(1)

Teastaíonn sláine agus trédhearcacht na margaí mórdhíola fuinnimh chun iomaíocht oscailte chóir a áirithiú sna margaí inmheánacha leictreachais agus gáis agus chun cothrom iomaíochta a áirithiú do rannpháirtithe sa mhargadh. Le Rialachán (AE) Uimh. 1227/2011 ó Pharlaimint na hEorpa agus ón gComhairle (2), bunaítear creat cuimsitheach chun an cuspóir sin a bhaint amach.

(2)

Le Rialachán (AE) Uimh. 1227/2011, cuireadh de chúram ar Ghníomhaireacht an Aontais Eorpaigh um Chomhar idir Rialálaithe Fuinnimh (‘an Ghníomhaireacht’) faireachán a dhéanamh ar mhargaí mórdhíola fuinnimh chun a áirithiú, i ndlúthchomhar leis na húdaráis rialála náisiúnta agus le húdaráis náisiúnta eile, go ndéanfar maoirseacht éifeachtach orthu. Le hAirteagal 32 de Rialachán (AE) 2019/942, tugadh isteach táillí chun feabhas a chur ar chistiú na Gníomhaireachta agus chun costais a bhaineann lena feidhmeanna faoi Rialachán (AE) Uimh. 1227/2011 a chumhdach.

(3)

Leagtar amach in Airteagal 32 de Rialachán (AE) 2019/942 raon feidhme agus bunphrionsabail na scéime táillí agus cuirtear de chúram ar an gCoimisiún na táillí agus an bealach a n-íocfar iad a shocrú, rud a rinne an Coimisiún le glacadh Chinneadh (AE) 2020/2152 (3). Leis an maoiniú méadaithe atá ar fáil don Ghníomhaireacht, cuireadh ar a cumas don Ghníomhaireacht feabhas a chur ar cháilíocht na seirbhísí a sholáthraíonn an Ghníomhaireacht d’eintitis a thuairiscíonn sonraí agus do rannpháirtithe sa mhargadh i gcoitinne.

(4)

Le Rialachán Tarmligthe (AE) 2019/715 ón gCoimisiún (4) bunaítear an rialachán réime airgeadais do na comhlachtaí arna mbunú ag an Aontas faoin gConradh ar Fheidhmiú an Aontais Eorpaigh agus faoin gConradh ag bunú an Chomhphobail Eorpaigh do Fhuinneamh Adamhach agus a bhfuil pearsantacht dhlítheanach acu agus a fhaigheann ranníocaíochtaí a mhuirearaítear ar bhuiséad an Aontais. Is comhlacht den sórt sin í an Ghníomhaireacht agus, mar a cheanglaítear le Rialachán Tarmligthe (AE) 2019/715, ghlac sí a rialacha airgeadais féin, Rialachán Airgeadais na Gníomhaireachta (5), atá i gcomhréir leis na rialacha sin de bhun Rialachán Tarmligthe (AE) 2019/715.

(5)

I ndoiciméad clársceidealaithe na Gníomhaireachta, arna bhunú i gcomhréir le hAirteagal 20 de Rialachán (AE) 2019/942 agus le hAirteagal 32 de Rialachán Airgeadais na Gníomhaireachta, tá clársceidealú bliantúil agus ilbhliantúil ann, agus sa chomhthéacs sin leagtar amach go mionsonraithe cúraimí na Gníomhaireachta agus na hacmhainní arna n-imscaradh le haghaidh na gcúraimí sin. Dá bhrí sin, is é an doiciméad clársceidealaithe an uirlis iomchuí chun na costais sin atá incháilithe lena gcumhdach le táillí de bhun Airteagal 32 de Rialachán (AE) 2019/942 a shainaithint.

(6)

I gcomhréir le hAirteagal 20 de Rialachán (AE) 2019/942, tugann an Coimisiún tuairim maidir le dréachtdoiciméad clársceidealaithe na Gníomhaireachta, lena n-áirítear tograí na Gníomhaireachta a mhéid a bhaineann leis na costais a mheastar a bheith incháilithe do chistiú le táillí.

(7)

De réir aithris 37 de Rialachán (AE) 2019/942, ba cheart an Ghníomhaireacht a mhaoiniú go príomha ó bhuiséad ginearálta an Aontais. Dá bhrí sin, níor cheart an t-ioncam ó tháillí a bheith níos mó ná an ranníocaíocht leis an nGníomhaireacht ó bhuiséad an Aontais.

