European flag

Iris Oifigiúil
an Aontais Eorpaigh

GA

Sraith L


2024/2905

19.11.2024

CINNEADH (CBES) 2024/2905 ÓN gCOMHAIRLE

an 18 Samhain 2024

lena gceaptar Ionadaí Speisialta an Aontais Eorpaigh don tSaiheil

TÁ COMHAIRLE AN AONTAIS EORPAIGH,

Ag féachaint don Chonradh ar an Aontas Eorpach, agus go háirithe Airteagal 33 agus Airteagal 31(2) de,

Ag féachaint don togra ó Ardionadaí an Aontais do Ghnóthaí Eachtracha agus don Bheartas Slándála,

De bharr an mhéid seo a leanas:

(1)

An 18 Márta 2013, chomhaontaigh an Chomhairle Ionadaí Speisialta an Aontais Eorpaigh (ISAE) a cheapadh don tSaiheil.

(2)

An 21 Meitheamh 2021, ghlac an Chomhairle Cinneadh (CBES) 2021/1011 (1), lena gceaptar Emanuela Claudia DEL RE mar ISAE don tSaiheil.

(3)

An 26 Iúil 2024, ghlac an Chomhairle Cinneadh (CBES) 2024/2083 (2), lena gcuirtear síneadh le sainordú ISAE don tSaiheil. Rachaidh sainordú ISAE in éag an 30 Samhain 2024.

(4)

Ba cheart ISAE nua don tSaiheil a cheapadh ar feadh tréimhse 21 mhí.

(5)

Cuirfidh ISAE an sainordú chun feidhme i gcomhthéacs staid a d’fhéadfadh dul in olcas, agus a d’fhéadfadh bac a chur ar bhaint amach chuspóirí ghníomhaíocht sheachtrach an Aontais mar a leagtar amach in Airteagal 21 den Chonradh iad,

TAR ÉIS AN CINNEADH SEO A GHLACADH:

Airteagal 1

Ionadaí Speisialta an Aontais Eorpaigh

1.   Leis seo, ceaptar João CRAVINHO mar Ionadaí Speisialta an Aontais Eorpaigh (ISAE) don tSaiheil ón 1 Nollaig 2024 go dtí an 31 Lúnasa 2026. Féadfaidh an Chomhairle a chinneadh go ndéanfaí sainordú ISAE a shíneadh nó a fhoirceannadh níos luaithe, ar bhonn measúnú ón gCoiste Polaitiúil agus Slándála (CPS) agus togra ó Ardionadaí an Aontais do Ghnóthaí Eachtracha agus don Bheartas Slándála.

2.   Chun críocha shainordú ISAE, sainítear gurb é atá sa tSaiheil Buircíne Fasó, Sead, Mailí, an Mháratáin agus an Nígir. Rachaidh ISAE i dteagmháil freisin, de réir mar is iomchuí, le tíortha Imchuach Loch Shead agus le tíortha eile agus le heintitis réigiúnacha nó idirnáisiúnta laistigh agus lasmuigh den tSaiheil, lena n-áirítear an Mhagraib agus Murascaill na Guine agus, go háirithe, leis na tíortha comharsanacha a ndéanann dinimic na Saiheile difear dóibh.

Airteagal 2

Cuspóirí beartais

1.   Ar bhonn cuspóirí beartais Straitéis Chomhtháite an Aontais Eorpaigh sa tSaiheil mar a glacadh iad le conclúidí ón gComhairle an 16 Aibreán 2021 (‘an Straitéis’), agus i bhfianaise an oiriúnaithe ar chur chuige an Aontais mar a pléadh ag an gComhairle Gnóthaí Eachtracha an 11 Nollaig 2023 agus an 19 Feabhra 2024 agus na hoibre ar chur chuige athnuaite i leith réigiún na Saiheile, is é an sainordú a bheidh ag ISAE rannchuidiú go gníomhach agus tosaíocht a thabhairt d’iarrachtaí réigiúnacha agus idirnáisiúnta chun síocháin, slándáil, cobhsaíocht agus forbairt inbhuanaithe bhuan a bhaint amach sa réigiún. Thairis sin, beidh sé d’aidhm ag ISAE feabhas a chur ar cháilíocht, tionchar agus infheictheacht rannpháirteachas ilghnéitheach an Aontais sa tSaiheil. I gcomhréir le treoirlínte na Comhairle, agus le cuspóirí straitéiseacha, leasanna agus luachanna an Aontais, cabhróidh ISAE leis an Ardionadaí cur chuige athnuaite de chuid an Aontais maidir leis an tSaiheil a shainiú.

