(1)

Ir-Regolament tal-Kummissjoni (UE) Nru 10/2011 (2) jistabbilixxi regoli speċifiċi dwar materjali u oġġetti tal-plastik maħsuba biex jiġu f’kuntatt mal-ikel. B’mod partikolari, l-Anness I ta’ dak ir-Regolament jistabbilixxi lista tal-Unjoni ta’ sustanzi awtorizzati li jistgħu jintużaw intenzjonalment fil-manifattura ta’ materjali u oġġetti tal-plastik maħsuba biex jiġu f’kuntatt mal-ikel.

(2)

Fis-6 ta’ Marzu 2024, l-Awtorità Ewropea dwar is-Sigurtà fl-Ikel (“l-Awtorità”) adottat opinjoni xjentifika (3) dwar l-użu tas-sustanza ester trifeniliku tal-aċidu fosforuż, polimerizzat bl-esteri alkiliċi C10–16 tal-1,4-ċikloeżandimetanol u tal-polipropilenglikol. L-Awtorità kkonkludiet li s-sustanza mhijiex ta’ tħassib għas-sikurezza tal-konsumaturi jekk tintuża bħala addittiv f’livelli ta’ mhux iktar minn 0,15 % w/w fil-materjali u l-oġġetti poliolefiniċi maħsuba biex jiġu f’kuntatt mat-tipi kollha tal-ikel ħlief għall-formula tat-trabi u għall-ħalib tal-bniedem, għall-ħżin fit-tul f’temperatura ambjentali jew inqas, inkluż il-mili sħun u/jew it-tisħin f’mhux iktar minn 100 °C għal mhux iktar minn sagħtejn, jekk il-migrazzjoni tat-total tal-ispeċijiet ta’ fosfiti u fosfati ma taqbiżx il-5 mg/kg ta’ ikel, u jekk il-frazzjoni b’piż molekulari baxx (LMWF, low molecular weight fraction) (< 1 000 Da) tagħha ma tkunx ogħla minn 13 % w/w. L-Awtorità indikat ukoll li japplika l-fattur tat-tnaqqis tax-xaħam.

(3)

Għalhekk jixraq li tiġi awtorizzata s-sustanza ester trifeniliku tal-aċidu fosforuż, polimerizzat bl-esteri alkiliċi C10–16 tal-1,4-ċikloeżandimetanol u tal-polipropilenglikol (Nru CAS 1821217-71-3, Nru FCM 1084), kif xieraq.

(4)

Fit-13 ta’ Marzu 2024, l-Awtorità adottat opinjoni xjentifika (4) dwar l-użu tas-sustanza tert-butilfosfonat tal-kalċju. L-Awtorità kkonkludiet li s-sustanza mhijiex ta’ tħassib għas-sikurezza tal-konsumaturi jekk tintuża bħala aġent nukleanti f’livelli ta’ mhux iktar minn 0,15 % w/w f’materjali u oġġetti poliolefiniċi maħsuba biex jiġu f’kuntatt mat-tipi kollha tal-ikel għall-ħżin għal aktar minn sitt xhur f’temperatura ambjentali u inqas, inkluż f’temperaturi sa 100 °C għal massimu ta’ sagħtejn u sa 130 °C għal durati qosra, ħlief għall-formula tat-trabi u għall-ħalib tal-bniedem.

(5)

Għalhekk jixraq li s-sustanza tert-butilfosfonat tal-kalċju (Nru CAS 81607-35-4, Nru FCM 1089) tiġi awtorizzata kif xieraq.

(6)

Fis-16 ta’ April 2024, l-Awtorità adottat opinjoni xjentifika (5) dwar l-użu tas-sustanza ammini, di-C14-C20-alkilati, ossidizzati, miż-żejt veġetali idroġenat. L-Awtorità kkonkludiet li s-sustanza mhijiex ta’ tħassib għas-sikurezza tal-konsumatur jekk tintuża bħala addittiv fil-livell ta’ 0,1 % w/w fil-manifattura ta’ materjali poliolefiniċi li jiġu f’kuntatt mal-ikel maħsuba biex jiġu f’kuntatt mal-ikel simulat mis-simulanti tal-ikel A, B, C u E, ħlief għall-formula tat-trabi u għall-ħalib tal-bniedem, għall-ħżin għal aktar minn sitt xhur f’temperatura ambjentali u inqas, inklużi kundizzjonijiet ta’ mili sħun u tisħin sa 100 °C għal sagħtejn.

(7)

Għalhekk jixraq li s-sustanza ammini, di-C14-C20-alkilati, ossidizzati, miż-żejt veġetali idroġenat (Nru CAS 1801863-42-2, Nru FCM 1092) tiġi awtorizzata kif xieraq.

(8)

Fl-opinjoni tagħha dwar is-sustanza ammini, di-C14-C20-alkilati, ossidizzati, miż-żejt veġetali idroġenat, l-Awtorità pproponiet li s-sustanza amines, bis(hydrogenated tallow alkyl) ossidizzat, tingħata isem ieħor billi tiġi inkluża l-preċiżjoni “di-C14-C20-alkilati”. Din il-bidla fl-isem ġiet issuġġerita peress li din is-sustanza fiha l-ktajjen alkiliċi C14- u C20-. Barra minn hekk, l-Awtorità rrakkomandat li titneħħa n-nota ta’ verifika tal-konformità fil-kolonna 11 tat-Tabella 1 tal-Anness I għal din is-sustanza, peress li ma jeżisti l-ebda valur speċifiku tas-sustanza biex tiġi vverifikata l-konformità tagħha.

