European flag

Iris Oifigiúil
an Aontais Eorpaigh

GA

Sraith L


2026/2571

16.11.2026

CINNEADH (CBES) 2026/2571 ÓN gCOMHAIRLE

an 16 Samhain 2026

lena leasaítear Cinneadh (CBES) 2020/1999 maidir le bearta sriantacha in aghaidh sáruithe agus mí-úsáidí tromchúiseacha ar chearta an duine

TÁ COMHAIRLE AN AONTAIS EORPAIGH,

Ag féachaint don Chonradh ar an Aontas Eorpach, agus go háirithe Airteagal 29 de,

Ag féachaint don togra ó Ardionadaí an Aontais do Ghnóthaí Eachtracha agus don Bheartas Slándála,

De bharr an mhéid seo a leanas:

(1)

An 7 Nollaig 2020, ghlac an Chomhairle Cinneadh (CBES) 2020/1999 (1).

(2)

An 8 Nollaig 2020, trí bhíthin an Dearbhaithe ó Ardionadaí an Aontais do Ghnóthaí Eachtracha agus don Bheartas Slándála (‘an tArdionadaí’), thar ceann an Aontais Eorpaigh, maidir le córas domhanda smachtbhannaí an Aontais Eorpaigh i ndáil le cearta an duine, d’athdhearbhaigh an tAontas agus a Bhallstáit gurb é a dtiomantas láidir cearta an duine a chur chun cinn agus a chosaint ar fud an domhain. Le córas domhanda smachtbhannaí an Aontais i ndáil le cearta an duine, leagtar béim ar a mheáite atá an tAontas feabhas a chur ar a ról maidir le haghaidh a thabhairt ar sháruithe agus mí-úsáidí tromchúiseacha i réimse chearta an duine ar fud an domhain. Is sprioc straitéiseach den Aontas é teachtadh éifeachtach chearta an duine ag an uile dhuine a bhaint amach. Is bunluach de chuid an Aontais agus de chomhbheartas eachtrach agus slándála an Aontais é meas ar dhínit an duine, ar an tsaoirse, ar an daonlathas, ar an gcomhionannas, ar an smacht reachta agus ar chearta an duine.

(3)

Sa ráiteas uaidh os comhair Chomhairle Slándála na Náisiún Aontaithe an 24 Meitheamh 2026, chuir an tAontas in iúl gur cúis mhór imní dó an méadú as cuimse ar sháruithe tromchúiseacha in aghaidh leanaí i gcoinbhleacht armtha, leag sé béim ar a thábhachtaí atá sé na sáruithe a chosc agus cuntasacht a áirithiú i ndáil leo siúd atá freagrach, agus d’iarr sé ar na páirtithe uile i gcoinbhleacht armtha seasamh lena n-oibleagáidí faoin dlí idirnáisiúnta agus bearta nithiúla a dhéanamh chun deireadh a chur le sáruithe in aghaidh leanaí agus iad a chosc.

(4)

Sa chomhthéacs sin, ba cheart ceithre eintiteas a chur le liosta na ndaoine nádúrtha agus dlítheanacha, na n-eintiteas agus na gcomhlachtaí atá faoi réir na mbeart sriantach a leagtar amach san Iarscríbhinn a ghabhann le Cinneadh (CBES) 2020/1999.

(5)

Dá bhrí sin, ba cheart Cinneadh (CBES) 2020/1999 a leasú dá réir,

TAR ÉIS AN CINNEADH SEO A GHLACADH:

Airteagal 1

Leasaítear an Iarscríbhinn a ghabhann le Cinneadh (CBES) 2020/1999 i gcomhréir leis an Iarscríbhinn a ghabhann leis an gCinneadh seo.

Airteagal 2

Tiocfaidh an Cinneadh seo i bhfeidhm ar dháta a fhoilsithe in Iris Oifigiúil an Aontais Eorpaigh.

Arna dhéanamh sa Bhruiséil, an 16 Samhain 2026.

Thar ceann na Comhairle

An tUachtarán

K. KALLAS


(1)  Cinneadh (CBES) 2020/1999 ón gComhairle an 7 Nollaig 2020 maidir le bearta sriantacha in aghaidh sáruithe agus mí-úsáidí tromchúiseacha ar chearta an duine (IO L 410 I, 7.12.2020, lch. 13, ELI: http://data.europa.eu/eli/dec/2020/1999/oj).


IARSCRÍBHINN

San Iarscríbhinn a ghabhann le Cinneadh (CBES) 2020/1999, cuirtear na hiontrálacha seo a leanas le liosta na ndaoine nádúrtha agus dlítheanacha, na n-eintiteas agus na gcomhlachtaí faoin gceannteideal ‘B. Daoine dlítheanacha, eintitis agus comhlachtaí’:

 

Ainmneacha (Traslitriú go haibítir na Laidine)

Ainmneacha

Faisnéis aitheantais

Cúiseanna lena liostú

Dáta an liostaithe

‘46.

5 Segond

 

Seoladh: Village de Dieu, Port-au-Prince, Háítí

Cineál eintitis: drong choiriúil armtha neamhstáit

Is grúpa coiriúil armtha é 5 Segond atá ag feidhmiú i Háítí.

