(1)

Permezz tal-ittri datati l-5 ta’ Awwissu 2009 u t-30 ta’ Settembru 2009, il-Kummissjoni talbet lill-Ġermanja għal informazzjoni dwar § 8c tal-att dwar it-taxxa korporattiva (Körperschaftsteuergesetz, “KStG”). L-awtoritajiet Ġermaniżi wieġbu għal dawn it-talbiet permezz tal-ittri tal-20 ta’ Awwissu 2009 u tal-5 ta’ Novembru 2009. Permezz tad-deċiżjoni datata l-24 ta’ Frar 2010 (“id-Deċiżjoni tal-Ftuħ”), il-Kummissjoni fetħet il-proċedura ta’ investigazzjoni formali stabbilita fl-Artikolu 108(2) tat-Trattat dwar il-Funzjonament tal-Unjoni Ewropea (TFUE) fir-rigward ta’ § 8c(1a) KStG (Sanierungsklausel).

(2)

Id-Deċiżjoni tal-Ftuħ ġiet ippubblikata f’Il-Ġurnal Uffiċjali tal-Unjoni Ewropea (2). Il-Kummissjoni stiednet lill-Ġermanja u lill-partijiet ikkonċernati biex jissottomettu kummenti.

(3)

L-awtoritajiet Ġermaniżi ssottomettew il-kummenti tagħhom permezz tal-ittra tad-9 ta’ April 2010.

(4)

Fid-9 ta’ April 2010 u fit-3 ta’ Ġunju 2010 saru żewġ laqgħat mal-awtoritajiet Ġermaniżi fi Brussell. L-awtoritajiet Ġermaniżi ssottomettew aktar informazzjoni fit-2 ta’ Lulju 2010. Il-Kummissjoni ma rċeviet l-ebda kumment mingħand il-partijiet ikkonċernati.

(5)

Fis-26 ta’ Jannar 2011, il-Kummissjoni adottat id-Deċiżjoni 2011/527/UE (3) (“id-Deċiżjoni tal-2011”) li fiha kkunsidrat li § 8c(1a) KStG (Sanierungsklausel) tikkostitwixxi għajnuna mill-Istat, li ġiet implimentata illegalment mill-Ġermanja bi ksur tal-Artikolu 108(3) tat-TFUE. Il-Kummissjoni kkonkludiet ukoll li l-għajnuna mogħtija skont § 8c(1a) KStG kienet inkompatibbli mas-suq intern, b’mod partikolari minħabba li ma setgħetx tinstab kompatibbli abbażi tal-punt (b) tal-Artikolu 107(3) tat-TFUE, kif interpretat mill-Qafas Temporanju (4) (5), u ordnat l-irkupru tal-għajnuna inkompatibbli.

(6)

Wara l-adozzjoni tad-Deċiżjoni tal-2011, il-Ġermanja u partijiet terzi ppreżentaw rikorsi għal annullament tad-Deċiżjoni tal-2011 (6). Fl-4 ta’ Frar 2016, il-Qorti Ġenerali ċaħdet l-argumenti tal-applikanti u kkonfermat id-Deċiżjoni tal-2011 (7).

(7)

Il-Ġermanja u żewġ benefiċjarji potenzjali (Heitkamp BauHolding GmbH u GFKL Financial Services AG) appellaw is-sentenzi tal-Qorti Ġenerali. Fit-28 ta’ Ġunju 2018, il-Qorti tal-Ġustizzja annullat is-sentenzi tal-Qorti Ġenerali u d-Deċiżjoni tal-2011 (8). Il-Qorti tal-Ġustizzja sabet li l-Kummissjoni żbaljat fl-analiżi tas-selettività billi qieset biss ir-regola li tipprojbixxi r-riport ta’ telf f’każ ta’ bidla fl-istruttura tal-parteċipazzjoni azzjonarja tal-kumpanija (§ 8c(1) KStG) li għandha tkun il-qafas ta’ referenza u eskludiet minnha r-regola ġenerali dwar ir-riport tat-telf.

(8)

It-tassazzjoni korporattiva fil-Ġermanja hija bbażata l-aktar fuq l-att dwar it-taxxa fuq l-introjtu (Einkommensteuergesetz, (“EStG”)) u l-KStG. § 10d(2) EStG tipprevedi l-possibbiltà li jiġi riportat telf imġarrab f’sena fiskali, jiġifieri li, f’konformità mal-prinċipju tal-kapaċità għall-ħlas, id-dħul taxxabbli fis-snin fiskali futuri jista’ jitnaqqas bit-tpaċija ta’ telf fl-imgħoddi sa limitu massimu ta’ EUR 1 miljun fis-sena. Skont § 8(1) KStG, din il-possibbiltà li jiġi riportat telf tapplika wkoll għal entitajiet soġġetti għat-taxxa korporattiva.

(9)

Skont l-awtoritajiet Ġermaniżi, il-possibbiltà ta’ tali riport tat-telf wassal ukoll għal kummerċ f’kumpaniji fittizji, li kienu ilhom żmien twil li waqqfu kwalunkwe attività ekonomika, iżda li xorta żammew it-telf li kien ġie riportat.

