(1)

Le Rialachán Cur Chun Feidhme (AE) 2018/2019 ón gCoimisiún (2) bunaítear, ar bhonn réamh-mheasúnú riosca, liosta plandaí, táirgí plandaí agus réad eile a mbaineann ardriosca leo.

(2)

Tar éis réamh-mheasúnú a dhéanamh, liostaíodh 34 ghéineas agus speiceas amháin de phlandaí le haghaidh plandú de thionscnamh tríú tíortha go sealadach san Iarscríbhinn a ghabhann le Rialachán Cur Chun Feidhme (AE) 2018/2019 mar phlandaí a mbaineann ardriosca leo. Tá an géineas Betula L. ar an liosta sin.

(3)

An 27 Aibreán 2023 chuir an Ríocht Aontaithe (3) dhá iarraidh faoi bhráid an Choimisiúin maidir leis na nithe seo a leanas a onnmhairiú chuig an Aontas: bata bachlóg/beangán nódaithe Betula pendula atá suas le 1 bhliain d’aois, nach mó ná 12 mm an trastomhas aige; plandaí Betula pendula agus Betula pubescens le haghaidh plandú atá suas le 7 mbliana d’aois, i ndamhna fáis, agus nach mó ná 40 mm an trastomhas acu ag bonn an ghais; plandaí Betula pendula agus Betula pubescens le haghaidh plandú atá suas le 7 mbliain d’aois, iad fréamhlom, agus nach mó ná 40 mm an trastomhas acu ag bonn an ghais agus plandaí Betula pendula agus Betula pubescens le haghaidh plandú atá suas le 15 bliana d’aois, iad i ndamhna fáis, agus nach mó ná 80 mm an trastomhas acu ag bonn an ghais (‘na plandaí ábhartha’). Cuireadh na sainchomhaid theicniúla ábhartha isteach leis na hiarrataí sin.

(4)

An 26 Meán Fómhair 2024 ghlac an tÚdarás Eorpach um Shábháilteacht Bia (‘an tÚdarás’) tuairim eolaíoch uaidh maidir leis an measúnú riosca ar na plandaí ábhartha (4). Shainaithin an tÚdarás Entoleuca mammata, Meloidogyne fallax, Phytophthora ramorum (aonraígh nach aonraígh de chuid an Aontais iad) agus Thaumetopoea processionea mar lotnaidí atá ábhartha do na plandaí sin, rinne sé meastóireacht ar na bearta maolaithe ar a dtugtar tuairisc sa sainchomhad agus rinne sé meastachán ar an dóchúlacht atá ann go mbeadh na plandaí ábhartha saor ó na lotnaidí sin.

(5)

Liostaítear Meloidogyne fallax agus Phytophthora ramorum (aonraígh nach aonraígh de chuid an Aontais iad) mar lotnaidí coraintín de chuid an Aontais in Iarscríbhinn II a ghabhann le Rialachán Cur Chun Feidhme (AE) 2019/2072 ón gCoimisiún (5), agus liostaítear Entoleuca mammata agus Thaumetopoea processionea mar lotnaidí coraintín de chuid criosanna cosanta in Iarscríbhinn III a ghabhann leis an Rialachán sin.

(6)

Ar bhonn na tuairime ón Údarás, meastar go laghdaítear an riosca fiteashláintíochta a eascraíonn ó na plandaí ábhartha a thabhairt isteach i gcríoch an Aontais go dtí leibhéal inghlactha, ar choinníoll go gcomhlíontar na ceanglais allmhairiúcháin lena mbaineann arna leagan amach in Iarscríbhinn VII a ghabhann le Rialachán Cur Chun Feidhme (AE) 2019/2072.

(7)

Ós rud é go meastar go laghdaítear an riosca fíteashláintíochta ó chrainn mhóra agus seanchrainn Betula pendula agus Betula pubescens (80 mm agus 15 bliana d’aois) a thabhairt isteach i gcríoch an Aontais go dtí leibhéal inghlactha, tá údar maith ann, dá bhrí sin, le teacht ar an gconclúid go laghdaítear an riosca fíteashláintíochta ó gach planda Betula pendula agus Betula pubescens le haghaidh plandú a thabhairt isteach san Aontas go dtí leibhéal inghlactha, gan beann ar a méid, a n-aois, iad a bheith fréamhlom nó i ndamhna fáis, ar phlandaí iad de thionscnamh na Ríochta Aontaithe.

(8)

Dá réir sin, níor cheart a mheas a thuilleadh gur plandaí a mbaineann ardriosca leo iad plandaí Betula pendula agus Betula pubescens le haghaidh plandú, de thionscnamh na Ríochta Aontaithe. Ba cheart, dá bhrí sin, iad a bhaint den liosta plandaí, táirgí plandaí agus réad eile a mbaineann ardriosca leo san Iarscríbhinn a ghabhann le Rialachán Cur Chun Feidhme (AE) 2018/2019.

(9)

Dá bhrí sin, ba cheart Rialachán Cur Chun Feidhme (AE) 2018/2019 a leasú dá réir.

(10)

Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,