-Parlament u l-Kunsill huma tal-fehma li l-leġiżlazzjoni l-ġdida hija essenzjalment identika għal-leġiżlazzjonijiet preċedenti, u li l-leġiżlatur ma riedx ibiddel is-sena rilevanti għall-kalkolu tat-tnaqqis. Huma jikkunsidraw essenzjalment li l-Artikolu 99(1) tar-Regolament Nru 1306/2013 jirregola mhux il-kalkolu tat-tnaqqis, imma l-imputazzjoni tiegħu. Jirriżulta għaldaqstant minn din id-dispożizzjoni, li tirreferi għas-sena tal-konstatazzjoni, li t-tnaqqis għandu jkun imputat fuq il-pagamenti mogħtija waqt dik is-sena. Min-naħa l-oħra, għal dak li jirrigwarda l-kalkolu tat-tnaqqis, il-Gvern Daniż isostni li huwa l-Artikolu 97(1) tar-Regolament Nru 1306/2013 li ssostitwixxa l-Artikolu 23(1) preċedenti tar-Regolament Nru 73/2009, u li, għaldaqstant, jeħtieġ li t-tnaqqis jiġi kkalkolat abbażi tas-sena li fiha jseħħ in-nuqqas ta’ osservanza, kif tipprevedi din l-ewwel dispożizzjoni  ( 32 ).

60.

Jien naqbel ma’ din l-aħħar interpretazzjoni partikolarment minħabba r-raġunijiet segwenti. Fl-ewwel lok, jirriżulta minn tabella ta’ korrelazzjoni li huwa fil-fatt l-Artikolu 97(1) tar-Regolament Nru 1306/2013 li ssostitwixxa l-Artikolu 23(1) tar-Regolament Nru 73/2009 (Taqsima 1). Fit-tieni lok, huwa biss l-użu tas-sena li fiha seħħ in-nuqqas ta’ osservanza bħala bażi ta’ kalkolu li jista’ jiżgura fil-każijiet kollha t-twettiq tal-għan tar-Regolament Nru 1306/2013 fil-qasam tal-osservanza tar-regoli ta’ kundizzjonalità kif ukoll il-prinċipju ta’ proporzjonalità (Taqsima 2). Fit-tielet lok, fil-fehma tiegħi, mill-ġenesi tar-Regolament Nru 1306/2013 ma jistax jiġi dedott li l-leġiżlatur ried ibiddel ir-regoli preċedenti fuq dan il-punt; pjuttost il-kuntrarju (Taqsima 3).

1.

Il-formulazzjoni tal-Artikolu 97(1) u tal-Artikolu 99(1) tar-Regolament Nru 1306/2013 kif ukoll il-kuntest li fih qegħdin dawn id-dispożizzjonijiet b’paragun mar-regolament preċedenti

61.

Qabelxejn, ninnota li skont il-formulazzjoni tagħhom, kemm l-Artikolu 97(1) kif ukoll l-Artikolu 99(1) tar-Regolament Nru 1306/2013 jistgħu, fil-prinċipju, jinftiehmu bħala li jirrigwardaw il-kalkolu tat-tnaqqis u jitqiesu, għaldaqstant, bħala li jissostitwixxu l-Artikolu 23(1) tar-Regolament Nru 73/2009. Fil-fatt, ebda wieħed minnhom ma jsemmi espliċitament is-sena li abbażi tagħha jeħtieġ li jiġi kkalkolat it-tnaqqis. Min-naħa l-oħra, it-tnejn li huma jużaw frażi b’tifsira wiesgħa, it-tnaqqis għandu “japplika”, ħaġa li tista’ tfisser “ikkalkolat” imma wkoll “imputat”  ( 33 ).

62.

Dan premess, nikkonstata madankollu li mit-tabella ta’ korrelazzjoni li tinsab fl-Anness XI tar-Regolament Nru 1307/2013 jirriżulta li huwa l-Artikolu 97 ta’ dar-Regolament Nru 1306/2013 li ssostitwixxa l-Artikolu 23 tar-Regolament Nru 73/2009  ( 34 ).

63.

