1998R2121 — MT — 01.01.2007 — 002.001
Dan id-dokument ġie magħmul bil-ħsieb li jintuża bħala għodda ta’ dokumentazzjoni u l-istituzzjonijiet ma jassumu l-ebda responsabbiltà għall-kontenut tiegħu
|
IR-REGOLAMENT TAL-KUMMISSJONI (KE) Nru 2121/98 tat-2 ta' Ottubru 1998 li jistabbilixxi regoli dettaljati għall-applikazzjoni tar-Regolament tal-Kunsill (KEE) Nru 684/92 u (KE) Nru 12/98 fir-rigward ta' dokumenti għall-ġarr tal-passiġġieri bil-kowċ u bix-xarabank (ĠU L 268, 3.10.1998, p.10) |
Emendat bi:
|
|
|
Il-Ġurnal Uffiċjali |
||
|
No |
page |
date |
||
|
COMMISSION REGULATION (EC) No 1792/2006 of 23 October 2006 (*) |
L 362 |
1 |
20.12.2006 |
|
Emendat bi:
|
L 236 |
33 |
23.9.2003 |
|
(*) |
Dan l-att qatt ma ġie ppubblikat bil-Malti. |
IR-REGOLAMENT TAL-KUMMISSJONI (KE) Nru 2121/98
tat-2 ta' Ottubru 1998
li jistabbilixxi regoli dettaljati għall-applikazzjoni tar-Regolament tal-Kunsill (KEE) Nru 684/92 u (KE) Nru 12/98 fir-rigward ta' dokumenti għall-ġarr tal-passiġġieri bil-kowċ u bix-xarabank
(test b'rilevanza għaż-ŻEE)
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi il-Komunità Ewropea,
Wara li kkunsidrat ir-Regolament tal-Kunsill (KEE) Nru 684/92 tas-16 ta' Marzu 1992 dwar ir-regoli komuni għall-ġarr internazzjonali tal-passiġġieri bil-kowċ u bix-xarabank ( 1 ), kif emendat bir-Regolament (KE) Nru 11/98 ( 2 ) u b'mod partikolari l-punt 3.4 ta' l-Artikolu 2 u l-Artikoli 5(4), 6(2), 11(5) u 13(3) tiegħu,
Wara li kkunsidrat ir-Regolament tal-Kunsill (KE) Nru 12/98 tal-11 ta' Diċembru 1997 li jistabilixxi l-kondizzjonijiet li taħthom ġarriera mhux residenti jistgħu jħaddmu servizzi nazzjonali ta' trasport fit-toroq fi Stat Membru ( 3 ), u b'mod partikolari l-Artikoli 6(2) u (3) u (7) tiegħu,
Wara li kkunsidrat il-kumitat stabbilit bl-Artikolu 10 tar-Regolament (KE) Nru 12/98,|
(1) |
Billi l-Artikolu 4(4) tar-Regolament Nru 684/92 jipprovdi li s-servizzi regolari u ċerti servizzi speċjali regolari għandhom ikunu suġġetti għal awtorizzazzjoni. |
|
(2) |
Billi l-Artikolu 11(1) ta' dak ir-Regolament jgħid li servizzi okkażjonali għandhom filwaqt li jitwettqu jkunu koperti minn formola tal-vjaġġ. |
|
(3) |
Billi l-Artikolu 13(1) ta' dan ir-Regolament jipprovdi li l-ħidmiet tat-trasport bi spejjeż propji għandhom ikunu suġġetti għal sistema ta' ċertifikati. |
|
(4) |
Billi għandhom jiġu stabbiliti wkoll regoli li jirregolaw l-użu tal-formola tal-vjaġġ imsemmija fl-Artikolu 11 ta' dak ir-Regolament u l-mezz ta' komunikazzjoni ma' l-Istati Membri konċernati, ta' l-ismijiet tal-ġarriera li jagħmlu dawk is-servizzi u l-waqfiet waqt il-vjaġġ. |
|
(5) |
Billi l-Kumissjoni addottat ir-Regolament (KEE) Nru 1839/92 ta' l-1 ta' Lulju 1992 li jistabilixxi regoli dettaljati għall-applikazzjoni tar-Regolament tal-Kunsill Nru 684/92 dwar id-dokumenti għall-ġarr internazzjonali tal-passiġġieri ( 4 ), kif l-aħħar emendat bl-Att ta' Adeżjoni ta' l-Awstrija, l-Finlandja u l-Isvezja; billi dak ir-Regolament ġie emendat bir-Regolament (KEE) Nru 2944/93 ( 5 ) biex jiġu standardizzati, għal raġunijiet ta' sempliċità, id-dokumenti ta' kontroll għal servizzi mekkuk bl-akkomodazzjoni u għal servizzi okkażjonali. |
