|
16.4.2021 |
MT |
Il-Ġurnal Uffiċjali tal-Unjoni Ewropea |
L 131/183 |
DEĊIŻJONI TA’ IMPLIMENTAZZJONI TAL-KUMMISSJONI (UE) 2021/626
tal-14 ta’ April 2021
li tistabbilixxi l-Portal InvestEU u tfassal l-ispeċifikazzjonijiet tekniċi tiegħu
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2021/523 tal-Parlament Ewropew u tal-Kunsill tal-24 ta’ Marzu 2021 li jistabbilixxi l-Programm InvestEU u li jemenda r-Regolament (UE) 2015/1017 (1), u b’mod partikolari l-Artikolu 26 tiegħu,
Billi:
|
(1) |
Jenħtieġ li l-portal InvestEU jikkontribwixxi għall-katalizzazzjoni u l-aċċellerazzjoni tal-iżvilupp u r-riżultati tal-proġetti ta’ investiment fl-Unjoni. |
|
(2) |
Skont l-Artikolu 26(2) tar-Regolament (UE) 2021/523, il-proġetti li huma kompatibbli mad-dritt u l-politiki tal-Unjoni biss għandhom jiġu elenkati fil-Portal InvestEU. Jenħtieġ li jiġu stabbiliti kriterji ta’ ammissjoni biex jiġi żgurat li dan ir-rekwiżit jiġi ssodisfat. |
|
(3) |
Sabiex tiġi żgurata ġestjoni trasparenti tal-Portal InvestEU, jenħtieġ li jiġu stabbiliti l-ispeċifikazzjonijiet tekniċi tiegħu, |
ADOTTAT DIN ID-DEĊIŻJONI:
Artikolu 1
Jiġi stabbilit il-Portal InvestEU. Dan għandu jkun konformi mal-ispeċifikazzjonijiet tekniċi stipulati fl-Anness I.
Artikolu 2
L-inklużjoni tal-proġetti fl-Portal InvestEU għandu jkun konformi mal-kriterji ta’ ammissjoni li ġejjin:
|
(a) |
il-proġett (jew il-programm li jikkonsisti minn proġetti iżgħar) għandu jkollu daqs minimu ta’ EUR 500 000 f’termini ta’ investimenti meħtieġa; |
|
(b) |
il-proġett għandu jkun kopert mill-oqsma eliġibbli għal operazzjonijiet ta’ finanzjament u investiment kif stabbilit fl-Anness II tar-Regolament (UE) 2021/523; |
|
(c) |
il-promotur ma għandux jiġi eskluż minn kuntratti ffinanzjati mill-baġit tal-Unjoni jew issanzjonat għal kondotta professjonali ħażina serja, attivitajiet kriminali, jew nuqqasijiet sinifikanti fil-konformità mal-obbligi tiegħu skont ir-Regolament (UE, Euratom) 2018/1046 tal-Parlament Ewropew u tal-Kunsill (2); |
|
(d) |
il-proġett ma għandux jikkostitwixxi attivitajiet esklużi kif stabbilit fil-punt B tal-Anness V tar-Regolament (UE) 2021/523; |
|
(e) |
il-proġett għandu jkun jinsab fl-Unjoni, jew f’pajjiż jew territorju ekstra-Ewropew marbut ma’ Stat Membru kif stabbilit fl-Anness II tat-TFUE; |
|
(f) |
il-proġett ma għandux jinvolvi riskji għar-reputazzjoni tal-Kummissjoni; |
|
(g) |
l-implimentazzjoni tal-proġett għandha tkun inbdiet jew għandha tkun mistennija li tibda fi żmien tliet snin mid-data tal-preżentazzjoni lill-Portal InvestEU; |
|
(h) |
il-proġett għandu jkun deskritt b’mod ċar fl-applikazzjoni tal-proġett bħala proġett ta’ investiment u l-informazzjoni pprovduta fiha għandha tkun preċiża u għandha tispeċifika l-ammont ta’ finanzjament meħtieġ għat-twettiq tal-proġett; u |
|
(i) |
il-proġett għandu jkun kompatibbli mad-dritt u l-politiki tal-Unjoni. |
Artikolu 3
Ma għandha tintalab l-ebda tariffa għall-ipproċessar tal-applikazzjonijiet għall-inklużjoni ta’ proġett fil-Portal InvestEU.
Artikolu 4
Din id-Deċiżjoni għandha tidħol fis-seħħ fit-tielet jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fi Brussell, l-14 ta’ April 2021.
Għall-Kummissjoni
Il-President
Ursula VON DER LEYEN
(1) ĠU L 107, 26.3.2021, p. 30.
(2) Ir-Regolament (UE, Euratom) 2018/1046 tal-Parlament Ewropew u tal-Kunsill tat-18 ta’ Lulju 2018 dwar ir-regoli finanzjarji applikabbli għall-baġit ġenerali tal-Unjoni, li jemenda r-Regolamenti (UE) Nru 1296/2013, (UE) Nru 1301/2013, (UE) Nru 1303/2013, (UE) Nru 1304/2013, (UE) Nru 1309/2013, (UE) Nru 1316/2013, (UE) Nru 223/2014, (UE) Nru 283/2014, u d-Deċiżjoni Nru 541/2014/UE u li jħassar ir-Regolament (UE, Euratom) Nru 966/2012 (ĠU L 193, 30.7.2018, p. 1).
