(1)

Permezz tar-Regolament ta’ Implimentazzjoni tal-Kummissjoni (UE) Nru 708/2013 (2), prodott (imsejjaħ “strixxa LED”) li jikkonsisti minn dajowds li jitfgħu d-dawl (LEDs), tranżisters, reżistenzi u dajowds ta’ protezzjoni, intenzjonat għall-użu, pereżempju, fl-għamara bħala tagħmir tad-dawl, ġie kklassifikat taħt il-kodiċi NM 9405 40 99 bħala “tagħmir (fittings) oħra tad-dawl”.

(2)

Peress li l-prodott kien jikkonsisti f’assemblaġġ ta’ ċirkwit stampat, ma kienx jissodisfa l-kundizzjonijiet għal apparati semikondutturi jew LED diskreta skont it-tifsira tal-intestatura 8541 , u l-prodott kellu l-karatteristiċi oġġettivi kollha ta’ tagħmir tad-dawl tal-intestatura 9405 . Konsegwentament, il-klassifikazzjonijiet taħt l-intestaturi 8541 u 8543 ġew esklużi. Meta jitqiesu l-karatteristiċi oġġettivi tiegħu, l-oġġett kellu l-karattru essenzjali ta’ tagħmir tad-dawl tal-intestatura 9405 li biex jiffunzjona jeħtieġ biss li jkun imqabbad ma’ provvista tal-enerġija.

(3)

Matul is-70 sessjoni tiegħu f’Settembru 2022, il-Kumitat tas-Sistema Armonizzata (HSC, “Harmonized System Committee”) tal-Organizzazzjoni Dinjija Doganali (WCO, “World Customs Organisation”) approva l-opinjoni tal-klassifikazzjoni 8539.51/1 li tikklassifika prodott imsejjaħ “strippi tad-dawl flessibbli”, strippa tad-dawl flessibbli LED ta’ ġewwa, 24 V, 1,3 W, abjad biered. Id-dwal tat-tejp huma sezzjonijiet ta’ prodotti tad-dawl modulari li jistgħu jiġu konnessi u li jikkonsistu fi 18-il LED allinjati mat-tul ta’ kull waħda mis-sezzjonijiet u għandhom LEDs konnessi fuq bord ta’ ċirkwit stampat (PCB, “printed circuit board”). Dan jintuża, pereżempju, għal tidwil għal kompitu speċifiku u tidwil ta’ aċċentwazzjoni fl-armarji tal-kċejjen, tidwil minn wara għal żoni li diffiċli jintlaħqu. Ġie klassifikat fis-subintestatura 8539.51 tas-SA bl-applikazzjoni tal-GIRs 1 (in-Nota 11 (a) tal-Kapitolu 85 u n-Nota 1 (f) tal-Kapitolu 94) u 6 u skont il-karatteristiċi oġġettivi tiegħu, jikkorrispondi għall-Kodiċi NM 8539 51 00 , bħala moduli b’dijodu li jemetti d-dawl (LED).

(4)

Minħabba l-karatteristiċi identiċi jew simili ħafna tal-prodott mal-oġġett deskritt fir-Regolament ta’ Implimentazzjoni (UE) Nru 708/2013, il-klassifikazzjoni tariffarja tal-oġġett, kif stabbilita fl-Anness ta’ dak ir-Regolament, mhijiex f’konformità mal-opinjoni ta’ klassifikazzjoni 8539.51/1.

(5)

Bis-saħħa tad-Deċiżjoni tal-Kunsill 87/369/KEE (3), l-Unjoni hija parti kontraenti għall-Konvenzjoni Internazzjonali dwar is-Sistema Armonizzata għad-Deskrizzjoni u l-Kodifika ta’ Oġġetti, imfassla mill-Kunsill għall-Kooperazzjoni Doganali tad-WCO. L-opinjonijiet ta’ klassifikazzjoni approvati mill-HSC huma strumenti ta’ gwida għall-miżuri tariffarji tal-Unjoni.

(6)

Bl-għan li tiġi żgurata uniformità fl-interpretazzjoni u fl-applikazzjoni tas-Sistema Armonizzata f’livell internazzjonali u meta wieħed iqis li d-deċiżjoni tal-HSC hija f’konformità mal-kliem tas-subintestatura 8539.51 tas-SA, jenħtieġ li l-Unjoni tapplika l-opinjoni ta’ klassifikazzjoni 8539.51/1.

(7)

Għalhekk jenħtieġ li r-Regolament ta’ Implimentazzjoni (UE) Nru 708/2013 jitħassar.

(8)

Il-miżuri stipulati f’dan ir-Regolament huma f’konformità mal-opinjoni tal-Kumitat tal-Kodiċi Doganali,