(8)

Chun trédhearcacht a sholáthar nach n-úsáidtear táillí ach amháin chun costais incháilithe a chumhdach agus go bhfuil an Ghníomhaireacht fós le maoiniú go príomha ó bhuiséad ginearálta an Aontais, ba cheart faisnéis a sholáthar sa Tuarascáil Bhliantúil Chomhdhlúite ar Ghníomhaíochtaí, a bunaíodh i gcomhréir le hAirteagal 48 de Rialachán Airgeadais na Gníomhaireachta, faoi na foinsí éagsúla ioncaim a fhaightear agus faoi úsáid an ioncaim sin.

(9)

I bhfianaise na margaí fuinnimh atá ag teacht chun cinn agus na géarchéime fuinnimh, leasaíodh Rialachán (AE) Uimh. 1227/2011 i mí na Bealtaine 2024 le Rialachán (AE) 2024/1106 ó Pharlamint na hEorpa agus ón gComhairle (6) agus Rialachán (AE) 2024/1789 ó Pharlaimint na hEorpa agus ón gComhairle (7), lenar tugadh isteach roinnt athruithe ar chreat tuairiscithe na sonraí a bhaineann le táirgí mórdhíola fuinnimh. Mar shampla, ní mór mionsonraí na n-idirbheart a bhaineann le stóráil leictreachais, hidrigine nó gáis nádúrtha chomh maith le hidirbhearta a bhaineann le margaí cothromúcháin a thuairisciú don Ghníomhaireacht. Chomh maith leis sin, bíonn costais mhéadaithe arna dtabhú ag an nGníomhaireacht mar thoradh ar athruithe ar an margadh, mar shampla níos mó trádála ardmhinicíochta, chomh maith le boilsciú. Thairis sin, le Rialachán (AE) 2024/1106, cuireadh cúram nua ar an nGníomhaireacht cumhachtaí maoirseachta agus imscrúdúcháin a fheidhmiú de bhun Airteagail 13 go 13c agus Airteagal 16 de Rialachán (AE) Uimh. 1227/2011.

(10)

Ina theannta sin, foráiltear le Rialachán (AE) Uimh. 1227/2011, arna leasú, nár cheart do rannpháirtithe sa mhargadh na sonraí a leagtar amach in Airteagal 7c agus Airteagal 8 den Rialachán sin a thuairisciú ach amháin trí shásraí tuairiscithe cláraithe agus faisnéis a nochtadh agus tuarascálacha faisnéise ón taobh istigh a chur isteach trí ardáin faisnéise ón taobh istigh. Tá sásraí tuairiscithe cláraithe agus ardáin faisnéise ón taobh istigh le húdarú ag an nGníomhaireacht de réir ceanglais áirithe a leagtar amach i Rialachán (AE) Uimh. 1227/2011, arna leasú, agus arna mionsonrú a thuilleadh ag an gCoimisiún trí bhíthin rialachán tarmligthe i gcomhréir le hAirteagal 4a(8) agus Airteagal 9a(6) den Rialachán céanna. Déanfaidh an Ghníomhaireacht faireachán ar chomhlíonadh na gceanglas ag na sásraí tuairiscithe cláraithe agus na hardáin faisnéise ón taobh istigh ar dá réir a údaraíodh iad agus, i gcás ina gcinnfidh sí go bhfuil siad neamhchomhlíontach, déanfaidh sí a n-údaruithe a tharraingt siar. comhlíontacht le".

(11)

Leasaíodh Rialachán (AE) 2019/942 freisin chun na hathruithe a tugadh isteach le Rialachán (AE) Uimh. 1227/2011 a léiriú. Go sonrach, de bhun Airteagal 32 leasaithe de Rialachán (AE) 019/94, maidir le táillí atá dlite don Ghníomhaireacht, ba cheart a chumhdach leo cúraimí na Gníomhaireachta maidir le faisnéis arna tuairisciú ag rannpháirtithe sa mhargadh, nó ag daoine nó eintitis a thuairiscíonn thar a gceann, de bhun Airteagal 8 de Rialachán (AE) Uimh. 1227/2011 a bhailiú, a láimhseáil, a phróiseáil agus a anailísiú agus maidir le faisnéis ón taobh istigh a nochtadh de bhun Airteagail 4 agus 4a den Rialachán sin. Féadfaidh an t-ioncam ó na táillí sin costais na Gníomhaireachta a chumhdach freisin as na cumhachtaí maoirseachta agus imscrúdúcháin a fheidhmiú de bhun Airteagail 13 go 13c agus Airteagal 16 de Rialachán (AE) Uimh. 1227/2011. Féadfaidh an méid atá le cumhdach le táillí arna socrú ag an nGníomhaireacht a bheith níos ísle ná na costais incháilithe iomlána.

