(1)

L-Uffiċċju tal-Prosekutur Pubbliku Ewropew (UPPE) ġie stabbilit bir-Regolament (UE) 2017/1939. Il-Kulleġġ tal-UPPE jikkonsisti mill-Kap Prosekutur Ewropew u Prosekutur Ewropew wieħed għal kull Stat Membru. Il-Kap Prosekutur Ewropew jinħatar bi qbil komuni tal-Parlament Ewropew u tal-Kunsill minn fost lista ristretta ta’ kandidati kwalifikati mħejja mill-bord tal-għażla previst fl-Artikolu 14(3) tar-Regolament (UE) 2017/1939 (il-“bord tal-għażla”). Il-Prosekuturi Ewropej jinħatru mill-Kunsill minn fost tliet kandidati kwalifikati nnominati minn kull Stat Membru, wara li jkunu rċevew opinjoni motivata mill-bord tal-għażla.

(2)

Il-membri attwali tal-bord tal-għażla nħatru għal perjodu ta’ erba’ snin mill-20 ta’ Jannar 2023 permezz tad-Deċiżjoni tal-Kunsill (UE) 2023/133 (2). Membru wieħed tal-bord tal-għażla ġie sostitwit f’Ġunju 2024 bid-Deċiżjoni tal-Kunsill (UE) 2024/1777 (3).

(3)

Fis-7 ta’ Marzu 2025, membru wieħed tal-bord tal-għażla, is-Sa Tuire Tamminiemi, irriżenjat. Il-Kunsill ġie informat dwar dan.

(4)

Jenħtieġ li jinħatar mill-aktar fis possibbli membru ġdid tal-bord tal-għażla biex jissostitwixxi lis-Sa Tuire TAMMINIEMI, sabiex tiġi żgurata l-kontinwità tal-attivitajiet tal-bord tal-għażla.

(5)

Il-Kummissjoni, filwaqt li tqis il-ħtieġa għal bilanċ ġeografiku, bilanċ bejn il-ġeneri u rappreżentanza xierqa tas-sistemi legali tal-Istati Membri li jipparteċipaw f’kooperazzjoni msaħħa dwar l-istabbiliment tal-UPPEpproponiet lis-Sa Johanna HERVONEN, Kap Prosekutur tad-distrett tal-prosekuzzjoni tal-Finlandja tan-Nofsinhar, bħala membru ġdid tal-bord tal-għażla.

(6)

Is-Sa Johanna HERVONEN għalhekk jenħtieġ li tinħatar bħala membru ġdid tal-bord tal-għażla u f’konformità mar-Regola II tar-regoli ta’ ħidma tal-bord tal-għażla stabbiliti fl-Anness tad-Deċiżjoni ta’ Implimentazzjoni tal-Kunsill (UE) 2018/1696 (4), jenħtieġ li tinħatar għall-bqija tal-mandat tal-predeċessur tagħha.

(7)

Għalhekk, jenħtieġ li d-Deċiżjoni (UE) 2023/133 tiġi emendata skont dan.

(8)

Sabiex jiġi żgurat li s-Sa Johanna HERVONEN tkun tista’ tassumi l-funzjonijiet tagħha malajr u tipparteċipa fl-attivitajiet li għaddejjin tal-bord tal-għażla, jenħtieġ li din id-Deċiżjoni tidħol fis-seħħ fil-jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea,