European flag

Iris Oifigiúil
an Aontais Eorpaigh

GA

Sraith L


2026/450

1.7.2026

RIALACHÁN TARMLIGTHE (AE) 2026/450 ÓN gCOIMISIÚN

an 27 Feabhra 2026

lena leasaítear Rialachán (AE) 2019/1241 a mhéid a bhaineann le bearta a bhunú chun comhlíonadh na mbeart maolaithe atá ann cheana chun gabhálacha de thaisme de líon na muc mhara atá i gCeartlimistéar Mhuir Bhailt (Phocoena phocoena) a laghdú i Muir Bhailt a áirithiú

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) 2019/1241 ó Pharlaimint na hEorpa agus ón gComhairle an 20 Meitheamh 2019 maidir le hacmhainní iascaigh a chaomhnú agus éiceachórais mhuirí a chosaint trí bhearta teicniúla, lena leasaítear Rialacháin (CE) Uimh. 1967/2006 agus (CE) Uimh. 1224/2009 ón gComhairle agus Rialacháin (AE) Uimh. 1380/2013, (AE) 2016/1139, (AE) 2018/973, (AE) 2019/472, agus (AE) 2019/1022 ó Pharlaimint na hEorpa agus ón gComhairle, agus lena n-aisghairtear Rialacháin (CE) Uimh. 894/97, (CE) Uimh. 850/98, (CE) Uimh. 2549/2000, (CE) Uimh. 254/2002, (CE) Uimh. 812/2004 agus (CE) Uimh. 2187/2005 ón gComhairle (1), agus go háirithe Airteagal 15(2) de,

De bharr an mhéid seo a leanas:

(1)

Is speiceas atá faoi dhianchosaint í an mhuc mhara (Phocoena phocoena) de réir Iarscríbhinn IV a ghabhann le Treoir 92/43/CEE ón gComhairle (2), ina liostaítear na céiticigh uile mar speiceas ar leas an Aontais a bhfuil dianchosaint de dhíth orthu, agus tá an mhuc mhara liostaithe in Iarscríbhinn II a ghabhann leis an Treoir sin mar speiceas ar leas an Aontais a bhfuil gá le limistéir speisialta caomhnaithe a ainmniú chun í a chosaint.

(2)

De réir na Comhairle Idirnáisiúnta um Thaiscéalaíocht na Mara (ICES), is í an mhuc mhara an t-aon speiceas céiticeach cónaitheach i Muir Bhailt, agus dhá phobal ar leith aige: pobal Cheartlimistéar Mhuir Bhailt agus pobal Mhuir na Beilte. Tá pobal Phríomh-imchuach Mhuir Bhailt fós aicmithe mar phobal atá i mbaol criticiúil ar liosta dearg IUCN agus meastar go bhfuil níos lú ná 500 ainmhí ann (3).

(3)

An 15 Nollaig 2021, ghlac an Coimisiún Rialachán Tarmligthe (AE) 2022/303 (4) lena leasaítear Rialachán (AE) 2019/1241 a mhéid a bhaineann le bearta chun gabhálacha de thaisme de líon na muc mhara atá i gCeartlimistéar Mhuir Bhailt (Phocoena phocoena) a laghdú i Muir Bhailt.

(4)

Mar a léiríodh in Aithris 18 de Rialachán Tarmligthe (AE) 2022/303, gheall na Ballstáit teacht ar chomhaontú maidir le bearta rialaithe níos mionsonraithe a bheadh nasctha le rialú na mbeart maolaithe arna nglacadh faoi Rialachán Tarmligthe (AE) 2022/303.

(5)

In Iarscríbhinn XIII a ghabhann le Rialachán (AE) 2019/1241, leagtar síos rialacha ar an leibhéal réigiúnach maidir le bearta maolaithe atá ceaptha chun gabhálacha de thaisme de speicis íogaire a laghdú lena n-áirítear céiticigh. Ba cheart do na Ballstáit faireachán agus measúnú a dhéanamh ar éifeachtacht na mbeart maolaithe a bhunaítear faoi Iarscríbhinn XIII.

(6)

An 29 Aibreán 2022, d’iarr Ballstáit Mhuir Bhailt – an Danmhairg, an Ghearmáin, an Eastóin, an Laitvia, an Liotuáin, an Pholainn, an Fhionlainn agus an tSualainn (‘BALTFISH’) – ar an nGrúpa Saineolaithe um Rialú (GSR) BALTFISH bearta rialaithe níos mionsonraithe den sórt sin a mholadh. I mí Lúnasa 2022, mheas GSR gur leor na bearta rialaithe a bhí ann cheana do na limistéir sin ina raibh feistí fuaimchiaptha éigeantach. Maidir leis na limistéir ina bhfuil feidhm ag iamh spásúil/ama, mhol GSR bearta sonracha.