(12)

Ina theannta sin, i gcomhréir le hAirteagal 32 de Rialachán (AE) 2019/942, ba cheart na táillí a bheith comhréireach le costais na seirbhísí ábhartha mar a sholáthraítear iad ar bhealach costéifeachtach agus ba cheart iad a bheith leordhóthanach chun na costais sin a chumhdach agus ba cheart iad a shocrú ar an leibhéal sin lena n-áiritheofar go mbeidh siad neamh-idirdhealaitheach agus lena seachnófar ualach míchuí airgeadais nó riaracháin a chur ar rannpháirtithe sa mhargadh nó ar eintitis atá ag gníomhú thar a gceann.

(13)

Dá bhrí sin, ba cheart Cinneadh (AE) 2020/2152 a aisghairm chun na modhnuithe a tugadh isteach le Rialachán (AE) 2024/1106 agus le Rialachán (AE) 2024/1789 a chur san áireamh.

(14)

Le Cinneadh (AE) 2020/2152, cuireadh an oibleagáid ar shásraí tuairiscithe cláraithe na táillí a íoc, trínar thuairiscigh formhór na rannpháirtithe sa mhargadh taifid sonraí an tráth sin. Maidir le sásraí tuairiscithe cláraithe, tá siad cláraithe ag an nGníomhaireacht faoi láthair ar bhonn Airteagal 11 de Rialachán Cur Chun Feidhme (AE) Uimh. 1348/2014 ón gCoimisiún (8). Cláraíonn an Ghníomhaireacht ardáin faisnéise ón taobh istigh freisin, trína nochtann rannpháirtithe sa mhargadh faisnéis ón taobh istigh. Cé go mbeidh gá le sásraí tuairiscithe cláraithe a bheith údaraithe ag an nGníomhaireacht amach anseo de bhun Airteagal 9a de Rialachán (AE) Uimh. 1227/2011, ba cheart an sainmhíniú ar shásraí tuairiscithe cláraithe agus tagairtí ábhartha dóibh a léiriú go leanfaidh an ceanglas maidir le táille a íoc d’fheidhm a bheith aige maidir leis na sásraí tuairiscithe cláraithe atá cláraithe leis an nGníomhaireacht cheana fiú mura bhfuil siad údaraithe go fóill. Go dtí seo, níor cumhdaíodh ardáin faisnéise ón taobh istigh le Cinneadh (AE) 2020/2152. Mar sin féin, ós rud é, de réir na leasuithe reachtacha thuasluaite, gur cheart táillí a bheith dlite don Ghníomhaireacht ag ardáin faisnéise ón taobh istigh, tá feidhm ag an gCinneadh seo freisin maidir le hardáin faisnéise ón taobh istigh agus go sonrach a luaithe a údaraítear iad de bhun Airteagal 4a de Rialachán (AE) Uimh. 1227/2011.

(15)

Áirítear sa Chinneadh seo freisin sainmhíniú nua ar thaifead idirbhirt, le tagairt do Rialachán (AE) Uimh. 1227/2011 chun a áirithiú nach ndéanfaidh aon athrú a d’fhéadfaí a dhéanamh ar Rialachán Cur Chun Feidhme (AE) Uimh. 1348/2014 difear don sainmhíniú sin. Tá an sainmhíniú ríthábhachtach chun braislí sonraí a shainaithint agus, dá bhrí sin, chun táillí a ríomh agus ba cheart, dá bhrí sin, é a mhionsonrú go leordhóthanach. Chun braislí sonraí a shainaithint, meastar rannpháirtí sa mhargadh a bheith ina thairbhí den idirbheart nó, mura bhfuil an fhaisnéis sin ar fáil, ina chontrapháirtí de chuid an idirbhirt.

(16)

Le hAirteagal 8(1) de Rialachán (AE) Uimh. 1227/2011, arna leasú, tugtar isteach oibleagáid ar rannpháirtithe sa mhargadh tuairisciú don Ghníomhaireacht chun faisnéis a sholáthar faoina neamhchosaintí. Ba cheart an ceanglas tuairiscithe nua sin a chumhdach agus a léiriú sa Chinneadh seo.

