AN COIMISIÚN EORPACH

An Bhruiséil,9.10.2024

COM(2024) 451 final

TUARASCÁIL ÓN gCOIMISIÚN CHUIG PARLAIMINT NA hEORPA AGUS CHUIG AN gCOMHAIRLE

maidir leis an gcéad athbhreithniú tréimhsiúil ar fheidhmiú an chinnidh leordhóthanachta maidir le Creat Príobháideachais Sonraí AE-SAM

1.AN CHÉAD ATHBHREITHNIÚ TRÉIMHSIÚIL - CÚLRA, ULLMHÚCHÁN AGUS PRÓISEAS

Ina chinneadh an 10 Iúil 2023 (an ‘cinneadh leordhóthanachta’), chinn an Coimisiún go soláthraíonn Creat Príobháideachais Sonraí AE‐SAM (CPS) leibhéal leormhaith cosanta le haghaidh sonraí pearsanta a aistrítear ón Aontas Eorpach chuig eagraíochtaí i Stáit Aontaithe Mheiriceá. 1 Leis an gcinneadh leordhóthanachta ceanglaítear ar an gCoimisiún athbhreithnithe tréimhsiúla a dhéanamh, ar cheart an chéad cheann díobh a dhéanamh bliain amháin tar éis an dáta a tugadh fógra do na Ballstáit faoin gcinneadh leordhóthanachta. Leis an tuarascáil seo tugtar an chéad athbhreithniú sin chun críche.

Mar a cheanglaítear le haithris 211 den chinneadh leordhóthanachta, díríodh sa chéad athbhreithniú seo atá á dhéanamh tar éis chéad bhliain oibríochta an chreata nua, ar a fhíorú maidir leis na heilimintí uile dá bhforáiltear sa chreat, ar cuireadh chun feidhme iad agus an bhfuil siad ag feidhmiú go héifeachtach. Chumhdaigh an t‑athbhreithniú gach gné d’fheidhmiú an chreata, lena n‑áirítear i bhfianaise forbairtí dlíthiúla a tharla ó glacadh an cinneadh leordhóthanachta.

San ullmhúchán don athbhreithniú bhailigh an Coimisiún faisnéis ó pháirtithe leasmhara ábhartha, go háirithe ó eagraíochtaí neamhrialtasacha (ENRanna) a bhfuil saineolas acu ar chearta digiteacha agus príobháideachas 2 , ó eagraíochtaí CPS-dheimhnithe, trína gcomhlachais trádála 3 , agus ó údaráis na Stát Aontaithe a mbíonn baint acu le cur chun feidhme an chreata. Thairis sin, bhailigh an Coimisiún aiseolas ón bpobal i gcoitinne freisin trí ghlao sonrach ar fhianaise ar an tairseach ‘Cloisimis uait’ 4 .

Tionóladh cruinniú athbhreithnithe in Washington D.C. an 18 agus an 19 Iúil 2024. D’oscail Didier Reynders, an Coimisinéir um Cheartas agus Tomhaltóirí agus Gina Raimondo, Rúnaí Tráchtála na Stát Aontaithe, é 5 . 

Maidir leis an Aontas Eorpach, b’ionadaithe ó Ard-Stiúrthóireacht um Cheartas agus Tomhaltóirí an Choimisiúin Eorpaigh, mar aon le cúigear ionadaithe arna n‑ainmniú ag an mBord Eorpach um Chosaint Sonraí (EDPB) agus a tháinig ó údaráis náisiúnta éagsúla cosanta sonraí (ÚCSanna) agus ón Maoirseoir Eorpach ar Chosaint Sonraí, a rinne an t‑athbhreithniú 6 . Ar thaobh na Stát Aontaithe, bhí ionadaithe ón Roinn Tráchtála rannpháirteach, mar aon le hionadaithe ón Roinn Stáit, ón gCoimisiún Trádála Feidearálach, ón Roinn Iompair, ó Oifig an Stiúrthóra um Fhaisnéis Náisiúnta (OSFN), ón Roinn Dlí agus Cirt, Ard-Chigire an Chomhphobail Faisnéise, agus comhaltaí den Bhord Maoirseachta um Príobháideachas agus Saoirsí Sibhialta (PCLOB). Ina theannta sin, chuir ionadaithe ó eagraíochtaí a thairgeann seirbhísí neamhspleácha um réiteach díospóidí agus Cumann Eadrána Mheiriceá faisnéis ar fáil le linn na seisiún athbhreithnithe ábhartha. Thairis sin, chuir roinnt cur i láthair ó eagraíochtaí CPS-dheimhnithe maidir leis an gcaoi a gcomhlíonann cuideachtaí ceanglais an chreata eolas ar fáil don athbhreithniú.

Thairis sin, chuir ábhar atá ar fáil go poiblí, amhail cinntí cúirte, rialacha agus nósanna imeachta cur chun feidhme údaráis ábhartha na Stát Aontaithe, tuarascálacha agus staidéir ó eagraíochtaí neamhrialtasacha, tuarascálacha trédhearcachta arna n‑eisiúint ag cuideachtaí CPS-dheimhnithe, tuarascálacha bliantúla ó chomhlachtaí maoirseachta neamhspleácha, agus tuarascálacha ó na meáin, eolas ar fáil do thorthaí an Choimisiúin.

2.TORTHAÍ

2.1.Gnéithe tráchtála

2.1.1.An próiseas deimhniúcháin

Chun bheith in ann sonraí pearsanta a fháil a aistrítear ón Aontas ar bhonn an Chreata Príobháideachais Sonraí, ní mór do chuideachta de chuid na Stát Aontaithe a dheimhniú don Roinn Tráchtála, agus a athdheimhniú a dhéanamh ansin ar bhonn bliantúil dó, go bhfuil sí ag cloí le ceanglais shonracha maidir le cosaint sonraí (‘Prionsabail CPS’). Chun an deimhniú a fháil, caithfidh an chuideachta a bheith faoi réir chumhachtaí imscrúdaitheacha agus forfheidhmiúcháin an Choimisiúin Trádála Fheidearálaigh nó na Roinne Iompair, a dhearbhú go poiblí go bhfuil sí tiomanta Prionsabail an Chreata Príobháideachais Sonraí a chomhlíonadh, agus a beartas príobháideachais a nochtadh go poiblí agus na ceanglais sin a chur chun feidhme go hiomlán 7 . Sula dtugtar deimhniú chun críche, fíoraíonn an Roinn Tráchtála cé acu a chomhlíon nó nár chomhlíon an chuideachta na ceanglais deimhniúcháin uile 8 .

Ag an gcruinniú athbhreithnithe, mhínigh an Roinn Tráchtála gur díríodh, sa chéad bhliain seo den Chreat Príobháideachais Sonraí, ar an bpróiseas deimhniúcháin a chur i bhfeidhm, lena n‑áirítear uirlisí tiomnaithe TF a fhorbairt, nósanna imeachta a thabhairt cothrom le dáta, dul i dteagmháil le cuideachtaí, agus gníomhaíochtaí for-rochtana/feasachta eile a dhéanamh. Amhail dáta an chruinnithe athbhreithnithe, tá níos mó ná 2 800 cuideachta CPS-dheimhnithe ann. Is é sin, d’éirigh le níos mó cuideachtaí deimhniú CPS a bhaint amach le linn chéad bhliain oibríochta an chreata sin, ná mar a d’éirigh faoin gcreat a bhí ann roimhe, an Sciath Phríobháideachais 9 . De réir na faisnéise a sholáthair an Roinn Tráchtála, is FBManna iad 70 % de na rannpháirtithe agus is san earnáil teicneolaíochta, faisnéise agus cumarsáide (TFC) atá líon mór cuideachtaí CPS (47 %). Thairis sin, tá 60 % de na cuideachtaí a bhfuil deimhniú faighte acu deimhnithe go heisiach le haghaidh sonraí neamh-AD, tá deimhniú faighte ag 2.5 % de na cuideachtaí go heisiach le haghaidh sonraí AD agus tá deimhniú faighte ag 37.5 % díobh le haghaidh sonraí AD agus neamh-AD araon.

Tá na nósanna imeachta is gá glactha ag an Roinn Tráchtála chun iarratais ó chuideachtaí a láimhseáil. Ní mór do chuideachtaí a n‐iarratais ar dheimhniúchán a chur isteach ar shuíomh gréasáin an Chreata Príobháideachais Sonraí de chuid na Roinne Tráchtála ( https://www.dataprivacyframework.gov/ ). Tugtar faisnéis ansin faoin tslí le dul isteach sa Chreat Príobháideachais Sonraí 10 agus maidir le hoibleagáidí na cuideachta faoin gCreat 11 . Tá foireann shonrach sa Roinn Tráchtála, faoi fhreagracht Stiúrthóra thiomnaithe le haghaidh an Chreata Príobháideachais Sonraí, i gceannas ar gach gné a bhaineann le bainistíocht agus riarachán CPS, lena n‑áirítear an próiseas deimhniúcháin agus faireachán ar chomhlíontacht. Sanntar gach iarratas do bhall foirne ar leith a bhíonn freagrach i gcónaí as an gcuideachta ábhartha le linn an phróisis deimhniúcháin.

Chun a bheith deimhnithe faoin gCreat, cuireann cuideachtaí a n‑iarratas isteach, lena n‑áirítear dréachtbheartas príobháideachais. Seiceálann an Roinn Tráchtála an bhfuil sé i gcomhréir le ceanglais ábhartha an Chreata Príobháideachais Sonraí. I gcás eagraíochtaí ar mian leo eintitis éagsúla laistigh de ghrúpa corparáideach (e.g. fochuideachtaí éagsúla) a dheimhniú, iarrann an Roinn Tráchtála beartas cuimsitheach príobháideachais amháin a thugann léiriú soiléir ar na heintitis uile atá le cumhdach agus athbhreithníonn sé é, é sin nó déanann sé beartais ar leithligh le haghaidh gach eintitis ar leith a iarraidh agus a athbhreithniú. Fíoraíonn an Roinn Tráchtála freisin leis an sásra neamhspleách maidir le ceart cúitimh 12 a léiríodh san iarratas an amhlaidh gur chláraigh an eagraíocht leis. I gcás cuideachtaí a roghnaíonn painéal an údaráis cosanta sonraí (e.g. toisc go bpróiseálann siad sonraí acmhainní daonna), seiceálann an Roinn Tráchtála ar íoc an chuideachta na táillí a cheanglaítear chun úsáid a bhaint as an bpainéal. Más gá, fíoraíonn an Roinn Tráchtála freisin an dtagann an t‐iarratasóir faoi dhlínse an Choimisiúin Trádála Fheidearálaigh nó na Roinne Iompair (agus an bhfuil sé incháilithe, dá bhrí sin, chun dul isteach sa Chreat Príobháideachais Sonraí).

Má chomhlíontar na coinníollacha go léir, cuireann an Roinn Tráchtála in iúl don eagraíocht gur féidir léi a beartas príobháideachais a thagraíonn don Chreat Príobháideachais Sonraí a phostáil ar a suíomh gréasáin. A luaithe ar beartas príobháideachais poiblí é, deimhníonn an Roinn Tráchtála an deimhniú agus cuireann sí an chuideachta ar liosta an Chreata Príobháideachais Sonraí ar a suíomh gréasáin. Is féidir brath ar an gCreat Príobháideachais Sonraí chun sonraí pearsanta a fháil ón Aontas ón dáta a chuireann an Roinn Tráchtála an eagraíocht ar an liosta sin 13 .

