–

għal “GVC Services (Bulgaria)” EOOD, minn D. Yordanov, advokat, kif ukoll minn D. Tench, V. Nagrani, P. Montegriffo, G. Jackson u E. Sheard, solicitors,

–

għad-Direktor na Direktsia “Obzhalvane i danachno-osiguritelna praktika” - Sofia, minn N. Kalistratov u S. Atanasova, bħala aġenti,

–

għall-Gvern Bulgaru, minn L. Zaharieva u E. Petranova, bħala aġenti,

–

għall-Gvern Daniż, minn J. Nymann-Lindegren, M. S. Wolff u P. Z. L. Ngo, bħala aġenti,

–

għall-Gvern tar-Renju Unit, minn F. Shibli, bħala aġent, assistit minn D. Yates u L. Ruxandu, barristers,

–

għall-Kummissjoni Ewropea, minn A. Armenia u Y. Marinova, bħala aġenti,

1

It-talba għal deċiżjoni preliminari tirrigwarda l-interpretazzjoni tal-Artikolu 2(a)(i) u (iii) tad-Direttiva tal-Kunsill 2011/96/UE tat-30 ta’ Novembru 2011 dwar is-sistema komuni tat-tassazzjoni li tapplika fil-każ tal-kumpanniji prinċipali u sussidjarji ta’ Stati Membri differenti (ĠU 2011, L 345, p. 8), u tal-punt (ab) tal-Parti A u tal-aħħar inċiż tal-Parti B tal-Anness I tagħha.

2

Din it-talba tressqet fil-kuntest ta’ tilwima bejn “GVC Services (Bulgaria)” EOOD, stabbilita fil-Bulgarija (iktar ’il quddiem “GVC”), u d-Direktor na Direktsia “Obzhalvane i danachno-osiguritelna praktika” - Sofia (id-Direttur tad-Direttorat tal-Appelli u tat-Taxxi u tas-Sigurtà Soċjali ta’ Sofija, il-Bulgarija) (iktar ’il quddiem id-“Direttur”) dwar avviż ta’ aġġustament tat-taxxa li jikkonstata dejn fiskali fir-rigward ta’ dividendi ddistribwiti u mħallsa minn GVC lill-kumpannija omm tagħha PGB Limited – Gibraltar, li hija stabbilita f’Ġibiltà, għall-perijodu bejn it-13 ta’ Lulju 2011 u l-21 ta’ April 2016.

Il-kuntest ġuridiku

Id-dritt tal-Unjoni

L-istatus ta’ Ġibiltà

3

Preliminarjament, għandu jiġi rrilevat li, peress li t-tilwima pendenti quddiem il-qorti tar-rinviju tikkonċerna djun ta’ taxxa dovuti għal perijodu qabel l-1 ta’ Frar 2020, ma hemmx lok li jittieħed inkunsiderazzjoni, fil-kuntest ta’ din il-kawża, il-Ftehim dwar il-ħruġ tar-Renju Unit tal-Gran Brittanja u l-Irlanda ta’ Fuq mill-Unjoni Ewropea u mill-Komunità Ewropea tal-Enerġija Atomika (ĠU 2020, L 29, p. 7).

4

Ġibiltà hija territorju Ewropew li tiegħu Stat Membru, jiġifieri r-Renju Unit tal-Gran Brittanja u l-Irlanda ta’ Fuq, jassumi r-relazzjonijiet esterni fis-sens tal-Artikolu 355(3) TFUE u li għalih japplikaw id-dispożizzjonijiet tat-Trattati.

5

L-Att li jirrigwarda l-kundizzjonijiet ta’ adeżjoni tar-Renju tad-Danimarka, tal-Irlanda u tar-Renju Unit tal-Gran Brittanja u l-Irlanda ta’ Fuq u l-aġġustamenti għat-Trattati (ĠU 1972, L 73, p. 14, iktar ’il quddiem l-“Att ta’ Adeżjoni tal-1972”) jipprevedi madankollu li ċerti partijiet tat-Trattat ma japplikawx għal Ġibiltà.

6

L-Artikolu 28 tal-Att ta’ Adeżjoni tal-1972 jipprovdi:

7

Skont l-Artikolu 29 tal-Att ta’ Adeżjoni tal-1972, flimkien mal-punt 4 tal-Parti I tal-Anness I tiegħu, Ġibiltà ma tagħmilx parti mit-territorju doganali tal-Unjoni.

Id-Direttiva 2011/96

8

Il-premessi 3 sa 6 u 8 tad-Direttiva 2011/96 jiddikjaraw:

9

Skont l-Artikolu 1(1) tad-Direttiva 2011/96:

10

L-Artikolu 2(a) ta’ din id-direttiva jipprovdi li:

11

L-Artikolu 5 tal-imsemmija direttiva jipprovdi li “[i]l-qligħ li sussidjarja tqassam lill-kumpannija prinċipali [omm] tagħha għandhom ikunu eżentati mit-taxxa fuq l-interessi [mit-taxxa f’ras il-għajn]”.

12

Il-parti A tal-Anness I tad-Direttiva 2011/96 tistabbilixxi l-lista tal-kumpanniji msemmija fl-Artikolu 2(a)(i) ta’ din id-direttiva u ssemmi, fil-punt (ab), il-“kumpanniji inkorporati taħt il-liġi tar-Renju Unit”.

13

Fil-parti B ta’ dan l-Anness I tinsab il-lista tat-taxxi msemmija fl-Artikolu 2(a)(iii) tal-imsemmija direttiva, li tinkludi, fl-aħħar inċiż tagħha, il-“corporation tax fir-Renju Unit”.

Id-dritt Bulgaru

14

Skont l-Artikolu 194(1) u (3) taż-Zakon za korporativnoto podohodno oblagane (il-Liġi dwar it-Taxxa fuq il-Kumpanniji) (DV Nru 105, tat-22 ta’ Diċembru 2006):

Il-kawża prinċipali u d-domandi preliminari

15

GVC hija kumpannija b’responsabbiltà limitata b’membru wieħed irregolata mid-dritt Bulgaru, li tipprovdi servizzi ta’ teknoloġija tal-informatika. Sal-1 ta’ Frar 2016, il-kapital tagħha kien kompletament miżmum minn PGB Limited – Gibraltar, kumpannija inkorporata f’Ġibiltà.

16

Matul il-perijodu bejn it-13 ta’ Lulju 2011 u l-21 ta’ April 2016, GVC għaddiet lill-kumpannija omm tagħha, PGB Limited – Gibraltar, dividendi u ħallsithom lilha mingħajr ma żammet jew ħallset taxxa fuqhom fil-Bulgarija, billi qieset li l-imsemmija kumpannija omm setgħet tiġi kkunsidrata bħala persuna ġuridika barranija li għandha d-domiċilju fiskali tagħha fi Stat Membru tal-Unjoni, skont l-Artikolu 194(3) tal-Liġi dwar it-Taxxa fuq il-Kumpanniji.

17

Billi qieset, għall-kuntrarju, li, f’dan il-każ, kellha tinżamm it-taxxa f’ras il-għajn fuq id-dividendi mqassma, l-awtorità fiskali Bulgara kompetenti ħarġet, fl-1 ta’ Diċembru 2017, avviż ta’ aġġustament tat-taxxa, intiż għall-irkupru ta’ ammont ta’ BGN 930 529.54 (lev Bulgaru) (madwar EUR 476 000), li minnhom BGN 669 690.32 (madwar EUR 342 000) kienu jikkostitwixxu l-ammont prinċipali u BGN 260 839.22 (madwar EUR 134 000) kienu jikkostitwixxu l-interessi moratorji. GVC ikkontestat dan l-avviż billi ppreżentat ilment amministrattiv quddiem id-Direttur, li kkonferma l-imsemmi avviż. GVC adixxiet lill-qorti tar-rinviju b’azzjoni għall-annullament tal-avviż ikkonfermat.

18

GVC issostni li d-dritt tal-Unjoni huwa applikabbli għal Ġibiltà li hija territorju Ewropew li tiegħu Stat Membru jassumi r-relazzjonijiet esterni fis-sens tal-Artikolu 355(3) TFUE u li d-distribuzzjoni tad-dividendi ma taqax taħt l-esklużjonijiet previsti fl-Artikoli 28 sa 30 tal-Att ta’ Adeżjoni tal-1972. F’dan ir-rigward, ir-rikorrenti tqis li l-kumpannija omm tissodisfa l-kundizzjonijiet tal-Artikolu 2 tad-Direttiva 2011/96 billi din il-kumpannija tista’ tiġi assimilata għal kumpannija inkorporata fir-Renju Unit u suġġetta f’Ġibiltà għat-taxxa fuq il-kumpanniji li tikkorrispondi, fil-fehma tagħha, għall-“corporation tax fir-Renju Unit” prevista fl-aħħar inċiż tal-Parti B tal-Anness I ta’ din id-direttiva.

