ANNESS

Għall-għanijiet a), b) u ċ) elenkati fl-Artikolu 3 tad-Deċiżjoni 574/2007/KE l-linji gwida strateġiċi stabbiliti iktar ’l isfel wieħed għandu jarahom fil-kuntest ta’ l-implimentazzjoni tal-politika Ewropea dwar il-ġestjoni tal-fruntieri esterni (1) kif imfassl fil-Programm ta’ l-Aja (2). Il-linji gwida għandhom partikolarment jimplimentaw il-prijoritajiet tal-Komunità bil-għan ta’ l-istabbiliment gradwali ulterjuri tas-sistema komuni u integrata ta’ ġestjoni tal-fruntieri esterni u t-tisħiħ tal-kontrolli u s-sorveljanza tal-fruntieri esterni ta’ l-Istati Membri.

Għall-iskop d) ta’ l-Artikolu 3 tad-Deċiżjoni Nru 574/2007/KE, il-linji gwida għandhom partikolarment jimplimentaw il-prijoritajiet Komunitarji għall-iżvilupp ulterjuri ta’ politika komuni dwar il-viża bħala, fuq in-naħa l-waħda, parti minn sistema b’ħafna livelli mmirata għat-trattament ta’ l-immigrazzjoni illegali permezz tat-titjib tat-trattament fil-missjonijiet konsulari lokali u, fuq in-naħa l-oħra, l-iffaċilitar ta’ l-ivvjaġġar leġittimu.

L-appoġġ għall-implimentazzjoni ta’ l-Iskema ta’ Tranżitu Speċjali msemmija fl-Artikolu 6 tad-Deċiżjoni Nru 574/2007/KE għandha tiġi stabbilita fil-qafas tal-programm multi-annwali tar-Repubblika tal-Litwanja b’konformità ma’ dawn il-linji gwida.

L-Istati Membri għandhom jiddetterminaw l-iktar tqassim effettiv tar-riżorsi finanzjarji allokati lilhom skond ħtiġijitethom. Madanakollu, waqt it-tħejjija tal-programmi multi-annwali tagħhom għall-2007-2013, l-Istati Membri għandhom jallokaw ir-riżorsi Komunitarji disponibbli taħt dan il-Fond għal mill-inqas tlieta mill-ħames prijoritajiet elenkati hawn taħt.

Il-prijoritajiet speċifiċi elenkati hawn taħt jirreferu għal azzjonijiet nazzjonali li jew iżidu l-valur ta’ strumenti u għodod komuni għall-prattikanti jew jolqtu b’mod dirett il-kapaċità ta’ l-Istati Membri l-oħra jew lill-Komunità fl-intier tagħha sabiex jiżguraw il-fruntieri esterni.

Barra minn hekk, meta jabbozzaw il-programmi multi-annwali tagħhom, l-Istati Membri huma mistiedna jikkunsidraw is-sinerġiji mal-ħidma mwettqa mill-Aġenzija FRONTEX dwar il-kontroll u s-sorveljanza tal-fruntieri esterni.

IL-PRIJORITÀ 1:   Appoġġ għat-twaqqif gradwali ulterjuri tas-sistema komuni u integrata ta’ ġestjoni tal-fruntieri fir-rigward tal-verifiki fuq persuni fil-fruntieri esterni u s-sorveljanza tal-fruntieri esterni.

Dan jista’ jinvolvi investiment fl-infrastruttura, fis-sistemi, u fit-tagħmir fi ħdan il-qafas tar-regoli ta’ eliġibbiltà tal-Fond. Dawn l-investimenti għandhom jimmiraw partikolarment lejn l-iżgurar ta’ konverġenza fil-ġestjoni ta’ l-informazzjoni għall-iffaċilitar tat-teħid tad-deċiżjonijiet u l-iskambju ta’ informazzjoni bejn l-Istati Membri, kif ukoll għat-titjib ta’ l-arkitettura u tal-proċessi għat-titjib ulterjuri tas-sigurtà fil-fruntieri, inkluża l-proviżjoni ta’ tagħmir li jikxef l-iffalsifikar.

F’din il-prijorità, il-kontribut Komunitarju jista’ jiżdied b’75 % għal proġetti li jindirizzaw il-prijoritajiet speċifiċi li ġejjin:

(1)	L-aġġornar tas-sistemi nazzjonali ta’ komunikazzjoni sabiex jagħmilhom interoperabbli ma’ Stati Membri oħra;

(2)	Ix-xiri u/jew l-aġġornar ta’ tagħmir operattiv għall-kontroll tal-fruntieri esterni li jkun interoperabbli ma’ Stati Membri oħra u li jikkunisdra r-riżultati ta’ analiżi tar-riskju integrata u komuni.

(3)	Ix-xiri u/jew l-aġġornar ta’ tagħmir operattiv għaż-żieda tal-kapaċità ta’ l-Istati Membri sabiex jipparteċipaw u/jew jikkontribwixxu għall-kooperazzjoni operattiva bejn l-Istati Membri kif ikkoordinat mill-Aġenzija FRONTEX.

IL-PRIJORITÀ 2:   Appoġġ għall-iżvilupp u l-implimentazzjoni tal-komponenti nazzjonali ta’ Sistema Ewropea ta’ Sorveljanza għall-fruntieri esterni u ta’ Netwerk Ewropew ta’ Għassa permanenti fil-fruntieri marittimi tan-nofsinhar ta’ l-Istati Membri ta’ l-UE.

Din tista’ tinkludi l-aġġornar ta’ sistemi ta’ sorveljanza sabiex jillokalizzaw u jidentifikaw vetturi, dgħajjes u ajruplani b’mod korrett.