(17)

Is iad príomhspreagthaí costais na seirbhísí ábhartha, agus dá bhrí sin príomhspreagthaí costais chostais incháilithe na Gníomhaireachta, an líon sásraí tuairiscithe cláraithe agus ardáin faisnéise ón taobh istigh, an líon rannpháirtithe sa mhargadh a thuairiscíonn siad lena n-aghaidh agus an méid sonraí a thuairiscíonn siad agus saintréithe na sonraí sin. Chun na spreagthaí costais sin a léiriú, ba cheart an táille nach mór do gach sásra tuairiscithe cláraithe a íoc a bheith ina meascán de bhunmhéid, mar atá comhpháirt na buntáille cláraithe, agus méid athraitheach, mar atá comhpháirt táille taifeadbhunaithe an idirbhirt. Braitheann an dara ceann díobh sin ar an líon rannpháirtithe sa mhargadh a bhfuil sonraí á dtuairisciú ag an sásra tuairiscithe cláraithe ina leith chomh maith le méid agus saintréithe na sonraí tuairiscithe.

(18)

Mar thoradh ar na hathruithe a tugadh isteach le Rialacháin (AE) 2024/1106 agus (AE) 2024/1789, tá méadú suntasach tagtha ar chostais na Gníomhaireachta nach mór a chumhdach le táillí. Dá bhrí sin, ba cheart comhpháirt na buntáille cláraithe agus an t-ioncam a ghintear ó chomhpháirt táille taifeadbhunaithe an idirbhirt ar aon a mhéadú sa Chinneadh seo. Ag an am céanna, níor cheart na táillí a bheith ina n-ualach airgeadais míchuí ar shásraí tuairiscithe cláraithe ná, dá bhrí sin, ar rannpháirtithe sa mhargadh ar bhonn indíreach. Dá bhrí sin, ba cheart an méadú ar an ioncam a ghintear ó chomhpháirt táille taifeadbhunaithe an idirbhirt a bhaint amach ar bhealach comhréireach lena seachnaítear méadú mór ar ioncam a eascraíonn as rannpháirtithe níos lú sa mhargadh a thuairiscíonn líon íseal taifead idirbhirt ach lena seachnaítear freisin méadú iomarcach ar ioncam a eascraíonn as rannpháirtithe sa mhargadh a thuairiscíonn líon ard taifead idirbhirt.

(19)

Ba cheart go léireodh an bunmhéid costais na Gníomhaireachta chun iarratais phróiseáil ar shásraí tuairiscithe cláraithe a údarú nó a chlárú agus chun a áirithiú go leanfaidh sásraí tuairiscithe cláraithe atá údaraithe nó cláraithe cheana de na ceanglais a leagtar amach i Rialachán (AE) Uimh. 1227/2011 a chomhlíonadh. Amach anseo, déanfaidh an Coimisiún na ceanglais sin a mhionsonrú a thuilleadh trí bhíthin rialachán tarmligthe de réir Airteagal 4a(8) agus Airteagal 9a(6) den Rialachán céanna. Ós rud é go dtabhaíonn an Ghníomhaireacht na costais sin gan beann ar cibé acu a thuairiscíonn na sásraí tuairiscithe cláraithe taifid idirbhirt nó sonraí bunúsacha, ba cheart do na sásraí tuairiscithe cláraithe uile an bunmhéid a íoc.

(20)

De bhun Airteagal 4a de Rialachán (AE) Uimh. 1227/2011 agus a luaithe a ghlacfar an gníomh tarmligthe ábhartha lena bhforlíontar an tAirteagal sin, tá an Ghníomhaireacht le bheith i gceannas ar ardáin faisnéise ón taobh istigh a údarú agus a mhaoirsiú, rud atá coibhéiseach le maoirseacht a dhéanamh ar shásraí tuairiscithe cláraithe. Dá bhrí sin, ba cheart d’ardáin faisnéise ón taobh istigh táille sheasta a íoc atá coibhéiseach le comhpháirt na buntáille cláraithe nach mór do shásraí tuairiscithe cláraithe a íoc.

(21)

Maidir le sonraí bunúsacha ar nós faisnéis a bhaineann le hacmhainneacht agus úsáid saoráidí i ndáil le táirgeadh, stóráil, tomhaltas nó tarchur leictreachais nó gáis nádúrtha, nó faisnéis a bhaineann le hacmhainneacht agus úsáid saoráidí GNL, ní bhailíonn an Ghníomhaireacht iad ach chun na taifid idirbhirt a bhailítear a chomhlánú. Dá bhrí sin, níor cheart sonraí bunúsacha a áireamh i ríomh na comhpháirte táille athraithí. Ós rud é gur spreagthóir suntasach costais don Ghníomhaireacht é stádas sásra tuairiscithe chláraithe ann féin, ba cheart do shásraí tuairiscithe cláraithe a thuairiscíonn sonraí bunúsacha comhpháirt na buntáille a íoc mar sin féin.

(22)

Chun nach socrófar ualach airgeadais míchuí ar shásraí tuairiscithe cláraithe, ba cheart méid athraitheach chomhpháirt táille taifeadbhunaithe an idirbhirt méid na dtaifead idirbhirt tuairiscithe a léiriú, atá nasctha le méid na trádála agus, dá bhrí sin, le hioncam fhéideartha an tsásra tuairiscithe chláraithe. Ba cheart a chur san áireamh sa chomhpháirt athraitheach go dtuairiscíonn go leor sásraí tuairiscithe cláraithe sonraí le haghaidh an iliomad rannpháirtithe sa mhargadh a bhíonn gníomhach go minic i roinnt ionad margaidh eagraithe agus a bhfuil bealaí trádála éagsúla á n-úsáid acu.

(23)

Chun drochúsáid mhargaidh a nochtadh go héifeachtach, ní hamháin go mbailíonn an Ghníomhaireacht sonraí maidir leis an trádáil agus conarthaí eile, ach bailíonn sí méid suntasach sonraí freisin maidir le horduithe chun trádála a chuirtear ar ionaid mhargaidh eagraithe amhail malartuithe fuinnimh. Dá bhrí sin, ba cheart orduithe chun trádála a chumhdach leis an scéim táillí freisin chun comhréireacht costais a áirithiú. Ar na cúiseanna céanna, ba cheart faisnéis saolré a chumhdach leis an scéim táillí freisin.

(24)

Tá leibhéal caighdeánaithe níos airde ná trádáil táirgí mórdhíola fuinnimh lasmuigh d’ ionaid mhargaidh eagraithe ina shaintréith de thrádáil táirgí den sórt sin ar ionaid mhargaidh eagraithe. Thairis sin, áirítear orduithe chun trádála i dtaifid idirbhirt thuairiscithe a eascraíonn as ionaid mhargaidh eagraithe. Tá forbairtí margaidh i dtrádáil conarthaí caighdeánacha amhail trádáil algartamach agus trádáil ardmhinicíochta ag éirí níos tábhachtaí, rud a fhágann go bhfuil méadú ag teacht ar an líon orduithe chun trádála a thuairiscítear ó ionaid mhargaidh eagraithe in aghaidh an chonartha soláthair chaighdeánaigh i gcomparáid le conarthaí soláthair a thugtar i gcrích lasmuigh d’ionaid mhargaidh eagraithe. Ba cheart, dá bhrí sin, taifid idirbhirt ar tháirgí mórdhíola fuinnimh a eascraíonn as ionaid mhargaidh eagraithe a ualú ar bhealach atá éagsúil leis na cinn a eascraíonn as áiteanna margaidh eagraithe lasmuigh agus comhpháirt na táille athraithí á ríomh.

(25)

De bhun Airteagal 8(1) de Rialachán (AE) Uimh. 1227/2011 agus a luaithe a ghlacfar an gníomh cur chun feidhme ábhartha lena bhforlíontar an tAirteagal sin, tuairisceoidh sásraí tuairiscithe cláraithe neamhchosaint rannpháirtithe sa mhargadh don Ghníomhaireacht le haghaidh gach rannpháirtí aonair sa mhargadh. Dá bhrí sin, ba cheart comhpháirt táillí tiomnaithe a thabhairt isteach lena socrófar méid socraithe do gach tuarascáil den sórt sin, gan beann ar a hinneachar ná ar a fad.

(26)