19

Min-naħa l-oħra, id-Direttur isostni li l-Anness I tad-Direttiva 2011/96 jistabbilixxi lista espliċita u eżawrjenti kemm tal-kumpanniji (Parti A) kif ukoll tat-taxxi (Parti B) li jaqgħu fil-kamp ta’ applikazzjoni tagħha. Huwa jikkunsidra li din id-direttiva tiddefinixxi b’mod eżawrjenti l-kamp ta’ applikazzjoni tagħha u li għalhekk dan ma jistax jiġi estiż għall-kumpanniji stabbiliti f’Ġibiltà u li huma suġġetti għat-taxxa fuq il-kumpanniji, sa fejn ir-regoli fiskali ma jistgħux jiġu interpretati b’mod estensiv.

20

Peress li kellha dubji dwar jekk GVC, bħala sussidjarja ta’ kumpannija omm irreġistrata f’Ġibiltà u li hija hemmhekk suġġetta għat-taxxa fuq il-kumpanniji, taqax fil-kamp ta’ applikazzjoni tad-Direttiva 2011/96 u jekk, konsegwentement, din għandhiex tiġi eżentata mit-taxxa f’ras il-għajn fil-Bulgarija, l-Administrativen sad Sofia-grad (il-Qorti Amministrattiva ta’ Sofija, il-Bulgarija) iddeċidiet li tissospendi l-proċeduri quddiemha u li tagħmel lill-Qorti tal-Ġustizzja d-domandi preliminari li ġejjin:

Fuq l-ammissibbiltà tat-talba għal deċiżjoni preliminari

21

Għalkemm ma qajjimx formalment eċċezzjoni ta’ inammissibbiltà, il-Gvern tar-Renju Unit jindika, fl-osservazzjonijiet bil-miktub tiegħu, li ma jidhirx li huwa neċessarju li tingħata risposta għad-domandi preliminari sabiex tkun tista’ tiġi riżolta t-tilwima fil-kawża prinċipali.

22

Fir-rigward tal-istatus ta’ Ġibiltà fid-dritt tal-Unjoni, kif ġie kkonfermat mill-Qorti tal-Ġustizzja, PGB Limited – Gibraltar, bħala kumpannija stabbilita f’Ġibiltà, diġà tissodisfa l-kundizzjoni prevista fl-Artikolu 194(3) tal-Liġi dwar it-Taxxa fuq il-Kumpanniji, jiġifieri dik li tkun persuna ġuridika barranija li għandha d-domiċilju fiskali tagħha fi Stat Membru tal-Unjoni. Konsegwentement, skont dan il-gvern, l-interpretazzjoni tad-Direttiva 2011/96 ma hijiex meħtieġa.

23

F’dan ir-rigward, għandu jitfakkar li, skont ġurisprudenza stabbilita, id-domandi relatati mal-interpretazzjoni tad-dritt tal-Unjoni magħmula mill-qorti nazzjonali fil-kuntest leġiżlattiv u fattwali li hija tiddefinixxi taħt ir-responsabbiltà tagħha, u li l-eżattezza tiegħu ma huwiex il-kompitu tal-Qorti tal-Ġustizzja li tivverifika, jibbenefikaw minn preżunzjoni ta’ rilevanza. Il-Qorti tal-Ġustizzja tista’ tirrifjuta li tiddeċiedi fuq talba mressqa minn qorti nazzjonali biss meta jidher b’mod manifest li l-interpretazzjoni mitluba tad-dritt tal-Unjoni ma għandha ebda rabta mar-realtà jew mas-suġġett tat-tilwima fil-kawża prinċipali, meta l-problema tkun ipotetika jew anki meta l-Qorti tal-Ġustizzja ma jkollhiex il-punti ta’ fatt u ta’ dritt neċessarji sabiex tirrispondi b’mod utli għad-domandi li jkunu sarulha (sentenza tat-30 ta’ Jannar 2020, I.G.I., C-394/18, EU:C:2020:56, punt 56 u l-ġurisprudenza ċċitata).

24

F’dan il-każ, kif jirrileva espressament il-Gvern tar-Renju Unit stess, id-dispożizzjonijiet tad-dritt nazzjonali inkwistjoni fil-kawża prinċipali jikkostitwixxu preċiżament miżuri ta’ traspożizzjoni tad-Direttiva 2011/96.

25

Barra minn hekk, kif jirriżulta mid-deċiżjoni tar-rinviju, sabiex issolvi t-tilwima fil-kawża prinċipali, il-qorti tar-rinviju għandha tistabbilixxi jekk PGB Limited – Gibraltar, bħala kumpannija inkorporata f’Ġibiltà, taqax fil-kamp ta’ applikazzjoni tad-Direttiva 2011/96, sabiex jiġi ddeterminat jekk it-taxxa imposta fuq din il-kumpannija f’Ġibiltà tiġġustifikax l-eżenzjoni ta’ GVC, bħala sussidjarja, mit-taxxa mnaqqsa f’ras il-għajn fil-Bulgarija, skont l-Artikolu 5 ta’ din id-direttiva.

26

F’dawn iċ-ċirkustanzi, bl-ebda mod ma jista’ jiġi kkunsidrat li l-interpretazzjoni tad-Direttiva 2011/96 mitluba mill-qorti tar-rinviju f’dan il-każ ma hijiex relatata mar-realtà jew mas-suġġett tat-tilwima fil-kawża prinċipali jew tqajjem problema ta’ natura ipotetika, peress li din l-interpretazzjoni hija neċessarja għall-finijiet tas-soluzzjoni ta’ din it-tilwima.

27

Konsegwentement, it-talba għal deċiżjoni preliminari hija ammissibbli.

Fuq id-domandi preliminari

28

Permezz tad-domandi tagħha, li għandhom jiġu eżaminati flimkien, il-qorti tar-rinviju tistaqsi, essenzjalment, jekk l-Artikolu 2(a)(i) u (iii) tad-Direttiva 2011/96, moqri flimkien mal-punt (ab) tal-Parti A u mal-aħħar inċiż tal-Parti B tal-Anness I ta’ din id-direttiva, għandux jiġi interpretat fis-sens li l-kunċetti ta’ “kumpanniji inkorporati skont il-liġi tar-Renju Unit” u ta’ “corporation tax fir-Renju Unit”, li jinsabu f’dawn id-dispożizzjonijiet, jinkludux il-kumpanniji inkorporati f’Ġibiltà u li huma suġġetti hemmhekk għat-taxxa fuq il-kumpanniji.

29

B’mod preliminari, għandu jiġi osservat li l-perijodu kkonċernat fit-tilwima fil-kawża prinċipali huwa kopert kemm mid-Direttiva tal-Kunsill 90/435, kif emendata bid-Direttiva tal-Kunsill 2006/98/KE tal-20 ta’ Novembru 2006 (ĠU 2008, L 352M, p. 757) (iktar ’il quddiem id-“Direttiva 90/435”), kif ukoll mid-Direttiva 2011/96, li ħassret u ssostitwixxiet lil din l-ewwel direttiva. Madankollu, peress li d-dispożizzjonijiet rilevanti baqgħu l-istess, huwa biżżejjed, f’dan il-każ, li tingħata risposta għad-domandi magħmula fir-rigward biss tad-dispożizzjonijiet rilevanti tad-Direttiva 2011/96.

30

Sa fejn, matul il-perijodu rilevanti għat-tilwima fil-kawża prinċipali, Ġibiltà kienet tikkostitwixxi territorju Ewropew li tiegħu Stat Membru, jiġifieri r-Renju Unit, jassumi r-relazzjonijiet esterni, id-dritt tal-Unjoni kien japplika, bħala prinċipju, f’dan it-territorju skont l-Artikolu 355(3) TFUE, bla ħsara għall-esklużjonijiet espressament previsti mill-Att ta’ Adeżjoni tal-1972 (sentenza tat-23 ta’ Settembru 2003, Il-Kummissjoni vs Ir-Renju Unit, C‑30/01, EU:C:2003:489, punt 47; digriet tat-12 ta’ Ottubru 2017, Fisher, C‑192/16, EU:C:2017:762, punt 29, u s-sentenza tat-23 ta’ Jannar 2018, Buhagiar et, C‑267/16, EU:C:2018:26, punt 31 u l-ġurisprudenza ċċitata).

31

Fir-rigward tad-Direttiva 2011/96, għandu jiġi rrilevat li din ġiet adottata abbażi tal-Artikolu 115 TFUE, li jippermetti lill-Kunsill jadotta direttivi għall-approssimazzjoni tal-liġijiet, regolamenti u dispożizzjonijiet amministrattivi tal-Istati Membri li għandhom effett dirett fuq l-istabbiliment jew il-funzjonament tas-suq intern. Skont il-premessi 3 sa 6 tagħha, l-għan ta’ din id-direttiva huwa li teżenta mit-taxxa f’ras il-għajn id-dividendi u profitti oħra mqassma minn sussidjarji lill-kumpannija omm tagħhom u li telimina t-taxxa doppja fuq dan id-dħul fil-livell tal-kumpannija omm, sabiex jiġu ffaċilitati r-raggruppamenti ta’ kumpanniji fil-livell tal-Unjoni (ara f’dan is-sens, fir-rigward tad-Direttiva 90/435, is-sentenza tad-19 ta’ Diċembru 2019, Brussels Securities, C‑389/18, EU:C:2019:1132, punti 35 u 36 u l-ġurisprudenza ċċitata).

32

Kif irrileva l-Avukat Ġenerali fil-punt 30 tal-konklużjonijiet tiegħu, huwa paċifiku li din id-Direttiva 2011/96 ma taqa’ taħt ebda waħda mill-esklużjonijiet previsti fl-Artikoli 28 u 29 tal-Att ta’ Adeżjoni tal-1972.

33

Madankollu, sabiex isir magħruf jekk il-kumpanniji omm inkorporati f’Ġibiltà u li huma hemmhekk suġġetti għat-taxxa fuq il-kumpanniji jistgħux jitolbu l-eżenzjoni mit-taxxa f’ras il-għajn tal-profitti mqassma mis-sussidjarji tagħhom stabbiliti fl-Istati Membri, prevista fl-Artikolu 5 tad-Direttiva 2011/96, għandhom jittieħdu inkunsiderazzjoni d-dispożizzjonijiet ta’ din id-direttiva li jillimitaw il-kamp ta’ applikazzjoni ratione materiae tagħha, jiġifieri l-kundizzjonijiet kumulattivi previsti fl-Artikolu 2(a) tad-Direttiva 2011/96, moqri flimkien mal-punt (ab) tal-Parti A u mal-aħħar inċiż tal-Parti B tal-Anness I tagħha.

34

F’dan ir-rigward, għandu fl-ewwel lok jitfakkar li, kif diġà ġie kkonstatat fil-punt 29 ta’ din is-sentenza, peress li dawn id-dispożizzjonijiet għandhom portata essenzjalment identika għal dawk tad-Direttiva 90/435, il-ġurisprudenza tal-Qorti tal-Ġustizzja dwar it-tieni waħda minn dawn id-direttivi hija applikabbli wkoll għall-ewwel waħda minn dawn id-direttivi (digriet tat-14 ta’ Ġunju 2018, GS, C‑440/17, mhux ippubblikat, EU:C:2018:437, punt 30). Issa, il-Qorti tal-Ġustizzja ddeċidiet li d-Direttiva 90/435 ma għandhiex l-għan li tistabbilixxi sistema komuni għall-kumpanniji kollha tal-Istati Membri, u lanqas għat-tipi kollha ta’ ishma (sentenzi tat-22 ta’ Diċembru 2008, Les Vergers du Vieux Tauves, C‑48/07, EU:C:2008:758, punt 49, u tal‑1 ta’ Ottubru 2009, Gaz de France – Berliner Investissement, C‑247/08, EU:C:2009:600, punt 36).

35

Minn dan jirriżulta, kif irrileva l-Avukat Ġenerali fil-punt 36 tal-konklużjonijiet tiegħu, li, għal raġunijiet ta’ ċertezza legali, kull possibbiltà li l-kamp ta’ applikazzjoni tad-Direttiva 2011/96 jiġi estiż b’analoġija għal kumpanniji oħra minbarra dawk elenkati fil-Parti A tal-Anness I ta’ din id-direttiva hija eskluża, peress li l-kamp ta’ applikazzjoni ratione materiae tal-imsemmija direttiva huwa ddefinit permezz ta’ lista eżawrjenti ta’ kumpanniji.

36

Għandu jiġi enfasizzat, fit-tieni lok, li mill-formulazzjoni tal-Artikolu 2(a) tad-Direttiva 2011/96, moqri flimkien mal-punt (ab) tal-Parti A u mal-aħħar inċiż tal-Parti B tal-Anness I tagħha, jirriżulta li, fir-rigward tar-Renju Unit, id-Direttiva 2011/96 tapplika biss għall‑“kumpanniji inkorporati skont il-liġi tar-Renju Unit” u suġġetti għall‑“corporation tax fir-Renju Unit”.

37

Dawn id-dispożizzjonijiet jinkludu riferiment espliċitu għad-dritt tar-Renju Unit. Għalhekk dawn għandhom jiġu interpretati konformement mad-dritt nazzjonali indikat bħala applikabbli (ara, f’dan is-sens, is-sentenza tat-22 ta’ Novembru 2012, Bank Handlowy u Adamiak, C‑116/11, EU:C:2012:739, punt 50).

38

Issa, għandu jiġi rrilevat li, fl-osservazzjonijiet bil-miktub tiegħu, il-Gvern tar-Renju Unit ippreċiża li, skont id-dritt intern ta’ dan l-Istat Membru, il-kumpanniji inkorporati skont id-dritt nazzjonali tiegħu jistgħu jinkludu biss kumpanniji li huma kkunsidrati li huma inkorporati fir-Renju Unit, li ma jinkludux, fi kwalunkwe każ, il-kumpanniji inkorporati f’Ġibiltà, fatt li ma ġiex formalment ikkontestat mill-partijiet l-oħra fil-proċedura quddiem il-Qorti tal-Ġustizzja.

39

Barra minn hekk, dan il-gvern ippreċiża, ukoll mingħajr kontestazzjoni, li, skont id-dritt intern tar-Renju Unit, it-taxxa miġbura f’Ġibiltà ma tikkostitwixxix “corporation tax fir-Renju Unit”.

40

Minn dan isegwi, fid-dawl tal-proċess imressaq quddiem il-Qorti tal-Ġustizzja, li l-kumpanniji inkorporati f’Ġibiltà ma jissodisfawx il-kundizzjoni ta’ applikabbiltà prevista fl-Artikolu 2(a)(i) tad-Direttiva 2011/96, moqri flimkien mal-punt (ab) tal-Parti A tal-Anness I ta’ din id-direttiva u li s-sistema ta’ taxxi stabbilita minn Ġibiltà ma tissodisfax il-kundizzjoni ta’ applikabbiltà prevista fl-Artikolu 2(a)(iii) tal-imsemmija direttiva, moqri flimkien mal-aħħar inċiż tal-Parti B tal-Anness I tagħha.

41

Il-kunsiderazzjonijiet preċedenti huma bla ħsara għall-obbligu li jiġu osservati, fid-data tal-fatti tat-tilwima fil-kawża prinċipali, l-Artikoli 49 u 63 TFUE u li jiġi vverifikat, eventwalment, jekk it-tassazzjoni tal-profitti mqassma minn sussidjarja Bulgara lill-kumpannija omm tagħha stabbilita f’Ġibiltà tikkostitwixxix, fid-dawl tad-dritt ta’ stabbiliment jew tal-moviment liberu tal-kapital li minnu jgawdu l-kumpanniji stabbiliti f’Ġibiltà (digriet tat-12 ta’ Ottubru 2017, Fisher, C‑192/16, EU:C:2017:762, punti 26 u 27), restrizzjoni u, jekk iva, jekk tali restrizzjoni hijiex iġġustifikata.

42

Fid-dawl ta’ dan kollu premess, ir-risposta għad-domandi magħmula għandha tkun li l-Artikolu 2(a)(i) u (iii) tad-Direttiva 2011/96, moqri flimkien mal-punt (ab) tal-Parti A u mal-aħħar inċiż tal-parti B tal-Anness I ta’ din id-direttiva, għandu jiġi interpretat fis-sens li l-kunċetti ta’ “kumpanniji inkorporati skont il-liġi tar-Renju Unit” u ta’ “corporation tax fir-Renju Unit”, li jinsabu f’dawn id-dispożizzjonijiet, ma jipprevedux il-kumpanniji inkorporati f’Ġibiltà u li huma hemmhekk suġġetti għat-taxxa fuq il-kumpanniji.

Fuq l-ispejjeż

43

Peress li l-proċedura għandha, fir-rigward tal-partijiet fil-kawża prinċipali, in-natura ta’ kwistjoni mqajma quddiem il-qorti tar-rinviju, hija dik il-qorti li għandha tiddeċiedi fuq l-ispejjeż. L-ispejjeż sostnuti għas-sottomissjoni tal-osservazzjonijiet lill-Qorti tal-Ġustizzja, barra dawk tal-imsemmija partijiet, ma jistgħux jitħallsu lura.