(1)

Is galar tógálach veicteoir-iompartha é ionfhabhtú le víreas ghalar an chraicinn chnapánaigh a bhíonn ar bhó-ainmhithe. D’fhéadfadh tionchar tromchúiseach a bheith aige ar an daonra ainmhithe lena mbaineann agus ar bhrabúsacht na feirmeoireachta, rud a chuirfeadh isteach freisin ar ghluaiseacht choinsíneachtaí na n-ainmhithe sin agus ar tháirgí na n-ainmhithe sin laistigh den Aontas, agus ar onnmhairí go tríú tíortha. I gcás ráig d’ionfhabhtú le víreas ghalar an chraicinn chnapánaigh i mbó-ainmhithe, tá riosca tromchúiseach ann go leathfadh an galar sin go mbunaíochtaí eile ina gcoimeádtar bó-ainmhithe go háirithe mar gheall ar a mhodh tarchurtha trí veicteoirí.

(2)

Le Rialachán Tarmligthe (AE) 2020/687 ón gCoimisiún (2) forlíontar na rialacha maidir le rialú na ngalar liostaithe dá dtagraítear in Airteagal 9(1), pointí (a), (b) agus (c) de Rialachán (AE) 2016/429, agus a shainmhínítear mar ghalair de chatagóirí A, B agus C i Rialachán Cur Chun Feidhme (AE) 2018/1882 ón gCoimisiún (3). Go háirithe, le hAirteagail 21 agus 22 de Rialachán Tarmligthe (AE) 2020/687 déantar foráil maidir le crios srianta a bhunú i gcás ráig de ghalar de chatagóir A, lena n-áirítear ionfhabhtú le víreas ghalar an chraicinn chnapánaigh agus maidir le bearta áirithe a bheidh le cur i bhfeidhm sa chrios srianta sin. Ina theannta sin, foráiltear le hAirteagal 21(1) den Rialachán Tarmligthe sin go gcuimseoidh an crios srianta ar a laghad crios cosanta, crios faireachais, agus, más gá, criosanna srianta breise timpeall ar na criosanna cosanta agus faireachais nó cóngarach dóibh.

(3)

Méid na gcriosanna cosanta agus faireachais agus fad tréimhse na mbeart atá le cur i bhfeidhm laistigh de na criosanna sin, tá siad bunaithe ar na critéir a leagtar síos in Airteagal 64(1) de Rialachán (AE) 2016/429 agus ar na rialacha a leagtar síos i Rialachán Tarmligthe (AE) 2020/687 freisin. Ar na critéir a chuirtear i bhfeidhm maidir le rogha mhéid na gcriosanna cosanta agus faireachais, chomh maith le fad tréimhse na mbeart atá le cur i bhfeidhm laistigh de na criosanna sin, áirítear breithniú ar an staid eipidéimeolaíoch a mhéid a bhaineann le hionfhabhtú le víreas ghalar an chraicinn chnapánaigh sna limistéir atá buailte ag an ngalar sin, agus ní hamháin sin ach ar thosca eipidéimeolaíocha eile lena n-áirítear paraiméadair gheografacha agus an riosca atá ann maidir le leathadh breise an ghalair. Cuireadh san áireamh freisin caighdeáin idirnáisiúnta an Chóid um Shláinte na nAinmhithe Talún ón Eagraíocht Dhomhanda um Shláinte Ainmhithe agus fad tréimhse na mbeart dá bhforáiltear sa Chinneadh seo á chinneadh (4).

