|
13.4.2021 |
MT |
Il-Ġurnal Uffiċjali tal-Unjoni Ewropea |
L 125/56 |
DEĊIŻJONI TAL-KUNSILL (UE) 2021/594
tad-9 ta’ April 2021
dwar il-pożizzjoni li għandha tittieħed f’isem l-Unjoni Ewropea fi ħdan il-Kumitat Ewropew għat-tfassil ta’ standards fil-qasam tan-navigazzjoni interna u fi ħdan il-Kummissjoni Ċentrali għan-Navigazzjoni fuq ir-Renu fir-rigward tal-adozzjoni ta’ standards dwar il-kwalifiki professjonali fin-navigazzjoni interna
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 91(1), flimkien mal-Artikolu 218(9) tiegħu,
Wara li kkunsidra l-proposta mill-Kummissjoni Ewropea,
Billi:
|
(1) |
Il-Konvenzjoni Riveduta għan-Navigazzjoni fuq ir-Renu iffirmata f’Mannheim fis-17 ta’ Ottubru 1868, kif emendata mill-Konvenzjoni li temenda l-Konvenzjoni Riveduta għan-Navigazzjoni fuq ir-Renu, iffirmata fi Strasburgu fl-20 ta’ Novembru 1963, daħlet fis-seħħ fl-14 ta’ April 1967 (“il-Konvenzjoni”). |
|
(2) |
Skont l-Artikolu 17 tal-Konvenzjoni, il-Kummissjoni Ċentrali għan-Navigazzjoni fuq ir-Renu (“CCNR”) tista’ tadotta rekwiżiti fil-qasam tal-kwalifiki professjonali. |
|
(3) |
Il-Kumitat Ewropew għat-tfassil ta’ standards komuni fil-qasam tan-navigazzjoni interna (“CESNI”) twaqqaf fit-3 ta’ Ġunju 2015 fil-qafas tas-CCNR biex jiżviluppa standards tekniċi għall-passaġġi fuq l-ilma interni f’diversi oqsma, b’mod partikolari fir-rigward tal-bastimenti, it-teknoloġija tal-informazzjoni u l-ekwipaġġ. |
|
(4) |
Is-CESNI, fil-laqgħa tiegħu li jmiss fil-15 ta’ April 2021, huwa mistenni li jadotta standard għat-taħriġ bażiku dwar is-sikurezza għall-baħrin li jistabbilixxi rekwiżiti ta’ taħriġ li l-Istati Membri jistgħu jsegwu bħala r-rekwiżiti nazzjonali tagħhom (“CESNI standard 20 04”) u standard għal frażijiet ta’ komunikazzjoni standardizzati f’erba’ lingwi għall-baħħara u l-boatmasters biex ikunu jistgħu jlaħħqu ma’ sitwazzjonijiet li jinvolvu problemi ta’ komunikazzjoni (“CESNI standard 20 39”). Iż-żewġ standards CESNI standard 20 04 u CESNI standard 20 39 għandhom l-għan li jiffaċilitaw l-implimentazzjoni tar-rekwiżiti li jaqgħu fil-kamp ta’ applikazzjoni tad-Direttiva (UE) 2017/2397 tal-Parlament Ewropew u tal-Kunsill (1). |
|
(5) |
Fil-laqgħa plenarja tagħha tat-2 ta’ Ġunju 2021, is-CCNR hija mistennija tadotta riżoluzzjoni li temenda r-Regolamenti għall-Persunal tan-Navigazzjoni fuq ir-Renu sabiex tinkludi referenza għall-Istandards Ewropej għall-Kwalifiki fin-Navigazzjoni Interna (“ES QIN standards”), fosthom CESNI standard 20 04 u CESNI standard 20 39. |
|
(6) |
CESNI standard 20 04 u CESNI standard 20 39 għandhom l-għan li jikkontribwixxu għaż-żamma tal-ogħla livell ta’ sikurezza fin-navigazzjoni interna u jinkoraġġixxu l-armonizzazzjoni fil-kuntest tad-Direttiva (UE) 2017/2397. |
|
(7) |
Huwa xieraq li tiġi stabbilita l-pożizzjoni li għandha tittieħed f’isem l-Unjoni fi ħdan is-CESNI u fi ħdan is-CCNR. |
|
(8) |
L-Unjoni la hija membru tas-CCNR u lanqas tas-CESNI. Għaldaqstant, il-pożizzjoni tal-Unjoni għandha tiġi espressa mill-Istati Membri li huma membri ta’ dawk il-korpi, filwaqt li jaġixxu b’mod konġunt fl-interess tal-Unjoni, |
ADOTTA DIN ID-DEĊIŻJONI:
Artikolu 1
1. Il-pożizzjoni li għandha tittieħed f’isem l-Unjoni fi ħdan is-CESNI fir-rigward tal-adozzjoni ta’ CESNI standard 20_04 u CESNI standard 20_39 għandha tkun li taqbel mal-adozzjoni tagħhom.
2. Il-pożizzjoni li għandha tittieħed f’isem l-Unjoni fi ħdan is-CCNR fir-rigward tal-adozzjoni ta’ riżoluzzjoni li temenda r-Regolamenti għall-Persunal tan-Navigazzjoni fuq ir-Renu sabiex tinkludi referenza għall-ES QIN standards inkluż CESNI standard 20_04 u CESNI standard 20_39, għandha tkun li tappoġġa l-proposti kollha li jallinjaw ir-rekwiżiti tar-Regolamenti dwar il-Persunal tan-Navigazzjoni fuq ir-Renu mal-ES QIN standards.
Artikolu 2
1. Il-pożizzjoni stabbilita fl-Artikolu 1(1) għandhom jesprimuha l-Istati Membri i li huma membri tas-CESNI, filwaqt li jaġixxu b’mod konġunt f’isem l-Unjoni.
2. Il-pożizzjoni stabbilita fl-Artikolu 1(2) għandhom jesprimuha l-Istati Membri li huma membri tas-CCNR, filwaqt li jaġixxu b’mod konġunt f’isem l-Unjoni.
Artikolu 3
Bidliet tekniċi minuri fil-pożizzjonijiet stabbiliti fl-Artikolu 1 jistgħu jiġu miftiehma mingħajr deċiżjoni ulterjuri tal-Kunsill.
Artikolu 4
Din id-Deċiżjoni għandha tidħol fis-seħħ fid-data tal-adozzjoni tagħha.
Magħmul fi Brussell, id-9 ta’ April 2021.
Għall-Kunsill
Il-President
A.P. ZACARIAS
(1) Id-Direttiva (UE) 2017/2397 tal-Parlament Ewropew u tal-Kunsill tat-12 ta’ Diċembru 2017 dwar ir-rikonoxximent tal-kwalifiki professjonali fin-navigazzjoni interna u li tħassar id-Direttivi tal-Kunsill 91/672/KEE u 96/50/KE (ĠU L 345, 27.12.2017, p. 53).