Mar a míníodh le linn an chruinnithe athbhreithnithe, diúltaíodh do 33 iarratas mar thoradh ar na seiceálacha a rinne an Roinn Tráchtála go dtí seo, toisc nár chomhlíon siad ceanglais an Chreata Príobháideachais Sonraí. Go ginearálta, oibríonn an Roinn Tráchtála leis an gcuideachta chun aghaidh a thabhairt ar aon easnamh. I gcás ina sainaithníonn an Roinn Tráchtála aon easnamh, cuireann sí an chuideachta ar an eolas nach mór di aghaidh a thabhairt orthu sin agus mura dtugann sí freagra laistigh de thréimhse ama ar leith nó má theipeann uirthi ar shlí eile a féindeimhniúchán a chur i gcrích i gcomhréir le nósanna imeachta na Roinne Tráchtála go mbeidh mar thoradh air sin go measfar gur éirigh sí as an iarratas a dhéanamh. Mura ndéantar an deimhniúchán tosaigh a chur i gcrích/a leasú laistigh de 12 mhí, glacann an Roinn Tráchtála leis gur éiríodh as.

Sonraítear ar liosta an Chreata Príobháideachais Sonraí an dáta dlite don athdheimhniú bliantúil i gcás gach cuideachta ar leith. Chun a mheabhrú do chuideachtaí nach mór iarratas athdheimhniúcháin a dhéanamh, chruthaigh an Roinn Tráchtála córas lena meabhraítear go bhfuil an deimhniú ar tí dul in éag. Faigheann eagraíochtaí meabhrúchán mí roimh an dáta dlite, ansin coicís roimhe agus ansin lá amháin roimhe. Iad siúd a ligeann dá ndeimhniú dul in éag, baintear de liosta an Chreata Príobháideachais Sonraí iad. Mar a thuairiscítear faoi Iarscríbhinn III a ghabhann leis an gcinneadh leordhóthanachta, tá rannóg ar leith ag an Roinn Tráchtála ar a suíomh gréasáin ina liostaítear na heagraíochtaí sna Stáit Aontaithe nach rannpháirtithe gníomhacha iad a thuilleadh agus ina sainaithnítear na cúiseanna faoi seach (e.g. dul in éag nó tarraingt siar) ar baineadh na cuideachtaí lena mbaineann den liosta (‘liosta na gcuideachtaí neamhghníomhacha’). I gcás eagraíochtaí a baineadh de liosta an Chreata Príobháideachais Sonraí toisc gur lig siad dá ndeimhniú dul in éag, téann an Roinn Tráchtála i dteagmháil leo chun a dheimhniú an mian leo tarraingt siar nó an amhlaidh go bhfuil sé beartaithe acu athdheimhniú a dhéanamh, agus, más mian leo athdheimhniú a dhéanamh, chun a fhíorú gur chuir siad Prionsabail CPS i bhfeidhm le linn na tréimhse éaga maidir le sonraí pearsanta a fuarthas faoi CPS agus chun soiléiriú a fháil maidir leis na bearta a dhéanfaidh siad chun aghaidh a thabhairt ar na saincheisteanna atá fós gan réiteach agus a chuir moill ar a n‑athdheimhniú. I gcás cuideachtaí a thugann fógra don Roinn Tráchtála gur mian leo tarraingt siar ón gCreat Príobháideachais Sonraí, ceanglaíonn an Roinn Tráchtála orthu a dheimhniú cé acu a dhéanfaidh siad na sonraí a fuarthas faoi CPS a thabhairt ar ais nó a scriosadh; na sonraí a choinneáil agus leanúint de Phrionsabail CPS a chur i bhfeidhm maidir le sonraí den sórt sin (rud nach mór a dheimhniú go bliantúil); nó na sonraí a choinneáil agus cosaintí eile a chur i bhfeidhm (amhail clásail chonarthacha chaighdeánacha arna nglacadh ag an gCoimisiún Eorpach).

San aiseolas a fuarthas ó chomhlachais trádála agus ó chuideachtaí dealraíonn sé go bhfuil roinnt beart déanta ag cuideachtaí CPS-dheimhnithe chun a áirithiú go gcomhlíonfar Prionsabail CPS. Mar shampla, chun an prionsabal maidir le ceart cúitimh, forfheidhmiú agus dliteanas a chomhlíonadh, rinne eagraíochtaí seiceálacha inmheánacha trí fhéinmheasúnú nó trí athbhreithniú seachtrach ar chomhlíontacht. Mhínigh an dá Shásra Neamhspleácha maidir le Ceart Cúitimh ón earnáil phríobháideach a ghlac páirt sa chruinniú athbhreithnithe go soláthraíonn siad athbhreithniú seachtrach ar chomhlíontacht freisin trí athbhreithniú a dhéanamh ar bheartais phríobháideachais, agus mhínigh ceann amháin de na Sásraí Neamhspleácha maidir le Ceart Cúitimh ón earnáil phríobháideach go soláthraíonn sé iniúchtaí agus seiceálacha randamacha freisin, agus go ndíríonn sé, mar shampla, ar na prionsabail maidir le rochtain, rogha agus aistriú ar aghaidh. Ina theannta sin, d’fhorbair cuideachtaí deimhnithe cláir chomhlíontachta inmheánacha agus sásraí maoirseachta, chuir siad oiliúint ar fhostaithe, chuir siad sásraí i bhfeidhm a thabharfadh deis do dhaoine aonair a gcearta a fheidhmiú, rinne siad measúnuithe tionchair príobháideachais, agus d’athbhreithnigh siad conarthaí a bhí ann cheana.

2.1.2.Faireachán ar chomhlíontacht, éilimh bhréagacha maidir le rannpháirtíocht agus forfheidhmiú

Faoin gCreat Príobháideachais Sonraí, tá an Roinn Tráchtála freagrach as faireachán a dhéanamh ar chomhlíonadh Phrionsabail an Chreata Príobháideachais Sonraí trí uirlisí éagsúla a úsáid, lena n‐áirítear seiceálacha ex officio (ar a thionscnamh féin), spotseiceálacha ad hoc agus ceistneoirí comhlíontachta. Áirítear leis sin cuardach a dhéanamh le haghaidh éilimh bhréagacha maidir le rannpháirtíocht sa chreat agus aghaidh a thabhairt ar na héilimh sin, mar shampla trí chuardaigh idirlín 14 .

Chun faireachán a dhéanamh ar chomhlíonadh na bprionsabal ag cuideachtaí CPS, bhí an Roinn Tráchtála ag brath go príomha ar chuardaigh ghréasáin ad hoc agus ar sheiceálacha sna meáin (shóisialta) le bliain anuas. Thuairiscigh an Roinn Tráchtála nár bhraith sí saincheisteanna maidir le Prionsabail CPS a bheith á gcomhlíonadh sa chéad bhliain seo agus nár tharchuir sí aon chuideachtaí chuig an gCoimisiún Trádála Feidearálach nó an Roinn Iompair ar mhaithe le gníomhaíocht forfheidhmiúcháin fhéideartha. Bhunaigh sí pointe teagmhála tiomnaithe freisin chun comhar le hÚdaráis Cosanta Sonraí a éascú agus chun gearáin a fháil ó dhaoine aonair agus atreoruithe a fháil ó údaráis eile (e.g. ÚCSanna nó an Coimisiún Trádála Feidearálach). Mar sin féin, ní bhfuarthas aon atreoruithe ná gearáin le bliain anuas. Cé gur díríodh sa chéad bhliain d’oibriú an Chreata Príobháideachais Sonraí ar bhunú an chreata agus an phróisis deimhniúcháin, ag an gcruinniú athbhreithnithe mhínigh an Roinn Tráchtála go bhfuil sé beartaithe aici seiceálacha comhlíontachta a dhéanamh trí mhodhanna uathoibrithe chun iad a dhéanamh ar bhealach níos córasaí, agus go bhfuil na huirlisí TF is gá á bhforbairt aici faoi láthair chun é sin a dhéanamh.

Aithníonn an Coimisiún nár mhór don Roinn Tráchtála a cuid iarrachtaí sa chéad bhliain seo a dhíriú ar bhunú an Chreata agus an phróisis deimhniúcháin. Ag bogadh ar aghaidh, tá sé tábhachtach go gcuirfidh an Roinn Tráchtála dlús lena hiarrachtaí faireachán agus seiceáil a dhéanamh ar chomhlíonadh na bPrionsabal, rud a bhfuil ga leis chun ardleibhéal leanúnach comhlíontachta leis an gcreat a áirithiú agus chun cásanna a bhrath a mbeidh gníomhaíocht forfheidhmiúcháin bhreise ag teastáil ina leith, lena n‑áirítear éilimh bhréagacha féideartha ó chuideachtaí maidir le rannpháirtíocht. I ndáil leis an méid sin, is díol sásaimh don Choimisiún gur dheimhnigh an Roinn Tráchtála go bhfuil sé ar intinn aici uirlisí (uathoibrithe) a fhorbairt agus a úsáid chun saincheisteanna maidir le comhlíonadh agus éilimh bhréagacha a shainaithint ar bhealach níos éifeachtaí agus níos córasaí agus tá sé den tuairim gur cheart é sin a bheith mar chuid d’iarracht níos leithne chun úsáid níos mó a bhaint as na huirlisí éagsúla atá ar fáil dó (e.g. spotseiceálacha, ceistneoirí maidir le hathbhreithniú ar chomhlíonadh, iarrataí ar fhaisnéis etc.), lena n‑áirítear chun a fhíorú go bhfuil ceanglais shonracha á gcomhlíonadh faoin gCreat Príobháideachais Sonraí 15 .

Tá eagraíochtaí an Chreata Príobháideachais Sonraí faoi réir dhlínse an Choimisiúin Trádála Fheidearálaigh agus na Roinne Iompair. Le linn an chruinnithe athbhreithnithe, dheimhnigh an Roinn Iompair go bhfuil na próisis uile i bhfeidhm aici chun gníomhaíocht forfheidhmiúcháin iomchuí a dhéanamh. Mhínigh sí freisin nach ndeachaigh ach fíorbheagán cuideachtaí faoina dlínse isteach sa Chreat Príobháideachais Sonraí (i.e., cúpla gníomhaire ticéad cé nach ndeachaigh aon aerlíne isteach ann). Dheimhnigh an Coimisiún Trádála Feidearálach go seiceálann sé sáruithe ar an gCreat Príobháideachais Sonraí go córasach i ngach ceann dá imscrúduithe príobháideachais. Go dtí seo, ní bhfuair an Coimisiún Trádála Feidearálach aon tarchuir ó údaráis eile. Fuair sé cúpla gearán inar luadh an Creat Príobháideachais Sonraí, cé gur bhain dhá cheann díobh le cuideachtaí ar an ‘liosta neamhghníomhach’, bhain dhá cheann díobh le cuideachtaí nach raibh rannpháirteach sa chreat agus bhí ceann amháin nár bhain le sonraí pearsanta a aistríodh ón Aontas. Tráth na tuarascála seo, ní raibh cinntí eisithe ag an gCoimisiún Trádála Feidearálach chun comhlíontacht le CPS a fhorfheidhmiú, cé gur dheimhnigh sé go bhfuil roinnt cuideachtaí a bhfuil deimhniú CPS acu á n‑imscrúdú faoi láthair.

