Foilsítear an teachtaireacht seo i gcomhréir le hAirteagal 17(5) de Rialachán Tarmligthe (AE) 2019/33 ón gCoimisiún (1).

FORMHEAS AR LEASÚ CAIGHDEÁNACH A CHUR IN IÚL

‘Lanzarote’

PDO-ES-A0113-AM02

Dáta na teachtaireachta: 13 Eanáir 2025

TUAIRISC AR AN LEASÚ FORMHEASTA AGUS NA CÚISEANNA LEIS

1.   FOCLAÍOCHT FHEABHSAITHE SA ROINN MAIDIR LEIS AN NASC

Tuairisc:

Tá tuairiscí ann ar an nasc do gach catagóir.

Baineann an leasú seo le pointe 7 den tsonraíocht táirge agus le pointe 8 den doiciméad aonair.

Is leasú caighdeánach é toisc nach ionann é agus aon cheann de na hathruithe a leagtar amach in Airteagal 24(3) de Rialachán (AE) 2024/1143 ó Pharlaimint na hEorpa agus ón gComhairle maidir le tásca geografacha.

Cúis:

Is é atá mar aidhm leis sin an nasc a neartú, ós rud é nach ndearnadh nasc de réir catagóire a bhunú leis an doiciméad bunaidh. Ní chuireann sé an nasc i mbaol, ach neartaíonn sé é. Thairis sin, ceartaíonn sé mainneachtain reachtaíocht a chomhlíonadh, ós rud é go gceanglaítear le hAirteagal 5(2) de Rialachán Cur Chun Feidhme (AE) 2019/34, gurb amhlaidh, i gcás ina gcumhdaítear in iarratas catagóirí éagsúla táirgí fíniúna, go léireofar na mionsonraí a dhearbhaíonn an nasc i gcás gach ceann de na táirgí fíniúna lena mbaineann.

2.   CINEÁLACHA EILE PACÁISTITHE A CHUR SAN ÁIREAMH

Tuairisc:

Leathnaíodh an raon ábhar le haghaidh phacáistiú na bhfíonta a chumhdaítear. Go dtí seo, níor ceadaíodh ach buidéil ghloine agus pacáistiú ‘mála i mbosca’ i gcás toirteanna áirithe. Ceadaítear leis an leasú seo anois aon phacáistiú a chomhlíonann na ceanglais riachtanacha sláinte.

Déanann an t-athrú seo difear do phointe 8.b.10 den tsonraíocht táirge agus ní déanann sé difear don doiciméad aonair.

Is leasú caighdeánach é toisc nach ionann é agus aon cheann de na hathruithe a leagtar amach in Airteagal 24(3) de Rialachán (AE) 2024/1143 ó Pharlaimint na hEorpa agus ón gComhairle maidir le tásca geografacha.

Cúis:

Is é an aidhm atá ann deireadh a chur le srianta ar mhargú an táirge i gcineálacha eile pacáistithe nach ndéanann difear dochrach do cháilíocht, d’íomhá ná do ghradam na bhfíonta faoi chosaint, agus ar an gcaoi sin freastal ar éileamh oibreoirí an ATFC sin, agus é a dhéanamh níos éasca an táirge a mhargú agus an pacáistiú a oiriúnú do nósanna nua tomhaltóirí.

3.   AONAID GHEOGRAFACHA NÍOS LÚ A CHUIMSIÚ

Tuairisc:

Áirítear na bardais seo a leanas mar aonaid gheografacha níos lú: Arrecife, Haría, San Bartolomé, Teguise, Tías, Tinajo agus Yaiza Na riachtanais úsáide atá acu a rialáil agus an chaoi a bhfuil siad le feiceáil ar an lipéad.

Déanann an t-athrú sin difear do phointe 8.c.ii den tsonraíocht táirge agus do phointe 9 den doiciméad aonair.

Is leasú caighdeánach é toisc nach ionann é agus aon cheann de na hathruithe a leagtar amach in Airteagal 24(3) de Rialachán (AE) 2024/1143 ó Pharlaimint na hEorpa agus ón gComhairle maidir le tásca geografacha.