De bhun Airteagal 71 de Rialachán Airgeadais na Gníomhaireachta, ní dhéanfaidh gníomhaireacht seirbhísí a sholáthar go dtí go mbeidh an táille chomhfhreagrach íoctha ina hiomláine. Ós rud é go ríomhtar na táillí ar bhonn mhéid na dtaifead idirbhirt a thuairiscítear agus na dtuarascálacha faisnéise ón taobh istigh a cuireadh isteach an bhliain roimhe sin, ní féidir na méideanna is infhaighte a shuí, ná sonraisc a sheoladh amach, ach amháin ag tús gach bliana. Mar sin féin, ba cheart sásraí tuairiscithe cláraithe agus ardáin faisnéise ón taobh istigh a bheith in ann sonraí a thuairisciú go leanúnach agus tuarascálacha faisnéise ón taobh istigh a chur faoi bhráid na Gníomhaireachta, agus dá bhrí sin sula n-íoc siad an sonrasc don bhliain ar leith. Maidir le sásraí tuairiscithe cláraithe a scoireann de bheith údaraithe nó cláraithe ag an nGníomhaireacht, níor cheart iad a bheith i dteideal aon aisíocaíocht ar tháillí a íocadh ná aon tarscaoileadh táillí atá dlite. Ar an gcaoi chéanna, maidir le hardáin faisnéise ón taobh istigh a scoireann de bheith údaraithe ag an nGníomhaireacht, níor cheart iad a bheith i dteideal aon aisíocaíocht ar tháillí a íocadh ná aon tarscaoileadh táillí atá dlite.

(27)

I gcás ina bhfuil feidhm ag méid ceartúcháin dearfach nó diúltach chun difríochtaí a chomhardú idir comhpháirt táille taifeadbhunaithe an idirbhirt a íocadh an bhliain roimhe sin agus comhpháirt táille taifeadbhunaithe an idirbhirt a d’íocfaí de réir an tuairiscithe iarbhír an bhliain sin, ba cheart ríomh an mhéid ceartúcháin a bhunú ar chomhpháirt táille taifeadbhunaithe an idirbhirt a íocadh go hiarbhír an bhliain roimhe sin, seachas ar an méid a ríomhadh ar dtús, ós rud é go bhfuil an méid a íocadh go hiarbhír éagsúil ón méid a ríomhadh ar dtús i gcás ina bhfuil feidhm ag fachtóir laghdaithe.

(28)

Ós rud é go dtabhaíonn an Ghníomhaireacht costais bhreise atá le cumhdach le táillí cheana in 2025, ba cheart í a bheith in ann formhuirear a thobhach arb ionann é agus an difríocht idir an t-ioncam ó tháillí arna mbuiséadú i nDoiciméad Clársceidealaithe na Gníomhaireachta le haghaidh 2025-2027 agus suim na méideanna a sonrascadh cheana in 2025. Ba cheart an formhuirear a ríomh ar bhealach simplí ionas go mbeidh sásraí tuairiscithe cláraithe in ann a shainaithint go héasca cén tionchar a bhíonn ag na rannpháirtithe éagsúla sa mhargadh, a bhfuil sonraí á dtuairisciú acu thar a gceann, ar an bhformhuirear sonrasctha. Dá bhrí sin, ba cheart an formhuirear a bheith ag brath ar an líon rannpháirtithe sa mhargadh a bhfuil sásra tuairiscithe cláraithe ag tuairisciú taifead idirbhirt ina leith. I gcás ina dtuairiscíonn rannpháirtí sa mhargadh sonraí trí níos mó ná sásra tuairiscithe cláraithe amháin, chuirfí an rannpháirtí sin sa mhargadh san áireamh mar sin féin le haghaidh gach sásra tuairiscithe chláraithe agus an formhuirear á ríomh. Ós rud é go bhféadfadh tionchar a bheith ag an bhformhuirear ar na muirir a íocann rannpháirtithe sa mhargadh le sásra tuairiscithe cláraithe, níor cheart rannpháirtithe sa mhargadh a scoir de bheith ina rannpháirtithe sa mhargadh níos luaithe in 2025 a chur san áireamh agus an formhuirear á ríomh.

(29)

Chun a áirithiú go bhfaighidh an Ghníomhaireacht ioncam leordhóthanach ó tháillí chun a costais incháilithe a chumhdach, ba cheart an rogha a bheith ag an nGníomhaireacht formhuirear a chur leis na sonraisc a seolfar amach i mí Eanáir 2026. Ba cheart an formhuirear sin a bheith bunaithe ar an líon rannpháirtithe sa mhargadh a dtuairiscíonn sásra tuairiscithe cláraithe taifid idirbhirt ina leith. Ós rud é go ríomhtar an formhuirear féideartha in 2026 an tráth céanna leis na comhpháirteanna táille eile, is féidir an ríomh a bhunú ar an líon rannpháirtithe sa mhargadh a shainaithnítear le haghaidh sásra tuairiscithe cláraithe agus comhpháirt táille taifeadbhunaithe an idirbhirt á ríomh. Chun críoch deimhneachta dlíthiúla agus chun dearbhú a thabhairt do shásraí tuairiscithe cláraithe nach n-úsáidtear an rogha sin chun costais incháilithe na Gníomhaireachta a mhéadú go míchuí, ba cheart uasteorainn a chur leis an ioncam iomlán is féidir leis an nGníomhaireacht a fháil, lena n-áirítear an formhuirear sin, chuig an ioncam measta ó tháillí mar a chuirtear i láthair iad i nDoiciméad Clársceidealaithe na Gníomhaireachta le haghaidh 2025-2027 nó chuig an ioncam ó tháillí arna mbuiséadú i nDoiciméad Clársceidealaithe na Gníomhaireachta le haghaidh 2026-2028, cibé acu den dá luach is ísle.

