Iris Oifigiúil
an Aontais Eorpaigh
GA
Sraith L
|
|
Iris Oifigiúil |
GA Sraith L |
|
2026/1548 |
7.7.2026 |
CINNEADH (AE) 2026/1548 ÓN gCOMHAIRLE
an 8 Meitheamh 2026
maidir le tabhairt i gcrích, thar ceann an Aontais, an Phrótacail maidir le Cur Chun Feidhme an Chomhaontaithe Comhpháirtíochta Iascaigh idir Poblacht Dhaonlathach São Tomé agus Príncipe agus an Comhphobal Eorpach (2025-2029)
TÁ COMHAIRLE AN AONTAIS EORPAIGH,
Ag féachaint don Chonradh ar Fheidhmiú an Aontais Eorpaigh, agus go háirithe Airteagal 43, i gcomhar le hAirteagal 218(6), pointe (a)(v), agus le hAirteagal 218(7), de,
Ag féachaint don togra ón gCoimisiún Eorpach,
Ag féachaint don toiliú ó Pharlaimint na hEorpa,
De bharr an mhéid seo a leanas:
|
(1) |
I gcomhréir le Cinneadh (AE) 2025/2139 ón gComhairle (1), síníodh an Prótacal maidir le Cur Chun Feidhme an Chomhaontaithe Comhpháirtíochta Iascaigh idir Poblacht Dhaonlathach São Tomé agus Príncipe agus an Comhphobal Eorpach (2025–2029) (‘an Prótacal’) an 6 Deireadh Fómhair 2025, faoi réir a thabhairt i gcrích ar dháta níos faide anonn. |
|
(2) |
Is é is cuspóir don Phrótacal é a chur ar a gcumas do shoithí de chuid an Aontais iascaireacht a dhéanamh i limistéar iascaireachta São Tomé agus Príncipe agus é a chur ar a gcumas don Aontas agus do São Tomé agus Príncipe oibriú níos dlúithe le chéile chun beartas iascaigh inbhuanaithe a fhorbairt, saothrú fónta acmhainne iascaigh i limistéar iascaireachta São Tomé agus Príncipe agus san Aigéan Atlantach a chur chun cinn, agus rannchuidiú le dálaí oibre cuibhiúla in earnáil an iascaigh. |
|
(3) |
Ba cheart an Prótacal a fhormheas thar ceann an Aontais. |
|
(4) |
Le hAirteagal 9 den Chomhaontú Comhpháirtíochta Iascaigh idir Poblacht Dhaonlathach São Tomé agus Príncipe agus an Comhphobal Eorpach (2) (‘an Comhaontú’), bunaítear Comhchoiste (‘an Comhchoiste’) atá freagrach as faireachán a dhéanamh ar chur i bhfeidhm an Chomhaontaithe, lena n-áirítear na prótacail cur chun feidhme a ghabhann leis. Thairis sin, féadfaidh an Comhchoiste leasuithe áirithe ar na prótacail cur chun feidhme a fhormheas. Chun formheas leasuithe ar an bPrótacal a éascú, ba cheart an Coimisiún a chumhachtú, faoi réir coinníollacha sonracha substainteacha agus nós imeachta a leagtar amach san Iarscríbhinn a ghabhann leis an gCinneadh seo, na leasuithe sin a fhormheas thar ceann an Aontais de réir nós imeachta simplithe. |
|
(5) |
Ba cheart don Chomhairle seasamh an Aontais maidir leis na leasuithe ar an bPrótacal a bhunú. Déanfar na leasuithe atá beartaithe ar an bPrótacal a fhormheas mura rud é go gcuireann mionlach blocála de na Ballstáit ina gcoinne i gcomhréir le hAirteagal 16(4) den Chonradh ar an Aontas Eorpach. |
|
(6) |
Ós rud é go bhfuil níos mó ná bliain airgeadais amháin i gceist leis an bPrótacal, féadfar na gealltanais bhuiséadacha lena mbaineann a roinnt ina n-íocaíochtaí bliantúla thar thréimhse an Phrótacail, i gcomhréir le hAirteagal 112(2) de Rialachán (AE, Euratom) 2024/2509 ó Pharlaimint na hEorpa agus ón gComhairle (3). |
|
(7) |
Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (4) agus thug sé tuairim uaidh an 20 Lúnasa 2025, |
TAR ÉIS AN CINNEADH SEO A GHLACADH:
Airteagal 1
Leis seo, déantar an Prótacal maidir le Cur Chun Feidhme an Chomhaontaithe Comhpháirtíochta Iascaigh idir Poblacht Dhaonlathach São Tomé agus Príncipe agus an Comhphobal Eorpach (2025-2029) (‘an Prótacal’), a fhormheas thar ceann an Aontais.