Is díol sásaimh don Choimisiún go ndéanann an Coimisiún Trádála Feidearálach seiceálacha córasacha ar sháruithe an Chreata Príobháideachais Sonraí ina imscrúduithe príobháideachais uile. Ós rud é go mbraitheann éifeachtacht leanúnach CPS ar an gcreat a bheith á fhorfheidhmiú go láidir, meastar go bhfeidhmeoidh an Coimisiún Trádála Feidearálach a chumhachtaí imscrúdaitheacha thairis sin faoin gcreat, lena n‑áirítear trí bhearta scuabtha a dhéanamh go réamhghníomhach lena ndíreofar ar cheanglais shonracha de chuid CPS a bheith á gcomhlíonadh agus/nó ar earnálacha áirithe.

2.1.3.Láimhseáil gearán

Soláthraíonn an Creat Príobháideachais Sonraí féidearthachtaí éagsúla do dhaoine aonair san Aontas maidir le ceart cúitimh i gcásanna nuair nach ndéanann eagraíochtaí deimhnithe Prionsabail CPS a chomhlíonadh 16 . Áirítear leis sin, réiteach a shaothrú trí theagmhálacha díreacha le heagraíocht CPS, nach mór di freagra a sholáthar don duine aonair a ndéantar difear dó laistigh de 45 lá. Féadfaidh daoine aonair gearán a dhéanamh freisin le Sásra Neamhspleách maidir le Ceart Cúitimh arna ainmniú ag eagraíocht chun gearáin a imscrúdú agus a réiteach. Ag brath ar na himthosca, d’fhéadfadh sé gur comhlacht malartach um réiteach díospóidí nó ÚCS a bheadh i gceist 17 . Ar deireadh, sa chás nár réitíodh gearán an ábhair sonraí go sásúil le haon cheann de na bealaí sásaimh eile atá ar fáil, féadfaidh daoine aonair tús a chur le headráin cheangailteach os comhair Phainéal CPS AE‐SAM mar rogha dheireanach ar cúiteamh.

2.1.3.1.Láimhseáil gearán ag cuideachtaí

Léiríonn na freagraí ó chomhlachais trádála agus ó chuideachtaí ar cheistneoirí a sheol an Coimisiún gur líon fíorbheag gearán a fuair cuideachtaí CPS-dheimhnithe ó dhaoine aonair maidir le neamhchomhlíonadh Phrionsabail CPS, má fuair ar chor ar bith. Chuir cuideachtaí sásraí agus uirlisí éagsúla i bhfeidhm freisin chun deis a thabhairt do dhaoine aonair a gcearta a fheidhmiú agus gearáin a thaisceadh, lena n‑áirítear trí fhoirmeacha gréasánbhunaithe, tríd an ríomhphost agus ar an bhfón.

2.1.3.2.Sásraí Neamhspleácha maidir le Ceart Cúitimh

Léiríonn an t‑aiseolas a fuarthas le linn an chruinnithe athbhreithnithe agus an fhaisnéis a chuir comhlachais trádála ar fáil go ndearnadh líon an-bheag gearán le sásraí réitigh neamhspleácha. I measc na Sásraí Iontaoibhe Neamhspleácha a roghnaigh cuideachtaí tá Cláir Náisiúnta BBB, JAMS, TRUSTe agus VeraSafe. Ceanglaíonn an Creat Príobháideachais Sonraí go bhfoilseoidh na Sásraí Neamhspleácha maidir le Ceart Cúitimh tuarascáil bhliantúil ina mbeidh staitisticí comhiomlána maidir le húsáid a seirbhísí um réiteach díospóidí. Tráth a glacadh an tuarascáil seo, bhí tuarascáil bhliantúil foilsithe ag gach Sásra Neamhspleách maidir le Ceart Cúitimh lena mbaineann 18 .

Thairis sin, ag an gcruinniú athbhreithnithe, rinne BBB agus VeraSafe cur i láthair mionsonraithe ar a gcuid gníomhaíochtaí ó anuraidh. Thuairiscigh siad méadú ar líon na rannpháirtithe gnó a roghnaigh a gcuid seirbhísí i gcomparáid le creataí roimhe seo agus luaigh siad go bhfuair siad roinnt gearán, cé gur gearáin neamh-incháilithe ab ea a bhformhór. Mar shampla, fuair BBB 87 ngearán ó dhaoine aonair san Aontas, agus ní raibh ach dhá cheann díobh a bheadh incháilithe lena réiteach. Cé gur mhínigh BBB go ndéantar gearáin a phróiseáil faoi cheann 5 lá gnó ar an meán, cuireadh clabhsúr ar an dá ghearán sin sa deireadh mar nach bhfuarthas freagairt ó na daoine aonair. Fuair VeraSafe 26 ghearán, a raibh sé cinn díobh incháilithe lena réiteach. Réitíodh dhá cheann díobh sin a bhain le hiarrataí ar rochtain agus ar scriosadh, agus tá dhá cheann fós ar feitheamh, agus tarraingíodh dhá cheann siar nó cuireadh clabhsúr orthu mar nach bhfuarthas freagairt ón duine aonair. Mhínigh an dá Shásra Neamhspleácha maidir le Ceart Cúitimh go bhfuil sé d’aidhm acu gearáin a fhreagairt i dteanga an duine aonair.

Ní mór do chuideachtaí an Chreata Príobháideachais Sonraí a phróiseálann sonraí acmhainní daonna a aistrítear ón Aontas ÚCSanna an Aontais a roghnú dá Sásra Neamhspleách maidir le Ceart Cúitimh le haghaidh na sonraí sin, cé go bhféadfadh cuideachta CPS ÚCSanna an Aontais a roghnú dá Sásra Neamhspleách maidir le Ceart Cúitimh ar bhonn deonach le haghaidh cineálacha eile sonraí pearsanta a aistrítear agus iad ag brath ar CPS. Go deimhin, is é an réiteach sin a roghnaigh níos mó ná leath na gcuideachtaí CPS-dheimhnithe tráth an athbhreithnithe 19 , rud ar díol sásaimh é. Ón uair a glacadh an cinneadh leordhóthanachta, ghlac an Bord Eorpach um Chosaint Sonraí na rialacha nós imeachta le haghaidh ‘Painéal Neamhfhoirmiúil ÚCSanna an Aontais’. Tá an Painéal inniúil chun comhairle cheangailteach a sholáthar d’eagraíochtaí na Stát Aontaithe tar éis gearáin neamhréitithe CPS ó dhaoine aonair maidir le sonraí pearsanta a aistríodh ón Aontas faoi CPS a láimhseáil. De réir a rialacha nós imeachta, bíonn an painéal déanta d’Údarás Cosanta Sonraí a ghníomhaíonn mar ÚCS ceannais agus d’ÚCSanna comh-athbhreithnitheora ainmnithe eile 20 . Cuireann sé comhairle cheangailteach ar fáil laistigh de 60 lá tar éis gearán CPS a fháil. D’fhoilsigh an Bord Eorpach um Chosaint Sonraí teimpléad le haghaidh foirm ghearáin freisin chun gearáin a chur faoi bhráid ÚCSanna 21 chomh maith le ‘Ceisteanna Coitianta do dhaoine aonair ón Eoraip’ 22 agus do ghnólachtaí Eorpacha 23 maidir leis an CPS. Ní raibh aon ghearáin faighte ag an bPainéal tráth an athbhreithnithe.

2.1.3.3.An sásra um eadráin cheangailteach

Roghnaigh an Roinn Tráchtála an tIonad Idirnáisiúnta um Réiteach Díospóidí, arb é rannán idirnáisiúnta Chumann Eadrána Mheiriceá é, chun an mheicníocht eadrána cheangailteach a riar. Tar éis an cinneadh leordhóthanachta a ghlacadh, roghnaigh an Roinn Tráchtála, in éineacht leis an gCoimisiún, 11 eadránaí a bhfuil taithí acu ar phríobháideachas agus a thagann ó chúlraí éagsúla, lena n‑áirítear eadráin, an bhreithiúnacht, an saol acadúil agus an tsochaí shibhialta 24 . Thairis sin, glacadh na rialacha eadrána 25 do Phainéal CPS agus cód iompair d’eadránaithe 26 agus tá siad uile ar fáil ar shuíomh gréasáin an Ionaid Idirnáisiúnta um Réiteach Díospóidí. Ní dhearna aon daoine aonair de chuid an Aontais an sásra eadrána a spreagadh fós, tráth an athbhreithnithe.

2.1.4.Treoraíocht, comhar agus múscailt feasachta

Ó tháinig an Creat Príobháideachais Sonraí i bhfeidhm, rinne an Roinn Tráchtála gníomhaíochtaí múscailte feasachta éagsúla trí sheónna bóthair, seimineáir ghréasáin agus comhdhálacha a eagrú; rinneadh teagmháil le comhlachais trádála agus idirghníomhú díreach le breis is 3000 cuideachta chun faisnéis faoi CPS a sholáthar. D’fhoilsigh sé treoraíocht freisin, lena n‑áirítear i bhfoirm Ceisteanna Coitianta a dhírítear ar dhaoine aonair, agus ar ghnólachtaí san Aontas agus sna Stáit Aontaithe 27 . D’fhorbair an Bord Eorpach um Chosaint Sonraí ar a sheal foirmeacha gearáin agus Ceisteanna Coitianta a dhírítear ar dhaoine aonair agus ar ghnólachtaí. Ar an gcaoi chéanna, d’fhoilsigh an Coimisiún Ceisteanna &Freagraí agus bileog eolais maidir leis an gCreat Príobháideachais Sonra nuair a ghlac sé a chinneadh leordhóthanachta 28 .

An tráth céanna, tháinig sé chun solais freisin ón gcruinniú athbhreithnithe go mbeidh breis oibre ag teastáil chun feasacht a mhúscailt i measc daoine aonair agus chun treoraíocht a chur ar fáil do chuideachtaí. Tugann an t‑ionchur a fuarthas ó chuideachtaí agus ó Shásraí Neamhspleácha maidir le Ceart Cúitimh, agus an líon an-íseal gearán le fios go bhféadfadh sé nach mbeadh daoine aonair ar an eolas i gcónaí faoina gcearta agus/nó faoin sásra chun iad a fheidhmiú. Le linn an chruinnithe athbhreithnithe, chuir an Roinn Tráchtála in iúl gur spéis léi oibriú i gcomhar le ÚCSanna an Aontais chun cur leis an bhfeasacht ar an gCreat i measc dhaoine aonair san Aontas. Molann an Coimisiún tionscnaimh den sórt sin agus tá bearta á ndéanamh aige freisin chun gur fearr a bheidh daoine aonair ar an eolas, lena n‑áirítear trí fhaisnéis bhreise maidir le CPS a sholáthar ar a shuíomh gréasáin, mar shampla trí naisc a ionchorprú mar aon le tagairtí do threoirdhoiciméid ábhartha arna nglacadh ag an mBord Eorpach um Chosaint Sonraí, an Roinn Tráchtála agus údaráis eile de chuid na Stát Aontaithe.

