Eagrán sealadach
BREITHIÚNAS NA CÚIRTE (an Deichiú Dlísheomra)
11 Meitheamh 2026 (*)
(Tarchur chun réamhrialú – Beartas sóisialta – Aistriú gnóthais – Cearta na bhfostaithe a choimirciú – Treoir 2001/23/CE – Airteagal 3(1) – Oibleagáidí a eascraíonn as conradh fostaíochta atá ann ar dháta aistrithe an ghnóthais a aistriú chuig an aistrí – Rogha na mBallstát foráil a dhéanamh maidir le dliteanas comhpháirteach agus leithleach an aistreora agus an aistrí – Airteagal 8 – Cur i bhfeidhm forálacha náisiúnta atá níos fabhraí d’fhostaithe – Aistriú na hoibleagáide a bhaineann le teidlíochtaí tuarastail neamhíoctha ag an aistreoir – Féidearthacht foráil náisiúnta a chur i bhfeidhm lena gcuirtear aistriú oibleagáide faoi réir chomhaontú an chreidiúnaí)
I gCás C‑216/25,
IARRAIDH ar réamhrialú faoi Airteagal 267 CFAE, ó Curtea de Apel Constanţa (an Chúirt Achomhairc, Constanța, an Rómáin), trí bhreith an 18 Márta 2025, a fuarthas ag an gCúirt an 19 Márta 2025, sna himeachtaí
ZN
v
GSP Offshore SRL,
tugann AN CHÚIRT (an Deichiú Dlísheomra),
agus í comhdhéanta mar seo a leanas: J. Passer, Uachtarán Dlísheomra, M. L. Arastey Sahún (Rapóirtéir), Uachtarán an Chúigiú Dlísheomra, agus B. Smulders, Breitheamh,
Abhcóide Ginearálta: R. Norkus,
Cláraitheoir: A. Calot Escobar,
ag féachaint don nós imeachta i scríbhinn,
tar éis breithniú a dhéanamh ar na barúlacha arna dtíolacadh thar ceann an pháirtí seo a leanas:
– an Coimisiún Eorpach, ag S. Delaude agus L. Nicolae, i gcáil Gníomhairí,
tar éis cinneadh a dhéanamh, i ndiaidh an tAbhcóide Ginearálta a éisteacht, breith a thabhairt ar an gcás gan Tuairim,
an Breithiúnas seo a leanas:
Breithiúnas
1 Baineann an iarraidh ar réamhrialú le léiriú Airteagal 3(1) agus Airteagal 8 de Threoir 2001/23/CE ón gComhairle an 12 Márta 2001 maidir le comhfhogasú a dhéanamh ar dhlíthe na mBallstát a bhaineann le cearta na bhfostaithe a choimirciú i gcás aistriú gnóthas nó gnólachtaí nó codanna de ghnóthais nó de ghnólachtaí (IO 2001 L 82, lch. 16).
2 Rinneadh an iarraidh seo in imeachtaí idir ZN agus GSP Offshore SRL, a iarfhostóir, maidir le híocaíocht teidlíochtaí tuarastail a chomhfhreagraíonn don obair a rinne ZN don chuideachta sin roimh dháta aistrithe gnóthais a rinneadh i gcomhréir le comhaontú arna thabhairt i gcrích idir an chuideachta sin agus cuideachta eile.
An dlí lena mbaineann
Dlí an Aontais Eorpaigh
3 Foráiltear le haithrisí 3 agus 8 de Threoir 2001/23 mar seo a leanas:
‘(3) Is gá forálacha a dhéanamh maidir le fostaithe a chosaint i gcás ina n‑athraítear úinéir gnóthais, go háirithe, chun a áirithiú go gcosnófar a gcearta.
[...]
(8) D’éiligh deimhneacht dhlíthiúil agus trédhearcacht soiléiriú ar choincheap an aistrithe i bhfianaise chásdlí na Cúirte Breithiúnais. Níor athraigh an soiléiriú sin raon feidhme Threoir 77/187/CEE [ón gComhairle an 14 Feabhra 1977 maidir le comhfhogasú dhlíthe na mBallstát a bhaineann le cearta fostaithe a choimirciú i gcás aistriú gnóthas nó gnólachtaí nó codanna de ghnólachtaí (IO 1977 L 61, lch. 26)] mar a léirigh an Chúirt Bhreithiúnais í.’
[Aistriúchán neamhoifigiúil]
4 Foráiltear le hAirteagal 1(1)(a) agus (b) de Threoir 2001/23 mar seo a leanas:
‘(a) Beidh feidhm ag an Treoir seo maidir le haon aistriú gnóthais, gnólachta nó cuid de ghnóthas nó de ghnólacht chuig fostóir eile mar thoradh ar aistriú dlíthiúil nó ar chumasc dlíthiúil.
(b) Faoi réir fhomhír (a) agus na bhforálacha seo a leanas den Airteagal seo, déantar aistriú de réir bhrí na Treorach seo i gcás ina ndéantar eintiteas eacnamaíoch a aistriú a choinníonn a chéannacht, rud a chiallaíonn grúpáil eagraithe acmhainní a bhfuil sé mar chuspóir aici gníomhaíocht eacnamaíoch a shaothrú, bíodh an ghníomhaíocht sin lárnach nó coimhdeach nó ná bíodh.’
[Aistriúchán neamhoifigiúil]
5 Foráiltear le hAirteagal 3 den Treoir sin mar seo a leanas:
‘1. ‘Maidir leis na cearta agus na hoibleagáidí a thagann ó chonradh fostaíochta nó ó chaidreamh fostaíochta atá ann cheana don aistreoir ar dháta an aistrithe, aistreofar iad, tríd an aistriú sin, chuig an aistrí.
Féadfaidh na Ballstáit foráil a dhéanamh go mbeidh an t‑aistreoir agus an t‑aistrí, tar éis dáta an aistrithe, faoi dhliteanas comhpháirteach agus leithleach i leith oibleagáidí a bhí eascartha roimh dháta an aistrithe de thoradh ar chonradh fostaíochta nó ar chaidreamh fostaíochta a bhí ann ar dháta an aistrithe.’
[...]
4. (a) Mura bhforálann na Ballstáit a mhalairt, ní bheidh feidhm ag mír 1 ná ag mír 3 maidir le cearta na bhfostaithe ar shochair seanaoise, easláine nó mharthanóra faoi scéimeanna pinsin forlíontacha gairmiúla nó idirghairme lasmuigh de na scéimeanna reachtúla slándála sóisialta sna Ballstáit.
