European flag

Iris Oifigiúil
an Aontais Eorpaigh

GA

Sraith L


2025/2383

26.11.2025

CINNEADH CUR CHUN FEIDHME (AE) 2025/2383 ÓN gCOIMISIÚN

an 25 Samhain 2025

lena leasaítear Cinneadh Cur Chun Feidhme (AE) 2021/76 a mhéid a bhaineann leis an gcaighdeán comhchuibhithe i dtaca le rialacha sábháilteachta maidir le tógáil agus suiteáil ardaitheoirí i ndáil le haslonnú daoine faoi mhíchumas trí ardaitheoirí a úsáid

(Téacs atá ábhartha maidir le LEE)

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 1025/2012 ó Pharlaimint na hEorpa agus ón gComhairle an 25 Deireadh Fómhair 2012 maidir le caighdeánú Eorpach, lena leasaítear Treoir 89/686/CEE agus Treoir 93/15/CEE ón gComhairle agus Treoracha 94/9/CE, 94/25/CE, 95/16/CE, 97/23/CE, 98/34/CE, 2004/22/CE, 2007/23/CE, 2009/23/CE agus 2009/105/CE ó Pharlaimint na hEorpa agus ón gComhairle agus lena n-aisghairtear Cinneadh 87/95/CEE ón gComhairle agus Cinneadh Uimh. 1673/2006/CE ó Pharlaimint na hEorpa agus ón gComhairle (1), agus go háirithe Airteagal 10(6) de,

De bharr an mhéid seo a leanas:

(1)

I gcomhréir le hAirteagal 14 de Threoir 2014/33/AE ó Pharlaimint na hEorpa agus ón gComhairle (2), maidir le hardaitheoirí agus comhpháirteanna sábháilteachta le haghaidh ardaitheoirí atá i gcomhréir le caighdeáin chomhchuibhithe nó le codanna díobh, caighdeáin ar foilsíodh na tagairtí dóibh in Iris Oifigiúil an Aontais Eorpaigh, glactar leis go bhfuil siad i gcomhréir leis na ceanglais fhíor-riachtanacha a chumhdaítear leis na caighdeáin sin nó leis na codanna sin díobh a leagtar amach sa Treoir sin.

(2)

Le Cinneadh Cur Chun Feidhme C(2023)6588 ón gCoimisiún (3), rinne an Coimisiún iarraidh ar an gCoiste Eorpach um Chaighdeánú (CEN) caighdeán comhchuibhithe nua a dhréachtú i dtaca le rialacha sábháilteachta maidir le aslonnú daoine faoi mhíchumas trí ardaitheoirí a úsáid chun tacú le Treoir 2014/33/AE lena léirítear an úrscothacht a nglactar léi i gcoitinne chun na ceanglais fhíor-riachtanacha sláinte agus sábháilteachta a leagtar amach in Iarscríbhinn I a ghabhann le Treoir 2014/33/AE a chomhlíonadh agus, i gcás inarb ábhartha, na ceanglais sláinte agus sábháilteachta a leagtar amach in Iarscríbhinn I a ghabhann le Treoir 2006/42/CE ó Pharlaimint na hEorpa agus ón gComhairle (4) a chomhlíonadh mar a leagtar amach i bpointe 1.1 d’Iarscríbhinn I a ghabhann le Treoir 2014/33/AE.

(3)

Ar bhonn na hiarrata a leagtar amach i gCinneadh Cur Chun Feidhme C(2023)6588, dhréachtaigh CEN caighdeán comhchuibhithe EN 81-76:2025 maidir le haslonnú daoine faoi mhíchumas trí ardaitheoirí a úsáid.

(4)

Rinne an Coimisiún measúnú i gcomhar le CEN féachaint an gcomhlíonann EN 81-76:2025 an iarraidh a leagtar amach i gCinneadh Cur Chun Feidhme C(2023)6588.

(5)

Comhlíonann caighdeán comhchuibhithe EN 81-76:2025 na ceanglais fhíor-riachtanacha sláinte agus sábháilteachta is aidhm dó a chumhdach, ar ceanglais iad a leagtar amach i dTreoir 2014/33/AE. Dá bhrí sin, is iomchuí an tagairt don chaighdeán comhchuibhithe sin a fhoilsiú in Iris Oifigiúil an Aontais Eorpaigh.

(6)

Cuirtear ar fáil le Cinneadh Cur Chun Feidhme (AE) 2021/76 (5) ón gCoimisiún, in Iarscríbhinn I a ghabhann leis, na tagairtí do na caighdeáin chomhchuibhithe lena dtugtar le fios go nglactar leis go bhfuil comhréir ann le Treoir 2014/33/AE. Chun a áirithiú gur in aon ghníomh amháin a liostaítear na tagairtí do na caighdeáin chomhchuibhithe a dréachtaíodh chun tacú le Treoir 2014/33/AE, ba cheart an tagairt do EN 81-76:2025 a chuimsiú san Iarscríbhinn sin.

(7)

Dá bhrí sin, ba cheart Cinneadh Cur Chun Feidhme (AE) 2021/76 a leasú dá réir sin.

(8)

Ón dáta a fhoilsítear an tagairt do chaighdeán comhchuibhithe in Iris Oifigiúil an Aontais Eorpaigh, tugtar le fios le comhlíonadh an chaighdeáin sin go nglactar leis go bhfuil comhréir ann leis na ceanglais fhíor-riachtanacha chomhfhreagracha a leagtar amach i reachtaíocht chomhchuibhithe an Aontais. Dá bhrí sin, ba cheart an Cinneadh seo a theacht i bhfeidhm lá a fhoilsithe,

TAR ÉIS AN CINNEADH SEO A GHLACADH:

Airteagal 1

Leasaítear Iarscríbhinn I a ghabhann le Cinneadh Cur Chun Feidhme (AE) 2021/76 i gcomhréir leis an Iarscríbhinn a ghabhann leis an gCinneadh seo.

Airteagal 2

Tiocfaidh an Cinneadh seo i bhfeidhm lá a fhoilsithe in Iris Oifigiúil an Aontais Eorpaigh.

Arna dhéanamh sa Bhruiséil, an 25 Samhain 2025.

Thar ceann an Choimisiúin

An tUachtarán

Ursula VON DER LEYEN


(1)   IO L 316, 14.11.2012, lch. 12, ELI: http://data.europa.eu/eli/reg/2012/1025/oj.

(2)  Treoir 2014/33/AE ó Pharlaimint na hEorpa agus ón gComhairle an 26 Feabhra 2014 maidir le comhchuibhiú dhlíthe na mBallstát i dtaca le hardaitheoirí agus le comhpháirteanna sábháilteachta le haghaidh ardaitheoirí (IO L 96, 29.3.2014, lch. 251, ELI: http://data.europa.eu/eli/dir/2014/33/oj).

(3)  Cinneadh Cur Chun Feidhme C(2023) 6588 ón gCoimisiún an 5 Deireadh Fómhair 2023 maidir leis an iarraidh ar chaighdeánú chuig an gCoiste Eorpach um Chaighdeánú a mhéid a bhaineann le hardaitheoirí agus le comhpháirteanna sábháilteachta le haghaidh ardaitheoirí chun tacú le Treoir 2014/33/AE ó Pharlaimint na hEorpa agus ón gComhairle.

(4)  Treoir 2006/42/CE ó Pharlaimint na hEorpa agus ón gComhairle an 17 Bealtaine 2006 maidir le hinnealra, agus lena leasaítear Treoir 95/16/CE (IO L 157, 9.6.2006, lch. 24, ELI: http://data.europa.eu/eli/dir/2006/42/oj).

(5)  Cinneadh Cur Chun Feidhme (AE) 2021/76 ón gCoimisiún an 26 Eanáir 2021 maidir le caighdeáin chomhchuibhithe i dtaca le hardaitheoirí agus le comhpháirteanna sábháilteachta le haghaidh ardaitheoirí a dréachtaíodh mar thacú le Treoir 2014/33/AE ó Pharlaimint na hEorpa agus ón gComhairle (IO L 27, 27.1.2021, lch. 20, ELI: http://data.europa.eu/eli/dec_impl/2021/76/oj).


IARSCRÍBHINN

In Iarscríbhinn I a ghabhann le Cinneadh Cur Chun Feidhme (AE) 2021/76, cuirtear isteach an ró seo a leanas:

‘10b.

EN 81-76:2025

Rialacha sábháilteachta maidir le tógáil agus suiteáil ardaitheoirí — Feidhmeanna áirithe le haghaidh ardaitheoirí paisinéirí agus ardaitheoirí paisinéirí agus earraí — Cuid 76: Aslonnú daoine faoi mhíchumas trí ardaitheoirí a úsáid’.


ELI: http://data.europa.eu/eli/dec_impl/2025/2383/oj

ISSN 1977-0839 (electronic edition)