Eagrán sealadach
TUAIRIM AN ABHCÓIDE GHINEARÁLTA
BIONDI
arna tabhairt an 8 Deireadh Fómhair 2026 (1)
Cás C‑390/25
HUS-yhtymä
páirtithe leasmhara:
Cloudia OY,
SC Software OY
(Iarraidh ar réamhrialú ón Korkein hallinto-oikeus (an Chúirt Riaracháin Uachtarach, an Fhionlainn))
(Tarchur chun réamhrialú – Soláthar poiblí – Treoir 2014/24/AE – Airteagal 30 – Idirphlé iomaíoch – Airteagal 67(5) – Ualú coibhneasta na gcritéar dámhachtana – Léiriú ualaithe de réir raonta – Soiléiriú ar an ualú coibhneasta sa chuireadh chun tairiscintí deiridh a chur isteach – Úsáid raonta san fhógra conartha nach léir ord deiridh na gcritéar dámhachtana uathu)
I. Réamhrá
1. Baineann an iarraidh ar réamhrialú seo ón Korkein hallinto-oikeus (an Chúirt Riaracháin Uachtarach, an Fhionlainn), arb í an chúirt a rinne an tarchur, le dhá ghné ábhartha den soláthar poiblí.
2. Ar thaobh amháin, tugtar deis léi don Chúirt forálacha Threoir 2014/24/AE (2) lena rialaítear an t‑idirphlé iomaíoch a léiriú den chéad uair, nós imeachta dámhachtana ilchéimneach ar leith a úsáidtear de ghnáth le haghaidh conarthaí a bhfuil castacht theicniúil, dhlíthiúil nó airgeadais ag baint leo. Ar an dara dul síos, cuirtear ar chumas na Cúirte léi freisin soiléiriú a thabhairt ar an oibleagáid a fhorchuirtear le hAirteagal 67(5) den Treoir sin ar údaráis chonarthacha an t‑ualú coibhneasta a thugtar do gach ceann de na critéir dhámhachtana conartha a léiriú, go háirithe i gcás ina ndéantar an léiriú sin trí raonta a úsáid. Tá an idirghníomhaíocht idir an dá ghné sin de na rialacha maidir le soláthairtí a leagtar síos le Treoir 2014/24 i gcroílár an cháis seo.
3. Rinneadh an iarraidh ar réamhrialú in imeachtaí a bhaineann le nós imeachta um dhámhachtain conartha arna eagrú i bhfoirm idirphlé iomaíoch ag Cuibhreannas Bhardais Cheantair Sláinte Heilsincí agus Uusimaa (HUS-yhtymä ina dhiaidh sin), an t‑údarás conarthach. Ba é cuspóir an chonartha atá i gceist córas cuimsitheach bainistíochta soláthair agus seirbhísí saineolaithe gaolmhara a fháil.
4. Ba léir ón bhfógra conartha go ndámhfadh an t‑údarás conarthach an conradh ar bhonn chritéar na tairisceana is buntáistí go heacnamaíoch. Luadh sa tuairisc ar an nós imeachta atá i gceangal leis an bhfógra conartha freisin go gcuirfí na tairiscintí i gcomparáid ar an mbealach a thuairiscítear sa chuireadh chun na tairiscintí deiridh a chur isteach. Luadh sa doiciméad céanna freisin gurb iad seo a leanas na critéir dhámhachtana tháscacha agus na raonta ualaithe comhfhreagracha:
– Praghas 30-70 %
– Saintréithe feidhmiúla: 15-35 %
– Inniúlacht an ghrúpa saineolaithe: 15-35 %.
5. Ag deireadh an idirphlé a rinneadh le ceathrar iarrthóirí roghnaithe as measc na n‑iarrthóirí a chuir isteach iarrataí ar rannpháirtíocht, sheol HUS-yhtymä cuireadh chuig na hiarrthóirí sin a dtairiscint deiridh a chur isteach. Ba léir ón gcuireadh sin gur mar seo a leanas a bhí ualú deiridh an chóimheasa idir praghas agus cáilíocht agus na critéir dhámhachtana:
‘ – Praghas 30 %
– Cáilíocht 70 %
– – Feidhmiúlachtaí breise (35 phointe)
– – Agallamh (35 phointe)’.
6. Le cinneadh dámhachtana agus cinneadh leasaitheach ina dhiaidh sin, dhámh HUS-yhtymä an conradh ar SC Software Oy agus d’ainmnigh sé Cloudia Oy mar sholáthróir cúltaca.
7. Thug Cloudia Oy caingean i gcoinne an chinnidh dámhachtana conartha os comhair na cúirte céadchéime, ag maíomh go raibh an raon idir 30 % agus 70 % d’ualú na gcritéar dámhachtana, arna leagan síos ag an údarás conarthach san fhógra conartha, i bhfianaise a mhéide, míchuí. Sheas an chúirt chéadchéime leis an gcaingean agus chuir sí an dámhachtain ar neamhní. Rinne HUS-yhtymä achomharc i gcoinne an bhreithiúnais sin os comhair na cúirte a rinne an tarchur.
8. I gcomhthéacs an cháis atá ar feitheamh os a comhair, tá dhá amhras ar an gcúirt a rinne an tarchur maidir le léiriú. Chinn sí, dá bhrí sin, bac a chur ar na himeachtaí agus an dá cheist seo a leanas a tharchur chuig an gCúirt Bhreithiúnais le haghaidh réamhrialú:
‘1. Más rud é, i gcomhthéacs idirphlé iomaíoch de réir bhrí Airteagal 30 de Threoir 2014/24, go gceanglaítear ar an údarás conarthach meastóireacht a dhéanamh ar na tairiscintí a cuireadh isteach ar bhonn na gcritéar dámhachtana agus na hualuithe a bhaineann leo arna mbunú san fhógra conartha nó sa doiciméad tuairisciúil, nó go bhfuil sé i dteideal, sa chuireadh [chun tairiscintí deiridh a chur isteach] atá le seoladh chuig tairgeoirí tar éis na gcaibidlíochtaí, ualú coibhneasta na gcritéar dámhachtana a leagtar amach san fhógra conartha nó sa tuairisc chonartha a shonrú, go háirithe i gcás inar tugadh na hualuithe sin san sa tuairisc conartha nó san fhógra conartha i bhfoirm raoin de réir bhrí na chéad fhomhíre d’Airteagal 67(5) den Treoir sin?
2. I gcás ina bhfuil an t‑údarás conarthach i dteideal, i gcomhthéacs idirphlé iomaíoch, agus an cuireadh chun [tairiscintí deiridh a chur isteach] á dhréachtú aige, na hualuithe a leagtar amach san fhógra conartha nó sa doiciméad tuairisciúil a shonrú i bhfoirm raoin de réir bhrí an dara fomhír d’Airteagal 67(5) [de Threoir 2014/24], an féidir an raon ualaithe a úsáideann an t‑údarás conarthach sa chás seo ag céim an fhógra conartha a mheas mar raon atá comhoiriúnach leis an dara fomhír d’Airteagal 67(5) de Threoir 2014/24/AE, i bhfianaise go háirithe, ar thaobh amháin, nach léirítear, leis an raon a úsáideann an t‑údarás conarthach, ord deiridh tábhachta na gcritéar dámhachtana a bhaineann le praghas agus cáilíocht, agus, ar an taobh eile, go bhfuil na critéir dhámhachtana agus na hualuithe coibhneasta mar a leagtar amach [sa chuireadh chun tairiscintí deiridh a chur isteach] laistigh den raon a cuireadh in iúl ag céim an fhógra conartha?’
