(1)

Ir-Regolament ta' Implimentazzjoni tal-Kummissjoni (UE) 2018/866 (2) iffissa r-rata ta' aġġustament għall-pagamenti diretti skont ir-Regolament (UE) Nru 1306/2013 fir-rigward tas-sena kalendarja 2018. Din ir-rata ta' aġġustament kienet ġiet stabbilita abbażi tal-informazzjoni disponibbli fil-kuntest tal-Abbozz ta' Baġit għall-2019, b'mod partikolari billi ġie kkunsidrat ammont ta' dixxiplina finanzjarja ta' EUR 468,7 miljun għar-riżerva tal-kriżijiet fis-settur agrikolu msemmija fl-Artikolu 25 tar-Regolament (UE) Nru 1306/2013.

(2)

Madankollu, filwaqt li l-ħtieġa għal dixxiplina finanzjarja tibqa' ta' EUR 468,7 miljun għar-riżerva tal-kriżijiet fis-settur agrikolu, l-informazzjoni disponibbli b'rabta mal-Ittra Emendatorja Nru 1 tal-Kummissjoni tal-Abbozz ta' Baġit għall-2019 li tkopri l-previżjonijiet għall-pagamenti diretti u għan-nefqa relatata mas-suq, turi li jeħtieġ li tiġi adattata r-rata tad-dixxiplina finanzjarja stabbilita fir-Regolament ta' Implimentazzjoni tal-Kummissjoni (UE) 2018/866.

(3)

B'hekk, abbażi tal-informazzjoni l-ġdida fil-pussess tal-Kummissjoni, jixraq li r-rata ta' aġġustament tiġi adattata skont l-Artikolu 26(4) tar-Regolament (UE) Nru 1306/2013, qabel l-1 ta' Diċembru tas-sena kalendarja li tapplika għaliha r-rata ta' aġġustament.

(4)

Bħala regola ġenerali, il-bdiewa li jippreżentaw applikazzjoni għall-għajnuna għall-pagamenti diretti għal sena kalendarja waħda (N) jitħallsu fi żmien perjodu fiss tal-pagamenti fis-sena finanzjarja (N+1). Madankollu, l-Istati Membri jistgħu, sa ċerti limiti, iħallsu l-pagamenti lill-bdiewa wara dak il-perjodu tal-pagamenti. Dawn il-pagamenti li jsiru tard jistgħu jsiru f'sena finanzjarja sussegwenti. Meta d-dixxiplina finanzjarja tiġi applikata għal sena kalendarja partikolari, jenħtieġ li r-rata ta' aġġustament ma tiġix applikata għal dawk il-pagamenti li l-applikazzjonijiet għall-għajnuna għalihom ikunu ġew ippreżentati fi snin kalendarji li ma jkunux is-sena kalendarja li tapplika għaliha d-dixxiplina finanzjarja. Għalhekk, sabiex jiġi żgurat it-trattament ugwali tal-bdiewa, jixraq li jiġi previst li r-rata ta' aġġustament tiġi applikata biss għall-pagamenti li għalihom ikunu ġew ippreżentati l-applikazzjonijiet għall-għajnuna fis-sena kalendarja li tapplika għaliha d-dixxiplina finanzjarja, irrispettivament minn meta jsir il-pagament lill-bdiewa.

(5)

L-Artikolu 8(1) tar-Regolament (UE) Nru 1307/2013 tal-Parlament Ewropew u tal-Kunsill (3) jipprevedi li r-rata ta' aġġustament applikata għall-pagamenti diretti stabbilita skont l-Artikolu 26 tar-Regolament (UE) Nru 1306/2013 trid tapplika biss għall-pagamenti diretti li jaqbżu l-EUR 2 000 u li jridu jingħataw lill-bdiewa fis-sena kalendarja korrispondenti. Barra minn hekk, l-Artikolu 8(2) tar-Regolament (UE) Nru 1307/2013 jipprevedi li, minħabba l-introduzzjoni gradwali tal-pagamenti diretti, ir-rata ta' aġġustament trid tibda tapplika għall-Kroazja mill-1 ta' Jannar 2022 biss. Għaldaqstant jenħtieġ li r-rata ta' aġġustament li trid tiġi stabbilita permezz ta' dan ir-Regolament ma tapplikax għall-pagamenti lill-bdiewa f'dak l-Istat Membru.

(6)

Għall-kalkolu tal-pagamenti kollha li jridu jingħataw lil bidwi għal applikazzjoni għall-għajnuna ppreżentata għas-sena kalendarja 2018, jenħtieġ li tiġi kkunsidrata r-rata ta' aġġustament adattata. Għalhekk, jenħtieġ li r-Regolament ta' Implimentazzjoni (UE) 2018/866 jitħassar għaċ-ċarezza.

(7)

Jenħtieġ li dan ir-Regolament japplika mill-1 ta' Diċembru 2018 sabiex jiġi żgurat li r-rata ta' aġġustament adattata tkun tapplika mid-data meta jridu jibdew isiru l-pagamenti lill-bdiewa skont ir-Regolament (UE) Nru 1306/2013.