(1)

Fl-20 ta' Settembru 2011, il-Kummissjoni adottat Deċiżjoni (id-“deċiżjoni tal-2011”) (2) li tapprova diversi miżuri ta' għajnuna mill-Istat favur HSH Nordbank AG (“HSH” jew “il-bank”). HSH huwa Landesbank Ġermaniż li s-sidien prinċipali tiegħu huma żewġ stati federali Ġermaniżi (il-“Länder” jew is-“sidien pubbliċi”),l-Istat ta' Schleswig-Holstein (“Schleswig-Holstein”) u l-Istat tal-Belt ta' Hamburg (“Hamburg”). Dawn il-miżuri kienu jinkludu garanzija fuq it-tieni telf (il-“garanzija”) mogħtija mill-HSH Finanzfonds AöR (il-“Finanzfonds” jew il-“fornitur tal-garanzija”) fl-ammont nominali ta' EUR 10 biljun. B'mod temporanju, il-Kummissjoni kienet diġà approvat il-garanzija f'deċiżjoni ta' salvataġġ preċedenti, meħuda fl-2009.

(2)

Fid-9 ta' Marzu, fit-18 ta' Ġunju, u fis-6 ta' Settembru 2011, HSH kienet qablet mal-fornitur tal-garanzija biex jiġu kkanċellati partijiet tal-garanzija fuq it-tieni telf, b'hekk tnaqqas l-ammont massimu tal-garanzija għal EUR 7 biljun. Konsegwentement, il-pjan ta' ristrutturar li fuqu kienet ibbażata d-deċiżjoni tal-2011 kien jassumi li l-HSH tħallas il-miżati ta' garanzija biss fuq garanzija ta' EUR 7 biljun. (3)

(3)

Fit-22 ta' Mejju 2013, il-Ġermanja nnotifikat lill-Kummissjoni bl-intenzjoni ta' Schleswig-Holstein u Hamburg li jerġgħu jżidu l-ammont massimu tal-garanzija minn EUR 7 biljun lura għal EUR 10 biljun. Man-notifika, il-Ġermanja ssottomettiet ukoll pjan aġġornat ta' direzzjoni tal-kummerċ fuq perjodu ta' żmien medju tal-HSH għall-perjodu mill-2013 sal-2015.

(4)

Bl-ittra datata l-21 ta' Ġunju 2013 (id-“Deċiżjoni tal-ftuħ”), il-Kummissjoni infurmat lill-Ġermanja li hija kienet tikkunsidra ż-żieda mill-ġdid tal-ammont massimu tal-garanzija b'EUR 3 biljun bħala għajnuna ġdida, li hija approvata b'mod temporanju, u li kienet iddeċidiet li tibda l-proċedura stabbilita fl-Artikolu 108(2) tat-Trattat dwar il-Funzjonament tal-Unjoni Ewropea (“TFUE”) b'rabta ma' din l-għajnuna.

(5)

Id-deċiżjoni tal-Kummissjoni li tibda l-proċedura ġiet ippubblikata f'Il-Ġurnal Uffiċjali tal-Unjoni Ewropea (4) . Il-Kummissjoni stiednet lill-partijiet interessati jissottomettu l-kummenti tagħhom.

(6)

Il-Ġermanja ssottomettiet kummenti dwar id-Deċiżjoni tal-ftuħ permezz tal-ittra datata t-30 ta' Settembru 2013. Il-Kummissjoni ma rċeviet l-ebda kumment mingħand il-partijiet interessati.

(7)

Permezz tal-ittra tal-20 ta' Diċembru 2013, il-Ġermanja ssottomettiet l-ewwel pjan ta' ristrutturar flimkien ma' impenn biex taġġorna dan il-pjan u biex tibbażah fuq suppożizzjonijiet aktar konservattivi wara l-għeluq tal-kontijiet annwali tal-HSH tal-2013. Il-Ġermanja ssottomettiet pjan ta' ristrutturar aġġornat fit-28 ta' April 2014 u, wara laqgħat u korrispondenza ulterjuri, kompliet aġġornat dan il-pjan permezz ta' sottomissjoni fis-17 ta' April 2015.

(8)

Fl-iskambji bejn l-awtoritajiet Ġermaniżi u s-servizzi tal-Kummissjoni baqa' mhux ċar jekk dawn il-pjanijiet jeliminax id-dubji espressi fid-Deċiżjoni tal-ftuħ fir-rigward tar-ritorn tal-HSH għall-vijabbiltà. Għaldaqstant, l-awtoritajiet Ġermaniżi fittxew li jipproponu soluzzjonijiet alternattivi lill-Kummissjoni matul l-2015. Fl-aħħar nett, madankollu, dawn l-ideat ma ġewx segwiti iżjed mill-awtoritajiet Ġermaniżi.

(9)

Fid-19 ta' Ottubru 2015, ir-rappreżentanti tas-sidien pubbliċi, tal-Ġermanja u tal-Kummissjoni laħqu ftehim dwar il-qafas prinċipali għal notifika. Il-miżuri jikkonsistu l-aktar minn qasma tal-bank f'kumpanija azzjonarja u sussidjarja tal-operazzjonijiet fejn din tal-aħħar tkompli l-operazzjonijiet attwali tal-bank. Din is-sussidjarja għandha sussegwentement tinbiegħ, jew, fil-każ ta' bejgħ mingħajr suċċess, twaqqaf negozju ġdid u tamministra l-assi bil-għan li twassal għall-istralċ tagħhom.

(10)

Fil-21 ta' Marzu 2016, il-Ġermanja nnotifikat mill-ġdid iż-żieda mill-ġdid tal-2013 tal-garanzija bħala għajnuna għall-bejgħ jew għall-istralċ tal-HSH, inklużi l-impenji korrispondenti (5).

(11)

HSH hija kumpanija privata b'ishma konġunti li ġiet stabbilita fl-2003 bħala riżultat tal-amalgamazzjoni bejn dak li qabel kien Hamburgische Landesbank u Landesbank Schleswig-Holstein. Hamburg u Schleswig-Holstein għandhom il-maġġoranza tal-ishma tal-HSH. Flimkien dawn għandhom 85,38 % tal-ishma tal-bank, li huma miżmuma b'mod dirett jew permezz tal-Finanzfonds, istituzzjoni rregolata mid-dritt pubbliku u kkontrollata minn Hamburg u Schleswig-Holstein (6). L-Assoċjazzjoni tal-Banek tat-Tfaddil ta' Schleswig-Holstein għandha 5,31 % u grupp ta' disa' trusts fuq parir ta' J.C. Flowers għandu 9,31 % tal-ishma. Għal raġunijiet storiċi, l-HSH għandha żewġ uffiċċji prinċipali, f'Hamburg u f'Kiel.

(12)

B'assi totali ta' EUR 105 biljun fit-30 ta' Settembru 2015, l-HSH hija l-ħames l-akbar mis-seba' gruppi Ġermaniżi ta' Landesbanken. Il-bank li jopera prinċipalment fit-Tramuntana u fir-reġjuni metropolitani tal-Ġermanja, jiffoka fuq operazzjonijiet bankarji korporattivi, proprjetà immobbli u operazzjonijiet bankarji privati. Il-kummerċ ma' klijenti korporattivi, kemm dak domestiku kif ukoll dak internazzjonali, jinvolvi, minbarra proġetti ta' enerġija u ta' infrastruttura, l-aktar il-qasam tat-trasport bil-baħar.

(13)

Fl-2009, Finanzfonds għamlet injezzjoni ta' kapital ta' EUR 3 biljun fil-bank u fl-istess ħin ipprovdiet garanzija fuq it-tieni telf li kienet tammonta għal EUR 10 biljun b'data effettiva tal-1 ta' April 2009. Barra minn hekk, il-Fond Ġermaniż għall-Istabbilizzar tas-Swieq Finanzjarji (SoFFin) tat lill-HSH garanziji li jkopru ħruġ ġdid ta' dejn ta' mhux aktar minn EUR 17-il biljun. Dawn il-miżuri ta' għajnuna ġew approvati fid-deċiżjoni tal-2011 abbażi ta' pjan ta' ristrutturar u ta' impenji kif ukoll kundizzjonijiet relatati fir-rigward tar-remunerazzjoni u l-kondiviżjoni tal-piżijiet.

(14)

Il-pjan ta' ristrutturar li jinkludi l-impenji tal-Ġermanja kien magħmul minn tnaqqis tal-esponiment tal-bank għall-kummerċ fil-qasam tat-trasport bil-baħar u diversifikazzjoni fi ħdan il-mudell kummerċjali tiegħu. Dan kien jeħtieġ li l-bank ineħħi r-riskju minn fuq il-karta tal-bilanċ tiegħu billi jillimita l-esponiment għal kummerċ ċikliku bħal finanzjament fuq il-qasam tat-trasport bil-baħar u fuq l-inġenji tal-ajru, mill-ġdid joħloq bilanċ fit-taħlita kummerċjali tiegħu permezz ta' enfasi akbar fuq il-kummerċ korporattiv reġjonali u l-proprjetà immobbli, u jistabbilizza l-finanzjament tiegħu billi jnaqqas id-dipendenza fuq il-finanzjament fil-livell tal-operaturi, inkluż f'USD.

(15)

Matul l-2011, fuq l-inizjattiva tal-HSH, permezz ta' approċċ gradwali, il-limitu ta' EUR 10 biljun tal-garanzija fuq it-tieni telf tnaqqas għal EUR 7 biljun (EUR 1 biljun kull darba f'Marzu, f'Ġunju, u f'Settembru 2011). Dan it-tnaqqis naqqas il-miżati li l-HSH kellha tħallas lil Finanzfonds u kien inkluż fil-pjan ta' ristrutturar li serva bħala bażi għad-deċiżjoni tal-2011.

(16)

Għalkemm il-pjan ta' ristrutturar tal-2011 kien jassumi li r-rati tan-noleġġ jirkupraw, fis-sena ta' wara d-deċiżjoni tal-2011, ir-rati tan-noleġġ, b'mod partikolari għall-bastimenti tal-kontejners, naqsu b'madwar terz, bi żviluppi simili jaffettwaw il-valur tas-suq tal-bastimenti. Għalkemm l-HSH naqqset b'mod konsiderevoli l-esponimenti tagħha fil-qasam tat-trasport bil-baħar, il-portafoll ta' self fuq il-qasam tat-trasport bil-baħar baqa' kummerċ ewlieni. Riżultat ta' dan, l-HSH kienet affettwata b'mod serju minn dawn l-iżviluppi li, flimkien mar-rati tal-kambju tal-EUR/USD, kienu l-muturi ewlenin tal-probabbiltà ta' inadempjenza tal-portafoll fil-qasam tat-trasport bil-baħar tal-HSH u, konsegwentement, tal-provvedimenti meħtieġa għal telf mis-self.

(17)

Bħala konsegwenza, fl-2013 is-superviżur talab lill-bank ifittex ritorn tal-limitu tal-garanzija bi EUR 3 biljun għal-livell oriġinali tiegħu ta' EUR 10 biljun. Il-Kummissjoni, meta approvat b'mod temporanju din iż-żieda mill-ġdid bħala miżura ta' għajnuna ġdida f'Ġunju 2013, esprimiet dubji, abbażi tal-pjan ta' direzzjoni tal-kummerċ sottomess man-notifika taż-żieda mill-ġdid, fir-rigward tar-ritorn għall-vijabbiltà fit-tul tal-HSH u staqsiet jekk l-HSH, biex tikseb dan l-għan, kellhiex bżonn taġġusta l-istrateġija kummerċjali tagħha u tikkunsidra azzjonijiet alternattivi (7).

(18)

Wara d-Deċiżjoni tal-ftuħ, l-HSH mhux biss kompliet tfalli b'mod sinifikanti l-pjan ta' ristrutturar li kien il-bażi għall-approvazzjoni ta' għajnuna għar-ristrutturar fid-deċiżjoni tal-2011 iżda wkoll falliet fid-diversi pjanijiet intermedjarji aġġornati pprovduti lis-servizzi tal-Kummissjoni.