Cúis:

Déantar an leasú seo i gcomhréir le hAirteagal 120(1)(g) de Rialachán (AE) Uimh. 1308/2013 ó Pharlaimint na hEorpa agus ón gComhairle, agus le hAirteagal 55 de Rialachán Tarmligthe (AE) 2019/33 ón gCoimisiún.

Is é an aidhm atá ann éilimh na dtomhaltóirí a shásamh maidir le heolas a bheith acu ar áit tionscnaimh bheacht na bhfíonta, agus freagairt do leas agus d’éilimh na dtáirgeoirí, na bhfíonsaothraithe agus na bhfíonlann i dtaca le saintréithe sonracha limistéir éagsúla an oileáin a shainaithint agus aird a tharraingt orthu.

DOICIMÉAD AONAIR

1.   Ainm (nó ainmneacha)

Lanzarote

2.   Cineál an táisc gheografaigh

ATFC – Ainmniúchán Tionscnaimh faoi Chosaint

3.   Catagóirí na dtáirgí fíniúna

1.

Fíon

3.	Fíon licéir

4.	Fíon súilíneach

5.	Fíon súilíneach ar ardchaighdeán

16.	Fíon ó fhíonchaora ró-aibí

3.1.   Cód Ainmníochta Comhcheangailte

—	22 - DEOCHANNA, BIOTÁILLÍ AGUS FÍNÉAGAR 2204 - Fíon ó fhíonchaora úra, lena n-áirítear fíonta treisithe; úrfhíon fíonchaor seachas é sin atá faoi cheannteideal 2009

4.   Tuairisc ar an bhfíon (nó ar na fíonta)

1.   FÍONTA – fíonta geala, rosé agus dearga

TUAIRISC ACHOMAIR I SCRÍBHINN

Ní mór na fíonta a bheith ina bhfíonta geala, rosé agus dearga,‘darach’ agus ‘gan dair’. Tá siad go léir gléigeal agus gléineach ó thaobh amhairc de. Bíonn dath idir dath buí na tuí agus buí scothghlas ar na fíonta geala. Féadfaidh na fíonta rosé agus dearga a bheith dearg ar fud an raoin. De réir an bholaidh, bíonn siad láidir agus dea-bholaithe torthaíocha agus bláthacha orthu de dhéine mheasartha. De réir an bhlais, tá siad úr, cothromaithe agus leanúnach. Bíonn blasanna fanaile, spíosra, balsamacha agus rósta ar fhíonta a aosaítear i mbairillí, agus bíonn iarbhlas dian agus leanúnach orthu.

*	I gcás nach bhfuil teorainneacha sonraithe, ní mór an reachtaíocht atá i bhfeidhm a chomhlíonadh.

*	Aigéadacht luaineach uasta i bhfíonta:

—	3 mhí ar a laghad caite i mbairillí: 1,08 g/l (18 meq/l) i bhfíonta geala agus rosé agus 1,2 g/l (20 meq/l) i bhfíonta dearga.

—	aosaithe ar feadh dhá bhliain ar a laghad: 1.5 g/l (25 meq/l)

*	Uaschion sulfair:

Agus méid siúcra níos lú ná 5 g/l ann:

—	150 mg/l i gcás fíonta dearga.

—	200 mg/l i gcás fíonta geala agus rosé.

Agus méid siúcra atá cothrom le 5 g/l nó níos mó ná sin:

—	200 mg/l i gcás fíonta dearga

—	250 mg/l i gcás fíonta geala agus rosé.