A mhéid a bhaineann le treoraíocht maidir le Prionsabail CPS, d’aontaigh ionadaithe ón mBord Eorpach um Chosaint Sonraí le linn an chruinnithe athbhreithnithe dul i gcomhar le chéile sna míonna le teacht chun soiléirithe breise a sholáthar maidir le coincheap na sonraí acmhainní daonna faoi CPS agus na hoibleagáidí sonracha a bhfuil feidhm acu maidir le sonraí den sórt sin a phróiseáil. Scrúdaíodh gnéithe éagsúla a bhí le cur san áireamh sa treoraíocht sin. Mar shampla, d’fhéadfadh an treoraíocht sin aghaidh a thabhairt ar chásanna praiticiúla áirithe ina mbeadh sonraí fostaithe á bpróiseáil faoi CPS (e.g. ag soláthraí néalseirbhíse) agus a mhíniú i ndáil le cásanna den sórt sin cé na hoibleagáidí CPS a bheadh ábhartha. Thairis sin, d’fhéadfadh sé a mholadh do chuideachtaí a fhaigheann sonraí fostaithe a bhaineann le daoine aonair as an Aontas (cé nár ghá go n‑úsáidfidís na sonraí sin i gcomhthéacs caidreamh fostaíochta) painéal Údarás Cosanta Sonraí a roghnú dá Sásra Neamhspleách maidir le Ceart Cúitimh. D’áiritheofaí leis sin go bhféadfadh na daoine aonair sin dul i muinín údarás a bheadh ‘in aice láimhe’ agus, i gcás inar gá, a bheadh níos eolaí ar na dlíthe náisiúnta is infheidhme a bhfuil feidhm acu maidir le sonraí acmhainní daonna.

Ina theannta sin, tá gné shonrach ann ar cosúil go mbeadh breis treoraíochta úsáideach ina leith (bunaithe ar ionchur a fuarthas ó chomhlachais trádála freisin) a bhaineann le ceanglais CPS maidir le haistrithe ar aghaidh. Thairis sin, thug an Roinn Tráchtála le fios gurbh fhiú féachaint an mbainfeadh roinnt earnálacha tairbhe as treoraíocht bhreise maidir le Prionsabail CPS a chur i bhfeidhm ar a ngníomhaíochtaí, e.g. i réimse an taighde sláinte agus na seirbhísí airgeadais.

Is díol sásaimh don Choimisiún go bhfuil an dá thaobh réidh chun treoraíocht a fhorbairt agus is é a mheas go dtosófar go luath ar an obair ar na hábhair thuasluaite.

Ar bhonn níos ginearálta, cuireadh roinnt sásraí ar bun chun malartuithe agus comhar idir údaráis na Stát Aontaithe agus ÚCSanna a áirithiú, lena n‑áirítear trí phointí teagmhála tiomnaithe a cheapadh laistigh den Choimisiún Trádála Feidearálach agus den Roinn Tráchtála chun déileáil le fiosrúcháin agus tarchuir ó ÚCSanna.

2.1.5.Forbairtí ábhartha i gcóras dlí na Stát Aontaithe

Ó glacadh an cinneadh leordhóthanachta, rinneadh roinnt forbairtí i gcreat dlíthiúil na Stát Aontaithe i réimse na príobháideachta. Áirítear leis sin forbairtí reachtacha, forbairtí rialála agus forbairtí sa chásdlí. Is léiriú iad i gcoitinne ar chóineasú breise idir cur chuige an Aontais agus cur chuige na Stát Aontaithe i leith dúshláin áirithe maidir le príobháideachas, lena n‑áirítear trí choincheapa dlíthiúla comhchosúla a úsáid. Is forbairtí leanúnacha cuid díobh agus beidh faireachán breise le déanamh orthu.

Ar an leibhéal feidearálach, d’eisigh an tUachtarán roinnt Orduithe Feidhmiúcháin atá ábhartha maidir le húsáid sonraí pearsanta. Go háirithe, le hOrdú Feidhmiúcháin (OF) 14117 an 28 Feabhra 2024 29 toirmisctear nó teorannaítear idirbhearta a bhaineann le catagóirí áirithe sonraí pearsanta íogaire (e.g. sonraí sláinte, aitheantóirí bithmhéadracha, sonraí géanómaíocha daonna) le heintitis i roinnt ‘tíortha is ábhar imní’ 30 . Leis an ordú a glacadh, tugtar treoir don Ard-Aighne rialacháin a mholadh – atá fós le heisiúint tráth glactha na tuarascála seo – chun cur chun feidhme na tuarascála seo a shonrú a thuilleadh. Ina theannta sin, le hOrdú Feidhmiúcháin 14110 an 30 Deireadh Fómhair 2023 maidir leis an intleacht shaorga 31 , dírítear ar intleacht shaorga a bheidh sábháilte, slán agus iontaofa a fhorbairt. Ceanglaítear leis ar roinnt gníomhaireachtaí cónaidhme caighdeáin agus treoirlínte sábháilteachta a bhaineann le IS a fhorbairt, lena n‑áirítear maidir le rioscaí sonracha IS don phríobháideachas agus maidir le teicnící caomhnaithe príobháideachais.

Maidir le hobair reachtach, cé gur tugadh isteach billí príobháideachta cónaidhme sa Chomhdháil le blianta beaga anuas, rinne 20 Stát de chuid SAM dlíthe cuimsitheacha príobháideachta a achtú ó mhí Iúil 2024, a bhfuil ocht gcinn díobh tar éis teacht i bhfeidhm, sna stáit a leanas: California, Colorado, Oregon, Virginia, Connecticut, Utah, Texas agus Florida. Thairis sin, ghlac 17 Stát de chuid na Stát Aontaithe reachtaíocht lena dtugtar aghaidh ar an bpróiseáil uathoibrithe (nó, ar a laghad, ar chineálacha áirithe di) agus lena gceadaítear go ginearálta rogha an diúltaithe le haghaidh cineálacha áirithe cinnteoireachta bunaithe ar ‘phróifíliú’ 32 .

Maidir le forbairtí ar an gcásdlí, tharraing roinnt ionadaithe ón tsochaí shibhialta aird ar bhreithiúnas an 28 Meitheamh 2024 ón gCúirt Uachtarach in Loper Bright Enterprises v. Raimondo. Leis an mbreithiúnas sin cuirtear ar neamhní an cásdlí roimhe sin maidir le foirceadal Chevron, trína gcuireann cúirteanna prionsabal na lánurraime do léirmhíniú réasúnach gníomhaireachta rialála ar an dlí i bhfeidhm i gcás débhríochta i ndlí arna fhorfheidhmiú ag an ngníomhaireacht sin. Go háirithe, léirigh roinnt eagraíochtaí neamhrialtasacha imní faoi thionchar an rialaithe sin ón gCúirt Uachtarach ar údarás an Choimisiúin Trádála Fheidearálaigh chun rialacha a cheapadh i réimse an phríobháideachais, cé go n‑aithníonn siad freisin go bhféadfadh sé nach mbeadh aon tionchar, nó nach mbeadh ach tionchar teoranta, ann ar a chumhachtaí forfheidhmiúcháin. Ag an gcruinniú athbhreithnithe, chuir an Coimisiún Trádála Feidearálach in iúl go bhfeicfear impleachtaí beachta an bhreithiúnais sin i bhfad na haimsire. Mhínigh sé freisin maidir leis an gceapadh rialacha a dhéanann an Coimisiún Trádála Feidearálach go ndéantar é faoi údarás sa Federal Trade Commission Act atá difriúil leo siúd le haghaidh gníomhaireachtaí riaracháin eile agus nach raibh foirceadal Chevron chomh hábhartha céanna dóibh. Dá bhrí sin, d’fhéadfadh sé gur tionchar teoranta a bheadh ag an mbreithiúnas a tugadh le déanaí sa réimse sin.

Ina theannta sin, chuir an Coimisiún Trádála Feidearálach eolas ar fáil faoi fhorbairtí le déanaí ina chur chuige maidir le próiseáil uathoibrithe agus intleacht shaorga. Áirítear leis sin ráiteas comhpháirteach a ghlacadh in éineacht le húdaráis forfheidhmiúcháin eile in aghaidh an idirdhealaithe agus na claontachta i gcórais uathoibrithe 33 , chomh maith le roinnt gníomhaíochtaí forfheidhmiúcháin – ina ndíríonn an Coimisiún Trádála Feidearálach ar thrédhearcacht, ar chothroime na próiseála uathoibrithe agus ar chumas daoine aonair agóid a dhéanamh in aghaidh torthaí, agus ar nithe eile. Is é an cás is suntasaí ina leith sin cinneadh mhí an Mhárta 2024 ón gCoimisiún Trádála Feidearálach i gcoinne Rite Aid, lenar forchuireadh toirmeasc 5 bliana ar an gcuideachta sin úsáid a bhaint as teicneolaíocht aghaidh-aitheanta chun críocha slándála 34 . Go háirithe, chinn an Coimisiún Trádála Feidearálach gur theip ar Rite Aid bearta réasúnta a dhéanamh chun torthaí earráideacha a chosc agus tomhaltóirí a chur ar an eolas faoin teicneolaíocht a úsáideadh. Ar bhonn níos ginearálta, ag an gcruinniú athbhreithnithe, thug an Coimisiún Trádála Feidearálach aghaidh ar na tosaíochtaí atá aige faoi láthair agus go háirithe ar na réimsí a gcreideann sé gur cheart cur chuige forfheidhmiúcháin níos réamhghníomhaí a bheith ann ina leith amach anseo. Áirítear leis sin sonraí íogaire a chosaint (e.g. sonraí sláinte, sonraí bithmhéadracha, geoshuíomh) 35 , leanaí 36 agus mionaoisigh a chosaint ar líne, agus slándáil sonraí 37 .

Coinneoidh an Coimisiún súil ghéar i gcónaí ar na forbairtí sin agus ar fhorbairtí eile sna Stáit Aontaithe, go háirithe aon bhearta breise i dtreo dlí cuimsitheach feidearálach maidir le príobháideachas agus an tionchar a d’fhéadfadh a bheith ag cásdlí na Cúirte Uachtaraí le déanaí ar ról an Choimisiúin Trádála Fheidearálaigh i réimse an phríobháideachais.

Is díol sásaimh don Choimisiún an fhaisnéis a chuir an Coimisiún Trádála Feidearálach ar fáil maidir lena ghníomhaíochtaí forfheidhmiúcháin le déanaí agus maidir lena thosaíochtaí faoi láthair a chomhfhreagraíonn den chuid is mó do threochtaí agus tosaíochtaí maidir le cosaint sonraí a fhorfheidhmiú san Eoraip. Tá páirt ghníomhach á glacadh ag an gCoimisiún Trádála Feidearálach freisin sa líonra lena dtugtar le chéile tíortha a thairbhíonn de chinneadh leordhóthanachta de chuid an Aontais, a sheol an Coimisiún i mí an Mhárta 2024 38 . Leis an méadú sin ar an gcóineasú, ba cheart go ndéanfaí comhar níos dlúithe a spreagadh agus a éascú idir lucht forfheidhmithe príobháideachais ar dhá thaobh an Atlantaigh, go háirithe maidir le hábhair a bhaineann le feidhmiú CPS.

2.2.Gnéithe a bhaineann le rochtain agus úsáid sonraí pearsanta a aistríonn údaráis phoiblí na Stát Aontaithe faoi Chreat Príobháideachais Sonraí AE‐SAM

Sa chinneadh leordhóthanachta tá measúnú mionsonraithe ar na rialacha lena rialaítear bailiú agus úsáid sonraí pearsanta a aistríonn údaráis phoiblí na Stát Aontaithe ón Aontas chuig cuideachtaí CPS-dheimhnithe, go háirithe chun críocha fhorfheidhmiú an dlí choiriúil agus na slándála náisiúnta. Ó glacadh an cinneadh leordhóthanachta, mar a dheimhnigh údaráis na Stát Aontaithe le linn an chruinnithe athbhreithnithe, ní dhearnadh aon fhorbairt ábhartha maidir leis an gcreat dlíthiúil a bhfuil feidhm aige maidir le rochtain ar shonraí chun críocha fhorfheidhmiú an dlí nó rialála sa chéad bhliain de CPS. Ar an gcúis sin, ní bhaineann na torthaí thíos ach le forbairtí i réimse na slándála náisiúnta.