2.   Rannchuideoidh ISAE le hiarrachtaí an Aontais sa réigiún a fhorbairt agus a chur chun feidhme ar bhealach comhtháite, lena n-áirítear i réimsí na polaitíochta, na slándála agus na forbartha, agus leis na hionstraimí agus na geallsealbhóirí ábhartha uile do ghníomhaíochtaí an Aontais a chomhordú. Rannchuideoidh ISAE le hiarrachtaí rannpháirtíochta agus comhordúcháin an Aontais a dhoimhniú le sásraí náisiúnta, réigiúnacha agus idirnáisiúnta.

3.   Gníomhóidh ISAE i ndlúthchomhar agus i ndlúthchomhardú leis an tSeirbhís Eorpach Gníomhaíochta Seachtraí (SEGS), le toscaireachtaí de chuid an Aontais, leis an gCoimisiún, leis na Ballstáit agus le páirtithe leasmhara ábhartha eile, go háirithe na Náisiúin Aontaithe (NA) agus eagraíochtaí Afracacha, go sonrach an tAontas Afracach (AA) agus Comhphobal Eacnamaíoch Stáit na hAfraice Thiar (ECOWAS).

Airteagal 3

Sainordú

1.   Chun cuspóirí beartais an Aontais a bhaint amach, is é an méid seo a leanas a bheidh mar shainordú ag ISAE:

(a)

rannchuidiú go gníomhach le cur chun feidhme na Straitéise agus leis an obair ar chur chuige athnuaite i leith réigiún na Saiheile de réir mar is iomchuí, agus cur chuige comhtháite an Aontais sa réigiún a chomhordú agus a fhorbairt a thuilleadh, d’fhonn feabhas a chur ar chomhleanúnachas agus éifeachtacht fhoriomlán ghníomhaíochtaí an Aontais sa tSaiheil chomh maith le tacú le cumarsáid straitéiseach éifeachtach;

(b)

teagmháil a dhéanamh, lena n-áirítear trí thaidhleoireacht tointeála, chomh maith le comhaontuithe síochána, agus le tionscnaimh idirghabhála idirnáisiúnta agus réitigh coinbhleachta, leis na páirtithe leasmhara ábhartha uile sa réigiún lena n-áirítear rialtais, eagraíochtaí réigiúnacha agus idirnáisiúnta, an t-aos óg, an tsochaí shibhialta agus an diaspóra, agus le tíortha na Magraibe, na hAfraice Thiar agus Imchuach Loch Shead, d’fhonn cuspóirí agus leasanna an Aontais a chur chun cinn agus cur le tuiscint níos fearr agus le híomhá dhearfach ar ról an Aontais sa tSaiheil agus ina comharsanacht;

(c)

ionadaíocht a dhéanamh ar leasanna agus infheictheacht an Aontais i bhfóraim ábhartha réigiúnacha agus idirnáisiúnta agus in aon phróisis eile atá ábhartha do chobhsaíocht an réigiúin agus na leasanna agus an infheictheacht sin a chur chun cinn;