(10)

Bħala reazzjoni għall-kummerċ f’kumpaniji fittizji, fl-1997 il-Parlament Ġermaniż illimita l-possibbiltà li jiġi riportat it-telf, billi f’§ 8(4) KStG introduċa l-hekk imsejħa “Mantelkaufregelun g” (“regola dwar ix-xiri tal-kowtijiet” (coat-buying rule), fejn il-kowt jirrappreżenta l-kumpanija fittizja). Din ir-regola rrestrinġiet ir-riport ta’ telf għal dawk l-entitajiet korporattivi li kienu legalment u ekonomikament identiċi għall-entità li ġarrbet it-telf. Ir-regola ma kinitx tinkludi definizzjoni ta’ “ekonomikament identika”, iżda kienet tiddependi fuq element wieħed negattiv u żewġ elementi pożittivi:

(11)

L-aħħar żewġ eżempji kienu komunement imsemmija bħala “Sanierungsklause l” (klawżola li tippermetti r-ristrutturar ta’ kumpaniji f’diffikultà).

(12)

§ 8(4) KStG ġiet irrevokata mill-1 ta’ Jannar 2008 mill-att tal-2008 biex tiġi riformata t-tassazzjoni tal-kumpaniji (Unternehmensteuerreformgesetz 2008) (9).

(13)

L-istess att introduċa l-§ 8c(1) KStG ġdida, li llimitat il-possibbiltà li jiġi riportat telf fil-każ ta’ bidliet fil-parteċipazzjoni azzjonarja ta’ entità korporattiva aktar milli § 8(4) KStG għamlet qabel. Skont ir-regola l-ġdida:

(14)

Ir-regola l-ġdida inizjalment ma pprovdiet l-ebda eċċezzjoni għall-kumpaniji li fl-istess ħin ikunu soġġetti għal bidla sinifikanti fis-sjieda u fil-proċess ta’ ristrutturar.

(15)

Skont il-memorandum ta’ spjegazzjoni adottat mill-Parlament Ġermaniż flimkien mal-Unternehmenssteuerreformgesetz 2008, l-iskop li § 8(4) KStG tiġi ssostitwita bil-§ 8c(1) KStG ġdida kien li jiġu ssimplifikati r-regoli (mill-memorandum ta’ spjegazzjoni jirriżulta li l-applikazzjoni prattika ta’ § 8(4) KStG kienet wasslet għal ħafna mistoqsijiet legali diffiċli) u biex il-miżura kontra l-abbuż tiġi mmirata aħjar (10). Il-Parlament Ġermaniż kien konxju mill-fatt li bħala riżultat tar-riforma fil-każ ta’ ristrutturar ta’ impriża f’diffikultajiet, li kien jimplika bidla fis-sjieda, ir-riport tat-telf ma jkunx aktar possibbli. Huwa qies li dan kien aċċettabbli, peress li l-awtoritajiet tat-taxxa setgħu jirrinunzjaw għad-djun tat-taxxa f’tali sitwazzjoni fuq il-bażi ta’ kunsiderazzjonijiet ta’ ekwità anke mingħajr dispożizzjoni espliċita fil-KStG (11).

(16)

F’Ġunju 2009, § 8c KStG ġiet emendata billi ddaħħlet dispożizzjoni ġdida (§ 8c(1a) KStG) li tikkonċerna l-preservazzjoni tar-riport ta’ telf f’każ ta’ akkwiżizzjoni ta’ kumpaniji f’diffikultà bil-għan li jiġu ristrutturati. Din l-emenda kienet tifforma parti mill-Att dwar l-Għajnuna u l-Assigurazzjoni tas-Saħħa taċ-Ċittadini (Bürgerentlastungsgesetz Krankenversicherung) (12). B’mod ġenerali, id-dispożizzjoni l-ġdida hija msemmija għal darb’oħra bħala Sanierungsklausel (jew Sanierungsklausel ġdida (neue)) sabiex tiġi tingħaraf mill-predeċessur tagħha fi § 8(4) KStG).

(17)

Skont § 8c(1a) KStG, entità korporattiva titħalla tirriporta telf minkejja bidliet fil-parteċipazzjoni azzjonarja tagħha li jissodisfaw il-kundizzjonijiet ta’ § 8c(1) KStG, jekk jiġu ssodisfati r-rekwiżiti li ġejjin:

(18)

§ 8c(1a) KStG daħlet fis-seħħ fl-10 ta’ Lulju 2009 u bdiet tapplika b’mod retroattiv mill-1 ta’ Jannar 2008.

(19)

Fil-bidu, § 8c(1a) KStG ġiet introdotta bħala miżura temporali applikabbli sal-31 ta’ Diċembru 2009. Madankollu, fit-22 ta’ Diċembru 2009, il-Parlament Ġermaniż adotta, bħala parti mill-att dwar l-aċċellerazzjoni tat-tkabbir tat-22 ta’ Diċembru 2009 (Wachstumsbeschleunigungsgesetz) dispożizzjoni li ħassret il-klawżola sunset korrispondenti mill-KStG (15).

(20)

Ta’ min jinnota li t-telf li jiġi riportat jista’ jiġi kkumpensat biss mill-benefiċċji tal-kumpanija li tkun qed tiġi ristrutturata. Il-kumpanija akkwirenti ma tistax tikkumpensa dan it-telf bil-benefiċċji tagħha stess. Dan jgħodd ukoll jekk il-kumpanija akkwirenti tikkonsolida l-obbligazzjonijiet fiskali tagħha fil-livell tal-grupp, peress li l-punt (1) tal-ewwel sentenza ta’ § 15 KStG jipprojbixxi r-riport tat-telf jekk entità (Organgesellschaft) tkun tifforma parti minn entità konsolidata (Organschaft) (16). Madankollu, il-liġi Ġermaniża dwar it-taxxa korporattiva tipprovdi li tali telf ma jintilifx; dan sempliċiment jiġi “iffriżat” fil-livell tal-Organgesellschaft u jista’ jintuża ladarba l-kumpanija ma tkunx għadha kkonsolidata. Ma hemm l-ebda limitu ta’ żmien għar-riport ta’ dan it-telf “iffriżat”.

(21)

Il-kumpanija akkwirenti tibbenefika indirettament minn § 8c(1a) KStG, peress li, ladarba l-proċess ta’ ristrutturar jitlesta b’suċċess, id-dispożizzjoni tnaqqas il-piż tat-taxxa tal-entità ristrutturata. Barra minn hekk, il-kumpanija akkwirenti tista’ tgħaqqad l-attivitajiet kollha tagħha jew parti minnhom fil-kumpanija akkwistata u tuża b’dan il-mod it-telf li jkun ġie riportat.

(22)

Permezz tal-ittra datata l-24 ta’ Frar 2010, il-Kummissjoni infurmat lill-awtoritajiet Ġermaniżi li kienet iddeċidiet li tibda l-proċedura stabbilita fl-Artikolu 108(2) tat-TFUE fir-rigward tal-miżura deskritta hawn fuq li ngħatat skont § 8c(1a) KStG.

(23)

Fid-Deċiżjoni ta’ Ftuħ tagħha, il-Kummissjoni qieset li § 8c(1a) KStG iddistingwiet bejn kumpaniji finanzjarjament sodi li qed jagħmlu telf u kumpaniji li huma (potenzjalment) illikwidi jew b’dejn eċċessiv, b’benefiċċju għal dawn tal-aħħar. Fl-opinjoni preliminari tagħha, il-Kummissjoni qieset li l-miżura hija selettiva u tinvolvi għajnuna mill-Istat, peress li anke l-kundizzjonijiet l-oħra tal-Artikolu 107(1) tat-TFUE dehru li ġew issodisfati. Fl-aħħar nett, il-Kummissjoni esprimiet id-dubji tagħha dwar il-kompatibbiltà tal-miżura mal-punt (b) tal-Artikolu 107(3) tat-TFUE, kif interpretat mill-Qafas Temporanju, u mal-punt (c) tal-Artikolu 107(3) tat-TFUE, kif interpretat mil-Linji Gwida dwar is-Salvataġġ u r-Ristrutturar (17) (li kienu japplikaw dak iż-żmien) u l-Linji Gwida dwar l-Għajnuna Reġjonali (18) (li kienu japplikaw dak iż-żmien).

(24)

Wara l-ftuħ tal-proċedura ta’ investigazzjoni formali, il-Ministeru Federali Ġermaniż tal-Finanzi ta struzzjonijiet lill-awtoritajiet tat-taxxa inkarigati mill-ġbir tat-taxxa biex ma jibqgħux japplikaw § 8c(1a) KStG sakemm il-Kummissjoni tkun adottat deċiżjoni finali fil-każ u biex jinformaw lill-entitajiet ikkonċernati li f’każ ta’ deċiżjoni finali negattiva tal-Kummissjoni, l-għajnuna mill-Istat jkollha tiġi rkuprata (19).

(25)

L-awtoritajiet Ġermaniżi jqisu li § 8c(1a) KStG ma tikkostitwixxix għajnuna mill-Istat, għal tliet raġunijiet:

(26)

L-awtoritajiet Ġermaniżi jsostnu wkoll li s-Sanierungsklausel il-ġdida fi § 8c(1a) KStG tikkorrispondi essenzjalment għas-Sanierungsklausel il-qadima fi § 8(4) KStG, li qatt ma kienet ġiet ikkritikata mill-Kummissjoni (ara t-Taqsima 4.4) u li għadd ta’ Stati Membri oħra għandhom fis-seħħ regoli fiskali simili (ara t-Taqsima 4.5).

