(1)

F’konformità mal-Artikolu 3(2)(b) tar-Regolament (UE) 2019/1241, il-miżuri tekniċi għandhom jiġu adottati biex jikkontribwixxu għat-tnaqqis u fejn possibbli, l-eliminazzjoni tal-qabdiet inċidentali ta’ speċijiet tal-baħar sensittivi, inklużi dawk elenkati skont id-Direttiva tal-Kunsill 92/43/KEE (2) u d-Direttiva 2009/147/KE tal-Parlament Ewropew u tal-Kunsill (3), li jirriżultaw mis-sajd.

(2)

Id-denfil iswed (Phocoena phocoena) huwa speċi strettament protetta skont l-Anness IV tad-Direttiva 92/43/KEE, li telenka ċ-ċetaċji kollha bħala speċi ta’ interess Komunitarju li teħtieġ protezzjoni stretta, u hija elenkata fl-Anness II ta’ dik id-Direttiva bħala speċi ta’ interess Komunitarju li l-konservazzjoni tagħha teħtieġ id-deżinjazzjoni ta’ żoni speċjali ta’ konservazzjoni.

(3)

Il-popolazzjoni tad-denfil iswed tal-Baltiku Ċentrali hija ġenetikament differenti b’mod sinifikanti minn popolazzjonijiet oħra. Il-Kunsill Internazzjonali għall-Esplorazzjoni tal-Baħar (ICES) għalhekk iqis li l-popolazzjoni resident tad-denfil iswed tal-Baltiku Ċentrali jenħtieġ li tiġi ġestita bħala unità tal-popolazzjoni separata (4) (minn hawn ’il quddiem id-“denfil iswed tal-Baltiku Ċentrali ” ).

(4)

L-Anness XIII tar-Regolament (UE) 2019/1241 jistabbilixxi r-regoli fil-livell reġjonali fir-rigward tal-miżuri ta’ mitigazzjoni biex jitnaqqsu l-qabdiet inċidentali ta’ speċijiet sensittivi inkluż iċ-ċetaċji, billi jingħataw dettalji dwar iż-żoni ristretti, il-perjodi u l-limitazzjonijiet tal-irkaptu.

(5)

F’konformità mal-punt 3 tal-Anness XIII tar-Regolament (UE) 2019/1241, l-Istati Membri għandhom jippreżentaw rakkomandazzjonijiet konġunti għal miżuri ta’ mitigazzjoni addizzjonali għat-tnaqqis ta’ qabdiet inċidentali tal-ispeċijiet sensittivi, abbażi tal-Artikolu 15 ta’ dak ir-Regolament, fejn l-evidenza xjentifika, ivvalidata mill-ICES jew l-STECF, turi l-impatti negattivi tal-irkaptu tas-sajd fuq l-ispeċijiet ikkonċernati.

(6)

It-theddida serja għall-popolazzjoni tad-denfil iswed tal-Baltiku Ċentrali u l-ħtieġa li tittieħed azzjoni restorattiva ġiet rikonoxxuta mill-partijiet tal-Ftehim dwar il-konservazzjoni ta’ ċetaċji żgħar tal-Baltiku, tal-Atlantiku tal-Grigal, tal-Baħar Irlandiż u tal-Baħar tat-Tramuntana (ASCOBANS) permezz tal-adozzjoni tal-pjan ta’ rkupru għad-dniefel suwed tal-Baltiku Ċentrali (“il-pjan ta’ Jastarnia”). Dan il-pjan ġie żviluppat fl-2002 u rivedut fl-2009 u fl-2016 (5), u jiddefinixxi l-qabdiet inċidentali fis-sajd bi xbieki statiċi bħala t-theddida prinċipali għas-sopravivenza tal-popolazzjoni tad-denfil iswed tal-Baltiku Ċentrali.

(7)

Il-Kummissjoni għall-Ħarsien tal-Ambjent Marin fil-Baħar Baltiku (HELCOM) irrapportat fil-lista ħamra (6) tagħha, li l-popolazzjoni tad-denfil iswed tal-Baltiku Ċentrali fil-Baħar Baltiku naqset b’mod drammatiku matul dawn l-aħħar mitt sena u hemm indikazzjonijiet qawwija li qed tiffaċċja l-estinzjoni.

