European flag

Iris Oifigiúil
an Aontais Eorpaigh

GA

Sraith C


C/2024/7444

16.12.2024

Foilsiú teachtaireachta maidir le formheas ar leasú caighdeánach ar an tsonraíocht táirge le haghaidh ainm in earnáil an fhíona, dá dtagraítear in Airteagal 17(2) agus (3) de Rialachán Tarmligthe (AE) 2019/33 ón gCoimisiún

(C/2024/7444)

Foilsítear an teachtaireacht seo i gcomhréir le hAirteagal 17(5) de Rialachán Tarmligthe (AE) 2019/33 ón gCoimisiún (1).

FORMHEAS AR LEASÚ CAIGHDEÁNACH A CHUR IN IÚL

‘Alsace grand cru Vorbourg’

PDO-FR-A0632-AM03

Dáta na teachtaireachta: 24 Meán Fómhair 2024

TUAIRISC AR AN LEASÚ FORMHEASTA AGUS NA CÚISEANNA LEIS

1.   Cineálacha táirge

I gCaibidil I, Roinn III, den tsonraíocht táirge, leasaíodh an téacs chun a léiriú nach dtagraíonn an t-ainmniúchán ‘Alsace grand cru Vorbourg’ go heisiach d’fhíonta geala socra a thuilleadh.

Scrúdaíodh iarratas ar aitheantas a thabhairt d’fhíonta dearga socra ar an leibhéal náisiúnta le haghaidh ainmniúchán tionscnaimh ‘Alsace grand cru Vorbourg’. Tá an t-iarratas seo ar fhíon dearg bunaithe ar chleachtas seanbhunaithe, ar cháil agus ar shaintréithe na bhfíonta a tháirgtear le fíonchaora den chineál Pinot Noir N a fhástar ar dháileachtaí críochaithe de chuid an ainmniúcháin ‘Alsace grand cru’ seo, ar ainmniúchán é nár aithníodh ar dtús ach amháin le haghaidh fíonta geala. Is é Pinot Noir N an t-aon chineál amháin atá údaraithe le haghaidh na bhfíonta dearga sin.

Leasaíodh an doiciméad aonair i roinnt áiteanna, go háirithe i bpointe 4, mar gheall ar aitheantas a thabhairt d’fhíonta dearga socra faoin ainmniúchán ‘Alsace grand cru Vorbourg’.

2.   Limistéar geografach

I gCaibidil I, Roinn IV(1) den tsonraíocht, tugadh an tagairt don Chód Geografach Oifigiúil cothrom le dáta: tagraítear do leagan 2024 anois. Ní dhéanann an leasú seo difear do theorainn an limistéir gheografaigh.

Ceanglaítear leis an leasú sin go leasófar pointe 6 den doiciméad aonair.

3.   Limistéar dáileachta críochaithe

I gCaibidil I, Roinn IV(2) den tsonraíocht, cuireadh an dáta an 25 Meitheamh 2024 isteach.

Sainítear sa limistéar dáileachta críochaithe na dáileachtaí atá oiriúnach chun na fíonchaora a tháirgeadh atá beartaithe chun fíon lena ngabhann an t-ainmniúchán a tháirgeadh.

Tá an réimse seo formheasta ag coiste náisiúnta inniúil na hInstitiúide Náisiúnta Tionscnaimh agus Cáilíochta.

Ní gá aon leasú a dhéanamh ar an doiciméad aonair mar thoradh air.

4.   Limistéar díreach in aice láimhe

I gCaibidil I, Roinn IV(3) den tsonraíocht, tugadh an tagairt don Chód Geografach Oifigiúil cothrom le dáta: tagraítear do leagan 2024 de anois. Ní dhéanann an leasú seo difear do theorainn an limistéir atá díreach in aice láimhe, ach ceanglaítear leis na nuashonruithe seo a leanas ar liosta na mbardas i gcás roinn Bas-Rhin:

—

Rinneadh bardas Gimbrett (bardas gaolmhar, atá ceangailte le Berstett) de bhardas Gimbrett-Berstett;

—

Scriosadh ainm bhardas Mittelhausen agus cuireadh ainm Wingersheim les Quatre Bans isteach, mar aon leis an bhfaisnéis gurb é críoch bhardas tarmligthe Mittelhausen an t-aon chuid den bhardas sin atá san áireamh.

