3.6.2010   

GA

Iris Oifigiúil an Aontais Eorpaigh

C NaN/4

1.

Is éard is aidhm leis an dréachtrialachán ó Pharlaimint na hEorpa agus ón gComhairle, a bhfuil tuairim ón gCúirt Iniúchóirí á hiarraidh ina leith, ná an Rialachán Airgeadais reatha a leasú chun a rialacha a oiriúnú do nádúr sainiúil na Seirbhíse Eorpaí Gníomhaíochta Seachtraí (SEGS anseo feasta) a bhfuil coinne leis in Airteagal 27(3) den Chonradh ar an Aontas Eorpach, mar atá modhnaithe ag Conradh Liospóin a tháinig i bhfeidhm an 1 Nollaig 2009. Beidh an SEGS ina comhlacht uathrialach de chuid an Aontais faoi údarás an Ardionadaithe a thabharfaidh tacaíocht di i gcomhlíonadh a sainorduithe. Bunófar eagar agus feidhmiú an SEGS le cinneadh ón gComhairle. Tugtar an 25 Márta 2010 mar dháta den togra le haghaidh an chinnidh sin.

2.

D’fhonn leanúnachas oibríochtúil na dtoscaireachtaí reatha a chinntiú, measfar go mbeidh caiteachas oibríochtúil a dhéanann Cinn na dtoscaireachtaí ag teacht le cur chun feidhme an bhuiséid ag an gCoimisiún ar bhainistiú láraithe díreach, cé gur institiúid ar leith í an SEGS.

3.

Beidh an SEGS comhdhéanta de riarachán lárnach agus de thoscaireachtaí Aontais chuig tríú tíortha agus chuig eagraíochtaí náisiúnta. Beidh Ceann Toscaireachta, a bheidh i gceannas ar fhoireann uile na toscaireachta, i bhfeighil gach toscaireachta Aontais.

4.

Beidh oifigigh ó Ardrúnaíocht na Comhairle, oifigigh ón gCoimisiún agus pearsanra a thógfar ar iasacht ó sheirbhísí taidhleoireachta na mBallstát san fhoireann SEGS. Ceapfar iad mar ghníomhairí sealadacha faoi na Rialacháin Foirne. I gcás cúrsaí foirne déileálfar leis an SEGS mar institiúid laistigh de bhrí na Rialachán Foirne.

5.

Tugann an Chúirt faoi deara, mar a iarrtar sa tuarascáil ó Uachtaránacht na Comhairle Eorpaí maidir leis an tSeirbhís Eorpach Gníomhaíochta Seachtraí an 23 Deireadh Fómhair 2009 (3), go mbeidh an SEGS ina seirbhís de nádúr sui generis a ndéileálfar leis mar institiúid chun críocha an Rialacháin Airgeadais, agus tairbheoidh sí de roinn dá cuid féin den Bhuiséad agus cuirfear faoi bhráid urscaoileadh Pharlaimint na hEorpa sa cháil sin í ach, ag an am céanna, eadhon ag leibhéal Toscaireachta, fanfaidh an SEGS mar an tseirbhís ábhartha ag an gCoimisiún maidir le cur chun feidhme leithreasuithe oibríochtúla a thiocfaidh ón roinn “Coimisiún” sa Bhuiséad.

6.

Beidh an fhoireann sna Toscaireachtaí comhdhéanta d'fhoireann SEGS agus foireann ón gCoimisiún. Gheobhaidh Cinn na dToscaireachtaí toscaireacht ón gCoimisiún, an institiúid a fheidhmíonn an buiséad agus a bhainistíonn na cláir i gcomhréir le hAirteagal 17 den Chonradh ar an Aontas Eorpach agus i gcomhréir le hAirteagal 317 den Chonradh ar Fheidhmiú an Aontais Eorpaigh d'fhonn leithreasuithe oibríochtúla a chur chun feidhme ar a shon. Ciallaíonn struchtúr nua na SEGS agus dualgais Cheann na Toscaireachta Aonaid go dtuairisceoidh sé chuig dhá chomhlacht dhifriúla. Dealraíonn sé go bhfuil réiteach á lorg san Airteagal 60a (2) agus (3) nua a moladh. Tugann an Chúirt faoi deara nach mór a bheith cúramach i mbainistiú an struchtúir nua inter alia chun malartú tosaíochtaí a sheachaint.