Infakkar li r-regoli fil-qasam tal-kundizzjonalità previsti mir-Regolament Nru 73/2009 ġew formalment imħassra permezz tar-Regolament Nru 1307/2013, filwaqt li ġew issostitwiti permezz tad-dispożizzjonijiet previsti fir-Regolament Nru 1306/2013  ( 35 ). Ir-Regolamenti Nru 1306/2013 u 1307/2013, li t-tnejn li huma jifformaw parti mir-riforma tal-PAK, huma għaldaqstant marbutin mill-qrib  ( 36 ). Huwa f’dan il-kuntest li t-tabella li tindika l-korrelazzjoni bejn id-dispożizzjonijiet tar-Regolament Nru 1306/2013 u d-dispożizzjonijiet imħassra tar-Regolament Nru 73/2009 ġiet annessa mar-Regolament Nru 1307/2013  ( 37 ).

64.

Skont din it-tabella, jiena nitlaq mill-prinċipju li huwa l-Artikolu 97(1) tar-Regolament Nru 1306/2013 li jiddetermina s-sena li abbażi tagħha jeħtieġ li jiġi kkalkolat it-tnaqqis tal-pagament, ħaġa li twassalni sabiex nagħmel il-mistoqsija li ġejja: x’inhu għaldaqstant l-għan tal-Artikolu 99(1) tar-Regolament Nru 1306/2013?

65.

Bħall-Gvern Daniż, il-Kunsill u l-Parlament, jidhirli li din id-dispożizzjoni tikkonċerna l-imputazzjoni tat-tnaqqis.

66.

Fil-fatt, għal dik li hija formulazzjoni, nikkonstata, l-ewwel nett, xebh kbir bejn din id-dispożizzjoni u d-dispożizzjoni preċedenti li kienet tirrigwarda l-imputazzjoni tat-tnaqqis, jiġifieri l-Artikolu 70(8)(a) tar-Regolament ta’ Implimentazzjoni Nru 1122/2009. Għaldaqstant, jidhirli li din l-aħħar dispożizzjoni ġiet introdotta mil-leġiżlatur fir-Regolament Bażiku Nru 1306/2013 fil-forma tal-ewwel subparagrafu tal-Artikolu 99(1).

67.

Imbagħad, din l-interpretazzjoni hija kkorroborata mit-tabella ta’ korrelazzjoni msemmija iktar ’il fuq. Fil-fatt, jirriżulta minn din it-tabella li l-Artikolu 99 tar-Regolament Nru 1306/2013 jikkorrispondi għall-Artikolu 24 tar-Regolament Nru 73/2009 l-antik. Nikkonstata f’dan ir-rigward li dan l-aħħar artikolu fih paragrafi simili għat-tieni subparagrafu tal-Artikolu 99(1) u għall-Artikolu 99(2) sa (4) tar-Regolament Nru 1306/2013. Madankollu ma fihx dispożizzjoni ekwivalenti għall-ewwel subparagrafu tal-Artikolu 99(1) tar-Regolament Nru 1306/2013, ħaġa li ssaħħaħ l-idea li din id-dispożizzjoni tikkorrispondi għall-Artikolu 70(8)(a) tar-Regolament ta’ Implimentazzjoni Nru 1122/2009.

68.

Fid-dawl tal-premess, jeħtieġ li jiġi miċħud l-argument imressaq mill-Gvern Ġermaniż u dak Olandiż kif ukoll mill-Kummissjoni dwar it-titolu tal-Artikolu 99, “Kalkolu tal-piena amministrattiva”, li ma kienx jinstab fir-regolamenti preċedenti. Ċertament, dan it-titolu jista’ jindika li l-ewwel subparagrafu tal-Artikolu 99(1) tar-Regolament Nru 1306/2013 jirrigwarda l-kalkolu tat-tnaqqis u li jirreferi, għaldaqstant, għas-sena li fuqha jeħtieġ li jiġi kkalkolat it-tnaqqis. Madankollu, jeħtieġ li jiġi kkonstatat, minn naħa, li l-argumenti esposti iktar ’il fuq ma jikkorroborawx din l-interpretazzjoni. Min-naħa l-oħra, kif sostna l-Kunsill, it-titolu tal-Artikolu 99 jista’ jiġi spjegat bil-fatt li kważi l-Artikolu 99 kollu, jiġifieri t-tieni subparagrafu tal-paragrafu 1, kif ukoll il-paragrafi 2 sa 4 ta’ dan l-artikolu, jirrigwarda fil-fatt il-kalkolu tat-tnaqqis, b’mod iktar partikolari l-elementi li għandhom jittieħdu inkunsiderazzjoni waqt il-kalkolu, bħalma huma l-gravità, il-portata, il-persistenza u r-repetizzjoni tan-nuqqas ta’ osservanza kkonstatat.