Ceanglaítear leis an leasú sin go leasófar pointe 9 den doiciméad aonair.

5.   Dlús plandaithe

I gCaibidil I, Roinn VI(1)(a) den tsonraíocht, chun fíon dearg a tháirgeadh, rinneadh na focail ‘nó “Alsace grand cru Vorbourg” ’ a chur leis an gcéad mhír i ndiaidh ‘Alsace grand cru Hengst’, tar éis an t-iarratas ar aitheantas a thabhairt d’fhíonta dearga socra le haghaidh an ainmniúcháin sin a thíolacadh ar an leibhéal náisiúnta.

Leasaíodh pointe 5 den doiciméad aonair.

6.   Riail phrúnála

I gCaibidil I, Roinn VI(1)(b) den tsonraíocht, chun fíonta dearga a tháirgeadh, prúnáiltear na fíniúnacha ina Guyot singil nó dúbailte agus 14 bhachlóg ar a mhéad a bheith ann in aghaidh an phlanda.

Is gá leasú a dhéanamh ar phointe 5 den doiciméad aonair chun scrúdú a dhéanamh ar an iarratas ar aitheantas a thabhairt d’ainmniúchán tionscnaimh fhíonta dearga ‘Alsace grand cru Vorbourg’.

7.   Aibíocht na bhfíonchaor agus neart alcóil nádúrtha íosta de réir toirte

Leasaíodh an tábla i gCaibidil I, Roinn VII(2)(a) den tsonraíocht. Cuirtear san áireamh ann anois an t-iarratas ar aitheantas a thabhairt d’fhíonta dearga socra arna thíolacadh ar an leibhéal náisiúnta le haghaidh an ainmniúcháin ‘Alsace grand cru Vorbourg’.

Leasaíodh pointe 4 den doiciméad aonair chun an neart alcóil nádúrtha íosta de réir toirte a léiriú.

8.   Tréimhse aibithe íosta agus an dáta a chuirtear fíonta ar fáil do thomhaltóirí ar an margadh

I gCaibidil I, Roinn IX(2) den tsonraíocht, leasaíodh an tréimhse aibithe íosta le haghaidh fíonta dearga agus geala ionas go maireann sí go dtí an 1 Samhain den bhliain tar éis na buainte.

Leasaíodh pointe 5 den doiciméad aonair.

I gCaibidil I, Roinn IX(5)(a), sonraítear nach féidir, tar éis na tréimhse aibithe, fíonta geala agus dearga a chur ar an margadh le haghaidh tomhaltóirí go dtí an 1 Samhain den bhliain tar éis na buainte, i gcomhréir leis an athrú ar an tréimhse aibithe.

Ní éilíonn an t-athrú sin an doiciméad aonair a leasú.

9.   Tosca daonna a chuireann leis an nasc leis an limistéar geografach

I gCaibidil I, Roinn X(1)(b) den tsonraíocht, leasaíodh an téacs ionas go ndéantar formheas fíonta dearga socra le haghaidh ainmniúchán tionscnaimh ‘Alsace grand cru Vorbourg’, agus an t-athrú ar an tréimhse aibithe, a chur i gcuntas.

—

Cuireadh an fhaisnéis seo a leanas isteach i gcás ainmniúchán tionscnaimh faoi chosaint ‘Alsace grand cru Vorbourg’: cáil na bhfíonta dearga ó bhardas Rouffach, a formheasadh in 2024 le haghaidh fíonta dearga; Is é Pinot Noir N an t-aon chineál amháin atá údaraithe; is é 5 500 planda in aghaidh an heicteáir an dlús plandaithe íosta chun fíon dearg a tháirgeadh; ní cheadaítear saibhriú in aon fhoirm le haghaidh fíonta dearga; ní mór go mbeadh íostréimhse aibithe 11 mhí ann.

Ní dhéanann an leasú sin difear don doiciméad aonair.

—

maidir leis na hainmniúcháin ‘Alsace grand cru Hengst’ agus ‘Alsace grand cru Kirchberg de Barr’, déantar an tréimhse aibithe íosta a thugtar le haghaidh fíonta dearga a mhéadú ó 10 mí go 11 mhí.

