IARSCRÍBHINN

San Iarscríbhinn, leagtar amach an clár ilbhliantúil rialuithe don tréimhse 2022-2026 atá le cur i gcrích ag saineolaithe an Údaráis san Íoslainn agus san Iorua i réimsí a chumhdaítear le Rialachán (AE) 2017/625.

Cumhdaíonn an clár ilbhliantúil rialuithe réimsí dá dtagraítear in Airteagal 1(2) de Rialachán (AE) 2017/625 chomh maith le réimsí eile dá bhforáiltear sa Rialachán sin, amhail rialuithe calaoise agus allmhairí.

Tá réimsí tosaíochta áirithe aitheanta ag an Údarás sna réimsí seo a leanas: bia agus beatha, sláinte ainmhithe agus leas ainmhithe, seachtháirgí ainmhithe agus táirgí díorthaithe, táirgeadh orgánach, rialuithe calaoise agus allmhairí, agus feidhmiú córas rialúcháin náisiúnta agus údaráis inniúla a bhíonn á n-oibriú.

Cumhdóidh rialuithe an Údaráis na réimsí tosaíochta aitheanta san Íoslainn agus san Iorua. Déanfar na saincheisteanna sonracha a chumhdaítear le rialuithe aonair a oiriúnú don staid mar atá i ngach Stát agus san Íoslainn, agus cuirfear iad faoi réir eisceachtaí is infheidhme maidir le reachtaíocht sna réimsí sláinte ainmhithe agus leas ainmhithe.

Cuirfidh saineolaithe an Údaráis rialuithe i gcrích, lena n-áirítear fíoruithe ar an láthair, iniúchtaí, agus anailísí deascbhunaithe i gcomhréir le hAirteagal 116 de Rialachán (AE) 2017/625.

Déantar rialuithe an Údaráis chun ardleibhéal clúdaigh a bhaint amach i réimsí atá aitheanta ag an Údarás mar thosaíochtaí agus a bhfuil grinnscrúdú de dhíth orthu i leith leibhéal cur chun feidhme agus éifeachtachta na gcóras rialúcháin oifigiúla agus na mbeart forfheidhmithe.

I gCuid A den Iarscríbhinn, liostaítear na réimsí ábhartha rialuithe chomh maith le cuspóirí an Údaráis le haghaidh na tréimhse 2022-2026. I gCuid B den Iarscríbhinn, sainaithnítear réimsí tosaíochta faoi gach réimse rialaithe.

Cuid A — Réimsí rialaithe agus cuspóirí rialuithe an Údaráis

1.   Bia agus sábháilteacht bia

Chun a fhíorú go bhfuil reachtaíocht ábhartha LEE á comhlíonadh, reachtaíocht maidir le bia agus sábháilteacht bia lena rialaítear táirgeadh agus cur ar an margadh bia de bhunadh ainmhíoch agus bia nach de bhunadh ainmhíoch é (a chumhdaíonn inrianaitheacht agus lipéadú freisin, mar aon le sábháilteacht mhicribhitheolaíoch agus zónóisí a iompraítear sa bhia), iarmhair agus éilleáin, faisnéis bhia do thomhaltóirí agus úsáid maíomh maidir le cothú agus sláinte, ábhair agus earraí a dteagmhaíonn bia díobh agus cur chun feidhme rialuithe oifigiúla ina leith.

2.   Beatha agus sábháilteacht beatha

Chun a fhíorú go gcomhlíontar reachtaíocht ábhartha LEE lena rialaítear sábháilteacht beatha (lena n-áirítear sláinteachas beatha, formheas agus clárú bunaíochtaí, éilleáin, inrianaitheacht agus lipéadú beatha), ábhar beathúcháin íocleasaithe, margaíocht agus úsáid beatha agus cur chun feidhme rialuithe oifigiúla ina leith.

3.   Seachtháirgí ainmhithe agus táirgí díorthaithe

Chun a fhíorú go bhfuil reachtaíocht ábhartha LEE á comhlíonadh, reachtaíocht lena rialaítear seachtháirgí ainmhithe agus táirgí díorthaithe agus cur chun feidhme rialuithe oifigiúla ina leith.

4.   Sláinte ainmhithe

Chun a fhíorú go bhfuil reachtaíocht ábhartha LEE á comhlíonadh, reachtaíocht lena rialaítear sláinte ainmhithe, ag díriú ar bhainistiú sláinte ainmhithe, cláir chun stádas saor ó ghalar a bhaint amach agus chun an stádas sin a choinneáil, rialú mórghalar gníomhach ainmhithe agus ullmhacht chun déileáil le ráigeanna iomadúla na ngalar eipeasótach, mar aon le cur chun feidhme rialuithe oifigiúla ina leith.

5.   Leas ainmhithe

Chun a fhíorú go gcomhlíontar reachtaíocht ábhartha LEE lena rialaítear leas ainmhithe le haghaidh ainmhithe táirgthe ar an bhfeirm, le linn a n-iompair agus tráth a maraithe, le linn dá líon a bheith á laghdú, an uair atá marú éigeandála á dhéanamh orthu, agus cur chun feidhme rialuithe oifigiúla ina leith.