(19)

Din il-miżura tikkonsisti miż-żieda mill-ġdid tal-limitu tal-garanzija fuq it-tieni telf kif deskritt fil-Premessa 17. Il-garanzija fuq it-tieni telf tfisser li l-garanti huwa responsabbli biss għal rimborż ta' telf fuq il-portafoll garantit li jeċċedi s-segment tal-ewwel telf ta' EUR 3,2 biljun imħallas mill-HSH. Bil-limitu mill-ġdid stabbilit għal EUR 10 biljun, il-garanzija konsegwentement tikkumpensa għal telf fil-portafoll garantit ta' bejn EUR 3,2 biljuni u EUR 13,2-il biljun (8).

(20)

Il-portafoll garantit kellu valur skont il-kotba inizjali ta' madwar EUR 185 biljun li kien jirrappreżenta madwar 75 % tat-total tal-karta tal-bilanċ tal-bank fl-2009. Ħafna mill-assi garantiti kienu self lil klijenti (inizjalment EUR 115-il biljun) iżda kienu jinkludu wkoll titoli ta' introjtu fiss (inizjalment EUR 27 biljun), self b'obbligazzjonijiet (inizjalment EUR 15-il biljun), garanziji fuq pagamenti (inizjalment EUR 5 biljun), u titoli bbażati fuq assi (inizjalment EUR 9 biljun) (9).

(21)

Kienu biss madwar EUR 50 biljun f'assi mkejla fi skopertura f'każ ta' inadempjenza (“EAD”) (10) li baqgħu pendenti taħt il-garanzija fl-aħħar tal-2015. Dawn l-assi li fadal huma kważi esklussivament self lil klijenti l-aktar fis-setturi tal-attivitajiet kummerċjali tat-trasport bil-baħar, ta' dawk korporattivi u tal-proprjetà immobbli.

(22)

Pagamenti fi flus mill-garanzija jinqalgħu meta l-assi garantiti finalment jiġu saldati b'telf għall-bank u wara li jiġi kkunsmat il-porzjon sħiħ tas-segment tal-ewwel telf ta' EUR 3,2 biljun. Attwalment, kienu biss madwar EUR 1,6 biljun ta' telf li ġew saldati fuq assi taħt il-garanzija. Barra minn hekk, il-garanzija tipprovdi wkoll effett ta' ktieb pożittiv billi tagħti kumpens fuq provvedimenti għal telf minn self meħud fuq il-portafoll garantit, li jippermetti li l-bank u s-superviżur jikkalkolaw u jimmonitorjaw l-użu “virtwali” tal-garanzija, jiġifieri l-mistennija pagamenti fi flus taħt il-garanzija. Fl-aħħar nett, filwaqt li l-garanzija tkun fis-seħħ, il-piż tar-riskju tal-assi garantiti, soġġett għal diskrezzjoni superviżorja, jonqos b'mod sinifikanti.

(23)

Biex tħallas għall-effetti tal-garanzija, l-HSH tħallas primjum fuq bażi annwali ta' 4 % flimkien ma' primjum addizzjonali ta' 3,85 %.

(24)

Il-primjum fuq bażi annwali ta' 4 % jikkonsisti minn żewġ komponenti — 2,20 % ta' remunerazzjoni u 1,80 % ta' rkupru sħiħ — u jiġi kkalkolat fuq l-ammont massimu pendenti. Bħala riżultat, il-fatt li l-bank juża l-garanzija ma jnaqqasx il-bażi ta' kalkolu għall-primjum ta' garanzija. Il-primjum fuq bażi annwali jeħtieġ li jitħallas mill-HSA sakemm il-garanzija jew tintuża għal kollox jew tiġi kkanċellata sabiex l-ebda garanzija oħra ma tkun pendenti. Skont previżjonijiet attwali, il-portafoll m'għandux jiġi likwidat qabel it-tmiem tal-2025.

(25)

Il-primjum annwali addizzjonali ta' 3,85 % irid jitħallas mill-HSH bejn l-2009 u l-2019 — sakemm il-garanzija ma tintużax b'mod sħiħ jew ma tiġix ikkanċellata qabel l-2019 — fuq l-ammont reali ta' telf saldat taħt il-garanzija. L-ammont reali dovut skont dan il-primjum għalhekk ikun magħruf biss ladarba l-garanzija tiġi saldata għal kollox, jew billi tintuża jew billi tiġi kkanċellata. Barra minn hekk, il-primjum addizzjonali huwa soġġett għal garanzija għad-debitu (“Besserungsschein”) li tipproteġi l-proporzjon tal-kapital tal-bank. Jekk il-proporzjon ta' ekwità komuni tal-bank jaqa' taħt il-proporzjon minimu ta' 10 %, il-pagamenti tal-proporzjon tal-kapital ta' ekwità bażika (“proporzjon ta' Grad 1 ta' Ekwità Komuni”) għandhom jiġu differiti sa mhux aktar tard mill-[2030-2040] (*1). Il-fornitur tal-garanzija għandu d-dritt iċedi d-drittijiet tiegħu għall-primjum addizzjonali f'każ ta' bejgħ b'suċċess tal-bank.

(26)

Fil-21 ta' Marzu 2016, il-Ġermanja nnotifikat dawn iż-żewġ miżuri li ġejjin:

(27)

Id-diviżjoni u t-trasferiment sa mhux aktar minn EUR 6,2 biljun ta' assi ta' skopertura f'każ ta' inadempjenza huma stipulati fl-impenji rilevanti li huma inklużi fil-katalogu (“il-katalogu tal-impenji”) li l-Ġermanja ssottomettiet man-notifika tal-21 ta' Marzu 2016 u li huwa anness ma' din id-deċiżjoni (ara Anness I) (11).

(28)

Taħt il-miżura 1 tal-2016, OpCo se żżomm l-assi u r-responsabbiltajiet operattivi kollha tal-HSH inklużi l-assi koperti minn garanzija, il-garanzija nnifisha u l-liċenzja bankarja. Bħala ħlas ta' miżata għaż-żamma tal-benefiċċju tal-garanzija, OpCo se tħallas 2,20 % tar-remunerazzjoni fuq il-parti mhux użata tal-garanzija (12). L-obbligazzjonijiet l-oħra kollha taħt il-kuntratt tal-garanzija għandhom jitħallsu minn HoldCo, jiġifieri l-primjum bażi ta' 2,20 % bħala remunerazzjoni fuq il-parti użata tal-garanzija, il-primjum bażi ta' 1,80 % previst bħala rkupru sħiħ skont id-deċiżjoni tal-2011 u l-primjum addizzjonali ta' 3,85 % inkluż il-Besserungsschein (13).

(29)

HoldCo se tkun biss kumpanija azzjonarja finanzjarja mingħajr ebda attività kummerċjali operattiva. L-assi ta' HoldCo għandhom jikkonsistu minn tal-anqas 90 % tal-ishma ta' OpCo u likwidità limitata oħra pprovduta minn OpCo (14) sabiex jiġu koperti l-ispejjeż operattivi ta' HoldCo u l-pagamenti tal-miżata tal-garanzija meta dawn ikun dovuti. Ir-responsabbiltajiet ta' HoldCo għandhom jikkonsistu mill-obbligazzjonijiet għall-ħlas tal-miżata tal-garanzija akkwistati mal-qasma. Sabiex jiġi minimizzat ir-riskju ta' falliment ta' HoldCo, għandu jiġi konkluż ftehim ta' subordinazzjoni bejn Holdco u l-fornitur tal-garanzija għal dawn l-obbligazzjonijiet. Taħt dan il-ftehim, kwalunkwe pagament li HoldCo ma tkunx tista' tħallas, jista' jiġi differit għad-data ta' ħlas li jmiss kontra rata ta' imgħax ta' 10 %.

(30)

Bħala miżura ta' akkumpanjament, OpCo se titħalla tbigħ portafoll sa mhux aktar minn EUR 6,2 biljun assi għall-iskopertura f'każ ta' inadempjenza lil-Länder bi prezzijiet tas-suq. Dan it-trasferiment jista' jseħħ f'diversi segmenti (15). Il-Kummissjoni wettqet verifika indipendenti tal-prezz tas-suq qabel il-bejgħ tal-assi bbażata fuq valutazzjoni tal-assi indipendenti. Jekk kwalunkwe trasferiment iseħħ wara l-aħħar ta' Awwissu 2016, ikun meħtieġ valutazzjoni addizzjonali mill-Kummissjoni tal-valur tas-suq (16).

(31)

Minbarra l-impenji relatati mal-qasma f'HoldCo u OpCo u d-diviżjoni tal-pagamenti tal-miżata tal-garanzija deskritti fit-Taqsima 2.2.2, il-Ġermanja ssottomettiet impenji ulterjuri. L-ewwel nett, dawn jirrigwardaw l-impenn għall-bejgħ tal-ishma ta' HoldCo f'OpCo permezz ta' proċedura ta' offerti miftuħa, mhux diskriminatorja, kompetittiva u trasparenti sa mhux aktar tard mit-28 ta' Frar 2018 (17). Biex il-privatizzazzjoni tiġi implimentata fil-ħin, l-awtoritajiet Ġermaniżi għandhom jissottomettu lill-Kummissjoni pjan bi stadji importanti qabel il-bidu tal-proċedura tal-bejgħ (18). Jekk il-proċedura tal-bejgħ tkun konkluża b'suċċess b'offerta ta' prezz ħielsa mill-għajnuna u pożittiva (filwaqt li tinżamm il-garanzija), ix-xiri maħsub għandu jiġi nnotifikat lill-Kummissjoni biex din tal-aħħar tivvaluta l-vijabbiltà tal-entità l-ġdida. Ix-xiri ma jiġix implimentat qabel deċiżjoni ta' approvazzjoni mill-Kummissjoni (19). Mal-bejgħ b'suċċess, il-bank għandu jibdel ismu (20).

(32)

Jekk il-proċedura tal-bejgħ ma tiġix konkluża b'suċċess fiż-żmien stipulat, jiġifieri jekk il-proċedura ma tirriżultax f'offerta ta' prezz ħielsa mill-għajnuna u pożittiva (filwaqt li tinżamm il-garanzija) jew jekk il-Kummissjoni tikkonkludi li l-integrazzjoni ta' OpCo fl-entità l-ġdida ma twassalx għal mudell kummerċjali vijabbli fit-tul, il-Ġermanja ħadet l-impenn li OpCo twaqqaf l-attività kummerċjali l-ġdida tagħha u tamministra biss l-assi tagħha bil-għan li jkun hemm stralċ ordnat (21). Matul il-perjodu sal-iskadenza tal-bejgħ, l-awtoritajiet Ġermaniżi impenjaw ruħhom li HoldCo tamministra lil OpCo bil-għan li tinżamm il-vijabbiltà, il-kompetittività u l-kapaċità tagħha li tinbiegħ (22). Għal dan il-għan, għandhom jitwettqu aktar miżuri biex jitnaqqsu l-ispejjeż ta' OpCo (bl-ispejjeż amministrattivi li ma jeċċedux EUR [570-590] miljun fl-2016 u EUR [520-550] miljun fl-2017), sabiex jiġi msaħħaħ il-bażi kapitali tagħha (pereżempju permezz ta' ġestjoni volontarja ta' obbligazzjonijiet soġġett għall-approvazzjoni tal-Kummissjoni), titwettaq ġestjoni tar-riskju prudenti u ma jitħallsux dividendi jew isiru pagamenti oħra fuq strumenti, bħal strumenti kapitali ibridi, li jiddependu fuq il-profittabilità. (23).

(33)

Barra minn hekk, it-total fuq il-karta tal-bilanċ ta' OpCo ma għandux jeċċedi EUR [100-110] biljun fl-2016 u EUR [90-100] biljun fl-2017 (24). Fir-rigward tal-finanzjament tal-bastimenti, OpCo se tkompli tnaqqas dawk l-attivitajiet u tirrestrinġi l-attività kummerċjali ġdida tagħha f'dak il-qasam għal EUR [1-2] biljun (25). Il-Ġermanja, barra minn hekk, ħadet l-impenn li tkompli tikkonforma ma' wħud mill-impenji annessi mad-deċiżjoni tal-2011, bħal pereżempju OpCo ma twettaqx attivitajiet ta' finanzjament fis-settur tal-inġenji tal-ajru (26), ma twettaqx tkabbir estern billi takkwista kontroll fuq kumpaniji oħrajn (27), ma twettaqx kummerċ proprjetarju ddedikat (28), u ma tirreklamax l-għoti ta' għajnuna mill-Istat jew il-vantaġġi li jirriżultaw meta mqabbla mal-kompetituri (29).

