(1)

Fit-18 ta’ Diċembru 2019, il-Kummissjoni Ewropea bdiet proċediment anti-dumping fir-rigward tal-importazzjonijiet ta’ pins u stejpils li joriġinaw mir-Repubblika tal-Poplu taċ-Ċina billi ppubblikat notifika ta’ bidu f’Il-Ġurnal Uffiċjali tal-Unjoni Ewropea (3).

(2)

L-investigazzjoni nbdiet wara li tressaq ilment minn sitt produtturi tal-UE: Atrom Impex srl (ir-Rumanija), Bizon Int. Sp. z.o.o. (il-Polonja), Ergo Staples (il-Kroazja), Grupodesa (Spanja), Omer SpA (l-Italja) u Velo srl (l-Italja), (“l-ilmentaturi”), li jirrappreżentaw aktar minn 50 % tal-produzzjoni totali tal-Unjoni tal-pins u l-istejpils. L-ilment kien fih evidenza ta’ dumping u ta’ dannu materjali li jirriżulta, u dan tqies biżżejjed biex il-bidu tal-investigazzjoni jkun iġġustifikat.

(3)

Fin-notifika ta’ bidu, il-Kummissjoni stiednet lill-partijiet interessati jikkuntattjawha sabiex jipparteċipaw fl-investigazzjoni. Barra minn hekk, il-Kummissjoni speċifikament infurmat lill-ilmentaturi, lil produtturi magħrufa oħra tal-Unjoni, lill-produtturi esportaturi magħrufa u lill-awtoritajiet Ċiniżi, lil importaturi, fornituri u utenti magħrufa, negozjanti, kif ukoll assoċjazzjonijiet li kien magħruf li kienu kkonċernati, dwar il-bidu tal-investigazzjoni, u stednithom jieħdu sehem.

(4)

Il-partijiet interessati kollha kellhom l-opportunità li jikkummentaw dwar il-bidu tal-investigazzjoni u li jitolbu smigħ mal-Kummissjoni u/jew mal-Uffiċjal tas-Seduta fi proċedimenti kummerċjali sal-limitu ta’ żmien stipulat fin-notifika ta’ bidu.

(5)

Fl-24 ta’ Ġunju 2020, l-ilmentaturi infurmaw lill-Kummissjoni li kienu rtiraw l-ilment.

(6)

Skont l-Artikolu 9(1) tar-Regolament (UE) 2016/1036, il-proċedimenti jistgħu jiġu terminati, fejn ilment jiġi rtirat, sakemm tali terminazzjoni ma tkunx kontra l-interess tal-Unjoni.

(7)

L-investigazzjoni ma kienet żvelat ebda konsiderazzjoni li turi li huwa fl-interess tal-Unjoni li jitkompla l-każ. Madankollu, il-Kummissjoni ħadet ukoll nota ta’ dak li ġie ddeterminat fis-26 ta’ Mejju 2020 mid-Dipartiment tal-Kummerċ tal-Istati Uniti f’investigazzjoni anti-dumping u antisussidji dwar l-importazzjonijiet ta’ ċerti stejpils tal-azzar fi strixxa mir-Repubblika tal-Poplu taċ-Ċina, li huma tipi ta’ prodott tal-prodott ikkonċernat. Minħabba r-riskju potenzjali ta’ devjazzjonijiet tat-traffiku kummerċjali fil-futur, il-Kummissjoni se tqis it-tendenzi statistiċi tal-importazzjonijiet Ċiniżi tal-prodott ikkonċernat għal perjodu ta’ 24 xahar mill-pubblikazzjoni ta’ din id-Deċiżjoni. B’hekk, il-Kummissjoni tkun tista’ tivvaluta l-ħtieġa potenzjali li tibda investigazzjoni ġdida skont ir-rekwiżiti tar-Regolament bażiku.

(8)

Għaldaqstant il-Kummissjoni kkonkludiet li l-proċediment anti-dumping li jikkonċerna l-importazzjonijiet fl-Unjoni ta’ pins u stejpils li joriġinaw mir-Repubblika tal-Poplu taċ-Ċina jenħtieġ li jiġi terminat mingħajr l-impożizzjoni tal-miżuri.

(9)

Il-partijiet interessati ġew infurmati b’dan u ngħataw opportunità li jikkummentaw. L-ebda parti interessata ma oġġezzjonat għat-terminazzjoni.

(10)

Din id-Deċiżjoni hija konformi mal-opinjoni tal-Kumitat stabbilit mill-Artikolu 15(1) tar-Regolament (UE) 2016/1036 u l-Kumitat tal-Kodiċi Doganali stabbilit mill-Artikolu 285 tar-Regolament (UE) Nru 952/2013,