Ní dhéanann na leasuithe sin difear don doiciméad aonair.

10.   Tuairisc ar an bhfíon (nó ar na fíonta)

I gCaibidil I(X)(2) den tsonraíocht, cuireadh an tuairisc seo a leanas isteach maidir le príomhthréithe orgánaileipteacha na bhfíonta dearga le haghaidh ainmniúchán tionscnaimh ‘Alsace grand cru Vorbourg’: ‘Tá dath domhain agus geal ar na fíonta dearga. Comhcheanglaíonn dea-bholaithe torthaí beaga dearga agus dubha le blasanna mianracha. Tá na fíonta flaithiúil, agus struchtúr tainneach dlúth ag gabháil leo, mar aon le tainniní síodúla. Tá siad galánta, mín agus gléghlan, agus iarbhlas fada acu mar aon le hardacmhainneacht i ndáil le haosú.’

Leasaíodh pointe 4 den doiciméad aonair.

11.   Nasc idir tionscnamh agus saintréithe na dtáirgí

I gCaibidil I, Roinn X(3) den tsonraíocht, rinneadh an soiléiriú seo a leanas a chur isteach maidir leis an tagairt don ainmniúchán ‘Alsace grand cru Vorbourg’: ‘Is é láithreacht iarainn san ithir an míniú atá ar dhath beoga, dian agus cobhsaí na bhfíonta dearga.’

Mar thoradh ar an méid sin a chur isteach, is gá pointe 8 den doiciméad aonair a leasú.

12.   Comhlacht cigireachta

Leasaíodh Caibidil III(II) den tsonraíocht chun tagairt a dhéanamh don chomhlacht cigireachta agus chun na rialacha dréachtaithe nua maidir leis an mír seo a chomhlíonadh.

Níor leasaíodh an doiciméad aonair.

DOICIMÉAD AONAIR

1.   Ainm (nó ainmneacha)

Alsace grand cru Vorbourg

2.   Cineál an táisc gheografaigh

ATFC – Ainmniúchán tionscnaimh faoi chosaint

3.   Catagóirí na dtáirgí fíniúna

1.

Fíon

3.1.   Cód Ainmníochta Comhcheangailte

—

22 - DEOCHANNA, BIOTÁILLÍ AGUS FÍNÉAGAR

2204 – fíon ó fhíonchaora úra, lena n-áirítear fíonta treisithe; úrfhíon fíonchaor seachas é sin atá faoi cheannteideal 2009

4.   Tuairisc ar an bhfíon (nó ar na fíonta)

1.   Fíon geal

TUAIRISC ACHOMAIR I SCRÍBHINN

Fíonta socra agus geala atá iontu.

Maidir le Gewürztraminer Rs agus Pinot Gris G, is é 12,5 % neart alcóil nádúrtha íosta na bhfíonta de réir toirte, agus is é 11 % an neart atá ann le haghaidh cineálacha eile. Maidir leis na fíonta a dhéantar as na cineálacha Gewürztraminer B agus Pinot Gris G, ní bhíonn neart alcóil iomláin na bhfíonta sin de réir toirte níos mó ná 15 % tar éis a saibhrithe, agus ní bhíonn neart níos mó ná 14 % ag na fíonta a dhéantar as cineálacha eile.

Tá na saintréithe anailíseacha eile mar a leagtar síos i reachtaíocht an Aontais Eorpaigh iad.

Is samplaí den scoth d’fhíonta geala atá oiriúnach lena n-aosú, a mbíonn úire den scoth mar shaintréith acu agus aigéad tartarach i dtreis mar bhonn taca leo mar aon le fíonchaora a bhíonn aibithe ar dóigh. Féadfar ainm an ainmniúcháin a fhorlíonadh le hainmneacha coitianta na gcineálacha fíonchaor, ar choinníoll go ndéantar na fíonta go heisiach as cineálacha fíonchaor arb fhéidir tagairt a dhéanamh dóibh trí na hainmneacha atá i gceist a úsáid. Tá substaint agus castacht iontach maith ag na fíonta sin, tagann dea-bholaithe cumhachtacha uathu agus baineann an-chuid fíneáltachta leo. Fanann a mblas tréimhse fhada sa bhéal, éiríonn siad níos casta de réir a chéile.