2.

Fuq l-għan tas-sistema tal-kundizzjonalità

69.

Fis-sentenza Teglgaard, il-Qorti tal-Ġustizzja ddeċidiet li l-għan tar-Regolament Nru 1782/2003 fil-qasam tal-osservanza tar-regoli ta’ kundizzjonalità kien li torbot il-pagament tal-għajnuniet diretti mal-osservanza tar-regoli fil-qasam tal-art agrikola, tal-produzzjoni u tal-biedja  ( 38 ).

70.

Huwa paċifiku li dan l-għan inżamm fir-Regolament Nru 1306/2013, kif tindika l-premessa 53 tiegħu. Għaldaqstant, din il-premessa tfakkar li r-regolamenti bażiċi antiki, ir-Regolament Nru 1782/2003 u r-Regolament Nru 73/2009, stabbilixxew il-prinċipju li skontu l-pagament sħiħ lill-benefiċjarji għandu jkun marbut mal-osservanza tar-regoli ta’ ġestjoni tal-art agrikola, tal-produzzjoni agrikola u tal-biedja.

71.

Fil-fehma tiegħi, u l-istess kif iddeċidiet il-Qorti tal-Ġustizzja fis-sentenza Teglgaard, jista’ jiġi dedott minn dan l-għan li hija s-sena li fiha jseħħ in-nuqqas ta’ osservanza, li jirreferi għaliha l-Artikolu 97(1) tar-Regolament Nru 1306/2013, li għandha tintuża bħala l-bażi għall-kalkolu tat-tnaqqis. Fil-fatt, hija biss din is-sena li hija kapaċi li tiżgura fil-każijiet kollha r-rabta bejn l-aġir tal-bidwi u s-sanzjoni  ( 39 ). Min-naħa l-oħra, it-teħid inkunsiderazzjoni tas-sena tal-konstatazzjoni sabiex jiġi kkalkolat it-tnaqqis ma jippermettix din ir-rabta li tiġi żgurata b’mod sistematiku. L-istess japplika għall-prinċipju ta’ proporzjonalità  ( 40 ). Iktar minn hekk, l-użu tas-sena li fiha jseħħ in-nuqqas ta’ osservanza jaqdi aħjar il-prinċipji ta’ ċertezza legali u ta’ ugwaljanza fit-trattament  ( 41 ).

72.

Sabiex nispjega dan permezz ta’ eżempju, jidhirli li dak użat mill-Avukat Ġenerali Sharpston fil-konklużjonijiet tiegħu fil-kawża Teglgaard huwa rilevanti  ( 42 ): l-ipoteżi ta’ tliet bdiewa A, B u Ċ li għandhom irziezet identiċi u li kull wieħed minnhom għandu dritt għal għajnuna diretta ta’ EUR 10 000 għas-sena 1. Huma jwettqu l-istess ksur tar-regoli ta’ kundizzjonalità matul is-sena 1 imma l-ksur ma jinkixifx f’dik is-sena.

73.

Matul is-sena 2, il-bidwi A jwaqqaf l-attività agrikola tiegħu u jittrasferixxiha lil bidwi ieħor. Il-bidwi B ikompli jaħdem l-istess proprjetà u jitlob l-istess somma (EUR 10 000) bħala għajnuna diretta. Il-bidwi Ċ iżid il-wiċċ tal-operat tiegħu u, konsegwentement, jitlob iktar għajnuna diretta.

74.

Il-ksur jinkixef matul is-sena 3. L-awtoritajiet nazzjonali kompetenti jistabbilixxu debitament il-“konstatazzjonijiet” dwar in-nuqqas ta’ osservanza tar-rekwiżiti u jadottaw deċiżjonijiet li jnaqqsu l-għajnuna diretta għal kull bidwi abbażi ta’ 3 % kkalkolata fuq id-dritt ta’ kull bidwi għall-għajnuna diretta għas-sena 3.

75.

