European flag

Iris Oifigiúil
an Aontais Eorpaigh

GA

Sraith L


2024/2152

21.8.2024

CINNEADH (AE) 2024/2152 ÓN gCOMHAIRLE

an 15 Iúil 2024

maidir le síniú, thar ceann an Aontais Eorpaigh, agus le cur i bhfeidhm sealadach Phrótacal (2024-2029) maidir le Cur Chun Feidhme an Chomhaontaithe Comhpháirtíochta Iascaigh idir an Comhphobal Eorpach agus Poblacht Cabo Verde

TÁ COMHAIRLE AN AONTAIS EORPAIGH,

Ag féachaint don Chonradh ar Fheidhmiú an Aontais Eorpaigh, agus go háirithe Airteagal 43 de, i gcomhar le hAirteagal 218(5) de,

Ag féachaint don togra ón gCoimisiún Eorpach,

De bharr an mhéid seo a leanas:

(1)

Tháinig an Comhaontú Comhpháirtíochta Iascaigh idir an Comhphobal Eorpach agus Poblacht Cabo Verde (1) (‘an Comhaontú’), arna fhormheas le Rialachán (CE) Uimh. 2027/2006 ón gComhairle (2), i bhfeidhm an 30 Márta 2007. An Prótacal a ghabhann leis, ina leagtar amach na deiseanna iascaireachta agus an ranníocaíocht airgeadais dá bhforáiltear sa Chomhaontú, chuaigh sin in éag an 19 Bealtaine 2024.

(2)

An 19 Nollaig 2023 ghlac an Chomhairle Cinneadh lena n-údaraítear an Coimisiún tús a chur le caibidlíocht le Cabo Verde chun prótacal nua (‘an Prótacal’) maidir le chur chun feidhme an Chomhaontaithe a thabhairt i gcrích.

(3)

Tá prótacal nua maidir le cur chun feidhme an Chomhaontú chun feidhme caibidlithe ag an gCoimisiún, thar ceann an Aontais. Tar éis an chaibidlíocht a bheith tugtha i gcrích, cuireadh inisealacha leis an bPrótacal an 15 Aibreán 2024.

(4)

Tá sé d’aidhm ag an bPrótacal soithí an Aontais a cheadú a ngníomhaíochtaí iascaireachta a dhéanamh i limistéar iascaireachta Cabo Verde agus cead a thabhairt don Aontas agus do Cabo Verde comhoibriú go dlúth le chéile chun leanúint d’fhorbairt beartais iascaigh inbhuanaithe agus do shaothrú freagrach na hacmhainne iascaigh i limistéar iascaireachta Cabo Verde agus san Aigéan Indiach a chur chun cinn. Tacaítear leis an gcomhar sin le dálaí oibre cuibhiúla a bhunú in earnáil an iascaigh freisin.

(5)

Leis an bPrótacal, déantar foráil maidir le deiseanna iascaireachta do shoithí an Aontais in uiscí Cabo Verde, ar bhonn na comhairle eolaíche is fearr atá ar fáil agus i gcomhréir leis na bearta caomhnúcháin agus bainistíochta a ghlac an Coimisiún Idirnáisiúnta um Thuinníní Atlantacha a Chaomhnú.

(6)

Dá bhrí sin, ba cheart an Prótacal a shíniú thar ceann an Aontais, faoi réir a thabhairt i gcrích tráth níos déanaí.

(7)

Ba cheart feidhm a bheith ag an bPrótacal a luaithe is féidir i bhfianaise na tábhachta eacnamaíche a bhaineann le gníomhaíochtaí iascaireachta an Aontais i limistéar iascaireachta Cabo Verde agus an ghá atá ann an tréimhse ama a chuirfear isteach ar na gníomhaíochtaí sin a laghdú a oiread is féidir.

(8)

Dá bhrí sin, ba cheart feidhm a bheith ag an bPrótacal ar bhonn sealadach tar éis a shínithe.

(9)

I gcomhréir leis na conarthaí, ba cheart don Choimisiún síniú an Phrótacail a áirithiú, faoi réir a thabhairt i gcrích.

(10)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42 de Rialachán (AE) 2018/1725 ó Pharlaimint na hEorpa agus ón gComhairle (3) agus thug sé tuairim uaidh an 5 Iúil 2024,

TAR ÉIS AN CINNEADH SEO A GHLACADH:

Airteagal 1

Leis seo, údaraítear Prótacal (2024-2029) maidir le Cur Chun Feidhme an Chomhaontaithe Comhpháirtíochta Iascaigh idir an Comhphobal Eorpach agus Poblacht Cabo Verde (‘an Prótacal’) a shíniú, thar ceann an Aontais Eorpaigh, faoi réir thabhairt i gcrích an Phrótacail (4).

Airteagal 2

Áiritheoidh an Coimisiún síniú an Phrótacail faoi réir a thabhairt i gcrích.

Airteagal 3

Beidh feidhm shealadach ag an bPrótacal, i gcomhréir lena Airteagal 17, ó dháta a shínithe, go dtí go dtiocfaidh sé i bhfeidhm.

Airteagal 4

Tiocfaidh an Cinneadh seo i bhfeidhm lá a ghlactha.

Arna dhéanamh sa Bhruiséil, an 15 Iúil 2024.

Thar ceann na Comhairle

An tUachtarán

NAGY I.


(1)  Comhaontú Comhpháirtíochta Iascaigh idir an Comhphobal Eorpach agus Poblacht Cabo Verde (IO L 414, 30.12.2006, lch. 3).

(2)  Rialachán (CE) Uimh. 2027/2006 ón gComhairle an 19 Nollaig 2006 maidir leis an gComhaontú Comhpháirtíochta Iascaigh idir an Comhphobal Eorpach agus Poblacht Cabo Verde a thabhairt i gcrích (IO L 414, 30.12.2006, lch. 1).

(3)  Rialachán (AE) 2018/1725 ó Pharlaimint na hEorpa agus ón gComhairle an 23 Deireadh Fómhair 2018 maidir le daoine nádúrtha a chosaint i ndáil le sonraí pearsanta a phróiseáil ag institiúidí, comhlachtaí, oifigí agus gníomhaireachtaí an Aontais agus maidir le saorghluaiseacht sonraí den sórt sin, agus lena n-aisghairtear Rialachán (CE) Uimh. 45/2001 agus Cinneadh Uimh. 1247/2002/CE (IO L 295, 21.11.2018, lch. 39).

(4)  Foilsíodh téacs an Phrótacail IO L, 2024/2151, 21.8.2024, ELI: http://data.europa.eu/eli/prot/2024/2151/oj.


ELI: http://data.europa.eu/eli/dec/2024/2152/oj

ISSN 1977-0839 (electronic edition)