Tá dhá chineál fíona ann: — fíonta tirime ag a bhfuil mianracht; — fíonta aramatacha atá torthaíoch, olartha agus saibhir. Tá fíonta geala ó Vorbourg tathagach agus méith agus tá mianracht íogair agus salandacht shuntasach ag gabháil leo. Bíonn iarbhlas tainneach orthu. Tá dea-bholaithe torthaí (torthaí citris, péitseog bhán, piorra, etc.) ceannasach. Is í an aigéadacht aibí cnámh droma an fhíona. Bíonn an dath domhain agus dian agus maidir leis an raon datha a bhaineann leo, téann sé chomh fada le dath buí órga.

Saintréithe anailíseacha ginearálta

—

Neart alcóil iomlán uasta (in % de réir toirte): —

—

Neart alcóil iarbhír íosta (in % de réir toirte): —

—

Aigéadacht iomlán íosta: i milleachoibhéisí in aghaidh an lítir

—

Aigéadacht luaineach uasta (i milleachoibhéisí in aghaidh an lítir): —

—

Dé-ocsaíd sulfair iomlán uasta (i milleagraim in aghaidh an lítir): —

2.   Ainmniúchán agus na focail ‘Vendanges Tardives’, fíon geal, ina dhiaidh

TUAIRISC ACHOMAIR I SCRÍBHINN

Maidir le Gewürztraminer Rs agus Pinot Gris G, is é 16 % neart alcóil nádúrtha íosta na bhfíonta de réir toirte agus is é 14,5 % an neart atá ann le haghaidh cineálacha eile.

Tá na saintréithe anailíseacha eile mar a leagtar síos i reachtaíocht an Aontais Eorpaigh iad.

Is minic a fhaightear dea-bholaithe an-andúchasach ó na fíonta a dtugtar tuairisc orthu mar ‘Vendanges Tardives’, amhail dea-bholaithe a fhaightear ó thorthaí criostalaithe agus a mbíonn iarbhlas úr orthu. Bíonn siad an-tiubhaithe go deo agus faightear dea-bholaithe fadmharthanacha uathu. Diandath domhain a bhíonn ar na fíonta sin agus maidir leis an raon datha a bhaineann leo téann sé chomh fada le buí ómra.

Saintréithe anailíseacha ginearálta

—

Neart alcóil iomlán uasta (in % de réir toirte): —

—

Neart alcóil iarbhír íosta (in % de réir toirte): —

—

Aigéadacht iomlán íosta: i milleachoibhéisí in aghaidh an lítir

—

Aigéadacht luaineach uasta (i milleachoibhéisí in aghaidh an lítir): —

—

Dé-ocsaíd sulfair iomlán uasta (i milleagraim in aghaidh an lítir): —

3.   Ainmniúchán agus na focail ‘Sélection de Grains Nobles’, fíon geal, ina dhiaidh

TUAIRISC ACHOMAIR I SCRÍBHINN

Maidir le Gewürztraminer Rs agus Pinot Gris G, is é 18,2 % neart alcóil nádúrtha íosta na bhfíonta de réir toirte, agus is é 16,4 % an neart atá ann le haghaidh cineálacha eile.

Tá na saintréithe anailíseacha eile mar a leagtar síos i reachtaíocht an Aontais Eorpaigh iad.

Na fíonta atá i dteideal a bheith lipéadaithe mar ‘Sélection de Grains Nobles’, bíonn siad níos tiubhaithe agus níos láidre agus is minic a fhaightear dea-bholaithe de thorthaí criostalaithe uathu. Bíonn siad an-tiubhaithe go deo agus faightear dea-bholaithe fadmharthanacha uathu. Diandath domhain a bhíonn ar na fíonta sin agus maidir leis an raon datha a bhaineann leo téann sé chomh fada le buí ómra.