Tá 5 Segond freagrach as maruithe, éigniú agus cineálacha eile foréigin ghnéasaigh agus inscnebhunaithe, fuadach, sracadh, goid, píoráideacht, bac a chur ar chabhair dhaonnúil, ionsaithe ar shibhialtaigh agus ar bhonneagar sibhialtach, agus gáinneáil ar airm agus ar dhrugaí.

Tá sáruithe tromchúiseacha inar díríodh ar leanaí déanta ag 5 Segond, lena n-áirítear foréigean gnéasach. Sainaithníodh comhaltaí de 5 Segond a bheith freagrach as éigniú bheirt chailíní, idir 3 bliana agus 12 bhliain d’aois, ag suíomh do dhaoine easáitithe ina dtír féin i mí an Mhárta 2024. Rinne an grúpa ionsaithe freisin a rinne difear don bhonneagar sláinte agus do sheirbhísí daonnúla.

Dá bhrí sin, tá 5 Segond freagrach as sáruithe agus mí-úsáidí tromchúiseacha i réimse chearta an duine, lena n-áirítear foréigean córasach forleathan gnéasach agus inscnebhunaithe.

16.11.2026

47.

400 Mawozo

 

Seoladh: Croix-des-Bouquets, ceantar meitreapholaiteach Port-au-Prince, Háítí

Cineál eintitis: drong choiriúil armtha neamhstáit

Is grúpa coiriúil armtha é 400 Segond atá ag feidhmiú i Háítí.

Tá 400 Mawozo freagrach as leanaí a earcú agus as teacht i dtír gnéasach ar leanaí, rud a fhágann iad gan chosaint ar fhoréigean armtha agus ar mhí-úsáidí tromchúiseacha eile. Tá 400 Mawozo freagrach freisin as maruithe, éigniú agus cineálacha eile foréigin ghnéasaigh agus inscnebhunaithe, lena n-áirítear éigniú mionaoiseach, fuadach, ionsaithe ar shibhialtaigh, creachadh, scriosadh maoine poiblí, fuadach trucailí, ionsaithe a chuireann isteach ar chúnamh daonnúil, agus easáitiú éigeantach.

Dá bhrí sin, tá 400 Mawozo freagrach as sáruithe agus mí-úsáidí tromchúiseacha i réimse chearta an duine, maruithe, agus foréigean córasach forleathan gnéasach agus inscnebhunaithe.

16.11.2026

48.

Gran Ravine

 

Seoladh: Port-au-Prince ouest, Háítí

Cineál eintitis: drong choiriúil armtha neamhstáit

Is grúpa coiriúil armtha é Gran Ravine atá ag feidhmiú i Háítí.

Tá Gran Ravine freagrach as maruithe, éigniú agus cineálacha eile foréigin ghnéasaigh agus inscnebhunaithe, fuadach, ionsaithe ar shibhialtaigh, scriosadh maoine, agus gníomhartha eile foréigin i gcoinne pobail shibhialtacha.

Faoi cheannaireacht Renel Destina, ar a dtugtar freisin “Ti Lapli”, tá dúnmharú, éigniú, fuadach agus coireanna tromchúiseacha eile déanta ag Gran Ravine. Tá ionsaithe déanta ag an ngrúpa ba shiocair le básanna sibhialtacha, le heasáitiú, agus le cur isteach ar sheirbhísí fíor-riachtanacha.

Dá bhrí sin, tá Gran Ravine freagrach as sáruithe agus mí-úsáidí tromchúiseacha i réimse chearta an duine, lena n-áirítear maruithe agus foréigean córasach forleathan gnéasach agus inscnebhunaithe.

16.11.2026

49.

Krazé Baryè

 

Seoladh: Ceantar meitreapholaiteach Port-au-Prince, lena n-áirítear Pétion-Ville agus comúin chomharsanachta

Cineál eintitis: drong choiriúil armtha neamhstáit

Is grúpa armtha coiriúil é Krazé Baryè atá ag feidhmiú go príomha i limistéar cathrach Port-au-Prince, Háítí.

Tá Krazé Baryè freagrach as leanaí a earcú agus as teacht i dtír gnéasach ar leanaí, rud a fhágann iad gan chosaint ar fhoréigean armtha agus ar mhí-úsáidí tromchúiseacha eile. Tá Krazé Baryè freagrach freisin as maruithe, éigniú agus cineálacha eile foréigin ghnéasaigh agus inscnebhunaithe, fuadach, ionsaithe ar shibhialtaigh, scriosadh maoine, agus easáitiú éigeantach.

Tá Krazé Baryè freagrach, dá bhrí sin, as sáruithe agus mí-úsáidí tromchúiseacha i réimse chearta an duine, lena n-áirítear leanaí a earcú agus teacht i dtír gnéasach ar leanaí, marú agus ballbhascadh leanaí, maruithe, agus foréigean córasach forleathan gnéis agus inscnebhunaithe.

16.11.2026’.


ELI: http://data.europa.eu/eli/dec/2026/2571/oj

ISSN 1977-0839 (electronic edition)