(34)

Fl-aħħar nett, il-Ġermanja ħadet l-impenn li OpCo tkun konformi ma' ċerti punti ta' riferiment ta' likwidità (30) u mar-restrizzjonijiet fir-rigward tar-remunerazzjoni tal-impjegati ta' OpCo u l-membri tal-bords tagħha u ta' korpi oħrajn. Għaldaqstant, ir-remunerazzjoni totali ta' kwalunkwe wieħed minn dawn l-individwi ma għandhiex teċċedi l-15-il darba s-salarju medju nazzjonali fil-Ġermanja jew 10 darbiet is-salarju medju ta' HSH Nordbank (qabel il-qasma) (31).

(35)

Kif imsemmi fil-Premessi 2 u 15, l-ammont massimu tal-garanzija tniżżel għal EUR 7 biljun fl-2011 iżda kellu jerġa' jiġi miżjud lura għal-livell inizjali ta' EUR 10 biljun f'Ġunju 2013 minħabba d-deterjorament tas-suq tat-trasport bil-baħar mill-2011 (ara Premessi 16 u 17).

(36)

Il-Ġermanja tat notifika taż-żieda mill-ġdid. Hija ħadet il-pożizzjoni li l-garanzija kienet tikkostitwixxi għajnuna, iżda esprimiet dubji kemm id-dħul mill-ġdid ta' ammont massimu ta' EUR 10 biljun kellu jiġi kkunsidrat bħala għajnuna ġdida peress li kien diġà ġie approvat eżattament l-istess limitu massimu fid-deċiżjoni tal-2011 (32). Hija kompliet targumenta li, anki jekk il-Kummissjoni kellha tikkunsidra ż-żieda mill-ġdid bħala għajnuna ġdida, din kienet diġà tinstab kompatibbli skont id-deċiżjoni tal-2011 (33).

(37)

Madankollu, il-Kummissjoni ddeċidiet li ż-żieda mill-ġdid kienet tikkostitwixxi għajnuna ġdida fid-Deċiżjoni tal-ftuħ. Qabel xejn, iż-żieda tal-garanzija ngħatat mill-Finanzfonds, proprjetà ta' Hamburg u Schleswig-Holstein, b'hekk kienet ġejja minn riżorsi tal-Istat u tappoġġa bank attiv internazzjonalment, bir-riżultat li ħalliet effett fuq il-kompetizzjoni fis-settur bankarju u kellha impatt fuq il-kummerċ fl-Unjoni (34). Peress li l-garanzija b'dawn il-kundizzjonijiet ma kinitx tingħata minn investitur privat, dan ta lil HSH vantaġġ li jikkostitwixxi għajnuna mill-Istat fis-sens tal-Artikolu 107(1) tat-TFUE. (35).

(38)

It-tieni, għalkemm il-Ġermanja ħadet il-pożizzjoni li ż-żieda mill-ġdid ma setgħetx titqies bħala għajnuna ġdida minħabba li l-ammont massimu ta' EUR 10 biljun kien diġà ġie approvat bid-deċiżjoni tal-2011, il-Kummissjoni spjegat fid-Deċiżjoni tal-ftuħ li l-kanċellazzjoni ta' garanzija hija ta' karattru vinkolanti u li kwalunkwe dħul mill-ġdid kellu jiġi kkunsidrat bħala ftehim ġdid bejn garanti u detentur ta' garanzija, abbażi ta' valutazzjoni ekonomika ġdida tal-fatturi tar-riskju li setgħu nbidlu matul iż-żmien. Peress li żieda fl-ammont massimu tal-garanzija ma kinitx prevista fit-termini u l-kundizzjonijiet tal-garanzija approvata bid-deċiżjoni tal-2011, dan kien jeħtieġ bidla fit-termini u l-kundizzjonijiet preċedenti. Konsegwentement, il-Kummissjoni ddeċidiet li ż-żieda kienet l-għoti ta' garanzija ġdida (36).

(39)

Fir-rigward tal-kompatibbiltà temporanja tal-għajnuna, il-Kummissjoni bbażat il-valutazzjoni tagħha fid-Deċiżjoni tal-ftuħ fuq l-Artikolu 107(3)(b) tat-TFUE li jistipula li l-għajnuna mill-Istat tista' titqies kompatibbli mas-suq intern fejn tkun maħsuba biex “tirrimedja taħwid serju fl-ekonomija ta' Stat Membru”. Fid-dawl tas-sitwazzjoni fraġli tas-swieq finanzjarji, il-Kummissjoni rrikonoxxiet li analiżi tal-HSH tista' taffettwa b'mod dirett is-swieq finanzjarji u b'hekk l-ekonomija kollha tal-Ġermanja (37). Fir-rigward tal-prinċipji applikabbli għall-għajnuna mill-Istat għall-istituzzjonijiet finanzjarji, il-Kummissjoni għamlet referenza għall-Punt 15 tal-Komunikazzjoni dwar il-Banek tal-2008 (38), li fiż-żmien tad-Deċiżjoni tal-ftuħ kienet ġiet aktar elaborata fil-Komunikazzjoni dwar ir-Rikapitalizzazzjoni (39) u fil-Komunikazzjonijiet dwar l-Estensjoni tal-2010 u l-2011 (40).

(40)

Kif imsemmi, fl-2013 il-Ġermanja sostniet li, anke kieku l-Kummissjoni kellha tqis iż-żieda tal-limitu massimu tal-garanzija bħala għajnuna ġdida, din kienet diġà nstabet kompatibbli taħt id-deċiżjoni tal-2011 b'hekk il-Kummissjoni issa tkun marbuta b'din il-valutazzjoni u ma tistax tasal għal konklużjoni differenti (41).

(41)

Fid-Deċiżjoni tal-ftuħ, il-Kummissjoni spjegat li, għalkemm fl-2011 kienet fil-fatt iddeċidiet li l-ammont massimu ta' EUR 10 biljun kien kompatibbli mas-suq intern, din il-valutazzjoni kienet ibbażata fuq l-evalwazzjoni tal-garanzija tal-Kummissjoni kif innotifikat mill-Ġermanja fit-30 ta' April 2009 u fid-dawl tas-sitwazzjoni ekonomika ta' dak iż-żmien meta adottat id-deċiżjoni tal-2011 u tal-previżjonijiet finanzjarji li l-HSH ippreżentat bħala bażi għall-eżaminazzjoni f'dik id-deċiżjoni. Għaldaqstant, il-pjan ta' ristrutturar f'dak iż-żmien kien jassumi li l-HSH tħallas il-miżati ta' garanzija biss għal garanzija ta' EUR 7 biljun (42).

(42)

Il-Kummissjoni rrimarkat ukoll fid-Deċiżjoni tal-ftuħ tagħha li l-fatturi rilevanti għall-valutazzjoni dwar il-kompatibbiltà tal-għajnuna ġdida kienu rilevanti wkoll għall-valutazzjoni preċedenti iżda li kellhom jiġu eżaminati fil-forma attwali tagħhom. F'dan l-isfond, b'mod partikolari l-valutazzjoni dwar il-vijabbiltà tal-HSH, hija kellha tikkunsidra s-sitwazzjoni ekonomika prevalenti sabiex tiddeċiedi dwar il-kompatibbiltà tal-għajnuna (43).

(43)

F'dan il-kuntest, il-Kummissjoni rrimarkat li s-sitwazzjoni ekonomika fis-settur tat-trasport bil-baħar — attività ewlenija tal-HSH u għalhekk diġà identifikata bħala problematika għall-vijabbiltà tal-bank fid-deċiżjoni tal-2011 — sadanittant kompliet iddeterjorat. Għaldaqstant, il-kriżi fis-settur tat-trasport bil-baħar kienet itwal u aktar profonda milli mistenni, affettwat l-affidabbiltà tal-finanzjament ta' bastimenti b'mod ġenerali u rriżultat f'żieda ta' assi mwieżna bir-riskju miżmuma mill-HSH (44).

(44)

Fid-Deċiżjoni tal-ftuħ tagħha, il-Kummissjoni rrimarkat ukoll li ż-żieda tal-garanzija tirriżulta f'pagamenti ogħla ta' miżati tal-garanzija ta' madwar EUR 1 biljun u li dawn l-ispejjeż addizzjonali jkollhom effett sinifikanti fuq il-profittabilità futura tal-HSH (45).

(45)

Għalkemm il-miżati tal-garanzija addizzjonali ġew inkorporati fil-pjan ta' direzzjoni tal-kummerċ sottomess man-notifika taż-żieda mill-ġdid tal-garanzija fl-2013, il-Kummissjoni ddubitat fis-sodezza tas-suppożizzjonijiet li fuqhom kien ibbażat il-pjan ta' direzzjoni tal-kummerċ u rrimarkat ukoll li ma kienx hemm xenarju ta' stress aġġornat. Fid-dawl tan-nuqqas ta' HSH li tilħaq il-previżjonijiet finanzjarji tal-każ bażi tal-pjan ta' ristrutturar tal-2011 u li tiżviluppa attivitajiet kummerċjali ġodda sal-punt mistenni, il-Kummissjoni staqsiet jekk kienx hemm il-ħtieġa li tiġi aġġustata l-istrateġija kummerċjali tagħha u jekk għandhomx jittieħdu azzjonijiet alternattivi biex tiġi rkuprata l-vijabbiltà tagħha fuq tul ta' żmien (46).

(46)

Għal dawn ir-raġunijiet, il-Kummissjoni esprimiet dubji li l-HSH tirkupra l-vijabbiltà kif mistenni fid-deċiżjoni tal-2011 u talbet għal aktar informazzjoni li tikkorrobora l-assunzjonijiet tal-pjan ta' direzzjoni tal-kummerċ u l-prospetti sottomessi għas-swieq tat-trasport bil-baħar kif ukoll għal evidenza li l-miżati ta' garanzija addizzjonali ma jkunux eċċessivi għall-kapaċitajiet finanzjarji tal-bank anki f'xenarju ta' stress (47).

(47)

Il-Kummissjoni, madankollu, ma esprimietx dubji fid-Deċiżjoni tal-ftuħ dwar il-kondiviżjoni tal-piżijiet jew dwar il-miżuri tal-kompetizzjoni approvati mid-deċiżjoni tal-2011 u ddikjarat li, peress li l-għajnuna l-ġdida baqgħet fil-konfini tal-miżura approvata fl-2011, dawn il-miżuri kienu għadhom adegwati f'dan l-istadju (48). Fid-dawl tal-ħtieġa taż-żieda tal-garanzija u l-fatt li r-remunerazzjoni kienet ikkunsidrata xierqa, il-Kummissjoni kkonkludiet li l-għajnuna kienet b'mod temporanju kompatibbli mas-suq intern (49).

(48)

Il-Ġermanja fil-kummenti tagħha dwar id-Deċiżjoni tal-ftuħ (50) reġgħet saħqet, l-ewwel nett, il-pożizzjoni inizjali li ż-żieda mill-ġdid tal-garanzija ma kinitx miżura ta' għajnuna ġdida peress li ż-żieda mill-ġdid ma kinitx teċċedi l-limitu ta' EUR 10 biljun approvat bid-deċiżjoni tal-2011. Għaldaqstant, din il-pożizzjoni ma tbiddlitx bil-fatti li t-tnaqqis kellu effett vinkolanti jew li l-kuntratt tal-garanzija ma kienx jipprovdi għal żieda mill-ġdid u kellu jiġi kkunsidrat bħala ftehim ġdid. Fil-fehma tal-Ġermanja, l-effett ekonomiku taż-żieda mill-ġdid fuq is-sitwazzjoni tal-Länder bħala garanti kien deċiżiv, u s-sitwazzjoni tagħhom ma nbidlitx bħala konsegwenza taż-żieda mill-ġdid, b'mod partikolari peress li ma kienx hemm probabbiltà akbar sinifikanti tal-użu tas-segment tal-garanzija miżjud mill-ġdid. Barra minn hekk, iż-żieda mill-ġdid kienet fil-biċċa l-kbira kompatibbli mal-garanzija sħiħa inizjali li l-Kummissjoni kienet diġà analizzat fil-kuntest tad-deċiżjoni tal-2011, mhux biss abbażi tal-każ bażi, iżda wkoll abbażi tal-agħar xenarju possibbli (51).