Na conclúidí ar thángthas orthu sa chinneadh leordhóthanachta maidir le rochtain gníomhaireachtaí faisnéise ar shonraí, braitheann siad ar an anailís ar na coinníollacha agus ar na teorainneacha a bhfuil feidhm acu maidir le hoibríochtaí faisnéise comharthaí faoi roinnt údarás dlíthiúil ábhartha – go háirithe Roinn 702 den Acht um Fhaireachas Faisnéise Eachtraí (FISA) agus Ordú Feidhmiúcháin 12333 39 – arna chomhlánú agus arna neartú le hOrdú Feidhmiúcháin 14086 maidir le Coimircí a Fheabhsú d’Fhaisnéis Chomharthaíochta na Stát Aontaithe (OF 14086) a ghlac Uachtarán na Stát Aontaithe an 7 Deireadh Fómhair 2022. Tá feidhm ag na coimircí a leagtar amach in OF 14086 maidir le gníomhaíochtaí faisnéise comharthaí uile na Stát Aontaithe, gan beann ar an údarás dlíthiúil ar a mbunaítear na gníomhaíochtaí sin agus ar an áit a dhéantar iad, agus cosnaíonn siad sonraí daoine nach saoránaigh de chuid na Stát Aontaithe iad (lena n‐áirítear Eorpaigh) 40 . Le OF 14086 bunaíodh sásra sásaimh nua freisin trínar féidir le daoine aonair san Aontas na coimircí ceangailteacha sin a agairt agus a fhorfheidhmiú.

Tugtar tuairisc sna chéad ranna eile ar na céimeanna a ghlac údaráis na Stát Aontaithe ó glacadh an cinneadh leordhóthanachta chun OF 14086 a chomhlíonadh, agus ar fhorbairtí ábhartha i ndáil leis an gcreat dlíthiúil thuasluaite.

2.2.1.Forbairtí ábhartha maidir le creat dlíthiúil na Stát Aontaithe

2.2.1.1.Cur chun feidhme Ordú Feidhmiúcháin 14086 ag gníomhaireachtaí faisnéise

Leis na teorainneacha agus na coimircí a tugadh isteach le hOrdú Feidhmiúcháin 14086, déantar forlíonadh ar na teorainneacha agus na coimircí dá bhforáiltear le Roinn 702 den Acht um Fhaireachas Faisnéise Eachtraí agus OF 12333. Tá siad ina gceangal ar na gníomhaireachtaí faisnéise uile agus rinneadh oibríochtú breise orthu trí bheartais agus nósanna imeachta arna nglacadh ag gach gníomhaireacht.

Mar chuid den chéad athbhreithniú, dheimhnigh údaráis na Stát Aontaithe nach ndearnadh aon athruithe ar Ordú Feidhmiúcháin 14086 ó glacadh é. Ina theannta sin, soiléiríodh nár bhain Uachtarán na Stát Aontaithe úsáid as an gcumhacht a bheartaítear i Ranna 2(b)(i)(B) agus 2(b)(ii)(C) d’Ordú Feidhmiúcháin 14086 chun nuashonrú a dhéanamh ar liosta na gcuspóirí dlisteanacha ar féidir faisnéis chomharthaí a shaothrú ina leith nó ar liosta na gcuspóirí ar féidir sonraí a bhailítear i mbulc a úsáid ina leith 41 . Chun tosaíochtaí faisnéise níos sonraí a chinneadh ar féidir faisnéis chomharthaí a bhailiú iarbhír ina leith, chuir OF 14086 nós imeachta sonrach i bhfeidhm. Go háirithe, ní mór dul i gcomhairle le hOifigeach Cosanta Saoirsí Sibhialta Oifig an Stiúrthóra Faisnéise Náisiúnta chun a mheas i gcás gach tosaíochta féachaint (1) an ndéanann sé cuspóir dlisteanach amháin nó níos mó de na cuspóirí a liostaítear san Ordú Feidhmiúcháin a chur chun cinn; (2) an é nár dearadh é chun go mbeadh bailiú faisnéise comharthaí mar thoradh air le haghaidh cuspóir toirmiscthe a liostaítear san Ordú Feidhmiúcháin nó nár measadh go mbeadh bailiú faisnéise comharthaí sin mar thoradh air agus (3) ar bunaíodh é tar éis breithniú iomchuí a dhéanamh ar phríobháideachas agus saoirsí sibhialta gach duine 42 . Dheimhnigh Oifigeach Cosanta Saoirsí Sibhialta OSFN le linn an chruinnithe athbhreithnithe go ndearna sí athbhreithniú ar na tosaíochtaí a mhol an Stiúrthóir um Fhaisnéis Náisiúnta i gCreat Tosaíochtaí Faisnéise Náisiúnta 2023, gur tháinig sí ar an gconclúid gur chomhlíon siad na ceanglais thuas, agus gur chomhroinn sí a conclúid leis an Stiúrthóir um Fhaisnéis Náisiúnta (SFN), a chuir na tosaíochtaí a bhí le bailíochtú faoi bhráid an Uachtaráin. Chuir OCSS OSFN oiliúint ar fáil freisin maidir le ceanglais OF 14086 do chodanna den phobal faisnéise a bhfuil baint acu le tosaíochtaí faisnéise a fhorbairt.

Ina theannta sin, ghlac údaráis na SA céimeanna praiticiúla breise le bliain anuas chun OF 14086 a chur i bhfeidhm ina n‑oibríochtaí ó lá go lá. Go háirithe, rinne gníomhaireachtaí faisnéise beartais agus treoirlínte inmheánacha breise a chur i bhfeidhm maidir le cur i bhfeidhm an Ordaithe Feidhmiúcháin, mar shampla próisis inmheánacha (trí cheanglais údarúcháin inmheánacha, rialuithe rochtana doiciméadaithe ionas nach mbeidh rochtain ar an bhfaisnéis ach ag na daoine aonair sin ar cuireadh oiliúint cheart orthu agus a bhfuil na ceanglais mhisin is gá acu, etc.) chun a áirithiú go gcomhlíonfar a cheanglais riachtanais agus chomhréireachta i gcomhthéacs bailiú spriocdhírithe agus bailiú builc araon 43 . Thairis sin, cuireadh oiliúint maidir le OF 14086 ar fáil d’fhoireann gníomhaireachtaí faisnéise éagsúla (e.g. NSA, CIA, FBI), lena n‑áirítear seisiúin oiliúna bhliantúla agus ad hoc arna n‑eagrú ag OCSS OSFN agus oiliúint éigeantach do gach ball foirne nua a thagann isteach in OSFN.

Is díol sásaimh don Choimisiún na bearta éagsúla a cuireadh i bhfeidhm chun OF 14086 a chur chun feidhme agus chun a chomhlíonadh a áirithiú. De réir mar a fhaightear níos mó taithí ar fheidhmiú praiticiúil choimircí an Ordaithe Feidhmiúcháin, ba mhór ag an gCoimisiún deis a fháil chun samplaí nithiúla a phlé maidir leis an gcaoi a gcuirtear an tOrdú Feidhmiúcháin i bhfeidhm go praiticiúil (agus na breithnithe rúndachta is infheidhme á n‑urramú) in athbhreithnithe amach anseo.

2.2.1.2.Athúdarú Roinn 702 den Acht um Fhaireachas Faisnéise Eachtraí

Ceadaítear le Roinn 702 den Acht um Fhaireachas Faisnéise Eachtraí díriú ar dhaoine nach as na Stáit Aontaithe iad a chreidtear le réasún a bheith lonnaithe lasmuigh de na Stáit Aontaithe chun faisnéis eachtrach a fháil. Déantar an fháil ar bhonn deimhnithe bliantúla arna gcur faoi bhráid na Cúirte um Fhaireachas Faisnéise Eachtraí (FISC) agus arna bhformheas aici. Sainaithnítear leis na deimhnithe sin catagóirí sonracha faisnéise eachtraí atá le bailiú. An 21 Iúil 2023, d’fhógair OSFN go bhfuil trí dheimhniú fhormheasta ann faoi Roinn 702 den Acht um Fhaireachas Faisnéise Eachtraí, lena gcumhdaítear na catagóirí faisnéise eachtraí seo a leanas: (1) rialtais eachtracha agus eintitis ghaolmhara, (2) frithsceimhlitheoireacht, agus (3) iomadú a chomhrac. 44 Ceanglaítear ar na deimhnithe freisin nósanna imeachta spriocdhírithe agus íoslaghdaithe a bhfuil formheas na Cúirte um Fhaireachas Faisnéise Eachtraí acu a áireamh 45 . Go háirithe, déantar an spriocdhíriú trína iarraidh ar chuideachtaí SAM a chomhlíonann sainmhíniú an Achta um Fhaireachas Faisnéise Eachtraí ar ‘sholáthraí seirbhíse cumarsáide leictreonaí’ sonraí cumarsáide leictreonaí a nochtadh i gcás teachtaireachtaí a sheoltar chuig ‘roghnaitheoirí’ nó uathu, lena sainaithnítear cuntas cumarsáide sonrach, e.g. uimhir theileafóin nó seoladh ríomhphoist. D’fhoilsigh rialtas na Stát Aontaithe roinnt ábhar maidir le Roinn 702 den Acht um Fhaireachas Faisnéise Eachtraí chun an pobal a chur ar an eolas faoi fheidhmiú na gclár faireachais, faoi na ceanglais is infheidhme agus na cosaintí príobháideachais mar aon le ról na Cúirte um Fhaireachas Faisnéise Eachtraí 46 .

Mar gheall ar chlásal éagtha, bhí Roinn 702 FISA le dul in éag ag deireadh 2023, in éagmais athúdarú ón gComhdháil. Tar éis athúdarú sealadach gan aon athruithe, rith an Chomhdháil an tAcht um Fhaisnéis a Athchóiriú agus Meiriceá a Áirithiú (RISAA) an 19 Aibreán 2024, lenar ath-údaraíodh Roinn 702 FISA ar feadh tréimhse 2 bhliain agus lenar tugadh isteach roinnt athruithe. Tá dhá chatagóir i gceist go ginearálta: (1) athruithe ar raon feidhme na ngníomhaíochtaí faireachais a cheadaítear faoi Roinn 702 FISA agus (2) athruithe institiúideacha agus nós imeachta.

Athruithe ar raon feidhme na ngníomhaíochtaí faireachais a cheadaítear faoi Roinn 702 FISA

Tugadh isteach le RISAA trí phríomhathrú ar raon feidhme na ngníomhaíochtaí faireachais is féidir a dhéanamh faoi Roinn 702 FISA.

Ar an gcéad dul síos, tá toirmeasc cinntitheach ann ar ‘a bhaineann le’ a bhailiú 47 . Tagraíonn sé sin do theachtaireachtaí a bhailiú i gcás nach bhfuil an roghnóir faoi Roinn 702 (amhail seoladh ríomhphoist) in ‘chuig’ nó ‘ó’ na teachtaireachta, ach go bhfuil tagairt don roghnóir sin sa teachtaireacht (e.g., teachtaireachtaí ríomhphoist nach seoltar chuig an seoladh ríomhphoist roghnaithe nó uaidh, ach a thugann an seoladh ríomhphoist roghnaithe i dtéacs nó i gcorp an ríomhphoist). Cé gur eisiadh a leithéid sin a bhailiú cheana féin tar éis leasú a dhéanamh ar FISA in 2018, d’fhoráil FISA fós don fhéidearthacht go n‑atosófaí ar ‘a bhaineann le’ a bhailiú amach anseo, tar éis nós imeachta sonrach um údarú a raibh baint ag FISC agus ag an gComhdháil leis. Leis an leasú is déanaí a tugadh isteach le RISAA, cuireadh deireadh leis an bhféidearthacht sin.