(4)

Le Rialachán (AE) 2016/429, agus go háirithe Airteagal 69 de, foráiltear go bhféadfaidh údarás inniúil Ballstáit vacsaíniú éigeandála a úsáid chun galar liostaithe, dá dtagraítear in Airteagal 9(1), pointe (a), den Rialachán sin, a rialú go héifeachtach in ainmhithe ar coimeád. Chuige sin, féadfaidh an t-údarás inniúil criosanna vacsaínithe a bhunú agus plean oifigiúil vacsaínithe a fhorbairt a chomhlíonann ceanglais shonracha. Le Rialachán Tarmligthe (AE) 2023/361 ón gCoimisiún (5), lena bhforlíontar Rialachán (AE) 2016/429, leagtar síos, inter alia, na rialacha sonracha atá le cur chun feidhme ag na Ballstáit agus vacsaíniú cosantach éigeandála á úsáid acu i mbó-ainmhithe chun galair liostaithe áirithe a chosc agus a rialú. Leagtar síos leis an Rialachán Tarmligthe sin freisin na coinníollacha faoinar féidir gluaiseachtaí ainmhithe vacsaínithe agus a dtáirgí a cheadú. In Iarscríbhinn IX a ghabhann leis an Rialachán Tarmligthe sin, leagtar síos coinníollacha sonracha maidir le vacsaíniú cosantach éigeandála in aghaidh ionfhabhtú le víreas ghalar an chraicinn chnapánaigh.

(5)

Le Cinneadh Cur Chun Feidhme (AE) 2025/2248 ón gCoimisiún (6) leagtar síos bearta éigeandála áirithe a bhaineann le hionfhabhtú le víreas ghalar an chraicinn chnapánaigh sa Spáinn. Go háirithe, ceanglaítear le hAirteagal 1, pointe (a), den Chinneadh Cur Chun Feidhme sin crios srianta a bhunú, lena gcuimsítear criosanna cosanta agus faireachais, i gcomhréir le hAirteagal 21 de Rialachán Tarmligthe (AE) 2020/687, sa Bhallstát sin, criosanna nach mór a chuimsiú ann ar a laghad na limistéir a liostaítear in Iarscríbhinn I a ghabhann leis an gCinneadh Cur Chun Feidhme sin. Ina theannta sin, foráiltear le hAirteagal 1, pointe (b), den Chinneadh Cur Chun Feidhme sin maidir le criosanna vacsaínithe I agus II a bhunú sa Spáinn, i gcomhréir le Cuid I d’Iarscríbhinn IX a ghabhann le Rialachán Tarmligthe (AE) 2023/361, agus faoi na coinníollacha a leagtar síos ann. Foráiltear leis freisin nach mór a chuimsiú sna criosanna vacsaínithe sin ar a laghad na limistéir a liostaítear amhlaidh in Iarscríbhinn II a ghabhann le Cinneadh Cur Chun Feidhme (AE) 2025/2248. Thairis sin, foráiltear le hAirteagal 1, pointe (c), de Chinneadh Cur Chun Feidhme (AE) 2025/2248 maidir leis na bearta is gá a chur i bhfeidhm sna criosanna cosanta agus faireachais, agus i gcriosanna vacsaínithe I agus II, go mbeidh feidhm ag na bearta sin ar a laghad go dtí na dátaí a liostaítear sna hIarscríbhinní a ghabhann leis an gCinneadh Cur Chun Feidhme sin.

(6)

Ó glacadh Cinneadh Cur Chun Feidhme (AE) 2025/2248, thug an Fhrainc fógra faoi sheacht ráig nua d’ionfhabhtú le víreas ghalar an chraicinn chnapánaigh i mbunaíochtaí ina gcoimeádtar bó-ainmhithe i limistéir sa Bhallstát sin, a bhfuil teorainn acu le pobal na Catalóine, sa Spáinn, sa tréimhse ón 30 Deireadh Fómhair 2025 go dtí an 17 Samhain 2025. Mar fhreagairt ar na ráigeanna nua sin sa Fhrainc, tá na criosanna cosanta agus faireachais a bhunaigh an Spáinn i bpobal na Catalóine, sa Bhallstát sin, tugtha cothrom le dáta, ina gcuirtear i bhfeidhm na bearta rialaithe galar a leagtar síos i Rialachán Tarmligthe (AE) 2020/687. Agus na ráigeanna sin a tharla le déanaí sa Fhrainc á gcur san áireamh, na limistéir a liostaítear mar chriosanna cosanta agus faireachais, agus fad na mbeart atá le cur i bhfeidhm sna criosanna sin, in Iarscríbhinn I a ghabhann le Cinneadh Cur Chun Feidhme (AE) 2025/2248, ba cheart iad a thabhairt cothrom le dáta agus a leasú leis an gCinneadh seo.