(49)

It-tieni nett, il-Ġermanja kkonfermat il-fehma preċedenti tagħha li ż-żieda mill-ġdid, anki jekk tikkwalifika bħala għajnuna ġdida, kienet koperta mir-raġunijiet li waslu għall-approvazzjoni fl-2011 kif innotat il-Kummissjoni fid-Deċiżjoni tal-ftuħ meta ddikjarat li ma kellha l-ebda dubju — f'dak l-istadju — li l-miżuri tal-kondiviżjoni tal-piżijiet u tal-kompetizzjoni kkunsidrati xierqa u suffiċjenti fid-deċiżjoni tal-2011 kienu għadhom adegwati fid-dawl tal-fatt li l-għajnuna l-ġdida tagħmel parti mill-konfini tal-miżuri approvati fid-deċiżjoni tal-2011 (52). Skont il-Ġermanja, il-Kummissjoni hija marbuta bir-raġunijiet li hija stess kienet indikat fl-approvazzjoni għall-għajnuna fid-deċiżjoni tal-2011.

(50)

It-tielet nett, il-Ġermanja ssottomettiet li ż-żieda mill-ġdid tal-limitu tal-garanzija appoġġat l-iskop tar-restawr tal-vijabbiltà fit-tul tal-HSH u, barra minn hekk, kienet konformi mal-miri tal-pjan ta' ristrutturar approvati fl-2011. F'dan il-kuntest, il-Ġermanja ddikjarat li ma kien hemm l-ebda raġuni biex tiġi ddubitata l-vijabbiltà fit-tul tal-bank u s-sostenibbiltà tal-mudell kummerċjali tiegħu. Hija sostniet li d-devjazzjonijiet mill-pjan ta' direzzjoni tal-kummerċ li seħħew minn dak iż-żmien ma kinux jiġġustifikaw konklużjonijiet oħrajn. Id-differiment tal-kanċellazzjonijiet parzjali tal-garanzija b'sentejn jew bi tliet snin jiżgura mudell kummerċjali aktar sostenibbli u anqas riskjuż, fid-dawl tal-kriżi persistenti fis-settur tat-trasport bil-baħar u b'kunsiderazzjoni għar-rekwiżiti superviżorji. Il-pagamenti ta' miżati aktar għolja li l-bank irid iħallas bħala konsegwenza taż-żieda mill-ġdid tal-garanzija jkunu sostenibbli għalih minħabba li dan għandu bażi kapitali suffiċjenti u fid-dawl tal-miżuri l-oħra inklużi fil-pjan ta' ristrutturar approvat bid-deċiżjoni tal-2011.

(51)

Fl-aħħar nett, il-Ġermanja rrimarkat li l-ħtieġa għal żieda mill-ġdid fil-garanzija kienet ikkawżata minn fatturi eżoġeni bħall-kriżi finanzjarja kontinwa, ir-rekwiżiti regolatorji miżjuda għall-istituzzjonijiet finanzjarji u l-bidla fl-istandard kontabilistiku tal-Istandards Internazzjonali tar-Rappurtar Finanzjarju (“IFRS”) għall-kalkolu tal-kwoti tal-kapital.

(52)

Wara li għamlet dawn il-kummenti, il-Ġermanja kompliet taħdem mill-qrib mal-Kummissjoni u ssottomettiet diversi pjanijiet tar-ristrutturar aġġornati. L-ewwel wieħed ġie ppreżentat f'Diċembru tal-2013, pjan ta' ristrutturar emendat ġie ppreżentat b'suppożizzjonijiet aktar prudenti f'April tal-2014 u aġġornament ulterjuri tal-ippjanar kummerċjali ntbagħat f'April tal-2015. Barra minn hekk, meta dawn il-pjanijiet ma naqsux id-dubji tal-Kummissjoni fir-rigward tal-kapaċità tagħhom li jirrestawraw il-vijabbiltà tal-HSH, l-awtoritajiet Ġermaniżi fittxew soluzzjonijiet oħrajn. Sussegwentement dawn l-isforzi rriżultaw fil-qafas ewlieni tal-miżuri tal-2016 li l-Ġermanja kellha qbil dwaru mal-Kummissjoni f'Ottubru tal-2015.

(53)

Konsegwentement, fil-21 ta' Marzu 2016, il-Ġermanja nnotifikat mill-ġdid iż-żieda mill-ġdid tal-garanzija tal-2013 bħala għajnuna mill-Istat fir-rigward tal-bejgħ tal-HSH jew, fin-nuqqas ta' dan il-bejgħ, l-istralċ tal-HSH.

(54)

Fir-rigward tal-miżura tal-2013, jiġifieri ż-żieda mill-ġdid tal-garanzija minn EUR 7 biljun għal EUR 10 biljun li kienet ġiet approvata b'mod temporanju fid-Deċiżjoni tal-ftuħ, il-Kummissjoni diġà ddeċidiet li dik il-miżura kienet tikkostitwixxi għajnuna mill-Istat (53). Għalkemm il-Ġermanja, fil-kummenti tagħha dwar id-Deċiżjoni tal-ftuħ (ara Premessa 49), ikkunsidrat li ż-żieda mill-ġdid ma kinitx tikkostitwixxi għajnuna ġdida — u, anki jekk kienet, din kienet koperta mir-raġunijiet li wasslu għall-approvazzjoni fl-2011 — hija ma komplietx tisħaq fuq dawn il-pożizzjonijiet u lanqas ma ressqet provi favur tagħhom. Fl-aħħar nett, bin-notifika mill-ġdid taż-żieda mill-ġdid “bħala għajnuna mill-Istat fis-sens tal-Artikolu 107(1) tat-TFUE” (54) li għandha tintuża għall-bejgħ jew l-istralċ tal-HSH, il-Ġermanja kkonfermat l-valutazzjoni tal-Kummissjoni. Bħala konsegwenza, fid-deċiżjoni attwali l-Kummissjoni tikkonferma l-konklużjoni tagħha fid-Deċiżjoni tal-ftuħ dwar l-eżistenza ta' għajnuna mill-Istat f'dik il-miżura u tagħmel dan għar-raġunijiet stabbiliti f'din id-deċiżjoni u mingħajr ebda valutazzjoni mill-ġdid.

(55)

Madankollu, il-Kummissjoni għad trid tivvaluta jekk hemmx għajnuna fil-miżuri tal-2016 (55).

(56)

Fl-aħħar, il-Kummissjoni trid tivvaluta jekk il-miżuri ta' għajnuna kkonċernati — il-miżura tal-2013 u l-miżura tal-2016 (jekk fihom għajnuna) — jistgħux jiġu kkunsidrati kompatibbli mas-suq intern.

(57)

Il-Kummissjoni tosserva li, skont l-awtoritajiet Ġermaniżi, l-ebda għajnuna mill-Istat addizzjonali mhu se tingħata bħala parti mill-miżuri tal-2016.

(58)

Skont l-Artikolu 107(1) tat-TFUE, għajnuna mill-Istat tfisser “kull għajnuna, ta' kwalunkwe forma, mogħtija minn Stat Membru jew permezz ta' riżorsi tal-Istat, li twassal għal distorsjoni jew theddida ta' distorsjoni għall-kompetizzjoni billi tiffavorixxi ċerti impriżi jew ċerti produtturi, sa fejn tolqot il-kummerċ bejn l-Istati Membri”. Miżura tikkostitwixxi għajnuna mill-Istat fit-tifsira ta' din id-dispożizzjoni jekk il-kundizzjonijiet kollha li ġejjin jiġu ssodisfati: (a) il-miżura trid tkun imputabbli lill-Istat u ffinanzjata permezz tar-riżorsi tal-Istat; (b) din trid tagħti vantaġġ lill-benefiċjarju tagħha; (c) dak il-vantaġġ irid ikun selettiv; u (d) il-miżura trid tfixkel jew thedded li tfixkel il-kompetizzjoni u jkollha l-potenzjal li taffettwa l-kummerċ bejn l-Istati Membri.

(59)

Fir-rigward tar-riżorsi tal-Istat, il-miżura 1 tal-2016 fiha kemm klawżola ta' subordinazzjoni kif ukoll mekkaniżmu ta' differiment parzjali għall-obbligazzjonijiet tat-tariffi tal-garanzija għas-sidien pubbliċi. Dawn ġew inklużi sabiex jiġi minimizzat ir-riskju ta' insolvenza fir-rigward ta' HoldCo. Dawn id-dispożizzjonijiet jirrigwardaw l-obbligazzjonijiet li huma pagabbli lis-sidien pubbliċi bħala remunerazzjoni u, jekk il-miżura 1 tal-2016 tat vantaġġ lil HSH, dawn l-elementi jistgħu jinvolvu telf tar-riżorsi tal-Istat.

(60)

Għaldaqstant, il-Kummissjoni tikkunsidra li ż-żewġ miżuri tal-2016 jinvolvu riżorsi tal-Istat, il-miżura 1 tal-2016 permezz tal-ftehim ta' subordinazzjoni u l-mekkaniżmu ta' differiment parzjali tal-miżati dovuti bħala remunerazzjoni għall-garanzija skont id-deċiżjoni tal-2011 u l-miżura 2 tal-2016 permezz tal-flus imħallsa mil-Länder lil OpCo bi tpattija għall-assi ttrasferiti.

(61)

Il-miżura 2 tal-2016, ix-xiri ta' assi mil-Länder, hija miżura meħuda mill-Istat. Il-miżura 1 tal-2016, il-modifika tal-istruttura tal-ħlas tal-miżati, hija imputabbli lis-sidien pubbliċi ta' Finanzfonds u b'hekk lill-Istat. Din l-imputabbiltà tidher fil-fatt li din il-modifika hija parti minn pakkett akbar ta' miżuri li l-Länder kienu involuti b'mod attiv fit-tfassil tiegħu.

(62)

Il-miżuri tal-2016 huma favur l-HSH biss. Għaldaqstant dawn huma selettivi. Huma għandhom il-potenzjal li jfixklu l-kompetizzjoni billi jipprevjenu l-eżitu normali tal-forzi tas-suq. Huma jaffettwaw il-kummerċ bejn l-Istati Membri minħabba n-natura liberalizzata tas-servizzi finanzjarji fl-Unjoni.

(63)

Sabiex tiġi determinata n-natura tal-għajnuna tal-miżuri tal-2016, il-Kummissjoni għalhekk trid tivvaluta l-kwistjoni dwar jekk l-HSH tingħatax vantaġġ addizzjonali bil-miżuri tal-2016 li jestendu lil hinn mill-vantaġġ diġà mogħti lilha bil-miżura tal-2013.

(64)

Qabel ma tkun tista' tivvaluta l-kwistjoni ta' vantaġġ addizzjonali fil-miżuri tal-2016, il-Kummissjoni teħtieġ li tfakkar il-funzjonament tal-garanzija biex tkun f'pożizzjoni li tivvaluta l-impatt li l-implimentazzjoni tal-miżuri tal-2016 kif proposti għandu jkollha fuq il-ħidma tal-garanzija.

(65)

Il-garanzija fuq it-tieni telf kif approvata fid-deċiżjoni tal-2011 tieħu l-forma ta' titolizzazzjoni sintetika. Dan ifisser li l-portafoll sħiħ taħt il-garanzija huwa maqsum b'mod artifiċjali fi tliet segmenti:

(66)

Il-preżenza tal-garanzija għandha żewġ gruppi ta' effetti ewlenin, jiġifieri, effetti fuq il-kontabbiltà taħt l-IFRS u effetti fuq ir-rekwiżiti tal-kapital skont ir-regoli regolatorji u prudenzjali kif applikati mis-superviżur.

(67)

L-ewwel nett, il-garanzija tikkumpensa għal telf globali meħud fuq il-portafoll garantit ta' aktar minn EUR 3,2 biljun u ta' anqas minn EUR 13,2-il biljun (56).