F’din il-prijorità, il-kontribut Komunitarju jista’ jiżdied b’75 % għal proġetti li jindirizzaw il-prijoritajiet speċifiċi li ġejjin:

(1)

Investimenti għall-ħolqien jew l-aġġornar ta’ ċentru nazzjonali ta’ koordinazzjoni uniku, li jikkoordina 24/7 l-attivitajiet ta’ l-awtoritajiet nazzjonali kollha li jwettqu ħidma ta’ kontroll tal-fruntieri esterni (il-kxif, l-identifikar, l-intervent) li jkun jista’ jiskambja informazzjoni maċ-ċentri nazzjonali ta’ koordinazzjoni fi Stati Membri oħra;

(2)	Investimenti fil-ħolqien jew l-aġġornar ta’ sistema nazzjonali ta’ sorveljanza unika, li tkopri l-partijiet kollha, jew partijiet partikolari, tal-fruntieri esterni u li tippermetti 24/7 it-tixrid ta’ informazzjoni bejn l-awtoritajiet involuti fil-kontroll tal-fruntieri esterni;

(3)	Ix-xiri u/jew l-aġġornar ta’ tagħmir għall-kxif, l-identifikar u l-intervent fil-fruntieri (eż. vetturi, dgħajjes, ajruplani, ħelikopters, sensors, u kameras eċċ.), sakemm il-ħtieġa għal dan it-tagħmir tkun identifikata b’mod ċar fuq livell Ewropew.

IL-PRIJORITÀ 3:   Appoġġ għall-ħruġ ta’ viżi u t-trattament ta’ l-immigrazzjoni illegali, inkluż il-kxif ta’ dokumenti foloz jew iffalsifikati permezz tat-tisħiħ ta’ l-attivitajiet organizzati mis-servizzi konsulari jew minn servizzi oħrajn ta’ l-Istati Membri f’pajjiżi terzi.

F’din il-prijorità, il-kontribut Komunitarju jista’ jiżdied b’75 % għal proġetti li jindirizzaw il-prijoritajiet speċifiċi li ġejjin:

(1)	Il-promozzjoni ta’ kooperazzjoni sistematika u regolari bejn is-servizzi konsulari ta’ l-Istati Membri u bejn is-servizzi konsulari u servizzi oħra ta’ Stati Membri differenti fil-qasam tal-viża;

(2)	Inizjattivi għall-iżvilupp u l-ħolqien ta’ rappreżentanza limitata, kolokazzjoni jew ċentri komuni għall-applikazzjoni tal-viża li, fi stadju bikri jilqa’ filwaqt li fi stadju iktar tard, jipproċessa l-applikazzjonijiet tal-viża.

IL-PRIJORITÀ 4:   Appoġġ għall-ħolqien ta’ sistemi ta’ l-IT meħtieġa għall-implimentazzjoni ta’ l-istrumenti Komunitarji legali fil-qasam tal-fruntieri esterni u l-viżi

F’din il-prijorità, il-kontribut Komunitarju jista’ jiżdied b’75 % għal proġetti li jindirizzaw il-prijoritajiet speċifiċi li ġejjin:

(1)	Investimenti marbuta mas-Sistema ta’ Informazzjoni ta’ Schengen (SIS);

(2)	Investimenti marbuta mas-Sistema ta’ Informazzjoni dwar il-Viża (VIS);

IL-PRIJORITÀ 5:   Appoġġ għall-applikazzjoni effettiva u effiċjenti ta’ strumenti legali Komunitarji rilevanti fil-qasam tal-fruntieri esterni u tal-viżi, partikolarment il-Kodiċi tal-Fruntieri ta’ Schengen u l-Kodiċi Ewropew dwar il-Viżi (3)

Dan jista’ jinvolvi t-tixrid ta’ informazzjoni dwar l-istrumenti rilevanti inklużi testi bħal gwida prattika għall-għassiesa tal-fruntieri, kif ukoll attivitajiet ta’ taħriġ immirati għal uffiċjali ta’ servizzi ta’ għassa tal-fruntieri u fil-konsulati.

F’din il-prijorità, il-kontribut Komunitarju jista’ jiżdied b’75 % għal proġetti li jindirizzaw il-prijoritajiet speċifiċi li ġejjin:

(1)	L-implimentazzjoni fuq livell nazzjonali tal-kurrikulu bażiku komuni għat-taħriġ ta’ l-għassiesa tal-fruntieri;

(2)	It-titjib tal-kwalità tal-kontribut nazzjonali fil-mudell ta’ analiżi tar-riskju integrata komuni

---

(1)  Fil-kuntest ta' din id-Deċiżjoni il-ġestjoni tal-fruntieri esterni tirreferi biss għall-kontrolli fuq il-persuni.

(2)  Għall-iktar dokumenti riċenti dwar il-politika Ewropea f'dan il-qasam, ara partikolarment: “Strateġija globali għall-Emigrazzjoni: Azzjonijiet ta' prijorità li jiffokaw fuq l-Afrika u l-Mediterran” adottat mill-Kunsill Ewropew tal-15-16 ta’ Diċembru 2005 (Bull. 12-2005, punti I.6. u I.15-I.20.) u l-Komunikazzjoni dwar it-tisħiħ tal-ġestjoni tal-Fruntieri Marittimi ta' Nofisnhar ta' l-Unjoni Ewropea adottata mill-Kummissjoni fit-30 ta’ Novembru 2006 (COM (2006) 733 finali).

(3)  L-Istruzzjonijiet Konsulari Komuni dwar il-viżi għall-missjonijiet diplomatiċi u l-karigi konsulari ser jiġu ssostitwiti mill-Kodiċi Ewropew dwar il-Viżi ladarba jiġi adottat mill-Kunsill.