|
(6) |
Billi r-Regolament (KE) Nru 11/98 abolixxa l-kunċett tas-servizz mekkuk u ssimplifika d-definizzjoni ta' servizzi okkażjonali billi abolixxa l-konċett ta' servizzi okkażjonali residwi. |
|
(7) |
Billi huwa meħtieġ li tiġi standardizzata, għal raġunijiet ta' sempliċità, il-formola tal-vjaġġ għas-servizzi okkażjonali internazzjonali u għas-servizzi okkażjonali fil-forma ta' kabotaġġ kif provdut fir-Regolament (KE) Nru 12/98. |
|
(8) |
Billi l-formola tal-vjaġġ użata bħala dokument ta' kontroll fl-istruttura tas-servizzi regolari speċjali fil-forma ta' kabotaġġ għandha tkun mimlija fil-forma ta' dikjarazzjoni mensili. |
|
(9) |
Billi, għal raġunijiet ta' trasparenza u sempliċità, id-dokumenti abbozz kollha stabbiliti bir-Regolament (KEE) Nru 1839/92 għandhom jiġu adattati għall-istrutttura regolatorja l-ġdida applikabbli għas-servizzi internazzjonali bil-kowċ u bix-xarabank u dak ir-Regolament għandu jiġi sostitwit bir-Regolament preżenti. |
|
(10) |
Billi l-Istati Membri jeħtieġu ż-żmien biex jistampaw u jqassmu d-dokumenti l-ġodda. |
|
(11) |
Billi fil-frattemp il-ġarriera għandhom ikunu jistgħu jkomplu jużaw id-dokumenti li għalihom hemm provdut bir-Regolament (KEE) Nru 1839/92 u r-Regolament tal-Kunsill (KEE) Nru 2454/92 ( 6 ), emendati bix-xieraq fejn meħtieġ sabiex jagħtu kas tar-Regolamenti (KEE) Nru 684/2 u (KE) Nru 12/98, |
ADOTTAT DAN IR-REGOLAMENT:
IL-KAPITOLU 1
ID-DOKUMENT TAL-KONTROLL - IL-FORMOLA TAL-VJAĠĠ
L-Artikolu 1
1. Id-dokument ta' kontroll - il-formola tal-vjaġġ għas-servizzi okkażjonali msemmija fil-punt 3.1 ta' l-Artikolu 2 tar-Regolament (KEE) Nru 684/92 għandu jikkonforma ma' l-abbozz fl-Anness 1 ta' dan ir-Regolament.
2. Id-dokument tal-kontroll - il-formola tal-vjaġġ għas-servizzi okkażjonali msemmija fil-punt 3 ta' l-Artikolu 2 tar-Regolament (KEE) Nru 12/92 għandu jikkonforma ma' l-abbozz fl-Anness 1 ta' dan ir-Regolament.
3. Il-formoli tal-vjaġġ għandhom ikunu f'kotba ta' 25 formola, duplikati, u distakkabbli. Kull ktieb għandu jkollu numru. Il-formoli għandhom ikunu ukoll numerati mill-1 sal 25. Il-qoxra tal-ktieb għandha tikkonforma ma' l-abbozz fl-Anness II ta' dan ir-Regolament. L-Istati Membri għandhom jieħdu l-miżuri kollha meħtieġa biex jaddattaw dawn il-ħtiġiet ma' l-ipproċessar kompjuterizzat tal-formoli tal-vjaġġ.
L-Artikolu 2
1. Il-ktieb li għalih hemm provdut fl-Artikolu 1(3) għandu jinħareġ f'isem il-ġarrier; dan ma jistax jiġi trasferit
2. Il-formola tal-vjaġġ għandha tiġi mimlija b'mod li tinqara b'ittri li ma jitħassrux, b'sistema dupliċi, jew mill-ġarrier jew mis-sewwieq għal kull vjaġġ qabel it-tluq. Din għandha tkun valida għall-vjaġġ kollu kemm hu.
3. Il-kopja ta' fuq tal-formola tal-vjaġġ għandha tinżamm fuq il-veikolu matul il-vjaġġ kollu li għalih tkun tirriferixxi. Il-kopja għandha tinżamm fil-bażi tal-kumpannija.