(27)

Fl-ittra tagħhom tat-2 ta’ Lulju 2010, l-awtoritajiet Ġermaniżi jsostnu li l-prinċipju tal-kreditur privat jista’ jiġi invokat fir-rigward ta’ talbiet fiskali jew parafiskali (20). Dawn iqisu wkoll li r-relazzjoni tal-Istat Ġermaniż mal-kontribwenti tiegħu hija komparabbli mar-relazzjoni bejn kreditur privat u debitur, li huma marbuta b’kuntratt fit-tul (Dauerschuldverhältnis), bħal kuntratt tal-kera jew kuntratt tal-impjieg. Fil-fehma tal-awtoritajiet Ġermaniżi, kreditur privat involut f’tali kuntratt fit-tul għandu jċedi parti mit-talbiet futuri tiegħu, jekk dak jippermetti l-akkwiżizzjoni tad-debitur tiegħu minn impriża oħra, li min-naħa tagħha tiżgura t-tkomplija tal-kuntratt fit-tul.

(28)

L-awtoritajiet Ġermaniżi jqisu li § 8c(1a) KStG hija miżura ġenerali, minħabba li mhijiex limitata għal xi settur, għad-daqs ta’ impriżi jew xi reġjun. Huma jsemmu l-fatt li kwalunkwe impriża tista’ potenzjalment issib ruħha, mingħajr ma tkun responsabbli għaliha, f’diffikultajiet finanzjarji u tkun eliġibbli għall-applikazzjoni tar-regola.

(29)

L-awtoritajiet Ġermaniżi jinnutaw li fl-avviż tagħha tal-1998 dwar it-tassazzjoni diretta tan-negozju, il-Kummissjoni stess kienet tal-opinjoni li, “sakemm dawn japplikaw għad-ditti kollha u għall-produzzjoni tal-merkanzija kollha”, miżuri fiskali ta’ natura purament teknika, bħal regoli dwar ir-riporti ta’ telf, ma kinux selettivi, u li “il-fatt li wħud mid-ditti jew uħud mis-setturi jibbenifikaw aktar minn oħrajn minn ftit minn dawn il-miżuri tat-taxxa mhux neċessarjament ifisser li huma maqbuda b’ regoli tal-kompetizzjoni li jirregolaw l-għajnuna tal-Istat” (21).

(30)

L-awtoritajiet Ġermaniżi huma tal-fehma li dawn il-kunsiderazzjonijiet huma ta’ importanza partikolari għat-trattament favorevoli tat-taxxa tar-riċerka u tal-iżvilupp, iżda anke għall-ħarsien tal-ambjent, it-taħriġ u l-impjiegi. Fil-fehma tal-awtoritajiet Ġermaniżi, ir-regoli fiskali li jibbenefikaw minnhom l-impriżi li jagħmlu sforzi partikolari f’dawn l-oqsma mhumiex selettivi, minħabba li huma miftuħa għall-impriżi kollha, anke jekk de facto huma ta’ benefiċċju akbar għal impriżi attivi f’ċerti setturi minn oħrajn. Fil-fehma tagħhom, l-istess raġunament jenħtieġ li japplika wkoll għar-regoli fiskali li jibbenefikaw minnhom impriżi f’diffikultà li jiġu akkwistati sabiex jiġu ristrutturati.

(31)

L-awtoritajiet Ġermaniżi jsostnu li l-Qorti tal-Ġustizzja u l-Qorti Ġenerali kienu aċċettaw li miżura li tkun ta’ benefiċċju esklussiv għal impriżi f’diffikultà tista’, fil-prinċipju, tikkostitwixxi miżura ġenerali, li mhijiex selettiva. F’dan ir-rigward, dawn jikkwotaw l-ewwel sentenza fil-kawża DM Transport (22), fejn il-Qorti tal-Ġustizzja ddeċidiet dan li ġej fir-rigward ta’ faċilità ta’ ħlas Belġjana għal impriżi f’diffikultajiet:

“Il-Gvern Franċiż isostni li faċilitajiet ta’ ħlas fir-rigward ta’ kontribuzzjonjiet tas-sigurtà soċjali ma jikkostitwixxux għajnuna mill-Istat jekk jingħataw f’ċirkostanzi identiċi lil kwalunkwe impriża li qed tesperjenza diffikultajiet finanzjarji. Dan jidher li huwa l-każ taħt ir-reġim stabbilit mil-leġiżlazzjoni Belġjana. Il-Kummissjoni, madankollu, tiddikjara li l-ONSS għandha setgħa diskrezzjonali fir-rigward tal-għoti ta’ faċilitajiet ta’ ħlas.

Jirriżulta mill-kliem tal-Artikoli 92(1) tat-Trattat li miżuri ġenerali li ma jiffavorixxux biss lil ċerti impriżi jew il-produzzjoni ta’ ċerti oġġetti biss ma jaqgħux taħt dik id-dispożizzjoni. Min-naħa l-oħra, fejn il-korp li qed jagħti assistenza finanzjarja jgawdi grad ta’ latitudni li jippermettilu li jagħżel il-benefiċjarji jew il-kondizzjonijiet taħt liema tiġi pprovduta l-assistenza finanzjarja, dik l-assistenza ma tistax titqies bħala ta’ natura ġenerali (ara, għal dan il-għan, Il-Kawża C-241/94 Franza vs il-Kummissjoni [1996] Ġabra I-4551, punti 23 u 24).