(7)

An 27 Meitheamh 2023 agus bunaithe ar mholtaí GSR, rinne BALTFISH moladh comhpháirteach a thíolacadh maidir le bearta rialaithe níos mionsonraithe den sórt sin. Mheas BALTFISH go n-áiritheofaí leis na bearta rialaithe beartaithe, i gcomhar leis na bearta rialaithe atá ann cheana, go gcomhlíonfaí forálacha Rialachán Tarmligthe (AE) 2022/303. Is éard atá i gceist leis na bearta atá beartaithe tarchur shonraí suímh na soithí a mhéadú go 10 nóiméad agus rialú a dhéanamh ar na soithí uile atá sna limistéir a liostaítear in Iarscríbhinn XIII, Cuid A, pointí 3.1 go 3.4, a ghabhann le Rialachán (AE) 2019/1241, nuair a bheidh feidhm ag srianta nó toirmisc ar iascaireacht le líonta éighníomhacha.

(8)

Rinne an Coiste Eolaíoch, Teicniúil agus Eacnamaíoch um Iascach (CETEI) measúnú dearfach ar mholtaí comhpháirteacha a rinneadh roimhe seo inar cuimsíodh na bearta rialaithe céanna le haghaidh láithreáin Natura 2000 (5) (6), agus tháinig sé ar an gconclúid gur cosúil go mbeadh na bearta rialaithe sin iomchuí, dá gcuirfí chun feidhme iad mar a bhí beartaithe, chun faireachán éifeachtach ar muir a dhéanamh ar láithreáin Natura 2000. I measúnuithe roimhe seo, mhol CETEI bearta rialaithe sonracha a fhorbairt le haghaidh na láithreán sonrach sin, i bhfianaise a laghad a bhíonn siad de ghnáth agus an riosca go bhféadfaí iascaireacht a dhéanamh gan iad a bhrath (7) (8).

(9)

Thairis sin, léiríodh an gá atá leis na bearta sin le déanaí sa Chomhairle ó ICES in 2025 (9), inar shainaithin ICES eangacha geolbhaigh agus traimlí (líonta éighníomhacha) ar na cineálacha trealaimh lena mbaineann an riosca is mó maidir le gabhálacha de thaisme de mhuca mara agus d’athdhearbhaigh sé gur gá feabhas a chur ar an bhfaireachán ar an bpobal agus ar shonraí maidir le hiarracht iascaireachta.

(10)

Tá feidhm ag na bearta rialaithe atá beartaithe (i) ar an leibhéal réigiúnach, (ii) tá dlúthbhaint acu leis na bearta maolaithe arna nglacadh faoi Rialachán Tarmligthe (AE) 2022/303, (iii) tá gá leo chun faireachán a dhéanamh ar a n-éifeachtacht, i gcomhréir le pointe 4 d’Iarscríbhinn XIII a ghabhann le Rialachán (AE) 2019/1241 agus, dá bhrí sin, (iv) rannchuidíonn siad leis an gcuspóir gabhálacha de thaisme de mhuca mara i gCeartlimistéar Mhuir Bhailt a laghdú.

(11)

Is iomchuí, dá bhrí sin, na bearta teicniúla a leagtar amach in Iarscríbhinn XIII, Cuid A, pointe 3 a ghabhann le Rialachán (AE) 2019/1241 a fhorlíonadh.

(12)

Chun go mbeidh a ndóthain ama ag na hoibreoirí na gairis tarchuir iomchuí a fheistiú ar a soithí, ba cheart cur i bhfeidhm phointe 3.5 san Iarscríbhinn a chur siar 12 mhí ón dáta teacht i bhfeidhm.

(13)

Beidh feidhm ag pointe 3.5(a) den Iarscríbhinn go dtí an 10 Eanáir 2028, tráth a bheidh a bheidh feidhm ag na rialacha nua maidir le córais faireacháin soithí a leagtar síos in Airteagal 9 de Rialachán (CE) Uimh. 1224/2009 ón gComhairle (10),

TAR ÉIS AN RIALACHÁN SEO A GHLACADH:

Airteagal 1

Leasaítear Iarscríbhinn XIII a ghabhann le Rialachán (AE) 2019/1241 i gcomhréir leis an Iarscríbhinn a ghabhann leis an Rialachán seo.

