(1)

Fl-ewwel rapport tagħha dwar l-applikazzjoni tar-Regolament (KE) Nru 1082/2006, il-Kummissjoni pproponiet għadd ta' emendi (2). Ir-Regolament (UE) Nru 1302/2013 tal-Parlament Ewropew u tal-Kunsill (3) tejjeb, ikkjarifika u ssimplifika t-twaqqif u l-funzjonament tar-raggruppamenti Ewropej ta' Kooperazzjoni Territorjali (“REKT”).

(2)

F'konformità mal-ewwel paragrafu tal-Artikolu 17 tar-Regolament (KE) Nru 1082/2006, il-Kummissjoni għandha tibgħat lill-Parlament Ewropew, lill-Kunsill u lill-Kumitat tar-Reġjuni rapport dwar l-applikazzjoni ta' dan ir-Regolament, filwaqt li tivvaluta, fuq il-bażi ta' ċerti indikaturi, l-effettività, l-effiċjenza, ir-rilevanza, il-valur miżjud Ewropew u l-marġini għas-simplifikazzjoni tiegħu.

(3)

Jenħtieġ li l-indikaturi jgħinu lill-Kummissjoni tifforma opinjoni dwar il-progress li sar sa issa. Jenħtieġ li tiġi introdotta data ta' skadenza għall-ġbir ta' informazzjoni għar-rapport u l-progress jenħtieġ li jiġi vvalutat billi s-sitwazzjoni f'ċertu xenarju bażi titqabbel mas-sitwazzjoni fid-data ta' skadenza stabbilita. Jenħtieġ li jintużaw kemm l-indikaturi kwantitattivi kif ukoll dawk kwalitattivi meta jitfassal ir-rapport.

(4)

F'konformità mat-tieni subparagrafu tal-Artikolu 3 tar-Regolament (UE) Nru 1302/2013, dan ir-Regolament japplika mit-22 ta' Ġunju 2014. F'konformità mad-dispożizzjonijiet tranżizzjonali fl-Artikolu 2 ta' dan ir-Regolament, il-proċedura ta' approvazzjoni tar-REKT li huma fil-proċess li jitwaqqfu tiddependi fuq id-data tat-22 ta' Ġunju 2014. Ix-xenarju bażi għall-indikaturi li jkejlu l-progress, għalhekk, jenħtieġ li jkun dak tas-sitwazzjoni fil-21 ta' Ġunju 2014. Id-data ta' skadenza biex tkun irċevuta data jew informazzjoni għall-użu tal-indikatur tista' tiġi stabbilita biss waqt ħidma preparatorja għar-rapport dwar l-applikazzjoni tar-Regolament u jenħtieġ li tissemma fir-rapport.

(5)

Jenħtieġ li l-indikatur tal-effettività juri kemm ir-Regolament (KE) Nru 1082/2006 qed jirnexxielu jilħaq b'suċċess l-objettivi tiegħu jew jagħmel progress fl-ilħuq tagħhom.

(6)

L-indikatur tal-effiċjenza jikkunsidra r-relazzjoni bejn ir-riżorsi jew l-inputs użati u l-bidliet jew ir-riżultati ġġenerati. Fir-rigward tal-proċedura ta' approvazzjoni għat-twaqqif tar-REKT, l-informazzjoni dwar l-ispejjeż varji għat-twaqqif ta' korpi ġuridiċi għall-kooperazzjoni tista' tiġi ġġenerata biss mill-awtoritajiet nazzjonali li kienu approvaw korpi komparabbli qabel. Fl-ambitu tal-valutazzjoni tal-progress tar-REKT u indirettament tal-effiċjenza tar-Regolament (KE) Nru 1082/2006 sa issa, jenħtieġ li l-ispejjeż għall-funzjonament ta' dawk ir-REKT jitqabblu mal-ispejjeż involuti fir-twaqqif ta' korp ġuridiku differenti għall-kooperazzjoni. Tqabbil bħal dan jista', madankollu, jsir biss ma' REKT li kienu waqqfu minn qabel korp ġuridiku differenti għall-kooperazzjoni.

(7)

L-indikatur tar-rilevanza jikkunsidra l-estent sa fejn l-objettivi u d-dispożizzjonijiet tar-Regolament (KE) Nru 1082/2006 jikkorrispondu mal-ħtiġijiet tal-membri prospettivi tar-REKT.

(8)

L-indikatur tas-sostenibbiltà, li huwa marbut mar-rilevanza, jikkunsidra l-għadd ta' REKT irreġistrati, li fil-fatt ma qed iwettqu l-ebda attività.

(9)

L-indikatur tal-valur miżjud Ewropew jikkunsidra jekk ir-REKT ġewx imwaqqfa grazzi għar-Regolament (KE) Nru 1082/2006, f'każ li l-membri tar-REKT ma setgħux iwaqqfu korpi ġuridiċi għall-kooperazzjoni territorjali skont il-liġi internazzjonali jew nazzjonali.

(10)

Fir-rigward tal-marġini għal simplifikazzjoni ulterjuri tar-Regolament (KE) Nru 1082/2006, jenħtieġ li jiġu vvalutati l-elementi għas-simplifikazzjoni, bħall-proċedura għat-twaqqif ta' REKT ġodda, inkluża l-approvazzjoni taċita mill-awtoritajiet ta' approvazzjoni nazzjonali, kif introdotti mir-Regolament (UE) Nru 1302/2013,