Saintréithe anailíseacha ginearálta

—	Neart alcóil iomlán uasta (in % de réir toirte) —

—	Neart alcóil iarbhír íosta (in % de réir toirte): 9

—	Aigéadacht iomlán íosta: 3,5 gram in aghaidh an lítir, arna sloinneadh mar aigéad tartarach

—	Aigéadacht luaineach uasta (i milleachoibhéisí in aghaidh an lítir): 13,33

—	Dé-ocsaíd sulfair iomlán uasta (i milleagraim in aghaidh an lítir): —

2.   FÍON LICÉIR

TUAIRISC ACHOMAIR I SCRÍBHINN

Bíonn na fíonta geala licéir gléigeal ó thaobh amhairc de, agus bíonn dath idir dath buí na tuí agus dath buí scothghlas orthu; bíonn dath ‘craiceann oinniúin’ agus dath bándearg sú craobh ar na fíonta licéir rosé, agus d’fhéadfadh imireacha corcairghorma a bheith orthu, agus bíonn dath dearg ar na fíonta dearga ar fud an raoin. De réir an bholaidh, bíonn siad láidir agus dea-bholaithe torthaíocha agus bláthacha orthu. Torthaí aibí, rísínithe agus criostalaithe. De réir an bhlais, bíonn na fíonta dian, blasta, cothromaithe agus an-chasta.

*	I gcás nach bhfuil teorainneacha sonraithe, ní mór an reachtaíocht atá i bhfeidhm a chomhlíonadh.

*	Uaschion sulfair:

—	150 mg/l i gcás inar lú an méid siúcra ná 5 g/l;

—	200 mg/l i gcás nach lú an méid siúcra ná 5 g/l.

Saintréithe anailíseacha ginearálta

—	Neart alcóil iomlán uasta (in % de réir toirte): —

—	Neart alcóil iarbhír íosta (in % de réir toirte): 15

—	Aigéadacht iomlán íosta: 3,5 gram in aghaidh an lítir, arna sloinneadh mar aigéad tartarach

—	Aigéadacht luaineach uasta (i milleachoibhéisí in aghaidh an lítir): 25

—	Dé-ocsaíd sulfair iomlán uasta (i milleagraim in aghaidh an lítir): —

3.   FÍON SÚILÍNEACH

TUAIRISC ACHOMAIR I SCRÍBHINN

Tá na fíonta súilíneacha gléigeal ó thaobh amhairc de agus bolgáin mhíne agus coróin sheasta acu. De réir an bholaidh, tá dea-bholadh glan torthaí úra agus bláthanna bána orthu. Blasanna d’arán úrbhácáilte. Is fíonta láidre iad na fíonta rosé a bhfuil dea-bholaithe torthaíocha orthu. Taitneamhach, fíneálta agus galánta sa bhéal.

*	I gcás nach bhfuil teorainneacha sonraithe, ní mór an reachtaíocht atá i bhfeidhm a chomhlíonadh.

Saintréithe anailíseacha ginearálta

—	Neart alcóil iomlán uasta (in % de réir toirte): —

—	Neart alcóil iarbhír íosta (in % de réir toirte): 10

—	Aigéadacht iomlán íosta: 5,5 gram in aghaidh an lítir, arna sloinneadh mar aigéad tartarach

—	Aigéadacht luaineach uasta (i milleachoibhéisí in aghaidh an lítir): 13,33

—	Dé-ocsaíd sulfair iomlán uasta (i milleagraim in aghaidh an lítir): 185

4.   FÍON SÚILÍNEACH AR ARDCHAIGHDEÁN

TUAIRISC ACHOMAIR I SCRÍBHINN

Tá na fíonta súilíneacha ar ardchaighdeán gléigeal ó thaobh amhairc de agus bolgáin mhíne agus coróin sheasta acu. De réir an bholaidh, tá dea-bholadh soiléir, úr orthu ach mar aon le bláthanna bána. Blasanna d’arán úrbhácáilte. Is fíonta láidre iad na fíonta rosé a bhfuil dea-bholaithe torthaíocha orthu. Taitneamhach, fíneálta agus galánta sa bhéal.

*	I gcás nach bhfuil teorainneacha sonraithe, ní mór an reachtaíocht atá i bhfeidhm a chomhlíonadh.