7.

I dTuarascáil Speisialta Uimh. 10/2004 ón gCúirt, rinne an Chúirt tagairt don dul chun cinn suntasach a rinneadh i mbainistiú cúnaimh eachtraigh i gcreat an phróisis “déabhlóide”, lena n-áirítear treisiú ar aonaid oibríochtúla agus airgeadais na dToscaireachtaí, agus nósanna imeachta níos láidre agus iontaofa, a chuidigh le feabhas a chur ar rialtacht, tráthúlacht agus caighdeán na seirbhísí a chuirtear ar fáil. Measann an Chúirt go bhfuil sé sárthábhachtach cuntasacht, freagracht agus caighdeán bainistithe airgeadais ar leibhéal na Toscaireachta a chaomhnú agus a fheabhsú. Níor chóir go gcuirfí struchtúir eagraíochtúla na dToscaireachtaí Aontais amach anseo éifeachtúlacht a bhfeidhmeanna oibríochtúla agus airgeadais agus leithscaradh a ndualgas i mbaol.

8.

Sa chomhthéacs seo, d’fhéadfaí féachaint ar an togra mar iarracht ar nósanna imeachta inmheánacha an Choimisiúin agus caighdeáin cur chun feidhme a leithreasuithe a chosaint chomh fada agus is féidir, i gcreat institiúideach atá nua agus níos casta.

9.

Is cúis imní don Chúirt í, áfach, go ndéantar iarracht an cuspóir seo a bhaint amach (a) trí mhaoluithe suntasacha ón Rialachán Airgeadais, ós rud é go dtabharfar fotharmligin de chumhachtaí cur chun feidhme buiséid an Choimisiúin d'oifigigh údaruithe (Cinn na dToscaireachtaí) nach mbeidh mar chuid de ranna an Choimisiúin a thuilleadh; (b) trí chastacht mhéadaithe i mbainistíocht airgeadais agus tuairisciú misean agus oibríochtaí na dToscaireachtaí; agus (c) trí neamhchinnteacht shuntasach maidir leis an leithdháileadh buiséadach agus bainistíocht caiteachas riaracháin agus tacaíochta na dToscaireachtaí Aontais, ar saincheist é nach ndéantar soiléiriú air sa togra.

10.

Is cúis shonrach imní don Chúirt iad ceithre de na forálacha leasuithe agus molann sí modhnuithe ar an téacs ar féidir teacht orthu sa tábla atá i gceangal leis an Tuairim seo.

11.

Airteagal 30. Molann an Coimisiún téacs nua a chur in áit na chéad fhomhír d’Airteagal 30(3), a dhearbhóidh go gcuirfidh an Coimisiún faisnéis ar fáil, ar mhodh iomchuí, faoi na tairbhithe cistí a eascróidh ón mbuiséad a bheidh aige agus an buiséad sin á chur chun feidhme ar bhonn láraithe de bhun Airteagal 53a. Forálann Airteagal 53a nua gur féidir le cur chun feidhme an bhuiséid ag an gCoimisiún ar bhonn láraithe a bheith díreach – ag a ranna nó ag an Toscaireacht Aontais – nó indíreach i gcomhréir le hAirteagal 54 go hAirteagal 57.

12.

De bharr chomhléamh na nAirteagal nua, Airteagal 30(3), an chéad fhomhír, agus Airteagal 53a, tá feidhm ag oibleagáid an Choimisiúin chun faisnéis a choimeád faoi thairbhithe cistí a eascróidh ón mbuiséad nuair a dhéantar an buiséad a chur chun feidhme ar bhonn láraithe, go díreach agus go hindíreach. Ach, i leagan reatha d’Airteagal 30(3), an chéad fhomhír, déantar oibleagáid an Choimisiúin chun faisnéis a choimeád faoi thairbhithe cistí a eascróidh ón mbuiséad infheidhme a theorannú go cásanna ina ndéantar an buiséad a chur chun feidhme ar bhonn láraithe agus go díreach amháin.

