European flag

Il-Ġurnal Uffiċjali
ta'l-Unjoni Ewropea

MT

Is-serje L


2024/2708

18.10.2024

DEĊIŻJONI TAL-KUNSILL (UE) 2024/2708

tat-14 ta’ Ottubru 2024

li tistabbilixxi l-pożizzjoni li għandha tittieħed f’isem l-Unjoni Ewropea fir-rigward ta’ ċerti riżoluzzjonijiet li ser jittieħed vot dwarhom fit-22 Assemblea Ġenerali tal-Organizzazzjoni Internazzjonali tad-Dielja u l-Inbid, li ser issir fit-18 ta’ Ottubru 2024

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u partikolarment l-Artikolu 43, flimkien mal-Artikolu 218(9) tiegħu,

Wara li kkunsidra l-proposta tal-Kummissjoni Ewropea,

Billi:

(1)

Fl-Assemblea Ġenerali li jmiss tagħha tat-18 ta’ Ottubru 2024, l-Organizzazzjoni Internazzjonali tad-Dielja u l-Inbid (OIV) ser teżamina u possibbilment tadotta riżoluzzjonijiet (“abbozz ta’ riżoluzzjonijiet tal-OIV”) fl-Assemblea Ġenerali li jmiss tagħha fit-18 ta’ Ottubru 2024. Dawk ir-riżoluzzjonijiet tal-OIV ser ikollhom effetti legali għall-finijiet tal-Artikolu 218(9) tat-Trattat.

(2)

L-Unjoni mhijiex membru tal-OIV. Madankollu, fl-20 ta’ Ottubru 2017 l-OIV tat lill-Unjoni l-istatus partikolari previst fl-Artikolu 4 tar-Regoli ta’ Proċedura tal-OIV.

(3)

Għoxrin Stat Membru huma membri tal-OIV. Dawk l-Istati Membri għandhom il-possibbiltà li jipproponu emendi għall-abbozzi ta’ riżoluzzjonijiet tal-OIV, u ser jintalbu jadottaw dawk ir-riżoluzzjonijiet fl-Assemblea Ġenerali li jmiss tal-OIV fit-18 ta’ Ottubru 2024.

(4)

Huwa xieraq li tiġi stabbilita l-pożizzjoni li għandha tittieħed f’isem l-Unjoni fil-laqgħat tal-OIV fir-rigward tal-abbozzi ta’ riżoluzzjonijiet tal-OIV b’rabta ma’ kwistjonijiet li jaqgħu taħt il-kompetenza tagħha. Jenħtieġ li dik il-pożizzjoni tiġi espressa fil-laqgħat tal-OIV mill-Istati Membri li huma membri tal-OIV, li jaġixxu b’mod konġunt fl-interess tal-Unjoni.

(5)

Skont ir-Regolament (UE) Nru 1308/2013 tal-Parlament Ewropew u tal-Kunsill (1) u r-Regolament Delegat tal-Kummissjoni (UE) 2019/934 (2), ċerti riżoluzzjonijiet adottati u ppubblikati mill-OIV ser ikollhom effetti legali.

(6)

L-Artikolu 80(3), il-punt (a), tar-Regolament (UE) Nru 1308/2013 jipprevedi li, meta tawtorizza l-prattiki enoloġiċi, il-Kummissjoni trid tqis il-prattiki enoloġiċi u l-metodi ta’ analiżi rrakkomandati u ppubblikati mill-OIV.

(7)

L-Artikolu 90(2) tar-Regolament (UE) Nru 1308/2013 jipprevedi li l-prodotti tas-settur tal-inbid importati fl-Unjoni jridu jkunu magħmulin f’konformità mal-prattiki enoloġiċi awtorizzati mill-Unjoni skont dak ir-Regolament jew, qabel dik l-awtorizzazzjoni, magħmulin f’konformità mal-prattiki enoloġiċi rrakkomandati u ppubblikati mill-OIV.

