ANNESS

Dan l-Anness jistabbilixxi l-programm pluriennali ta’ kontrolli għall-perjodu 2022–2026 li għandhom jitwettqu minn esperti tal-Awtorità fl-Iżlanda u fin-Norveġja f’oqsma koperti mir-Regolament (UE) 2017/625.

Il-programm pluriennali ta’ kontrolli jkopri l-oqsma msemmija fl-Artikolu 1(2) tar-Regolament (UE) 2017/625 kif ukoll oqsma oħra previsti f’dak ir-Regolament, bħall-frodi u l-kontrolli tal-importazzjoni.

L-Awtorità identifikat ċerti oqsma ta’ prijorità fl-oqsma tal-ikel u l-għalf, is-saħħa tal-annimali u l-benessri tal-annimali, il-prodotti sekondarji tal-annimali u l-prodotti derivati, il-produzzjoni organika, il-kontrolli tal-frodi u tal-importazzjoni, u l-funzjonament tas-sistemi ta’ kontroll nazzjonali u tal-awtoritajiet kompetenti.

Il-kontrolli tal-Awtorità għandhom ikopru oqsma ta’ prijorità identifikati fl-Iżlanda u fin-Norveġja. Il-kwistjonijiet speċifiċi koperti minn kontrolli individwali għandhom jiġu adattati għas-sitwazzjoni f’kull wieħed mill-Istati u għall-Islanda, ikunu soġġetti għal eċċezzjonijiet applikabbli fir-rigward tal-leġiżlazzjoni fl-oqsma tas-saħħa u l-benessri tal-annimali.

L-esperti tal-Awtorità għandhom iwettqu l-kontrolli, li jinkludu verifiki fuq il-post, awditi, u analiżijiet ibbażati fuq id-dokumentazzjoni, skont l-Artikolu 116 tar-Regolament (UE) 2017/625.

Il-kontrolli mill-Awtorità jsiru biex jinkiseb livell għoli ta’ kopertura f’oqsma identifikati bħala prijorità mill-Awtorità u li jeħtieġu skrutinju dwar il-livell ta’ implimentazzjoni u l-effettività tas-sistemi ta’ kontrolli uffiċjali u tal-miżuri ta’ infurzar.

Il-Parti A tal-Anness telenka l-oqsma rilevanti ta’ kontrolli flimkien mal-objettivi għall-kontrolli tal-Awtorità għall-perjodu 2022-2026. Fil-Parti B tal-Anness jiġu identifikati l-oqsma ta’ prijorità taħt kull qasam ta’ kontroll.

Parti A – Oqsma ta’ kontrolli u għanijiet tal-kontrolli tal-Awtorità

1.   L-ikel u s-sikurezza tal-ikel

Biex tiġi vverifikata l-konformità mal-leġiżlazzjoni applikabbli taż-ŻEE dwar l-ikel u s-sikurezza tal-ikel li tirregola l-produzzjoni u t-tqegħid fis-suq ta’ ikel li joriġina mill-annimali u li ma joriġinax mill-annimali (li jkopri wkoll it-traċċabbiltà u t-tikkettar, is-sikurezza mikrobijoloġika u ż-żoonożi li tinġarr mill-ikel), ir-residwi u l-kontaminanti, l-informazzjoni dwar l-ikel lill-konsumaturi u l-użu ta’ indikazzjonijiet dwar in-nutrizzjoni u s-saħħa, il-materjali u l-oġġetti li jiġu f’kuntatt mal-ikel u l-implimentazzjoni ta’ kontrolli uffiċjali fuqhom.

2.   L-għalf u s-sikurezza tal-għalf

Biex tiġi vverifikata l-konformità mal-leġiżlazzjoni taż-ŻEE applikabbli li tirregola s-sikurezza tal-għalf (inklużi l-iġjene tal-għalf, l-approvazzjoni u r-reġistrazzjoni tal-istabbilimenti, il-kontaminanti, it-traċċabbiltà u t-tikkettar tal-għalf), l-għalf medikat, il-kummerċjalizzazzjoni u l-użu tal-għalf u l-implimentazzjoni tal-kontrolli uffiċjali fuqhom.