(8)

Informazzjoni ġdida dwar l-istatus tad-denfil iswed tal-Baltiku Ċentrali pprovduta mill-proġett SAMBAH fl-2016 (7) ikkwantifikat id-daqs tal-popolazzjoni tad-denfil iswed tal-Baltiku Ċentrali għal 497 individwu.

(9)

Wara talba tal-UE għal parir dwar il-miżuri ta’ emerġenza biex jiġu evitati l-qabdiet aċċessorji tad-denfil komuni (Delphinus delphis) u d-denfil iswed tal-Baltiku Ċentrali (Phocoena phocoena) fl-Atlantiku tal-Grigal, il-Kunsill Internazzjonali għall-Esplorazzjoni tal-Baħar (ICES) ikkalkula, fil-parir tiegħu tas-26 ta’ Mejju 2020 (8), il-livell ta’ qabdiet inċidentali tad-denfil iswed tal-Baltiku Ċentrali li jippermetti l-popolazzjoni tirkupra sa 50 % tal-kapaċità ta’ portata tagħha f’95 % tal-każijiet fit-tul. Dak il-livell ġie kkalkulat bħala 0,7 individwi minn qbid aċċessorju fis-sena. Sabiex jintlaħaq dan l-objettiv tal-ġestjoni, l-ICES iddikjara li s-sajd ta’ tħassib kollu għandu jingħalaq. Kwalunkwe qabda inċidentali ta’ individwu wieħed biss fis-sena tkompli żżid ir-riskju li l-popolazzjoni tiġi estinta. L-ICES iddikjara fil-parir tiegħu li, b’kont meħud tal-istorja tal-ħajja taċ-ċetaċji żgħar, kwalunkwe miżura ta’ protezzjoni tista’ tkun effettiva biss meta tiġi applikata kontinwament għal perjodu twil.

(10)

Fil-parir tiegħu tas-26 ta’ Mejju 2020, l-ICES irrakkomanda sett ta’ miżuri ta’ mitigazzjoni għall-qabdiet aċċessorji li, jekk jiġu implimentati fl-intier tagħhom, huma mistennija li jnaqqsu b’mod immedjat ir-riskju ta’ qabdiet aċċessorji tad-denfil iswed tal-Baltiku Ċentrali. Dawk il-miżuri jinkludi l-għeluq tax-xatt tal-Baħar Ċentrali tat-Tramuntana għas-sajd kollu għajr għan-nases u l-konzijiet, l-għeluq ta’ ċerti siti ta’ Natura 2000 u żoni oħra għas-sajd bix-xbieki statiċi (jiġifieri parit, għażel u għażel tat-tisqif immażżrat parzjalment). Jirrakkomanda wkoll l-użu obbligatorju ta’ apparat akustiku deterrenti fuq ix-xbieki statiċi f’żoni b’okkorrenza baxxa jew potenzjalment baxxa ta’ denfil iswed tal-Baltiku Ċentrali.

(11)

Abbażi tal-parir tal-ICES (9), f’Diċembru 2020, id-Danimarka, il-Ġermanja, l-Estonja, il-Latvja, il-Litwanja, il-Polonja, il-Finlandja u l-Iżvezja (il-grupp reġjonali “BALTFISH”), issottomettew rakkomandazzjoni konġunta li tipproponi miżuri ta’ mitigazzjoni biex jitnaqqsu l-qabdiet inċidentali tad-denfil iswed tal-Baltiku Ċentrali. F’Settembru 2021, f’konformità mal-istess parir tal-ICES, BALTFISH issottometta rakkomandazzjoni konġunta ġdida b’miżuri ta’ mitigazzjoni addizzjonali għas-sit ta’ Natura 2000 Sydvästskånes utsjövatten (SE0430187).

(12)

Ir-rakkomandazzjonijiet konġunti ġew ivvalutati mill-Kunsill Konsultattiv tal-Baħar Baltiku f’Ottubru 2020 u f’Lulju 2021.

