|
8.10.2021 |
GA |
Iris Oifigiúil an Aontais Eorpaigh |
L 356/30 |
RIALACHÁN (AE) 2021/1771 ÓN gCOIMISIÚN
an 7 Deireadh Fómhair 2021
lena leasaítear Iarscríbhinn I a ghabhann le Rialachán (CE) Uimh. 396/2005 ó Pharlaimint na hEorpa agus ón gComhairle a mhéid a bhaineann le duillí raidise
(Téacs atá ábhartha maidir le LEE)
TÁ AN COIMISIÚN EORPACH,
Ag féachaint don Chonradh ar Fheidhmiú an Aontais Eorpaigh,
Ag féachaint do Rialachán (CE) Uimh. 396/2005 ó Pharlaimint na hEorpa agus ón gComhairle an 23 Feabhra 2005 maidir le huasleibhéil iarmhar lotnaidicídí i mbia agus i mbeatha de bhunadh plandaí nó de bhunadh ainmhíoch nó ar bhia agus ar bheatha den sórt sin agus lena leasaítear Treoir 91/414/CEE ón gComhairle (1), agus go háirithe Airteagal 4 de,
De bharr an mhéid seo a leanas:
|
(1) |
Na táirgí de thionscnamh plandaí agus ainmhíoch a bhfuil feidhm ag na huasleibhéil iarmhar lotnaidicídí (“MRLanna”) arna leagan síos i Rialachán (CE) Uimh. 396/2005 maidir leo, liostaítear iad in Iarscríbhinn I a ghabhann leis an Rialachán sin faoi réir fhorálacha an Rialacháin sin. |
|
(2) |
Le Rialachán (AE) 2018/62 ón gCoimisiún (2), tugadh isteach, inter alia, an tráchtearra “duillí raidise” i gCuid B d’Iarscríbhinn I, agus rinneadh an tráchtearra sin a nascadh leis an tráchtearra “cáil” i gCuid A den Iarscríbhinn sin. Dá dhroim sin, tá feidhm ag na MRLanna le haghaidh cál maidir le duillí raidise freisin. |
|
(3) |
Faoi mar a bhí an scéal tráth a glacadh Rialachán (AE) 2018/62, ní raibh sonraí ó thrialacha iarmhar ar fáil lena dheimhniú arbh iomchuí an t-aicmiú sin agus, mar sin, suíodh idirthréimhse le Rialachán (AE) 2018/1049 ón gCoimisiún (3). Chun é a chur ar a gcumas do na Ballstáit sonraí den sórt sin a ghiniúint, tugadh isteach fonóta a bhaineann leis an tráchtearra “duillí raidise”, fonóta lena ndíolmhaítear an tráchtearra sin ó chur i bhfeidhm an MRL le haghaidh “cál” go dtí an 31 Nollaig 2021. |
|
(4) |
Ós rud é gur chuir na Ballstáit a ghineann sonraí den sórt sin an Coimisiún ar an eolas le déanaí go bhfuil moill ar ghiniúint na sonraí, ba cheart síneadh a chur leis an idirthréimhse lena mbaineann go ceann 3 bliana eile ionas gur féidir bailchríoch a chur ar na trialacha agus ar an measúnú orthu. |
|
(5) |
Dá bhrí sin, ba cheart an fonóta lena mbaineann in Iarscríbhinn I a ghabhann le Rialachán (CE) Uimh. 396/2005 a leasú dá réir. |
|
(6) |
Tá na bearta dá bhforáiltear sa Rialachán seo i gcomhréir leis an tuairim ón mBuanchoiste um Plandaí, Ainmhithe, Bia agus Beatha, |
TAR ÉIS AN RIALACHÁN SEO A GHLACADH:
Airteagal 1
I gCuid B den Iarscríbhinn a ghabhann le Rialachán (CE) Uimh. 396/2005, cuirtear an méid seo a leanas in ionad fhonóta (3):
|
“(3) |
Beidh feidhm ag MRLanna maidir le duillí raidise amhail ón 1 Eanáir 2025”. |
Airteagal 2
Tiocfaidh an Rialachán seo i bhfeidhm an fichiú lá tar éis lá a fhoilsithe in Iris Oifigiúil an Aontais Eorpaigh.
Beidh an Rialachán seo ina cheangal go huile agus go hiomlán agus beidh sé infheidhme go díreach i ngach Ballstát.
Arna dhéanamh sa Bhruiséil, 7 Deireadh Fómhair 2021.
Thar ceann an Choimisiúin
An tUachtarán
Ursula VON DER LEYEN
(1) IO L 70, 16.3.2005, lch. 1.
(2) Rialachán (AE) 2018/62 ón gCoimisiún an 17 Eanáir 2018 lena ndéantar ionadú ar Iarscríbhinn I a ghabhann le Rialachán (CE) Uimh. 396/2005 ó Pharlaimint na hEorpa agus ón gComhairle (IO L 18, 23.1.2018, lch. 1).
(3) Rialachán (AE) 2018/1049 ón gCoimisiún an 25 Iúil 2018 lena ndéantar ionadú ar Iarscríbhinn I a ghabhann le Rialachán (CE) Uimh. 396/2005 ó Pharlaimint na hEorpa agus ón gComhairle (IO L 189, 26.7.2018, lch. 9).