Saintréithe anailíseacha ginearálta

—	Neart alcóil iomlán uasta (in % de réir toirte): —

—	Neart alcóil iarbhír íosta (in % de réir toirte): 10

—	Aigéadacht iomlán íosta: 5,5 gram in aghaidh an lítir, arna sloinneadh mar aigéad tartarach

—	Aigéadacht luaineach uasta (i milleachoibhéisí in aghaidh an lítir): 13,33

—	Dé-ocsaíd sulfair iomlán uasta (i milleagraim in aghaidh an lítir): 185

5.   FÍON Ó FHÍONCHAORA RÓ-AIBÍ

TUAIRISC ACHOMAIR I SCRÍBHINN

Tá na fíonta ó fhíonchaora ró-aibí gléineach agus gléigeal ó thaobh amhairc de, tá dath buí órga orthu i gcás na gcineálacha geala nó dath corcra orthu i gcás na gcineálacha dearga. De réir an bholaidh, tá siad láidir agus an-aramatach. De réir an bhlais, tá siad measartha olartha agus torthaíoch.

*	I gcás nach bhfuil teorainneacha sonraithe, ní mór an reachtaíocht atá i bhfeidhm a chomhlíonadh.

*	Uaschion sulfair:

Agus méid siúcra níos lú ná 5 g/l ann:

—	150 mg/l i gcás fíonta dearga.

—	200 mg/l i gcás fíonta geala agus rosé.

Agus méid siúcra atá cothrom le 5 g/l nó níos mó ná sin:

—	200 mg/l i gcás fíonta dearga

—	250 mg/l i gcás fíonta geala agus rosé.

Saintréithe anailíseacha ginearálta

—	Neart alcóil iomlán uasta (in % de réir toirte): —

—	Neart alcóil iarbhír íosta (in % de réir toirte): 13

—	Aigéadacht iomlán íosta: 3.5 i milleachoibhéisí in aghaidh an lítir

—	Aigéadacht luaineach uasta (i milleachoibhéisí in aghaidh an lítir): 25

—	Dé-ocsaíd sulfair iomlán uasta (i milleagraim in aghaidh an lítir): —

5.   Cleachtais fhíoneolaíocha

5.1.   Cleachtais fhíoneolaíocha shonracha

1.   Cleachtas fíoneolaíoch sonrach

Ní mór na fíonchaora a bhuain go roghnaitheach, gan ach baisceanna sláintiúla fíonchaor a úsáid, ag a bhfuil neart alcóil nádúrtha íosta 10,5 % de réir toirte le haghaidh cineálacha atá beartaithe chun fíonta geala, rosé, dearga agus súilíneacha a dhéanamh; 12 % de réir toirte le haghaidh fíonta licéir; agus 16 % de réir toirte i gcás fíonta a dhéantar as fíonchaora ró-aibí. Cuirfear brúnna iomchuí i bhfeidhm maidir le húrfhíon agus fíon a eastóscadh agus maidir leis an méid sin scaradh ón marc, agus uastáirgeacht 74 % a bheith ann.

2.   Srian ábhartha ar dhéanamh na bhfíonta

Ní fhéadfar ach córais mheicniúla nach ndéanann damáiste do chodanna soladacha triopall a úsáid chun úrfhíon fíonchaor úr a eastóscadh ó fhíonchaora úra san fhíonóireacht lena mbaineann coipeadh as an gcraiceann, nó fíon ó mharc fíonchaor coipthe san fhíonóireacht dhearg. Go háirithe, toirmiscfear brúiteoirí lártheifeacha ardluais a úsáid, agus brúnna leanúnacha a úsáid, ina gcuireann scriú Airciméidéis brú i gcoinne frithmheáchain. Tá toirmeasc sainráite ann freisin ar chleachtais réamhthéimh a úsáid le haghaidh úrfhíona nó fíona i láthair mairc chun iallach a chur ar eastóscadh lí.