(9)

Għalhekk jixraq li l-isem tas-sustanza amines, bis(hydrogenated tallow alkyl) ossidizzat (Nru FCM 768) jinbidel u titneħħa r-referenza għan-nota dwar il-verifika tal-konformità kif xieraq. Barra minn hekk, ir-restrizzjoni għall-użi ta’ din is-sustanza jenħtieġ li ssir konsistenti mad-definizzjoni ta’ “ikel mhux xaħmi” fir-Regolament (UE) Nru 10/2011.

(10)

Fit-3 ta’ Lulju 2024, l-Awtorità adottat opinjoni xjentifika (6) dwar l-użu tas-sustanzi xama’ tan-nuħħala tar-ross, ossidizzata, u xama’ tan-nuħħala tar-ross, ossidizzata, melħ tal-kalċju. L-Awtorità kkonkludiet li dawn iż-żewġ sustanzi mhumiex ta’ tħassib għas-sikurezza tal-konsumaturi jekk jintużaw bħala addittivi f’livelli ta’ mhux iktar minn 0,3 % w/w fil-materjali u l-oġġetti tal-polietilentereftalat (PET), tal-aċidu polilattiku (PLA) u tal-klorur tal-polivinil (PVC) riġidu maħsuba biex jiġu f’kuntatt mat-tipi kollha tal-ikel ħlief għall-ikel xaħmi, għall-ħżin fit-tul f’temperatura ambjentali u inqas, inkluż il-mili sħun u/jew it-tisħin sa 100 °C għal mhux iktar minn sagħtejn.

(11)

Għalhekk jixraq li jiġu awtorizzati s-sustanzi xama’ tan-nuħħala tar-ross, ossidizzata (Nru CAS 1883583-80-9, Nru FCM 1093), u xama’ tan-nuħħala tar-ross, ossidizzata, melħ tal-kalċju (Nru CAS 1850357-57-1, Nru FCM 1096) kif xieraq.

(12)

Fis-6 ta’ Novembru 2024, l-Awtorità adottat opinjoni xjentifika (7) dwar l-użu tas-sustanza 2,2′-ossidietilammina. L-Awtorità kkonkludiet li s-sustanza mhijiex ta’ tħassib għas-sikurezza tal-konsumaturi fi kwalunkwe kundizzjoni ta’ ħin jew temperatura jekk tintuża bħala komonomeru f’livelli ta’ mhux iktar minn 14 % w/w mal-aċidu adipiku u l-kaprolattam, jew mal-omologi ta’ dawk iż-żewġ sustanzi li għandhom ktajjen C itwal, għall-manifattura ta’ films tal-poliammid bi ħxuna ta’ mhux iktar minn 25 μm, dment li l-migrazzjoni tas-sustanza ma taqbiżx iż-0,05 mg/kg ta’ ikel, li l-films finali ma jiġux f’kuntatt mal-formula tat-trabi u mal-ħalib tal-bniedem, li l-migrazzjoni tal-oligomeri b’piż molekulari ta’ inqas minn 1 000 Da li fihom is-sustanza ma taqbiżx il-5 mg/kg ta’ ikel u li, fejn l-omologi tal-aċidu adipiku u l-kaprolattam jintużaw bħala sustanzi tal-bidu, jintużaw biss l-omologi awtorizzati f’konformità mar-Regolament (UE) Nru 10/2011.

(13)

Għalhekk jixraq li s-sustanza 2,2′-ossidietilammina (numru CAS 2752-17-2, Nru FCM 1094) tiġi awtorizzata kif xieraq.

(14)

Fil-valutazzjoni tagħha tas-sustanza 2,2′-ossidietilammina, l-Awtorità qieset ukoll id-data disponibbli dwar il-migrazzjoni u l-instabbiltà tas-sustanza f’10 % etanol (simulant A) fil-kundizzjonijiet applikati tat-test tal-migrazzjoni, u rrakkomandat l-użu tal-ilma bħala s-simulant biex tiġi ttestjata l-konformità mal-limitu tal-migrazzjoni. Minħabba s-solubbiltà għolja tas-sustanza fl-ilma u l-possibbiltà għall-ittestjar f’temperatura ta’ 60 °C minflok f’40 °C, l-Awtorità ddeterminat li l-kuntatt mal-ilma kien jirrappreżenta l-agħar xenarju possibbli għall-migrazzjoni tat-2,2’-ossidietilammina u rrakkomandat li f’nota dwar il-verifika tal-konformità jiġi indikat li għandu jintuża l-ilma għal skopijiet ta’ verifika tal-konformità minflok is-simulanti tal-ikel.

(15)

Għaldaqstant, ir-Regolament (UE) Nru 10/2011 jenħtieġ li jiġi emendat kif xieraq.

(16)

Il-miżuri previsti f’dan ir-Regolament huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,