13.

Níl baint ag síneadh na hoibleagáide chun faisnéis a choimeád i leith tairbhithe cistí a eascraíonn ón mbuiséad i gcás bainistíochta atá indíreach agus láraithe le staid shonrach na Seirbhíse Eorpaí Gníomhaíochta Seachtraí (SEGS). Dá bhrí sin, téann síneadh den sórt sin thar ábhar an togra agus bheadh sé infheidhme i gcás gach bainistíochta a bheidh indíreach agus láraithe. D’fhonn a bheith ar aon dul leis an gcleachtas reatha, ba cheart Airteagal 30(3), an chéad fhomhír, a leasú mar seo a leanas:

14.

Airteagal 60a. Is dealraitheach gurb é cuspóir Airteagail 60a ná treisiú a dhéanamh ar an bprionsabal go bhfuil Cinn Thoscaireachtaí an Aontais, agus iad ag gníomhú faoi fhotharmligean, faoi réir na rialacha cuntasachta céanna agus atá ag aon oifigigh údaraithe eile trí fhotharmligean (de bhun Airteagal 60 den Rialachán Airgeadais). Measann an Chúirt go bhfuil sé tábhachtach go ndéanfaí dualgais Chinn Thoscaireachtaí an Aontais a áitiú sa mhéid sin.

15.

De bhun an dara fomhír, áfach, tá Cinn Thoscaireachtaí an Aontais inter alia freagrach as coinbhleachtaí leasa féideartha a réiteach. Ba cheart an tagairt don choincheap “coinbhleacht leasa” sa chomhthéacs seo a sheachaint, ós rud é go ndealraíonn sé go gclúdaíonn sé seo cineál eile de “choinbhleacht leasa” a ndéanann Airteagal 52 den Rialachán Airgeadais sainmhíniú air. Ar mhaithe leis an gcomhsheasmhacht, ba cheart go gcoimeádfaí an sainmhíniú céanna ar choincheap i ngach foráil den Rialachán Airgeadais. Molann an Chúirt Airteagal 60a(1) a leasú bunaithe dá dhála sin.

16.

Airteagal 85. Ar mhaithe leis an gcomhsheasmhacht, leis an éifeachtúlacht agus leis an éifeachtacht, glacann an Chúirt le rogha Iniúchóir inmheánach an Choimisiúin mar Iniúchóir inmheánach na Seirbhíse Eorpaí Gníomhaíochta Seachtraí (SEGS). Mar sin féin, tugann dréachtú an iarthéacs mholta d'Airteagal 85 den Rialachán Airgeadais le fios nach bhfuil na cumhachtaí céanna ag Iniúchóir inmheánach an Choimisiúin i leith na SEGS mar a bheadh aige/aici i leith ranna an Choimisiúin agus go bhféadfadh na cumhachtaí sin athrú ag brath ar cé acu de rannóga ábhartha an bhuiséid – an SEGS nó an Coimisiún – atá á gcur chun feidhme. Chun aon mhíthuiscint i leith cumhachtaí an Iniúchóra inmheánaigh a sheachaint, molann an Chúirt an téacs seo a leanas a chur in áit an iarthéacs mholta.

17.

Airteagal 165. Tá ciall an leasaithe atá molta d'Airteagal 165 míshoiléir. Ní cheapann an Chúirt go bhfuil gá le hAirteagal 165 a leasú, tar éis d’Airteagal 53a a bheith leasaithe.

18.

Airteagal 185. Níl aon chuspóir ag an leasú atá molta d’Airteagal 185. Feidhmeoidh an chomparáid maidir le raon feidhme chumhachtaí Iniúchóir inmheánach an Choimisiúin de bhun tagairt do ranna an Choimisiúin amháin. Dá bhrí sin, molann an Chúirt gan Airteagal 185 a leasú.