4. Il-ġarrier għandu jkun responsabbli milli jżomm il-formoli tal-vjaġġ.
L-Artikolu 3
Fil-każ ta' servizz internazzjonali okkażjonali pprovdut minn grupp ta' ġarriera li jkunu jaġixxu f'isem ta' l-istess kuntrattur, u li jistgħu jinkludu l-vjaġġaturi li jkunu sejrin jaqbdu konnessjoni waqt il-vjaġġ ma' ġarrier differenti ta' l-istess grupp, l-oriġinal tal-formola tal-vjaġġ għandha tinżamm fuq il-veikolu li jkun qiegħed jagħmel is-servizz. Kopja tal-formola tal-vjaġġ għandha tinżamm fil-bażi ta' kull ġarrier.
L-Artikolu 4
1. Il-kopji tal-formoli tal-vjaġġ li jkunu ġew użati bħala dokument ta' kontroll għal servizzi okkażjonali fil-forma ta' kabotaġġ skond l-Artikolu 6 tar-Regolament (KE) Nru 12/98 għandhom jiġu rritornati mill-ġarrier lill-awtorità jew lill-aġenzija kompetenti fl-Istat Membru ta' l-istabbiliment skond il-proċeduri li għandhom jiġu stabbiliti mill-awtorità jew mill-aġenzija.
2. Fil-każ ta' servizzi regolari speċjali fil-forma ta' kabotaġġ skond l-Artikolu 3 tar-Regolament (KE) Nru 12/98, il-formola tal-vjaġġ kif tidher fl-Anness 1 ta' dan ir-Regolament għandha tiġi mimlija fil-forma ta' dikjarazzjoni mensili u rritornata mill-ġarrier lill-awtorità jew l-aġenzija kompetenti fl-Istat Membru ta' l-istabbiliment b'konformità mal-proċeduri stabbiliti minn dik l-awtorità jew l-aġenzija.
L-Artikolu 5
Il-formola tal-vjaġġ għandha tagħmel lid-detentur kapaċi, fil-kors tas-servizz okkażjonali internazzjonali, li jagħmel eskursjonijiet lokali fi Stat Membru għajr dak li fih il-ġarrier ikun stabbilit, skond il-kondizzjonijiet stabbiliti fit-tieni paragrafu ta' l-Artikolu 12 tar-Regolament (KEE) Nru 684/92. L-eskursjonijiet lokali għandhom jiddaħħlu fil-formola tal-vjaġġ mit-tluq tal-vetturi għall-eskursjoni konċernat. L-oriġinal tal-formola tal-vjaġġ għandha tinżamm fil-veikolu sakemm iddum l-eskursjoni lokali.
L-Artikolu 6
Id-dokument tal-kontroll għandu jiġi ppreżentat lil kull uffiċjal tal-liġi malli jintalab.
IL-KAPITOLU II
L-AWTORIZZAZZJONIJIET
L-Artikolu 7
1. L-applikazzjonijiet għall-awtorizzazzjoni għal servizzi regolari u għal servizzi regolari speċjali suġġetti għall-awtorizzazzjoni għandhom jikkonformaw ma' l-abbozz fl-Anness III.
2. L-applikazzjonijiet għall-awtorizzazzjoni għandu jkun fihom din l-informazzjoni segwenti:
(a) skeda tal-ħinijiet;
(b) rati tal-ħlas;
(ċ) kopja awtentikata tal-liċenzja Komunitarja għal ġarr internazzjonali tal-passiġġieri bil-kowċ u bix-xarabank għall-kiri jew kumpens kif provdut fl-Artikolu 3a tar-Regolamnent (KEE) Nru 684/92;
(d) l-informazzjoni dwar it-tip u l-volum tas-servizz li l-applikant ikun qiegħed jippjana li jipprovdi, fil-każ ta' applikazzjoni biex joħloq servizz - jew li għandu jiġi provdut, fil-każ ta' applikazzjoni għal tiġdid ta' awtorizzazzjoni;
(e) mappa ta' skala xierqa, li fuqha jkun hemm immarkata r-rotta u l-postijiet ta' waqfien fejn għandhom jitrikkbu jew jitniżżlu l-pasiġġieri ;
(f) skeda tas-sewqan li tkun tippermetti verifika tal-konformità mal-leġislazzjoni Komunitarja dwar il-perjodi ta' sewqan u ta' mistrieħ.
3. L-applikanti għandhom jipprovdu kull informazzjoni ulterjuri li huma jikkunsidraw li tista' tkun rilevanti jew li tintalab mill-awtorità ta' ħruġ bħala appoġġ għall-applikazzjoni.