Airteagal 2

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh feidhm ag na bearta i bpointe 3.5 den Iarscríbhinn ón 21 Iúil 2027.

Rachaidh na bearta i bpointe 3.5(a) den Iarscríbhinn in éag an 10 Eanáir 2028.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, an 27 Feabhra 2026.

Thar ceann an Choimisiúin

An tUachtarán

Ursula VON DER LEYEN


(1)   IO L 198, 25.7.2019, lch. 105, ELI: http://data.europa.eu/eli/reg/2019/1241/oj.

(2)  Treoir 92/43/CEE ón gComhairle an 21 Bealtaine 1992 maidir le caomhnú gnáthóg nádúrtha agus fána agus flóra fiáine (IO L 206, 22.7.1992, lch. 7, ELI: http://data.europa.eu/eli/dir/1992/43/oj).

(3)  ICES, ‘Iarraidh ón Aontas maidir le tacaíocht do chur chun feidhme an Phlean Gníomhaíochta um Mhuca mara i Muir Bhailt (Ceartlimistéar Mhuir Bhailt)’, sa Tuarascáil ó Choiste Comhairleach, 2024, Comhairle ó ICES 2024, sr.2024.20, https://doi.org/10.17895/ices.advice.27967035.

(4)  Rialachán Tarmligthe (AE) 2022/303 ón gCoimisiún an 15 Nollaig 2021 lena leasaítear Rialachán (AE) 2019/1241 a mhéid a bhaineann le bearta chun gabhálacha de thaisme de líon na muc mhara atá i gCeartlimistéar Mhuir Bhailt (Phocoena phocoena) a laghdú i Muir Bhailt (IO L 46, 25.2.2022, lch. 67, ELI: http://data.europa.eu/eli/reg_del/2022/303/oj).

(5)  An Coiste Eolaíoch, Teicniúil agus Eacnamaíoch um Iascach (CETEI), an 71ú Tuarascáil Iomlánach (STECF-PLEN-22-03), Oifig Foilseachán an Aontais Eorpaigh, Lucsamburg, 2023, doi:10.2760/016673, JRC132078.

(6)  An Coimisiún Eorpach: An tAirmheán Comhpháirteach Taighde, an Coiste Eolaíoch, Teicniúil agus Eacnamaíoch um Iascach, an 77ú Tuarascáil Iomlánach (STECF-PLEN-24-03), Nord, J. agus Doerner, H. eagarthóir(í), Oifig Foilseachán an Aontais Eorpaigh, Lucsamburg, 2024, https://data.europa.eu/doi/10.2760/2392535, JRC140580.

(7)  An Coiste Eolaíoch, Teicniúil agus Eacnamaíoch um Iascach (CETEI), Tuarascáil ón 55ú Cruinniú Iomlánach (PLEN-17-02), Oifig Foilseachán an Aontais Eorpaigh, Lucsamburg; EUR 28359. GA, doi:10.2760/53335.

(8)   Review of joint recommendations for Natura 2000 sites at Dogger Bank, Cleaver Bank, Frisian Front and Central Oyster ground (STECF-19-04), [Athbhreithniú ar mholtaí comhpháirteacha maidir le láithreáin Natura 2000 i meánna Dogger Bank, Cleaver Bank, Frisian Front agus Central Oyster] Oifig Foilseachán an Aontais Eorpaigh, Lucsamburg, 2019, doi:10.2760/422631, JRC117963.

(9)  ICES, Iarraidh ón Aontas maidir le tacaíocht do chur chun feidhme an Phlean Gníomhaíochta um mhuca mara i Muir Bhailt (Ceartlimistéar Mhuir Bhailt), arna cur in ionad comhairle arna soláthar i mí na Nollag 2024. Comhairle ó ICES: Iarrataí Speisialta. Tuarascáil. https://doi.org/10.17895/ices.advice.28616360.v1.

(10)  Rialachán (CE) Uimh. 1224/2009 ón gComhairle an 20 Samhain 2009 lena mbunaítear córas rialaithe Aontais d'fhonn comhlíonadh rialacha an chomhbheartais iascaigh a áirithiú, lena leasaítear Rialacháin (CE) Uimh. 847/96, (CE) Uimh. 2371/2002, (CE) Uimh. 811/2004, (CE) Uimh. 768/2005, (CE) Uimh. 2115/2005, (CE) Uimh. 2166/2005, (CE) Uimh. 388/2006, (CE) Uimh. 509/2007, (CE) Uimh. 676/2007, (CE) Uimh. 1098/2007, (CE) Uimh. 1300/2008, (CE) Uimh. 1342/2008 agus lena n-aisghairtear Rialachán (CEE) Uimh. 2847/93, Rialachán (CE) Uimh. 1627/94 agus Rialachán (CE) Uimh. 1966/2006 (IO L 343, 22.12.2009, lch. 1, ELI: http://data.europa.eu/eli/reg/2009/1224/oj).


IARSCRÍBHINN

In Iarscríbhinn XIII, Cuid A, a ghabhann le Rialachán (AE) 2019/1241, cuirtear an méid seo a leanas in ionad phointe 3.5:

‘3.5.

Beidh feidhm ag na bearta seo a leanas sna limistéir faoi phointí 3.1 go 3.4, i gcás ina bhfuil feidhm ag srianta nó toirmisc ar iascaireacht le líonta éighníomhacha:

(a)

Soithí iascaireachta ar lú ná 12 mhéadar a bhfad iomlán, beidh siad feistithe leis an méid seo a leanas:

(i)

córas um fhaireachán soithí (VMS) dá dtagraítear in Airteagal 9 de Rialachán (CE) Uimh. 1224/2009; nó

(ii)

córas aitheantais uathoibríoch (CAU) dá dtagraítear in Airteagal 6a de Threoir 2002/59/CE ó Pharlaimint na hEorpa agus ón gComhairle (*1) agus in Airteagal 10 de Rialachán (CE) Uimh. 1224/2009; nó

(iii)

gaireas rianaithe arna fhormheas ag údarás inniúil an Bhallstáit brataí, chun sonraí suímh an tsoithigh agus, i gcás inarb infheidhme, dáta agus am, cúrsa, luas agus marc aitheantais seachtrach an tsoithigh iascaireachta a tharchur, chomh maith le haon sonraí ábhartha eile a leagtar síos i ngníomhartha cur chun feidhme arna nglacadh ag an gCoimisiún.

Mura bhfuil an gaireas laistigh de raon líonra, déanfar sonraí suímh an tsoithigh a stóráil agus a tharchur i gcomhréir le hAirteagal 9(3) de Rialachán (CE) Uimh. 1224/2009 arna leasú le Rialachán (AE) 2023/2842 ó Pharlaimint na hEorpa agus ón gComhairle (*2).

Beidh feidhm ag na bearta seo go dtí an 10 Eanáir 2028.

(b)

Uair amháin gach 10 nóiméad ar a laghad a bheidh i minicíocht tharchur shonraí suímh an tsoithigh, lena n-áirítear laistigh de chrios foláirimh ceithre mhuirmhíle a bhunófar le haghaidh soithí a úsáideann córas um fhaireachán soithí nach dtacaíonn a ngairis leis an athrú uathoibríoch ar mhinicíocht an tuairiscithe.

(c)

Cuirfidh an Ballstát brataí an Ballstát cósta ar an eolas:

(i)

nuair a théann soithí iascaireachta atá faoi bhratach an Bhallstáit chósta ábhartha isteach i limistéir atá faoina cheannasacht nó ina dhlínse, mar a liostaítear i bpointí 3.1 go 3.4; agus

(ii)

faoin gcóras sonrach nó gaireas sonrach a úsáideann an soitheach iascaireachta atá faoina bhratach.


(*1)  Treoir 2002/59/CE ó Pharlaimint na hEorpa agus ón gComhairle an 27 Meitheamh 2002 lena mbunaítear córas Comhphobail faireacháin agus faisnéise um thrácht soithí agus lena n-aisghairtear Treoir 93/75/CEE ón gComhairle (IO L 208, 5.8.2002, lch. 10, ELI: http://data.europa.eu/eli/dir/2002/59/oj).

(*2)  Rialachán (AE) 2023/2842 ó Pharlaimint na hEorpa agus ón gComhairle an 22 Samhain 2023 lena leasaítear Rialachán (CE) Uimh. 1224/2009 ón gComhairle, agus lena leasaítear Rialacháin (CE) Uimh. 1967/2006 agus (CE) Uimh. 1005/2008 ón gComhairle agus Rialacháin (AE) 2016/1139, (AE) 2017/2403 agus (AE) 2019/473 ó Pharlaimint na hEorpa agus ón gComhairle a mhéid a bhaineann le rialú ar iascach (IO L, 2023/2842, 20.12.2023, ELI: http://data.europa.eu/eli/reg/2023/2842/oj).’.


ELI: http://data.europa.eu/eli/reg_del/2026/450/oj

ISSN 1977-0839 (electronic edition)