Saintréithe anailíseacha ginearálta

—

Neart alcóil iomlán uasta (in % de réir toirte): —

—

Neart alcóil iarbhír íosta (in % de réir toirte): —

—

Aigéadacht iomlán íosta: i milleachoibhéisí in aghaidh an lítir

—

Aigéadacht luaineach uasta (i milleachoibhéisí in aghaidh an lítir): —

—

Dé-ocsaíd sulfair iomlán uasta (i milleagraim in aghaidh an lítir): —

4.   Fíon dearg

TUAIRISC ACHOMAIR I SCRÍBHINN

Tá neart alcóil nádúrtha íosta 12,5 % de réir toirte ag na fíonta dearga, a dhéantar as an gcineál fíonchaor Pinot Noir N amháin.

Cuirtear coipeadh malalachtach i gcrích. Ag céim an phacáistithe, tá cion aigéid mhalaigh nach mó ná 0,4 gram in aghaidh an lítir ag na fíonta.

Tar éis an choipthe, tá méid siúcra inchoipthe nach mó ná 2 ghram in aghaidh an lítir ag na fíonta.

Tá na saintréithe anailíseacha eile mar a leagtar síos i reachtaíocht an Aontais Eorpaigh iad.

Bíonn dath domhain agus geal ar na fíonta dearga. Comhcheanglaíonn dea-bholaithe torthaí beaga dearga agus dubha le blasanna mianracha. Tá na fíonta flaithiúil, agus struchtúr tainneach dlúth ag gabháil leo, mar aon le tainniní síodúla. Tá siad galánta, mín agus gléghlan, agus iarbhlas fada acu mar aon le hardacmhainneacht i ndáil le haosú.

Saintréithe anailíseacha ginearálta

—

Neart alcóil iomlán uasta (in % de réir toirte): —

—

Neart alcóil iarbhír íosta (in % de réir toirte): —

—

Aigéadacht iomlán íosta: —

—

Aigéadacht luaineach uasta (i milleachoibhéisí in aghaidh an lítir): —

—

Dé-ocsaíd sulfair iomlán uasta (i milleagraim in aghaidh an lítir): —

5.   Cleachtais fhíoneolaíocha

5.1.   Cleachtais fhíoneolaíocha shonracha

1.

Córais traenála: dlús plandaithe

An modh saothraithe

Maidir le fíniúnacha atá beartaithe chun fíonta geala a tháirgeadh, is é 4 500 planda in aghaidh an heicteáir an dlús plandaithe íosta.

Maidir le fíniúnacha atá beartaithe chun fíonta dearga a tháirgeadh, is é 5 500 planda in aghaidh an heicteáir an dlús plandaithe íosta.

Níor cheart don fhad idir sraitheanna na bhfíniúnacha a bheith níos mó ná 2 mhéadar.

Maidir le spásáil sa tsraith atá ag na fíniúnacha ní bhíonn sí níos lú ná 0,75 méadar agus ní bhíonn sí níos mó ná 1,50 méadar.

Ón 25 Deireadh Fómhair 2011, maidir le sraitheanna atá laistigh de dháileacht, níor cheart spásáil atá níos leithne ná 3 mhéadar, a bheith idir na sraitheanna tar éis an ghrafa a dhéanamh.

2.

Córais traenála: riail phrúnála

An modh saothraithe

Maidir le fíonta geala, déantar na fíniúnacha a phrúnáil ina Guyot singil nó dúbailte agus 18 mbachlóg ar a mhéad a bheith ann in aghaidh an phlanda.

Maidir le fíonta dearga, déantar na fíniúnacha a phrúnáil ina Guyot singil nó dúbailte agus 14 bhachlóg ar a mhéad a bheith ann in aghaidh an phlanda.

3.

Buaint

An modh saothraithe

Déantar na fíonta as fíonchaora a bhuantar de láimh.

4.

Méadú ar an neart alcóil nádúrtha íosta de réir toirte

Cleachtas fíoneolaíoch sonrach

Aon mhéadú ar an neart alcóil nádúrtha íosta de réir toirte, níor cheart dó na céatadáin a leanas a shárú:

0,5 % le haghaidh fíonta a dhéantar as cineálacha Gewürztraminer B agus Pinot Gris G,

1,5 % le haghaidh fíonta a dhéantar as cineálacha eile.

Níor cheart na fíonta atá incháilithe le haghaidh an téarma ‘Vendanges Tardives’ nó ‘Sélection de Grains Nobles’ agus ní ceadmhach na fíonta dearga a bheith saibhrithe.

5.