(8)

L-Artikolu 9(1) tar-Regolament Delegat (UE) 2019/934 jipprevedi li, meta ma jkunux stabbiliti mill-Kummissjoni, l-ispeċifikazzjonijiet tal-purità u tal-identifikazzjoni tas-sustanzi użati fil-prattiki enoloġiċi għandhom ikunu dawk imsemmija fil-kolonna 4 tat-Tabella 2 tal-Parti A tal-Anness I ta’ dak ir-Regolament, li jirreferu għar-rakkomandazzjonijiet tal-OIV.

(9)

L-abbozz ta’ Riżoluzzjoni OENO-MICRO 23-740 jestendi l-kamp ta’ applikazzjoni ta’ diversi riżoluzzjonijiet għal ħmejjer mhux Saccharomyces bil-ħsieb li l-użu tagħhom jiġi rregolat. F’konformità mal-Artikolu 80(3), il-punt (a), u mal-Artikolu 90(2) tar-Regolament (UE) Nru 1308/2013, dik ir-Riżoluzzjoni ser ikollha effetti legali.

(10)

L-abbozz ta’ Riżoluzzjoni OENO-SPECIF 23-723 tneħħi r-referenzi għall-proteina tal-qamħ mid-dokumenti kollha tal-OIV, inkluż il-Kodiċi Enoloġiku Internazzjonali u l-Kodiċi Internazzjonali tal-Prattiki Enoloġiċi. F’konformità mal-Artikolu 80(3), il-punt (a), u mal-Artikolu 90(2) tar-Regolament (UE) Nru 1308/2013, u mal-Artikolu 9 tar-Regolament Delegat (UE) 2019/934, dik ir-Riżoluzzjonijiet ser ikollha effetti legali.

(11)

L-abbozz ta’ Riżoluzzjoni OENO-TECHNO 15-581B jistabbilixxi prattika enoloġika ġdida biex tittejjeb l-aċidità fl-inbid bl-użu tal-aċidu fumariku. L-abbozz ta’ Riżoluzzjoni OENO-TECHNO 20-672B jistabbilixxi prattika enoloġika ġdida għall-istabbilizzazzjoni tal-proteini tal-inbejjed bl-użu ta’ silika mesoporuża funzjonalizzata. F’konformità mal-Artikolu 80(3), il-punt (a), u mal-Artikolu 90(2) tar-Regolament (UE) Nru 1308/2013, dawk ir-Riżoluzzjonijiet ser ikollhom effetti legali.

(12)

L-abbozzi ta’ riżoluzzjonijiet tal-OIV ġew diskussi b’mod estensiv mill-esperti xjentifiċi u tekniċi tas-settur tal-inbid. Jikkontribwixxu għall-armonizzazzjoni internazzjonali tal-istandards tal-inbid u ser jistabbilixxu qafas li jiżgura kompetizzjoni ġusta fin-negozjar tal-prodotti tas-settur tal-inbid. Għaldaqstant, jenħtieġ li jiġu appoġġati.

(13)

Sabiex ikun hemm il-flessibbiltà meħtieġa matul in-negozjati qabel l-Assemblea Ġenerali tal-OIV fit-18 ta’ Ottubru 2024, jenħtieġ li l-Istati Membri li huma membri tal-OIV ikunu awtorizzati jaqblu mal-bidliet tekniċi għall-abbozzi ta’ riżoluzzjonijiet tal-OIV sakemm dawk il-bidliet ma jbiddlux is-sustanza tagħhom,

ADOTTA DIN ID-DEĊIŻJONI:

Artikolu 1

Il-pożizzjoni li għandha tittieħed f’isem l-Unjoni fl-Assemblea Ġenerali tal-OIV skedata għat-18 ta’ Ottubru 2024 hija stabbilita fl-Anness għal din id-Deċiżjoni.

Artikolu 2

Il-pożizzjoni msemmija fl-Artikolu 1 għandha tiġi espressa mill-Istati Membri li huma Membri tal-OIV, li jaġixxu b’mod konġunt fl-interess tal-Unjoni.