(d)

gníomhaíocht iomlán comhordaithe agus comhtháite an Aontais sa réigiún a éascú agus leas á bhaint as na hionstraimí ábhartha uile, lena n-áirítear comhar um fhorbairt, an tSaoráid Eorpach Síochána, agus gníomhaíochtaí na mBallstát agus tacaíocht an Aontais do bhainistiú géarchéime agus do chosc coinbhleachtaí trí ghníomhaíochtaí chomhbheartas slándála agus cosanta (CBSC) an Aontais agus trí iarrachtaí cobhsaíochta réigiúnacha agus náisiúnta, lena n-áirítear iad siúd a bhaineann le hathchóiriú agus dí-armáil na hearnála slándála, díshlógadh agus ath-imeascadh iarchomhraiceoirí, agus oidhreacht chultúrtha le linn coinbhleachta agus géarchéime;

(e)

dlúthchomhar a choinneáil leis na Náisiúin Aontaithe, go háirithe Ionadaí Speisialta Ardrúnaí na hAfraice Thiar agus na Saiheile, an Comhordaitheoir Speisialta um Fhorbairt sa tSaiheil, an tAontas Afracach, ECOWAS, agus páirtithe leasmhara tábhachtacha náisiúnta, réigiúnacha agus idirnáisiúnta eile, lena n-áirítear Toscairí Speisialta eile don tSaiheil;

(f)

súil ghéar a choinneáil, anailís agus tuairisciú a dhéanamh ar an tionchar a bhíonn ag bunchúiseanna na héagobhsaíochta agus ag treochtaí fadtéarmacha sa réigiún, lena n-áirítear an t-athrú aeráide, cailliúint na bithéagsúlachta, tréadachas, neamhshlándáil bia, rochtain ar acmhainní nádúrtha, go háirithe acmhainní talún agus uisce, chomh maith le bainistiú inbhuanaithe acmhainní nádúrtha a threisíonn cobhsaíocht, agus comhar maidir leo, a chur chun cinn, agus tacú leis na hiarrachtaí leathadh na héagobhsaíochta a theorannú, trí aird ar leith a thabhairt ar na réigiúin is leochailí;

(g)

súil ghéar a choinneáil ar ghnéithe réigiúnacha agus trasteorann na ndúshlán atá os comhair an réigiúin, lena n-áirítear paindéimí, sceimhlitheoireacht, radacú, antoisceachas foréigneach, coireacht eagraithe, foréigean idirphobail, bagairtí hibrideacha agus cibearbhagairtí, smuigleáil arm, gáinneáil ar dhaoine agus smuigleáil daoine, gáinneáil ar dhrugaí, slándáil mhuirí, sreabha dídeanaithe agus imirce agus sreabha airgeadais aindleathacha gaolmhara;

(h)

súil ghéar a choinneáil ar na hiarmhairtí daonnúla, polaitiúla, slándála agus forbartha a bhaineann le sreabha móra dídeanaithe agus imirce, lena n-áirítear daoine easáitithe ina dtír féin, agus, de réir mar is iomchuí, dul i mbun idirphlé leis na húdaráis agus na páirtithe leasmhara ábhartha maidir leis an imirce agus rannchuidiú ar bhonn níos ginearálta le beartas an Aontais maidir leis an imirce agus dídeanaithe i ndáil leis an réigiún, i gcomhréir le cuspóirí, leasanna agus luachanna an Aontais chun comhar tairbheach a chur chun cinn i réimsí na himirce le cur chuige an bhealaigh iomláin cuimsitheach;

(i)

i ndlúthchomhar le SEGS. le Comhordaitheoir Frithsceimhlitheoireachta an Aontais agus leis an gCoimisiún, rannchuidiú le cur chun feidhme na gconclúidí ábhartha ón gComhairle maidir leis an sceimhlitheoireacht agus an t-antoisceachas foréigneach a chosc agus a chomhrac, teagmhálacha polaitiúla ardleibhéil rialta a choinneáil leis na tíortha a ndéanann an sceimhlitheoireacht agus an choireacht eagraithe idirnáisiúnta difear dóibh agus ról lárnach an Aontais a áirithiú sna hiarrachtaí an sceimhlitheoireacht, an t-antoisceachas foréigneach agus an choireacht eagraithe idirnáisiúnta a chomhrac;

(j)

súil ghéar a choinneáil ar iarmhairtí polaitiúla, slándála agus forbartha na ngéarchéimeanna daonnúla sa réigiún, agus an nasc idir an tsíocháin, an chabhair dhaonnúil agus an fhorbairt á chur san áireamh agus réitigh réigiúnacha fhadtéarmacha ar ghéarchéimeanna agus ar choinbhleachtaí á gcur chun cinn;

(k)

rannchuidiú, i gcomhar le ISAE um Chearta an Duine, le cur chun feidhme bheartas an Aontais um chearta an duine sa réigiún, i gcomhréir le Plean Gníomhaíochta an Aontais maidir le Cearta an Duine agus leis an Daonlathas, le Treoirlínte an Aontais maidir le Cearta an Duine, go háirithe Treoirlínte an Aontais maidir le Leanaí agus Coinbhleacht Armtha, chomh maith leis an bhforéigean in aghaidh na mban agus na gcailíní, agus gach cineál idirdhealaithe ina n-aghaidh a chomhrac, agus beartas an Aontais maidir le Mná, an tSíocháin agus an tSlándáil i gcomhréir le Plean Gníomhaíochta 2019–2024 an Aontais maidir le Mná, an tSíocháin agus an tSlándáil, cuimsitheacht agus comhionannas inscne a chur chun cinn i bpróiseas tógála an Stáit, i gcomhréir le Rún 1325 (2000) ó Chomhairle Slándála na Náisiún Aontaithe agus Rúin ó Chomhairle Slándála na Náisiún Aontaithe a rinneadh ina dhiaidh sin maidir le Mná, an tSíocháin agus an tSlándáil, lena n-áirítear Rún 2242 (2015) ó Chomhairle Slándála na Náisiún Aontaithe, agus tacú le cur chun feidhme Rún 2250 (2015) ó Chomhairle Slándála na Náisiún Aontaithe maidir leis an óige, an tsíocháin agus an tslándáil;

(l)

leanúint d’aird a thabhairt ar earnáil an cheartais ina hiomláine, agus ar shásraí cuntasachta is féidir a úsáid chun an tsaoirse ó phionós a chomhrac, lena n-áirítear moltaí a cheapadh agus teagmháil rialta a dhéanamh leis na húdaráis ábhartha sa réigiún, le hOifig Ionchúisitheoir na Cúirte Coiriúla Idirnáisiúnta agus le hOifig an Ard-Choimisinéara um Chearta an Duine, agus dul i mbun plé le cosantóirí chearta an duine agus le breathnóirí sa réigiún;

(m)

eolas an Aontais ar ionchais áitiúla agus ar chomhthéacsanna áitiúla a dhoimhniú trí theagmháil rialta a dhéanamh sa réigiún, lena n-áirítear le gníomhaithe áitiúla. Bunaithe ar anailís chríochnúil, leanúnach ar an staid, próiseas machnaimh a éascú agus rannchuidiú le freagairt luath, oiriúnú agus fís straitéiseach fhadtéarmach an Aontais sa tSaiheil.

2.   Chun sainordú ISAE a chomhlíonadh, déanfaidh ISAE inter alia na nithe seo a leanas:

(a)

comhairle a thabhairt agus tuairisciú a dhéanamh ar cheapadh na seasamh ón Aontas i bhfóraim réigiúnacha agus idirnáisiúnta, de réir mar is iomchuí, chun teagmháil agus gníomhaíochtaí taidhleoireachta lena neartaítear cur chuige cuimsitheach an Aontais i leith na Saiheile a chur chun cinn go réamhghníomhach;

(b)

rannchuidiú le forléargas a choinneáil ar ghníomhaíochtaí uile an Aontais agus comhoibriú go dlúth le toscaireachtaí ábhartha an Aontais agus leis na Ballstáit.

