(1)

Foráiltear le Rialachán (AE) 2015/2283 nach bhféadfar ach bianna núíosacha a údaraítear agus atá ar liosta an Aontais de bhianna núíosacha a chur ar an margadh laistigh den Aontas.

(2)

De bhun Airteagal 8 de Rialachán (AE) 2015/2283, bunaíodh liosta an Aontais de bhianna núíosacha le Rialachán Cur Chun Feidhme (AE) 2017/2470 ón gCoimisiún (2).

(3)

An 16 Bealtaine 2020, chuir an chuideachta The Protein Brewery B.V. (‘an t-iarratasóir’) iarratas ar údarú faoi bhráid an Choimisiúin i gcomhréir le hAirteagal 10(1) de Rialachán (AE) 2015/2283 chun bithmhais an fhungais Rhizomucor pusillus a chur ar mhargadh an Aontais mar bhia núíosach. D’iarr an t-iarratasóir bithmhais an fhungais Rhizomucor pusillus a úsáid mar bhia iomlán, mar chomhábhar i roinnt táirgí bia, lena n-áirítear malartú ar bhéile chun meáchan a rialú ar leibhéil nach sáraíonn 40 g in aghaidh an bhéile, agus i bhforbhianna mar a shainmhínítear i dTreoir 2002/46/CE ó Pharlaimint na hEorpa agus ón gComhairle (3), ar leibhéil nach sáraíonn 6 g/lá i gcás daoine fásta i gcoitinne, cé is moite de mhná atá torrach nó de mhná atá ag lachtadh.

(4)

An 16 Bealtaine 2020, chuir an t-iarratasóir iarraidh faoi bhráid an Choimisiúin ar staidéar dílsithe eolaíoch agus sonraí dílsithe eolaíocha a chosaint, mar atá, sainaitheantas an bhia núíosaigh (4), an próiseas táirgthe (5), anailís chomhdhéanaimh (6), stair úsáide (7), faisnéis faoi ionsú, dáileadh, meitibileacht agus eisfhearadh (8), faisnéis chothaitheach (9), faisnéis thocsaineolaíoch (10), géineatocsaineacht (11), staidéar tocsaineachta meathainsealaí (12), sonraí daonna (13), agus ailléirgineacht (14).

(5)

An 7 Eanáir 2021, d’iarr an Coimisiún ar an Údarás Eorpach um Shábháilteacht Bia (‘an tÚdarás’) measúnú a dhéanamh ar bhithmhais an fhungais Rhizomucor pusillus mar bhia núíosach.

(6)

An 29 Meán Fómhair 2025, ghlac an tÚdarás an tuairim eolaíoch uaidh dar teideal ‘Sábháilteacht púdair bithmhaise Rhizomucor pusillus mar bhia núíosach de bhun Rialachán (AE) 2015/2283 (15)’ i gcomhréir le hAirteagal 11 de Rialachán (AE) 2015/2283.

(7)

Sa tuairim eolaíoch uaidh, chinn an tÚdarás go raibh bithmhais an fhungais Rhizomucor pusillus sábháilte faoi na coinníollacha úsáide atá beartaithe don spriocghrúpa atá beartaithe. Dá bhrí sin, is leor an foras sa tuairim eolaíoch sin chun a shuí maidir le bithmhais an fhungais Rhizomucor pusillus, nuair a úsáidtear é mar bhia iomlán, mar chomhábhar i dtáirgí bia, lena n-áirítear malartú ar bhéile chun meáchan a rialú ar leibhéil nach sáraíonn 40 g in aghaidh an bhéile, agus i bhforbhianna ar leibhéil nach sáraíonn 6 g/lá i gcás daoine fásta i gcoitinne, cé is moite de mhná atá torrach agus de mhná atá ag lachtadh, go gcomhlíonann sé na coinníollacha maidir lena chur ar an margadh i gcomhréir le hAirteagal 12(1) de Rialachán (AE) 2015/2283.

