(1)

Il-mod kif tiġi pprovduta dik l-informazzjoni f’applikazzjoni għar-reġistrazzjoni bħala rieżaminatur estern jenħtieġ li jippermetti lill-Awtorità Ewropea tat-Titoli u s-Swieq (ESMA, European Securities and Markets Authority) tivvaluta jekk il-kundizzjonijiet imsemmija fl-Artikolu 23(2) tar-Regolament (UE) 2023/2631 humiex issodisfati, inklużi l-kundizzjonijiet stabbiliti fir-Regolament Delegat tal-Kummissjoni (UE) 2025/2180 (2).

(2)

Biex tiġi ssalvagwardjata s-sigurtà u tissaħħaħ il-ġestjoni u l-użu tad-data, il-formoli, il-mudelli u l-proċeduri standard li jenħtieġ li jintużaw mill-applikanti meta japplikaw għar-reġistrazzjoni bħala rieżaminatur estern jenħtieġ li jippermettu r-reġistrazzjoni permezz ta’ mezzi diġitali. Għalhekk, kwalunkwe informazzjoni li l-applikanti jissottomettu lill-ESMA f’applikazzjoni għar-reġistrazzjoni jenħtieġ li tkun tista’ tinqara minn magna u tiġi pprovduta fuq mezz durabbli.

(3)

Sabiex l-ESMA tiġi assistita fl-identifikazzjoni tad-dokumenti li applikant ikun ippreżenta bħala parti mill-applikazzjoni għar-reġistrazzjoni, jenħtieġ li jiġi pprovdut numru ta’ referenza uniku li jikkorrispondi ma’ kull dokument.

(4)

Għall-finijiet ta’ assigurazzjoni u ta’ responsabbiltà, l-applikanti li jressqu applikazzjoni għar-reġistrazzjoni lill-Awtorità Ewropea tat-Titoli u s-Swieq (ESMA) jenħtieġ li jikkomplementaw dik l-applikazzjoni b’ittra ffirmata minn membru tal-maniġment superjuri tagħha, li tiċċertifika li l-informazzjoni pprezżentati hija preċiża u kompluta skont l-aħjar għarfien ta’ dak il-membru.

(5)

Dan ir-Regolament huwa bbażat fuq l-abbozz tal-istandards tekniċi ta’ implimentazzjoni ppreżentati lill-Kummissjoni mill-ESMA.

(6)

Dan ir-Regolament jirrispetta d-drittijiet fundamentali u josserva l-prinċipji rikonoxxuti fil-Karta tad-Drittijiet Fundamentali tal-Unjoni Ewropea, b’mod partikolari d-dritt għall-protezzjoni tad-data personali. L-ipproċessar ta’ data personali għall-finijiet ta’ dan ir-Regolament jenħtieġ li jitwettaq f’konformità mad-dritt tal-Unjoni dwar il-protezzjoni ta’ data personali. F’dan ir-rigward, kwalunkwe pproċessar ta’ data personali mill-ESMA fl-applikazzjoni ta’ dan ir-Regolament jenħtieġ li jitwettaq f’konformità mar-Regolament (UE) 2018/1725 tal-Parlament Ewropew u tal-Kunsill (3). Kwalunkwe pproċessar ta’ data personali mwettaq mill-entitajiet li japplikaw għal rieżaminatur estern fi ħdan l-applikazzjoni ta’ dan ir-Regolament jenħtieġ li jitwettaq f’konformità mar-Regolament (UE) 2016/679 tal-Parlament Ewropew u tal-Kunsill (4) u mar-rekwiżiti nazzjonali dwar il-protezzjoni ta’ persuni fiżiċi fir-rigward tal-ipproċessar ta’ data personali.

(7)

Sabiex l-ESMA tkun tista’ twettaq il-valutazzjoni għall-finijiet tar-reġistrazzjoni inizjali, filwaqt li tiżgura salvagwardji xierqa, id-data personali relatata mal-applikanti għar-reġistrazzjoni bħala rieżaminatur estern jenħtieġ li tinżamm mir-rieżaminaturi esterni u mill-ESMA għal mhux aktar minn ħames snin wara li dak l-applikant ikun waqaf iwettaq il-funzjoni tiegħu jekk l-applikant ikun ġie rreġistrat bħala rieżaminatur estern. Meta l-ESMA tkun irrifjutat li tirreġistra rieżaminatur estern applikant jew meta l-applikant jirtira l-applikazzjoni tiegħu, jenħtieġ li d-data personali relatata ma’ dak l-applikant tinżamm mill-ESMA għal mhux aktar minn ħames snin wara r-rifjut tar-reġistrazzjoni tal-applikant jew wara l-irtirar tal-applikazzjoni.

(8)

Il-Kontrollur Ewropew għall-Protezzjoni tad-Data ġie kkonsultat f’konformità mal-Artikolu 42(1) tar-Regolament (UE) 2018/1725 u pprovda l-kummenti formali tiegħu fis-7 ta’ Lulju 2025.

(9)

L-ESMA wettqet konsultazzjoni pubblika miftuħa dwar l-abbozz tal-istandard tekniku ta’ implementazzjoni li fuqu huwa bbażat dan ir-Regolament. L-awtorità analizzat il-kostijiet u l-benefiċċji u talbet il-parir tal-Grupp tal-Partijiet Interessati tat-Titoli u s-Swieq stabbilit f’konformità mal-Artikolu 37 tar-Regolament (UE) Nru 1095/2010 tal-Parlament Ewropew u tal-Kunsill (5),