[...]’
[Aistriúchán neamhoifigiúil]
6 Foráiltear le hAirteagal 8 den Treoir sin mar seo a leanas:
‘Ní dhéanfaidh an Treoir seo difear do cheart na mBallstát forálacha reachtaíochta, rialúcháin nó riaracháin atá níos fabhraí d’fhostaithe a chur i bhfeidhm nó a thabhairt isteach nó comhaontuithe comhchoiteanna nó comhaontuithe idir comhpháirtithe sóisialta atá níos fabhraí d’fhostaithe a chur chun cinn nó a cheadú.’
[Aistriúchán neamhoifigiúil]
Dlí na Rómáine
An Cód Saothair
7 Foráiltear le hAirteagal 173(2) de Legea nr. 53/2003 privind Codul muncii (Dlí Uimh. 53/2003 maidir leis an gCód Saothair) an 24 Eanáir 2003 (Monitorul Oficial al României, Cuid I, Uimh. 72 an 5 Feabhra 2003), sa leagan is infheidhme maidir leis an díospóid sna príomhimeachtaí (‘an Cód Saothair) mar seo a leanas:
‘Aistreofar cearta agus oibleagáidí an aistreora a eascraíonn as conradh fostaíochta nó as caidreamh fostaíochta atá ann ar dháta an aistrithe ina n‑iomláine chuig an aistrí.’
Dlí Uimh. 67/2006
8 Foráiltear le hAirteagal 5(1) de Legea nr. 67/2006 privind protecția drepturilor salariaților în cazul transferului întreprinderii, al unității sau al unor părți ale acestora (Dlí Uimh. 67/2006 maidir le cearta fostaithe a chosaint i gcás aistriú gnóthas, gnólachtaí nó codanna de ghnóthais nó de ghnólachtaí) an 22 Márta 2006 (Monitorul Oficial al României, Cuid I, Uimh. 276 an 28 Márta 2006; ‘Dlí Uimh. 67/2006’) mar seo a leanas:
‘Aistreofar cearta agus oibleagáidí an aistreora a eascraíonn as conarthaí fostaíochta aonair agus comhaontuithe comhchoiteanna is infheidhme atá ann ar dháta an aistrithe ina n‑iomláine chuig an aistrí.’
An Cód Sibhialta
9 Foráiltear le hAirteagal 1605 de Legea Uimh. 287/2009 privind Codul civil al României (Dlí Uimh. 287/2009 lena mbunaítear Cód Sibhialta na Rómáine) an 17 Iúil 2009 (Monitorul Oficial al României, Cuid I, Uimh. 511 an 24 Iúil 2009; ‘an Cód Sibhialta’) mar seo a leanas:
‘Ní thiocfaidh sannadh fiachais arna chomhaontú leis an bhféichiúnaí i bhfeidhm ach amháin má thoilíonn an creidiúnaí leis sin.’
An díospóid sna príomhimeachtaí agus na ceisteanna a tharchuirtear le haghaidh réamhrialú
10 D’fhostaigh GSP Offshore ZN ar ardán ola.
11 Le litir dar dáta an 21 Feabhra 2024 ar tugadh fógra fúithi dá fhostaithe uile, lena n‑áirítear ZN, d’fhógair GSP Offshore go nglacfadh OMV Petrom Energy Solutions SRL (‘OMV Petrom’) seilbh ar a fhoireann mar gheall ar aistriú gnóthais, i gcomhréir le comhaontú arna thabhairt i gcrích idir an dá chuideachta sin an 8 Feabhra 2024 (‘an t‑aistriú atá i gceist’). Dá bhrí sin, ba é OMV Petrom fostóir nua na bhfostaithe sin.
12 Chuir OMV Petrom dlíodóir ZN ar an eolas go raibh sé den tuairim go raibh an chuideachta sin fós freagrach as na teidlíochtaí tuarastail is iníoctha ag GSP Offshore ar dháta an aistrithe atá i gceist, a chomhfhreagraíonn don obair a rinne ZN don chuideachta sin roimh an dáta sin, agus mar thoradh air sin nár ceanglaíodh ar OMV Petrom an oibleagáid na teidlíochtaí tuarastail sin a íoc a ghlacadh air féin.
13 Thug ZN caingean os comhair Tribunalul Constanța (an Chúirt Réigiúnach, Constanța, an Rómáin) ag lorg ordú go n‑íocfadh GSP Offshore na teidlíochtaí tuarastail sin.
14 Le breithiúnas an 11 Deireadh Fómhair 2024, dhiúltaigh an chúirt sin don chaingean sin ar an bhforas, mar thoradh ar an aistriú atá i gceist, gur aistríodh cearta agus oibleagáidí uile an aistreora chuig an aistrí, eadhon OMV Petrom, agus mar thoradh air sin gur scaoileadh GSP Offshore, mar aistreoir, ó aon oibleagáid na teidlíochtaí tuarastail a éilíodh a íoc.
15 Rinne ZN achomharc i gcoinne an bhreithiúnais sin os comhair Curtea de Apel Constanta (an Chúirt Achomhairc, Constanta, an Rómáin), arb í an chúirt a rinne an tarchur í, ag maíomh go raibh sé fós de cheangal ar GSP Offshore na teidlíochtaí tuarastail sin a íoc agus ag brath ar an bhfíoras nár ghlac OMV Petrom an oibleagáid na teidlíochtaí tuarastail sin a íoc. Dá bhrí sin, cuireann ZN i gcoinne gur aistríodh na hoibleagáidí a bhaineann leis na teidlíochtaí tuarastail céanna ó GSP Offshore go OMV Petrom.
16 Sonraíonn an chúirt sin, i ndíospóidí eile a bhaineann leis an ábhar céanna idir GSP Offshore agus fostaithe eile dá chuid iarfhostaithe, gur chinn sí go raibh GSP Offshore, mar aistreoir, fós faoi dhliteanas na teidlíochtaí tuarastail neamhíoctha a íoc, ós rud é nár aistríodh na cearta sin chuig an aistrí.
17 Tugann sí faoi deara, i gcomhréir leis an gcéad fhomhír d’Airteagal 3(1) de Threoir 2001/23, go bhfuil cearta agus oibleagáidí an aistreora a eascraíonn as conarthaí fostaíochta atá ann ar dháta aistriú an ghnóthais le haistriú ina n‑iomláine chuig an aistrí, agus mar thoradh air sin, faoin bhforáil sin, go ndéanfaí fíoraistriú fiachais mar thoradh ar an aistriú sin. Rinneadh an fhoráil sin a thrasuí sa dlí náisiúnta le hAirteagal 5(1) de Dhlí Uimh. 67/2006 agus le hAirteagal 173(2) den Chód Saothair.
