Artikolu 1

Dan id-Digriet jistipula l-kundizzjonijiet li bihom l-edituri tas-servizzi tat-televiżjoni għandhom jiggarantixxu x-xandir esklużiv tal-avvenimenti ta’ importanza kbira, sabiex parti sostanzjali mill-pubbliku ma tiċċaħħadx mill-possibbiltà li ssegwihom fuq servizz tat-televiżjoni bla ħlas.

Artikolu 2

Għall-applikazzjoni ta’ dan it-Titolu, id-definizzjonijiet li ġejjin għandhom japplikaw:

a)	“Editur tas-servizzi tat-televiżjoni bla ħlas”: kull editur ta’ servizz tat-televiżjoni li ma jiġix iffinanzjat permezz ta’ ħlas mill-utenti tiegħu u li jistgħu tabilħaqq jinqabdu minn tal-anqas 85 % tad-djar fi Franza metropolitana;

b)	“Editur tas-servizzi tat-televiżjoni ristretti”: kull editur ta’ servizz tat-televiżjoni li ma jissodisfax iż-żewġ kundizzjonijiet stabbiliti fis-subparagrafu ta’ qabel.

Artikolu 3

Il-lista tal-avvenimenti prevista fl-Artikolu 20–2 tal-Liġi tat-30 ta’ Settembru 1986 msemmija hawn fuq hija stabbilita kif ġej:

1.	Il-Logħob Olimpiku tas-sajf u tax-xitwa;

2.	Il-Logħob tat-tim tal-futbol Franċiż stabbilit fil-kalendarju tal-Federazzjoni Internazzjonali tal-Assoċjazzjonijiet tal-Futbol (FIFA, Fédération Internationale de Football Association);

3.	Is-semifinali u l-finali tat-Tazza tad-Dinja tal-futbol;

4.	Is-semifinali u l-finali tal-Kampjonat tal-Ewropa tal-futbol;

5.	Il-finali tal-Europa League tal-Unjoni tal-Assoċjazzjonijiet Ewropej tal-Futbol (UEFA, Union of European Football Associations) meta jkun qed jilgħab klabb involut f’wieħed mill-Kampjonati Franċiżi;

6.	Il-finali taċ-Champions League tal-futbol;

7.	Il-finali tat-Tazza Franċiża tal-futbol;

8.	It-Turnew tar-Rugby tas-Sitt Nazzjonijiet;

9.	Is-semifinali u l-finali tat-Tazza tad-Dinja tar-Rugby–15;

10.	Il-finali tal-Kampjonat Franċiż tar-Rugby–15;

11.	Il-finali tat-Tazza Ewropea tar-Rugby–15, meta jkun qed jilgħab klabb involut f’wieħed mill-Kampjonati Franċiżi;

12.	Il-finali tat-turnew tat-tennis ta’ Roland Garros tal-irġiel u tan-nisa singoli;

13°	Il-finali tal-kompetizzjonijiet internazzjonali tan-nazzjonijiet organizzati mill-Federazzjoni Internazzjonali tat-Tennis meta jkun qed jilgħab it-tim Franċiż tat-tennis;

14.	Il-Grand Prix tal-Formula 1 ta’ Franza;

15.	It-Tour de France (ċikliżmu tal-irġiel);

16.	Il-kompetizzjoni taċ-ċirkliżmu “Paris-Roubaix”;

17.	Il-finali tal-Kampjonati Ewropej tal-Basketball tal-irġiel u tan-nisa, meta jkun qed jilgħab it-tim Franċiż;

18.	Il-finali tal-Kampjonati Dinjin tal-Basketball tal-irġiel u tan-nisa, meta jkun qed jilgħab it-tim Franċiż;

19.	Il-finali tal-Kampjonati Ewropej tal-Handball tal-irġiel u tan-nisa, meta jkun qed jilgħab it-tim Franċiż;

20.	Il-finali tal-Kampjonati Dinjin tal-Handball tal-irġiel u tan-nisa, meta jkun qed jilgħab it-tim Franċiż;

21.	Il-kampjonati dinjin tal-atletika.

Artikolu 3–1

Il-lista stabbilita fl-Artikolu ta’ qabel tlestiet kif ġej:

