(1)

Id-data hija assi strateġiku, hija meħtieġa għall-innovazzjoni u biex tippermetti l-użu a’ teknoloġiji ġodda, b’mod partikolari l-intelliġenza artifiċjali;

(2)

L-organizzazzjonijiet pubbliċi jrendu disponibbli b’mod sistematiku parti mid-data pubblika tagħhom fil-forma ta’ data miftuħa biex jippromwovu t-trasparenza u l-obbligu ta’ rendikont, biex jagħtu s-setgħa liċ-ċittadini, u biex itejbu s-servizzi pubbliċi permezz tal-promozzjoni tal-innovazzjoni;

(3)

Biex tiġi appoġġjata dik il-prattika, ġiet adottata d-Direttiva (UE) 2019/1024 tal-Parlament Ewropew u tal-Kunsill (1);

(4)

Fir-riżoluzzjoni tal-25 ta’ Marzu 2021 dwar strateġija Ewropea għad-data (2), il-Parlament Ewropew appella għal miżuri li jippermettu fluss akbar ta’ data bejn is-settur pubbliku u n-negozji, kif ukoll fi ħdanhom;

(5)

Il-Kummissjoni Ewropea, il-Kunsill tal-Unjoni Ewropea u l-Qorti tal-Awdituri adottaw miżuri li jifformalizzaw il-ftuħ tad-data tagħhom; fl-2011, il-Kummissjoni Ewropea adottat id-Deċiżjoni 2011/833/UE (3), intiża sabiex tiffaċilita użu mill-ġdid usa’ tal-informazzjoni pubblika. Fuq l-eżempju tal-Kummissjoni Ewropea, il-Kunsill tal-Unjoni Ewropea adotta d-Deċiżjoni (UE) 2017/1842 (4) u l-Qorti tal-Awdituri adottat id-Deċiżjoni Nru 6-2019 (5), dwar il-politika dwar id-data miftuħa u l-politiki dwar l-użu mill-ġdid tad-dokumenti;

(6)

Il-parlamenti nazzjonali rrikonoxxew ukoll il-ħtieġa li tittejjeb l-aċċessibbiltà tad-data pubblika tagħhom. Fl-2022, l-Unjoni Interparlamentari wettqet studju fuq id-data miftuħa u ppubblikat lista (6) tal-kmamar parlamentari madwar id-dinja, li bħalissa joffru data miftuħa fuq portali jew siti web speċifiċi;

(7)

Għall-Parlament, l-objettiv li jrendi d-data pubblika tiegħu kemm jista’ jkun interoperabbli u faċli li tinsab jikkostitwixxi l-konkretezza tal-impenji tiegħu favur il-ftuħ u l-obligu ta’ rendikont; dan jikkomplementa d-deċiżjonijiet meħuda biex jissaħħu l-integrità, l-indipendenza u l-obbligu ta’ rendikont tal-istituzzjoni. It-tqegħid għad-dispożizzjoni ta’ data miftuħa huwa wkoll mod kif jistimula l-innovazzjoni fil-qasam tas-servizzi lill-Membri, isaħħaħ il-proċess deċiżjonali tal-Parlament ibbażat fuq id-data u jsaħħaħ ix-xogħol tiegħu ta’ sensibilizzazzjoni fost iċ-ċittadini;

(a)

“ftuħ tekniku”: id-data u l-metadata tagħha jkunu offruti f’formati miftuħa u li jinqraw mill-magni;

(b)

“ftuħ legali”: id-data tkun l-oġġett ta’ liċenzja miftuħa;

(c)

“ftuħ prattiku”: id-data tkun tista’ tinsab faċilment u tkun aġġornata u direttament aċċessibbli;

(d)

“ftuħ soċjali”: bl-għan li jittejbu l-kwalità u d-disponibbiltà tad-data, il-feedback tal-utenti jinġabar u jitqies meta d-data ssir disponibbli.