(7)

Chuir an Spáinn an Coimisiún ar an eolas go bhfuarthas amach go raibh torthaí na ráige i bpobal na Catalóine a tuairiscíodh mar ES-LSD-2025-0009 an 12 Samhain 2025 bréagdheimhneach mar gheall ar éilliú le linn na próiseála tar éis tástáil chríochnúil chliniciúil, eipidéimeolaíoch agus saotharlainne. Dá bhrí sin, ba cheart an ráig sin a bhaint d’Iarscríbhinn I a ghabhann le Cinneadh Cur Chun Feidhme (AE) 2025/2248.

(8)

I bhfianaise na gcriosanna cosanta agus faireachais a tugadh cothrom le dáta i bpobal na Catalóine sa Spáinn, is gá criosanna vacsaínithe I agus II le haghaidh ionfhabhtú le víreas ghalar an chraicinn chnapánaigh atá ann faoi láthair, sa Bhallstát sin, a choigeartú, ar criosanna iad a leagtar amach in Iarscríbhinn II a ghabhann le Cinneadh Cur Chun Feidhme (AE) 2025/2248.

(9)

Maidir leis na criosanna vacsaínithe I agus II a liostaítear in Iarscríbhinn II a ghabhann le Cinneadh Cur Chun Feidhme (AE) 2025/2248, is gá a gcineál, a méid agus a bhfad tréimhse a leasú i bhfianaise na staide eipidéimeolaíche atá ag teacht chun cinn a mhéid a bhaineann le hionfhabhtú le víreas ghalar an chraicinn chnapánaigh, agus i bhfianaise dhul chun cinn an fheachtais vacsaínithe, go háirithe agus leibhéal athraitheach an chumhdaigh vacsaíne a baineadh amach á chur san áireamh. Dá réir sin, is gá na dátaí maidir le fad tréimhse chriosanna vacsaínithe I agus II a léiriú in Iarscríbhinn II a ghabhann leis an gCinneadh Cur Chun Feidhme sin.

(10)

Le hAirteagal 2 de Chinneadh Cur Chun Feidhme (AE) 2025/2248 cuirtear toirmeasc ar ghluaiseachtaí bó-ainmhithe ó na criosanna cosanta agus faireachais a leagtar amach in Iarscríbhinn I a ghabhann leis an gCinneadh Cur Chun Feidhme sin chuig cinn scríbe lasmuigh d’imlíne sheachtrach na gcriosanna sin sa Spáinn nó lasmuigh den Bhallstát sin go dtí na dátaí a liostaítear san Iarscríbhinn sin. I bhfianaise fhorbairt na staide eipidéimeolaíche maidir le hionfhabhtú le víreas ghalar an chraicinn chnapánaigh sa Spáinn, is gá an toirmeasc sin a choinneáil ar bun.

(11)

Dá bhrí sin, ba cheart na hIarscríbhinní a ghabhann le Cinneadh Cur Chun Feidhme (AE) 2025/2248 a leasú dá réir sin.

(12)

I bhfianaise na staide eipidéimeolaíche atá ann faoi láthair sa Spáinn, ba cheart feidhm a bheith ag na leasuithe atá le déanamh ar Chinneadh Cur Chun Feidhme (AE) 2025/2248 leis an gCinneadh seo a luaithe is féidir chun leathadh breise an ghalair laistigh den Spáinn, chuig na Ballstáit eile, nó chuig tríú tíortha a chosc, agus chun aon suaitheadh nach bhfuil gá leis ar thrádáil laistigh den Aontas nó aon bhacainn gan údar ar thrádáil le tríú tíortha a sheachaint.

(13)

Tá na bearta dá bhforáiltear sa Chinneadh seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha,