(1)

Le Rialachán (AE) 2022/2371, cuirtear leis na ceachtanna a foghlaimíodh ó phaindéim COVID-19, lena n-áirítear maidir leis an ngá an fhreagairt ar bhagairtí tromchúiseacha trasteorann ar an tsláinte a chomhordú go dlúth laistigh den Choiste Slándála Sláinte (CSS).

(2)

Ba cheart an Córas Luathrabhaidh agus Freagartha a bheith ar an bpríomhuirlis atá le húsáid chun comhairliúchán agus freagairt ar bhagairt thromchúiseach trasteorann ar an tsláinte laistigh den Choiste Slándála Sláinte a iarraidh, agus chun faisnéis a bhaineann leis an mbagairt sin a mhalartú, go háirithe chun faisnéis ar an leibhéal slándála ‘Íogair neamh-rúnaicmithe’ (2) ar a laghad a mhalartú. Féadfar iarrataí agus malartú faisnéise den sórt sin a dhéanamh freisin le linn cruinniú den Choiste Slándála Sláinte. Ina theannta sin, féadfar iarraidh ar chomhairliúchán agus ar chomhordú a chur chuig rúnaíocht an Choiste Slándála Sláinte.

(3)

I gcás ina dtagann bagairt thromchúiseach trasteorann ar an tsláinte chun cinn lena gcomhlíontar na critéir a shainítear in Airteagal 19(1) de Rialachán (AE) 2022/2371 nó i gcás ina bhfuil bagairt den sórt sin ag forbairt, tá na húdaráis inniúla náisiúnta nó an Coimisiún le fógra a thabhairt faoi fholáireamh in EWRS. Tá sé d’oibleagáid ar na Stáit is Páirtithe san Eagraíocht Dhomhanda Sláinte fógra a thabhairt don Eagraíocht Dhomhanda Sláinte laistigh de 24 uair an chloig tar éis measúnú a dhéanamh ar fhaisnéis sláinte poiblí faoi imeacht a d’fhéadfadh a bheith ina éigeandáil sláinte poiblí arb ábhar imní ar leibhéal náisiúnta idirnáisiúnta í, i gcomhréir leis na Rialacháin Sláinte Idirnáisiúnta (RSI 2005) (3). I gcás ina dtabharfaidh na húdaráis inniúla náisiúnta fógra don Eagraíocht Dhomhanda Sláinte, ní mór dóibh fógra comhuaineach a thabhairt faoi fholáireamh in EWRS ar choinníoll go dtagann an bhagairt lena mbaineann faoi na bagairtí sin dá dtagraítear in Airteagal 2(1) de Rialachán (AE) 2022/2371. Chun go bhféadfar fógra comhuaineach a thabhairt, is féidir leis na húdaráis inniúla náisiúnta fógra a thugtar in EWRS a aistriú chuig pointe fócasach RSI na hEagraíochta Domhanda Sláinte.

(4)

I gcomhréir le hAirteagal 21(1) de Rialachán (AE) 2022/2371, tar éis fógra foláirimh de bhun Airteagal 19 de, arna iarraidh sin don Choimisiún nó do Bhallstát agus ar bhonn na faisnéise atá ar fáil, lena n-áirítear an fhaisnéis dá dtagraítear in Airteagal 19 agus na measúnuithe riosca dá dtagraítear in Airteagal 20, ní mór do na Ballstáit dul i gcomhairle le chéile agus comhordú a dhéanamh laistigh den Choiste Slándála Sláinte agus i gcomhar leis an gCoimisiún, maidir le freagairtí náisiúnta, cumarsáid i dtaobh rioscaí agus géarchéimeanna a bhfuil sé d’aidhm aici faisnéis chomhsheasmhach chomhordaithe a sholáthar, glacadh tuairimí agus treoraíochta agus tacaíocht a thabhairt do Shocruithe Comhtháite an Aontais maidir le Freagairt Pholaitiúil ar Ghéarchéimeanna i gcás a ghníomhachtaithe. I gcomhréir le hAirteagal 2(4) de Rialachán (AE) 2022/2371, i staideanna éigeandála eisceachtúla, féadfaidh Ballstát nó an Coimisiún a iarraidh go ndéanfaí freagairt a chomhordú laistigh den Choiste Slándála Sláinte maidir le bagairtí tromchúiseacha trasteorann ar an tsláinte seachas na cinn sin a luaitear in Airteagal 2(1), má mheastar nach leor na bearta sláinte poiblí a rinneadh roimhe seo chun ardleibhéal cosanta a áirithiú do shláinte an duine.

(5)

Ba cheart do na Ballstáit agus don Choimisiún measúnú a dhéanamh ar an ngá comhairliúchán agus comhordú a dhéanamh ar an bhfreagairt ar bhagairt thromchúiseach trasteorann ar an tsláinte laistigh den Choiste Slándála Sláinte sula ndéantar iarraidh ar an gcomhairliúchán agus ar an gcomhordú sin. Tar éis iarraidh a bheith curtha isteach, ba cheart don Choimisiún an comhairliúchán agus an comhordú a eagrú go pras.

(6)

Chun go mbeidh na Ballstáit agus an Coimisiún in ann measúnú a dhéanamh ar an ngá atá le comhairliúchán agus freagairt a chomhordú laistigh den Choiste Slándála Sláinte, ba cheart a shonrú san fhógra foláirimh na cúiseanna lena gcinntear go gcomhlíonann teacht chun cinn nó forbairt bagartha tromchúisí trasteorann ar an tsláinte critéir Airteagal 19(1) de Rialachán (AE) 2022/2371.

(7)

I gcomhréir le hAirteagal 21(2) agus (3) de Rialachán (AE) 2022/2371, i gcás ina bhfuil sé beartaithe ag Ballstát bearta sláinte poiblí a ghlacadh nó a fhoirceannadh mar fhreagairt ar bhagairt thromchúiseach trasteorann ar an tsláinte, ní mór dó an Coiste Slándála Sláinte a chur ar an eolas, dul i gcomhairle leis agus comhordú a dhéanamh laistigh de.

(8)

Malartú tráthúil faisnéise maidir leis an mbagairt thromchúiseach trasteorann ar an tsláinte agus ar bearta sláinte poiblí, tá siad ríthábhachtach chun freagairt a chomhordú. Ba cheart do na Ballstáit bealaí cumarsáide éifeachtacha a bhunú idir na húdaráis inniúla ábhartha. I bhfianaise a chasta atá géarchéimeanna a bhaineann leis an tsláinte, tá gá le comhar trasearnála i gcomhréir leis an gcur chuige Aon Sláinte Amháin chun freagairt éifeachtach chomhréireach a thabhairt.

(9)

Tráth a dhéantar iarraidh ar chomhairliúchán agus ar fhreagairt ar an mbagairt thromchúiseach trasteorann ar an tsláinte a chomhordú, ba cheart don Choimisiún a iarraidh go dtionólfaí comhairliúchán laistigh den Choiste Slándála Sláinte. I bprionsabal, ba cheart an comhairliúchán sin a dhéanamh tráth nach déanaí ná 48 n-uair an chloig tar éis an iarraidh a fháil. Ba cheart go bhféadfaí an tréimhse ama sin a oiriúnú de réir phráinn an iarrata nó dhéine na bagartha.

(10)

Sula nglacann Ballstáit bearta sláinte poiblí chun freagairt do bhagairt thromchúiseach trasteorann ar an tsláinte nó sula bhfoirceannann siad iad, ba cheart dóibh na Ballstáit eile sa Choiste Slándála Sláinte a chur ar an eolas maidir le cineál, cuspóir agus raon feidhme na mbeart sin agus ba cheart dóibh dul i gcomhairle agus i gcomhordú leo maidir leo a luaithe is féidir agus 14 lá ar a laghad roimh ré. I gcás ina ndéanann Ballstáit bearta sláinte poiblí a ghlacadh nó a fhoirceannadh láithreach, ba cheart dóibh na Ballstáit eile agus an Coimisiún a chur ar an eolas go pras agus tráth nach déanaí ná 24 uair an chloig tar éis na bearta sin a ghlacadh nó a fhoirceannadh.

(11)

Ós rud é go bhfuil faisnéis chruinn agus cumarsáid thráthúil leis an bpobal agus le páirtithe leasmhara, amhail gairmithe cúraim sláinte agus sláinte poiblí, fíor-riachtanach le haghaidh freagairt éifeachtach, ba cheart foráil a dhéanamh sa Rialachán seo maidir leis an nós imeachta chun faisnéis maidir le bearta cumarsáide a chomhroinnt agus teachtaireachtaí cumarsáide riosca agus géarchéime atá comhsheasmhach agus comhordaithe a fhorbairt laistigh den Choiste Slándála Sláinte.

(12)

Is é is aidhm do na Socruithe Comhtháite maidir le Freagairt Pholaitiúil ar Ghéarchéimeanna comhleanúnachas agus comhlántacht an Aontais agus na mBallstát a áirithiú sa Chomhairle i gcás agairt an chlásail dlúthpháirtíochta dá dtagraítear i gCinneadh 2014/415/AE ón gComhairle (4). Leis na Socruithe Comhtháite maidir le Freagairt Pholaitiúil ar Ghéarchéimeanna, cumasaítear comhordú agus freagairt thráthúil ar leibhéal polaitiúil an Aontais i gcás géarchéimeanna a bhfuil tionchar fadréimseach nó tábhacht pholaitiúil ag baint leo (5). I gcomhréir le hAirteagal 21(1) de Rialachán (AE) 2022/2371, arna iarraidh sin don Choimisiún nó do Bhallstát, ní mór do na Ballstáit dul i gcomhairle le chéile agus comhordú a dhéanamh laistigh den Choiste Slándála Sláinte maidir leis an tacaíocht do na Socruithe Comhtháite maidir le Freagairt Pholaitiúil ar Ghéarchéimeanna, lena n-áirítear trí mhalartú faisnéise, agus trína thuairimí agus a threoraíocht a chomhroinnt. Ba cheart do rúnaíocht an Choiste Slándála Sláinte idirchaidreamh a dhéanamh le rúnaíocht na Socruithe Comhtháite maidir le Freagairt Pholaitiúil ar Ghéarchéimeanna chun gníomhaíocht chomhleanúnach éifeachtúil a áirithiú agus chun dúbláil iarrachtaí a sheachaint.

(13)

Ós rud é go bhfuil sé beartaithe leis an Rialachán seo cuid de Chinneadh Cur Chun Feidhme (AE) 2017/253 ón gCoimisiún (6) a thabhairt cothrom le dáta, ba cheart Airteagal 2 agus Airteagail 4 go 6 den chinneadh sin a scriosadh.

(14)

Tá na bearta dá bhforáiltear sa Rialachán seo i gcomhréir leis an tuairim ón gCoiste maidir le bagairtí tromchúiseacha trasteorann ar an tsláinte,