8.4.2021   

GA

Iris Oifigiúil an Aontais Eorpaigh

L 120/13


RIALACHÁN CUR CHUN FEIDHME (AE) 2021/575 ÓN gCOIMISIÚN

an 30 Márta 2021

maidir le haicmiú earraí áirithe san Ainmníocht Chomhcheangailte

TÁ AN COIMISIÚN EORPACH,

Ag féachaint don Chonradh ar Fheidhmiú an Aontais Eorpaigh,

Ag féachaint do Rialachán (AE) Uimh. 952/2013 ó Pharlaimint na hEorpa agus ón gComhairle an 9 Deireadh Fómhair 2013 lena leagtar síos Cód Custaim an Aontais (1), agus go háirithe Airteagal 57(4) agus Airteagal 58(2) de,

De bharr an mhéid seo a leanas:

(1)

Chun a áirithiú go gcuirtear an Ainmníocht Chomhcheangailte atá i gceangal le Rialachán (CEE) Uimh. 2658/87 ón gComhairle (2) i bhfeidhm go haonfhoirmeach, is gá bearta a ghlacadh maidir le haicmiú na n-earraí dá dtagraítear san Iarscríbhinn a ghabhann leis an Rialachán seo.

(2)

Le Rialachán (CEE) Uimh. 2658/87, leagadh síos na rialacha ginearálta maidir le léirmhíniú na hAinmníochta Comhcheangailte. Tá feidhm ag na rialacha sin freisin maidir le haon ainmníocht eile atá bunaithe go hiomlán uirthi nó a bhfuil cuid di bunaithe uirthi nó a chuireann aon fhoroinn bhreise léi agus a bhunaítear le forálacha sonracha de chuid an Aontais, d’fhonn bearta taraife agus bearta eile i ndáil le trádáil in earraí a chur i bhfeidhm.

(3)

De bhun na rialacha ginearálta sin, na hearraí a bhfuil tuairisc orthu i gcolún (1) den tábla a leagtar amach san Iarscríbhinn, is earraí iad ba cheart a aicmiú faoin gcód AC a luaitear i gcolún (2), de bhua na gcúiseanna a leagtar amach i gcolún (3) den tábla sin.

(4)

Is iomchuí foráil i ndáil le faisnéis taraife cheangailteach arna heisiúint i leith na n-earraí a bhaineann leis an Rialachán seo, faisnéis nach bhfuil i gcomhréir leis an Rialachán seo, go bhféadfaidh an sealbhóir, ar feadh tréimhse áirithe, leanúint air ag agairt na faisnéise sin i gcomhréir le hAirteagal 34(9) de Rialachán (AE) Uimh. 952/2013. Is tréimhse 3 mhí ba cheart a bheith sa tréimhse sin.

(5)

Na bearta dá bhforáiltear sa Rialachán seo, is bearta iad atá i gcomhréir le tuairim an Choiste um an gCód Custaim,

TAR ÉIS AN RIALACHÁN SEO A GHLACADH:

Airteagal 1

Na hearraí a bhfuil tuairisc orthu i gcolún (1) den tábla a leagtar amach san Iarscríbhinn, is earraí iad a dhéanfar a aicmiú faoi chuimsiú na hAinmníochta Comhcheangailte faoin gcód AC a luaitear i gcolún (2) den tábla sin.

Airteagal 2

Faisnéis taraife cheangailteach nach bhfuil i gcomhréir leis an Rialachán seo, is faisnéis í is féidir a agairt fós i gcomhréir le hAirteagal 34(9) de Rialachán (AE) Uimh. 952/2013 go ceann tréimhse 3 mhí ó dháta theacht i bhfeidhm an Rialacháin seo.

Airteagal 3

Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.

Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.

Arna dhéanamh sa Bhruiséil, 30 Márta 2021.

Thar ceann an Choimisiúin

Gerassimos THOMAS

An tArd-Stiúrthóir

Ard-Stiúrthóireacht an Chánachais agus an Aontais Custaim


(1)   IO L 269, 10.10.2013, lch. 1.

(2)  Rialachán (CEE) Uimh. 2658/87 ón gComhairle an 23 Iúil 1987 maidir leis an ainmníocht taraife agus staidrimh agus leis an gComhtharaif Chustaim (IO L 256, 7.9.1987, lch. 1).


IARSCRÍBHINN

Tuairisc ar na hearraí

Aicmiú

(Cód-AC)

Cúiseanna

(1)

(2)

(3)

Táirge a chuirtear i láthair ina shraith lena mhiondíol, buidéal plaisteach air agus é feistithe le caidéal aeir agus soic (fearas líonta) mar aon le 100 píosa ildaite de bhalúin ildaite atá istigh sa bhuidéal.

An gaireas líonta atá leis, is gaireas é a dearadh le líonadh le huisce agus le huisce a stóráil agus le húsáid chun uisce a phumpáil isteach sna balúin. Nuair atá na balúin líonta le huisce, úsáidtear iad ina bpléascáin uisce ar mhaithe le siamsaíocht amuigh faoin aer do leanaí agus do dhaoine fásta.

(Féach íomhá) (*1)

9503 00 99

Cinntear an t-aicmiú le rialacha ginearálta 1, 3(c) agus 6 maidir le léirmhíniú na hAinmníochta Comhcheangailte agus le foclaíocht na gcód AC 9503 00 agus 9503 00 99 .

Ach an táirge a bhunú ar na saintréithe agus ar na hairíonna oibiachtúla atá ann, is rud é le húsáid ar mhaithe le siamsaíocht na ndaoine nuair atá siad ag fearadh cath uisce ar a chéile le balúin líonta. Tacar le miondíol, sin é atá ann, tacar nach féidir a rá cé acu de na comhpháirteanna is mó tábhacht ó thaobh na mbuntréithe de. An ceannteideal faoina bhfuil sé le haicmiú, is é an ceannteideal deiridh é san ord uimhriúil i measc na gceannteideal a bhfuil cothrom an áirimh ag dul dóibh. Cumhdaítear na balúin faoi cheannteideal 9503 . Dá bhrí sin, an t-aicmiú faoi cheannteideal 8414 nó 8424 , aicmiú de réir an ghairis líonta, sin aicmiú a chuirtear as an áireamh. Dá bhrí sin, is faoi cheannteideal 9503 atá an táirge le haicmiú.

Dá bhrí sin fós, fearacht bréagáin eile, is faoi chód AC 9503 00 99 atá an táirge le haicmiú.

Image 1


(*1)  Níl i gceist leis an íomhá ach rud ar mhaithe le faisnéis.