(68)

Sakemm l-assi garantiti għadhom fuq il-karta tal-bilanċ, indebolimenti u provvedimenti meħuda fuq dawn l-assi skont l-IFRS għandhom jiġu bbilanċjati minn oġġett ta' kumpens tal-istess ammont. Huwa biss meta l-assi jkunu finalment saldati u jisparixxu mill-karta tal-bilanċ biex jiġi kkristalizzat it-telf li jirriżulta, li t-talbiet għal kumpens taħt il-garanzija huma fil-fatt mħallsa fi flus kontanti.

(69)

Dawn it-tipi differenti ta' talbiet għal kumpens taħt il-garanzija jwasslu għal miżuri differenti għall-użu tal-garanzija:

(70)

Hemm żewġ komponenti ta' miżati li għandhom jitħallsu għall-garanzija: il-primjum bażi ta' 4,00 % (il-“primjum bażi”) u l-primjum addizzjonali ta' 3,85 % (il-“primjum addizzjonali”). Il-bażi tal-kalkolu għall-primjum bażi huwa l-ammont globali tal-garanzija pendenti, EUR 10 biljun. Il-bażi tal-kalkolu għall-primjum addizzjonali huwa l-ammont globali użat li għadu ma jistax ikun magħruf (57).

(71)

Skont l-IFRS, miżati mħallsa fuq garanzija pendenti huma interpretati bħala primjums tal-assigurazzjoni u jġibu magħhom imposta sempliċi fil-kont tal-profitt u tat-telf.

(72)

Madankollu, meta jibda jsir probabbli li l-garanzija tintuża jew jekk l-ammont fil-fatt użat huwa akbar minn żero, ikunu previsti pagamenti tal-miżata fuq dik il-parti tal-garanzija. Skont l-IFRS, dawn l-imposti jixbhu obbligazzjonijiet (il-benefiċċju jkun ittieħed imma jeħtieġ li jitħallas lura) u jrid jiġi pprovdut il-ħlas lura. Skont l-IFRS, il-livelli ta' proviżjonament korrispondenti jridu jiżdiedu meta jiżdied l-ammont totali użat stmat. Għaldaqstant, kwalunkwe użu addizzjonali tal-garanzija jwassal għal żieda fl-ammont totali użat stmat, għal pagamenti ta' miżati proporzjonalment akbar fil-futur li mbagħad iwasslu għal żieda fid-dispożizzjonijiet meħtieġa.

(73)

Il-primjum addizzjonali huwa soġġett għal mekkaniżmu ta' differiment, il-Besserungsschein, li huwa effettiv f'livell kapitali konsolidat għall-HSH (HoldCo + OpCo) ta' 10 % ta' Grad 1 ta' Ekwità Komuni. Dan il-mekkaniżmu ta' differiment jagħti lok għad-differiment sħiħ ta' pagamenti dovuti għal perjodu sas-sena [2030-2040]. Barra minn hekk, dan il-mekkaniżmu ta' differiment jinkludi provvedimenti magħmula għal pagamenti futuri li wkoll huma inklużi fil-Besserungsschein. Dan jimplika li dawn il-provvedimenti jistgħu jinħarġu bħala bafer kontra t-telf jekk dan it-telf iwassal għal tnaqqis tal-proporzjon ta' Grad 1 ta' Ekwità Komuni sa anqas minn 10 % (58).

(74)

It-tieni nett, skont il-formula superviżorja f'Basel II (il-“formula superviżorja”) applikabbli għal strutturi ta' titolizzazzjoni sintetika bħal ma hija l-garanzija fuq it-tieni telf, il-preżenza tal-garanzija tnaqqas għal 20 % il-piż tar-riskju li għandu jiġi applikat għas-segment superjuri meta jiġu kkalkolati l-assi mwieżna għar-riskju (“RWA”) (59).

(75)

Skont ir-regoli regolatorji u b'kunsiderazzjoni għad-diskrezzjoni superviżorja fl-applikazzjoni tagħhom, żewġ limiti għandhom jiġu kkunsidrati sabiex il-garanzija żżomm dan l-effett. L-ewwel limitu jiddependi fuq il-kalkolu prudenti ta' telf mistenni (f'xenarju ta' referenza) filwaqt li t-tieni limitu jiddependi fuq telf mhux mistenni (telf addizzjonali fl-agħar xenarju possibbli), fil-portafoll li jifdal taħt il-garanzija. Il-livelli ta' telf mistenni u mhux mistenni fil-portafoll li jifdal għandhom jiġu koperti sa ċertu punt bl-ammont mhux użat tal-garanzija. Jekk ikunx hemm ksur ta' limitu wieħed jew tat-tnejn, għalhekk, jiddependi fuq l-ammont mhux użat disponibbli tal-garanzija li huwa affettwat b'mod sinifikanti mill-ammont ta' telf saldat.

(76)

Jekk jinkiser l-ewwel limitu, l-applikazzjoni tal-formula superviżorja għandha tirriżulta f'żieda tal-livelli tal-RWA minħabba s-segment superjuri, b'żieda bħal din isseħħ fi proporzjon mal-punt tan-nuqqas fil-kopertura mil-livell minimu tagħha ta' 20 %. Jekk jinkiser it-tieni limitu, il-formula superviżorja ma għandha bl-ebda mod tibqa' applikabbli. F'dan il-każ, il-livelli ta' RWA fuq is-segment superjuri għandhom jiżdiedu b'mod immedjat mill-minimu ta' 20 % għal-livell li jkun applikabbli fin-nuqqas ta' garanzija (l-“effett ta' preċipizju”).

(77)

Skont in-notifika, l-HSH se tinqasam f'HoldCo u OpCo. Il-miżati tal-garanzija skont ir-remunerazzjoni tal-garanzija kif approvat fid-deċiżjoni tal-2011 għandhom jibqgħu l-istess. Madankollu, il-ħlas tagħhom għandu jinqasam hekk kif ġej:

(78)

Din il-qasma f'OpCo u HoldCo timplika li l-effett tal-kontabbiltà mill-kumpens tal-garanzija għandu jkompli jiżdied fil-livell ta' OpCo filwaqt li r-rekwiżiti kollha ta' proviżjonament taħt l-IFRS li jirriżultaw mit-trattament ta' pagamenti tal-miżata fuq il-parti użata tal-garanzija issa għandhom iseħħu f'HoldCo. Madankollu, il-Kummissjoni tenfasizza li fil-livell konsolidat tal-bank (HoldCo + OpCo) ma hemm l-ebda bidla fl-istruttura tal-garanzija jew l-effetti tagħha, għaldaqstant il-qasma nnifisha ma tipprovdi l-ebda vantaġġ addizzjonali lil HSH.

(79)

Skont l-impenji pprovduti mill-Ġermanja, HoldCo nnifisha ma għandha topera l-ebda kummerċ u għaldaqstant ma għandu jkollha ebda fluss ta' dħul għajr għal dak li jkun ġej mill-parteċipazzjoni azzjonarja tagħha f'OpCo. HoldCo madankollu se tirċievi EUR 260 miljun f'likwidità minn OpCo, EUR 50 miljun għall-ispejjeż operattivi matul il-perjodu tal-bejgħ u EUR 210 miljun għall-ħlas tal-pagamenti tal-miżata tal-garanzija meta dawn ikunu dovuti.

(80)

Mill-qasma tal-obbligazzjonijiet kif spjegat hawn fuq, il-Kummissjoni tirrimarka li l-ammont ta' miżati dovuti matul il-proċess tal-bejgħ li għandu jitħallas minn HoldCo fl-aħħar tas-sena tal-2016 u tal-2017 rispettivament għandu jiddependi fuq:

(81)

Fir-rigward tal-komponent 1 tal-miżata, il-livell ġenerali ta' garanzija pendenti huwa attwalment ta' EUR 10 biljun, inkluż il-miżura tal-2013. Dan il-livell ma jistax jitla' aktar peress li EUR 10 biljun huwa limitu massimu fiss. Bl-istess mod, dan il-livell x'aktarx li ma jonqosx matul il-proċess tal-bejgħ.

(82)

Minħabba li l-livell ta' EUR 10 biljun iservi bħala bażi tal-kalkolu għall-komponent 1 tal-miżata ta' 1,80 %, il-Kummissjoni tikkunsidra li l-obbligu ta' pagament tal-miżata annwali taħt il-komponent 1 tal-miżata għandu jkun ta' EUR 180 miljun.

(83)

Fir-rigward tal-komponent 2 tal-miżata, il-Kummissjoni tfakkar li skont l-istimi disponibbli l-aktar reċenti, l-ammont ta' telf saldat fuq il-portafoll garantit għandu jitla' għal madwar EUR [3,2-5,0] biljun fl-2016, jiġifieri EUR [0-1,8] biljun aktar mis-segment tal-ewwel telf ta' EUR 3,2 biljun.

(84)

Dan l-ammont għandu jkompli jiżdied bl-ammont ta' telf imġarrab mill-HSH permezz tal-miżura 2 tal-2016, jiġifieri t-trasferiment ta' mhux aktar minn EUR 6,2 biljun skopertura f'każ ta' inadempjenza ta' assi taħt il-garanzija lis-sidien pubbliċi. Skont l-impenji, il-valuri tat-trasferiment tal-assi għandhom jiġu ddeterminati skont il-lista mehmuża man-notifika li tikkorrispondi għar-riżultati tal-valutazzjoni tal-prezz tas-suq tal-esperti tal-Kummissjoni.

(85)

Il-Kummissjoni tfakkar li skont l-impenji l-bank għandu l-għan li jittrasferixxi biss EUR 5 biljun skopertura f'każ ta' inadempjenza ta' assi sat-tmiem ta' Ġunju 2016. Sad-data tat-trasferiment, il-garanzija tibqa' prinċipalment mhux użata u għalhekk il-pagamenti tal-miżata relatati għandhom isiru minn OpCo.

(86)

Abbażi tal-lista tal-valuri tat-trasferiment (ara l-Anness II għad-Deċiżjoni preżenti) u skont kif jiġi mtejjeb l-użu tal-garanzija, telf addizzjonali possibbli fuq it-trasferiment ta' portafoll ta' EUR 5 biljun skopertura f'każ ta' inadempjenza magħżul mil-lista ta' EUR [8-10] biljun skopertura f'każ ta' inadempjenza ta' assi disponibbli u saldati taħt il-garanzija x'aktarx ikun ta' madwar EUR [1-4] biljun għal EUR [1-4] biljun.

(87)

Għaldaqstant, il-Kummissjoni tikkunsidra li l-obbligazzjoni ta' ħlas tal-miżata taħt il-komponent 2 tal-miżata għal sitt xhur fl-2016 x'aktarx li tikkorrispondi għal bejn EUR [25-35] miljun u EUR [25-35] miljun.

(88)

Fir-rigward tal-komponent 3 tal-miżata, il-Kummissjoni tfakkar li l-ħlas ta' 3,85 % huwa soġġett għall-Besserungsschein effettiva f'livell ta' kapital konsolidat għall-HSH (HoldCo + OpCo) ta' 10 % ta' Grad 1 ta' Ekwità Komuni. Skont in-numru disponibbli l-aktar reċenti, l-HSH diġà tinsab fil-limitu aktar baxx ta' proporzjon ta' 10 % ta' Grad 1 ta' Ekwità Komuni b'madwar EUR [700-800] miljun ta' proviżjonament li għadhom taħt il-Besserungsschein.

(89)

Telf addizzjonali ta' bejn EUR [1-4] biljun u EUR [1-4] biljun fuq it-trasferiment ta' EUR 5 biljun skopertura f'każ ta' inadempjenza ta' assi mill-bank għal-Länder għandu jwassal għal żieda fl-ammont totali użat mistenni tal-garanzija u, b'mod korrispondenti, għal rekwiżiti addizzjonali għall-proviżjonament taħt l-IFRS għaż-żewġ komponenti 2 u 3 tal-miżata.

(90)

Skont il-valutazzjoni tal-Kummissjoni, il-ħtieġa ta' proviżjonament addizzjonali li tirriżulta taħt l-IFRS għall-komponent 2 tal-miżata x'aktarx li tikkorrispondi għal madwar EUR [700-900] miljun u EUR [700-900] miljun.