Ar an dara dul síos, leathnaíodh an sainmhíniú ar fhaisnéis eachtrach chun faisnéis a bhaineann le frith-thámhshuanaigh a chur san áireamh. 48 Le linn an chruinnithe athbhreithnithe, mhínigh údaráis na Stát Aontaithe gur tugadh isteach é i bhfianaise na géarchéime feantainile atá ann faoi láthair agus bagairt slándála náisiúnta ó gháinneálaithe agus monaróirí idirnáisiúnta na dtámhshuanach, bagairt atá ag dul i méid. I bhfianaise an mhéid sin, deimhníodh go dtagann an coincheap sin faoi roinnt de na cuspóirí dlisteanacha a liostaítear in OF 14086, i.e. tuiscint ar chumais, rúin, nó gníomhaíochtaí eagraíochtaí eachtracha atá ina mbagairt reatha nó a d’fhéadfadh a bheith ina mbagairt ar shlándáil náisiúnta na Stát Aontaithe nó a gcomhghuaillithe, nó measúnú a dhéanamh ar an méid sin; tuiscint ar bhagairtí trasnáisiúnta a mbíonn tionchar acu ar an tslándáil dhomhanda, lena n‑áirítear rioscaí don tsláinte phoiblí, nó iad a mheasúnú; agus cosaint i gcoinne bagairtí coiriúla trasnáisiúnta 49 .

Ar an tríú dul síos, leathnaigh RISAA an sainmhíniú ar ‘soláthraí seirbhíse cumarsáide leictreonaí’ (ECSP), agus ar an gcaoi sin leathnaíodh raon feidhme na gcuideachtaí a bhféadfaí iallach a chur orthu faisnéis a sholáthar de bhun Roinn 702 FISA 50 . Áirítear sa sainmhíniú anois soláthraithe seirbhíse eile a bhfuil ‘rochtain acu ar threalamh a úsáidtear nó a d’fhéadfaí a úsáid chun cumarsáid sreinge nó leictreonach a tharchur nó a stóráil’, agus eisiatar go sainráite freisin saoráidí cóiríochta poiblí, teaghaisí, saoráidí pobail agus bunaíochtaí seirbhíse bia. I litir chuig an gComhdháil, luaigh an Roinn Dlí agus Cirt gur athrú teicniúil a bhí sa leasú sin a beartaíodh chun líon ‘fíorbheag’ cuideachtaí teicneolaíochta a chumhdach nár gabhadh, de réir chinntí FISC agus cinntí ón gCúirt Athbhreithnithe um Fhaireachas Faisnéise Eachtraí (FISCR) le déanaí, leis an sainmhíniú ar ECSP a bhí ann roimhe sin 51 . Sa litir sin, gheall an Roinn Dlí agus Cirt an raon feidhme a chúngú tríd an sainmhíniú sin a chur i bhfeidhm go heisiach chun an cineál soláthraí seirbhíse atá i gceist sa dlíthíocht as ar eascair cinneadh FISC a chumhdach. Mar thoradh air sin, ainmnítear na cuideachtaí lena mbaineann in iarscríbhinn rúnaicmithe don Chomhdháil. Bhí roinnt eagraíochtaí neamhrialtasacha, lena n‑áirítear iad siúd a thug aiseolas mar chuid den athbhreithniú, a chuir imní in iúl faoin leathnú sin, agus d’áitigh siad go bhféadfaí go leor gnólachtaí Meiriceánacha a chumhdach leis (ós rud é go soláthraíonn go leor díobh seirbhís de chineál éigin do threalamh cumarsáide agus go bhfuil rochtain acu air). I bhfianaise na n‑ábhar imní sin, moladh leasú breise le tacaíocht ón gComhphobal Faisnéise i ndréacht-Acht um Údarú Faisnéise don Bhliain Fhioscach 2025, atá os comhair na Comhdhála faoi láthair. Leis an athrú sin, dá rithfeadh an Chomhdháil é, d’áiritheofaí go mbeadh na cuideachtaí breise arna ngabháil leis an sainmhíniú ar ECSP teoranta do na cuideachtaí sin amháin a luaitear sna rialuithe FISC thuasluaite. Beartaítear leis an mbille freisin go gcaithfí gach treoir a dhírítear ar chuideachta den sórt sin a thuairisciú do FISC, ionas go mbeadh FISC in ann a athbhreithniú an dtiocfadh an chuideachta go deimhin faoin raon feidhme. Ina litir chuig an gComhdháil, gheall an Roinn Dlí agus Cirt tuairisc a thabhairt don Chomhdháil gach sé mhí maidir le haon chur i bhfeidhm a dhéanfaí ar an sainmhíniú nuashonraithe chun deis a thabhairt don Chomhdháil an mhaoirseacht chuí a fheidhmiú a mhéid a bhainfeadh le cur i bhfeidhm cúng an tsainmhínithe.

Rud atá tábhachtach, dheimhnigh údaráis na Stát Aontaithe agus PCLOB ag an gcruinniú athbhreithnithe go leanann coimircí uile OF 14086 d’fheidhm iomlán a bheith acu maidir le gach bailiú agus úsáid sonraí faoi Roinn 702 FISA, lena n‐áirítear tar éis na leasuithe sin. Dá bhrí sin, cé go leathnaíonn RISAA raon feidhme na gcuideachtaí a d’fhéadfadh ordú a fháil beagán, ní chuireann sé teorainn le feidhmiú na gceart. Mar sin féin, beidh sé tábhachtach faireachán a dhéanamh ar fhorbairtí (reachtacha agus tuairiscithe) thairis sin agus faisnéis a fháil maidir le cur i bhfeidhm praiticiúil na rialacha nua sin. Áirítear leis sin, mar shampla, mar a rachaidh leathnú na sainmhínithe ar fhaisnéis eachtrach agus soláthraithe seirbhíse cumarsáide leictreonaí i bhfeidhm ar líon spriocanna Roinn 702 FISA (arna gcur in iúl go bliantúil ag OSFN, féach thíos maidir le trédhearcacht). Ba cheart go leor faisnéise ina leith sin a bheith sa tuarascáil amach anseo a leanfaidh tuarascáil PCLOB maidir le Roinn 702 FISA (féach thíos), a foilsíodh le déanaí.

Athruithe institiúideacha agus athruithe nós imeachta

Ó thaobh athruithe institiúideacha agus athruithe nós imeachta de, rinne RISAA códú ar roinnt nósanna imeachta a bhí á leanúint go praiticiúil cheana féin agus thug sé coimircí nua isteach. Cé nach mbaineann cuid díobh sin ach le daoine ó na Stáit Aontaithe, tá roinnt athruithe ann a chuireann leis na cosaintí do dhaoine ó na Stáit Aontaithe agus do dhaoine nach ó na Stáit Aontaithe iad araon a bhféadfar a gcuid sonraí a bhailiú faoi Roinn 702 FISA 52 agus atá ábhartha dá bhrí sin d’fheidhmiú an Chreata Príobháideachais Sonraí.

Ar an gcéad dul síos, cuireadh roinnt ceanglais bhreise i bhfeidhm maidir le cuntasacht, maoirseacht agus tuairisciú. Go háirithe, ní mór oiliúint bhliantúil a chur ar phearsanra FBI anois maidir leis na rialacha is infheidhme maidir le faisnéis a fhaightear faoi Roinn 702 FISA a chuardach 53 . Ceanglaítear ar FBI freisin tuairisciú don Chomhdháil maidir lena ghníomhaíochtaí cuardaigh (e.g. líon na gcuardach a bhaineann úsáid as ‘teicneolaíochtaí jabanna baisce’, i.e. téarmaí cuardaigh iomadúla a rith mar chuid d’aon chuardach amháin) agus maidir le bearta cuntasachta a cuireadh i bhfeidhm chun comhlíonadh na gceanglas um chuardach dlíthiúil a áirithiú (Ranna 11-12 RISAA). Thairis sin, tugtar treoir d’Ardchigire na Roinne Dlí agus Cirt tuarascáil a chur ar fáil maidir le comhlíontacht FBI le ceanglais chuardaigh (Roinn 9 RISAA). Ar bhonn níos ginearálta, chun cur le trédhearcacht na nósanna imeachta os comhair FISC, Oifig an Stiúrthóra Faisnéise Náisiúnta agus an Ard-Aighne, ceanglaítear orthu anois athbhreithniú dí-aicmiúcháin ar chinntí FISC a chur i gcrích laistigh de 180 lá (Roinn 7 RISAA). Ina theannta sin, ní mór tras-scríbhinní na n‑éisteachtaí uile os comhair FISC agus na Cúirte Athbhreithnithe um Fhaisnéis Eachtrach (FISCR, áit ar féidir achomharc a dhéanamh i gcoinne cinntí FISC) a choinneáil agus a tharchur chuig an gComhdháil (Roinn 8 RISAA).

Ar an dara dul síos, thug RISAA teorainneacha breise isteach maidir le sonraí arna mbailiú faoi Roinn 702 FISA a bheith in úsáid ag FBI. Foráiltear le Roinn 2(d) RISAA nach féidir cuardach le ‘teicneolaíocht baisce’ a dhéanamh ach amháin tar éis formheas a fháil ó aturnae laistigh de FBI, mura bhfuil imthosca eisceachtúla ann. Ina theannta sin, tá toirmeasc ar an FBI anois seiceáil uathoibríoch a dhéanamh ar fhaisnéis neamh-íoslaghdaithe a fuarthas faoi Roinn 702 FISA agus ina ionad sin ní mór dó a áirithiú gur gá d’anailísithe roghnú go dearfach chun cuardach a dhéanamh san fhaisnéis. Chuir RISAA toirmeasc freisin ar an FBI cuardaigh a dhéanamh a ceapadh d’aon ghnó chun fianaise ar ghníomhaíocht choiriúil a aimsiú agus a asbhaint (gan tuairim réasúnta go bhféadfaidís cabhrú chun bagairt ar bheatha nó ar dhíobháil thromchúiseach choirp a mhaolú nó deireadh a chur léi, nó i gcás inar gá chun oibleagáidí nochta sa dlíthíocht a chomhlíonadh) 54 . Thairis sin, tá toirmeasc ar an FBI sonraí neamh-íoslaghdaithe a ionghabháil i stórais anailíseacha mura rud é go bhfuil an duine a bhfuiltear ag díriú air ábhartha d’imscrúdú slándála náisiúnta atá ar siúl cheana 55 .