(13)

Ir-rakkomandazzjoni konġunta sottomessa f’Diċembru 2020 mill-grupp reġjonali BALTFISH tipproponi l-għeluq tax-Xatt tal-Baħar Ċentrali tat-Tramuntana, żona ewlenija għad-denfil iswed tal-Baltiku Ċentrali matul l-istaġun tat-tgħammir (10), għas-sajd kollu għajr għan-nases u l-konz. Din tissuġġerixxi wkoll l-għeluq tax-Xatt tal-Baħar Ċentrali tan-Nofsinhar u numru ta’ siti ta’ Natura 2000 għas-sajd bix-xbieki statiċi f’konformità mal-parir tal-ICES tas-26 ta’ Mejju 2020. Ir-rakkomandazzjoni konġunta sottomessa f’Settembru 2021 tipproponi l-għeluq staġonali (mill-1 ta’ Novembru sat-30 ta’ April) għas-sajd bix-xbieki statiċi fis-sit ta’ Natura 2000 Sydvästskånes utsjövatten, identifikat mill-ICES ukoll bħala żona ta’ importanza għad-denfil iswed tal-Baltiku Ċentrali. Flimkien maż-żoni inklużi fil-parir tal-ICES, ir-rakkomandazzjoni konġunta sottomessa f’Diċembru 2020, ipproponiet l-għeluq taż-żona Adler Grund og Rønne Banke (DK00VA261) bejn l-1 ta’ Novembru u l-31 ta’ Jannar, żona fejn id-dniefel suwed ġieli jkunu preżenti matul ix-xhur tax-xitwa (11).

(14)

Ir-rakkomandazzjoni konġunta ta’ Diċembru 2020 tkompli tipproponi l-użu obbligatorju matul is-sena kollha ta’ apparat akustiku deterrenti fi ħdan u barra mis-sit ta’ Natura 2000 Zatoka Pucka i Półwysep Helski (PLH220032), li jkopri l-Bajja ta’ Puck (il-Polonja) kollha. L-ICES illimita l-parir tiegħu għaż-żona ta’ ġo dan is-sit ta’ Natura 2000. Madankollu, l-ICES ta l-parir li jingħalaq is-sajd bix-xbieki statiċi fiż-żona tal-Lvant tas-sikka tar-ramel Ryf Mew (il-Bajja ta’ Barra ta’ Puck) minħabba probabbiltà ogħla ta’ detezzjoni tad-denfil iswed tal-Baltiku Ċentrali. Ir-rakkomandazzjoni konġunta ta’ Settembru 2021 tipproponi użu staġonali obbligatorju ta’ apparat akustiku deterrenti (mill-1 ta’ Mejju sal-31 ta’ Ottubru) fuq ix-xbieki statiċi fis-sit ta’ Natura 2000 ta’ Sydvästskånes utsjövatten. Barra minn hekk, l-ICES ta l-parir li x-xbieki statiċi jiġu mgħammra b’apparat akustiku deterrenti f’żoni addizzjonali b’okkorrenza baxxa jew potenzjalment baxxa ta’ denfil iswed tal-Baltiku Ċentrali, li ma tqisux f’dawn ir-rakkomandazzjonijiet konġunti.

(15)

Ir-rakkomandazzjoni konġunta sottomessa f’Diċembru 2020 ġiet ivvalutata mill-Kumitat Xjentifiku, Tekniku u Ekonomiku għas-Sajd (STECF) fil-laqgħa plenarja tiegħu ta’ Marzu 2021 (12). L-STECF iddikjara li għalkemm il-miżuri proposti f’din ir-rakkomandazzjoni konġunta huma fil-biċċa l-kbira konformi ma’ dawk proposti mill-ICES, ma jimxux magħhom għalkollox. Madankollu, l-STECF ikkonkluda wkoll li jekk jiġu implimentati b’mod effettiv, dawn il-miżuri se jikkontribwixxu għat-tnaqqis ta’ qabdiet mhux intenzjonati u inċidentali tad-denfil iswed tal-Baltiku Ċentrali. Il-miżuri introdotti fir-rakkomandazzjoni konġunta ta’ Settembru 2021, f’konformità mal-parir tal-ICES, jikkontribwixxu aktar għal dak l-objettiv.

