(1)

Le gníomhaíocht de chuid an Aontais in earnáil na loingseoireachta intíre, ba cheart an aonfhoirmeacht a áirithiú agus ceanglais theicniúla á bhforbairt le haghaidh soithí uiscebhealaí intíre san Aontas.

(2)

Le Treoir (AE) 2016/1629 leagadh síos córas comhchuibhithe chun deimhnithe teicniúla a eisiúint le haghaidh soithí uiscebhealaí intíre trí thagairt a dhéanamh, inter alia, do cheanglais theicniúla an Choiste Eorpaigh um ullmhú caighdeán i réimse na loingseoireachta intíre (‘CESNI’).

(3)

Bunaíodh CESNI an 3 Meitheamh 2015 faoi chuimsiú an Lárchoimisiúin um Loingseoireacht ar an Réin (‘CCNR’) chun caighdeáin theicniúla aonfhoirmeacha a fhorbairt le haghaidh uiscebhealaí intíre i réimsí éagsúla, go háirithe maidir le soithí agus maidir le ceanglais theicniúla le haghaidh soithí. Déantar tagairt do na caighdeáin sin freisin i gcóras dlí CCNR.

(4)

Foráiltear le hIarscríbhinn II a ghabhann le Treoir (AE) 2016/1629 gurb iad na ceanglais theicniúla is infheidhme maidir le hárthaí na ceanglais sin a leagtar amach sa Chaighdeán Eorpach lena leagtar síos Ceanglais Theicniúla le haghaidh soithí loingseoireachta intíre san eagrán 2023/1 a ghabhann leis (ES-TRIN 2023/1). Le ES-TRIN leagtar síos ceanglais theicniúla aonfhoirmeacha atá riachtanach chun sábháilteacht soithí loingseoireachta intíre a áirithiú.

(5)

Ag an gcruinniú a bhí aige an 17 Deireadh Fómhair 2024, ghlac CESNI eagrán nua de ES-TRIN, mar atá ES-TRIN 2025/1. Le ES-TRIN 2025/1, tugtar isteach go háirithe rialacha nua maidir le breoslaí íseal-splancphointe, go háirithe stóráil agus úsáid meatánóil, marcáil limistéar guaiseach agus lipéadú breoslaí, córais tiomána leictreacha agus taisc-cheallraí litiam-ian, úsáid plaistigh atá treisithe le halúmanam nó le snáithín chun soithí paisinéirí a thógáil, prótacal paraiméadair innill a thréigean, díolúine tástála allamuigh a aithint d’innill, naisc líonta agus dathchóid iomchuí, trealamh loingseoireachta agus faisnéise, go háirithe trealamh AIS intíre, gléasraí cóireála séarachais, cábáin stiúracha ardaithe agus forálacha idirthréimhseacha le haghaidh cábáin stiúracha in-aistarraingthe córais spréite uisce brúchóirithe uathoibríocha, píosaí nasctha idir ancaire agus slabhra agus cábáin codlata.

(6)

Dá bhrí sin ba cheart Iarscríbhinn II a ghabhann le Treoir (AE) 2016/1629 a mhodhnú chun a áirithiú gurb iad na ceanglais theicniúla a leagtar amach in ES-TRIN 2025/1 na ceanglais theicniúla is infheidhme maidir le hárthaí agus ba cheart iad a bheith infheidhme ón 1 Eanáir 2026.

(7)

Ba cheart, dá bhrí sin, Treoir (AE) 2016/1629 a leasú dá réir sin,