Konsegwentement, il-bidwi A (li ma talabx għajnuna diretta għas-sena 3, peress li waqqaf l-attività agrikola tiegħu) huwa suġġett għal tnaqqis tal-ammont tal-għajnuna ta’ 3 % × 0. Għaldaqstant ma ġiet imposta lilu ebda sanzjoni. Il-bidwi B, li jkompli jaħdem l-istess wiċċ bħas-sena 1, u għandu dritt għal EUR 10 000 ta’ għajnuna diretta għas-sena 3, jiġi impost fuqu tnaqqis fuq l-ammont tal-għajnuna diretta tiegħu ta’ 3 % × EUR 10 000, jiġifieri EUR 300. Is-sanzjoni li ġiet imposta fuqu hija l-istess bħal dik li kienet tiġi imposta fuqu kieku s-sena li fiha seħħ il-ksur ittieħdet bħala bażi għall-kalkolu tat-tnaqqis tal-għajnuna ta’ 3 %. Il-bidwi Ċ estenda sostanzjalment l-operat tiegħu u għandu dritt għal EUR 100 000 bħala għajnuna diretta għas-sena 3. Konsegwentement, is-sanzjoni tiegħu għan-nuqqas ta’ osservanza tal-obbligi tiegħu matul is-sena 1 hija t-tnaqqis ta’ EUR 3 000, applikat għall-ammont ta’ għajnuna diretta li għandha tingħata għas-sena 3.

76.

Wieħed josserva li r-riżultat tal-applikazzjoni tal-metodu bbażat fuq is-sena tal-konstatazzjoni jwassal għal sanzjonijiet differenti ħafna għat-tliet bdiewa A, B u Ċ (ta’ EUR 0, EUR 300 u EUR 3 000 rispettivament) għal eżattament l-istess ksur tar-regoli ta’ kundizzjonalità matul is-sena 1. Issa, tali riżultat ma huwiex kompatibbli la mal-għan tar-Regolament Nru 1306/2013, u lanqas mal-prinċipju ta’ proporzjonalità  ( 43 ).

77.

Fid-dawl tal-premess, jeħtieġ, min-naħa, li jiġi miċħud l-argument imressaq mill-Kummissjoni dwar l-għan tar-Regolament Nru 1306/2013. Ċertament, huwa minnu li s-sanzjonijiet amministrattivi fil-forma ta’ tnaqqis ta’ pagamenti għandhom ikunu dissważivi u effettivi, ħaġa li toħroġ mill-premessa 57 tar-Regolament Nru 1306/2013. Dan l-għan ġenerali ma jistax madankollu, fid-dawl ta’ dak li għadni kif spjegajt, jiġġustifika l-użu tas-sena tal-konstatazzjoni għall-kalkolu tat-tnaqqis. Fir-rigward, min-naħa, tal-argument imressaq mill-Gvern Olandiż, Ġermaniż u dak Svediż dwar il-fatt li jkun iktar diffiċli fil-prattika li tintuża s-sena li fiha jseħħ in-nuqqas ta’ osservanza bħala l-bażi ta’ kalkolu iktar milli s-sena tal-konstatazzjoni, għandu jiġi konkluż, anki jekk wieħed jippreżupponi li dan l-argument huwa korrett, li tali diffikultajiet ta’ natura amministrattiva jew prattika ma jistgħux jiġu invokati insostenn ta’ interpretazzjoni li tmur kontra l-għan tad-dispożizzjonijiet ikkonċernati  ( 44 ).

3.

Dwar il-ġenesi tad-dispożizzjonijiet ikkonċernati

78.

Peress li r-Regolament Nru 1306/2013 ġie adottat qabel ma kienet ngħatat is-sentenza Teglgaard, il-leġiżlatur ma kellux l-opportunità jindika espliċitament jekk huwa xtaqx iżomm jew ibiddel is-sena li fuqha għandu jiġi kkalkolat it-tnaqqis tal-pagamenti diretti previsti mil-leġiżlazzjoni l-antika, kif interpretata fis-sentenza Teglgaard. Dan premess, ebda element li jirrigwarda l-ġenesi tal-Artikolu 97(1) u tal-Artikolu 99(1) tar-Regolament Nru 1306/2013 ma jippermetti, fil-fehma tiegħi, li jiġi kkunsidrat li l-leġiżlatur ried ibiddel il-leġiżlazzjoni fuq dan il-punt.

79.