Huwa f’idejn il-qorti nazzjonali fil-proċedimenti prinċipali li tiddetermina jekk is-setgħa tal-ONSS li tagħti faċilitajiet ta’ ħlas hijiex diskrezzjonali u, jekk ma tkunx, li tistabbilixxi jekk il-faċilitajiet ta’ ħlas mogħtija mill-ONSS humiex ta’ natura ġenerali jew jekk jiffavorixxux ċerti impriżi.”

(32)

Barra minn hekk, l-awtoritajiet Ġermaniżi jikkwotaw is-sentenza fil-kawża HAMSA (23), fejn l-awtoritajiet Spanjoli sostnew li miżura mhijiex selettiva, minħabba li kienet tapplika għall-impriżi kollha f’diffikultà. Il-Qorti tal-Prim’Istanza ddeċidiet dwar dak il-punt:

“F’dan il-każ, l-argument invokat mill-applikant u r-Renju ta’ Spanja bil-għan li l-liġi Spanjola tas-26 ta’ Lulju 1922 dwar is-sospensjoni ta’ ħlasijiet twaqqaf proċedura ġenerali, applikabbli għall-kumpaniji kollha f’diffikultà, ma jistax jiġi aċċettat. Filwaqt li huwa veru li l-liġi ma għandhiex l-awtorità li tapplika s-selettività favur ċerti kategoriji ta’ impriżi jew setturi ta’ attività, wieħed irid jiftakar li r-remissjonijiet ta’ dejn ikkritikati mill-Kummissjoni ma jirriżultawx b’mod awtomatiku mill-applikazzjoni tal-liġi, iżda mid-deċiżjonijiet diskrezzjonali magħmula mill-korpi pubbliċi inkwistjoni. Hija, barra minn hekk, ġurisprudenza stabbilita li fejn il-korp li qed jagħti assistenza finanzjarja jgawdi grad ta’ latitudni li jippermettilu li jagħżel il-benefiċjarji jew il-kundizzjonijiet taħt liema tiġi pprovduta l-assistenza finanzjarja, dik l-assistenza ma tistax titqies bħala ta’ natura ġenerali (Kawża C-256/97 DM Transport [1999] Ġabra I-3913, punt 27).

(33)

L-awtoritajiet Ġermaniżi jsostnu li, għall-kuntrarju tal-miżuri involuti f’DM Transport u HAMSA, § 8c(1a) KStG ma tipprevedix deċiżjonijiet diskrezzjonali ta’ korpi pubbliċi, iżda li l-applikazzjoni tagħha tirriżulta awtomatikament mil-liġi. Għalhekk, bl-applikazzjoni ta’ argument a contrario, § 8c(1a) KStG ma tkunx selettiva.

(34)

L-awtoritajiet Ġermaniżi huma tal-fehma wkoll li § 8c(1a) KStG tifforma parti mill-korp ta’ regoli li jiffurmaw il-liġi Ġermaniża dwar l-insolvenza. B’mod partikolari, l-eliġibbiltà ta’ impriża hija bbażata fuq il-kunċetti ta’ illikwidità, riskju ta’ illikwidità u dejn eċċessiv, li huma-ddefiniti fl-Insolvenzordnung u li jrendu impriża eliġibbli għall-ftuħ ta’ proċeduri ta’ insolvenza.

(35)

Fir-rigward tal-kwistjoni tas-selettività, l-awtoritajiet Ġermaniżi jikkonkludu li l-opinjoni tal-Kummissjoni kellha bħala riżultat li kwalunkwe tnaqqis fit-taxxa kien jikkostitwixxi għajnuna mill-Istat, anke jekk kien applikabbli b’mod ġenerali, u li tali pożizzjoni kienet tikser it-TFUE.

(36)

L-awtoritajiet Ġermaniżi jqisu li l-eżenzjoni maħluqa minn § 8c(1a) KStG hija ġġustifikata abbażi tan-natura u l-iskema ġenerali tas-sistema Ġermaniża għat-tassazzjoni tal-entitajiet korporattivi. Dawn isostnu li hemm differenza oġġettiva bejn impriżi f’diffikultà li jeħtieġu ristrutturar u impriżi oħra, u li din id-differenza oġġettiva tiġġustifika trattament differenti ta’ impriżi f’diffikultà li jiġu akkwistati bil-għan li jiġu ristrutturati. L-awtoritajiet Ġermaniżi jibbażaw l-argument tagħhom fuq tliet kunsiderazzjonijiet.

(37)

L-ewwel nett, dawn jargumentaw li billi impriżi finanzjarjament b’saħħithom għandhom għażla bejn li jiffinanzjaw lilhom infushom mis-swieq kapitali u li jfittxu impriża oħra li tista’ tkun trid takkwistahom, l-impriżi f’diffikultà għandhom biss l-għażla li ssemmiet l-aħħar, jiġifieri li jfittxu akkwirent, peress li mhux se jkunu jistgħu jiġbru dejn mis-swieq kapitali jew jiksbu self mill-bank. B’riżultat ta’ dan, l-impriżi f’diffikultà se jitilfu sistematikament il-possibbiltà li jirriportaw it-telf tagħhom, filwaqt li impriżi b’saħħithom dejjem għandhom l-għażla li jiffinanzjaw id-dejn u li jfittxu xerrej.

(38)

It-tieni, dawn isostnu li r-ratio legis ta’ § 8c(1) KStG, jiġifieri li jiġi evitat il-kummerċ f’kumpaniji fittizji b’telf akkumulat, ma jirrikjedix l-esklużjoni tar-riport ta’ telf f’sitwazzjonijiet fejn l-iskop tal-akkwiżizzjoni jkun ir-ristrutturar, u mhux ta’ ottimizzazzjoni fiskali biss. Mingħajr il-limitazzjoni ta’ § 8c(1a) KStG għal akkwiżizzjonijiet ta’ impriżi f’diffikultà finanzjarja bil-għan li jiġu ristrutturati, jiġifieri billi jiġu inklużi wkoll akkwiżizzjonijiet oħra, ir-ratio legis ma setgħetx tibqa’ tiġi realizzata.

(39)

It-tielet, huma jargumentaw li l-iskop ta’ § 8c(1) KStG huwa li tiżgura li l-prezz tal-bejgħ tal-parteċipazzjonijiet f’impriżi jkun ibbażat biss fuq il-valur ekonomiku tal-impriża, bl-esklużjoni tal-valur tat-telf akkumulat għall-ottimizzazzjoni fiskali. Madankollu, fil-każ tal-akkwiżizzjoni ta’ impriża f’diffikultà bil-għan li tiġi ristrutturata, skont l-awtoritajiet Ġermaniżi l-valur possibbli tat-telf akkumulat ma għandu l-ebda rwol partikolari. Biex juru dan, dawn jinnutaw li, fil-kotba ta’ entità konsolidata tat-taxxa, il-kontabilisti ma jagħtu l-ebda valur biex possibbilment jiġi riportat it-telf ta’ impriża f’diffikultà.

(40)

Għal dawn it-tliet raġunijiet kumulattivi, l-awtoritajiet Ġermaniżi jqisu li, anke jekk § 8c(1a) KStG kienet prima facie selettiva, fi kwalunkwe każ din hija ġġustifikata min-natura u l-iskema ġenerali tat-tassazzjoni tal-entitajiet korporattivi fil-Ġermanja.

(41)

L-awtoritajiet Ġermaniżi josservaw li mill-1 ta’ Jannar 2008 § 8c KStG issostitwiet regola simili, jiġifieri § 8(4) KStG. Dawn jinnutaw li ż-żewġ regoli jsegwu l-istess għan, jiġifieri li jeskludu l-kummerċ f’kumpaniji fittizji b’telf akkumulat.

(42)

L-awtoritajiet Ġermaniżi jinnutaw li l-Kummissjoni qatt ma kienet indikat xi problemi possibbli fir-rigward ta’ § 8(4) KStG, u li għalhekk jidher li din ir-regola ma kinitx tikkostitwixxi għajnuna mill-Istat.

(43)

Għalhekk, dawn iqisu li l-pożizzjoni tal-Kummissjoni f’dan ir-rigward hija inkoerenti.

(44)

L-awtoritajiet Ġermaniżi indikaw li ħafna Stati Membri oħra għandhom regoli fis-seħħ li huma komparabbli ma’ § 8c(1a) KStG. F’dan ir-rigward jikkwotaw l-Awstrija, il-Belġju, il-Finlandja, l-Italja, il-Lussemburgu u n-Netherlands. Dawn jinnutaw li l-Kummissjoni ma ħadet l-ebda azzjoni taħt il-kompetenzi tagħha ta’ għajnuna mill-Istat fir-rigward ta’ dawn l-Istati Membri, minkejja s-similaritajiet qawwija ħafna tas-sistemi.

(45)

L-awtoritajiet Ġermaniżi, b’reazzjoni għall-premessa 34 tad-Deċiżjoni tal-Ftuħ, li tispjega l-azzjoni li ħadet il-Kummissjoni fir-rigward tas-sistema Franċiża, jenfasizzaw ukoll li s-sistema Ġermaniża hija differenti mis-sistema Franċiża li kienet limitata għal ċerti setturi tal-ekonomija u kien fiha eżenzjoni sħiħa mit-taxxa korporattiva.

(46)

Wara l-adozzjoni tad-Deċiżjoni tal-2011, il-Ġermanja ssospendiet l-applikazzjoni tal-miżura sakemm tingħata sentenza finali mill-Qorti Ġenerali jew mill-Qorti tal-Ġustizzja (24).

(47)

Fid-29 ta’ Marzu 2017, il-Qorti Kostituzzjonali Federali Ġermaniża (Bundesverfassungsgericht) qieset ir-rinunzja prorata ta’ riport ta’ telf fil-każ ta’ trasferiment ta’ bejn 25 % u 50 % tal-kapital tal-ishma, tad-drittijiet ta’ sħubija, tad-drittijiet ta’ sjieda jew tad-drittijiet tal-vot skont § 8c(1) KStG bħala mhux kostituzzjonali, u talbet lill-Parlament Ġermaniż jemenda d-dispożizzjoni sal-31 ta’ Diċembru 2018 (25). Wara dan il-Parlament Ġermaniż neħħa (b’effett retroattiv mill-21 ta’ Diċembru 2007) it-telf totali ta’ riport ta’ telf fil-każ ta’ trasferiment ta’ bejn 25 % u 50 % tal-kapital tal-ishma, tad-drittijiet ta’ sħubija, tad-drittijiet ta’ sjieda jew tad-drittijiet tal-vot, u żamm biss it-telf totali ta’ riport ta’ telf jekk aktar minn 50 % ta’ tali kapital jew drittijiet kienu ġew ittrasferiti lil entità oħra (26).

(48)

Wara l-annullament tad-Deċiżjoni tal-2011 mill-Qorti tal-Ġustizzja, il-Ġermanja reġgħet introduċiet ukoll is-Sanierungsklausel (§ 8c(1a)) fil-KStG fil-11 ta’ Diċembru 2018 (b’effett retroattiv mill-2008) (27).

(49)

Skont l-Artikolu 107(1) tat-TFUE, “kull għajnuna, ta’ kwalunkwe forma, mogħtija minn Stat Membru jew permezz ta’ riżorsi tal-Istat, li twassal għal distorsjoni jew theddida ta’ distorsjoni għall-kompetizzjoni billi tiffavorixxi ċerti impriżi jew ċerti produtturi għandha, safejn tolqot il-kummerċ bejn l-Istati Membri, tkun inkompatibbli mas-suq intern.”

(50)

Għalhekk, il-kwalifikazzjoni ta’ miżura bħala għajnuna skont it-tifsira ta’ din id-dispożizzjoni tirrikjedi li jiġu ssodisfati l-kundizzjonijiet li ġejjin: (i) il-miżura trid tkun imputabbli lill-Istat u ffinanzjata mir-riżorsi tal-Istat; (ii) trid tagħti vantaġġ lill-impriża; (iii) dak il-vantaġġ irid ikun selettiv; u (iv) il-miżura trid tfixkel jew thedded li tfixkel il-kompetizzjoni u taffettwa l-kummerċ bejn l-Istati Membri.

(51)

Il-karatterizzazzjoni ta’ miżura bħala għajnuna mill-Istat, skont it-tifsira tal-Artikolu 107(1) tat-TFUE tirrikjedi li jiġu ssodisfati l-erba’ kundizzjonijiet kollha, billi dawk il-kundizzjonijiet huma kumulattivi. Il-Kummissjoni l-ewwel teżamina l-kundizzjoni relatata mal-għoti ta’ vantaġġ selettiv.

(52)

Bħala kwistjoni ta’ prinċipju, biex tiġi vvalutata l-eżistenza ta’ vantaġġ, is-sitwazzjoni finanzjarja tal-impriża wara l-miżura jenħtieġ li tiġi mqabbla mas-sitwazzjoni finanzjarja tagħha kieku l-miżura ma tkunx ittieħdet (28).

(53)

B’mod partikolari, fir-rigward tal-miżuri fiskali, sabiex jiġi vverifikat vantaġġ possibbli tat-taxxa, huwa meħtieġ li jiġi vvalutat jekk it-trattament tat-taxxa mogħti lil entità jagħtihiex vantaġġ meta mqabbel mas-sistema fiskali ordinarja jew “normali” (29). Għalhekk, il-valutazzjoni tal-vantaġġ hija marbuta mill-qrib mal-valutazzjoni tal-kriterju tas-selettività (fejn l-eżistenza ta’ trattament tat-taxxa derogatorju tiġi evalwata wkoll meta mqabbla mar-regoli ġenerali tat-taxxa).

(54)

Skont il-ġurisprudenza stabbilita (30), il-valutazzjoni tas-selettività materjali ta’ miżura fiskali sseħħ fi tliet stadji. L-ewwel nett, huwa meħtieġ li jiġi identifikat u eżaminat ir-reġim komuni jew “normali” (“is-sistema ta’ referenza”) applikabbli fl-Istat Membru kkonċernat. It-tieni, huwa b’rabta ma’ dan ir-reġim tat-taxxa komuni jew “normali” li jeħtieġ li jiġi ddeterminat jekk xi vantaġġ mogħti mill-miżura tat-taxxa inkwistjoni jistax ikun selettiv. Dan għandu jsir billi jintwera li l-miżura titbiegħed mill-arranġament ordinarju billi tagħmel distinzjoni bejn l-atturi ekonomiċi li, fid-dawl tal-objettiv fil-mira ta’ dak ir-reġim, ikunu f’sitwazzjoni fattwali u legali komparabbli. It-tielet, jekk tkun teżisti tali deroga, jeħtieġ li jiġi eżaminat jekk din tirriżultax min-natura jew mill-iskema ġenerali tas-sistema ta’ tassazzjoni li tifforma parti minnha u b’hekk jekk tistax tiġi ġġustifikata min-natura jew mil-loġika tas-sistema. F’dan il-kuntest, huwa l-kompitu tal-Istati Membri li juru li t-trattament diffrenzjat tat-taxxa jirriżulta direttament mill-prinċipji bażiċi jew ta’ gwida ta’ dik is-sistema

(55)

F’dan il-każ, mis-sentenzi tal-Qorti tal-Ġustizzja (31) jirriżulta li r-regoli tat-taxxa korporattiva li fil-Ġermanja b’mod ġenerali japplikaw għall-impriżi kollha huma s-sistema ta’ referenza u li dawn jinkludu r-regola ġenerali dwar ir-riport tat-telf skont §8(1) KStG. L-għan ta’ dawn ir-regoli huwa t-tassazzjoni tal-profitti korporattivi biex jiġi ġġenerat dħul għall-baġit, skont il-prinċipju tal-kapaċità għall-ħlas.

(56)

§8(1) KStG tistabbilixxi (b’referenza għal § 10d EStG) li l-entitajiet soġġetti għat-taxxa korporattiva jistgħu, għal finijiet ta’ taxxa, jirriportaw telf imġarrab f’sena fiskali għal snin fiskali futuri (sa limitu massimu ta’ EUR 1 miljun fis-sena).

(57)

Fil-punt 102 tas-Sentenza Andres (32), il-Qorti tal-Ġustizzja qieset li r-regola li tirregola d-dekadenza ta’ telf kienet fiha nnifisha eċċezzjoni għar-regola dwar-ir-riport tat-telf u li eżami ġenerali tal-kontenut ta’ dawk id-dispożizzjonijiet kellu jagħmilha possibbli li wieħed isib li l-effett tal-klawżola tar-ristrutturar kien li tiġi ddefinita sitwazzjoni li taqa’ taħt ir-regola ġenerali dwar ir-riport tat-telf.

(58)

Għalhekk, fiċ-ċirkostanzi speċifiċi tal-każ, mhuwiex meħtieġ li jiġi ddeterminat jekk ir-regoli kontra l-abbuż jagħmlux parti mis-sistema ta’ referenza, minħabba li, fi kwalunkwe każ, l-analiżi tal-Qorti tal-Ġustizzja tidher li teskludi li l-klawżola ta’ ristrutturar tikkontradixxi l-għan ta’ dawn ir-regoli (33) u tidderoga minnhom (34).

(59)

Sabiex jiġi vvalutat jekk is-Sanierungsklausel skont §8c(1a) KStG tikkostitwixxix vantaġġ selettiv, il-Kummissjoni jeħtiġilha tiddetermina jekk il-miżura tat-taxxa inkwistjoni hijiex deroga minn dik is-sistema ordinarja, sa fejn tiddistingwi bejn operaturi li, fid-dawl tal-għan segwit mis-sistema ordinarja tat-taxxa, huma f’sitwazzjoni fattwali u legali komparabbli.

(60)

Peress li §8c(1a) KStG tippermetti li l-kumpaniji li huma illikwidi jew b’dejn eċċessiv (jew f’riskju ta’ illikwidità jew dejn eċċessiv) u li qed jiġu ristrutturati jirriportaw it-telf, il-miżura ma tidderogax mir-regola ġenerali dwar ir-riport skont §8(1) KStG.

(61)

Fuq din il-bażi, il-Kummissjoni tikkonkludi li §8c(1a) KStG ma tipprovdix vantaġġ selettiv lill-entitajiet korporattivi li tapplika għalihom.

(62)

Fid-dawl tas-sejba msemmija hawn fuq, mhuwiex meħtieġ li jiġu vvalutati aktar argumenti tal-awtoritajiet Ġermaniżi rigward in-nuqqas ta’ vantaġġ selettiv. Barra minn hekk, mhuwiex meħtieġ li jiġu vvalutati l-kundizzjonijiet li jifdal biex miżura biex tikkwalifika bħala għajnuna, peress li l-karatterizzazzjoni ta’ miżura bħala għajnuna mill-Istat tirrikjedi li jiġu ssodisfati l-erba’ kundizzjonijiet kollha tal-Artikolu 107(1) tat-TFUE, billi dawk il-kundizzjonijiet ikunu kumulattivi.

(63)

Abbażi ta’ dak li ntqal hawn fuq, il-Kummissjoni tikkonkludi li § 8c(1a) KStG (Sanierungsklausel) ma tikkostitwixxix għajnuna mill-Istat skont it-tifsira tal-Artikolu 107(1) tat-TFUE,