1.	Il-Logħob Paraolimpiku tas-sajf u tax-xitwa;

2.	Il-Logħob tat-tim Nazzjonali Franċiż tal-futbol tan-nisa stabbilit fil-kalendarju tal-Federazzjoni Internazzjonali tal-Assoċjazzjonijiet tal-Futbol (FIFA, Fédération Internationale de Football Association);

3.	Is-semifinali u l-finali tat-Tazza tad-Dinja tal-futbol tan-nisa;

4.	Is-semifinali u l-finali tal-Kampjonat Ewropew tal-futbol tan-nisa;

5.	Il-finali taċ-Champions League tal-futbol tan-nisa;

6.	Il-finali tal-Lega tal-Konferenza Ewropea tal-Unjoni tal-Assoċjazzjonijiet Ewropej tal-Futbol (UEFA, Union of European Football Associations) meta jkun qed jilgħab klabb involut f’wieħed mill-Kampjonati Franċiżi;

7.	Il-finali tat-Tazza Franċiża tal-futbol tan-nisa;

8.	Il-logħbiet tat-timijiet Franċiżi tar-Rugby-15 tan-nisa u tal-irġiel, fil-kalendarju Dinji tar-Rugby;

9°	Il-logħbiet tat-tim Franċiż tat-turnew tar-Rugby tan-Nisa tas-Sitt Nazzjonijiet;

10.	Is-semifinali u l-finali tat-Tazza tad-Dinja tar-Rugby-15 tan-nisa;

11.	Il-finali tal-Kampjonat Franċiż tar-Rugby–15 tan-nisa;

12°	Is-semifinali tat-turnew tat-tennis ta’ Roland-Garros tal-irġiel u tan-nisa singoli fil-każ ta’ parteċipazzjoni minn plejer Franċiż;

13	° Il-finali tat-turnew tat-tennis tal-Gran Slam tal-irġiel u tan-nisa singoli għajr ir-Roland-Garros fil-każ ta’ parteċipazzjoni minn plejer Franċiż;

14.	It-Tour de France (ċikliżmu tan-nisa);

15.	Il-kompetizzjoni taċ-ċikliżmu “Paris-Roubaix” tan-nisa;

16.	Is-semifinali tal-Kampjonat Ewropew tal-Basketball tal-irġiel u tan-nisa, meta jkun qed jilgħab it-tim Franċiż;

17.	Is-semifinali tal-Kampjonati Dinjin tal-Basketball tal-irġiel u tan-nisa, meta jkun qed jilgħab it-tim Franċiż;

18.	Is-semifinali tal-Kampjonati Ewropej tal-Handball tal-irġiel u tan-nisa, meta jkun qed jilgħab it-tim Franċiż;

19.	Is-semifinali tal-Kampjonati Dinjin tal-Handball tal-irġiel u tan-nisa, meta jkun qed jilgħab it-tim Franċiż;

20.	Il-finali u s-semifinali tal-Kampjonat Ewropew tal-Volleyball tal-irġiel u tan-nisa, meta jkun qed jilgħab it-tim Franċiż;

21.	Il-finali u s-semifinali tal-Kampjonati Dinjin tal-Volleyball tal-irġiel u tan-nisa, meta jkun qed jilgħab it-tim Franċiż;