18 Os a choinne sin, níor chuir reachtas na Rómáine chun feidhme, sa reachtaíocht náisiúnta, an rogha dá bhforáiltear sa dara fomhír d’Airteagal 3(1) den Treoir sin, faoina bhféadfaidh na Ballstáit foráil a dhéanamh go mbeidh an t‑aistreoir agus an t‑aistrí, tar éis dháta aistriú an ghnóthais, faoi dhliteanas i gcomhpháirt agus go leithleach as oibleagáidí a bhí dlite roimh dháta an aistrithe de bhun conradh fostaíochta a bhí ann ar dháta an aistrithe.
19 Sa chomhthéacs sin, tagraíonn an chúirt a rinne an tarchur do bhreithiúnas an 5 Bealtaine 1988, Berg agus Busschers (144/87 agus 145/87, EU:C:1988:236), inar léirigh an Chúirt Airteagal 3(1) de Threoir 77/187, a aisghaireadh agus ar cuireadh Treoir 2001/23 ina hionad.
20 Sa bhreithiúnas sin, chinn an Chúirt nach mór an fhoráil sin a léiriú sa chaoi, tar éis dháta aistrithe gnóthais, go scaoiltear an t‑aistreoir óna oibleagáidí a eascraíonn as an gconradh fostaíochta nó as an gcaidreamh fostaíochta mar gheall ar an aistriú amháin, fiú mura dtoilíonn na fostaithe atá fostaithe sa ghnóthas leis nó má chuireann siad ina choinne, ar an gcoinníoll áfach go bhfuil na Ballstáit in ann foráil a dhéanamh do dhliteanas comhpháirteach agus leithleach an aistreora agus an aistrí tar éis dháta an aistrithe.
21 É sin ráite, measann an chúirt a rinne an tarchur nach mór cinntí na Cúirte sa bhreithiúnas sin a thuiscint i bhfianaise chomhthéacs na gcaidreamh fostaíochta a bhí ann tráth a thug sí a rialú. Faoi láthair, ba cheart aird a thabhairt ar fhorbairtí i gcásdlí na Cúirte, go háirithe maidir leis an gcoincheap ‘aistriú gnóthais’, de réir bhrí Threoir 2001/23, agus ar fhorbairtí i gcaidrimh fostaíochta lena léirítear go bhféadfaí brath ar fhorálacha na Treorach sin chun críche atá contrártha leis an gcuspóir atá á shaothrú aici, eadhon cosaint a gceart a bhaint d’fhostaithe i gcomhthéacs aistriú gnóthais, agus gan an chosaint sin a ráthú.
22 Maidir leis an gcoincheap ‘aistriú gnóthais’, sonraíonn an chúirt a rinne an tarchur, ar an dáta a glacadh Treoir 77/187, go raibh an réiteach trína raibh ar an aistrí fiacha an aistreora a eascraíonn roimh aistriú gnóthais a ghlacadh ar láimh loighciúil, ós rud é gur ghlac an t‑aistrí acmhainní, conarthaí agus éilimh an ghnóthais ar láimh chun a bheith in ann íocaíocht teidlíochtaí tuarastail neamhíoctha a áirithiú. Ó shin i leith, áfach, chinn an Chúirt, go háirithe i mbreithiúnas an 11 Márta 1997, Süzen (C‑13/95, EU:C:1997:141), go bhféadfadh táthcheangal grúpa fostaithe a bheith ina aistriú gnóthais, gan gá le táthcheangal tacar sócmhainní inláimhsithe, modhanna táirgthe nó sócmhainní eile.
23 Dá bhrí sin, d’fhéadfadh sé nach mbeadh i gceist le haistriú gnóthais ach táthcheangal líon áirithe fostaithe, gan aon sócmhainní a áireamh, mar atá sna príomhimeachtaí, agus go scaoilfear an t‑aistreoir ó aon oibleagáid teidlíochtaí tuarastail neamhíoctha a íoc, a aistrítear, gan toiliú na bhfostaithe, chuig an aistrí.
24 Maidir leis an díospóid sin, sonraíonn an chúirt a rinne an tarchur gur léir ón bhfaisnéis atá ar fáil go poiblí a bhaineann le OMV Petrom go bhfuil scairchaipiteal 2000 lei na Rómáine (RON) ag an gcuideachta sin (thart ar EUR 400), rud a fhágann nach féidir na teidlíochtaí tuarastail atá dlite do na fostaithe uile a aistrítear a chumhdach.
25 De réir na cúirte sin, i gcás den sórt sin, ní mór a mheas nár baineadh amach cuspóir Threoir 2001/23. Os a choinne sin, is ionann forálacha Airteagal 3(1) den Treoir sin agus modh chun an ráthaíocht go n‑íocfar na teidlíochtaí tuarastail neamhíoctha a bhaint d’fhostaithe.
26 Sa chomhthéacs sin, ar an gcéad dul síos, fiafraíonn an chúirt sin an féidir léi a mheas gurb ionann foráil de chineál ginearálta, amhail Airteagal 1605 den Chód Sibhialta, lena gcuirtear sannadh fiach faoi réir thoiliú an chreidiúnaí, agus an rogha dá bhforáiltear sa dara fomhír d’Airteagal 3(1) de Threoir 2001/23 a aistriú sa dlí náisiúnta.
27 Ar an dara dul síos, cuireann an chúirt a rinne an tarchur in iúl go gceadaítear le hAirteagal 8 den Treoir sin do na Ballstáit dlíthe, rialacháin agus forálacha riaracháin atá níos fabhraí d’fhostaithe a chur i bhfeidhm. I ndáil leis sin, luaitear ann go bhfuil Airteagal 1605 den Chód Sibhialta níos fabhraí d’fhostaí a roghnaíonn, agus é den tuairim go bhfuil an riail a leagtar síos sa chéad fhomhír d’Airteagal 3(1) den Treoir sin díobhálach dó, agra a dhéanamh in aghaidh an aistreora seachas in aghaidh an aistrí.
