‘Airteagal 2

Cuspóirí

Is é seo a leanas cuspóir straitéiseach EUAM Iraq:

1.

tacú le cur chun feidhme na Straitéise Slándála Náisiúnta trí chomhairle agus cúnamh straitéiseach spriocdhírithe a chur ar fáil d’údaráis ábhartha na hIaráice, lena n-áirítear an tAire Gnóthaí Baile agus an Comhairleoir Slándála Náisiúnta. Sa chomhthéacs seo, tacóidh EUAM Iraq lena chontrapháirtithe ábhartha Iarácacha chun aghaidh a thabhairt ar an gcoireacht eagraithe, ar an sceimhlitheoireacht agus ar an antoisceachas foréigneach, mar chuid den Straitéis Slándála Náisiúnta a chur chun feidhme i gcomhréir leis an smacht reachta, le cearta an duine, le comhionannas inscne, agus le hoibleagáidí idirnáisiúnta;

2.

rannchuidiú le feabhas a chur ar an gcomhordú idir údaráis na hIaráice, na Ballstáit, institiúidí, comhlachtaí, oifigí agus gníomhaireachtaí an Aontais, agus comhpháirtithe idirnáisiúnta, rannchuidiú le comhleanúnachas, comhordú agus comhlántacht ghníomhaíocht an Aontais agus ghníomhaíochtaí na mBallstát, chomh maith le comhordú ghníomhaíochtaí na gcomhpháirtithe idirnáisiúnta chun tacú le hathchóiriú earnáil slándála na hIaráice. Chuige sin, féadfaidh EUAM Iraq, i gcás inarb iomchuí, tuilleadh forbartha a dhéanamh mar ardán chun soláthar tacaíochta don Iaráic ó na Ballstáit agus ó institiúidí, comhlachtaí, oifigí agus gníomhaireachtaí de chuid an Aontais a éascú, agus sainaithneoidh sé roghanna inmharthana chun cúraimí an Mhisin a aistriú de réir a chéile chuig gníomhaithe institiúideacha eile.’.

‘1.   Is é an Stiúrthóir Bainistíochta den Cheanncheathrú Oibríochtaí Sibhialtacha a bheidh ina Cheannasaí Oibríochtaí Sibhialtacha ar EUAM Iraq. Beidh an Ceanncheathrú Oibríochtaí Sibhialtacha ar fáil don Cheannasaí Oibríochtaí Sibhialtacha chun EUAM Iraq a phleanáil agus a chur i gcrích.’.

‘1.   Faoi fhreagracht na Comhairle agus an Ardionadaí, déanfaidh an Coiste Polaitiúil agus Slándála rialú polaitiúil ar EUAM Iraq agus tabharfaidh sé treoir straitéiseach dó. Leis seo, údaraíonn an Chomhairle don Choiste Polaitiúil agus Slándála na cinntí ábhartha a dhéanamh chun na críche sin i gcomhréir leis an tríú mír d’Airteagal 38 CAE. Áireofar san údarú sin an chumhacht chun Ceann Misin a cheapadh, ar thogra ón Ardionadaí, agus an chumhacht chun an Plean Oibríochtaí (OPLAN) a leasú. Leanfaidh na cumhachtaí cinnteoireachta maidir le cuspóirí agus foirceannadh EUAM Iraq de bheith dílsithe don Chomhairle. Foilseofar na cinntí a dhéanfaidh an Coiste Polaitiúil agus Slándála maidir le ceapadh an Chinn Misin in Iris Oifigiúil an Aontais Eorpaigh.’

‘2.   Beidh an Ceann Misin freagrach as an dualgas cúraim in EUAM Iraq a chomhall agus as a áirithiú go gcomhlíonfar na ceanglais is infheidhme maidir le EUAM Iraq, i gcomhréir leis an mBeartas Slándála agus Dualgais Cúraim do Mhisin Shibhialtacha CBSC, agus lena ionstraimí tacaíochta.

3.   Tabharfaidh Ceann Slándála agus Sláinte cúnamh don Cheann Misin, agus tuairisceoidh sé nó sí don Cheann Misin agus coinneoidh sé nó sí dlúthchaidreamh feidhmiúil ar bun leis an gCeanncheathrú Oibríochtaí Sibhialtacha.

4.   Cuirfear oiliúint slándála éigeantach ar phearsanra EUAM sula rachaidh siad i mbun a ndualgas, i gcomhréir le OPLAN. Gheobhaidh siad oiliúint athnuachana rialta ar láthair na n-oibríochtaí freisin, rud a eagróidh Ceann na Slándála agus na Sláinte.’.