3.   Cleachtas saothraithe

Is iad na córais agus na cleachtais saothraithe na cinn a bhfuil meas acu ar cháilíocht an táirge nó a fheabhsaíonn cáilíocht an táirge, cé nach bhfuil siad traidisiúnta don oileán (sraith ghainimh bholcánaigh agus cosaint ghaoithe a úsáideann cuasa nó ballaí cloiche). Dlús plandála: ní rachaidh sé thar 3 000 fíniúin in aghaidh an heicteáir. Is fíniúnacha neamhspleácha iad na córais treoraithe a phrúnáiltear go híseal leis an talamh, agus parral (pergola). Údaraítear uisciú tacaíochta le linn treorú fíniúnacha agus i bhfíonghoirt ina dtáirgtear fíonchaora, más rud é gurb é feabhsú cáilíochta is aidhm leis sin.

5.2.   Uastáirgeacht

7 000 cileagram d’fhíonchaora in aghaidh an heicteáir

51,80 heictilítear in aghaidh an heicteáir

6.   Limistéar geografach críochaithe

Áirítear oileán iomlán Lanzarote i limistéar táirgeachta, stórála, aosaithe agus buidéalaithe na bhfíonta sin.

7.   Cineál (nó cineálacha) fíonchaor

ALBILLO CRIOLLO

BASTARDO NEGRO - BABOSO NEGRO

BREVAL

BURRABLANCA

CABERNET SAUVIGNON

GUAL

LISTAN BLANCO DE CANARIAS

LISTAN NEGRO - ALMUÑECO

MALVASÍA ROSADA

MALVASÍA VOLCÁNICA

MERLOT

MUSCAT OF ALEXANDRIA

MOSCATEL NEGRO

NEGRAMOLL

PEDRO XIMENEZ

PINOT NOIR

RUBY CABERNET

SYRAH

TEMPRANILLO

TINTILLA

TORRONTÉS

VERDELLO

VIJARIEGO BLANCO - DIEGO

VIJARIEGO NEGRO

8.   Tuairisc ar an nasc (nó ar na naisc)

8.1.   Fíonta geala, rose agus dearga

Tá córas saothraithe ag Lanzarote atá oiriúnach do dhrochdhálaí aimsire; báisteach íseal a bhfuil a meáin bhliantúla níos lú ná 150 mm, agus tionchar na ngaoth trádála beagnach seasmhach ar feadh na bliana, rud a fhágann gur gá na fíonghoirt a chosaint le ballaí cloiche. Is é an toradh a bhíonn air sin fíonta geala úra mianracha ag a bhfuil salandacht shainiúil. Tá dea-bholaithe torthaíocha de dhéine mheasartha ar na fíonta rosé agus tá siad cothromaithe i dtéarmaí aigéadachta agus neart alcóil. Bíonn na fíonta dearga éadrom, agus saintréith mhianrach ar leith ag baint leo.

8.2.   Fíon licéir

In ainneoin a mhéide agus a thír-raoin, tá miocraeráidí éagsúla agus uaireanta éagsúla de sholas na gréine ag an oileán, agus is é 7.8 uair an chloig/sa lá an meánluach i rith na mbliana. Treisítear na fíonta a fhaightear dá bhrí sin le halcól agus bíonn tiúchan ard siúcra iontu. Aosaíonn siad chun teacht chun bheith ina bhfíonta a bhfuil castacht aramatach nach beag ag baint leo.

8.3.   Fíon súilíneach

In ainneoin ár ngaireacht do mhór-roinn na hAfraice agus a bhuí le tionchar na ngaoth trádála, is é 20 °C meánteocht an oileáin, agus éagsúlachtaí teochta ann idir na míonna is fuaire agus is teo, agus an mheándifríocht sa teocht ann idir mí Eanáir agus mí Lúnasa, is é sin thart ar 7 °C. Fágann sé sin gur féidir fíonta aramatacha a bhfuil aigéadacht ard acu a fháil, rud a thugann úire dóibh sa bhéal.

8.4.   Fíon súilíneach ar ardchaighdeán

In ainneoin ár ngaireacht do mhór-roinn na hAfraice agus a bhuí le tionchar na ngaoth trádála, is é 20 °C meánteocht an oileáin, agus éagsúlachtaí teochta ann idir na míonna is fuaire agus is teo, agus an mheándifríocht sa teocht ann idir mí Eanáir agus mí Lúnasa, is é sin thart ar 7 °C. Fágann sé sin gur féidir fíonta aramatacha a bhfuil aigéadacht ard acu a fháil, rud a thugann úire dóibh sa bhéal.