(16)

Iż-żewġ rakkomandazzjonijiet konġunti jipprevedu li l-Istati Membri għandhom jiżguraw il-kontroll tal-attività tal-bastimenti tas-sajd sabiex jiġu implimentati l-miżuri proposti. L-STECF ikkonkluda (13), fil-valutazzjoni tal-miżuri proposti fir-rakkomandazzjoni konġunta ta’ Diċembru 2020, li tali miżuri jistgħu jsaħħu l-akkuratezza tar-reġistrazzjoni tal-avvenimenti ta’ qabdiet aċċessorji għall-ispeċijiet protetti, fil-periklu u mhedda.

(17)

B’mod ġenerali, l-STECF iqis li l-implimentazzjoni tal-miżuri proposti fir-rakkomandazzjoni konġunta ta’ Diċembru 2020 se tikkontribwixxi għat-tnaqqis tal-qabdiet mhux intenzjonati u inċidentali tad-denfil iswed tal-Baltiku Ċentrali u jkunu pass lejn l-ilħuq tal-objettivi tar-Regolament (UE) 2019/1241. Għalhekk, jenħtieġ li l-miżuri proposti jiġu inklużi fl-Anness XIII tar-Regolament (UE) 2019/1241.

(18)

Il-Kummissjoni tinnota wkoll li l-Istati Membri, fir-rakkomandazzjoni konġunta sottomessa f’Diċembru 2020, jimpenjaw ruħhom li jaħdmu fuq miżuri ta’ mitigazzjoni addizzjonali malajr kemm jista’ jkun, inkluż miżuri addizzjonali relatati mal-użu ta’ apparat akustiku deterrenti fuq xbieki statiċi f’żoni b’okkorrenza baxxa jew potenzjalment baxxa ta’ denfil iswed tal-Baltiku Ċentrali, u se jagħmlu ħilithom biex jaqblu aktar dwar miżuri ta’ kontroll dettaljati relatati mal-kontroll tal-miżuri ta’ mitigazzjoni. Barra minn hekk, flimkien maż-żoni diġà koperti, l-Istati Membri, fir-rakkomandazzjoni konġunta sottomessa f’Settembru 2021, jimpenjaw ruħhom li jaħdmu fuq miżuri addizzjonali biex jitwaqqfu l-attivitajiet tas-sajd bix-xbieki statiċi f’żoni fejn ġew identifikati d-dniefel suwed.

(19)

Dan ir-Regolament Delegat huwa mingħajr preġudizzju għal miżuri addizzjonali għall-protezzjoni tad-denfil iswed tal-Baltiku Ċentrali li l-Kummissjoni tista’ tadotta, inkluż fil-każ ta’ raġunijiet imperattivi ta’ urġenza debitament ġustifikati relatati ma’ theddida serja għall-konservazzjoni tar-riżorsi bijoloġiċi tal-baħar jew għall-ekosistema tal-baħar skont l-Artikolu 12 tar-Regolament (UE) Nru 1380/2013 tal-Parlament Ewropew u tal-Kunsill (14), u miżuri nazzjonali aktar stretti li l-Istati Membri jistgħu jadottaw għal dak l-iskop fl-ilmijiet tagħhom f’konformità mar-Regolament (UE) Nru 1380/2013 u r-Regolament (UE) 2019/1241.

(20)

Għal raġunijiet ta’ urġenza li jikkonċernaw il-ħtieġa li l-popolazzjoni tad-denfil iswed tal-Baltiku Ċentrali tiġi ssalvagwardjata b’effett immedjat, jenħtieġ li dan ir-Regolament jidħol fis-seħħ immedjatament. Sabiex tippermetti lis-sajjieda biżżejjed ħin biex jgħammru l-bastimenti tagħhom bl-apparat akustiku deterrenti, jenħtieġ li l-applikazzjoni tal-punt 1.1(b) fl-Anness tiġi differita,