(91)

Skont il-pjan ta' ristrutturar ipprovdut mill-bank, dawn il-provvedimenti addizzjonali x'aktarx li ma jiġux iffinanzjati permezz tal-introjtu nett tal-bank u għalhekk x'aktarx li jwasslu għal talba fuq il-Besserungsschein fil-livell konsolidat għal madwar l-istess ammont. Madankollu, kwalunkwe kumpens mill-Besserungsschein huwa limitat għall-ammont ta' riżervi li jkun fadal, jiġifieri EUR [700-800] miljun. Imposta addizzjonali ta' EUR [700-900] miljun għal EUR [700-900] miljun għalhekk twassal biex il-proporzjon ta' Grad 1 ta' Ekwità Komuni fil-livell konsolidat jaqa' taħt l-10 %.

(92)

Il-proviżjonament stess għall-komponent 3 tal-miżata huwa soġġett għall-Besserungsschein (ara Premessa 73). Għaldaqstant, peress li wara l-proviżjonament għall-komponent 2 tal-miżata, ir-riżervi kollha tal-proviżjonament taħt il-Besserungsschein ikunu ġew użati u l-proporzjon ta' Grad 1 ta' Ekwità Komuni jkun diġà niżel taħt l-10 %, il-proviżjonament addizzjonali għall-komponent 3 tal-miżata jkollu jiġi differit ukoll.

(93)

Kwalunkwe trasferiment ta' assi matul il-perjodu tal-bejgħ li jeċċedi l-ammont ta' EUR 5 biljun, kif permess taħt l-impenji pprovduti mill-Ġermanja, x'aktarx li jwassal għal telf ulterjuri. Dan it-telf ikompli biss inaqqas il-proporzjon tal-kapital ta' Grad 1 ta' Ekwità Komuni fil-livell konsolidat, b'hekk tkompli tonqos il-probabbiltà li l-proporzjon tal-kapital ta' Grad 1 ta' Ekwità Komuni jogħla aktar minn 10 %. Huwa biss f'tali każ li jkunu meħtieġa ħlasijiet jew proviżjonament għall-komponent 3 tal-miżata.

(94)

Għaldaqstant, il-Kummissjoni tikkunsidra li x'aktarx l-ebda ħlas jew proviżjonament taħt il-komponent 3 tal-miżata ma jkun meħtieġ matul il-proċess tal-bejgħ. Il-Kummissjoni tfakkar ukoll li mal-bejgħ b'suċċess, il-Länder għandhom id-dritt skont il-kuntratt tal-garanzija li jirrinunzjaw għall-obbligazzjoni ta' ħlas tal-primjum addizzjonali ta' 3,85 % (60).

(95)

Għaldaqstant, abbażi tal-informazzjoni pprovduta inkluż il-fatt li l-miżura 2 tal-2016, it-trasferiment tal-assi, għandu jiġi implimentat fl-aħħar ta' Ġunju 2016, il-Kummissjoni tikkonkludi li l-obbligazzjonijiet ta' ħlas ta' miżata mill-HoldCo għall-2016 x'aktarx li jkunu bejn EUR [205-210] miljun u EUR [210-220] miljun. Il-Kummissjoni tieħu nota pożittiva tal-fatt li din il-firxa hija b'mod wiesgħa komparabbli mal-EUR 210 miljun ta' likwidità pprovduta lill-HoldCo minn OpCo.

(96)

Barra minn hekk, il-2,20 % ta' miżati fuq l-ammont mhux użat tal-garanzija qed jitħallas minn OpCo mingħajr ebda mekkaniżmu ta' differiment addizzjonali fis-seħħ li jkopri b'mod partikolari l-ammont ta' ħlas sħiħ matul l-ewwel sitt xhur tal-2016 qabel ma tiġi implimentata l-miżura 2 tal-2016.

(97)

Għaldaqstant, abbażi tal-informazzjoni disponibbli, il-pagamenti tal-miżata tal-garanzija li għandhom jaslu għand il-Länder għall-2016 wara l-implimentazzjoni tal-miżuri tal-2016, probabbilment ma jkunx anqas minn EUR [385-400] miljun (EUR [175-190] miljun OpCo + EUR 210 miljun HoldCo). Dan jimplika ammont ta' mhux aktar minn EUR [0-15] miljun ta' pagamenti tal-miżata fl-2016 li jistgħu jiġu differiti għad-data ta' ħlas li jmiss. Kull differiment bħal dan ikun remunerat b'rata ta' imgħax annwali ta' 10 %.

(98)

Madankollu, il-Kummissjoni tinnota li l-livell ta' pagamenti ta' miżata dovuti fl-2017 fil-livell ta' HoldCo jista' jkun ogħla minħabba l-possibbiltà ta' trasferiment ulterjuri ta' assi taħt il-garanzija lis-sidien pubbliċi u għall-fatt li HoldCo jkollha tħallas il-primjum tal-garanzija ta' 2,20 % matul is-sena kollha.

(99)

Kif indikat qabel, HoldCo ma għandu jkollha l-ebda dħul b'hekk x'aktarx li jekk il-bejgħ ta' OpCo jseħħ wara li l-miżati għall-2017 ikunu pagabbli, HoldCo ma tkunx f'pożizzjoni li tonora dawn l-obbligazzjonijiet ta' ħlas ta' miżata tal-2017 meta dawn ikunu dovuti. F'każ bħal dan, skont l-impenji pprovduti mill-Ġermanja, il-pagamenti ta' miżata jiġu differiti għad-data tal-ħlas li jmiss, miżjuda b'rata ta' imgħax annwali ta' 10 %.

(100)

Il-Kummissjoni tfakkar li skont l-impenji pprovduti mill-Ġermanja, id-data aħħarija għal bejgħ tal-HSH hija t-28 ta' Frar 2018 u li l-qligħ dieħel f'HoldCo minn bejgħ b'suċċess għandu, l-ewwel u qabel kollox, jintuża biex jitħallsu l-obbligazzjonijiet tal-ħlas ta' miżata li jkunu ġejjin mill-garanzija.

(101)

Għaldaqstant, kull obbligazzjoni ta' ħlas ta' miżata li ma tistax tiġi onorata fl-aħħar tal-2017 tkun differita biss jekk OpCo tkun għadha ma ġietx mibjugħa sa dik id-data. Anke f'dan il-każ id-differiment ma jdumx aktar minn xahrejn, sakemm OpCo tinbiegħ jew tidħol fi stralċ ordnat jew f'riżoluzzjoni. Dan id-differiment possibbli jiġi remunerat b'rata ta' imgħax annwali ta' 10 %.

(102)

Bħala konklużjoni, il-Kummissjoni tinnota li hemm xi probabbiltà li l-pagamenti tal-miżata ta' EUR 400 miljun dovuti taħt il-ftehim tal-garanzija attwali fl-aħħar tal-2016 (1,80 % + 2,20 % fuq garanzija pendenti ta' EUR 10 biljun) mhux ser jitħallsu b'mod sħiħ, għalkemm x'aktarx li jiġu differiti mhux aktar minn EUR [0-15] miljun. Barra minn hekk, filwaqt li l-pagamenti tal-miżata dovuti fl-2017 jistgħu jiġu differiti b'mod sħiħ, kwalunkwe differiment bħal dan għandu jiġi limitat għal mhux aktar minn xahrejn minħabba l-iskadenza tal-bejgħ tat-28 ta' Frar 2018.

(103)

Skont l-impenji, kwalunkwe differiment għandu jiġi remunerat b'rata ta' imgħax annwali ta' 10 %. L-aktar bonds subordinati likwidi tal-HSH (61) għamlu kummerċ bi dħul annwali ta' bejn 7,5 % u 8 % fid-dawl tal-ftehim milħuq f'Ottubru 2015 u li attwalment jagħmlu kummerċ ta' madwar 10,6 %. Dawn iż-żewġ ħruġ jimmaturaw matul il-proċess tal-bejgħ fi Frar 2017 b'EUR 928 miljun ta' ammont nozzjonali pendenti li għandu jitħallas lura. Huma jipprovdu indikazzjoni ta' prezz tas-suq għal riskju fir-rigward ta' skopertura simili tal-kapital għall-HSH, u għaldaqstant stima konservattiva ta' xi tkun r-remunerazzjoni fil-livell tas-suq f'każ ta' possibbiltà ta' differiment ta' ħlas.

(104)

B'kunsiderazzjoni għall-firxa tal-kummerċ tad-dħul fuq dak il-ħruġ subordinat tal-HSH u l-fatt li kwalunkwe differiment fl-2016 x'aktarx li jkun limitat għal mhux aktar minn EUR [0-15] miljun, il-Kummissjoni tqis li r-remunerazzjoni ta' 10 % annwalizzati għar-riskju ta' pagament ta' EUR [0-15] miljun differit għal sena bħala konformi mal-kundizzjonijiet tas-suq.

(105)

B'rabta ma' kwalunkwe differiment possibbli li jirriżulta mill-obbligazzjonijiet dovuti fl-2017, il-Kummissjoni tosserva l-ewwel nett li dan iseħħ biss jekk il-bejgħ ma jseħħx qabel it-tmiem tal-2017. It-tieni, filwaqt li l-ammont ta' differiment possibbli x'aktarx li jkun komparabbli mal-ammont pendenti ta' kull wieħed miż-żewġ ħruġ subordinati, differiment bħal dan għandu jkun limitat għal mhux aktar minn xahrejn minħabba l-iskadenza tal-bejgħ finali, b'hekk jiġi llimitat b'mod sinifikanti r-riskju meħud bid-differiment tal-imposti. Minħabba l-maturità ferm aktar qasira ta' kwalunkwe differiment relatat mal-2017 meta mqabbel mal-maturità tal-ħruġ subordinat u r-riskju aktar baxx b'mod korrispondenti, il-Kummissjoni tqis ir-remunerazzjoni ta' 10 % annwalizzati bħala konformi mal-kundizzjonijiet tas-suq.

(106)

Meta tikkunsidra dan kollu, il-Kummissjoni tikkonkludi li minħabba li kwalunkwe differiment possibbli ta' parti mill-flussi tal-miżata tal-garanzija għas-sidien pubbliċi jkun (a) x'aktarx żgħir ħafna, jekk ikun hemm, fl-2016, (b) limitat fiż-żmien (jekk biss isseħħ, skont id-data tal-bejgħ attwali) għall-miżati dovuti fl-2017 u (c) f'kull każ remunerat b'rata ta' imgħax konformi mal-kundizzjonijiet tas-suq, ma hemm l-ebda vantaġġ addizzjonali għall-HSH li jirriżulta mill-implimentazzjoni tal-miżura 1 tal-2016 bħala riżultat tar-riskji preżenti f'(a) u (b).

(107)

Skont l-impenji pprovduti mill-Ġermanja, l-HSH se tittrasferixxi portafoll sa mhux aktar minn EUR 6,2 biljun skopertura f'każ ta' inadempjenza ta' assi attwalment taħt il-garanzija għal-Länder. Dan it-trasferiment jista' jseħħ f'segmenti multipli matul id-durata tal-proċess tal-bejgħ fl-2016 u l-2017.

(108)

Sabiex jiġi definit il-portafoll li għandu jiġi ttrasferit, il-Ġermanja u l-bank identifikaw EUR [8-10] biljun skopertura f'każ ta' inadempjenza ta' assi taħt il-garanzija bħala eliġibbli għal trasferiment lis-sidien pubbliċi. Il-Kummissjoni tinnota li bażikament dawn l-assi huma kollha self improduttiv, li kollha jinsabu fis-settur tat-trasport bil-baħar li kien wieħed mill-muturi ewlenin għad-diffikultajiet tal-bank (62).

(109)

Minħabba li attwalment ma hemm l-ebda xerrej tas-suq disponibbli għal dawn l-assi, il-Kummissjoni tikkunsidra li trasferiment bħal dan lis-sidien pubbliċi jikkorrispondi għal miżura tal-assi indeboliti. F'konformità mal-ewwel prinċipji u kif imfakkar fid-deċiżjonijiet reċenti tal-Kummissjoni dwar is-self improduttiv fl-Italja u fl-Ungerija (63), tali trasferiment ta' assi jista' jiġi kkunsidrat ħieles minn għajnuna mill-Istat biss jekk it-tranżazzjoni sseħħ skont it-termini tas-suq.

(110)

B'mod partikolari, il-Kummissjoni ċċarat li minħabba n-natura tal-portafoll u l-assenza ta' xerrej tas-suq hija tibbaża l-valutazzjoni tagħha fuq il-prinċipji tal-kalkolu tal-valur tas-suq speċifikati fil-Komunikazzjoni dwar l-Assi Indeboliti (64). Għaldaqstant, l-għan ewlieni tal-valutazzjoni mhuwiex li jiġi kkalkolat valur ġust iżda valur tas-suq li– jekk jintuża bħala prezz ta' trasferiment fi tranżazzjoni ma' awtorità pubblika — jippermetti lill-Kummissjoni tikkonkludi li tranżazzjoni b'dak il-prezz ma tipprovdix vantaġġ lill-bank u b'hekk teskludi l-preżenza ta' għajnuna mill-Istat. Il-valutazzjoni għalhekk għandha tkun b'mod partikolari kemm prudenti kif ukoll konservattiva.

(111)

Il-Kummissjoni impjegat esperti tal-valutazzjoni indipendenti biex jgħinuha tiddetermina l-valuri tas-suq ta' dawn l-assi.

(112)

Wara l-ewwel talba għad-dejta mill-Kummissjoni u mill-esperti tagħha f'nofs Diċembru 2015, il-bank għamel l-informazzjoni disponibbli fit-18 ta' Jannar 2016. Seħħew diversi kuntatti, laqgħat, diskussjonijiet u preżentazzjonijiet ta' dejta bejn l-20 ta' Jannar u d-19 ta' Marzu 2016.

(113)

Il-portafoll jikkonsisti minn madwar […] faċilitajiet ta' self, kollateralizzati permezz ta' […] bastimenti u xi assi oħrajn. Sabiex jiġu evitati kwistjonijiet ta' kollateralizzazzjoni inkroċjata, il-bank ipprovda wkoll l-hekk imsejjaħ livell ta' formazzjoni li huwa l-aktar livell baxx li fih kollateral jista' jiġi identifikat bħala kollateral għal eżattament linja waħda. Hemm […] linji ta' formazzjoni fil-portafoll.

(114)

B'konformità mal-prinċipji ta' valutazzjoni prudenti u konservattiva, u abbażi tad-dejta disponibbli mill-bank, l-esperti tal-Kummissjoni għamlu għadd ta' suppożizzjonijiet. Pereżempju, meta l-ebda dejta ma kienet disponibbli għall-esperti tal-Kummissjoni, bħal fir-rigward ta' kollaterali li mhumiex bastimenti, dawn il-kollaterali b'mod konservattiv ingħataw valur ta' żero u ġew esklużi mill-kalkolu. Barra minn hekk, fin-nuqqas ta' dejta dwar l-ordni preċiża ta' talbiet tal-kredituri differenti għal flussi ta' flus li jirriżultaw mill-kollaterali, it-talbiet kollha fuq il-kollaterali tat-trasport bil-baħar li ma jirriżultawx minn talbiet taħt il-garanzija ġew ikkunsidrati bħala privileġġjati u tnaqqsu mill-valur kollaterali. Fl-aħħar nett l-ebda benefiċċju ma ġie kkunsidrat fejn il-bank reċentement irristruttura s-self.

(115)

Il-mudell użat mill-esperti tal-Kummissjoni huwa mudell tal-fluss tal-flus skontat. Il-flussi tal-flus operattivi kollha ġew ikkalibrati ma' dejta tas-suq osservabbli bħal ma huma kuntratti eżistenti fil-qasam tat-trasport bil-baħar. Il-valuri ta' likwidazzjoni għall-bastimenti ġew skontati minn valutazzjonijiet reċenti tal-assessuri biex jiġu kkunsidrati l-ispejjeż tal-bejgħ tal-kont u l-ħin għall-bejgħ kif ukoll biex jiġu kkoreġuti preġudizzji osservati statistikament f'estimi ta' assessuri speċifiċi. Il-ħajja ekonomika tal-bastimenti ġiet aġġustata 'l isfel għal dejta osservabbli. Il-flussi tal-flus kollha ġew imqabbla ma' punti ta' riferiment tas-suq disponibbli minn fornituri terzi u ngħataw limitu massimu skont dawn il-punti ta' riferiment. Ir-rati tat-tkabbir fil-flussi tal-flus u l-valuri ta' likwidazzjoni ġew ikkalkolati minn dawn il-punti ta' riferiment tas-suq, iżda b'limitu massimu ta' orizzont ta' ħames snin.

(116)

Filwaqt li d-data limitu tal-valutazzjoni miftiehma mal-bank kienet il-31 ta' Diċembru 2015, ħafna mid-dejta pprovduta minnha kienet datata mit-30 ta' Settembru 2015. L-esperti tal-Kummissjoni għalhekk naqqsu mill-valutazzjoni l-flussi tal-flus kollha li ġejjin mir-raba' trimestru tal-2015 skont il-previżjonijiet applikabbli.

(117)

Abbażi tal-valutazzjoni tal-esperti tal-Kummissjoni, il-Kummissjoni tasal għall-konklużjoni li l-valur tas-suq tal-portafoll sħiħ ta' EUR [8-10] biljun skopertura f'każ ta' inadempjenza huwa [33,4-56,8] % tal-iskopertura f'każ ta' inadempjenza. Il-firxa ta' portafolli ta' EUR 6,2 biljun skopertura f'każ ta' inadempjenza li tista' tintgħażel minn dawn l-assi għandha valuri tas-suq bejn 33,4 % u 56,8 %. Il-valutazzjoni kienet magħmula disponibbli fil-livell ta' formazzjoni linja b'linja kemm għall-Ġermanja kif ukoll għall-bank.

(118)

Skont l-impenji, is-sidien tal-banek u s-sidien pubbliċi għandhom jużaw din il-valutazzjoni linja b'linja li kienet annessa man-notifika u mad-Deċiżjoni preżenti (l-Anness II) sabiex jiddeterminaw il-valur tat-trasferiment applikabbli għal portafoll partikolari. Id-daqs tal-portafoll magħżul inklużi s-segmenti kollha ma jistax ikun akbar fis-somma minn EUR 6,2 biljun skopertura f'każ ta' inadempjenza. Skont l-impenji, kwalunkwe trasferiment wara l-31 ta' Awwissu 2016 jeħtieġ rivalutazzjoni tal-assi magħżula mill-Kummissjoni sabiex jiġi żgurat li l-valur tas-suq huwa adattat b'kunsiderazzjoni għall-evoluzzjoni tal-assi u tas-suq.

(119)

Finalment, il-Kummissjoni tenfasizza li l-bejgħ ta' self lil-Länder f'dawk il-livelli se jiġġenera telf addizzjonali fil-bank li jkollu jiġi assorbit permezz ta' profitt u telf u li jkun kopert permezz tal-pożizzjoni kapitali disponibbli tal-bank. Barra minn hekk, il-Kummissjoni tfakkar li kwalunkwe bejgħ bħal dan jista' jirriżulta fl-effett negattiv fuq il-funzjonament tal-garanzija kif deskritt fil-Premessi 75 u 76 u jkun soġġett għad-diskrezzjoni tas-superviżur. Dawn l-effetti kollha jistgħu jkompli jnaqqsu l-pożizzjoni kapitali tal-bank. Madankollu, il-Kummissjoni tenfasizza li taħt l-ebda ċirkostanza ma għandha tiġi pprovduta għajnuna kapitali lill-bank.

(120)

Abbażi tal-impenji kif ivvalutati, il-Kummissjoni tinsab sodisfatta li l-miżura 2 tal-2016, it-trasferiment tal-assi lis-sidien pubbliċi, se tiġi implimentata skont il-valur tas-suq u b'mod korrispondenti ma għandhiex twassal għal vantaġġ. It-telf li jirriżulta għandu jiġi assorbit mill-pożizzjoni kapitali attwali tal-bank mingħajr ebda għajnuna oħra.

(121)

Abbażi tal-valutazzjoni preċedenti, il-Kummissjoni tikkonkludi li l-miżuri tal-2016 ma jinkludux għajnuna mill-Istat fis-sens tal-Artikolu 107(1) tat-TFUE.

(122)

Kif ivvalutat mill-Kummissjoni fit-taqsima preċedenti, il-miżuri tal-2016 ma jinkludux għajnuna mill-Istat.

(123)

Fir-rigward tal-miżura tal-2013, il-Kummissjoni b'mod temporanju ddikjaratha kompatibbli fid-Deċiżjoni tal-ftuħ iżda fetħet il-proċedura ta' investigazzjoni formali minħabba dubji dwar il-kompatibbiltà tal-miżura, b'mod partikolari “tiddubita li l-HSH terġa' lura għall-vijabbiltà kif preżunt fid-deċiżjoni ta' ristrutturar tal-2011 abbażi tal-pjan ta' direzzjoni tal-kummerċ” (65).

(124)

Peress li l-miżura tal-2013 ġiet innotifikata u ddikjarata temporanjament kompatibbli qabel ma daħħlet fis-seħħ il-Komunikazzjoni dwar il-Banek tal-2013, (66) il-Kummissjoni tkompli tibbaża l-valutazzjoni tagħha tal-miżura tal-2013 fuq l-Artikolu 107(3)(b) tat-TFUE, kif spjegat fil-Komunikazzjoni ta' Estensjoni tal-2011 u skont il-prinċipji ġenerali applikabbli għall-għajnuna mill-Istat mogħtija lil istituzzjonijiet finanzjarji stabbiliti fil-Komunikazzjoni dwar il-Banek tal-2008, elaborata aktar fil-Komunikazzjoni dwar ir-Rikapitalizzazzjoni u fil-Komunikazzjoni dwar ir-Ristrutturar (67) u sussegwentement emendata mill-Komunikazzjoni ta' Estensjoni tal-2010 u l-Komunikazzjoni ta' Estensjoni tal-2011.

(125)

Fir-rigward tad-dubji tagħha dwar il-vijabbiltà, il-Kummissjoni nnotat b'mod partikolari tliet fatturi fid-Deċiżjoni tal-ftuħ (ara Taqsima 2.4 għal ħarsa ġenerali aktar komprensiva):

(126)

Kif imsemmi fit-Taqsima 1, il-Ġermanja bagħtet lill-Kummissjoni għadd ta' pjanijiet ta' ristrutturar ipprovduti mill-bank. Madankollu:

(127)

Għaldaqstant, il-Kummissjoni ma tistax tikkunsidra li d-dubji tagħha espressi fid-Deċiżjoni tal-ftuħ ittaffew b'dawn il-pjanijiet ta' ristrutturar.

(128)

Il-Kummissjoni tinnota l-fatt li l-Ġermanja mill-ġdid innotifikat il-miżura tal-2013 bħala għajnuna mill-Istat li għandha tintuża għall-istralċ ordnat tal-HSH Nordbank jew permezz ta' bejgħ mingħajr għajnuna jew permezz tal-waqfien ta' attività kummerċjali ġdida u tal-istralċ. Abbażi ta' dan l-iskop il-ġdid tal-għajnuna, il-Kummissjoni tqis li mhux meħtieġ il-valutazzjoni tal-pjanijiet ta' ristrutturar li waslu f'aktar dettall u ma tasal għal ebda konsegwenza mill-fatt li d-dubji tagħha dwar il-vijabbiltà tal-bank ma ġewx solvuti.

(129)

Minflok, il-Kummissjoni se tivvaluta l-kompatibbiltà tal-għajnuna abbażi tat-Taqsima 2 tal-Komunikazzjoni dwar ir-Ristrutturar u b'mod partikolari tas-sottotaqsima “Vijabbiltà permezz tal-bejgħ ta' bank” kif ukoll tat-Taqsima 5 tal-Komunikazzjoni dwar il-Banek tal-2008 (68)“Għajnuna għax-xoljiment ikkontrollat ta' istituzzjonijiet finanzjarji”.

(130)

Skont it-Taqsima 2 tal-Komunikazzjoni dwar ir-Ristrutturar, il-bejgħ ta' bank f'diffikultà lil istituzzjoni finanzjarja oħra jista' jikkontribwixxi għar-ritorn għall-vijabbiltà għal tul ta' żmien, dejjem jekk ix-xerrej ikun vijabbli u kapaċi jassorbi t-trasferiment tal-bank f'diffikultà. Ix-xerrej irid juri lill-Kummissjoni li l-entità integrata tkun vijabbli.