ANNESS
SPEĊIFIKAZZJONIJIET TEKNIĊI TAL-PORTAL INVESTEU
1. Deskrizzjoni ġenerali
Il-Portal InvestEU għandu jkun bażi tad-data tal-proġetti li tkun faċli biex taċċessaha u biex tużaha, u li tipprovdi informazzjoni rilevanti għal kull proġett, u b’hekk tipprovdi mezz għall-promoturi tal-proġetti biex jagħmlu l-proġetti li qed jitolbu finanzjament għalihom viżibbli għall-investituri, inklużi d-donaturi u l-filantropi. Informazzjoni dettaljata dwar il-proġett għandha tkun disponibbli għall-utenti rreġistrati biss.
Il-pubblikazzjoni ta’ proġett fuq il-Portal InvestEU ma għandhiex tfisser li approvat mill-Kummissjoni. L-inklużjoni ta’ proġetti fil-Portal tal-InvestEU għandha tkun mingħajr preġudizzju għad-deċiżjonijiet dwar il-proġetti finali li jintgħażlu għas-sostenn skont ir-Regolament (UE) 2021/523, skont kull strument ieħor tal-Unjoni, jew għad-deċiżjonijiet dwar il-finanzjament pubbliku.
Il-komponenti ewlenin tal-Portal InvestEU għandhom ikunu:
|
(1) |
portal pubbliku: parti mis-sit tal-programm InvestEU li fiha informazzjoni disponibbli għall-pubbliku, inkluż:
|
|
(2) |
pjattaforma online għall-utenti rreġistrati (“front office”): parti mis-Sistema ta’ Informazzjoni Maniġerjali tal-InvestEU li tippermetti r-reġistrazzjoni tal-utenti (inklużi l-promoturi tal-proġetti u l-investituri) u li tipprovdi informazzjoni dettaljata, bħal:
|
|
(3) |
pjattaforma interna (“back office”): parti mis-Sistema ta’ Informazzjoni Maniġerjali tal-InvestEU użata mis-servizzi tal-Kummissjoni għall-finijiet ta’ skrinjar u ġestjoni. |
2. Ġestjoni tal-Portal InvestEU
Il-Portal InvestEU għandu jiġi ġestit mill-Kummissjoni. Il-kontenut tal-Portal għandu jiġi ġġenerat mill-promoturi tal-proġett, jiġifieri minn entitajiet ġuridiċi privati u pubbliċi. Il-Portal jista’ jkun appoġġat minn avvenimenti mmirati.
Il-parteċipazzjoni tal-promoturi tal-proġett u tal-utenti tas-sit irreġistrati l-oħrajn fil-Portal InvestEU għandha tkun soġġetta għall-aċċettazzjoni tagħhom tal-Patti u l-Kundizzjonijiet li għandu jkollhom l-għan li jiżguraw il-kwalità tal-informazzjoni ppubblikata rċevuta mill-promoturi tal-proġett filwaqt li jagħmluha ċara li l-Kummissjoni ma tagħtix garanzija dwar il-preċiżjoni tal-informazzjoni ppubblikata u ma tista’ tinżamm responsabbli għall-ebda pretensjoni bbażata fuq il-pubblikazzjoni tal-proġett.
Dikjarazzjoni ta’ ċaħda ta’ responsabbiltà għandha twissi lill-utenti tas-sit li l-Kummissjoni ma tistax tiggarantixxi l-preċiżjoni tal-informazzjoni ppubblikata u li l-investituri potenzjali jkollhom iwettqu d-diliġenza dovuta proprja tagħhom, inkluż rigward aspetti finanzjarji u kull aspett ieħor rilevanti għad-deċiżjoni tagħhom dwar jekk għandhomx jinvestu fi proġett.
Għandha tiġi stabbilita ħarsa ġenerali lejn is-servizzi ta’ konsulenza pubblika fil-livell nazzjonali. Il-Kummissjoni għandha tibgħat proġetti li jissodisfaw il-kundizzjonijiet stabbiliti fl-Artikolu 2 lis-sħab ta’ implimentazzjoni tal-InvestEU rilevanti. Meta jkun xieraq u meta jkun jeżisti inizjattiva konsultattiva, il-Kummissjoni għandha tibgħat ukoll tali proġetti liċ-Ċentru ta’ Konsulenza tal-InvestEU.
3. Skrinjar tal-proġett
Is-servizzi tal-Kummissjoni għandhom iwettqu skrinjar tal-proġett abbażi tal-kriterji ta’ ammissjoni stabbiliti fl-Artikolu 2. Xi aspetti tekniċi tal-proċess ta’ validazzjoni, bħall-verifika tal-identità tal-promoturi tal-proġett, jistgħu jiġu esternalizzati lil terzi. L-Istati Membri għandhom jiġu mistiedna jaħtru punt ta’ kuntatt wieħed jew aktar għall-finijiet tal-iskrinjar ta’ proġetti b’implikazzjonijiet reali u diretti għas-sigurtà, b’mod partikolari fis-setturi tal-ispazju, tad-difiża u taċ-ċibersigurtà. Is-Sistema ta’ Identifikazzjoni Bikrija u ta’ Esklużjoni (EDES) għandha tiġi kkonsultata kif xieraq.
Il-pubblikazzjoni tal-informazzjoni ppreżentata mill-promoturi għandha tiġi miċħuda jekk l-informazzjoni ma tkunx preċiża jew jekk il-proġett ma jissodisfax ir-rekwiżiti stabbiliti fl-Artikolu 2.
L-informazzjoni dwar proġett għandha titneħħa mill-Portal InvestEU jekk ma tkunx ġiet aġġornata mill-promotur tal-proġett għal tliet snin.