Airteagal 2
I gcomhréir leis na forálacha agus na coinníollacha a leagtar amach san Iarscríbhinn a ghabhann leis an gCinneadh seo, údaraítear an Coimisiún leis seo, thar ceann an Aontais, na leasuithe ar an bPrótacal arna nglacadh ag an gComhchoiste arna bhunú faoi Airteagal 9 den Chomhaontú, a fhormheas.
Airteagal 3
Tiocfaidh an Cinneadh seo i bhfeidhm ar dháta a ghlactha (5).
Arna dhéanamh i Lucsamburg, an 8 Meitheamh 2026.
Thar ceann na Comhairle
An tUachtarán
A. VAFEADES
(1) Cinneadh (AE) 2025/2139 an 30 Meán Fómhair 2025 maidir le síniú, thar ceann an Aontais, agus cur i bhfeidhm sealadach an Phrótacail maidir le cur chun feidhme an Chomhaontaithe Comhpháirtíochta Iascaigh idir Poblacht Dhaonlathach São Tomé agus Príncipe agus an Comhphobal Eorpach (2025–2029) (IO L, 2025/2139, 22.10.2025, ELI: http://data.europa.eu/eli/dec/2025/2139/oj).
(2) IO L 205, 7.8.2007, lch. 36, ELI: http://data.europa.eu/eli/agree_internation/2007/894/oj.
(3) Rialachán (AE, Euratom) 2024/2509 ó Pharlaimint na hEorpa agus ón gComhairle an 23 Meán Fómhair 2024 maidir leis na rialacha airgeadais is infheidhme maidir le buiséad ginearálta an Aontais (IO L, 2024/2509, 26.9.2024, ELI: http://data.europa.eu/eli/reg/2024/2509/oj).
(4) Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lch. 39, ELI: http://data.europa.eu/eli/reg/2018/1725/oj).
(5) Foilseoidh Ardrúnaíocht na Comhairle dáta theacht i bhfeidhm an Phrótacail in Iris Oifigiúil an Aontais Eorpaigh.