(131)

Skont it-Taqsima 5 tal-Komunikazzjoni dwar il-Banek tal-2008, l-għajnuna għax-xoljiment ikkontrollat ta' istituzzjonijiet finanzjarji jeħtieġ li tiġi vvalutata mutatis mutandis skont it-Taqsima 3 tal-Komunikazzjoni dwar il-Banek tal-2008, b'mod partikolari

Dawn ir-rekwiżiti huma ekwivalenti għar-rekwiżiti taħt it-Taqsima 2 tal-Komunikazzjoni dwar ir-Ristrutturar fil-każ ta' bejgħ b'suċċess.

(132)

Barra minn hekk, minħabba li l-istralċ ordnat tal-bank jista' jiġi ssodisfat bil-bejgħ ta' OpCo, il-kriterji speċifiċi stabbiliti fil-Punt 49 tal-Komunikazzjoni dwar il-Banek tal-2008 iridu jiġu ssodisfati, jiġifieri “sabiex jiġi żgurat illi ma tingħatax għajnuna lill-bejjiegħa tal-istituzzjoni finanzjarja jew ta' partijiet minnha jew lill-entitajiet mibjugħa, huwa importanti li…:

Dawk ir-rekwiżiti huma ekwivalenti għar-rekwiżiti taħt it-Taqsima 2 tal-Komunikazzjoni dwar ir-Ristrutturar fir-rigward tal-proċess tal-bejgħ.

(133)

Skont il-Punt 50 tal-Komunikazzjoni dwar il-Banek tal-2008, kwalunkwe għajnuna ġdida lil xerrej jew lil entità mibjugħa li tinstab skont il-kriterji msemmija hawn fuq twassal għal valutazzjoni separata.

(134)

Fir-rigward tal-limitazzjoni tal-għajnuna għall-minimu meħtieġ u l-kontribut tas-settur privat, il-Kummissjoni tirreferi għall-valutazzjoni tagħha fil-Premessa 57 tad-Deċiżjoni tal-ftuħ fejn hija kkonstatat li ż-żieda tal-garanzija fuq it-tieni telf — filwaqt li hija għajnuna ġdida — baqgħet fi ħdan il-konfini ta' dak li fil-bidu ġie approvat fid-deċiżjoni tal-2011. Il-Kummissjoni tikkonkludi għalhekk li r-remunerazzjoni approvata fid-deċiżjoni tal-2011 baqgħet adegwata għall-miżura l-ġdida.

(135)

Fil-konklużjoni tagħha fir-rigward tal-miżura temporanjament kompatibbli, il-Kummissjoni qieset ukoll il-preżenza ta' pagament ta' darba ta' EUR 275 miljun mill-bank lill-fornitur tal-garanzija u l-fatt li EUR 3 biljun addizzjonali tal-garanzija jistgħu jiġu kkunsidrati bħala superjuri għall-garanzija eżistenti ta' EUR 7 biljun. Dawn iż-żewġ elementi addizzjonali waslu biex il-Kummissjoni tikkonstata li r-remunerazzjoni tikkunsidra b'mod xieraq ir-riskju akbar għall-fornitur tal-garanzija.

(136)

Il-Kummissjoni żżomm din il-valutazzjoni waqt li tindika fl-istess ħin li parti kbira mill-istruttura tal-miżata tal-garanzija ġiet implimentata sabiex jiġi żgurat irkupru biżżejjed tal-ammont tal-għajnuna. Billi jiġi żgurat li dawn l-ammonti effettivament jitħallsu lura lill-fornitur tal-garanzija, l-arranġament il-ġdid ikompli jiżgura li l-għajnuna riċevuta mill-HSH matul il-kriżi tiġi limitata għall-minimu meħtieġ.

(137)

Il-miżuri ta' kondiviżjoni tal-piżijiet ġew implimentati kif previst mid-deċiżjoni tal-2011 u l-Kummissjoni ttenni l-valutazzjoni tagħha mid-Deċiżjoni tal-ftuħ li ma għandha l-ebda dubju li dawn il-miżuri għadhom adegwati għall-kompatibbiltà tal-miżura tal-2013.

(138)

Abbażi ta' dan, il-Kummissjoni kkonkludiet li l-għajnuna hija limitata għall-minimu meħtieġ u għandha biżżejjed kontribuzzjoni proprja.

(139)

Fir-rigward tat-tfixkil tal-kompetizzjoni, il-Kummissjoni tikkunsidra li l-għajnuna pprovduta sservi biex tiżgura li l-HSH finalment titneħħa mis-suq bħala entità awtonoma, jew (a) permezz ta' bejgħ lil entità differenti jew (b) permezz ta' waqfien ta' kummerċ ġdid, b'hekk twassal biex is-sehem tas-suq miżmum mill-HSH ikun disponibbli għall-parteċipanti tas-suq oħrajn.

(140)

Matul iż-żmien tal-proċess tal-bejgħ, il-Kummissjoni tikkunsidra li l-impenji kummerċjali pprovduti mill-Ġermanja jservu biex jissodisfaw il-kundizzjonijiet dwar il-minimizzazzjoni tat-tfixkil tal-kompetizzjoni kif mitlub minn Taqsima 3 tal-Komunikazzjoni dwar il-Banek tal-2008, jiġifieri:

(141)

Barra minn hekk, il-Kummissjoni tikkunsidra b'mod pożittiv il-fatt li l-Ġermanja tieħu l-impenn li l-isem HSH Nordbank jitneħħa wara l-bejgħ b'suċċess kif ukoll il-fatt li huwa speċifikament permess il-bejgħ ta' HSH f'partijiet jew fi gruppi ta' assi lil partijiet differenti, kif rifless fl-impenji.

(142)

F'każ li l-proċess tal-bejgħ ma jirnexxix minħabba li (a) ma jkunx hemm offerenti jew (b) ikun hemm biss offerenti li ma jikkwalifikawx skont l-impenji jew (c) l-ogħla offerta tirriżulta fi prezz negattiv jew (d) il-valutazzjoni tal-Kummissjoni dwar il-vijabbiltà tal-entità konġunta tkun negattiva, il-Ġermanja u l-HSH jagħtu l-impenn li l-bank iwaqqaf attività kummerċjali ġdida u jamministra l-assi tiegħu bil-għan li jkun hemm l-istralċ tiegħu (69).

(143)

Abbażi ta' dan, il-Kummissjoni tqis li waqt il-proċess tal-bejgħ kif ukoll wara u b'mod indipendenti mir-riżultat finali tiegħu, l-impenji previsti mill-Ġermanja jiżguraw li jiġi evitat tfixkil mhux mistħoqq tal-kompetizzjoni.

(144)

Kif ivvalutati fid-dettall fit-Taqsima 4.1, il-miżuri tal-2016 għandhom jaqsmu l-HSH f'kumpanija azzjonarja HoldCo u sussidjarja operattiva OpCo b'din tal-aħħar jew tinbiegħ sat-28 ta' Frar 2018 jew ittemm attività kummerċjali ġdida. Dawn il-miżuri ma jinvolvux għajnuna ġdida.

(145)

Skont it-Taqsima 2 tal-Komunikazzjoni dwar ir-Ristrutturar u t-Taqsima 5 tal-Komunikazzjoni dwar il-Banek tal-2008, hemm rekwiżiti dwar il-proċedura tal-bejgħ sabiex tkun aċċettabbli għal (a) kisba tal-vijabbiltà permezz tal-bejgħ tal-bank u (b) kontribuzzjoni fin-nuqqas ta' għajnuna għax-xerrej.

(146)

Fir-rigward tal-kwistjoni ta' għajnuna għax-xerrej, il-Kummissjoni tinnota b'mod pożittiv l-impenji tal-Ġermanja li tbiegħ l-OpCo permezz ta' proċedura ta' bejgħ b'offerti miftuħa, trasparenti u kompetittiva kif ukoll bi prezz pożittiv sat-28 ta' Frar 2018. Il-Ġermanja se tipprovdi skeda bi stadji importanti ta' monitoraġġ lill-Kummissjoni la darba jkun ġie mniedi l-proċess tal-bejgħ. Il-Ġermanja diġà inkludiet l-aħħar dati possibbli fir-rigward tal-istadji ewlenin fl-impenji.

(147)

Fir-rigward tal-kwistjoni ta' jekk il-proċess tal-bejgħ iwassalx għal entità vijabbli, il-Kummissjoni tieħu nota pożittiva taż-żewġ impenji li ġejjin ipprovduti mill-Ġermanja, jiġifieri li l-offerenti li jipparteċipaw fil-proċess tal-bejgħ (a) għandhom juru li għandhom ir-riżorsi finanzjarji meħtieġa u l-kompetenza rilevanti biex imexxu l-OpCo bħala kompetitur vijabbli u attiv u (b) iridu jkunu indipendenti mis-settur pubbliku. Landesbanken u l-proprjetà pubblika Sparkassen (jekk qegħdin jitfgħu l-offerta b'mod konġunt flimkien ma' offerenti oħrajn) jitħallew jipparteċipaw fil-proċess ta' offerti.

(148)

Il-Kummissjoni tinnota wkoll b'mod pożittiv numru ta' impenji mill-Ġermanja mmirati biex itejbu l-istat tal-kummerċ f'OpCo, jiġifieri l-implimentazzjoni ta' aktar miżuri ta' ristrutturar fil-forma ta' tnaqqis tal-ispejjeż (sa EUR [570-590] miljun fl-2016 u EUR [520 -550] miljun fl-2017), titjib fil-ġestjoni tal-likwidità u tar-riskju tal-bank kif ukoll impenn ġenerali biex l-assi u l-obbligazzjonijiet tal-bank jiġu amministrati b'mod sostenibbli biex jiġu mmassimizzati l-opportunitajiet ta' bejgħ b'suċċess bi prezz massimu fil-limiti pprovduti.

(149)

Il-Kummissjoni tenfasizza li tkun meħtieġa deċiżjoni tal-Kummissjoni ulterjuri ladarba offerta finali tkun ġiet riċevuta fil-proċess tal-bejgħ. Tali deċiżjoni tivvaluta (a) jekk l-entità konġunta hijiex tabilħaqq vijabbli jew le u (b) jekk il-prezz tal-offerta finali huwiex tabilħaqq pożittiv, u li l-implimentazzjoni tal-proċess tal-bejgħ ma tinvolvix għajnuna la lix-xerrej u lanqas lill-entità mibjugħa (70). Il-Kummissjoni tieħu nota pożittiva tal-impenn mill-Ġermanja biex tissottometti l-offerta finali għall-valutazzjoni u l-approvazzjoni tal-Kummissjoni.

(150)

Fir-rigward tal-valutazzjoni meħtieġa tal-vijabbiltà, il-Kummissjoni tinnota li sempliċi bidla fis-sjieda li ma kinitx tinvolvi tibdil fil-mudell kummerċjali, pereżempju permezz ta' IPO, tiltaqa' mal-istess dubji fir-rigward tal-vijabbiltà hekk kif tqajmu mill-Kummissjoni fid-Deċiżjoni tal-ftuħ u sussegwentement mhux solvuti kif ivvalutat fid-deċiżjoni preżenti fit-Taqsima 4.1.2.

(151)

Abbażi ta' dawn l-impenji u l-kunsiderazzjonijiet imsemmija qabel, il-Kummissjoni tikkonkludi li r-rekwiżiti taħt il-Punt 49 tal-Komunikazzjoni dwar il-Banek tal-2008 kif ukoll taħt il-Punti 17 u 18 tal-Komunikazzjoni dwar ir-Ristrutturar huma sodisfatti.

(152)

Finalment, il-Kummissjoni tikkunsidra b'mod pożittiv l-impenn mill-Ġermanja li tpoġġi taħt monitoraġġ rigoruż is-sett kollu ta' impenji minn fiduċjarju ta' monitoraġġ ikkwalifikat u indipendenti.

(153)

Abbażi tal-impenji pprovduti u l-valutazzjoni preċedenti, il-Kummissjoni tikkonkludi li l-miżura tal-2013, innotifikata mill-ġdid bħala għajnuna għall-istralċ ordnat tal-HSH, tista' titqies bħala kompatibbli mar-regoli tas-suq intern,