Fil-fatt, għal dak li jirrigwarda, fl-ewwel lok, il-premessi tar-Regolament Nru 1306/2013, nikkonstata li dawn ma jirreferux għall-metodu ta’ kalkolu tat-tnaqqis. Ma hemm xejn fil-premessi tar-Regolament Nru 1306/2013 li jippermetti għaldaqstant li jiġi kkunsidrat li l-leġiżlatur ried ibiddel ir-regoli preċedenti fuq dan il-punt. Għall-kuntrarju, l-istess bħall-Gvern Daniż u l-Parlament, jidhirli li l-premessa 57 tar-Regolament Nru 1306/2013 tidher li tindika li l-leġiżlatur ma riedx ibiddel il-leġiżlazzjonijiet preċedenti. Għaldaqstant, jirriżulta minn din il-premessa li tirrigwarda s-sistema ta’ kundizzjonalità li r-Regolament Nru 1306/2013 huwa intiż li jara “[g]ħal raġunijiet ta’ konsistenza […] li d-dispożizzjonijiet rilevanti tal-Unjoni jkunu kkonsolidati fi strument legali wieħed”  ( 45 ), ħaġa li tagħti lil wieħed x’jifhem li l-leġiżlatur ma xtaqx ibiddel is-sistema ta’ tnaqqis f’każ ta’ nuqqas ta’ osservanza tar-regoli ta’ kundizzjonalità.

80.

Għal dak li jirrigwarda, fit-tieni lok, ix-xogħol preparatorju tar-Regolament Nru 1306/2013, nirrileva l-ewwel nett li, anki jekk dan ix-xogħol kien juri r-rieda tal-leġiżlatur li jbiddel il-metodu ta’ kalkolu tat-tnaqqis, tali intenzjoni ma tkunx tista’, fil-fehma tiegħi, tkun determinanti għall-interpretazzjoni tad-dispożizzjonijiet ikkonċernati, inkwantu hija bl-ebda mod ma tinsab espressa fil-leġiżlazzjoni stess, jiġifieri la fid-dispożizzjonijiet, la fil-premessi tar-Regolament Nru 1306/2013, u lanqas fl-għan tar-regoli kkonċernati  ( 46 ).

81.

Dan premess, u fi kwalunkwe każ, ma jidhirlix, b’kuntrast mal-Kummissjoni, li mix-xogħol preparatorju tal-Artikolu 99 tar-Regolament Nru 1306/2013 jista’ jiġi dedott li l-leġiżlatur ried jemenda l-metodu ta’ kalkolu tat-tnaqqis. Infakkar li l-Kummissjoni ssostni li hija din id-dispożizzjoni, u mhux l-Artikolu 97(1) ta’ dan ir-regolament, li tirregola s-sena li fuqha għandu jiġi kkalkolat it-tnaqqis tal-pagamenti diretti.

82.

F’dan ir-rigward, ninnota li huwa ċertament minnu li l-Artikolu 99(1) tar-Regolament Nru 1306/2013 ġie emendat waqt il-proċess leġiżlattiv, peress li l-verżjoni inizjali ta’ din id-dispożizzjoni fil-proposta tal-Kummissjoni kienet tagħmel riferiment għas-sena li fiha jseħħ in-nuqqas ta’ osservanza  ( 47 ), filwaqt li l-verżjoni finali ta’ din id-dispożizzjoni tagħmel riferiment għas-sena tal-konstatazzjoni. B’kuntrast ma’ dak li ssostni l-Kummissjoni, xejn fix-xogħol preparatorju ma jippermetti madankollu li jiġi konkluż li l-leġiżlatur, permezz ta’ din il-modifika li ġiet introdotta waqt il-laqgħat trilogi fuq proposta tal-Kummissjoni  ( 48 ), xtaq ibiddel is-sena rilevanti għall-kalkolu tat-tnaqqis meta mqabbla mal-leġiżlazzjoni l-antika.

83.

Insostenn tal-pożizzjoni tagħha, il-Kummissjoni pprovdiet dokumenti interni li jippermettu li jiġi kkunsidrat li din kienet l-intenzjoni tagħha meta pproponiet din il-modifika: hija kienet tal-fehma li l-kalkolu tat-tnaqqis kien jaqa’ taħt l-Artikolu 99(1) tar-Regolament Nru 1306/2013 u li ma għandhiex tintuża iktar is-sena li fiha jseħħ in-nuqqas ta’ osservanza, iżda dik tal-konstatazzjoni, minħabba li kien wisq diffiċli li tiġi stabbilita s-sena li fiha seħħ in-nuqqas ta’ osservanza tar-regoli ta’ kundizzjonalità  ( 49 ).

84.

Madankollu, għandu jiġi kkonstatat mal-Parlament u mal-Kunsill li ebda element fix-xogħlijiet preparatorji (pubbliċi) tar-Regolament Nru 1306/2013 ma jippermetti li jiġi stabbilit li żewġ koleġiżlaturi kienu ġew informati b’din l-allegata motivazzjoni u li huma kienu qablu magħha billi aċċettaw il-modifika  ( 50 ). Minn dan isegwi li l-imsemmi dokument intern ma jistax iservi ta’ sors ta’ interpretazzjoni. Barra minn hekk, kif jirrilevaw il-Parlament u l-Kunsill, il-modifika proposta mill-Kummissjoni tista’ ssib spjegazzjoni bir-rieda tagħha li tiżgura l-koerenza mal-kontenut tad-dispożizzjoni l-antika dwar l-imputazzjoni, jiġifieri l-Artikolu 70(8)(a) tar-Regolament ta’ Implimentazzjoni Nru 1122/2009.

85.

Fid-dawl tal-kunsiderazzjonijiet kollha preċedenti, nikkonkludi li l-leġiżlatur ma riedx ibiddel il-metodu ta’ kalkolu tat-tnaqqis taħt ir-Regolament Nru 1306/2013.

4.

Konklużjoni dwar l-interpretazzjoni tar-Regolament Nru 1306/2013

86.

Jirriżulta mill-kunsiderazzjonijiet kollha esposti preċedentement li l-Artikolu 97(1) tar-Regolament Nru 1306/2013 għandu jiġi interpretat fis-sens li t-tnaqqis tal-pagamenti minħabba n-nuqqas ta’ osservanza tar-regoli ta’ kundizzjonalità għandu jkun ikkalkolat abbażi tal-pagamenti mogħtija jew li għandhom jingħataw għas-sena li fiha jkun seħħ dan in-nuqqas ta’ osservanza, filwaqt li l-Artikolu 99(1) ta’ dan ir-regolament għandu jkun interpretat fis-sens li t-tnaqqis tal-pagamenti diretti hekk ikkalkolati għandu jiġi imputat fuq il-pagamenti mogħtija jew li għandhom jingħataw għas-sena kalendarja li fiha jkun ġie kkonstatat l-imsemmi nuqqas ta’ osservanza.

E.

Fuq l-interpretazzjoni tar-Regolament ta’ Implimentazzjoni Nru 809/2014

87.

Għal dak li jirrigwarda l-Artikolu 73(4)(a) tar-Regolament ta’ Implimentazzjoni Nru 809/2014, nikkonstata li l-formulazzjoni ta’ din id-dispożizzjoni hija essenzjalment identika għal dik tal-Artikolu 99(1) tar-Regolament Nru 1306/2013. Bħala dispożizzjoni tar-Regolament ta’ Implimentazzjoni, l-Artikolu 73(4)(a) tar-Regolament ta’ Implimentazzjoni Nru 809/2014 għandu għaldaqstant jiġi interpretat skont l-Artikolu 99(1) tar-Regolament Nru 1306/2013. Minn dan isegwi li l-Artikolu 73(4)(a) tar-Regolament ta’ Implimentazzjoni Nru 809/2014 għandu wkoll jiġi interpretat fis-sens li t-tnaqqis tal-pagamenti diretti għandu jiġi imputat fuq il-pagamenti rċevuti jew li għandhom jiġu rċevuti għas-sena kalendarja li fiha jkun ġie kkonstatat in-nuqqas ta’ osservanza tar-regoli ta’ kundizzjonalità  ( 51 ).

V. Konklużjoni

88.

Fid-dawl tal-kunsiderazzjonijiet kollha preċedenti, nipproponi li l-Qorti tal-Ġustizzja tirrispondi għad-domanda magħmula mill-College van Beroep voor het bedrijfsleven (il-Qorti tal-Appell għall-Kwistjonijiet Amministrattivi fil-Qasam Ekonomiku, il-Pajjiżi l-Baxxi) kif ġej: