(1)

L-Artikolu 8(2) tad-Direttiva 91/414/KEE jipprevedi li Stat Membru, matul perijodu ta’ 12-il sena wara n-notifika ta’ dik id-Direttiva, jista’ jawtorizza t-tqegħid fis-suq fit-territorju tiegħu ta’ prodotti għall-protezzjoni tal-pjanti li jkun fihom sustanzi attivi mhux elenkati fl-Anness I għal dik id-Direttiva u li jkunu diġà fis-suq sentejn wara n-notifika, filwaqt li dawk is-sustanzi jkunu qed jiġu eżaminati gradwalment fil-qafas ta’ programm ta’ ħidma.

(2)

Ir-Regolamenti tal-Kummissjoni (KE) Nru 451/2000 (2) u (KE) Nru 1490/2002 (3) jistabbilixxu r-regoli dettaljati għall-implimentazzjoni tat-tielet stadju tal-programm ta’ ħidma msemmi fl-Artikolu 8(2) tad-Direttiva tal-Kunsill 91/414/KEE u jistabbilixxu lista ta’ sustanzi attivi li għandhom jiġu vvalutati, bl-għan tal-inklużjoni possibbli tagħhom fl-Anness I mad-Direttiva 91/414/KEE. Dik il-lista tinkludi l-metam.

(3)

Għall-metam, l-effetti fuq is-saħħa tal-bniedem u l-ambjent ġew ivvalutati skont id-dispożizzjonijiet stabbiliti fir-Regolamenti (KE) Nru 451/2000 u (KE) Nru 1490/2002 għal firxa ta’ użijietjiet proposti min-notifikant. Barra minn hekk, dawk ir-Regolamenti jaħtru lill-Istati Membri relaturi li għandhom iressqu r-rapporti ta’ valutazzjoni u r-rakkomandazzjonijiet rilevanti lill-Awtorità Ewropea dwar is-Sigurtà Alimentari (EFSA) skont l-Artikolu 10 (1) tar-Regolament (KE) Nru 1490/2002. Għall-metam, l-Istat Membru relatur kien il-Belġju u t-tagħrif kollu rilevanti tressaq fl-10 ta’ Settembru 2007.

(4)

Ir-rapport ta’ valutazzjoni saritlu reviżjoni inter pares mill-Istati Membri u l-EFSA fil-Grupp ta’ Ħidma tagħha għall-Evalwazzjoni u kien ippreżentat lill-Kummissjoni fis-26 ta’ Novembru 2008 fil-format tal-konklużjoni tal-EFSA fir-rigward tar-reviżjoni inter pares tal-valutazzjoni tar-riskju tas-sustanza attiva metam. Dan ir-rapport ġie eżaminat mill-Istati Membri u mill-Kummissjoni fil-Kumitat Permanenti dwar il-Katina Alimentari u s-Saħħa tal-Annimali u ffinalizzat fis-26 ta’ Frar 2009 fil-format tar-rapport ta’ reviżjoni tal-Kummissjoni għall-metam.

(5)

Matul l-evalwazzjoni ta’ din is-sustanza attiva, ġew identifikati xi elementi ta’ tħassib li ma ppermettewx li l-evalwaturi juru l-aċċettabbiltà ta’ espożizzjoni tal-konsumatur. Dawk l-elementi ta’ tħassib kienu, b’mod partikolari, l-istudji inadegwati tar-residwi u n-nuqqas ta’ informazzjoni dwar impurità tossikoloġikament rilevanti, N,N′-dimethylthiourea (DMTU). Barra minn hekk, minħabba r-rata għolja ta’ applikazzjoni, ammont kbir ta’ impurità DMTU tispiċċa fl-ambjent u n-nuqqas ta’ data fir-rigward tal-imġiba tagħha fl-ambjent jirriżulta fi tħassib. Konsegwentement, ma kienx possibbli li tintlaħaq konklużjoni, abbażi tal-informazzjoni disponibbli fl-iskadenzi ta’ żmien stabbilit, li l-metam laħaq il-kriterji għall-inklużjoni fl-Anness I mad-Direttiva 91/414/KEE.

(6)

Il-Kummissjoni stiednet lin-notifikant biex iressaq il-kummenti tiegħu dwar ir-riżultati tar-reviżjoni inter pares u dwar jekk kienx biħsiebu jew le jkompli jappoġġa s-sustanza. In-notifikant ressaq il-kummenti tiegħu li kienu eżaminati bir-reqqa. Madankollu, minkejja l-argumenti mressqa min-notifikant, it-tħassib identifikat ma setgħax jitneħħa, u l-valutazzjonijiet magħmula abbażi tal-informazzjoni mogħtija u evalwata matul il-laqgħat tal-esperti tal-EFSA ma wrewx li jista’ jkun mistenni li, taħt il-kondizzjonijiet proposti ta’ użu, il-prodotti għall-protezzjoni tal-pjanti li fihom il-metam jissodisfaw b’mod ġenerali r-rekwiżiti stabbiliti fil-punti (a) u (b) tal-Artikolu 5(1) tad-Direttiva 91/414/KEE.

(7)

Għalhekk il-metam m’għandux jiġi inkluż fl-Anness I mad-Direttiva 91/414/KEE.

(8)

Għandhom jittieħdu miżuri biex jiżguraw li l-awtorizzazzjonijiet mogħtija għall-prodotti għall-protezzjoni tal-pjanti li jkun fihom il-metam jiġu rtirati fi żmien perijodu preskritt u ma jiġġeddux u li ma jingħatawx awtorizzazzjonijiet ġodda għal tali prodotti.

(9)

Fid-dawl tal-informazzjoni quddiem il-Kunsill jidher li, fin-nuqqas ta’ alternattivi effiċjenti għal ċerti użijietjiet limitati f’ċerti Stati Membri, hemm ħtieġa għal aktar użu tas-sustanza attiva biex ikun jista’ jsir l-iżvilupp ta’ alternattivi. Huwa, għalhekk, iġġustifikat, fiċ-ċirkostanzi preżenti, li jiġi preskritt, taħt kondizzjonijiet stretti mmirati biex jiġi mminimizzat ir-riskju, perijodu itwal għall-irtirar tal-awtorizzazzjonijiet eżistenti għall-użijietjiet limitati kkunsidrati essenzjali li għalihom ma tidher ebda alternattiva attwalment disponibbli għall-kontroll ta’ organiżmi li jagħmlu ħsara.

(10)

Kwalunkwe perijodu ta’ konċessjoni mogħti minn Stat Membru għar-rimi, il-ħażna, it-tqegħid fis-suq u l-użu tal-ħażniet eżistenti ta’ prodotti għall-protezzjoni tal-pjanti li fihom il-metam għandu jkun limitat għal perijodu ta’ 12-il xahar biex jippermetti li l-ħażniet eżistenti jkunu wżati fi staġun ieħor tat-tkabbir, li jiżgura li l-prodotti għall-protezzjoni tal-pjanti li fihom il-metam jistgħu jibqgħu disponibbli għall-bdiewa sa 18-il xahar wara l-adozzjoni ta’ din id-Deċizjoni.

(11)

Din id-Deċiżjoni ma tippreġudikax il-preżentazzjoni ta’ applikazzjoni għall-metam skont id-dispożizzjonijiet tal-Artikolu 6 (2) tad-Direttiva 91/414/KEE, li r-regoli ta’ implimentazzjoni dettaljati tagħha l ġew stabbiliti fir-Regolament tal-Kummissjoni (KE) Nru 33/2008 tas-17 ta’ Jannar 2008 li jistabbilixxi regoli dettaljati għall-applikazzjoni tad-Direttiva tal-Kunsill 91/414/KEE fir-rigward ta’ proċedura regolari u aċċellerata għall-valutazzjoni ta’ sustanzi attivi li kienu parti mill-programm ta’ ħidma msemmi fl-Artikolu 8(2) ta’ dik id-Direttiva iżda li ma ġewx inklużi fl-Anness I (4) tagħha, bil-ħsieb tal-inklużjoni possibbli tal-metam fl-Anness I tagħha.

(12)

Fin-nuqqas ta’ opinjoni favorevoli tal-Kumitat Permanenti dwar il-Katina Alimentari u s-Saħħa tal-Annimali, il-Kummissjoni ma setgħetx tadotta d-dispożizzjonijiet li hi pprevediet taħt il-proċedura stabbilita fl-Artikolu 19 tad-Direttiva tal-Kunsill 91/414/KEE,

(1)

awtorizzazzjonijiet għall-protezzjoni tal-pjanti li fihom il-metam ikunu rtirati sat-13 ta’ Jannar 2010;

(2)

ebda awtorizzazzjoni għal prodotti għall-protezzjoni tal-pjanti li fihom il-metam m’hi ser tingħata jew tiġġeded mid-data tal-pubblikazzjoni ta’ din id-Deċiżjoni.