(30)

Tá ríomh chomhpháirt táille taifeadbhunaithe an idirbhirt an-éagsúil ó 2026 ar aghaidh i gcomparáid le ríomh na comhpháirte sin sna blianta roimhe sin. In 2026 d’fhéadfadh luachanna áibhéalacha don mhéid ceartúcháin a bheith mar thoradh air sin nuair a ríomhtar é chun difríochtaí a chothromú idir comhpháirt táille taifeadbhunaithe an idirbhirt a íocadh in 2025 agus comhpháirt táille taifeadbhunaithe an idirbhirt a d’íocfaí de réir an tuairiscithe iarbhír in 2025. In 2026, dá bhrí sin, ba cheart don Ghníomhaireacht an méid ceartúcháin a ríomh trí chomhpháirt táille taifeadbhunaithe an idirbhirt a íocadh in 2025 a dhealú ó chomhpháirt táille taifeadbhunaithe an idirbhirt arna ríomh, ach ó luach réamhchinntithe arna ríomh de réir na bhfo-chomhpháirteanna táillí in aghaidh na braisle sonraí is infheidhme roimh ghlacadh an Chinnidh seo.

(31)

Tuairiscítear tuarascálacha risíochta ex-post, agus dá bhrí sin sa bhliain ina dtagann an oibleagáid tuairiscithe risíochta chun bheith infheidhme (‘an bhliain tagartha’) gheobhaidh an Ghníomhaireacht níos lú tuarascálacha risíochta ná mar a gheobhaidh sí sna blianta ina dhiaidh sin. Dá bhrí sin, ní mór an líon tuarascálacha ar neamhchosaint a thuairiscíonn sásra tuairiscithe cláraithe sa bhliain tagartha a oiriúnú chun bheith ina bhonn cuí chun comhpháirt na táille bunaithe ar thuarascáil ar neamhchosaint sa bhliain féilire tar éis na bliana tagartha a ríomh. Ní ríomhfar comhpháirt na táille bunaithe ar thuarascáil ar neamhchosaint sa bhliain tagartha.

(32)

Chun nach mbeadh gá leis an gCinneadh seo a leasú toisc nach leor an t-ioncam ó tháillí chun costais incháilithe mar gheall ar bhoilsciú a chumhdach, agus ar an gcúis sin amháin, ba cheart táillí a choigeartú go huathoibríoch don bhoilsciú má thiteann ioncam ó tháillí faoi bhun na gcostas incháilithe. Thairis sin, chun go mbeidh sásraí tuairiscithe cláraithe agus ardáin faisnéise ón taobh istigh in ann ullmhú do na hathruithe ar na comhpháirteanna táille éagsúla, níor cheart éifeacht a bheith ag an gcoigeartú ach amháin an bhliain dár gcionn agus ba cheart don Ghníomhaireacht é a fhógairt luath go leor roimh ré.

(33)

Ba cheart don Ghníomhaireacht sonraisc a sheoladh chuig sásraí tuairiscithe cláraithe agus ardáin faisnéise ón taobh istigh. Ós rud é go gcinntear na táillí go hiomlán leis an gCinneadh seo, arb é an bunús é leis an nGníomhaireacht lena mbunaítear na méideanna is infhaighte, i gcomhréir le hAirteagal 71 de Rialachán Airgeadais na Gníomhaireachta, ba cheart na sonraisc a bheith ina nótaí dochair.