Táirgeadh

Srian maidir le fíonóireacht

Toirmisctear sliseanna adhmaid a úsáid.

6.

Na fíonta a aibiú

Cleachtas fíoneolaíoch sonrach

Ní mór na fíonta geala agus dearga a aibiú go dtí an 1 Samhain ar a laghad den bhliain tar éis na buainte.

Fíonta atá incháilithe leis na téarmaí ‘Vendanges Tardives’ nó ‘Sélection de Grains Nobles’ a bheith ag gabháil leo, ní mór iad a aibiú go dtí an 1 Meitheamh den dara bliain tar éis na buainte ar a laghad.

5.2.   Uastáirgeacht

1.

Ainmniúchán leis an téarma breise ‘Vendanges Tardives’ nó gan an téarma sin

60 heictilítear in aghaidh an heicteáir

2.

Ainmniúchán agus na focail ‘Sélection de Grains Nobles’ ina dhiaidh

48 heictilítear in aghaidh an heicteáir

3.

Fíon dearg

48 heictilítear in aghaidh an heicteáir

6.   Limistéar geografach críochaithe

Déantar na fíonchaora a bhuain agus na fíonta a tháirgeadh, a fhorbairt agus a aibiú sna bardais seo a leanas, bunaithe ar Chód Geografach Oifigiúil 2024:

—

Roinn Haut-Rhin:

Bardais iomlána: Ammerschwihr, Beblenheim, Bennwihr, Bergheim, Bergholtz, Eguisheim, Gueberschwihr, Guebwiller, Hattstatt, Hunawihr, Ingersheim, Katzenthal, Mittelwihr, Niedermorschwihr, Orschwihr, Pfaffenheim, Ribeauvillé, Riquewihr, Rodern, Rouffach, Saint-Hippolyte, Soultzmatt, Thann, Turckheim, Vieux-Thann, Voegtlinshoffen, Westhalten, Wettolsheim, Wintzenheim, Wuenheim agus Zellenberg.

Na bardais atá san áireamh go páirteach: Kaysersberg Vignoble, críoch bhardais tharmligthe Kientzheim agus Sigolsheim amháin.

—

Roinn Bas-Rhin:

Andlau, Barr, Bergbieten, Blienschwiller, Dahlenheim, Dambach-la-Ville, Eichhoffen, Kintzheim, Marlenheim, Mittelbergheim, Molsheim, Nothalten, Scharrachbergheim-Irmstett agus Wolxheim.

Rinneadh léarscáil ina shainítear teorainneacha an limistéir gheografaigh a thaisceadh le húdaráis bhardasacha na mbardas atá san áireamh go páirteach.

Is féidir léarscáileanna den limistéar geografach a aimsiú ar shuíomh gréasáin INAO.

7.   Cineál (nó cineálacha) fíonchaor

Gewurztraminer Rs

Muscat Ottonel B – Muscat, Moscato

Muscat à petits grains blancs B – Muscat, Moscato

Muscat à petits grains blancs B – Muscat, Moscato

Pinot Gris G

Pinot Noir N

Riesling B

8.   Tuairisc ar an nasc (nó ar na naisc)

A bhuí leis na dálaí méisea-aeráide fabhracha ar saintréith iad de chuid fhíonghoirt na hAlsáise, tairbhíonn ainmniúchán tionscnaimh faoi chosaint ‘Alsace grand cru Vorbourg’de cheann de na suíomhanna is fearr. Agus iad neadaithe i dtírdhreach pictiúrtha na hAlsáise, cumasaíonn na fíonghoirt táirgeadh fíonta thar a bheith léiritheach, caolchúiseach a bhfuil carachtar sainiúil agus pearsantacht uathúil acu.

Maidir leis an grand cru te grianmhar seo, saintréith de chuid na bhfíonta is ea mianracht éadrom atá nasctha le láithreacht aolchloiche san ithir agus san fho-ithir. Táirgeann na marlaí agus na créanna troma, mínsrathacha fíonta méithe tathagacha ag a bhfuil mianracht éadrom agus salandacht shuntasach. Bíonn an t-iarbhlas tainneach agus créúil.

Is é láithreacht iarainn san ithir an míniú atá ar dhath beoga, dian agus cobhsaí na bhfíonta dearga.