(8)

Sa tuairim eolaíoch uaidh, thug an tÚdarás dá aire freisin go raibh an chonclúid uaidh i ndáil le sábháilteacht an bhia núíosaigh bunaithe ar na tuarascálacha anailíseacha maidir le sainaitheantas an bhia núíosaigh, an próiseas táirgthe, anailís chomhdhéanaimh, stair úsáide, faisnéis faoi ionsú, dáileadh, meitibileacht agus eisfhearadh, faisnéis chothaitheach, faisnéis thocsaineolaíoch, géineatocsaineacht, staidéar tocsaineachta meathainsealaí, sonraí daonna agus ailléirgineacht, nithe nach bhféadfadh sé measúnú a dhéanamh ar an mbia núíosach ná teacht ar a chonclúid dá n-uireasa.

(9)

Dhearbhaigh an t-iarratasóir go raibh, tráth a chuir sé an t-iarratas isteach, cearta dílseánaigh eisiacha aige chun tagairt a dhéanamh do na staidéir eolaíocha agus na sonraí sin.

(10)

Rinne an Coimisiún measúnú ar an bhfaisnéis uile a sholáthair an t-iarratasóir agus mheas sé go bhfuil bunús leordhóthanach tugtha aige gur comhlíonadh na ceanglais a leagtar síos in Airteagal 26(2) de Rialachán (AE) 2015/2283. Dá bhrí sin, an fhianaise eolaíoch agus na sonraí eolaíocha, mar atá, sainaitheantas an bhia núíosaigh, an próiseas táirgthe, anailís chomhdhéanaimh, stair úsáide, faisnéis faoi ionsú, dáileadh, meitibileacht agus eisfhearadh, faisnéis chothaitheach, faisnéis thocsaineolaíoch, géineatocsaineacht, staidéar tocsaineachta meathainsealaí, sonraí daonna agus ailléirgineacht, ba cheart iad sin a chosaint i gcomhréir le hAirteagal 27(1) de Rialachán (AE) 2015/2283. Dá réir sin, is é an t-iarratasóir amháin ba cheart a údarú chun bithmhais an fhungais Rhizomucor pusillus a chur ar an margadh laistigh den Aontas ar feadh tréimhse 5 bliana ó theacht i bhfeidhm an Rialacháin seo.

(11)

Mar sin féin, maidir le húdarú bhithmhais an fhungais Rhizomucor pusillus agus an tagairt don fhianaise eolaíoch agus do na sonraí atá i gcomhad an iarratasóra a shrianadh d’úsáid an iarratasóra amháin, ní chuirfidh an srianadh sin cosc ar iarratasóirí eile ina dhiaidh sin cur isteach ar údarú chun an bia núíosach céanna a chur ar an margadh ar choinníoll gur ar fhaisnéis a fuarthas go dlíthiúil agus atá ina taca leis an údarú sin atá a n-iarratas bunaithe.

(12)

D’fhéadfadh úsáid an téarma ‘bithmhais an fhungais Rhizomucor pusillus’ in ainmniú an bhia núíosaigh tomhaltóirí a chur amú maidir lena shainaitheantas agus lena chomhdhéanamh. Dá bhrí sin, is iomchuí an t-ainmniúchán ‘mícéiliam Rhizomucor pusillus’ a mhol an t-iarratasóir a chur in ionad an téarma ‘bithmhais an fhungais Rhizomucor pusillus’.

(13)

Is iomchuí an fhaisnéis dá dtagraítear in Airteagal 9(3) de Rialachán (AE) 2015/2283 a bheith san iontráil a bhaineann le mícéiliam Rhizomucor pusillus mar bhia núíosach ar liosta an Aontais de bhianna núíosacha.

(14)

Ba cheart mícéiliam Rhizomucor pusillus a chur le liosta an Aontais de bhianna núíosacha a leagtar amach i Rialachán Cur Chun Feidhme (AE) 2017/2470. Dá bhrí sin, ba cheart an Iarscríbhinn a ghabhann le Rialachán Cur Chun Feidhme (AE) 2017/2470 a leasú dá réir sin.

(15)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,