(1)

Il-limiti massimi tal-prezzijiet bl-imnut għall-komunikazzjonijiet intra-UE stabbiliti fl-Artikolu 5a(1) tar-Regolament (UE) 2015/2120, li daħal fis-seħħ fl-Istati Membri kollha fil-15 ta’ Mejju 2019, ġew stabbiliti f’livell li ppermetta lill-fornituri ta’ servizzi tal-komunikazzjonijiet interpersonali bbażati fuq in-numri disponibbli għall-pubbliku jirkupraw il-kostijiet tagħhom, u b’hekk jiġi żgurat intervent proporzjonat kemm fis-suq tal-komunikazzjonijiet mobbli kif ukoll f’dawk fissi. Dawk il-miżuri, li kellhom jiskadu fl-14 ta’ Mejju 2024 skont l-Artikolu 10 tar-Regolament (UE) 2015/2120 kif emendat bir-Regolament (UE) 2018/1971 tal-Parlament Ewropew u tal-Kunsill, (2) kellhom l-għan li jiżguraw li l-konsumaturi ma jintalbux prezzijiet eċċessivi għall-komunikazzjonijiet intra-UE.

(2)

L-Artikolu 10(5) tar-Regolament (UE) 2015/2120 jestendi l-applikazzjoni tal-limiti massimi tal-prezzijiet bl-imnut għall-komunikazzjonijiet intra-UE sat-30 ta’ Ġunju 2032. Skont l-Artikolu 5a(9) tal-istess Regolament, sat-30 ta’ Ġunju 2027, il-Kummissjoni jenħtieġ li tirrieżamina l-Artikolu 5a u, jekk ikun xieraq, tista’ tiddeċiedi tippreżenta proposta leġiżlattiva bil-ħsieb li temendah.

(3)

Skont l-Artikolu 5a(8) tar-Regolament (UE) 2015/2120, il-fornituri li volontarjament jiddeċiedu li ma japplikawx prezzijiet bl-imnut differenti għall-konsumaturi għal komunikazzjonijiet domestiċi u intra-UE għandhom ikunu eżentati milli japplikaw il-limiti massimi tal-prezzijiet bl-imnut stabbiliti għall-komunikazzjonijiet intra-UE, soġġetti għal politika ta’ użu ġust. F’każ bħal dan, dawn għandhom jiġu eżentati minn prezzijiet regolati għall-komunikazzjonijiet intra-UE. Politika ta’ użu ġust hija salvagwardja li jenħtieġ li tippermetti lill-fornituri jiddevjaw mill-prezzijiet konverġenti u japplikaw ħlasijiet addizzjonali, jekk l-użu tal-komunikazzjonijiet intra-UE mill-konsumaturi jaqbeż il-kundizzjonijiet li l-fornitur ikun stabbilixxa biex jiddefinixxi l-użu tipiku tal-komunikazzjonijiet intra-UE fi Stat Membru partikolari.

(4)

L-ewwel nett, il-kundizzjonijiet li jiddefinixxu l-użu tipiku jenħtieġ li jispeċifikaw il-volumi tal-komunikazzjonijiet intra-UE li jippermettu lill-konsumaturi jikkunsmaw għadd ta’ unitajiet għal telefonati u messaġġi SMS intra-UE, mitluba bil-prezzijiet bl-imnut domestiċi applikabbli, li huma konsistenti mal-pjanijiet tariffarji rispettivi tagħhom u li huma biżżejjed biex ikopru firxa wiesgħa ta’ xejriet ta’ użu tal-konsumaturi, inklużi b’mod partikolari l-konsumaturi b’konsum relattivament għoli tal-komunikazzjonijiet intra-UE kull xahar li jkomplu jiddependu mill-komunikazzjonijiet tradizzjonali bħal telefonati jew messaġġi SMS. It-tieni, jenħtieġ li l-kundizzjonijiet li jiddefinixxu l-użu tipiku jispeċifikaw il-perjodu ta’ applikazzjoni tagħhom. Dan il-perjodu ta’ applikazzjoni definit jenħtieġ li bħala minimu jkun daqs perjodu wieħed ta’ fatturazzjoni, iżda jista’ jestendi għal diversi perjodi ta’ fatturazzjoni speċifikati mill-fornitur. Il-fornituri jistgħu jiffissaw limiti tal-konsum tal-volum applikabbli għal perjodu wieħed jew aktar fil-perjodu ta’ applikazzjoni. It-tielet, l-istess kundizzjonijiet li jiddefinixxu l-użu tipiku jenħtieġ li japplikaw għall-pjanijiet tariffarji kollha tal-fornitur fi Stat Membru.

(5)

Il-politika ta’ użu ġust jenħtieġ li, minn naħa waħda, tipprovdi lill-konsumaturi b’volumi xierqa ta’ telefonati u messaġġi SMS intra-UE u, min-naħa l-oħra, tippermetti aġġustamenti futuri bbażati fuq il-kundizzjonijiet tas-suq u l-imġiba tal-konsumaturi. L-użu tipiku ta’ telefonati u messaġġi SMS intra-UE jista’ jvarja, fost l-oħrajn, skont it-tip ta’ konsumatur, il-fornitur, jew l-Istat Membru.