Tá an toisc dhaonna fíor-riachtanach chun saintréithe an fhíona seo a bhaint amach, agus ní mór an róbhrú a bheith níos mó ná 3,5 bar nó cothrom leis sin, chomh maith le neart alcóil iomlán an bhunfhíona a bheidh 9 % de réir toirte ar a laghad. Is é sin an saintréith a idirdhealaíonn é ón gcatagóir roimhe seo.

8.5.   Fíon ó fhíonchaora ró-aibí

Maidir leis an aeráid, tá meánteochtaí éadroma ag Lanzarote i rith na bliana agus tá Lanzarote nochta ag an ngrian ar feadh níos mó ná 2 800 uair an chloig ar an meán in aghaidh na bliana. Leis sin, in éineacht leis na córais saothraithe thraidisiúnta chuachthreoraithe agus/nó treoraithe parral íseal, is féidir leis na cineálacha a úsáidtear le haghaidh an chineáil fíonóireachta seo tiúchan siúcra idéalach agus paraiméadair nirt alcóil a bhaint amach chun na críche sin, as a n-eascraíonn fíonta atá an-aramatach agus dea-chothromaithe i dtéarmaí aigéadachta, milseachta agus alcóil.

9.   Coinníollacha fíor-riachtanacha breise (pacáistiú, lipéadú, ceanglais eile)

Creat dlíthiúil:

Sa reachtaíocht náisiúnta

An cineál coinníll breise:

Pacáistiú laistigh den limistéar geografach críochaithe

Tuairisc ar an gcoinníoll:

Mar gheall ar shaintréithe speisialta an táirge, agus ar an ngá atá le cáil an ainmniúcháin tionscnaimh faoi chosaint a chosaint, ceanglaítear fíonta ATFC ‘Lanzarote’ a bhuidéalú go heisiach i bhfíonlanna atá cláraithe sa chlár fíonlainne iomchuí. Caillfidh an fíon an ceart an t-ainmniúchán a úsáid mura gcomhlíontar an ceanglas sin.

Creat dlíthiúil:

Sa reachtaíocht náisiúnta

An cineál coinníll breise:

Forálacha breise a bhaineann le lipéadú

Tuairisc ar an gcoinníoll:

Ní mór ‘Lanzarote’ a mharcáil ar lipéid na bhfíonta ATFC mar ainm an ainmniúcháin tionscnaimh.

Féadfar aonaid gheografacha níos lú a lua freisin: Arrecife, Haría, San Bartolomé, Teguise, Tías, Tinajo agus Yaiza

Chun bheith in ann ainm an aonaid gheografaigh níos lú a úsáid ar an lipéad, ní mór an fíon a dhéanamh go heisiach as fíonchaora a tháirgtear san aonad geografach níos lú sin. Ní mór do tháirgeadh, aosú, i gcás inarb infheidhme, agus buidéalú a dhéanamh laistigh den aonad geografach sin freisin.

Ar an lipéad, ní ceadmhach ainm an aonaid gheografaigh níos lú a bheith le feiceáil i gcarachtair atá níos mó ná na carachtair a úsáidtear le haghaidh an ainmniúcháin tionscnaimh faoi chosaint ‘Lanzarote’.

Ní mór séalaí ráthaíochta, lipéid nó lipéid thánaisteacha uimhrithe, arna n-eisiúint ag an gcomhlacht bainistíochta, a bheith ag gach cineál pacáistithe fíona lena thomhailt. Ní mór iad sin a ghreamú ag an bhfíonlann féin, ar bhealach nach féidir iad a athúsáid.

Nasc chuig an tsonraíocht táirge

https://www.gobiernodecanarias.org/cmsgob2/export/sites/agpsa/icca/galerias/doc/calidad/v/lz/pliego.pdf

---

(1)   IO L 9, 11.1.2019, lch. 2.