L-Artikolu 8
1. L-awtorizzazzjonijiet għandhom jikkonformaw ma' l-abbozz fl-Anness IV.
2. Kull veikolu li jwettaq servizz li jkun suġġett għal awtorizzazzjoni għandu jkollu fuqu awtorizzazzjoni jew kopja ċċertifikata mill-awtorità ta' ħruġ.
IL-KAPITOLU III
IĊ-ĊERTIFIKATI
L-Artikolu 9
1. Iċ-ċertifikati għal ħidmiet ta' trasport indipendenti kif definiti fil-punt 4 ta' l-Artikolu 2 tar-Regolament (KEE) Nru 684/92 għandhom ikunu jikkonformaw ma' l-abbozz fl-Anness V ta' dan ir-Regolament.
2. L-intrapriżi li jitolbu ċertifikat għandhom jipprovdu lill-awtorità ta' ħruġ b' evidenza jew assigurazzjoni li l-kondizzjonijiet stabbiliti fil-punt 4 ta' l-Artikolu 2 tar-Regolament (KEE) Nru 684/92 jkunu ġew issodisfati.
3. Kull veikolu li jagħmel servizz li jkun suġġett għal sistema ta' ċertifikati għandu jkollu fuqu, sakemm idum il-vjaġġ, ċertifikat jew kopja awtentikata, li għandha tiġi ppreżentata lill-uffiċjali tal-liġi malli din tintalab.
4. Iċ-ċertifikati għandhom ikunu validi sa massimu ta' ħames snin.
IL-KAPITOLU IV
IL-KOMUNIKAZZJONI TAD-DATA STATISTIKA
L-Artikolu 10
Id-data dwar ħidmiet tat-trasport bil-kabotaġġ imsemmija fl-Artikolu 7 tar-Regolament (KE) Nru 12/98 għandhom jiġu kkomunikati f'forma tabularja b'konformità ma' l-abbozz fl-Anness V ta' dan ir-Regolament.
IL-KAPITOLU V
ID-DISPOŻIZZJONIJIET TRANSIZZJONALI U FINALI
L-Artikolu 11
Ir-Regolament (KEE) 1839/92 għandu jiġi revokat b'seħħ mill-31 ta' Diċembru 1999.
L-Artikolu 12
L-Istati Membri jistgħu jawtorizzaw l-użu tal-formoli tal-vjaġġ, l-applikazzjonijiet għall-awtorizzazzjoni, l-awtorizzazzjonijiet u ċ-ċertifikati li jsiru b'konformità mar-Regolament (KEE) Nru 1839/92 u mar-Regolament (KEE) Nru 2454/92 sa mhux aktar tard mill-31 ta' Diċembru 1999, sakemm dawn jiġu emendati, b'mod leġibbli, li ma jitħassarx u xieraq sa fejn ikun meħtieġ, biex ikunu jikkonformaw mar-Regolamenti (KEE) Nru 684/92, (KE) Nru 12/98 u ma' dan ir-Regolament.
L-Istati Membri l-oħra għandhom jaċċettaw dawk id-dokumenti fit-territorju tagħhom sal-31 ta' Diċembru 1999.
L-Artikolu 13
L-Istati Membri għandhom jieħdu l-miżuri neċessarji biex jimplimentaw dan ir-Regolament u jinformaw immedjatament lill-Kumissjoni dwaru.
L-Artikolu 14
Dan ir-Regolament għandu jidħol fis-seħħ fit-tielet jum ta' wara l-pubblikazzjoni tiegħu fil-Ġurnal Uffiċjali tal-Komunitajiet Ewropej.
Dan għandu japplika mill-11 ta' Diċembru 1998, minbarra għall-Artikoli 1(2), 4 u 10, li għandhom japplikaw mill-11 ta' Ġunju 1999.
Dan ir-regolament għandu jorbot fl-intier tiegħu u japplika direttament fl-Istati Membri kollha.
L-ANNESS I
L-ANNESS II
L-ANNESS III
L-ANNESS IV
L-ANNESS V
L-ANNESS VI
( 1 ) ĠU L 74, ta' l-20.3.1992. p. 1.
( 2 ) ĠU L 4, tat-8.1.1998. p. 1.
( 3 ) ĠU L 4, tat-8.1.1998. p. 10.
( 4 ) ĠU L 187, tas-7.7.1992. p.5.
( 5 ) ĠU L 266, tas-27.10.1998. p. 2.
( 6 ) ĠU L 251, tad-29.8.1992. p. 1.