Ar an tríú dul síos, athraíodh forálacha áirithe a bhaineann le stádas agus ról amici curiae roimh FISC 56 . Ainmnítear na amici mar shaineolaithe chun cúnamh a thabhairt don Chúirt (agus do FISCR) maidir le hábhair a bhaineann le príobháideachas agus saoirsí sibhialta nó chun cuidiú le saincheisteanna teicneolaíochta a shoiléiriú agus iad ag déileáil le hiarratas ar leith ón rialtas. Cé gur cheangail FISA roimhe seo go mbeadh saineolas maidir le príobháideachas agus saoirsí sibhialta, bailiú faisnéise, teicneolaíocht chumarsáide nó réimsí ábhartha eile ag amici, ceanglaíonn sé anois, i bprionsabal, go mbeidh saineolas maidir le príobháideachas/saoirsí sibhialta agus bailiú faisnéise acu. Bhí deis ag an gCúirt cheana féin amicus a cheapadh in aon chás inar mheas sí é a bheith iomchuí, agus bhí sé de cheangal uirthi é a dhéanamh agus í ag déileáil le léirmhíniú nua nó suntasach ar an dlí. Tar éis an athúdaraithe, ceanglaítear ar FISC anois freisin amicus a cheapadh gach uair a iarrtar air deimhnithe Roinn 702 FISA agus nósanna imeachta a ghabhann leo (e.g. nósanna imeachta um spriocdhíriú) a fhormheas, ach amháin má chinneann sé nach mbeadh sé sin iomchuí nó gur dócha go mbeadh moill mhíchuí mar thoradh air 57 . Ina theannta sin, in ionad gan ach amicus amháin a cheapadh, féadfaidh an Chúirt cinneadh a dhéanamh anois amicus amháin nó níos mó a cheapadh. Soiléirítear freisin nach mór an fhaisnéis atá le soláthar ag amici a bheith ‘teoranta d’aghaidh a thabhairt ar na saincheisteanna sonracha arna sainaithint ag an gcúirt’, cé gur féidir le amici barúil a thabhairt i leith réimsí leathana i gcónaí (i.e. argóintí dlíthiúla agus faisnéis a bhaineann le príobháideachas agus saoirsí sibhialta daoine aonair de chuid na Stát Aontaithe a chosaint, bailiú faisnéise agus teicneolaíocht na cumarsáide nó aon réimse ábhartha eile).

Ar deireadh, bunaítear le Roinn 18 RISAA ‘Coimisiún um Athchóiriú FISA’ – ina bhfuil, i measc comhaltaí eile, Comhaltaí ón gComhdháil, Cathaoirleach PCLOB, Príomh-Leas-Stiúrthóir na Faisnéise Náisiúnta, agus an Leas-Ard-Aighne, agus comhaltaí breise atá le ceapadh ag an gComhdháil 58 – chun athchóirithe breise ar FISA a mholadh.

Déanfaidh an Coimisiún dlúthfhaireachán ar fhorbairtí breise i ndáil le Roinn 702 FISA, lena n‑áirítear i gcomhthéacs ghníomhaíochtaí formhaoirseachta PCLOB (féach thíos), obair an Choimisiúin um Athchóiriú agus an t‑athbhreithniú a dhéanfar ar FISA faoi cheann 2 bhliain.

2.2.1.3.Gníomhaíochtaí faireachais sa chleachtas: figiúirí agus treochtaí

Léirítear i dTuarascáil Trédhearcachta Staidrimh Bhliantúil OSFN maidir leis an Úsáid a dhéanann an Comhphobal Faisnéise d’Údaráis Faireachais Slándála Náisiúnta don Bhliain Féilire 2023 (a foilsíodh i mí Aibreáin 2024) 59 gur tháinig méadú ar líon na spriocanna faoi Roinn 702 FISA ó 245 073 sa bhliain féilire 2022 go 268 590 sa bhliain féilire 2023. Mínítear sa tuarascáil go bhféadfadh luaineachtaí i líon na spriocanna a bheith nasctha le cúiseanna éagsúla, lena n‑áirítear athruithe ar thosaíochtaí oibríochtúla, imeachtaí domhanda, cumais theicniúla, iompraíocht sprice, agus athruithe san earnáil teileachumarsáide. Léirítear sa tuarascáil freisin nár díríodh ar aon daoine nach daoine de chuid na Stát Aontaithe iad (i gcomparáid le 1 in 2021 agus 0 in 2022) faoi Roinn 402 FISA (rolla diallaithe agus gairis ceaptha agus rianaithe), ach gur eisíodh sé ordú (i gcomparáid le 11 ordú in 2021 agus 2022) le haghaidh sé sprioc (i gcomparáid le 13 in 2021 agus 11 in 2022) faoi Roinn 501 FISA (rochtain ar thaifid ghnó iompróirí coiteanna, saoráidí cíosa feithiclí nó saoráidí stórála fisiceacha), lenar cumhdaíodh 5412 aitheantóir uathúla (i gcomparáid le 23,157 in 2021 agus 55,431 in 2022) a úsáideadh chun faisnéis a bailíodh de bhun na n‑orduithe sin a chur in iúl.

Léirítear sa tuarascáil bhliantúil ón Roinn Dlí agus Cirt ar an Acht um Fhaireachas Faisnéise Eachtraí chuig an gComhdháil gur comhdaíodh 327 n‑iarratas le FISC le linn na bliana féilire 2023 chun faireachas leictreonach agus/nó cuardaigh fhisiceacha a dhéanamh chun críoch faisnéise eachtraí faoi Roinn 105 agus Roinn 302 FISA faoi seach. 60 Bhí líon iomlán na ndaoine a rabhthas ag díriú orthu idir 500 agus 999. A mhéid a bhaineann le litreacha slándála náisiúnta, foráiltear sa tuarascáil gur eisíodh 10 115 iarraidh (gan iarrataí ar fhaisnéis rannpháirtí amháin a áireamh) ar fhaisnéis maidir le daoine nach daoine de chuid na Stát Aontaithe iad, agus faisnéis á lorg a bhain le 3033 dhuine éagsúla nár dhaoine de chuid na Stát Aontaithe iad 61 .

Baineann roinnt cuideachtaí CPS-dheimhnithe (e.g. Google, Meta) úsáid as an bhféidearthacht a sholáthraítear faoi dhlí na Stát Aontaithe chun tuarascálacha trédhearcachta a fhoilsiú ina dtugtar eolas faoi líon na n‑iarrataí a fuair siad faoi FISA agus litreacha slándála náisiúnta le linn tréimhse tuairiscithe ar leith. Tráth dréachtaithe na tuarascála seo, ní raibh na staitisticí maidir le hiarrataí FISA tar éis mhí Iúil 2023 ar fáil go fóill. Thuairiscigh Google, mar shampla, go bhfuair sé idir 500 agus 999 n‑iarraidh ar Dhlí na Slándála Náisiúnta, a raibh tionchar acu ar chuntais 2000 go 2499, idir mí Iúil agus mí na Nollag 2023. 62 Thuairiscigh Meta go bhfuair sé idir 0 agus 499 iarraidh litreacha slándála náisiúnta, a rinne difear do 500 go 999 gcuntas, sa tréimhse tuairiscithe chéanna. 63 Tá an líon sin seasmhach go leor le blianta beaga anuas. Chun trédhearcacht a mhéadú thairis sin, foilsíonn roinnt cuideachtaí (e.g. Google) go réamhghníomhach na litreacha slándála náisiúnta a fuair siad a luaithe a chuirtear deireadh le srianta neamhnochta 64 .

2.2.1.4.Forbairtí eile

I gcomhthéacs ullmhú an athbhreithnithe, tharraing roinnt eagraíochtaí neamhrialtasacha ceisteanna anuas maidir le bealaí nua atá ag gníomhaireachtaí faisnéise de chuid na Stát Aontaithe chun sonraí a fháil trí shonraí a cheannach ó eintitis tráchtála, go háirithe bróicéirí sonraí. Mhínigh siad cé nach mór sonraí a bhailítear ar an mbonn sin a phróiseáil fós i gcomhréir le ceanglais eile, lena n‑áirítear faoi OF 12333 65 , mar shampla, go dtarlaíonn an fháil sin lasmuigh de chreat FISA agus OF 14086.

I ndáil leis sin, ba cheart a mheabhrú go bhfuil aon chineál comhroinnte deonaí sonraí le tríú páirtithe faoi réir roinnt coinníollacha mionsonraithe faoi CPS. Ar an gcéad dul síos, ní féidir le heagraíocht dheimhnithe sonraí a roinnt le tríú páirtí (nach bhfuil ag gníomhú mar ghníomhaire/phróiseálaí) gan fógra agus rogha a thabhairt do na daoine aonair lena mbaineann 66 . Ar an dara dul síos, i gcomhréir leis an bPrionsabal maidir le Cuntasacht i leith Aistrithe ar Aghaidh, ní fhéadfar aistrithe ar aghaidh a dhéanamh ach amháin (1) chun críoch teoranta agus sonraithe, (2) ar bhonn conradh idir eagraíocht CPS AE‐SAM agus an tríú páirtí agus (3) má cheanglaítear leis an gconradh sin ar an tríú páirtí an leibhéal céanna cosanta a sholáthar leis an leibhéal a ráthaítear faoi na Prionsabail 67 .

Ina theannta sin, mar a pléadh freisin le linn an chruinnithe athbhreithnithe, tá gníomhaíochtaí forfheidhmiúcháin déanta ag an gCoimisiún Trádála Feidearálach i gcoinne bróicéirí sonraí a dhíolann sonraí íogaire tomhaltóirí. Mar shampla, i gcás in aghaidh X-Mode agus a chomharba Outlogic, ghlac an Coimisiún Trádála Feidearálach ordú an 9 Eanáir 2024 lena dtoirmisctear ar an gcuideachta sonraí geoshuímh a dhíol le tríú páirtithe agus sonraí a d’úsáid sí agus a chomhroinn sí go neamhdhleathach a scriosadh. Fuarthas amach in imscrúdú an Choimisiúin Trádála Fheidearálaigh, i measc nithe eile, nár chuir an chuideachta daoine aonair ar an eolas go hiomlán maidir le húsáid agus díol a sonraí geoshuímh, nár chuir sí bearta i bhfeidhm chun deis a thabhairt do dhaoine aonair diúltú do rianú, gur cheadaigh sí úsáid na sonraí chun críoch a d’fhéadfadh a bheith idirdhealaitheach agus nár chuir sí teorainneacha le húsáid faisnéise den sórt sin ag tríú páirtithe 68 . Measann an Coimisiún go nglacfaidh an Coimisiún Trádála Feidearálach an cur chuige céanna dá gcomhroinnfeadh cuideachtaí CPS-dheimhnithe sonraí de shárú ar na forálacha thuasluaite.

Ar deireadh, is fiú a lua gur eisigh OSFN Creat Beartais an Chomhphobail Faisnéise maidir le Faisnéis atá ar Fáil ar bhonn Tráchtála 69 i mí na Bealtaine 2024. Leagtar síos leis an gCreat sin roinnt prionsabal agus ceanglas ba cheart do ghníomhaireachtaí faisnéise a leanúint, lena n‑áirítear rioscaí príobháideachais agus rioscaí saoirsí sibhialta a íoslaghdú, le linn dóibh faisnéis a fháil agus a úsáid i gcomhthéacs idirbhirt tráchtála.

2.2.2.Formhaoirseacht neamhspleách

Tá gníomhaíochtaí ghníomhaireachtaí faisnéise na Stát Aontaithe faoi réir maoirseacht ag comhlachtaí éagsúla, lena n‐áirítear Oifigigh Phríobháideachais agus Saoirsí Sibhialta, Ard‐Chigirí, an Chomhdháil agus Bord Maoirseachta um Príobháideachas agus Saoirsí Sibhialta. Go háirithe, le OF 14086 ceanglaítear ar gach gníomhaireacht faisnéise oifigigh dlí, formhaoirseachta agus chomhlíontachta ar leibhéal sinsearach a bheith acu chun a áirithiú go gcomhlíontar dlí na Stát Aontaithe is infheidhme. Is oifigigh a bhfuil ról comhlíontachta ainmnithe acu, chomh maith le hOifigigh um Príobháideachas agus Saoirsí Sibhialta agus Ardchigirí a dhéanann an fheidhm formhaoirseachta sin 70 . Ní mór dóibh maoirseacht thréimhsiúil a dhéanamh ar ghníomhaíochtaí faisnéise comharthaí agus a áirithiú go leigheasfar aon neamhchomhlíonadh. Ní mór do ghníomhaireachtaí faisnéise rochtain a sholáthar do na hoifigigh sin ar an bhfaisnéis ábhartha uile is gá chun a bhfeidhmeanna formhaoirseachta a dhéanamh agus ní fhéadfaidh siad aon ghníomhaíocht a dhéanamh a chuirfeadh isteach ar a ngníomhaíochtaí formhaoirseachta nó a d’imreodh tionchar míchuí orthu.

