(1)

Leagtar síos i Rialachán Cur Chun Feidhme (AE) 2021/128 ón gCoimisiún (2) an t-iarmhéid glan atá ar fáil le haghaidh chaiteachas an Chiste Eorpaigh um Ráthaíocht Talmhaíochta (CERT), chomh maith leis na méideanna atá ar fáil don Chiste Eorpach Talmhaíochta um Fhorbairt Tuaithe (CETFT) le haghaidh na mblianta airgeadais 2021 go 2027, de bhun Airteagal 7(2) agus Airteagal 14 de Rialachán (AE) Uimh. 1307/2013 ó Pharlaimint na hEorpa agus ón gComhairle.

(2)

I gcomhréir le hAirteagal 14(1) de Rialachán (AE) 2021/2116, is iad na huasmhéideanna atá socruithe i leith na fo-uasteorann do chaiteachas a bhaineann leis an margadh agus d’íocaíochtaí díreacha a leagtar amach in Iarscríbhinn I a ghabhann le Rialachán (AE, Euratom) 2020/2093 ón gComhairle (3) a bheidh san uasteorainn bhliantúil le caiteachas CERT le haghaidh na mblianta 2021 go 2027.

(3)

I gcomhréir le hAirteagal 17(5), an dara fomhír, de Rialachán (AE) 2021/2115 ó Pharlaimint na hEorpa agus ón gComhairle (4), chinn Ballstát amháin ina Phlean Straitéiseach CBT méid na n-íocaíochtaí díreacha atá le deonú d’fheirmeoirí a laghdú le haghaidh na mblianta féilire 2023 go 2026 agus an toradh measta ar an laghdú sin a aistriú chuig CETFT.

(4)

I gcomhréir le hAirteagal 103(1), pointe (a), agus Airteagal 103(2) de Rialachán (AE) 2021/2115, chinn roinnt Ballstát ina bPlean Straitéiseach CBT céatadán áirithe dá leithdháiltí le haghaidh íocaíochtaí díreacha le haghaidh CETFT a aistriú le haghaidh na mblianta féilire 2023 go 2026.

(5)

I gcomhréir le hAirteagal 103(1), pointe (b), agus Airteagal 103(3) de Rialachán (AE) 2021/2115, chinn roinnt Ballstát ina bPlean Straitéiseach CBT céatadán áirithe dá leithdháiltí CETFT le haghaidh 2024-2027 a aistriú chuig a leithdháiltí le haghaidh íocaíochtaí díreacha le haghaidh na mblianta airgeadais 2024 go 2027.

(6)

Leithdháiltí ábhartha na mBallstát le haghaidh íocaíochtaí díreacha a leagtar amach in Iarscríbhinní V agus IX a ghabhann le Rialachán (AE) 2021/2115, chomh maith leis an miondealú bliantúil de réir Ballstáit ar thacaíocht an Aontais d’fhorbairt tuaithe a leagtar amach in Iarscríbhinn XI a ghabhann leis an Rialachán sin, rinneadh iad a oiriúnú dá réir sin trí Rialachán Tarmligthe (AE) 2023/813 ón gCoimisiún (5).

(7)

I gcomhréir le hAirteagal 2(1) de Rialachán (AE, Euratom) 2020/2093, tá an fho-uasteorainn do chaiteachas a bhaineann leis an margadh agus le híocaíochtaí díreacha de chuid an chreata airgeadais ilbhliantúil a leagtar amach in Iarscríbhinn I a ghabhann leis an Rialachán sin le coigeartú faoin gcoigeartú teicniúil dá bhforáiltear in Airteagal 4 den Rialachán sin tar éis na n-aistrithe idir CETFT agus na híocaíochtaí díreacha.

(8)

Ní mór, dá bhrí sin, an t-iarmhéid glan atá ar fáil le haghaidh chaiteachas CERT le haghaidh na mblianta 2024 go 2027 mar a leagtar amach i Rialachán Cur Chun Feidhme (AE) 2021/128 a choigeartú. Ar mhaithe le soiléireacht, ba cheart na méideanna atá le cur ar fáil do CETFT a fhoilsiú freisin.

(9)

Ba cheart, dá bhrí sin, Rialachán Cur Chun Feidhme (AE) 2021/128 a leasú dá réir sin,