Mar gheall ar na dálaí aeráide den scoth a bhíonn ann ag deireadh an tséasúir, is féidir le torthaí na fíniúna éirí tiubh agus féadann an lobhadh uasal forbairt. Dá thoradh sin, is féidir fíonta a tháirgeadh as fíonchaora a bhuaintear nuair a bhíonn siad ró-aibí.

De bharr na tréimhse aibithe mar a leagtar síos sa tsonraíocht í, cumasaítear feabhsú na bhfíonta.

Tá rialacha diana ann maidir leis an táirgeadh, amhail ceannbhrat leathan a chothabháil agus buaint a dhéanamh de láimh. Trí na rialacha sin a ghlacadh, caomhnaíonn fíonsaothraithe na hAlsáise carachtar seanbhunaithe na bhfíonta, a bhfuil clú orthu mar gheall ar a gcastacht agus chomh oiriúnach is atá siad lena gcoinneáil i bhfad.

Is iad na fíonta is fearr iad as fíonta an réigiúin seo. Tá meas níos airde ag daoine ar na fíonta sin ná mar atá acu ar fhíonta a bhfuil an t-ainmniúchán tionscnaimh faoi chosaint ‘Alsace’ acu.

9.   Coinníollacha fíor-riachtanacha breise (pacáistiú, lipéadú, ceanglais eile)

Limistéar díreach in aice láimhe

Creat dlíthiúil

Reachtaíocht náisiúnta

Cineál an choinníll breise

Maolú maidir le táirgeadh sa limistéar geografach críochaithe

Tuairisc ar an gcoinníoll

Sa limistéar atá díreach in aice láimhe, arna shainmhíniú ag maolú maidir le fíonóireacht, próiseáil agus aibiú fíonta, cuimsítear críoch na mbardas seo a leanas, bunaithe ar Chód Geografach Oifigiúil 2024:

—

Roinn Haut-Rhin:

Bardais iomlána: Bergholtz-Zell, Berrwiller, Buhl, Cernay, Colmar, Gundolsheim, Hartmanswiller, Herrlisheim, Houssen, Husseren-les-Châteaux, Jungholtz, Leimbach, Obermorschwihr, Osenbach, Ostheim, Rorschwihr, Soultz, Steinbach, Uffholtz, Walbach, Wattwiller, Wihr-au-Val agus Zimmerbach.

Na bardais atá san áireamh go páirteach: Kaysersberg Vignoble, críoch bhardas tarmligthe Kayserberg amháin.

—

Roinn Bas-Rhin:

Bardais iomlána: Albé, Avolsheim, Balbronn, Bernardswiller, Bernardvillé, Bischoffsheim, Boersch, Bourgheim, Châtenois, Cleebourg, Dachstein, Dangolsheim, Dieffenthal, Dorlisheim, Epfig, Ergersheim, Ernolsheim-Bruche, Fessenheim-le-Bas, Flexbourg, Furdenheim, Gertwiller, Gimbrett (bardas gaolmhar, atá i gceangal le Berstett), Goxwiller, Heiligenstein, Itterswiller, Kienheim, Kirchheim, Kuttolsheim, Mutzig, Nordheim, Oberhoffen-les-Wissenbourg, Obernai, Odratzheim, Orschwiller, Osthoffen, Ottrott, Petersbach, Reichsfeld, Riedseltz, Rosenwiller, Rosheim, Rott, Saint-Nabor, Saint-Pierre, Scherwiller, Seebach, Soultz-les-Bains, Steinseltz, Stotzheim, Strasbourg, Traenheim, Villé, Wangen, Westhoffen, Wissembourg agus Zellwiller.

Na bardais atá san áireamh go páirteach: Wingersheim les Quatre Bans, gan ach críoch bhardas tarmligthe Mittelhausen a bheith ann.

Pacáistiú sa limistéar

Creat dlíthiúil

Reachtaíocht náisiúnta

Cineál an choinníll breise

Pacáistiú sa limistéar geografach críochaithe

Tuairisc ar an gcoinníoll

Déantar na fíonta a phacáistiú i mbuidéil ‘Vin du Rhin’, i gcomhréir le Foraithne Uimh. 55-673 an 20 Bealtaine 1955, Ordú an 13 Bealtaine 1959 agus Foraithne an 19 Márta 1963. Ní cheadaítear buidéil d’aon chineál eile.