II. Anailís
9. Baineann an dá cheist a tharchuir an chúirt a rinne an tarchur le haghaidh réamhrialú le cur i bhfeidhm Airteagal 67(5) de Threoir 2014/24 i gcomhthéacs sonrach an nós imeachta um idirphlé iomaíoch dá dtagraítear in Airteagal 30 den Treoir sin.
10. Mar réamhphointe, ba cheart a mheabhrú go leagtar síos in Airteagal 67 de Threoir 2014/24 na rialacha ginearálta maidir leis na critéir dhámhachtana conartha. Baineann mír 5 den Airteagal sin leis an oibleagáid atá ar údaráis chonarthacha ualú coibhneasta na gcritéar sin a léiriú. Tá mír 5 roinnte ina trí fhomhír.
11. Foráiltear sa chéad fhomhír go ‘[s]onróidh an t‑údarás conarthach sna doiciméid soláthair an t‑ualú coibhneasta a thugann sé do gach ceann de na critéir dhámhachtana conartha a roghnaíodh chun an tairiscint is buntáistí go heacnamaíoch a chinneadh, ach amháin i gcás ina sainaithnítear é sin ar bhonn praghais amháin’.
[Aistriúchán neamhoifigiúil]
12. Foráiltear leis an dara fomhír go ‘[bhf]éadfar na hualuithe sin a chur in iúl mar raon a bhfuil leathadh uasta iomchuí i gceist leis.’
[Aistriúchán neamhoifigiúil]
13. Foráiltear leis an tríú fomhír ‘[i] gcás nach féidir ualú coibhneasta a dhéanamh ar chúiseanna oibiachtúla, léireoidh an t‑údarás conarthach na critéir dhámhachtana in ord laghdaitheach tábhachta’.
[Aistriúchán neamhoifigiúil]
14. Baineann an dá cheist a tharchuirtear le haghaidh réamhrialú leis an dara fomhír d’Airteagal 67(5) de Threoir 2014/24, maidir leis na raonta a úsáideann HUS-yhtymä chun an t‑ualú coibhneasta idir na critéir dhámhachtana a bhí beartaithe aige a úsáid a chur in iúl. Baineann an chéad cheist, go bunúsach, leis an bpointe ama, i gcomhthéacs an nós imeachta um idirphlé iomaíoch, ina bhféadfaidh an t‑údarás conarthach an t‑ualú coibhneasta a chuirtear in iúl san fhógra conartha a chinneadh go cinntitheach trí raonta; baineann an dara ceist, ar an taobh eile, le cineál ‘iomchuí’ an leata dá bhforáiltear sna raonta a úsáideann HUS-yhtymä sa chonradh sonrach atá i gceist.
15. Chun an dá cheist sin a tharchuirtear le haghaidh réamhrialú a fhreagairt, is iomchuí, mar réamhphointe, saintréithe bunriachtanacha an nós imeachta um idirphlé iomaíoch arna rialú le Treoir 2014/24 a leagan amach go hachomair.
A. Cúlra an nós imeachta um idirphlé iomaíoch
16. Is nós imeachta solúbtha é an t‑idirphlé iomaíoch atá ceaptha chun conarthaí an‑chasta a dhámhachtain. Tá sé úsáideach i gcás nach bhfuil údaráis chonarthacha in ann na modhanna a shainiú chun a gcuid riachtanas a shásamh nó chun measúnú a dhéanamh ar a bhfuil le tairiscint ag an margadh i dtéarmaí réiteach teicniúil, airgeadais nó dlíthiúil. (3) D’fhéadfadh sé sin a bheith amhlaidh, mar shampla, i gcás tionscadail nuálacha nó i gcás seirbhísí nó soláthairtí a bhfuil gá le hiarrachtaí oiriúnaithe nó deartha ina leith, mar atá i gcás ceannacháin chasta amhail táirgí sofaisticiúla agus seirbhísí intleachtúla, mar shampla roinnt seirbhísí comhairliúcháin. (4) Is é príomhchuspóir an nós imeachta um idirphlé iomaíoch a chumasú don údarás conarthach, trí idirphlé leis na hiarrthóirí a ligeadh isteach, na modhanna is iomchuí chun a riachtanais a shásamh a aithint agus a shainiú sula n‑iarrfar na tairiscintí deiridh.
17. Tugadh an t‑idirphlé iomaíoch isteach i ndlí an Aontais den chéad uair le Treoir 2004/18 (5) go beacht chun foráil a dhéanamh maidir le nós imeachta solúbtha trí bhealach dlíthiúil agus trédhearcach a chur ar fáil d’údaráis chonarthacha chun dul i dteagmháil leis an margadh, i gcás inar gá sin, go háirithe mar gheall ar chastacht an chonartha. Coinníodh loighic bhunaidh an nós imeachta i dTreoir 2014/24, ach cuireadh isteach i gcreat rialála nuashonraithe í.
18. Níl an nós imeachta um idirphlé iomaíoch ar fáil gan srian d’údaráis chonarthacha, ach tá sé ag brath ar choinníollacha áirithe úsáide a leagtar síos in Airteagal 26(4) de Threoir 2014/24 a chomhlíonadh. Dá bhrí sin, ní fhéadfaidh údarás conarthach an t‑idirphlé iomaíoch a úsáid ach amháin más ann do cheann amháin nó níos mó de na cásanna seo a leanas: nach féidir freastal ar a riachtanais gan réitigh atá ar fáil láithreach a ghlacadh; go bhfuil réitigh nuálacha nó deartha i gceist leis na hoibreacha, na soláthairtí nó na seirbhísí atá le soláthar; nach féidir an conradh a dhámhachtain gan caibidlíocht roimh ré mar gheall ar imthosca speisialta a bhaineann le cineál, castacht nó comhdhéanamh airgeadais agus dlíthiúil ábhar an chonartha; nó nach féidir na sonraíochtaí teicniúla a shuíomh le cruinneas leordhóthanach.
19. Rialaítear an nós imeachta um idirphlé iomaíoch le hAirteagal 30 de Threoir 2014/24 agus roinntear é go bunúsach ina cheithre chéim.
20. Is í an chéad chéim seoladh an nós imeachta, tríd an údarás conarthach fógra conartha a fhoilsiú. Leagfar amach agus sainmhíneofar riachtanais an údaráis chonarthaigh, na ceanglais agus na critéir dhámhachtana a roghnaíodh roimh ré san fhógra conartha sin, nó i ndoiciméad tuairisciúil. (6) Féadfaidh aon oibreoir eacnamaíoch a bhfuil suim aige agus a chomhlíonann na critéir roghnúcháin iarratas a chur isteach chun páirt a ghlacadh sa nós imeachta um idirphlé iomaíoch. (7)
21. Is é an dara céim an fíor-idirphlé, atá i gcroílár an nós imeachta. Ar an gcéad dul síos, seolann an t‑údarás conarthach cuirí chuig na hoibreoirí roghnaithe go comhuaineach agus i scríbhinn chun páirt a ghlacadh san idirphlé, (8) a bhfuil a n‑ábhar leagtha amach in Iarscríbhinn IX a ghabhann le Treoir 2014/24.
22. Téann an t‑údarás conarthach i mbun idirphlé ansin leis na hiarrthóirí roghnaithe chun go ndéanfaí na modhanna is oiriúnaí chun a riachtanais a shásamh a shainaithint agus a shainiú. Féadfaidh baint a bheith ag an idirphlé sin le gach gné den chonradh. Féadfar an t‑idirphlé a dhéanamh i gcéimeanna comhleanúnacha chun líon na réiteach lena mbaineann scimeáil fhorchéimnitheach a laghdú, ach in aon chás na critéir dhámhachtana a leagtar amach san fhógra conartha nó sa doiciméad tuairisciúil a chur i bhfeidhm. (9)
23. Le linn an idirphlé, áiritheoidh na húdaráis chonarthacha go gcaithfear go cothrom leis na rannpháirtithe uile, go háirithe trí mhainneachtain faisnéis a sholáthar ar bhealach idirdhealaitheach a d’fhéadfadh buntáiste a thabhairt do rannpháirtithe áirithe thar rannpháirtithe eile. (10) Le linn an idirphlé, beidh feidhm ag prionsabal na rúndachta freisin: ní nochtfaidh údaráis chonarthacha do na rannpháirtithe eile réitigh a mholtar ná aon fhaisnéis rúnda eile a chuir an t‑iarrthóir in iúl gan a thoiliú. (11) Leanfaidh an t‑idirphlé ar aghaidh go dtí go mbeidh an t‑údarás conarthach in ann an réiteach nó na réitigh atá in ann freastal ar a riachtanais a aithint. (12)
24. Sa tríú céim, a luaithe a dhearbhófar go bhfuil céim an idirphlé dúnta, seolfaidh an t‑údarás conarthach cuireadh chuig na tairgeoirí atá fágtha chun a dtairiscintí deiridh a chur isteach ar bhonn na réiteach a shainítear i gcéim an idirphlé. (13)
25. Ar deireadh, is é an ceathrú céim meastóireacht a dhéanamh ar na tairiscintí a fuarthas ar bhonn na gcritéar dámhachtana a leagtar amach san fhógra conartha nó sa doiciméad tuairisciúil (14)agus ar bhonn dhámhachtain deiridh an chonartha ina dhiaidh sin.
B. An chéad cheist a tharchuirtear le haghaidh réamhrialú
26. Lena céad cheist, fiafraíonn an chúirt a rinne an tarchur an gá Airteagal 30 agus an dara fomhír d’Airteagal 67(5) de Threoir 2014/24 a léiriú sa chaoi, i gcomhthéacs nós imeachta um idirphlé iomaíoch, go bhfuil údarás conarthach a chuir ualú coibhneasta na gcritéar dámhachtana in iúl san fhógra conartha nó sa doiciméad tuairisciúil trí raonta i dteideal a shonrú go cinntitheach go bhfuil an t‑ualú coibhneasta sin sa chuireadh chun na tairiscintí deiridh atá le seoladh chuig na rannpháirtithe a chur isteach tar éis an idirphlé a rinneadh leo.
27. Mar atá feicthe againn, ceadaítear leis an gcéad fhomhír agus leis an dara fomhír d’Airteagal 67(5) de Threoir 2014/24 ualú coibhneasta na gcritéar dámhachtana a léiriú sna doiciméid soláthair chun an tairiscint is buntáistí go heacnamaíoch a chinneadh, agus úsáid á baint as raonta a bhfuil leathadh uasta iomchuí i gceist leo.
28. Mar gheall ar chineál an idirphlé iomaíoch, tá sé an‑iomchuí raonta a úsáid sa chineál sin nós imeachta. Mar a tugadh faoi deara, glactar leis go bunúsach san idirphlé iomaíoch go n‑aithnítear leibhéal suntasach solúbthachta d’údaráis chonarthacha toisc go n‑úsáideann siad an cineál sin nós imeachta nuair nach bhfuil siad in ann na modhanna chun freastal ar a riachtanais a shainiú go beacht go fóill.
29. Sa chomhthéacs sin, leis an bhféidearthacht raonta ag a bhfuil leathadh uasta iomchuí a úsáid, gan, dá bhrí sin, na hualuithe coibhneasta a réamhchinneadh go docht, tugtar corrlach lánroghnach agus solúbthachta d’údaráis chonarthacha maidir le conas na critéir dhámhachtana conartha a chur i bhfeidhm. Tabharfaidh na raonta, i gcás inarb iomchuí, léargas beacht go leor do na rannpháirtithe ag an am céanna chun go mbeidh siad in ann eilimintí bunriachtanacha na meastóireachta as a dtiocfaidh dámhachtain an chonartha a thuiscint.
30. Maidir leis an tráth a léirítear an t‑ualú coibhneasta trí bhíthin raonta, is léir go sainráite ó Iarscríbhinn IX a ghabhann le Treoir 2014/24 agus, go háirithe, ó phointe 1(e) di, arna léamh i gcomhar leis an abairt dheireanach d’Airteagal 30(2) agus pointe 54 den Treoir sin, nach mór ualú coibhneasta na gcritéar dámhachtana a leagan amach san fhógra conartha nó, mar mhalairt air sin, sa chuireadh chun spéis a dhearbhú, sna sonraíochtaí teicniúla nó sa doiciméad tuairisciúil.
31. Thairis sin, tá sé sin comhsheasmhach le cásdlí na Cúirte ar dá réir a chiallaíonn an oibleagáid atá ar údaráis chonarthacha ‘ualú coibhneasta’ gach ceann de na critéir dhámhachtana a léiriú san fhógra conartha nó sna sonraíochtaí tairisceana nach mór na rialacha ualaithe a shainiú go soiléir ón gcéim ag a dtionscnaítear an nós imeachta dámhachtana, ionas nach féidir le húdarás conarthach, i bprionsabal, rialacha ualaithe nár chuir sé in iúl do na tairgeoirí roimhe sin a chur i bhfeidhm. (15)
32. Dá bhrí sin, is léir nach mór an t‑ualú coibhneasta i bhfoirm raonta a léiriú, i gcomhréir le prionsabail na trédhearcachta agus na córa comhionainne, ag tús an nós imeachta um idirphlé iomaíoch.
33. Mar sin féin, má chinneann an t‑údarás conarthach na raonta a úsáid, ní shonraítear i dTreoir 2014/24 an chéim den nós imeachta dámhachtana, agus go háirithe an chéim den nós imeachta casta um idirphlé iomaíoch, nach mór an t‑ualú coibhneasta sin a chinneadh go cinntitheach.
34. Sa chás seo atá ar feitheamh os comhair na cúirte a rinne an tarchur, rinneadh an cinneadh críochnaitheach sin ag deireadh an idirphlé leis na rannpháirtithe roghnaithe, sa chuireadh chun na tairiscintí deiridh a chur isteach.
35. I ndáil leis sin, is é cuspóir chéim an idirphlé na bealaí is fearr chun freastal ar riachtanais an údaráis chonarthaigh a shainaithint agus a shainiú. Sa chomhthéacs sin, déanfaidh na húdaráis chonarthacha plé struchtúrtha leis na rannpháirtithe roghnaithe lena bhféadfar gach gné den chonradh a chumhdach agus lena mbeartaítear a shonrú, de réir mar a théann an t‑idirphlé sin ar aghaidh, an fhaisnéis a bhaineann leis an gconradh. Ní chuireann na rannpháirtithe a dtairiscintí deiridh isteach ach amháin nuair a thugtar an t‑idirphlé sin chun críche toisc gur shainaithin an t‑údarás conarthach an réiteach nó na réitigh lena bhféadfaí freastal ar a riachtanais.
36. Dá bhrí sin, fad nár tugadh an t‑idirphlé iomaíoch i gcrích toisc nár thángthas ar réitigh shásúla go fóill, ní mór don údarás conarthach a bheith in ann an tsolúbthacht a thugtar dó leis an nós imeachta um idirphlé iomaíoch a choinneáil chun na réitigh sin a shainiú. Dá bhrí sin, ag an gcéim sin, ní gá ualú coibhneasta na gcritéar dámhachtana, arna léiriú i bhfoirm raonta, a chinneadh go cinntitheach. Ar an taobh eile, dá gcuirfí d’oibleagáid ar an údarás conarthach an t‑ualú sin a chinneadh go cinntitheach roimh dheireadh chéim an idirphlé, bheadh an baol ann go gcuirfí teorainn leis an tsolúbthacht a thairgtear go sonrach leis an nós imeachta sin, nó go bhfágfaí gan bhrí í fiú.
37. Mar sin féin, a luaithe a bheidh an t‑idirphlé iomaíoch tugtha chun críche, agus dá bhrí sin a luaithe a bheidh an réiteach nó na réitigh fhéideartha soiléirithe go cinntitheach, féadfaidh an t‑údarás conarthach ualuithe coibhneasta deiridh na gcritéar dámhachtana a chinneadh, laistigh de theorainneacha na raonta a léirítear thuas, ionas go bhféadfaidh na rannpháirtithe eile san idirphlé iad a chur san áireamh agus a dtairiscintí deiridh á dtarraingt suas acu.
38. Thairis sin, áirithítear le léiriú chuige sin ar na forálacha ábhartha go gcomhlíonfar prionsabal na córa comhionainne (16) agus oibleagáid na trédhearcachta a eascraíonn as sin. (17)
39. Leanann sé ón méid sin roimhe seo, i mo thuairimse, nach mór an chéad cheist a tharchuirtear le haghaidh réamhrialú a fhreagairt mar seo a leanas: ní mór Airteagal 30 agus an dara fomhír d’Airteagal 67(5) de Threoir 2014/24 a léiriú sa chaoi nach gcuirtear cosc leo, i gcomhthéacs nós imeachta um idirphlé iomaíoch, ar údarás conarthach a chuir ualú coibhneasta na gcritéar dámhachtana in iúl san fhógra conartha nó sa doiciméad tuairisciúil i bhfoirm raoin, a bheith in ann an t‑ualú coibhneasta sin a shonrú go cinntitheach sa chuireadh chun na tairiscintí deiridh atá le seoladh chuig na rannpháirtithe tar éis an idirphlé leo a chur isteach.
C. An dara ceist a tharchuirtear le haghaidh réamhrialú
40. Lena dara ceist, fiafraíonn an chúirt a rinne an tarchur an gá an dara fomhír d’Airteagal 67(5) de Threoir 2014/24, arna léamh i gcomhar le hAirteagal 30 den Treoir sin, a léiriú sa chaoi, i gcomhthéacs nós imeachta um idirphlé iomaíoch, go bhféadfaidh údarás conarthach, san fhógra conartha, raonta a úsáid d’ualú coibhneasta na gcritéar dámhachtana conartha nach léir ord deiridh na gcritéar sin uathu, agus é á chur san áireamh go dtagann na critéir dhámhachtana agus a n‑ualú coibhneasta, a leagtar amach sa chuireadh chun tairiscintí deiridh a chur isteach, faoin raon a chuirtear in iúl san fhógra conartha.
41. Cuireann an chúirt a rinne an tarchur an cheist sin i gcomhthéacs, mar is léir ó mhír 4 thuas, sa ghlao ar thairiscintí atá i gceist sa chás atá ar feitheamh os a comhair, inar foráladh do na raonta a úsáideann an t‑údarás conarthach chun ualú coibhneasta na gcritéar dámhachtana conartha a léiriú: i gcás an phraghais, raon idir 30 agus 70 %; agus maidir le cáilíocht, dhá raon idir 15 % agus 35 % faoi seach, agus idir 15 % agus 35 % le haghaidh inniúlacht an ghrúpa saineolaithe.
42. Dá bhrí sin, le húsáid na raonta sin, níorbh fhéidir a chinneadh, tráth fhoilsiú an fhógra conartha, an t‑ord tábhachta idir na critéir dhámhachtana agus, go sonrach, cé acu den phraghas nó den dá chritéar cáilíochta a raibh ról ceannasach acu i ndámhachtain deiridh an chonartha. D’fhág úsáid raonta den sórt sin gur féidir roinnt féidearthachtaí a bheith ann laistigh de dhá chás teorannacha: a luaithe a chinnfear na hualuithe coibhneasta deiridh, 70 % a bheadh sa phraghas agus 30 % a bheadh sa cháilíocht; nó, os a choinne sin – mar a bhí an cás ar deireadh – inar 70 % a bheadh sa cháilíocht agus nach mbeadh ach 30 % sa phraghas.
43. Sa chomhthéacs sin, chun a fháil amach an bhfuil úsáid raonta den sórt sin, mar a iarradh sa dara ceist a tharchuirtear le haghaidh réamhrialú, i gcomhthéacs nós imeachta um idirphlé iomaíoch, ag luí leis an dara fomhír d’Airteagal 67(5) de Threoir 2014/24, measaim gur gá, ar an gcéad dul síos, an fhoráil sin a léiriú chun a chinneadh an gceadaítear léi, go ginearálta, raonta a úsáid d’ualú coibhneasta na gcritéar dámhachtana conartha nach léirítear leo ord deiridh na gcritéar dámhachtana. Ina dhiaidh sin, is gá a fháil amach an bhfuil údar le cur chuige sonrach, i gcomhthéacs sonrach an nós imeachta dámhachtana ina bhfuil idirphlé iomaíoch, i bhfianaise shaintréithe sonracha an nós imeachta sin.
1. Léiriú ar an dara fomhír d’Airteagal 67(5)
44. Is cásdlí socair é, agus foráil de dhlí an Aontais á léiriú, gur gá a chur san áireamh ní hamháin foclaíocht ach freisin an comhthéacs ina bhfuil sí, na cuspóirí a shaothraítear leis na rialacha ar cuid díobh í (18) agus, i gcás inarb iomchuí, bunús na rialacha sin. (19)
45. Ó thaobh an téacs de, foráiltear leis an dara fomhír d’Airteagal 67(5) de Threoir 2014/24 go bhféadfar ualú coibhneasta na gcritéar dámhachtana a chur in iúl trí fhoráil a dhéanamh maidir le raon a bhfuil leathadh uasta iomchuí i gceist leis. (20)
46. Ní fhágann anailís litriúil ar an bhforáil sin gur féidir a shoiléiriú go cinntitheach an gá ord cinntitheach na gcritéar sin a léiriú le léiriú ualú coibhneasta na gcritéar dámhachtana trí raonta.
47. Ar thaobh amháin, ní gá go dtuigtear leis an gcoincheap ‘ualú coibhneasta’ ann féin go mbunófar ordú cinntitheach idir na tosca a chuirtear san áireamh.
48. Ó thaobh na téarmaíochta de, sa staidreamh, is éard is ualú ann ná oibríocht (ar a dtugtar meá freisin) trína sanntar comhéifeacht (ar a dtugtar meáchan) do gach téarma, agus meán á ríomh, lena léirítear tábhacht choibhneasta an téarma sin i ndáil leis na téarmaí eile. Ós rud é go bhfuil sé ‘coibhneasta’, is léir nach mór a bheith in ann, leis an ualú, gaol tábhachtach a shainaithint idir na tosca go léir a chuirtear san áireamh. Mar sin féin, i gcás ina gcuirtear ualú in iúl trí raonta a úsáid, cé go mbaineann sé go ginearálta ar a laghad le hord páirteach tábhachta a shainaithint i measc na n‑eilimintí, ní gá go mbeadh ord iomlán agus aonchiallach i gceist leis i gcónaí. Braitheann sé ar an gcaoi a sainítear na raonta.
49. Dá bhrí sin, mura bhfuil forluí idir na raonta (mar shampla: A = 40-50 %, B = 25-35 %, C = 15-20 %), déanfar an t‑ord tábhachta deiridh idir na tosca éagsúla a ionchorprú sna raonta. Mar sin féin, más rud é, mar atá i gcás na raonta a úsáidtear san fhógra conartha don chonradh atá i gceist, go bhforluíonn na raonta ar a chéile (mar shampla: A = 30-50 %, B = 25-45 %, C = 10-30 %), ní fhéadfar teacht ar chonclúid go cinnte cad é ord deiridh na dtosca sula gcinnfear go cinntitheach na luachanna deiridh a luaitear i gcomhthéacs na raonta.
50. Ar an taobh eile, foráiltear leis an dara fomhír d’Airteagal 67(5) de Threoir 2014/24 nach mór an leathadh uasta iomchuí a shonraítear sa raon a bheith ‘iomchuí’. Mar sin féin, ní shonraítear i dTreoir 2014/24 – i mo thuairimse, d’aon ghnó – cad atá le tuiscint le leathadh ‘iomchuí’, agus ar an gcaoi sin fágtar faoin ateangaire é, agus ar deireadh faoin gCúirt, raon feidhme an choincheapa sin a chinneadh, ar bhonn cás ar chás.
51. Sa chomhthéacs sin, is gá, dá bhrí sin, anailís chórasach theileolaíoch a dhéanamh ar an dara fomhír d’Airteagal 67(5) de Threoir 2014/24 chun a chinneadh an gceadaítear leis an bhforáil sin ualú coibhneasta na gcritéar dámhachtana a léiriú trí raonta nach sainítear leo roimh ré ord deiridh na gcritéar sin.
52. I ndáil leis sin, ó thaobh córasach de, tagann an fhoráil atá faoi anailís faoi chuimsiú Airteagal 67(5) de Threoir 2014/24, a bhfuil trí fhomhír inti, mar a mheabhraítear i míreanna 10 go 13 thuas. Leagtar síos sa chéad fhomhír, ar an gcéad dul síos, an oibleagáid atá ar údaráis chonarthacha, i bprionsabal, ualú coibhneasta na gcritéar dámhachtana conartha a shonrú.
53. Is léir ó aithris 90 agus ó chásdlí na Cúirte go gcomhlíontar leis an oibleagáid sin an gá atá le comhlíonadh phrionsabal na córa comhionainne agus na hoibleagáide trédhearcachta a eascraíonn as sin a áirithiú. Tá sé beartaithe go gcuirfear ar a chumas d’aon oibreoir atá rannpháirteach sa nós imeachta soláthair a bheith ar an eolas go réasúnta faoi na critéir agus na rialacha mionsonraithe a chuirfear i bhfeidhm chun an tairiscint is buntáistí go heacnamaíoch a shainaithint. Léirítear leis an oibleagáid sin dualgas na n‑údarás conarthach faoi Airteagal 18(1) de Threoir 2014/24, faoina gceanglaítear orthu caitheamh go cothrom agus go neamh-idirdhealaitheach le hoibreoirí eacnamaíocha agus gníomhú ar bhealach trédhearcach. (21)
54. Leis an dara fomhír de mhír 5, is é sin le rá, an fhoráil atá á léiriú, tugtar an rogha d’údaráis chonarthacha an t‑ualú coibhneasta a léiriú trí raonta a úsáid, agus ar an gcaoi sin a chinntiú go bhfuil corrlach solúbthachta ag na húdaráis sin. Níl an rogha sin faoi réir aon cheanglas oiriúnachta. Féadfaidh an t‑údarás conarthach na raonta a úsáid de réir mar is cuí leis, ar choinníoll go gcomhlíontar an t‑aon choinníoll ‘gurb iomchuí an leathadh uasta iomchuí’. Cé nach sonraítear brí an téarma ‘leathadh iomchuí’ i dTreoir 2014/24, mar atá feicthe againn, is léir nach mór tagairt a dhéanamh do chuspóir na hoibleagáide an t‑ualú coibhneasta a léiriú, a bhaineann, mar atá feicthe againn sa phointe roimhe seo, leis an ngá atá le comhlíonadh phrionsabal na córa comhionainne a áirithiú agus leis an oibleagáid trédhearcachta a eascraíonn as sin.
55. Foráiltear leis an tríú fomhír, arna léamh i bhfianaise aithris 90, gurb é an t‑aon chás ina bhféadfaidh údaráis chonarthacha maolú ar an oibleagáid ualú coibhneasta na gcritéar dámhachtana a léiriú i gcás nach féidir an t‑ualú sin a bhunú roimh ré, go háirithe mar gheall ar chastacht an chonartha. Ní mór údar cuí agus bonn cirt a bheith le maolú den sórt sin ar an oibleagáid an t‑ualú a léiriú roimh ré, áfach. Sa chás sin, áfach, is gá do na húdaráis sin, in aon chás, na critéir dhámhachtana a chur in iúl in ord laghdaitheach tábhachta.
56. Is cosúil, dá bhrí sin, i scéim Airteagal 67(5) de Threoir 2014/24, gurb é an léiriú ar ord laghdaitheach tábhachta na gcritéar dámhachtana conartha an teorainn absalóideach is gá chun an teorainn dhosháraithe is gá a áirithiú chun prionsabail na córa comhionainne agus na trédhearcachta a chomhlíonadh d’iarrthóirí i ndáil leis an ngá atá le bheith ar an eolas roimh ré faoi thábhacht na gcritéar dámhachtana conartha. Más rud é, ar chúiseanna oibiachtúla agus réasúnaithe, nach féidir ualú coibhneasta na gcritéar sin a léiriú, foráiltear le Treoir 2014/24 nach mór, ar a laghad, ord laghdaitheach tábhachta na gcritéar sin a léiriú.
57. Mar sin féin, más ionann léiriú ar ord laghdaitheach tábhachta na gcritéar dámhachtana agus teorainn dhosháraithe na gcorrlach lánroghnach a fhágtar ag na húdaráis chonarthacha chun a n‑oibleagáid a chomhlíonadh iarrthóirí a chur ar an eolas roimh ré maidir le tábhacht shonrach na gcritéar dámhachtana, is gá go n‑urramófar an teorainn sin freisin agus ualú coibhneasta na gcritéar sin de réir raonta á léiriú. Sa chomhthéacs sin, i mo thuairimse, bheadh sé neamhréasúnach freisin dá mba rud é go mbeadh an fhéidearthacht maolaithe dá bhforáiltear ar bhonn eisceachtúil agus iarmharach sa tríú fomhír – a bhfuil oibleagáid ann go sainráite údar cuí agus réasúnaíocht a sholáthar – ina riail atá níos sriantaí agus níos teoranta ar rogha na n‑údarás conarthach ná riail de chineál níos ginearálta amhail an riail dá bhforáiltear sa dara fomhír. Ar an taobh eile, tá an oibleagáid foráil a dhéanamh maidir le raonta ag a bhfuil leathadh ‘iomchuí’ beartaithe go beacht chun cosc a chur ar údaráis chonarthacha ualuithe a shainiú chomh doiléir sin nach gceadaítear leo do thairgeoirí tábhacht choibhneasta gach critéir dámhachtana a thuiscint ón tús.
58. Is cosúil, thairis sin, go ndeimhnítear léiriú den sórt sin ar an bhforáil atá i gceist le stair reachtach na rialach. I ndáil leis sin, tugadh isteach an fhoráil atá in Airteagal 67(5) de Threoir 2014/24 anois i ndlí soláthair an Aontais le hAirteagal 53(2) de Threoir 2004/18. Is léir ón obair ullmhúcháin ar an Treoir sin (22) gur tugadh isteach an oibleagáid chun ualú coibhneasta na gcritéar dámhachtana a léiriú go beacht chun an lánrogha a theorannú, rud a measadh a bheith iomarcach agus a fágadh faoi na húdaráis chonarthacha de bharr na hoibleagáide amháin, a bhí i bhfeidhm roimh theacht i bhfeidhm na forála sin, na critéir dhámhachtana a bhí beartaithe acu a chur i bhfeidhm a léiriú sna sonraíochtaí tairisceana nó san fhógra conartha, ‘in ord laghdaitheach tábhachta nuair is féidir’.(23) Deimhnítear leis sin nach féidir leis an bhforáil a leagtar amach sa tríú fomhír a bheith níos sriantaí, i dtéarmaí lánrogha na n‑údarás conarthach a theorannú, ná an fhoráil a leagtar amach sa dara fomhír.
59. Ar an taobh eile, ó thaobh na teileolaíochta de amháin, measaim go ndéanfaí prionsabail na córa comhionainne agus na trédhearcachta a shárú dá gceadófaí d’údaráis chonarthacha raonta a úsáid san fhógra conartha lena gceadaítear dóibh ina dhiaidh sin cinneadh ord tábhachta na gcritéar dámhachtana a leasú, prionsabail nach mór d’údaráis chonarthacha a chomhlíonadh, de bhun Airteagal 18 de Threoir 2014/24, le linn an nós imeachta um dhámhachtain conartha (24) agus a bhfuil sé beartaithe go sonrach le hAirteagal 67(5) den Treoir a chinntiú go gcomhlíontar iad, mar a luadh i mír 55 thuas.
60. Dá nglacfaí le húsáid raonta nach bhfágann gur féidir an t‑ord coibhneasta tábhachta a thuiscint, choimeádfaí an rogha do na húdaráis chonarthacha na critéir dhámhachtana a thabhairt, agus meastóireacht á déanamh ar thairiscintí, ualú sonrach agus, dá bhrí sin, luach coibhneasta nach eol do na tairgeoirí. Chuirfeadh sé sin ar chumas na n‑údarás conarthach tábhacht nárbh fhéidir a thuar a chur le critéar amháin nó níos mó, fiú tar éis oscailt na dtairiscintí, rud a chuirfeadh ar a gcumas tosaíocht a thabhairt do cheann amháin nó do cheann eile de na tairiscintí. (25)
61. Thairis sin, is léir ó chásdlí na Cúirte ní hamháin nach mór ualú coibhneasta gach critéir dámhachtana a shuí go soiléir ó thús an nós imeachta soláthair, rud a chuirfidh ar chumas tairgeoirí tábhacht iarbhír critéar dámhachtana amháin i ndáil le critéar dámhachtana eile a chinneadh go hoibiachtúil le linn a measúnaithe ina dhiaidh sin ag an údarás conarthach, ach freisin nach féidir ualú coibhneasta gach critéir dámhachtana a athrú le linn an nós imeachta. (26)
62. Níor cheadaigh an Chúirt ach maolú amháin ar an gcur chuige sriantach sin, maidir leis na fo-chritéir dámhachtana, ar choinníoll gur comhlíonadh na ceanglais maidir le cóir chomhionann a chosaint agus oibleagáid iarmhartach na trédhearcachta. (27)
63. Is léir ón méid sin roimhe seo, i mo thuairimse, nach gceadaítear leis an dara fomhír d’Airteagal 67(5) de Threoir 2014/24 ualú coibhneasta na gcritéar dámhachtana a léiriú trí raonta nach sainítear leo roimh ré ord deiridh na gcritéar sin. Dá bhrí sin, ní féidir a mheas go bhfuil raonta den sórt sin ‘iomchuí’ de réir bhrí na forála sin.
2. Cur i bhfeidhm an dara fomhír d’Airteagal 67(5) de Threoir 2014/24 i gcomhthéacs sonrach an idirphlé iomaíoch
64. Is gá a fháil amach, áfach, i bhfianaise shaintréithe agus shaintréithe sonracha an nós imeachta um idirphlé iomaíoch, mar a chuirtear i dtábhacht i míreanna 16 go 25 thuas, an bhfuil údar le cur chuige ar leith maidir le cur i bhfeidhm an dara fomhír d’Airteagal 67(5) i gcomhthéacs an nós imeachta dámhachtana sin.
65. Mar is léir ó na míreanna sin, mar gheall ar a chuspóir sonrach, eadhon a chur ar chumas an údaráis chonarthaigh, trí idirphlé leis na hiarrthóirí a ligtear isteach, na modhanna is oiriúnaí chun a riachtanais a shásamh a shainaithint agus a shainiú, sula n‑iarrfaidh sé tairiscintí deiridh, tugtar le tuiscint leis an nós imeachta um dhámhachtain idirphlé iomaíoch go n‑aithnítear corrlach lánroghnach níos mó ag an údarás conarthach ná mar a aithnítear i nósanna imeachta dámhachtana eile.
66. Mar a cuireadh in iúl cheana, tá leas ag údaráis chonarthacha nós imeachta den sórt sin a úsáid i gcás nach bhfuil siad in ann na modhanna a shainiú atá lena bhféadfaí a riachtanais a shásamh nó measúnú a dhéanamh ar na réitigh is féidir leis an margadh a thairiscint dá riachtanais theicniúla, airgeadais nó dhlíthiúla. Go háirithe, i gcomhthéacs an idirphlé atá ina shaintréith den idirphlé iomaíoch, déanann an t‑údarás conarthach measúnú ar an bhfeidhmiúlacht atá beartaithe aige a bheith aige nó ar an bhfeidhmíocht atá beartaithe aige a bhaint amach. Sna himthosca sin, ní féidir a chur as an áireamh, ós rud é nach féidir le húdarás conarthach a thuar ón tús i dtéarmaí nithiúla conas a riachtanais a shásamh, nach féidir leis na critéir dhámhachtana conartha a ualú go beacht ar dtús.
67. Sa chomhthéacs sin, tagann an cheist chun cinn maidir le méid na gcorrlach lánroghnach nach mór a thabhairt don údarás conarthach i ndáil leis an ualú sin.
68. Is fíor go bhfágann an dara fomhír d’Airteagal 67(5), tríd an deis a thabhairt an t‑ualú sin a chur in iúl trí raonta, nach féidir an t‑ualú a réamhchinneadh go beacht agus, dá bhrí sin, go bhfágtar corrlach lánroghnach suntasach cheana féin. Ní mór an coincheap leathadh ‘iomchuí’, mar a fheictear thuas, a léiriú go leathan i gcomhthéacs an idirphlé iomaíoch. Mar sin féin, ní féidir an corrlach lánroghnach sin a leathnú chuig cead a thabhairt d’údaráis chonarthacha gan a léiriú, de mhaolú ar an tríú fomhír den fhoráil sin, ord laghdaitheach tábhachta na gcritéar dámhachtana.
69. I ndáil leis sin, tugaim faoi deara, ar an gcéad dul síos, nach bhforáiltear le haon fhoráil shonrach de Threoir 2014/24 do mhaolú nó do chur i bhfeidhm difreáilte nó sonrach ar fhorálacha Airteagal 67(5) den Treoir sin i gcomhthéacs sonrach an nós imeachta um dhámhachtain an idirphlé iomaíoch. Tá feidhm ghinearálta ag Airteagal 67(5) de Threoir 2014/24 agus tá feidhm aige ina iomláine maidir leis na nósanna imeachta dámhachtana uile faoin Treoir sin.
70. Ar an dara dul síos, leanann sé go sainráite ón dara fomhír d’Airteagal 30(3) de Threoir 2014/24, i gcomhthéacs an idirphlé iomaíoch, go gceanglaítear ar an údarás conarthach prionsabail na córa comhionainne agus na trédhearcachta a chomhlíonadh le linn an nós imeachta.
71. Cé nach mór na prionsabail sin a mheas agus a chur i bhfeidhm i bhfianaise chineál sonrach an nós imeachta dámhachtana arb é atá ann an t‑idirphlé iomaíoch, lena mbaineann corrlach lánroghnach leathan go bunúsach, is léir, mar sin féin, ó mhíreanna 59 go 61 thuas, go bhféadfadh sárú ar phrionsabal na córa comhionainne idir iomaitheoirí, lena n‑áirítear i gcomhthéacs an idirphlé iomaíoch, a bheith i gceist le deis a thabhairt d’údaráis chonarthacha an t‑ord tábhachta a bhaineann leis na critéir dhámhachtana a athrú tráth a tháinig siad ar an eolas faoi na réitigh arna moladh ag na rannpháirtithe éagsúla.
72. Dá bhrí sin, i mo thuairimse, d’ainneoin an chorrlaigh lánroghnaigh leathain a thugtar d’údaráis chonarthacha i gcomhthéacs an nós imeachta maidir le hidirphlé iomaíoch, ní mór an dara fomhír d’Airteagal 67(5) de Threoir 2014/24, mar a léirítear i mír 63 den bhreithiúnas seo, a bheith infheidhme go hiomlán sa nós imeachta dámhachtana sin freisin.
73. Ar deireadh, ba cheart a thabhairt faoi deara gur cosúil nach bhfuil an abairt dheireanach den dara ceist a tharchuirtear le haghaidh réamhrialú, maidir le cibé ar tháinig na critéir dhámhachtana agus a n‑ualú coibhneasta, a leagtar amach sa chuireadh chun tairiscintí deiridh a chur isteach sa chás seo, laistigh den raon a cuireadh in iúl san fhógra conartha, ábhartha chun críocha na ceiste sin a fhreagairt. Bheadh aon léiriú sa chuireadh chun tairiscintí deiridh a chur isteach ar na critéir dhámhachtain nó luachanna deiridh a n‑ualaithe choibhneasta nár chomhlíon na tásca agus na raonta a leagtar amach san fhógra conartha ina shárú ar phrionsabail na córa comhionainne agus na trédhearcachta, chomh maith le sárú ar an dara fomhír d’Airteagal 67(5) de Threoir 2014/24.
74. Mar fhocal scoir, leanann sé ón méid sin roimhe seo, i mo thuairimse, nach mór an dara ceist a tharchuirtear le haghaidh réamhrialú a fhreagairt mar seo a leanas: ní mór an dara fomhír d’Airteagal 67(5) de Threoir 2014/24, arna léamh i gcomhar le hAirteagal 30 den Treoir sin, a léiriú sa chaoi nach bhféadfaidh údarás conarthach, i gcomhthéacs nós imeachta um idirphlé iomaíoch, raonta a úsáid san fhógra conartha le haghaidh ualú coibhneasta na gcritéar dámhachtana conartha nach léir ord deiridh na gcritéar sin uathu.
III. Conclúid
75. I bhfianaise na mbreithnithe go léir roimhe seo, molaim go bhfreagródh an Chúirt na ceisteanna a tharchuir an Korkein hallinto-oikeus (an Chúirt Riaracháin Uachtarach, an Fhionlainn) mar seo a leanas:
1. ní mór Airteagal 30 agus an dara fomhír d’Airteagal 67(5) de Threoir 2014/24/AE a léiriú sa chaoi nach gcuirtear cosc leo, i gcomhthéacs nós imeachta um idirphlé iomaíoch, ar údarás conarthach a chuir ualú coibhneasta na gcritéar dámhachtana in iúl san fhógra conartha nó sa doiciméad tuairisciúil i bhfoirm raoin, a bheith in ann an t‑ualú coibhneasta sin a shonrú go cinntitheach sa chuireadh chun na tairiscintí deiridh atá le seoladh chuig na rannpháirtithe tar éis an idirphlé leo a chur isteach.
2. ní mór an dara fomhír d’Airteagal 67(5) de Threoir 2014/24, arna léamh i gcomhar le hAirteagal 30 den Treoir sin, a léiriú sa chaoi nach bhféadfaidh údarás conarthach, i gcomhthéacs nós imeachta um idirphlé iomaíoch, raonta a úsáid san fhógra conartha le haghaidh ualú coibhneasta na gcritéar dámhachtana conartha nach léir ord deiridh na gcritéar sin uathu.
1 Bunteanga: an Iodáilis.
2 Treoir 2014/24/AE ó Pharlaimint na hEorpa agus ón gComhairle an 26 Feabhra 2014 maidir le soláthar poiblí agus lena n‑aisghairtear Treoir 2004/18/CE (IO 2014 L 94, lgh. 65 go 242).
3 Féach aithris 42 de Threoir 2014/24.
4 Féach aithrisí 42 agus 43 de Threoir 2014/24.
5 Treoir 2004/18/CE ó Pharlaimint na hEorpa agus ón gComhairle an 31 Márta 2004 maidir leis na nósanna imeachta um dhámhachtain conarthaí oibreacha poiblí, conarthaí soláthair phoiblí agus conarthaí seirbhíse poiblí a chomhordú (IO 2004 L 134, lch. 114). Féach, go háirithe, Airteagal 29 den Treoir sin.
6 Féach Airteagal 30(1), an chéad fhomhír, agus Airteagal 30(2) de Threoir 2014/24.
7 Féach an chéad fhomhír d’Airteagal 30(1) de Threoir 2014/24.
8 Féach an tríú fomhír d’Airteagal 30(1) agus Airteagal 54 de Threoir 2014/24.
9 Airteagal 30(4) de Threoir 2014/24.
10 An dara fomhír d’Airteagal 30(3) de Threoir 2014/24.
11 An tríú fomhír d’Airteagal 30(3) de Threoir 2014/24.
12 Airteagal 30(5) de Threoir 2014/24.
13 Airteagal 30(6) de Threoir 2014/24.
14 Airteagal 30(7) de Threoir 2014/24.
15 Féach, chuige sin, maidir le hAirteagal 53(2) de Threoir 2004/18, breithiúnas an 14 Iúil 2016, TNS Dimarso (C‑6/15, EU:C:2016:555, míreanna 24 agus 25 agus an cásdlí dá dtagraítear).
16 Is léir ó chásdlí socair go gceanglaítear leis an bprionsabal sin go mbeidh na deiseanna céanna ag gach tairgeoir agus a dtairiscintí á bhfoirmliú acu agus, dá bhrí sin, go mbeidh na tairiscintí sin faoi réir na gcoinníollacha céanna do na hiomaitheoirí uile. Féach, inter alia, breithiúnas an 11 Iúil 2019, Telecom Italia (C‑697/17, EU:C:2019:599, mír 33 agus an cásdlí dá dtagraítear).
17 Tá an oibleagáid sin, de réir cásdlí socair, ceaptha go bunúsach chun a chinntiú go bhféadfaidh aon oibreoir leasmhar tairiscint a chur isteach, i nós imeachta soláthair phoiblí, ar bhonn na faisnéise ábhartha uile agus chun a chinntiú go gcuirfear deireadh le haon riosca fabhraíochta nó treallachta ar thaobh an údaráis chonarthaigh. Féach, inter alia, breithiúnas an 4 Aibreán 2019, Allianz Vorsorgekasse (C‑699/17, EU:C:2019:290, mír 62 agus an cásdlí dá dtagraítear).
18 Féach, inter alia, breithiúnas an 15 Eanáir 2026, AVR-Afvalverwerking (C‑692/23, EU:C:2026:4, mír 37 agus an cásdlí dá dtagraítear).
19 Féach, inter alia, breithiúnas an 22 Aibreán 2015, Drukarnia Multipress (C‑357/13, EU:C:2015:253, mír 22 agus an cásdlí dá dtagraítear).
20 Féach mír 12 thuas.
21 Féach, maidir le hAirteagal 53(2) de Threoir 2004/18, breithiúnas an 14 Iúil 2016, TNS Dimarso (C‑6/15, EU:C:2016:555, mír 21).
22 Féach Nóta Míniúcháin a ghabhann leis an Togra le haghaidh Treoir ó Pharlaimint na hEorpa agus ón gComhairle maidir leis na nósanna imeachta um dhámhachtain conarthaí soláthair phoiblí, conarthaí seirbhíse poiblí agus conarthaí oibreacha poiblí a chomhordú (COM/2000/275 final) (IO 2001 E29, 30 Eanáir 2001, lch. 11). Féach go háirithe pointí 6.2 agus 6.3.
23 Chuige sin, féach Tuairim an Abhcóide Ghinearálta Mengozzi in TNS Dimarso (C‑6/15, EU:C:2016:160, mír 22).
24 Féach, chuige sin, inter alia, an breithiúnas is déanaí, breithiúnas an 5 Márta 2026, AESTE (C‑210/24, EU:C:2026:145, mír 52 agus an cásdlí dá dtagraítear).
25 I ndáil leis sin, féach freisin, ar thaobh amháin, an Nóta Míniúcháin thuasluaite a ghabhann leis an Togra le haghaidh Treorach (COM/2000/275 final), pointe 6.2 agus, ar an taobh eile, Nóta Míniúcháin an Choimisiúin Eorpaigh maidir leis an idirphlé iomaíoch (Doiciméad CC/2005/04, lch. 7, an mhír dheireanach).
26 Féach, maidir le hAirteagal 53(2) de Threoir 2004/18, breithiúnas an 14 Iúil 2016, TNS Dimarso (C‑6/15, EU:C:2016:555, mír 25).
27 Ghlac an Chúirt leis gur féidir le húdarás conarthach a chinneadh, tar éis an spriocdháta chun tairiscintí a chur isteach, ualuithe na bhfo-chritéar a chomhfhreagraíonn, go bunúsach, do na critéir a cuireadh in iúl roimhe sin do thairgeoirí, má chomhlíontar trí choinníoll, eadhon, ar an gcéad dul síos, nach n-athraíonn an cinneadh ex post sin na critéir dhámhachtana conartha a leagtar amach sna sonraíochtaí tairisceana nó san fhógra conartha, ar an dara dul síos, nach bhfuil eilimintí ann a d’fhéadfadh, dá mbeadh siad ar eolas tráth ullmhaithe na dtairiscintí, tionchar a imirt ar an ullmhúchán sin agus, ar an tríú dul síos, nár glacadh é agus gnéithe a d’fhéadfadh éifeacht idirdhealaitheach a bheith acu i gcoinne ceann de na tairgeoirí á gcur san áireamh. Féach breithiúnas an 14 Iúil 2016, TNS Dimarso (C-6/15, EU:C:2016:555, mír 26 agus an cásdlí dá dtagraítear).