(1)

Le Treoir 2011/65/AE, ceanglaítear ar na Ballstáit a áirithiú nach mbeidh na substaintí guaiseacha a liostaítear in Iarscríbhinn II a ghabhann leis an Treoir sin i dtrealamh leictreach agus leictreonach a chuirtear ar an margadh. Níl feidhm ag an srian sin maidir le feidhmeanna díolmhaithe áirithe a liostaítear in Iarscríbhinn III a ghabhann leis an Treoir sin.

(2)

Liostaítear catagóirí an trealaimh leictrigh agus leictreonaigh a bhfuil feidhm ag Treoir 2011/65/AE ina leith in Iarscríbhinn I a ghabhann leis an Treoir sin.

(3)

Is substaint é mearcair a bhfuil srian air agus a liostaítear in Iarscríbhinn II a ghabhann le Treoir 2011/65/AE.

(4)

Le Cinneadh 2010/571/AE (2), dheonaigh an Coimisiún, i measc nithe eile, díolúine chun mearcair a úsáid i lampaí líneacha fluaraiseacha eile chun críoch soilsithe ghinearálta eile agus chun críoch speisialta eile (e.g. lampaí ionduchtúcháin) (“an díolúine”), a liostaítear anois mar dhíolúine 2(b)(4) in Iarscríbhinn III a ghabhann le Treoir 2011/65/AE. Bhí an díolúine le dul in éag an 21 Iúil 2016, i gcomhréir hAirteagal 5(2), an dara fomhír, pointe (a), den Treoir sin.

(5)

Cumhdaítear leis an díolúine grúpaí lampaí neamh-aonchineálacha a bhfuil cruthanna, teicneolaíochtaí, feidhmeanna agus cuspóirí difriúla acu. Úsáidtear mearcair san fheadán díluchtúcháin, rud atá fíor-riachtanach chun fuinneamh leictreach a thiontú ina sholas.

(6)

An 15 Eanáir 2015, fuair an Coimisiún iarratas ar athnuachan na díolúine (“an t-iarratas ar athnuachan”), atá laistigh den teorainn ama a leagtar síos in Airteagal 5(5) de Threoir 2011/65/AE, a nuashonraíodh an 20 Eanáir 2020 le hiarratas athnuaite breise. I gcomhréir le hAirteagal 5(5) den Treoir sin, beidh an díolúine bailí go dtí go ndéanfar cinneadh maidir leis an iarratas ar athnuachan.

(7)

Is é conclúid na meastóireachta ar an iarratas ar athnuachan, inar cuireadh san áireamh infhaighteacht na n-ionadach agus tionchar socheacnamaíoch an ionadaithe, go bhfuil ionadú nó díothú mearcair sna feidhmeanna lena mbaineann dodhéanta go teicniúil faoi láthair. Mar chuid den mheastóireacht sin, rinneadh comhairliúcháin le páirtithe leasmhara i gcomhréir le hAirteagal 5(7) de Threoir 2011/65/AE. Cuireadh na tuairimí a fuarthas le linn na gcomhairliúchán sin ar fáil go poiblí ar shuíomh gréasáin tiomnaithe.

(8)

Tá an díolúine i gcomhréir le Rialachán (CE) Uimh. 1907/2006 ó Pharlaimint na hEorpa agus ón gComhairle (3), agus ar an gcaoi sin ní lagaítear an chosaint don chomhshaol agus don tsláinte a thugtar léi.

(9)

Dá bhrí sin, is iomchuí an athnuachan ar an díolúine a dheonú, agus an aidhm ghinearálta á cur san áireamh gur cheart díolúintí ón srianadh le haghaidh ábhair shonracha áirithe nó comhpháirteanna sonracha áirithe a theorannú ina raon feidhme agus ina bhfad, chun deireadh a chur de réir a chéile le shubstaintí guaiseacha in TLL.

(10)

Chun go mbeifear in ann athmheasúnú tráthúil a dhéanamh ar infhaighteacht lampaí athsholáthair atá saor ó mhearcair le haghaidh an réimse leathain cineálacha lampa a chumhdaítear leis an díolúine seo, is iomchuí an athnuachan ar an díolúine a dheonú ar feadh tréimhse theoranta 3 bliana. I gcás catagóirí sonracha lampa, eadhon lampaí a astaíonn solas atá sa speictream dofheicthe (fo-iontráil nua 2(b)(4)-II d’Iarscríbhinn III) agus lampaí éigeandála (fo-iontráil nua 2(b)(4)-III d’Iarscríbhinn III), tá faisnéis leordhóthanach ann go bhfuil ionadú dodhéanta go teicniúil sna blianta atá romhainn agus i gcás na gcatagóirí sin lampaí, ba cheart údar cuí a bheith le tréimhse bhailíochta 5 bliana, i gcomhréir le hAirteagal 5(2), an chéad fhomhír, de Threoir 2011/65/AE. I bhfianaise thorthaí na n-iarrachtaí leanúnacha chun teacht ar ionadú iontaofa, ní dócha go mbeidh drochthionchair ag fad na díolúine ar an nuálaíocht.

(11)

Ba cheart, dá bhrí sin, Treoir 2011/65/AE a leasú dá réir sin,