Ó tugadh isteach Dlí an 5 Iúil 1972, ní mór na fíonta a chur i mbuidéil arda, chaola ‘Vin du Rhin’ i ranna Bas-Rhin agus Haut-Rhin, mar a leagtar síos i bhForaithne 1955.

Bliain an fhíona a shonrú

Creat dlíthiúil

Reachtaíocht náisiúnta

Cineál an choinníll breise

Forálacha breise a bhaineann le lipéadú

Tuairisc ar an gcoinníoll

Ní mór do bhliain an fhíona, mar aon le hainm an ainmniúcháin, a bheith le feiceáil in aon dearbhú a bhaineann le buaint agus stoc, in aon doiciméid tacaíochta nó poiblíocht, agus ar aon bhileoga, lipéid, sonraisc nó gabhdáin.

Gnáthainm

Creat dlíthiúil

Reachtaíocht náisiúnta

Cineál an choinníll breise

Forálacha breise a bhaineann le lipéadú

Tuairisc ar an gcoinníoll

Is féidir ainm an ainmniúcháin tionscnaimh faoi chosaint a fhorlíonadh le ceann de na gnáthainmneacha atá ar na cineálacha fíonchaor, ar choinníoll go ndéantar na fíonta go heisiach as cineálacha fíonchaor arbh fhéidir tagairt a dhéanamh dóibh tríd an ainm i gceist a úsáid.

Tá toirmeasc ar dhá cheann nó níos mó de ghnáthainmneacha a úsáid ar an lipéad céanna.

Seo a leanas na gnáthainmneacha sin:

Gewürztraminer

Muscat

Muscat Ottonel

Pinot Gris

Pinot Noir

Riesling.

Téarmaí traidisiúnta ‘Vendanges Tardives’ agus ‘Sélection de Grains Nobles’

Creat dlíthiúil

Reachtaíocht náisiúnta

Cineál an choinníll breise

Forálacha breise a bhaineann le lipéadú

Tuairisc ar an gcoinníoll

Maidir le fíonta ar incháilithe iad leis an téarma ‘Vendanges Tardives’ nó ‘Sélection de Grains Nobles’ a bheith ag gabháil leo, ní mór an méid seo a leanas a chur in iúl freisin:

—

bliain an fhíona

—

ceann amháin de na foirmeacha coitianta seo a leanas d’ainm an chineáil fíonchaor:

Gewürztraminer

Muscat

Muscat Ottonel

Pinot Gris

Riesling.

Sonrú ar an méid siúcra

Creat dlíthiúil

Reachtaíocht náisiúnta

Cineál an choinníll breise

Forálacha breise a bhaineann le lipéadú

Tuairisc ar an gcoinníoll

Ní mór an méid siúcra, mar a shainítear le dlí an Aontais, a lua go soiléir i gcás fíonta geala a n-éilítear ceann de na 51 ainmniúchán tionscnaimh faoi chosaint ‘Alsace Grand Cru - lieu-dit’ ina leith faoi théarmaí an ainmniúcháin sin. Bíonn feidhm aige sin nuair a chuirtear fíonta den sórt sin i láthair faoin ainmniúchán réamhluaite agus nuair a chuirtear ar fáil don phobal iad, nuair a sheoltar iad, nuair a thairgtear iad lena ndíol nó nuair a dhíoltar iad; rud nach féidir a dhéanamh mura bhfuil an méid siúcra luaite i ngach píosa poiblíochta, gach bileog, lipéad, sonrasc nó gabhdán a bhaineann leis. Níl feidhm ag an méid sin maidir le fíonta ar a mbíonn na lipéid ‘Vendanges Tardives’ nó ‘Sélection de Grains Nobles’.

Nasc chuig an tsonraíocht táirge

https://info.agriculture.gouv.fr/boagri/document_administratif-c08e30ef-3332-4470-9202-24cc90d12fbe


(1)   IO L 9, 11.1.2019, lch. 2.


ELI: http://data.europa.eu/eli/C/2024/7444/oj

ISSN 1977-107X (electronic edition)