Artikolu 3

1.   Meta jkun hemm il-probabbiltà li l-pożizzjoni msemmija fl-Artikolu 1 tiġi affettwata minn informazzjoni xjentifika jew teknika ġdida ppreżentata qabel jew waqt il-laqgħat tal-OIV, l-Istati Membri li huma Membri tal-OIV għandhom jitolbu biex il-votazzjoni fl-Assemblea Ġenerali tal-OIV tiġi posposta sakemm il-pożizzjoni tal-Unjoni tkun stabbilita abbażi tal-informazzjoni l-ġdida.

2.   Wara l-koordinazzjoni u mingħajr deċiżjoni ulterjuri tal-Kunsill li tistabbilixxi l-pożizzjoni li għandha tittieħed f’isem l-Unjoni, l-Istati Membri li huma Membri tal-OIV, li jaġixxu b’mod konġunt fl-interess tal-Unjoni, jistgħu jaqblu ma’ bidliet tekniċi fl-abbozzi tar-riżoluzzjonijiet tal-OIV imsemmija fl-Anness ta’ din id-Deċiżjoni li ma jbiddlux is-sustanza tagħhom.

Artikolu 4

Din id-Deċiżjoni għandha tidħol fis-seħħ fid-data tal-adozzjoni tagħha.

Magħmul fil-Lussemburgu, it-14 ta’ Ottubru 2024.

Għall-Kunsill

Il-President

NAGY I.


(1)  Ir-Regolament (UE) Nru 1308/2013 tal-Parlament Ewropew u tal-Kunsill tas-17 ta’ Diċembru 2013 li jistabbilixxi organizzazzjoni komuni tas-swieq fi prodotti agrikoli u li jħassar ir-Regolamenti tal-Kunsill (KEE) Nru 922/72, (KEE) Nru 234/79, (KE) Nru 1037/2001 u (KE) Nru 1234/2007 (ĠU L 347, 20.12.2013, p. 671, ELI: http://data.europa.eu/eli/reg/2013/1308/oj).

(2)  Ir-Regolament Delegat tal-Kummissjoni (UE) 2019/934 tat-12 ta’ Marzu 2019 li jissupplimenta r-Regolament (UE) Nru 1308/2013 tal-Parlament Ewropew u tal-Kunsill f’dak li jirrigwarda ż-żoni ta’ vitikultura li fihom tista’ tiżdied il-qawwa alkoħolika, il-prattiki enoloġiċi awtorizzati u r-restrizzjonijiet applikabbli għall-produzzjoni u l-konservazzjoni tal-prodotti tad-dielja, il-persentaġġ minimu tal-alkoħol għall-prodotti sekondarji u r-rimi tagħhom, u l-pubblikazzjoni tal-fajls tal-OIV (ĠU L 149, 7.6.2019, p. 1, ELI: http://data.europa.eu/eli/reg_del/2019/934/oj).


ANNESS

L-Istati Membri li huma Membri tal-Organizzazzjoni Internazzjonali tad-Dielja u l-Inbid (OIV) li jaġixxu b'mod konġunt f'isem l-Unjoni għandhom jappoġġaw l-abbozzi tar-riżoluzzjonijiet li ġejjin fl-istadju 7 fl-Assemblea Ġenerali tal-OIV skedata għat-18 ta' Ottubru 2024:

—

OENO-MICRO 23-740: Aġġornament tal-monografiji fir-rigward ta' prodotti u sottoprodotti ta' ħmejjer mhux Saccharomyces,

—

OENO-SPECIF 23-723: Aġġornament tal-monografija u tal-kodiċi dwar il-proteina li toriġina mill-pjanti (irtirar tal-qamħ),

—

OENO-TECHNO 15-581B: Trattament bl-aċidu fumariku fl-inbid għall-aċidifikazzjoni,

—

OENO-TECHNO 20-672B: Trattament b'silika mesoporuża funzjonalizzata (FMS) għall-istabbilizzazzjoni tal-proteini tal-inbejjed.


ELI: http://data.europa.eu/eli/dec/2024/2708/oj

ISSN 1977-074X (electronic edition)