Airteagal 4

An sainordú a chur chun feidhme

1.   Beidh ISAE freagrach as an sainordú a chur chun feidhme, ag gníomhú dó nó di faoi údarás an Ardionadaí.

2.   Coinneoidh an Coiste Polaitiúil agus Slándála nasc pribhléideach le ISAE agus is é a bheidh ina phríomhphointe teagmhála ISAE leis an gComhairle. Cuirfidh an Coiste Polaitiúil agus Slándála treoir straitéiseach agus stiúradh polaitiúil ar fáil do ISAE faoi chuimsiú an tsainordaithe, gan dochar do chumhachtaí an Ardionadaí.

3.   Comhoibreoidh ISEA leis an tSeirbhís Eorpach Gníomhaíochta Seachtraí (SEGS) agus lena ranna ábhartha, agus oibreoidh sé i ndlúthchomhar leo.

Airteagal 5

Maoiniú

1.   Is é EUR 2 984 189,62 a bheidh sa mhéid tagartha airgeadais a bheartaítear chun an caiteachas a bhaineann le sainordú ISAE sa tréimhse ón 1 Nollaig 2024 go dtí an 31 Lúnasa 2026 a chumhdach.

2.   Bainisteofar an caiteachas i gcomhréir leis na nósanna imeachta agus na rialacha is infheidhme maidir le buiséad ginearálta an Aontais.

3.   Beidh bainistiú an chaiteachais faoi réir conradh idir ISAE agus an Coimisiún. Is don Choimisiún a bheidh ISAE cuntasach as gach caiteachas.

Airteagal 6

Tiomsú agus comhdhéanamh na foirne

1.   Laistigh de theorainneacha shainordú ISAE agus de na hacmhainní airgeadais comhfhreagracha a chuirfear ar fáil, beidh ISAE freagrach as foireann a chur le chéile. Áireofar san fhoireann an saineolas maidir le saincheisteanna beartais de réir mar a cheanglaítear leis an sainordú. Coinneoidh ISAE an Chomhairle agus an Coimisiún ar an eolas go pras faoi chomhdhéanamh na foirne.

2.   Féadfaidh na Ballstáit, institiúidí de chuid an Aontais agus SEGS a mholadh go mbeadh foireann ar iasacht ag obair le ISAE. Is iad an Ballstát, an institiúid de chuid an Aontais lena mbaineann nó SEGS, faoi seach, a chumhdóidh tuarastal an phearsanra sin atá ar iasacht. Féadfar saineolaithe atá ar iasacht ó na Ballstáit chuig institiúidí de chuid an Aontais nó chuig SEGS a phostú chun oibriú le ISAE freisin. Beidh náisiúntacht Bhallstáit ag baill foirne idirnáisiúnta ar conradh.

3.   Is faoi údarás riaracháin an Bhallstáit seolta, institiúid seolta an Aontais nó SEGS a fhanfaidh an pearsanra uile ar iasacht agus comhlíonfaidh siad a ndualgais agus feidhmeoidh siad chun leas shainordú ISAE.

4.   Comhlonnófar foireann ISAE le roinn ábhartha SEGS, le toscaireachtaí an Aontais chun comhleanúnachas agus comhsheasmhacht a ngníomhaíochtaí faoi seach a áirithiú.

Airteagal 7

Pribhléidí agus díolúintí ISAE agus fhoireann ISAE

Déanfar na pribhléidí, na díolúintí agus na ráthaíochtaí breise is gá le haghaidh chomhlánú agus dhea-fheidhmiú mhisean ISAE chomh maith le baill foirne ISAE a chomhaontú leis na tíortha óstacha, de réir mar is iomchuí. Deonóidh na Ballstáit agus SEGS gach tacaíocht is gá chun na críche sin.

Airteagal 8

Slándáil fhaisnéis rúnaicmithe an Aontais

Urramóidh ISAE agus baill fhoireann ISAE na prionsabail slándála agus na híoschaighdeáin arna mbunú le Cinneadh 2013/488/AE ón gComhairle (3).

Airteagal 9

Rochtain ar fhaisnéis agus ar thacaíocht lóistíochta

1.   Áiritheoidh na Ballstáit, an Coimisiún, SEGS agus Ardrúnaíocht na Comhairle go dtabharfar rochtain do ISAE ar aon fhaisnéis ábhartha.

2.   Cuirfidh toscaireachtaí an Aontais sa réigiún agus na Ballstáit, de réir mar is iomchuí, tacaíocht lóistíochta ar fáil sa réigiún.

Airteagal 10

Slándáil

I gcomhréir le beartas an Aontais maidir le slándáil an phearsanra a imscartar lasmuigh den Aontas i gcáil oibríochtúil faoi Theideal V den Chonradh, déanfaidh ISAE gach beart is féidir le réasún, i gcomhréir le sainordú ISAE agus le staid na slándála i réimse na freagrachta, i ndáil le slándáil an phearsanra uile atá faoi údarás díreach ISAE, go háirithe tríd an méid seo a leanas a dhéanamh:

(a)

plean slándála sonrach a bhunú a bheidh bunaithe ar threoir ó SEGS, lena n-áirítear bearta slándála sonracha fisiciúla, eagraíochtúla agus nós imeachta, lena rialaítear bainistiú ar ghluaiseacht shlán pearsanra chuig an réimse freagrachta agus laistigh de, chomh maith le bainistiú teagmhas slándála, agus lena n-áirítear plean teagmhais agus plean aslonnaithe;

(b)

a áirithiú go gcumhdófar an pearsanra uile a imscartar lasmuigh den Aontas le hárachas ardriosca mar a cheanglaítear leis na coinníollacha i réimse na freagrachta;

(c)

a áirithiú go mbeidh oiliúint slándála iomchuí faighte ag foireann ISAE a bheidh le himscaradh lasmuigh den Aontas, lena n-áirítear pearsanra a bheidh ar conradh go háitiúil, roimh theacht i réimse na freagrachta nó ar theacht isteach sa réimse sin dóibh, bunaithe ar na rátálacha riosca arna sannadh ag SEGS don réimse sin;

(d)

a áirithiú go ndéanfar na moltaí comhaontaithe uile, a dhéantar tar éis measúnuithe rialta slándála, a chur chun feidhme agus tuarascálacha i scríbhinn a chur ar fáil don Ardionadaí, don Chomhairle agus don Choimisiún maidir lena gcur chun feidhme agus maidir le saincheisteanna slándála eile faoi chuimsiú na dtuarascálacha rialta ar an dul chun cinn agus na tuarascála cuimsithí críochnaithí ar chur chun feidhme an tsainordaithe.

Airteagal 11

Tuairisciú

Cuirfidh ISAE tuarascálacha i scríbhinn agus ó bhéal ar fáil go tráthrialta don Ardionadaí agus don Choiste Polaitiúil agus Slándála. Tuairisceoidh ISAE do mheithleacha de chuid na Comhairle freisin de réir mar is gá. Scaipfear tuarascálacha rialta trí líonra COREU. Féadfaidh ISAE tuarascálacha a chur ar fáil don Chomhairle Gnóthaí Eachtracha. I gcomhréir le hAirteagal 36 den Chonradh, féadfaidh ISAE a bheith rannpháirteach i bhfaisnéis a chur ar fáil do Pharlaimint na hEorpa.

