(1)

Leis an gcaoi a soláthraítear an fhaisnéis sin in iarratas ar chlárú mar athbhreithneoir seachtrach, ba cheart an tÚdarás Eorpach um Urrúis agus Margaí (ESMA) a chumasú measúnú a dhéanamh ar cé acu a chomhlíontar nó nach gcomhlíontar na coinníollacha dá dtagraítear in Airteagal 23(2) de Rialachán (AE) 2023/2631, lena n-áirítear na coinníollacha a leagtar síos i Rialachán Tarmligthe (AE) 2025/2180 ón gCoimisiún (2).

(2)

Chun slándáil a choimirciú agus bainistíocht agus inúsáidteacht sonraí a fheabhsú, ba cheart modhanna clárúcháin digiteacha a cheadú leis na foirmeacha, na teimpléid agus na nósanna imeachta caighdeánacha ba cheart d’iarratasóirí a úsáid nuair a dhéanann siad iarratas ar chlárú mar athbhreithneoir seachtrach. Dá bhrí sin, aon fhaisnéis a chuirfidh iarratasóirí faoi bhráid ESMA in iarratas ar chlárú, ba cheart í a bheith inléite ag meaisín agus ba cheart í a sholáthar ar mheán marthanach.

(3)

Chun cuidiú le ESMA na doiciméid atá curtha isteach ag iarratasóir mar chuid den iarratas ar chlárú a shainaithint, ba cheart uimhir thagartha uathúil a sholáthar chun comhfhreagairt do gach doiciméad.

(4)

Ar mhaithe le dearbhú agus cuntasacht, ba cheart d’iarratasóirí a chuireann iarratas ar chlárú faoi bhráid ESMA an t-iarratas sin a chomhlánú le litir arna síniú ag comhalta dá mbainistíocht shinsearach, lena bhfianaítear go bhfuil an fhaisnéis arna tíolacadh cruinn agus iomlán chomh fada agus is eol don chomhalta sin.

(5)

Tá an Rialachán seo bunaithe ar an dréachtchaighdeán teicniúil cur chun feidhme a chuir ESMA faoi bhráid an Choimisiúin.

(6)

Leis an Rialachán seo, urramaítear na cearta bunúsacha agus comhlíontar na prionsabail a aithnítear i gCairt um Chearta Bunúsacha an Aontais Eorpaigh, go háirithe an ceart go ndéanfar sonraí pearsanta a chosaint. Ba cheart próiseáil sonraí pearsanta chun críocha an Rialacháin seo a dhéanamh i gcomhréir leis an gcuid sin de dhlí an Aontais maidir le cosaint sonraí pearsanta. I ndáil leis sin, aon phróiseáil sonraí pearsanta a dhéanann ESMA agus an Rialachán seo á chur i bhfeidhm, ba cheart í a dhéanamh i gcomhréir le Rialachán (AE) 2018/1725 ó Pharlaimint na hEorpa agus ón gComhairle (3). Aon phróiseáil sonraí pearsanta a dhéanann eintitis a dhéanann iarratas ar athbhreithneoir seachtrach laistigh de chur i bhfeidhm an Rialacháin seo, ba cheart í a dhéanamh i gcomhréir le Rialachán (AE) 2016/679 ó Pharlaimint na hEorpa agus ón gComhairle (4) agus le ceanglais náisiúnta maidir le daoine nádúrtha a chosaint maidir le próiseáil sonraí pearsanta.

(7)

Chun ESMA a chumasú an measúnú a dhéanamh chun an clárú tosaigh a dhéanamh, agus coimircí iomchuí á n-áirithiú an tráth céanna, ba cheart d’athbhreithneoirí seachtracha agus do ESMA sonraí pearsanta a bhaineann le hiarratasóirí ar chlárú mar athbhreithneoir seachtrach a choinneáil ar feadh tréimhse nach faide ná 5 bliana tar éis don iarratasóir sin scor dá fheidhm a chomhlíonadh i gcás inar cláraíodh an t-iarratasóir mar athbhreithneoir seachtrach. I gcás inar dhiúltaigh ESMA clárú an athbhreithneora sheachtraigh is iarratasóir nó i gcás ina dtarraingíonn an t-iarratasóir a iarratas siar, ba cheart do ESMA na sonraí pearsanta a bhaineann leis an iarratasóir sin a choinneáil ar feadh tréimhse nach faide ná 5 bliana tar éis clárú an iarratasóra a dhiúltú nó tar éis an t-iarratas a tharraingt siar.

(8)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 agus thug sé barúlacha foirmiúla an 7 Iúil 2025.

(9)

Reáchtáil ESMA comhairliúchán poiblí oscailte maidir leis an dréachtchaighdeán teicniúil cur chun feidhme ar a bhfuil an Rialachán seo bunaithe. Rinne sé anailís ar na costais agus ar na tairbhí a d’fhéadfadh a bheith ag baint leis agus d’iarr sé comhairle ar an nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (5),