(6)

Għalhekk, il-kundizzjonijiet tipiċi tal-użu jenħtieġ li jippermettu lill-fornituri marġni suffiċjenti ta’ flessibbiltà biex jistabbilixxu politika ta’ użu ġust li jqisu xierqa u li tkun konformi ma’ dan ir-Regolament ta’ Implimentazzjoni u fl-istess ħin, jippermettu aġġustamenti futuri bbażati fuq il-kundizzjonijiet tas-suq u l-imġiba tal-konsumaturi.

(7)

Il-komunikazzjonijiet intra-UE huma ta’ natura differenti mir-roaming u l-użu maħsub tagħhom huwa differenti. Għall-kuntrarju tal-komunikazzjonijiet intra-UE, ir-roaming regolat huwa servizz transfruntier maħsub għall-ivvjaġġar perjodiku u mhux għall-użu permanenti. Għalhekk, ir-roaming jinsab f’riskju ta’ użu anomalu u abbużiv għal finijiet oħra għajr dawk maħsuba, filwaqt li l-komunikazzjonijiet intra-UE jinsabu f’riskju li jintużaw lil hinn mill-użu tipiku. Il-kunċett ta’ użu li jaqbeż l-użu tipiku tal-komunikazzjonijiet intra-UE huwa għalhekk differenti mill-kunċett ta’ użu “anomalu u abbużiv” tas-servizzi tar-roaming bl-imnut bi prezzijiet domestiċi, kif definit fl-Artikolu 5 tar-Regolament (UE) 2022/612 tal-Parlament Ewropew u tal-Kunsill (3) li jirreferi għall-użu ta’ servizzi tar-roaming bl-imnut regolati minn klijenti tar-roaming fi Stat Membru għajr dak tal-fornitur domestiku tagħhom għal finijiet għajr l-ivvjaġġar perjodiku u li għalihom tista’ tiġi applikata politika ta’ użu ġust.

(8)

Il-politika ta’ użu ġust jenħtieġ li ma taffettwax id-dritt tal-fornituri li jieħdu miżuri kontra l-frodi, jekk id-deċiżjoni volontarja li ma jiġux applikati prezzijiet bl-imnut għall-konsumaturi għal komunikazzjonijiet intra-UE, differenti minn dawk għal komunikazzjonijiet domestiċi, twassal għal użu frawdolenti. Il-fornituri tas-servizzi tal-komunikazzjoni elettronika lill-pubbliku jenħtieġ li jitħallew jidentifikaw u jipprevjenu każijiet li fihom il-partijiet terzi jisfruttaw il-politika ta’ użu ġust għall-arbitraġġ tal-prezzijiet biex jiksbu vantaġġ ekonomiku (eż. Frodi Internazzjonali tad-Dħul Kondiviż, użu abbużiv ta’ SIM cards). Tali miżuri jenħtieġ li jkunu proporzjonati u jistgħu jinkludu, fost l-oħrajn, il-monitoraġġ tax-xejriet tat-traffiku biex jiġu identifikati anomaliji li jistgħu jindikaw użu frawdolenti jew abbużiv, jew is-sospensjoni temporanja tas-servizz sakemm issir verifika tal-użu.

(9)

Fl-istess ħin, il-konsumaturi jenħtieġ li jkunu protetti minn miżuri li jistgħu jaffettwaw bi kwalunkwe mod il-kapaċità tagħhom li jużaw il-komunikazzjonijiet intra-UE. F’dan ir-rigward, huma applikabbli d-drittijiet kollha tal-konsumatur li jirriżultaw mid-Direttiva 2011/83/UE tal-Parlament Ewropew u tal-Kunsill (4) dwar drittijiet tal-konsumatur. F’konformità mal-Artikolu 102 tad-Direttiva (UE) 2018/1972 tal-Parlament Ewropew u tal-Kunsill, (5) il-klawżoli kuntrattwali li jipprevedu politika ta’ użu ġust għandhom jiġu kkomunikati b’mod ċar lill-konsumaturi qabel ma jsiru applikabbli.

(10)

Barra minn hekk, qabel ma l-konsum tal-komunikazzjonijiet intra-UE minn konsumatur jaqbeż l-użu tipiku, il-fornituri jenħtieġ li jwissu lill-konsumaturi dwar tali użu b’mod dettaljat minn qabel fil-kuntratti tal-konsumaturi. Fi kwalunkwe każ, tali miżuri jenħtieġ li jimminimizzaw il-piż amministrattiv għall-konsumaturi u jillimitaw l-għadd ta’ twissijiet mhux meħtieġa.

(11)

Għall-finijiet ta’ dan l-Att, il-konsumaturi jenħtieġ li jinftiehmu kif definit fl-Artikolu 2(15) tad-Direttiva (UE) 2018/1972.

(12)

Il-Korp ta’ Regolaturi Ewropej tal-Komunikazzjonijiet Elettroniċi ġie kkonsultat skont l-Artikolu 5a(8) tar-Regolament (UE) 2015/2120.

(13)

Il-Kumitat tal-Komunikazzjoni stabbilit bl-Artikolu 118(1) tad-Direttiva (UE) 2018/1972 ma tax opinjoni fil-limitu taż-żmien stabbilit mill-President tiegħu.