IARSCRÍBHINN
An nós imeachta maidir le formheas a dhéanamh ar na leasuithe ar an bPrótacal atá le glacadh ag an gComhchoiste
(1)
I gcás ina n-iarrfar ar an gComhchoiste leasuithe ar an bPrótacal a ghlacadh i gcomhréir le hAirteagal 16, mír 2, den Phrótacal, údarófar an Coimisiún caibidlíocht a dhéanamh le rialtas São Tomé agus Príncipe agus, i gcás inarb iomchuí agus faoi réir chomhlíonadh phointe 3 den Iarscríbhinn seo, na leasuithe atá beartaithe ar an bPrótacal a fhormheas, thar ceann an Aontais, maidir leis an méid seo a leanas:|
(a) |
na deiseanna iascaireachta de bhun Airteagal 5, mír 2, Airteagal 9, mír 1, agus Airteagal 10, mír 2, den Phrótacal a athbhreithniú, agus dá bhrí sin an ranníocaíocht airgeadais dá bhforáiltear in Airteagal 6, mír 2, pointe (a) den Phrótacal a athbhreithniú; |
|
(b) |
na socruithe cur chun feidhme don tacaíocht earnála dá dtagraítear in Airteagal 7 den Phrótacal; |
|
(c) |
na coinníollacha agus na socruithe teicniúla faoina ndéanann soithí an Aontais a gcuid gníomhaíochtaí iascaireachta; |
|
(d) |
na coimircí breise dá bhforáiltear in Airteagal 15, mír 4 den Phrótacal, arb é is aidhm dóibh sonraí pearsanta a chosaint. |
(2)
Maidir leis an bhformheas a dhéanfar thar ceann an Aontais, áiritheoidh an Coimisiún:|
(a) |
go mbeidh sé i gcomhréir le cuspóirí an chomhbheartais iascaigh; |
|
(b) |
go mbeidh sé comhsheasmhach leis na rialacha ábhartha arna nglacadh ag eagraíochtaí réigiúnacha bainistithe iascaigh agus go gcuirfear san áireamh ann an comhbhainistiú a dhéanann stáit chósta; |
|
(c) |
go gcuirfear san áireamh ann an fhaisnéis staidrimh, an fhaisnéis bhitheolaíoch agus an fhaisnéis ábhartha eile is déanaí arna tarchur chuig an gCoimisiún. |
(3)
Chuige sin agus bunaithe ar an bhfaisnéis a luaitear i bpointe 2(c), déanfaidh an Coimisiún doiciméad a tharchur ina leagfar amach sonraíochtaí sheasamh molta an Aontais (‘an doiciméad ullmhúcháin’), in am trátha roimh chruinniú ábhartha an Chomhchoiste, chuig an gComhairle nó a comhlachtaí ullmhúcháin lena bhreithniú agus a fhormheas.
(4)
Measfar an seasamh beartaithe ón Aontas a leagtar amach sa doiciméad ullmhúcháin a bheith formheasta, ach amháin má dhéanann líon áirithe Ballstát, líon is comhionann le mionlach blocála sa Chomhairle, i gcomhréir le hAirteagal 16, mír 4 den Chonradh ar an Aontas Eorpach, agóid le linn chruinniú chomhlacht ullmhúcháin na Comhairle nó laistigh de 20 lá ón doiciméad ullmhúcháin a fháil, cibé acu is túisce. I gcás na hagóide sin, cuirfear an cheist faoi bhráid na Comhairle.
(5)
Más rud é, le linn cruinnithe den Chomhchoiste a thionólfar ina dhiaidh sin, nach féidir teacht ar chomhaontú, lena n-áirítear comhaontú ar an láthair, cuirfear an cheist ar ais chuig an gComhairle, i gcomhréir leis an nós imeachta a leagtar amach i bpointí 2 go 4, chun go gcuirfear tosca nua san áireamh i seasamh an Aontais.
(6)
Iarrtar ar an gCoimisiún aon bheart is gá a dhéanamh, in am trátha, chun obair leantach a dhéanamh ar chinneadh an Chomhchoiste, lena n-áirítear, i gcás inarb iomchuí, an cinneadh ábhartha a fhoilsiú in Iris Oifigiúil an Aontais Eorpaigh agus aon togra is gá a chur in iúl chun an Cinneadh sin a chur chun feidhme.
(7)
A mhéid a bhaineann le ceisteanna eile nach mbaineann le leasuithe ar an bPrótacal i gcomhréir le hAirteagal 16, mír 2, den Phrótacal, déanfar an seasamh atá le glacadh ag an Aontas sa Chomhchoiste a chinneadh i gcomhréir leis na Conarthaí agus le cleachtais oibre sheanbhunaithe.
ELI: http://data.europa.eu/eli/dec/2026/1548/oj
ISSN 1977-0839 (electronic edition)