6.   Táirgeadh orgánach

Chun a fhíorú go gcomhlíontar reachtaíocht ábhartha LEE lena rialaítear táirgeadh agus lipéadú táirgí orgánacha agus cur chun feidhme rialuithe oifigiúla ina leith.

7.   Earraí agus ainmhithe ó thríú tíortha a theacht isteach in LEE

Chun a fhíorú go gcomhlíontar reachtaíocht ábhartha LEE lena rialaítear rialuithe oifigiúla ar ainmhithe agus earraí ag teacht isteach san Íoslainn agus san Iorua ó thríú tíortha dóibh, lena n-áirítear comhlíontacht le ceanglais i ndáil le hionaid rialaithe teorann agus ceanglais ghinearálta agus shonracha LEE is infheidhme maidir leis na hainmhithe agus earraí ábhartha. Leagfar béim ar leith ar rialacha a bhunaítear le Rialachán (AE) 2017/625 agus gníomhartha tarmligthe agus cur chun feidhme gaolmhara.

8.   Gnéithe ginearálta agus cothrománacha

Chun a fhíorú go gcomhlíontar reachtaíocht ábhartha LEE lena rialaítear sainaithint cleachtas calaoiseach nó bréagach agus obair leantach ar na cleachtais sin i réimsí a chumhdaítear le Rialachán (AE) 2017/625 agus rialuithe oifigiúla ina leith. Chun a fhíorú go ndéanfaidh an Íoslainn agus an Iorua bearta leantacha iomchuí chun aon easnamh sonrach nó córasach a aithnítear trí rialuithe an Údaráis a leigheas. Chun socruithe a fhíorú, ar socruithe iad atá i bhfeidhm chun éifeachtacht rialuithe oifigiúla a fhíorú.

CUID B — Réimsí tosaíochta

	Réimse Tosaíochta	2022-2026
Bia agus an tsábháilteacht bia	Bia de bhunadh ainmhíoch	Sábháilteacht feola na mamach agus na n-éan agus a dtáirgí, bainne agus a tháirgí, táirgí iascaigh agus sláinteachas táirgthe na moileasc débhlaosach beo
	Bia nach de bhunadh ainmhíoch é	Sábháilteacht torthaí agus glasraí, luibheanna, spíosraí agus eascróg, lena n-áirítear éilleáin
	Iarmhair agus éilleáin	Iarmhair de tháirgí tréidliachta, lotnaidicídí agus éilleáin chomhshaoil
	Faisnéis bhia do thomhaltóirí agus úsáid maíomh maidir le cothú agus sláinte	Faisnéis bhia do thomhaltóirí agus úsáid maíomh maidir le cothú agus sláinte
	Ábhair agus earraí a dteagmhaíonn bia díobh		Ábhair agus earraí atá i dteagmháil dhíreach nó indíreach le bia
Beatha agus sábháilteacht beatha	Sábháilteacht ghinearálta beatha	Sábháilteacht beatha ag gach céim, lena n-áirítear táirgeadh príomhúil, formheas agus clárú bunaíochtaí, sláinteachas beatha, inrianaitheacht, lipéadú agus éilleáin
	Ábhar beatha íocleasaithe		Táirgeadh, dáileadh agus úsáid ábhair bheatha íocleasaithe
	Margaíocht agus úsáid beatha		An cur ar an margadh agus úsáid na beatha, lena n-áirítear lipéadú agus faisnéis do na húsáideoirí, pacáistíocht agus cur i láthair
Seachtháirgí ainmhithe	Seachtháirgí ainmhithe agus táirgí díorthaithe	Seachtháirgí ainmhithe agus táirgí díorthaithe
Sláinte ainmhithe	Sláinte ainmhithe uisceacha	Bainistiú sláinte ainmhithe, lena n-áirítear cláir chun stádas saor ó ghalar a bhaint amach agus an stádas sin a choinneáil, agus galair eipeasótacha ghníomhacha (e.g. fliú na n-éan)
	Sláinte ainmhithe talún
	Ullmhacht agus cosc	Pleanáil theagmhasach
Leas Ainmhithe	Ar an bhfeirm	Mucra, béaróga, sicíní grísce, athchogantaigh bheaga agus eallach
	Iompar
	Tráth a maraithe		Marú, marú éigeandála agus marú le líon na n-ainmhithe a laghdú
Táirgeadh orgánach	Táirgeadh orgánach	Táirgeadh orgánach
Earraí agus ainmhithe ó thríú tíortha a theacht isteach in LEE	Comhlíontacht na n-ionad rialaithe teorann	Comhlíontacht na n-ionad rialaithe teorann agus na lárionad iniúchta athainmnithe agus na lárionad nua
	Rialuithe oifigiúla ar ainmhithe agus ar earraí	Rialuithe oifigiúla ar ainmhithe beo agus ar tháirgí de bhunadh ainmhíoch agus ar tháirgí nach de bhunadh ainmhíoch iad ó thríú tíortha
Gnéithe ginearálta agus cothrománacha	Obair leantach ar mholtaí	Obair leantach ar mholtaí earnála agus athbhreithniú ginearálta
	Calaois	Socruithe atá i bhfeidhm chun cleachtais chalaoiseach nó bhréagacha a chomhrac
	Fíorú éifeachtachta rialuithe oifigiúla	Socruithe atá i bhfeidhm chun éifeachtacht na rialuithe oifigiúla a fhíorú