(1)

L-infezzjoni bil-virus tal-marda tal-infafet fil-ġilda hija marda infettiva li tinġarr minn vettur u li taffettwa lill-annimali bovini. L-okkorrenza tagħha tista’ tħalli impatt sever fuq il-popolazzjoni tal-annimali kkonċernati u fuq il-profittabbiltà tal-biedja, filwaqt li tikkawża wkoll disturb fil-movimenti tal-kunsinni ta’ dawk l-annimali u tal-prodotti tagħhom fl-Unjoni u fl-esportazzjonijiet lejn pajjiżi terzi. Fil-każ ta’ tifqigħa tal-infezzjoni bil-virus tal-marda tal-infafet fil-ġilda fl-annimali bovini, hemm riskju serju li dik il-marda tinxtered fi stabbilimenti oħra li jżommu l-annimali bovini, b’mod partikolari minħabba l-mod ta’ trażmissjoni tagħha permezz tal-vetturi.

(2)

Ir-Regolament Delegat tal-Kummissjoni (UE) 2020/687 (2) jissupplimenta r-regoli għall-kontroll tal-mard elenkat imsemmi fl-Artikolu 9(1), il-punti (a), (b) u (c), tar-Regolament (UE) 2016/429, u definit bħala mard tal-kategoriji A, B u C fir-Regolament ta’ Implimentazzjoni tal-Kummissjoni (UE) 2018/1882 (3). B’mod partikolari, l-Artikoli 21 u 22 tar-Regolament Delegat (UE) 2020/687 jipprevedu l-istabbiliment ta’ żona ristretta f’każ ta’ tifqigħa ta’ marda tal-kategorija A, inkluż l-infezzjoni bil-virus tal-marda tal-infafet fil-ġilda, u ċerti miżuri li għandhom jiġu applikati fiha. Barra minn hekk, l-Artikolu 21(1) ta’ dak ir-Regolament Delegat jipprevedi li ż-żona ristretta trid tkun tinkludi mill-inqas żona ta’ protezzjoni, żona ta’ sorveljanza, u, jekk ikun meħtieġ, żoni ristretti ulterjuri madwar iż-żoni ta’ protezzjoni u ta’ sorveljanza jew maġenbhom.

(3)

Id-daqs taż-żoni ta’ protezzjoni u ta’ sorveljanza, u d-durata tal-miżuri li għandhom jiġu applikati fihom, huma bbażati fuq il-kriterji stabbiliti fl-Artikolu 64(1) tar-Regolament (UE) 2016/429, kif ukoll fuq ir-regoli stabbiliti fir-Regolament Delegat (UE) 2020/687. Il-kriterji applikati għall-għażla tad-daqs taż-żoni ta’ protezzjoni u ta’ sorveljanza, kif ukoll tad-durata tal-miżuri li għandhom jiġu applikati fihom, ma jqisux biss is-sitwazzjoni epidemjoloġika fir-rigward tal-infezzjoni bil-virus tal-marda tal-infafet fil-ġilda fiż-żoni milquta minn dik il-marda, iżda anke fatturi epidemjoloġiċi oħra, inklużi l-parametri ġeografiċi u r-riskju li l-marda tkompli tinxtered. Meta ntgħażlet id-durata tal-miżuri previsti f’din id-Deċiżjoni tqiesu wkoll l-istandards internazzjonali tal-Kodiċi tas-Saħħa tal-Annimali Terrestri tal-Organizzazzjoni Dinjija għas-Saħħa tal-Annimali (4).

(4)

Ir-Regolament (UE) 2016/429, u b’mod partikolari l-Artikolu 69 tiegħu, jipprevedi li l-awtorità kompetenti ta’ Stat Membru tista’ tuża tilqim ta’ emerġenza għall-kontroll effettiv ta’ marda elenkata, kif imsemmi fl-Artikolu 9(1), il-punt (a), ta’ dak ir-Regolament, fl-annimali miżmuma. Għal dak il-għan, l-awtorità kompetenti tista’ tistabbilixxi żoni ta’ tilqim u tiżviluppa pjan ta’ tilqim li jissodisfa rekwiżiti speċifiċi. Ir-Regolament Delegat tal-Kummissjoni (UE) 2023/361 (5), li jissupplimenta r-regoli stabbiliti fir-Regolament (UE) 2016/429, jistabbilixxi, inter alia, ir-regoli speċifiċi li għandhom jiġu implimentati mill-Istati Membri meta jużaw tilqim protettiv ta’ emerġenza fl-annimali bovini għall-prevenzjoni jew għall-kontroll ta’ ċertu mard elenkat. Dak ir-Regolament Delegat jistabbilixxi wkoll il-kundizzjonijiet li fihom jistgħu jiġu permessi l-movimenti tal-annimali mlaqqma u tal-prodotti tagħhom. Il-kundizzjonijiet speċifiċi għat-tilqim protettiv ta’ emerġenza kontra l-infezzjoni bil-virus tal-marda tal-infafet fil-ġilda huma stabbiliti fl-Anness IX ta’ dak ir-Regolament Delegat.

(5)

Id-Deċiżjoni ta’ Implimentazzjoni tal-Kummissjoni (UE) 2025/2248 (6) tistabbilixxi ċerti miżuri ta’ emerġenza relatati mal-infezzjoni bil-virus tal-marda tal-infafet fil-ġilda fi Spanja. B’mod aktar partikolari, l-Artikolu 1, il-punt (a), ta’ dik id-Deċiżjoni ta’ Implimentazzjoni jeħtieġ l-istabbiliment ta’ żona ristretta, li tinkludi żoni ta’ protezzjoni u ta’ sorveljanza, f’konformità mal-Artikolu 21 tar-Regolament Delegat (UE) 2020/687, f’dak l-Istat Membru, li trid tinkludi mill-inqas iż-żoni elenkati fl-Anness I ta’ dik id-Deċiżjoni ta’ Implimentazzjoni. Barra minn hekk, l-Artikolu 1, il-punt (b), ta’ dik id-Deċiżjoni ta’ Implimentazzjoni jipprevedi l-istabbiliment taż-żoni ta’ tilqim I u II fi Spanja, f’konformità mal-Parti I tal-Anness IX tar-Regolament Delegat (UE) 2023/361, u skont il-kundizzjonijiet stabbiliti fih. Jipprevedi wkoll li dawk iż-żoni ta’ tilqim iridu jinkludu mill-inqas iż-żoni elenkati bħala tali fl-Anness II tad-Deċiżjoni ta’ Implimentazzjoni (UE) 2025/2248. Barra minn hekk, l-Artikolu 1, il-punt (c), tad-Deċiżjoni ta’ Implimentazzjoni (UE) 2025/2248 jipprevedi li l-miżuri li jeħtieġ li jiġu applikati fiż-żoni ta’ protezzjoni u ta’ sorveljanza, kif ukoll fiż-żoni ta’ tilqim I u II, iridu japplikaw mill-inqas sad-dati elenkati fl-Annessi ta’ dik id-Deċiżjoni ta’ Implimentazzjoni.

(6)

Mill-adozzjoni tad-Deċiżjoni ta’ Implimentazzjoni (UE) 2025/2248, Franza nnotifikat seba’ tifqigħat ġodda tal-infezzjoni bil-virus tal-marda tal-infafet fil-ġilda fi stabbilimenti li jżommu l-annimali bovini f’ċerti żoni f’dak l-Istat Membru, li jmissu mal-Komunità tal-Katalonja, fi Spanja, fil-perjodu mit-30 ta’ Ottubru 2025 sas-17 ta’ Novembru 2025. B’reazzjoni għal dawk it-tifqigħat il-ġodda fi Franza, Spanja aġġornat iż-żoni ta’ protezzjoni u ta’ sorveljanza fil-Komunità tal-Katalonja f’dak l-Istat Membru, fejn jiġu applikati l-miżuri għall-kontroll tal-mard stabbiliti fir-Regolament Delegat (UE) 2020/687. Filwaqt li jitqiesu dawn it-tifqigħat reċenti fi Franza, iż-żoni elenkati bħala żoni ta’ protezzjoni u ta’ sorveljanza, u d-durata tal-miżuri li għandhom jiġu applikati fihom, fl-Anness I tad-Deċiżjoni ta’ Implimentazzjoni (UE) 2025/2248, jenħtieġ li jiġu aġġornati u emendati b’din id-Deċiżjoni.

(7)

Spanja nnotifikat lill-Kummissjoni li wara investigazzjoni klinika, epidemjoloġika u fil-laboratorju bir-reqqa, ir-riżultati tat-tifqigħa fil-Komunità tal-Katalonja nnotifikati fit-12 ta’ Novembru 2025 bħala ES-LSD-2025-0009, tqiesu bħala pożittivi foloz minħabba kontaminazzjoni matul l-ipproċessar. Għalhekk, jenħtieġ li dik it-tifqigħa titneħħa mill-Anness I tad-Deċiżjoni ta’ Implimentazzjoni (UE) 2025/2248.

(8)

Minħabba l-aġġornament taż-żoni ta’ protezzjoni u ta’ sorveljanza fil-Komunità tal-Katalonja fi Spanja, huwa meħtieġ li jiġu aġġustati ż-żoni ta’ tilqim I u II għall-infezzjoni bil-virus tal-marda tal-infafet fil-ġilda attwalment stabbiliti fl-Anness II tad-Deċiżjoni ta’ Implimentazzjoni (UE) 2025/2248, f’dak l-Istat Membru.

(9)

It-tip, id-daqs u d-durata taż-żoni ta’ tilqim I u II elenkati fl-Anness II tad-Deċiżjoni ta’ Implimentazzjoni (UE) 2025/2248 jista’ jkollhom bżonn jiġu emendati fid-dawl tas-sitwazzjoni epidemjoloġika li qed tevolvi fir-rigward tal-infezzjoni bil-virus tal-marda tal-infafet fil-ġilda, u tal-progress tal-kampanja ta’ tilqim, b’mod partikolari filwaqt li jitqies il-livell li qed jevolvi tal-kopertura tal-vaċċin miksub. Għaldaqstant, huwa meħtieġ li jiġu indikati, fl-Anness II ta’ dik id-Deċiżjoni ta’ Implimentazzjoni, id-dati għad-durata taż-żoni ta’ tilqim I u II.

(10)

L-Artikolu 2 tad-Deċiżjoni ta’ Implimentazzjoni (UE) 2025/2248 jipprojbixxi l-movimenti tal-annimali bovini miż-żoni ta’ protezzjoni u ta’ sorveljanza stabbiliti fl-Anness I ta’ dik id-Deċiżjoni ta’ Implimentazzjoni għal destinazzjonijiet barra mill-perimetru estern ta’ dawk iż-żoni fi Spanja jew barra minn dak l-Istat Membru sad-dati elenkati f’dak l-Anness. Fid-dawl tal-evoluzzjoni tas-sitwazzjoni epidemjoloġika fir-rigward tal-infezzjoni bil-virus tal-marda tal-infafet fil-ġilda fi Spanja, jeħtieġ li dik il-projbizzjoni tinżamm.

(11)

Għalhekk, jenħtieġ li l-Annessi tad-Deċiżjoni ta’ Implimentazzjoni (UE) 2025/2248 jiġu emendati kif xieraq.

(12)

Fid-dawl tas-sitwazzjoni epidemjoloġika attwali fi Spanja, l-emendi li għandhom isiru fid-Deċiżjoni ta’ Implimentazzjoni (UE) 2025/2248 b’din id-Deċiżjoni jenħtieġ li japplikaw malajr kemm jista’ jkun biex jiġi evitat li l-marda tkompli tinxtered fi Spanja, fi Stati Membri oħra, jew f’pajjiżi terzi u anke biex jiġi evitat kwalunkwe disturb bla bżonn għall-kummerċ fl-Unjoni jew kwalunkwe ostaklu mhux ġustifikat għall-kummerċ ma’ pajjiżi terzi.

(13)

Il-miżuri previsti f’din id-Deċiżjoni huma f’konformità mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,