(34)

Ba cheart faisnéis a áireamh sna sonraisc a sheoltar chuig sásraí tuairiscithe cláraithe faoin gcaoi ar ríomhadh an táille chun é a dhéanamh trédhearcach don sásra tuairiscithe cláraithe cén chaoi a bhfuil sonraí á dtuairisciú ag na rannpháirtithe éagsúla sa mhargadh chun rannchuidiú leis an táille shonrasctha. Chun ualach airgeadais míchuí ar shásraí tuairiscithe cláraithe a sheachaint, ba cheart é a bheith indéanta sonraisc mhóra a íoc ina dtráthchodanna i gcomhaontú leis an nGníomhaireacht. Ag an am céanna, ní mór ioncam rialta agus inphleanáilte ó tháillí a bheith ag an nGníomhaireacht chun go mbeidh sí in ann a costais a chumhdach agus a caiteachas a phleanáil dá réir. D’fhéadfadh sé go gciallódh an méadú ar ioncam ó tháillí nach mbeadh sciar suntasach den ioncam sin ar fáil don Ghníomhaireacht níos déanaí sa bhliain dá gcloífí le sprioc-am an 30 Meán Fómhair le haghaidh na sonrasc uile. Dá bhrí sin, níor cheart feidhm a bheith ag sprioc-am an 30 Meán Fómhair ach amháin maidir leis na sonraisc is airde, ach ba cheart sonraisc níos ísle a íoc tráth nach déanaí ná an 30 Meitheamh.

(35)

Maidir le cinneadh a dhéanamh i ndáil lena mhéid is féidir le hoibreoirí córais tarchurtha leictreachais nó gáis ar sásraí tuairiscithe cláraithe iad costais a aisghabháil, ar costais iad a thabhaítear de bharr iallach a bheith orthu na táillí a íoc atá dlite don Ghníomhaireacht ó úsáideoirí gréasáin trí tharaifí gréasáin, is cuid de dhualgais agus de chumhachtaí údaráis rialála na mBallstát é de bhun Airteagal 59(1) de Threoir (AE) 2019/944 ó Pharlaimint na hEorpa agus ón gComhairle (9) agus Airteagal 78(1) de Threoir (AE) 2024/1788 ó Pharlaimint agus ón gComhairle (10).

(36)

Ceanglaítear ar an gCoimisiún le hAirteagal 32 de Rialachán (AE) 2019/942 scrúdú rialta a dhéanamh ar leibhéal na dtáillí. Ba cheart é sin a dhéanamh in éineacht leis na meastóireachtaí ar fheidhmíocht na Gníomhaireachta de bhun Airteagal 45 de Rialachán (AE) 2019/942. Ní chuireann ceanglas den sórt sin cosc ar an gCoimisiún athbhreithniú a dhéanamh ar an scéim táillí go neamhspleách ar na meastóireachtaí sin.

(37)

I gcomhréir le hAirteagal 32 de Rialachán (AE) 2019/942, rinneadh comhairliúchán poiblí agus chuathas i gcomhairle le Bord Riaracháin agus Bord Rialálaithe na Gníomhaireachta,

(1)

ciallaíonn ‘sásra tuairiscithe cláraithe’ eintiteas arna údarú ag an nGníomhaireacht i gcomhréir le hAirteagal 9a de Rialachán (AE) Uimh. 1227/2011 nó arna chlárú ag an nGníomhaireacht i gcomhréir le hAirteagal 11 de Rialachán Cur Chun Feidhme (AE) Uimh. 1348/2014 chun taifid idirbhirt nó sonraí bunúsacha a thuairisciú;

(2)

ciallaíonn ‘taifead idirbhirt’ tacar sonraí aonair ina bhfuil mionsonraí faoi thrádáil, ordú chun trádála, is cuma é a bheith meaitseáilte nó gan bheith, nó trádáil dhéthaobhach a bhaineann le táirgí mórdhíola fuinnimh, lena n-áirítear aon teagmhas saolré de chuid na dtrádálacha sin, na n-orduithe chun trádála nó na dtrádálacha déthaobhacha sin, ar tacar é a thuairiscítear don Ghníomhaireacht, gan sonraí a bhaineann le horduithe arna nginiúint ag córas a áireamh;

(3)

ciallaíonn ‘tuarascáil ar neamhchosaint’ aighneacht aonair ó shásra tuairiscithe cláraithe thar ceann rannpháirtí sa mhargadh chuig an nGníomhaireacht i gcomhréir le hAirteagal 8 de Rialachán (AE) Uimh. 1227/2011 ina bhfuil faisnéis ar an mbonn a ríomhann an Ghníomhaireacht neamhchosaintí an rannpháirtí margaidh sin;

(4)

ciallaíonn ‘rannpháirtí margaidh’ eintiteas atá cláraithe leis an údarás rialála náisiúnta sa Bhallstát i gcomhréir le hAirteagal 9 de Rialachán (AE) Uimh. 1227/2011.