(1)

I gcomhréir le Cinneadh (AE) 2019/2025 (2) ón gComhairle, síníodh an Prótacal chun an Coinbhinsiún Idirnáisiúnta um Chaomhnú Thuinníní an Atlantaigh a leasú (“an Prótacal”) an 20 Samhain 2019.

(2)

Le Rialachán (AE) Uimh. 1380/2013 ó Pharlaimint na hEorpa agus ón gComhairle (3), foráiltear go bhfuil an tAontas lena áirithiú go mbeidh gníomhaíochtaí iascaireachta agus dobharshaothraithe inbhuanaithe san fhadtéarma ó thaobh an chomhshaoil de agus go mbainisteofar iad ar bhealach a bheidh ag luí leis na cuspóirí tairbhí eacnamaíocha, sóisialta agus fostaíochta a bhaint amach, agus rannchuidiú le hinfhaighteacht soláthairtí bia. Foráiltear leis freisin go bhfuil an tAontas lecur chuige an réamhchúraim a chur i bhfeidhm i leith bainistiú iascaigh, agus go bhfuil sé chun a bheith mar aidhm leis a áirithiú go ndéanfaidh saothrú bheo-acmhainní bitheolaíocha na mara líon na speiceas atá á saothrú a athbhunú agus a chothabháil os cionn leibhéil atá in acmhainn an uastáirgeacht inbhuanaithe a tháirgeadh. Ina theannta sin, foráiltear leis go bhfuil an tAontas le bearta bainistíochta agus caomhnaithe a dhéanamh ar bhonn na comhairle eolaíche is fearr atá ar fáil, le tacú le forbairt an eolais eolaíoch agus na comhairle eolaíche, le hábhar muirí aischurtha a dhíchur de réir a chéile agus le modhanna iascaireachta a chur chun cinn a chuideoidh le hiascaireacht níos roghnaí agus le gabhálacha de thaisme a sheachaint agus a laghdú a mhéid is féidir, agus le hiascaireacht a bhfuil tionchar íseal aici ar an éiceachóras muirí agus ar acmhainní iascaigh. Ina theannta sin, foráiltear go sonrach le Rialachán (AE) Uimh. 1380/2013 go bhfuil an tAontas leis na cuspóirí agus na prionsabail sin a chur i bhfeidhm agus a chaidreamh seachtrach iascaigh á sheoladh aige. Tá an Prótacal comhchuí leis na cuspóirí sin.

(3)

Mar a luaitear sa Teachtaireacht Chomhpháirteach ón gCoimisiún Eorpach agus ó Ardionadaí an Aontais do Ghnóthaí Eachtracha agus don Bheartas Slándála dar teideal “International ocean governance: an agenda for the future of oceans” [Rialachas idirnáisiúnta aigéan: clár oibre le haghaidh thodhchaí na n-aigéan], is cuid lárnach de ghníomhaíocht an Aontais bearta a chur chun cinn chun tacú agus cur le héifeachtacht na n-eagraíochtaí réigiúnacha um bainistíocht iascaigh (ERBInna) agus, i gcás inarb ábhartha, rialachas na bhfóram sin a fheabhsú. Tá an Prótacal ag teacht go hiomlán leis na haidhmeanna sin.

(4)

Ba cheart an Prótacal a fhormheas thar ceann an Aontais Eorpaigh,