Airteagal 12

Comhordú

1.   Faoi chuimsiú na Straitéise, agus i bhfianaise an oiriúnaithe agus na hoibre ar chur chuige athnuaite i leith réigiún na Saiheile, rannchuideoidh ISAE le haontacht, comhsheasmhacht agus éifeachtacht ghníomhaíocht an Aontais agus cuideoidh sé nó sí lena áirithiú go ndéanfar ionstraimí uile an Aontais agus gníomhaíochtaí uile na mBallstát a shaothrú go comhsheasmhach chun cuspóirí beartais an Aontais a bhaint amach. Iarrfar idirchaidreamh leis na Ballstáit ar bhonn rialta. Maidir le ról tionólta ISAE ó thaobh Toscairí Speisialta na mBallstát don tSaiheil a thabhairt le chéile agus, ar bhonn níos leithne, in éineacht le páirtithe leasmhara ábhartha eile, leanfaidh an ról sin de bheith tábhachtach. Déanfar gníomhaíochtaí ISAE a chomhordú le gníomhaíochtaí de chuid thoscaireachtaí SEGS, an Aontais agus de chuid an Choimisiúin, chomh maith le gníomhaíochtaí ISAEnna eile atá gníomhach sa réigiún. Cuirfidh ISAE seisiúin faisnéise thráthrialta ar fáil do SEGS, do thoscaireachtaí an Aontais agus do mhisin na mBallstát sa réigiún.

2.   Ar an láthair, coinneofar dlúthchaidreamh le Cinn mhisin ábhartha na mBallstát, le Cinn thoscaireachtaí ábhartha an Aontais agus le Cinn mhisean CSC. Déanfaidh siad gach iarracht cúnamh a thabhairt do ISAE agus an sainordú á chur chun feidhme acu. Cuirfidh ISAE, i ndlúthchomhar leis na toscaireachtaí ábhartha de chuid an Aontais, treoir pholaitiúil áitiúil ar fáil do Cheann Misin EUCAP Sahel Mali. Rachaidh ISAE agus Ceannasaí Oibríochtaí Sibhialtacha i gcomhairle le chéile de réir mar is gá. Déanfaidh ISAE idirchaidreamh freisin le gníomhaithe idirnáisiúnta agus réigiúnacha eile ar an láthair.

Airteagal 13

Cúnamh i ndáil le héilimh

Tabharfaidh ISAE agus foireann ISAE cúnamh maidir le heilimintí a chur ar fáil chun freagairt ar aon éilimh agus oibleagáidí a eascraíonn as sainorduithe ISAEnna a bhí ann roimhe seo don tSaiheil agus cuirfidh siad cúnamh riaracháin agus rochtain ar na comhaid ábhartha ar fáil chun na gcríoch sin.

Airteagal 14

Athbhreithniú

Déanfar athbhreithniú rialta ar chur chun feidhme an Chinnidh seo agus ar a chomhsheasmhacht le rannchuidithe eile ón Aontas leis an réigiún. Cuirfidh ISAE tuarascálacha tráthrialta maidir le dul chun cinn faoi bhráid an Ardionadaí, na Comhairle agus an Choimisiúin, mar aon le tuarascáil chuimsitheach chríochnaitheach ar chur chun feidhme an tsainordaithe faoin 31 Bealtaine 2026.

Airteagal 15

Teacht i bhfeidhm

Tiocfaidh an Cinneadh seo i bhfeidhm an 1 Nollaig 2024.

Arna dhéanamh sa Bhruiséil, an 18 Samhain 2024.

Thar ceann na Comhairle

An tUachtarán

J. BORRELL FONTELLES


(1)  Cinneadh (CBES) 2021/1011 ón gComhairle an 21 Meitheamh 2021 lena gceaptar Ionadaí Speisialta an Aontais Eorpaigh don tSaiheil (IO L 222, 22.6.2021, lch. 21).

(2)  Cinneadh (CBES) 2024/2083 ón gComhairle an 26 Iúil 2024 lena gcuirtear síneadh le sainordú Ionadaí Speisialta an Aontais Eorpaigh don tSaiheil agus lena leasaítear Cinneadh (CBES) 2021/1011 (IO L, 2024/2083, 29.7.2024, ELI: http://data.europa.eu/eli/dec/2024/2083/oj).

(3)  Cinneadh 2013/488/AE ón gComhairle an 23 Meán Fómhair 2013 maidir leis na rialacha slándála chun faisnéis rúnaicmithe AE a chosaint (IO L 274, 15.10.2013, lch. 1).


ELI: http://data.europa.eu/eli/dec/2024/2905/oj

ISSN 1977-0839 (electronic edition)