22.	Il-Kampjonati Dinjin tal-iski Alpin meta l-kompetizzjoni ssir fi Franza.

Artikolu 4

Meta editur tas-servizzi tat-televiżjoni, fit-territorju Franċiż, jeżerċita d-drittijiet esklużivi miksuba wara t-23 ta’ Awwissu 1997 sabiex ixandar avvenimenti ta’ importanza kbira msemmija fl-Artikolu 3, jew mid-data tad-dħul fis-seħħ tad-Digriet Nru 2024–699 tal-5 ta’ Lulju 2024 fuq wieħed minn dawn imsemmija fl-Artikolu 3–1, l-editur ma jistax iwaqqaf lill-editur tas-servizzi tat-televiżjoni bla ħlas milli jxandar dan l-avveniment. L-avveniment għandu jintwera b’mod dirett u bis-sħiħ, għajr f’dawn il-każijiet:

1.	Ix-xandir tal-avvenimenti msemmija fl-Artikolu 3(15) u fl-Artikolu 3–1(14) jista’ jiġi limitat għall-mumenti sinifikanti, f’konformità mal-użanza tax-xandir ta’ dan l-avveniment;

2.	Ix-xandir tal-avvenimenti msemmija fl-Artikolu 3(1) u (21) u fl-Artikolu 3–1(1) jistgħu jiġi limitati għall-mumenti li jirriflettu d-diversità tad-dixxiplini sportivi u tal-pajjiżi li jieħdu sehem u jistgħu jinkludu materjal irrekordjat meta l-avvenimenti jseħħu fl-istess waqt;

3.	Ix-xandir tal-avvenimenti ta’ importanza kbira jistgħu jixxandru wkoll b’mod irrekordjat meta l-avveniment iseħħ bejn nofsillejl u s-sitta ta’ filgħodu, ħin Franċiż, dment li x-xandir fi Franza jibda qabel l-10 ta’ filgħodu;

Servizz tat-televiżjoni bla ħlas ma jqisx li l-fatt li l-editur tas-servizzi tat-televiżjoni b’aċċess ristrett, li jeħtieġ jitħallas mill-utenti tiegħu u li l-programmi tiegħu jistgħu jitwasslu/jixxandru skont il-kundizzjonijiet imsemmija fl-Artikolu 2(a) ta’ dan id-Digriet, ixandar dan l-avveniment ta’ importanza kbira b’mod dirett u sħiħ, suġġett għad-dispożizzjonijiet preċedenti u mingħajr ma jitqegħdulu kundizzjonijiet speċifiċi għall-aċċess, jikkostitwixxi ostaklu għax-xandir ta’ dak l-avveniment ta’ importanza kbira.

Artikolu 5

Sabiex l-editur tas-servizzi tat-televiżjoni bla ħlas jitħalla jxandar avveniment ta’ importanza kbira bil-kundizzjonijiet speċifikati fl-Artikolu 4, editur tas-servizzi tat-televiżjoni bi drittijiet esklużivi ta’ xandir għal parti jew għall-avveniment ta’ importanza kbira kollu u li ma jistax iħares il-kundizzjonijiet, irid ifassal, fi żmien raġonevoli qabel l-avveniment u skont l-arranġamenti tar-riklamar li permezz tagħhom l-edituri tas-servizzi tat-televiżjoni bla ħlas jirċievu l-informazzjoni, il-proposta fejn iċedi d-drittijiet li jxandar dan l-avveniment bil-kundizzjonijiet previsti fl-Artikolu 4. Din l-offerta għandha ssir bit-termini u l-kundizzjonijiet ġusti, raġonevoli u nondiskriminatorji tas-suq.

Jekk, bħala tweġiba għal din l-offerta, ma jkun hemm l-ebda proposta minn editur tas-servizzi tat-televiżjoni jew jekk il-proposta ma tkunx imfassla skont it-termini u l-kundizzjonijiet ġusti, raġonevoli u nondiskriminatorji tas-suq, l-editur tas-servizzi tat-televiżjoni li jkollu d-drittijiet esklużivi jista’ jeżerċita dawk id-drittijiet mingħajr ma jissodisfa l-kundizzjonijiet previsti fl-Artikolu 4.

Artikolu 6

Id-dispożizzjonijiet ta’ dan it-Titolu japplikaw għall-edituri tas-servizzi tat-televiżjoni li jaqgħu taħt il-ġuriżdizzjoni Franċiża u li jxandru, lejn it-territorju ta’ Stat Membru ieħor tal-Unjoni Ewropea, parti mill-ftehim taż-żona Ekonomika Ewropea jew parti mill-Konvenzjoni Ewropea dwar it-Televiżjoni Transkonfinali, avveniment indikat minn dak l-Istat bħala ta’ importanza kbira għas-soċjetà ta’ dan il-pajjiż skont id-dispożizzjonijiet tad-Direttiva 2010/13/UE tal-Parlament Ewropew u tal-Kunsill tal-10 ta’ Marzu 2010 dwar il-koordinazzjoni ta’ ċerti dispożizzjonijiet stabbiliti bil-liġi, b’regolament jew b’azzjoni amministrattiva fi Stati Membri dwar il-forniment ta’ servizzi tal-media awdjoviżiva (Direttiva dwar is-Servizzi tal-Media awdjoviżiva) u li jkunu kisbu d-drittijiet tax-xandir ta’ dan l-avveniment wara t-23 ta’ Awwissu 1997.

Artikolu 7

L-edituri tas-servizzi tat-televiżjoni li jaqgħu taħt il-ġuriżdizzjoni Franċiża għandhom jeżerċitaw, fi Stat imsemmi fl-Artikolu 6, id-drittijiet tagħhom li jxandru l-avvenimenti ta’ importanza kbira, kif definiti minn dak l-Istat, b’tali mod li ma jċaħħdux lil parti sostanzjali tal-pubbliku mill-opportunità li jaraw dawn l-avvenimenti kemm b’mod dirett kif ukoll irrekordjat, permezz ta’ servizz tat-televiżjoni bla ħlas skont id-dispożizzjonijiet tal-Artikolu 14 tad-Direttiva tal-10 ta’ Marzu 2010 imsemmija hawn fuq.

Artikolu 8

Meta editur tas-servizzi tat-televiżjoni li jaqa’ taħt il-ġuriżdizzjoni Franċiża ixandar avveniment ta’ importanza kbira f’wieħed mill-Istati msemmija fl-Artikolu 6, irid jissodisfa l-kundizzjonijiet imsemmija minn dak l-Istat dwar ix-xandir tal-avveniment mill-editur tas-servizzi tat-televiżjoni.

Artikolu 9

Meta mitlub minn editur tas-servizzi tat-televiżjoni, jew fuq l-inizjattiva tiegħu stess, l-Awtorità Regolatorja tal-Komunikazzjoni Awdjoviżiva u Diġitali tista’ tagħti opinjoni dwar il-kundizzjonijiet tal-applikazzjoni tad-dispożizzjonijiet ta’ dan id-Digriet.

Artikolu 10

Id-Digriet sussegwenti tal-Kunsill tal-Istat għandu jistabbilixxi l-lista tal-avvenimenti ta’ importanza kbira u l-kundizzjonijiet tax-xandir televiżiv tagħhom għad-dipartimenti ekstra-Ewropej ta’ Saint Pierre u Miquelon, Mayotte, New Caledonia, il-Polineżja Franċiża u l-gżejjer Wallis u Futuna, filwaqt li jqis l-ispeċifikazzjonijiet ta’ kull waħda minn dawn l-awtoritajiet u l-karatteristiċi individwali tax-xandir televiżiv ekstra-Ewropew.

Artikolu 11

Il-Ministru għall-Kultura u l-Komunikazzjoni u l-Ministru għat-Territorji ekstra-Ewropej huma responsabbli, kull wieħed skont il-mandat tiegħu, għat-twettiq ta’ dan id-Digriet, li għandu jiġi ppubblikat fil-Ġurnal Uffiċjali tar-Repubblika Franċiża.