28 Dá bhrí sin, fiafraíonn an chúirt a rinne an tarchur, d’fhonn a áirithiú go mbeidh fostaithe in ann na teidlíochtaí tuarastail neamhíoctha ag an aistreoir roimh aistriú an ghnóthas a aisghabháil, an bhféadfaidh sí Airteagal 1605 den Chód Sibhialta a chur i bhfeidhm, rud a d’fhágfadh, in éagmais thoiliú an chreidiúnaí, eadhon an fostaí, maidir le sannadh an fhéich a bhaineann leis na teidlíochtaí tuarastail sin, nach measfaí go bhfuil an t‑aistreoir scaoilte ón oibleagáid iad a íoc.
29 De réir na cúirte sin, d’fhéadfaí glacadh le féidearthacht den sórt sin, sa chéad áit, i gcás ina bhféadfaí an rogha atá ag na Ballstáit an dara fomhír d’Airteagal 3(1) de Threoir 2001/23 a chur chun feidhme a thrasuí sa dlí náisiúnta trí bhíthin forálacha de chineál ginearálta, amhail forálacha an Chóid Shibhialta, agus ní hamháin trí bhíthin forálacha speisialta ina luaitear go sainráite go bhfuil sé beartaithe acu an Treoir sin a thrasuí.
30 Dá measfaí nach féidir an rogha sin a chur chun feidhme le foráil de chineál ginearálta, thiocfadh an cheist chun cinn, sa dara háit, an gceadaítear le hAirteagal 8 den Treoir sin do chúirteanna náisiúnta foráil den sórt sin de chineál ginearálta a chur i bhfeidhm mar riail atá níos fabhraí d’fhostaithe ná an fhoráil a leagtar síos sa chéad fhomhír d’Airteagal 3(1) den Treoir sin.
31 Sna himthosca sin, chinn Curtea de Apel Constanţa (an Cúirt Achomhairc, Constanţa) bac a chur ar na himeachtaí agus na ceisteanna seo a leanas a tharchur chuig an gCúirt Bhreithiúnais i gcomhair réamhrialú:
‘(1) An gcaithfear Airteagal 3(1) de Threoir 2001/23/CE a léiriú ar chaoi:
(a) go gcuirtear cosc leis ar riail ghinearálta den dlí náisiúnta a chur i bhfeidhm lena gcuirtear aistriú oibleagáide idir beirt fhéichiúnaithe faoi réir thoiliú an chreidiúnaí, i gcás aistriú a rialaítear leis an Treoir sin, maidir le hoibleagáidí an aistreora a eascraíonn as conradh fostaíochta nó caidreamh fostaíochta a bhí ann ar dháta an aistrithe, a aistrítear chuig an aistrí?
(b) inar féidir a mheas go bhfuil an eisceacht dá bhforáiltear sa dara fomhír den mhír sin bunaithe le riail ghinearálta den dlí náisiúnta arna glacadh tar éis an dlí lena dtrasuitear an Treoir – riail ghinearálta lena gcuirtear aistriú oibleagáide idir beirt fhéichiúnaithe faoi réir chomhaontú an chreidiúnaí – nó an gá go mbunófaí an eisceacht sin trí fhoráil speisialta dlí?
(2) Má thugtar freagra diúltach ar an gcéad dá cheist, an féidir Airteagal 8 de Threoir 2001/23/CE a léiriú sa chaoi go gceadaítear do Stáit (lena n‑áirítear cúirteanna) riail ghinearálta a chur i bhfeidhm lena gcuirtear aistriú na n‑oibleagáidí a bhaineann le teidlíochtaí tuarastail a thagann chun cinn roimh an aistriú, ón aistreoir chuig an aistrí, faoi réir thoiliú an fhostaí is creidiúnaí, mar riail níos fabhraí ná an chéad fhomhír d’Airteagal 3(1) de Threoir 2001/23/CE, arna trasuí le dlí náisiúnta sonrach?’
Na ceisteanna a tharchuirtear le haghaidh réamhrialú
An chéad cheist
32 Lena céad cheist, fiafraíonn an chúirt a rinne an tarchur, go bunúsach, an gá Airteagal 3(1) de Threoir 2001/23 a léiriú sa chaoi go gcuirtear cosc leis ar fhoráil náisiúnta a chur i bhfeidhm, i gcomhthéacs aistriú gnóthais, de réir bhrí na Treorach sin, agus maidir le híocaíocht na dteidlíochtaí tuarastail neamhíoctha ag an aistreoir, lena gcuirtear sannadh oibleagáide idir beirt fhéichiúnaithe faoi réir chomhaontú an chreidiúnaí, agus mar thoradh air sin go bhfuil aistriú oibleagáidí an aistreora a bhaineann le híocaíocht na dteidlíochtaí tuarastail sin faoi réir thoiliú an fhostaí lena mbaineann agus an bhfuil aon tionchar ag an bhfíoras go bhfuil an fhoráil náisiúnta sin de chineál ginearálta nó de chineál speisialta ina leith sin.
33 Ba cheart a mheabhrú go bhforáiltear leis an gcéad fhomhír d’Airteagal 3(1) go bhfuil cearta agus oibleagáidí an aistreora a eascraíonn as conradh fostaíochta nó as caidreamh fostaíochta atá ann cheana ar dháta aistrithe gnóthais, mar gheall ar an aistriú sin, le haistriú chuig an aistrí.
34 Ina theannta sin, foráiltear leis an dara fomhír d’Airteagal 3(1) go bhféadfaidh na Ballstáit foráil a dhéanamh go mbeidh an t‑aistreoir agus an t‑aistrí, tar éis dháta aistrithe an ghnóthais, faoi dhliteanas i gcomhpháirt agus go leithleach i leith oibleagáidí a bhí dlite roimh dháta an aistrithe mar thoradh ar chonradh fostaíochta nó ar chaidreamh fostaíochta a bhí ann ar dháta an aistrithe.
35 Ar dtús, ba cheart a thabhairt faoi deara gur léir ón iarraidh ar réamhrialú gur thrasuigh reachtas na Rómáine an chéad fhomhír d’Airteagal 3(1) de Threoir 2001/23 in Airteagal 5(1) de Dhlí Uimh. 67/2006 agus in Airteagal 173(2) den Chód Saothair araon, ach nár chuir sé chun feidhme, sna forálacha náisiúnta sin, an rogha dá bhforáiltear sa dara fomhír d’Airteagal 3(1) den Treoir sin.
36 É sin ráite, fiafraíonn an chúirt a rinne an tarchur an féidir léi a mheas gur cuireadh an rogha sin chun feidhme trí bhíthin foráil náisiúnta de chineál ginearálta, amhail Airteagal 1605 den Chód Sibhialta, lena gcuirtear sannadh fiachais faoi réir thoiliú an chreidiúnaí. I ndáil le sin, tá sí den tuairim, i gcomhthéacs an aistrithe atá i gceist, gur cheart a mheas nár aistríodh an oibleagáid na teidlíochtaí tuarastail atá dlite ag an aistreoir a íoc leis an bhfostaí lena mbaineann roimh dháta an aistrithe sin, in éagmais thoiliú an fhostaí sin, chuig an aistrí.
37 I ndáil leis sin, sa chéad áit, ba cheart a mheabhrú, i mír 11 de bhreithiúnas an 5 Bealtaine 1988, Berg agus Busschers (144/87 agus 145/87, EU:C:1988:236), gur chinn an Chúirt, maidir le hAirteagal 3(1) de Threoir 77/187, a bhí coibhéiseach go bunúsach le hAirteagal 3(1) de Threoir 2001/23, gurb é atá i gceist le haistriú gnóthais oibleagáidí an fhostóra a eascraíonn as an gconradh fostaíochta nó as an gcaidreamh fostaíochta a aistriú go huathoibríoch, ón aistreoir chuig an aistrí, ar an gcoinníoll go bhfuil na Ballstáit in ann, áfach, foráil a dhéanamh maidir le dliteanas comhpháirteach agus leithleach an aistreora agus an aistrí tar éis an aistrithe. Thuig an Chúirt as sin, mura mbaineann na Ballstáit úsáid as an rogha sin, go scaoiltear an t‑aistreoir óna oibleagáidí mar fhostóir díreach mar gheall ar an aistriú agus nach bhfuil an éifeacht dhlíthiúil sin faoi réir chomhaontú na bhfostaithe lena mbaineann.
38 I mír 12 den bhreithiúnas sin, chinn an Chúirt go raibh léiriú den sórt sin comhsheasmhach leis an gcuspóir a shaothraítear le Treoir 77/187, is é sin a áirithiú go gcosnófar cearta fostaithe i gcás athrú úinéara gnóthais, trí chead a thabhairt dóibh fanacht i seirbhís an fhostóra nua faoi na coinníollacha céanna a comhaontaíodh leis an aistreoir.
39 Ina theannta sin, i mír 13 den bhreithiúnas sin, thug sí faoi deara, trí fhoráil a dhéanamh d’aistriú ex lege den sórt sin ar na hoibleagáidí a eascraíonn as an gconradh fostaíochta, gur thug an Treoir sin neamhaird ar an bprionsabal — ar a bhfuil na hiarratasóirí sna príomhimeachtaí ag brath sa chás as ar eascair an breithiúnas sin — nach féidir féichiúnaí a athrú ach amháin le toiliú an chreidiúnaí. Chinn sí freisin, tríd an rogha a thabhairt do na Ballstáit foráil a dhéanamh do dhliteanas comhpháirteach agus leithleach an aistreora agus an aistrí tar éis an aistrithe, gur chuir an dara fomhír d’Airteagal 3(1) den Treoir sin ar a gcumas an riail maidir le haistriú uathoibríoch na n‑oibleagáidí a eascraíonn as an gconradh fostaíochta a réiteach le prionsabail a gcóras dlí náisiúnta.
40 Dá bhrí sin, chinn an Chúirt nach mór Airteagal 3(1) de Threoir 77/187 a léiriú sa chaoi, tar éis dháta aistrithe gnóthais, go scaoiltear an t‑aistreoir óna oibleagáidí a eascraíonn as an gconradh fostaíochta nó as an gcaidreamh fostaíochta mar gheall ar an aistriú amháin, fiú mura dtoilíonn na fostaithe atá fostaithe sa ghnóthas leis sin nó má chuireann siad ina choinne, ar an gcoinníoll go bhfuil na Ballstáit in ann foráil a dhéanamh maidir le dliteanas comhpháirteach agus leithleach an aistreora agus an aistrí tar éis dháta an aistrithe (breithiúnas an 5 Bealtaine 1988, Berg agus Busschers, 144/87 agus 145/87, EU:C:1988:236, mír 14).
41 Mar is léir ó mhír 35 den bhreithiúnas seo, níor chuir reachtas na Rómáine an rogha sin chun feidhme, sna forálacha náisiúnta dá dtagraítear sa mhír sin, chun foráil a dhéanamh do dhliteanas comhpháirteach agus leithleach an aistreora agus an aistrí, de bhun an dara fomhír d’Airteagal 3(1) de Threoir 2001/23.
42 Ar an dara dul síos, ba cheart a mheabhrú gur chinn an Chúirt freisin nach féidir cur chun feidhme na gceart a thugtar d’fhostaithe le Treoir 2001/23, go háirithe le hAirteagal 3(1) di, a chur faoi réir thoiliú an aistreora nó an aistrí nó ionadaithe na bhfostaithe nó na bhfostaithe iad féin, ar an gcoinníoll go bhfuil na fostaithe sin in ann cinneadh a dhéanamh gan leanúint den chaidreamh fostaíochta leis an úinéara gnóthais nua tar éis an aistrithe sin, agus ar an gcoinníoll sin amháin (féach, chuige sin agus de réir analaí, breithiúnais an 25 Iúil 1991, d’ Urso agus páirtithe eile, C‑362/89, EU:C:1991:326, mír 11; an 24 Eanáir 2002, Temco, C‑51/00, EU:C:2002:48, míreanna 35 agus 36, agus an 26 Bealtaine 2005, Celtec, C‑478/03, EU:C:2005:321, mír 37).
43 I ndáil leis sin, ba cheart a thabhairt faoi deara nach ndealraíonn sé go bhfuil an forchoimeádas deireanach sin ábhartha i gcomhthéacs an cháis sna príomhimeachtaí. De réir na faisnéise a eascraíonn as an iarraidh ar réamhrialú agus ar faoin gcúirt a rinne an tarchur atá sé, i gcás inarb iomchuí, a dheimhniú, sa chás seo, nach ndíospóideann an fostaí lena mbaineann leanúint dá chaidreamh fostaíochta leis an aistrí, ach díreach an fíoras go mbeadh an t‑aistreoir, tar éis an aistrithe atá i gceist, scaoilte ó na hoibleagáidí a bhaineann le híoc na teidlíochtaí tuarastail a chomhfhreagraíonn don obair a rinne an fostaí sin don aistreoir sin.
44 Sa tríú háit agus faoi dheireadh, leanann sé ón gcásdlí go gcuimsíonn an t‑aistriú dá bhforáiltear in Airteagal 3(1) de Threoir 2001/23 cearta uile na bhfostaithe, a mhéid nach dtagann siad faoi cheann de na heisceachtaí ar chur i bhfeidhm na forála sin dá bhforáiltear in Airteagal 3(4) den Treoir sin (féach, chuige sin, ordú an 28 Eanáir 2015, Gimnasio Deportivo San Andrés, C‑688/13, EU:C:2015:46, mír 52 agus an cásdlí dá dtagraítear), is cuma ar tháinig na cearta sin chun cinn tar éis aistriú an ghnóthais nó roimhe sin (féach, chuige sin agus de réir analaí, breithiúnas an 7 Feabhra 1985, Abels, 135/83, EU:C:1985:55, míreanna 37 agus 38).
45 Shonraigh an Chúirt freisin, a mhéid a údaraítear leis an dara fomhír d’Airteagal 3(1) den Treoir sin do na Ballstáit foráil a dhéanamh go mbeidh an t‑aistreoir agus an t‑aistrí, ‘tar éis dháta an aistrithe’, faoi dhliteanas i gcomhpháirt agus go leithleach i leith oibleagáidí a bhí dlite roimh dháta an aistrithe de bhun conradh fostaíochta nó caidreamh fostaíochta a bhí ann ar dháta an aistrithe, is é an t‑aistrí, sa chéad áit, atá freagrach as na hualaí a eascraíonn as cearta fostaithe atá ann tráth an aistrithe a chomhlíonadh (féach, chuige sin agus de réir analaí, breithiúnas an 7 Feabhra 1985, Abels, 135/83, EU:C:1985:55, mír 36).
46 Dá bhrí sin, agus ag féachaint don chásdlí dá dtagraítear i míreanna 39 agus 44 den bhreithiúnas seo freisin, is gá diúltú d’ábharthacht prionsabail, maidir le léiriú Airteagal 3(1) de Threoir 2001/23, amhail an prionsabal dá gcomhfhreagraíonn an riail a leagtar amach in Airteagal 1605 den Chód Sibhialta, ar dá réir nach bhféadfaidh féichiúnaí a fhiacha a aistriú chuig tríú páirtí gan comhaontú a chreidiúnaithe, lena n‑áirítear maidir le haistriú na hoibleagáide teidlíochtaí tuarastail atá dlite ag an aistreoir don fhostaí lena mbaineann roimh dháta aistrithe an ghnóthais, faoi réir rogha na mBallstát, áfach, dá dtagraítear sa dara fomhír d’Airteagal 3(1), foráil a dhéanamh maidir le dliteanas comhpháirteach agus leithleach an aistreora agus an aistrí tar éis an dáta sin.
47 Go sonrach, maidir leis an dara fomhír sin, ní mór a chur in iúl nach bhféachann sé le maolú ar an mbunphrionsabal, a leagtar síos sa chéad fhomhír d’Airteagal 3(1), go mbeidh an t‑aistrí, mar gheall ar an aistriú, faoi dhliteanas i leith na n‑oibleagáidí a eascraíonn as an gconradh fostaíochta, ach go bhféadfar cur i bhfeidhm an bhunphrionsabail sin a fhorlíonadh trí fhoráil a dhéanamh go bhféadfaidh an dliteanas sin leanúint de bheith ag fanacht, sa bhreis ar an aistrí, leis an aistreoir.
48 Dá bhrí sin, ní chuirtear cosc leis an dara fomhír d’Airteagal 3(1) de Threoir 2001/23 ar an mbunphrionsabal sin, faoina n‑aistrítear na hoibleagáidí a eascraíonn as an gconradh fostaíochta go huathoibríoch chuig an aistrí, fiú mura dtoilíonn na fostaithe atá fostaithe sa ghnóthas leis sin nó má chuireann siad ina choinne, mar is léir ón gcásdlí dá dtagraítear i mír 40 den bhreithiúnas seo.
49 Dá bhrí sin, ní féidir an fhoráil sin a chur chun feidhme in aon chás trí bhíthin riail arb é is éifeacht di aistriú na n‑oibleagáidí sin a chur faoi réir thoiliú an fhostaí, beag beann ar an bhfíoras, a léirítear sa chéad cheist, go leagtar síos riail den sórt sin le foráil náisiúnta de chineál ginearálta nó speisialta.
50 Ba cheart a thabhairt faoi deara freisin nach féidir an léiriú sin ar Airteagal 3(1) de Threoir 2001/23 a thabhairt faoi cheist leis an bhfianaise a chuir an chúirt a rinne an tarchur ar aghaidh ina hiarraidh ar réamhrialú, mar a mheabhraítear i mír 21 den bhreithiúnas seo.
51 Sa chéad áit, sonraíonn an chúirt sin, ó bhreithiúnas an 5 Bealtaine 1988, Berg agus Busschers (144/87 agus 145/87, EU:C:1988:236), go bhfuil athrú tagtha ar chásdlí na Cúirte maidir leis an gcoincheap ‘aistriú gnóthais’, mar a léirítear le breithiúnas an 11 Márta 1997, Süzen (C‑13/95, EU:C:1997:141).
52 I ndáil leis sin, is leor a thabhairt faoi deara gur prionsabal seanbhunaithe i gcásdlí na Cúirte Breithiúnais tar éis bhreithiúnas an 5 Bealtaine 1988, Berg agus Busschers (144/87 agus 145/87, EU:C:1988:236), mar a léirítear, go háirithe, leis an gcásdlí dá dtagraítear i mír 42 den bhreithiúnas seo, é an prionsabal go n‑aistrítear go huathoibríoch chuig an aistrí na cearta agus na hoibleagáidí a eascraíonn as conarthaí fostaíochta atá ann ar dháta aistrithe gnóthais, gan éifeacht den sórt sin a bheith faoi réir toiliú na bhfostaithe, go háirithe.
53 In aon chás, mar is léir ó aithris 8 de Threoir 2001/23, cé go raibh gá le soiléiriú ar an gcoincheap ‘aistriú’ mar gheall ar dheimhneacht dhlíthiúil agus trédhearcacht i bhfianaise chásdlí na Cúirte, ní raibh de thoradh ag an soiléiriú sin, atá le fáil in Airteagal 1(1)(b) den Treoir sin, raon feidhme Threoir 77/187 a athrú ná, dá bhrí sin, raon feidhme Threoir 2001/23.
54 Sa dara háit, sonraíonn an chúirt a rinne an tarchur go léiríonn forbairtí i gcaidrimh fostaíochta go bhféadfaí brath ar fhorálacha Threoir 2001/23 ar bhealach atá contrártha leis an gcuspóir a shaothraítear leis an Treoir sin, eadhon cosaint a gceart a bhaint d’fhostaithe i gcomhthéacs aistriú gnóthais, agus gan an chosaint sin a ráthú.
55 I ndáil leis sin, ba cheart a mheabhrú, mar a tugadh faoi deara i mír 38 den bhreithiúnas seo, mar is léir ó Airteagal 3 den Treoir sin, arna léamh i bhfianaise aithris 3 di, go bhféachann sé le fostaithe a chosaint trína áirithiú go gcosnófar a gcearta i gcás athrú úinéara gnóthais, trí chead a thabhairt dóibh fanacht i seirbhís an fhostóra nua faoi na coinníollacha céanna a comhaontaíodh leis an aistreoir. Is é is cuspóir don Treoir sin a áirithiú, a mhéid is féidir, go leanfaidh na conarthaí fostaíochta nó caidrimh fostaíochta de bheith gan athrú leis an aistrí, ionas nach gcuirfear na fostaithe lena mbaineann i staid is lú fabhar mar thoradh ar aistriú gnóthais amháin (breithiúnas an 9 Meán Fómhair 2020, TMD Friction agus TMD FrictionEsCo, C‑674/18 agus C‑675/18, EU:C:2020:682, mír 48 agus an cásdlí dá dtagraítear). É sin ráite, mar is léir ó mhíreanna 37 agus 38 den bhreithiúnas seo, tá sé d’éifeacht freisin ag aistriú den sórt sin, faoi réir fheidhmiú na rogha dá bhforáiltear sa dara fomhír d’Airteagal 3(1), nach bhfuil ábhartha sa chás seo, an t‑aistreoir a scaoileadh óna oibleagáidí mar fhostóir.
56 Mar a chuireann an Coimisiún Eorpach in iúl ina bharúlacha i scríbhinn, ní mór a mheabhrú nach féidir cur i bhfeidhm reachtaíocht an Aontais a leathnú chun idirbhearta a dhéantar chun buntáistí dá bhforáiltear le dlí an Aontais a fháil go calaoiseach nó go héagórach a chumhdach. Is léir ó chásdlí socair nach mór, ar taobh amháin, sraith d’imthosca oibiachtúla a bheith ann de bharr cruthúnas ar chleachtas mí-úsáideach, agus, d’ainneoin urramú foirmiúil na gcoinníollacha a leagtar síos le rialacha an Aontais is infheidhme, nár baineadh amach an cuspóir a shaothraítear leis na rialacha sin agus, ar an taobh eile, gur gné shuibiachtúil í arb é atá ann an rún tairbhe a bhaint as rialacha an Aontais sin trí na coinníollacha is gá chun é a fháil a chruthú go saorga (breithiúnas an 30 Deireadh Fómhair 2025, Mercedes-Benz Bank agus VolkswagenBank, C‑143/23, EU:C:2025:837, míreanna 79 agus 81, agus an cásdlí dá dtagraítear).
57 I ndeireadh na dála, is faoin gcúirt náisiúnta atá sé a chinneadh an bhfuil cleachtas mí-úsáideach sa díospóid atá os a comhair, agus fíorais agus imthosca uile an cháis á gcur san áireamh, lena n‑áirítear iad siúd tar éis an idirbhirt a líomhnaítear a bheith mí-úsáideach (breithiúnas an 30 Deireadh Fómhair 2025, Mercedes-Benz Bank agus VolkswagenBank, C‑143/23, EU:C:2025:837, mír 82 agus an cásdlí dá dtagraítear).
58 I bhfianaise na mbreithnithe go léir roimhe seo, is é an freagra ar an gcéad cheist ná nach mór Airteagal 3(1) de Threoir 2001/23 a léiriú sa chaoi go gcuirtear cosc leis ar fhoráil náisiúnta a chur i bhfeidhm, i gcomhthéacs aistriú gnóthais, de réir bhrí na Treorach sin, agus maidir le híocaíocht teidlíochtaí tuarastail neamhíoctha ag an aistreoir, lena gcuirtear sannadh oibleagáide idir beirt fhéichiúnaithe faoi réir chomhaontú an chreidiúnaí, agus mar thoradh air sin go bhfuil aistriú oibleagáidí an aistreora a bhaineann le híocaíocht teidlíochtaí tuarastail sin chuig an aistrí faoi réir thoiliú an fhostaí lena mbaineann, beag beann ar chineál ginearálta nó de chineál speisialta na forála náisiúnta sin.
An dara ceist
59 Lena dara ceist, fiafraíonn an chúirt a rinne an tarchur, go bunúsach, an gá Airteagal 8 de Threoir 2001/23 a léiriú sa chaoi go gceadaítear foráil náisiúnta a chur i bhfeidhm, i gcomhthéacs aistriú gnóthais, de réir bhrí na Treorach sin, agus maidir le híocaíocht teidlíochtaí tuarastail neamhíoctha ag an aistreoir, lena gcuirtear sannadh oibleagáide idir beirt fhéichiúnaithe faoi réir chomhaontú an chreidiúnaí, agus mar thoradh air sin go bhfuil aistriú oibleagáidí an aistreora a bhaineann le híocaíocht na dteidlíochtaí tuarastail sin chuig an aistrí faoi réir thoiliú an fhostaí lena mbaineann.
60 Foráiltear in Airteagal 8 nach gcuireann an Treoir isteach ar cheart na mBallstát dlíthe, rialacháin agus forálacha riaracháin níos fabhraí do na fostaithe a chur i bhfeidhm nó a thabhairt isteach, ná comhaontuithe comhchoiteanna nó comhaontuithe a dhéantar idir comhpháirtithe sóisialta atá níos fabhraí do na hoibrithe a spreagadh ná a cheadú.
61 I ndáil leis sin, ní mór a mheabhrú nach bhféachtar leis an Treoir sin ach comhchuibhiú páirteach a dhéanamh ar an réimse a rialaítear léi, tríd an gcosaint a ráthaítear d’fhostaithe go neamhspleách le dlí na mBallstát éagsúil a leathnú chuig cás aistrithe gnóthais freisin. Ní fhéachtar léi le leibhéal aonfhoirmeach cosanta a bhunú ar fud an Aontais Eorpaigh ar bhonn critéir choiteanna (breithiúnas an 11 Meán Fómhair 2014, Österreichischer Gewerkschaftsbund, C‑328/13, EU:C:2014:2197, mír 22 agus an cásdlí dá dtagraítear).
62 Mar sin féin, ní féidir le cur i bhfeidhm forálacha náisiúnta atá níos fabhraí d’fhostaithe, de bhun Airteagal 8 de Threoir 2001/23, an bonn a bhaint den chosaint íosta a ráthaítear d’fhostaithe leis an Treoir sin agus, go háirithe, le hAirteagal 3(1) di, ar dá réir a aistrítear go huathoibríoch na cearta agus na hoibleagáidí a eascraíonn as an gconradh fostaíochta chuig an aistrí (féach, chuige sin agus de réir analaí, breithiúnais an 19 Samhain 2019, TSN agus AKT, C‑609/17 agus C‑610/17, EU:C:2019:981, mír 35 agus an cásdlí dá dtagraítear, agus an 2 Márta 2023, MÁV-START, C‑477/21, EU:C:2023:140, mír 51).
63 Ní féidir le cur i bhfeidhm forálacha náisiúnta den sórt sin an bonn a bhaint de chomhleanúnachas na Treorach sin ná de na cuspóirí a shaothraítear léi ach oiread (féach, chuige sin agus de réir analaí, breithiúnais an 19 Samhain 2019, TSN agus AKT, C‑609/17 agus C‑610/17, EU:C:2019:981, mír 51, agus an 12 Meitheamh 2025, Tallinna linn, C‑219/24, EU:C:2025:442, mír 48).
64 Fiú ag glacadh leis gurb ionann foráil náisiúnta lena gcuirtear sannadh oibleagáide idir beirt fhéichiúnaithe faoi réir chomhaontú an chreidiúnaí, amhail Airteagal 1605 den Chód Sibhialta, agus foráil atá níos fabhraí d’fhostaithe ná Airteagal 3(1) de Threoir 2001/23, ní mór a lua go sáródh cur i bhfeidhm forála náisiúnta den sórt sin an bunphrionsabal is bun le hAirteagal 3(1), ar dá réir a bheidh an t‑aistrí, mar gheall ar an aistriú, faoi dhliteanas uathoibríoch as na hoibleagáidí a eascraíonn as an gconradh fostaíochta, lena n‑áirítear i gcás nach dtoilíonn na fostaithe lena mbaineann leis an gcuspóir sin nó nach gcuireann siad cosc leis, mar is léir ón bhfreagra a tugadh ar an gcéad cheist. Sna himthosca sin, bhainfeadh cur i bhfeidhm forála náisiúnta den sórt sin an bonn de chomhleanúnachas na Treorach sin agus den chosaint íosta a ráthaítear d’fhostaithe léi, go háirithe le hAirteagal 3(1).
65 I bhfianaise na mbreithnithe go léir roimhe seo, is é an freagra ar an dara ceist ná nach mór Airteagal 8 de Threoir 2001/23 a léiriú sa chaoi go gcuirtear cosc leis ar fhoráil náisiúnta a chur i bhfeidhm, i gcomhthéacs aistriú gnóthais, de réir bhrí na Treorach sin, agus maidir le híocaíocht teidlíochtaí tuarastail neamhíoctha ag an aistreoir, lena gcuirtear sannadh oibleagáide idir beirt fhéichiúnaithe faoi réir chomhaontú an chreidiúnaí, agus mar thoradh air sin go bhfuil aistriú oibleagáidí an aistreora a bhaineann le híocaíocht na dteidlíochtaí tuarastail sin chuig an aistrí faoi réir thoiliú an fhostaí lena mbaineann.
Costais
66 Ós rud é, a mhéid a bhaineann sé leis na páirtithe sna príomhimeachtaí, go bhfuil na himeachtaí mar chéim sa chás os comhair na cúirte a rinne an tarchur, baineann ceist na gcostas leis an gcúirt sin. Níl na costais a tabhaíodh trí bharúlacha a chur faoi bhráid na Cúirte, seachas costais na bpáirtithe sin, inghnóthaithe.
Ar na forais sin, rialaíonn AN CHÚIRT (an Deichiú Dlísheomra) mar seo a leanas:
1. Maidir le hAirteagal 3(1) de Threoir 2001/23/CE ón gComhairle an 12 Márta 2001 maidir le comhfhogasú a dhéanamh ar dhlíthe na mBallstát a bhaineann le cearta na bhfostaithe a choimirciú i gcás aistriú gnóthas nó gnólachtaí nó codanna de ghnóthais nó de ghnólachtaí (IO 2001 L 82, lch. 16).
ní mór léiriú a dhéanamh mar seo a leanas:
cuirtear cosc leis ar fhoráil náisiúnta a chur i bhfeidhm, i gcomhthéacs aistriú gnóthais, de réir bhrí na Treorach sin, agus maidir le híocaíocht teidlíochtaí tuarastail neamhíoctha ag an aistreoir, lena gcuirtear sannadh oibleagáide idir beirt fhéichiúnaithe faoi réir chomhaontú an chreidiúnaí, agus mar thoradh air sin go bhfuil aistriú oibleagáidí an aistreora a bhaineann le híocaíocht na dteidlíochtaí tuarastail sin chuig an aistrí faoi réir thoiliú an fhostaí lena mbaineann, beag beann ar chineál ginearálta nó de chineál speisialta na forála náisiúnta sin.
2. Maidir le hAirteagal 8 de Threoir 2001/23,
ní mór léiriú a dhéanamh mar seo a leanas:
cuirtear cosc leis ar fhoráil náisiúnta a chur i bhfeidhm, i gcomhthéacs aistriú gnóthais, de réir bhrí na Treorach sin, agus maidir le híocaíocht teidlíochtaí tuarastail neamhíoctha ag an aistreoir, lena gcuirtear sannadh oibleagáide idir beirt fhéichiúnaithe faoi réir chomhaontú an chreidiúnaí, agus mar thoradh air sin go bhfuil aistriú oibleagáidí an aistreora a bhaineann le híocaíocht na dteidlíochtaí tuarastail sin chuig an aistrí faoi réir thoiliú an fhostaí lena mbaineann.
Sínithe
* Teanga an cháis: an Rómáinis.