3.   Prodotti sekondarji mill-annimali u prodotti derivati

Biex tiġi vverifikata l-konformità mal-leġiżlazzjoni taż-ŻEE applikabbli li tirregola l-prodotti sekondarji tal-annimali u l-prodotti derivati u l-implimentazzjoni tal-kontrolli uffiċjali fuqhom.

4.   Is-saħħa tal-annimali

Biex tiġi vverifikata l-konformità mal-leġiżlazzjoni taż-ŻEE applikabbli li tirregola s-saħħa tal-annimali, b’enfasi fuq il-ġestjoni tas-saħħa tal-annimali, programmi biex jinkiseb status ħieles mill-mard u ż-żamma ta’ tali status, il-kontroll ta’ mard attiv ewlieni tal-annimali u t-tħejjija biex jiġu indirizzati tifqigħat multipli ta’ mard epiżootiku, u l-implimentazzjoni ta’ kontrolli uffiċjali fuqhom.

5.   Il-benessri tal-annimali

Li tiġi vverifikata l-konformità mal-leġiżlazzjoni applikabbli taż-ŻEE li tirregola t-trattament xieraq tal-annimali għall-produzzjoni fl-irziezet, matul it-trasport u waqt it-tbiċċir, id-depopolazzjoni u l-qtil b’emerġenza, u l-implimentazzjoni ta’ kontrolli uffiċjali fuqhom.

6.   Il-produzzjoni organika

Biex tiġi vverifikata l-konformità mal-leġiżlazzjoni taż-ŻEE applikabbli li tirregola l-produzzjoni u t-tikkettar ta’ prodotti organiċi u l-implimentazzjoni ta’ kontrolli uffiċjali fuqhom.

7.   Dħul fiż-ŻEE ta’ oġġetti u annimali minn pajjiżi terzi

Biex tiġi vverifikata l-konformità mal-leġiżlazzjoni applikabbli taż-ŻEE li tirregola l-kontrolli uffiċjali fuq l-annimali u l-oġġetti li jidħlu fl-Iżlanda u fin-Norveġja minn pajjiżi terzi, inkluża l-konformità mar-rekwiżiti għall-postijiet ta’ kontroll fuq il-fruntiera u r-rekwiżiti ġenerali u speċifiċi taż-ŻEE applikabbli għall-annimali u l-oġġetti rilevanti. Se jkun hemm enfasi speċjali fuq ir-regoli stabbiliti bir-Regolament (UE) 2017/625 u l-atti delegati u ta’ implimentazzjoni relatati.

8.   Aspetti ġenerali u orizzontali

Biex tiġi vverifikata l-konformità mal-leġiżlazzjoni taż-ŻEE applikabbli li tirregola l-identifikazzjoni u s-segwitu ta’ prattiki frodulenti jew qarrieqa f’oqsma koperti mir-Regolament (UE) 2017/625 u l-kontrolli uffiċjali fuqhom. Biex jiġi vverifikat li l-Iżlanda u n-Norveġja jieħdu miżuri ta’ segwitu xierqa biex jirrimedjaw kwalunkwe nuqqas speċifiku jew sistemiku identifikat permezz tal-kontrolli tal-Awtorità. Biex jiġu vverifikati l-arranġamenti fis-seħħ għall-verifika tal-effettività tal-kontrolli uffiċjali.

Parti B – Oqsma ta’ prijorità

	Qasam ta’ prijorità	2022 - 2026
L-ikel u s-sikurezza tal-ikel	Ikel li joriġina mill-annimali	Is-sikurezza tal-laħam tal-mammiferi u tal-għasafar u tal-prodotti tagħhom, tal-ħalib u tal-prodotti tiegħu, tal-prodotti tas-sajd u l-iġjene tal-produzzjoni ta’ molluski bivalvi ħajjin
	Ikel li ma joriġinax mill-annimali	Is-sikurezza tal-frott u tal-ħaxix, tal-ħxejjex aromatiċi, tal-ħwawar u tan-nebbieta, inklużi kontaminanti
	Residwi u kontaminanti	Residwi ta’ prodotti mediċinali veterinarji, pestiċidi u kontaminanti ambjentali
	Informazzjoni għall-konsumaturi dwar l-ikel u l-użu ta’ indikazzjonijiet nutrizzjonali u dwar is-saħħa	Informazzjoni għall-konsumaturi dwar l-ikel u l-użu ta’ indikazzjonijiet nutrizzjonali u dwar is-saħħa
	Il-materjali u l-oġġetti f’kuntatt mal-ikel		Il-materjali u l-oġġetti f’kuntatt dirett jew indirett mal-ikel
L-għalf u s-sikurezza tal-għalf	Is-sikurezza ġenerali tal-għalf	Is-sikurezza tal-għalf fl-istadji kollha, inklużi l-produzzjoni primarja, l-approvazzjoni u r-reġistrazzjoni tal-istabbilimenti, l-iġjene tal-għalf, it-traċċabbiltà, it-tikkettar u l-kontaminanti
	Għalf medikat		Produzzjoni, distribuzzjoni u użu ta’ għalf medikat
	Il-kummerċjalizzazzjoni u l-użu tal-għalf		It-tqegħid fis-suq u l-użu tal-għalf, inkluż it-tikkettar u l-informazzjoni lill-utenti, l-imballaġġ u l-preżentazzjoni
Prodotti sekondarji tal-annimali	Prodotti sekondarji mill-annimali u prodotti derivati	Prodotti sekondarji mill-annimali u prodotti derivati
Is-saħħa tal-annimali	Is-saħħa ta’ annimali akkwatiċi	Ġestjoni tas-saħħa tal-annimali inklużi programmi biex jinkiseb stat ħieles mill-mard u ż-żamma ta’ tali stat, u mard epiżootiku attiv (eż. influwenza avjarja)
	Is-saħħa ta’ annimali terrestri
	Tħejjija u prevenzjoni	Ippjanar ta’ kontinġenza
Benessri tal-Annimali	Fir-razzett	Majjali, tiġieġ tal-bajd, tiġieġ tas-simna, ruminanti żgħar u bhejjem tal-ifrat
	It-trasport
	Waqt il-qtil		Tbiċċir, qtil b’emerġenza u qtil għall-fini ta’ depopolazzjoni
Il-produzzjoni organika	Il-produzzjoni organika	Il-produzzjoni organika
Dħul fiż-ŻEE ta’ oġġetti u annimali minn pajjiżi terzi	Il-konformità tal-postijiet ta’ kontroll fuq il-fruntiera	Konformità ta’ postijiet ta’ kontroll fuq il-fruntiera u ċentri ta’ spezzjoni deżinjati mill-ġdid u ġodda
	Kontrolli uffiċjali fuq l-annimali u l-oġġetti	Kontrolli uffiċjali fuq annimali ħajjin u prodotti li ma joriġinawx mill-annimali u li joriġinaw mill-annimali minn pajjiżi terzi
Aspetti ġenerali u orizzontali	Segwitu tar-rakkomandazzjonijiet	Segwitu tar-rakkomandazzjonijiet settorjali u rieżami ġenerali
	Frodi	Arranġamenti fis-seħħ għall-ġlieda kontra prattiki frawdolenti jew qarrieqa
	Verifika tal-effettività tal-kontrolli uffiċjali	Arranġamenti fis-seħħ għall-verifika tal-effettività tal-kontrolli uffiċjali