(1)

Rinne an tAontas an Coinbhinsiún maidir le hAontú Rialacha Áirithe i dtaca le hIompar Idirnáisiúnta d’Aer (‘Coinbhinsiún Montréal’) arna dhéanamh in Montréal an 28 Bealtaine 1999 a fhormheas trí bhíthin Chinneadh 2001/539/CE ón gComhairle (1).

(2)

De bhun Airteagal 24(1) de Choinbhinsiún Montréal, tá an Eagraíocht Eitlíochta Sibhialta Idirnáisiúnta (ICAO), mar Thaiscí Choinbhinsiún Montréal, le hathbhreithniú a dhéanamh ar na teorainneacha dliteanais dá bhforáiltear in Airteagail 21, 22 agus 23 de ag eatraimh 5 bliana.

(3)

Mar thoradh ar an athbhreithniú is déanaí a rinne ICAO, is gá na teorainneacha dliteanais dá bhforáiltear in Airteagal 21 agus in Airteagal 22(1), (2) agus (3) de Choinbhinsiún Montréal a choigeartú, mar a leagtar amach i Litir Stáit LE 3/38.1-IND/24/4 arna heisiúint ag ICAO an 28 Meitheamh 2024 (‘Litir Stáit ICAO’). De réir Litir Stáit ICAO, tá na coigeartuithe sin le teacht i bhfeidhm le haghaidh na Stát is Páirtithe ar fad 6 mhí tar éis a bhfógartha, mura rud é, laistigh de 3 mhí tar éis an fhógra, go gcláraíonn tromlach na Stát is Páirtithe a míshástacht le ICAO.

(4)

Is iomchuí an seasamh atá le glacadh thar ceann an Aontais in ICAO a bhunú, ós rud é go mbeidh na teorainneacha dliteanais athbhreithnithe ceangailteach faoin dlí idirnáisiúnta, i gcomhréir le hAirteagal 21 agus le hAirteagal 22(1), (2) agus (3) de Choinbhinsiún Montréal, agus ós rud é gur cuid dhílis é de dhlíchóras an Aontais.

(5)

I bhfianaise chineál teicniúil an athbhreithnithe sin, lena leantar an modh ríofa a shainítear go soiléir agus a leagtar síos i gCoinbhinsiún Montréal, níl aon chúis ann go gcuirfeadh an tAontas i gcoinne an athbhreithnithe.

(6)

Dá bhrí sin, ba cheart gurb é an seasamh atá le glacadh thar ceann an Aontais gan míshástacht a chlárú maidir leis na teorainneacha dliteanais nua atá molta mar a leagtar amach i Litir Stáit ICAO.