Ghlac Comhairleoir Ginearálta Oifig Ardchigire an Chomhphobail Faisnéise (ICIG) in OSFN – a bhfuil dlínse chuimsitheach aige ar an gComhphobal Faisnéise ar fad agus a údaraítear chun gearáin nó faisnéis maidir le líomhaintí faoi iompar neamhdhleathach nó faoi mhí-úsáid údaráis a imscrúdú – páirt sa chruinniú athbhreithnithe. Dheimhnigh sé go seiceálann ICIG comhlíonadh OF 14086 go córasach mar chuid dá ghníomhaíochtaí maoirseachta. Thagair sé freisin do ghníomhaíochtaí formhaoirseachta a rinne Ardchigirí eile an chomhphobail faisnéise le déanaí, mar a shonraítear i dtuarascálacha rialta. Mar shampla, ina thuarascáil leathbhliantúil chuig an gComhdháil d’Aibreán-Meán Fómhair 2023 71 , thug Ardchigire an NSA eolas faoi mheastóireacht ar chreat rialaithe inmheánach de chuid NSA chun spriocdhíriú ar chinntí agus iarrataí. Tháinig sí ar an gconclúid go raibh an creat sin ag feidhmiú i gceart chun a áirithiú go gcomhlíontar na dlíthe, na treoracha agus na beartais lena gcosnaítear saoirsí sibhialta agus príobháideachas. Luaitear sa tuarascáil chéanna freisin imscrúdú a léirigh uirlis faisnéise comharthaí a bheith á mí-úsáid ag fostaí NSA chun críocha neamhúdaraithe.

Faoi OF 14086, cuirtear feidhmeanna maoirseachta sonracha 72 de chúram ar PCLOB 73 . Ghlac Cathaoirleach PCLOB agus a thriúr comhaltaí páirt sa chruinniú athbhreithnithe, agus chuir siad in iúl gur chuir PCLOB comhairle ar fáil do ghníomhaireachtaí faisnéise maidir lena ndréachtbheartais agus a ndréachtnósanna imeachta lena gcuirtear OF 14086 chun feidhme i mí Aibreáin 2023, agus go ndeachthas i gcomhairle leis maidir le breithiúna agus abhcóidí speisialta na Cúirte Athbhreithnithe um Chosaint Sonraí (DPRC) a ainmniú. Sheol an Bord tionscadal formhaoirseachta freisin chun (1) athbhreithniú a dhéanamh ar chur chun feidhme na mbeartas agus na nósanna imeachta nuashonraithe arna nglacadh ag na gníomhaireachtaí faisnéise chun a áirithiú go bhfuil siad comhsheasmhach leis an Ordú Feidhmiúcháin, agus (2) athbhreithniú bliantúil a dhéanamh ar fheidhmiú an tsásra sásaimh nua (féach thíos) 74 . Dheimhnigh Comhaltaí PCLOB go bhfuil sé beartaithe ag an mBord an dá athbhreithniú a dhéanamh go luath amach anseo. Maidir leis an sásamh, mhínigh siad, in éagmais gearán, go ndíreoidh athbhreithniú PCLOB ar na beartais agus na nósanna imeachta a cuireadh i bhfeidhm chun an sásra a chur ar bun.

I dtéarmaí gníomhaíochtaí formhaoirseachta eile, d’eisigh PCLOB tuarascáil ar Roinn 702 FISA, an 28 Meán Fómhair 2023 75 . Is obair leantach í an tuarascáil sin ar thuarascáil níos luaithe ó 2014 agus tá faisnéis fhíorasach agus dhlíthiúil nuashonraithe inti maidir le hoibriú chláir faireachais Roinn 702 FISA. Tá moltaí sa tuarascáil freisin maidir le comhlíontacht gníomhaireachtaí faisnéise leis na ceanglais is infheidhme agus moltaí don Chomhdháil chun roinnt gnéithe de Roinn 702 FISA a neartú a thuilleadh i gcomhthéacs a athúdaraithe (lena n‐áirítear trí na cuspóirí dlisteanacha le haghaidh gníomhaíochtaí faireachais a liostaítear in OF 14086 a chódú) 76 . Le linn an chruinnithe athbhreithnithe, chuir PCLOB in iúl go bhfuil sé ag súil le freagraí a fháil go luath ó ghníomhaireachtaí faisnéise maidir le cur chun feidhme a mholtaí, rud a chuirfidh le tuarascáil leantach amach anseo. I measc na dtionscadal maoirseachta eile atá ar siúl faoi láthair tá tionscadal maidir le cur i gcoinne na sceimhlitheoireachta intíre agus a tionchar ar phríobháideachas agus ar shaoirsí sibhialta agus sonraí foinse oscailte nó sonraí atá ar fáil ar bhonn tráchtála a bheith á mbailiú ag an FBI 77 .

Ar deireadh, chuir ENRanna a ndeachthas i gcomhairle leo i gcomhthéacs an athbhreithnithe in iúl gur ábhar imní é go rachaidh téarma roinnt Comhaltaí PCLOB in éag go luath, rud a d’fhéadfadh PCLOB a fhágáil gan chóram. Go háirithe, tá téarma an Chathaoirligh imithe in éag agus tiocfaidh deireadh leis an tréimhse ar féidir léi fónamh i gcáil coinneála i mí Eanáir 2025, agus tá suíochán eile folamh, agus beidh an tríú suíochán folamh i mí Eanáir na bliana seo chugainn freisin. Le linn an chruinnithe athbhreithnithe, mhínigh na Comhaltaí nach bhfuil siad den tuairim go bhfágfar PCLOB gan chóram, ós rud é gur eisíodh ainmniúchán cheana féin don suíochán atá folamh faoi láthair (agus go bhfuiltear ag fanacht le deimhniú ón Seanad). 78 Chuir siad i dtreis freisin, fiú dá gcaillfeadh an Bord a chóram, nach ndéanfadh sé sin difear dá chumas leanúint de thionscadail mhaoirseachta a chur i gcrích. Mar sin féin, i bhfianaise ról tábhachtach PCLOB maidir le hathbhreithniú a dhéanamh ar chur chun feidhme OF 14086, déanfaidh an Coimisiún dlúthfhaireachán ar stádas na bhfolúntas amach anseo agus ar ainmniúcháin/cheapacháin amach anseo.

2.2.3.Sásamh

Le OF 14086, arna chomhlánú le Rialachán ón Ard‐Aighne, bunaíodh sásra sásaimh nua chun gearáin cháilitheacha ó dhaoine aonair maidir le gníomhaíochtaí faisnéise comharthaí na Stát Aontaithe a láimhseáil agus a réiteach 79 . Tá duine aonair ar bith san Aontas i dteideal gearán a chur faoi bhráid an tsásra sásaimh maidir le sárú líomhnaithe ar dhlí na Stát Aontaithe lena rialaítear gníomhaíochtaí faisnéise comharthaí (e.g. OF 14086, Roinn 702 FISA, OF 12333) i ndáil le sonraí pearsanta a aistrítear chuig na Stáit Aontaithe a dhéanann dochar dá leasanna príobháideachais agus dá leasanna saoirsí sibhialta. Is féidir le daoine aonair gearán a dhéanamh le hÚdarás Cosanta Sonraí i mBallstát den Aontas, a dhíríonn an gearán, trí rúnaíocht an Bhoird Eorpaigh um Chosaint Sonraí, chuig an sásra sásaimh. Tá dhá shraith sa sásra, is é OCSS OSFN a dhéanann imscrúdú tosaigh ar ghearáin agus féidearthacht ann do dhaoine aonair achomharc a dhéanamh in aghaidh chinneadh OCSS os comhair DPRC neamhspleách. Nuair a chuireann OCSS OSFN nó DPRC an t‑athbhreithniú i gcrích, cuirtear daoine aonair ar an eolas, tríd an údarás náisiúnta, ‘nár sainaithníodh aon sáruithe cumhdaithe san athbhreithniú nó gur eisigh OCSS OSFN /DPRC cinneadh lena gceanglaítear feabhsúchán iomchuí’. Bíonn cinntí OCSS OSFN agus DPRC ceangailteach ar ghníomhaireachtaí faisnéise.

Ó glacadh an cinneadh leordhóthanachta, rinneadh bearta breise chun an sásra sásaimh a dhéanamh lánoibríochtúil.

A mhéid a bhaineann le bunú DPRC, ar an 14 Samhain 2023 ceapadh ochtar breithiúna chun na cúirte (i.e. dhá bhreitheamh sa bhreis ar an líon íosta a cheanglaítear faoi OF 14086, arna chomhlánú le rialacháin an Ard-Aighne ag 28 C.F.R. § 201.3(a)) 80 . Ceapadh iad ar bhonn na gcritéar a leagtar amach in OF 14086 agus i gcomhréir leis an bpróiseas a bhunaítear ansin, lena n‑áirítear tar éis dul i gcomhairle le PCLOB inter alia 81 . Áirítear orthu sin iarbhreithiúna de chuid na Cúirte Dúiche feidearálaí agus na Cúirte Achomhairc, iar‐Ard‐Aighne de chuid na Stát Aontaithe agus iarchomhalta de PCLOB. De réir mar a éilítear san OF, tá taithí bhreithiúnach roimhe seo ag leath na mbreithiúna ar a laghad. Ina theannta sin, i mí Aibreáin 2024, ceapadh beirt abhcóidí speisialta – cleachtóirí dlí a bhfuil saineolas acu ar phríobháideachas agus ar shlándáil náisiúnta araon – chun ionadaíocht a dhéanamh ar leasanna daoine aonair os comhair DPRC. Deimhníodh ag an gcruinniú athbhreithnithe go bhfuair na breithiúna agus na habhcóidí speisialta uile an t‑imréiteach slándála is airde agus, dá bhrí sin, gur féidir leo rochtain a fháil ar ábhair rúnaicmithe le linn dóibh a gcúraimí a chomhlíonadh do DPRC. D’fhoilsigh DPRC sraith Ceisteanna Coitianta freisin, inar tugadh tuilleadh faisnéise faoina ról, faoina neamhspleáchas agus faoina fheidhmiú 82 .

Maidir le gearáin a láimhseáil, ghlac OSFN ar an 6 Nollaig 2022 Treoir 126 ón gComhphobal Faisnéise lena rialaítear go mionsonraithe (trí spriocdhátaí a leagan síos, stór leictreonach slán agus bealaí cumarsáide a bhunú, lena gceanglaítear ar OCSS agus ar eilimintí de chuid an Chomhphobail Faisnéise comhoibriú le PCLOB i gcomhthéacs an athbhreithnithe bhliantúil ar an sásra sásaimh, etc.) gnéithe éagsúla den phróiseas chun gearáin a imscrúdú agus a bhreithniú 83 . Tá an Treoir sin infheidhme ar fud Chomhphobal Faisnéise na Stát Aontaithe agus comhlánaíodh í le nósanna imeachta inmheánacha breise arna nglacadh ag gníomhaireachtaí faisnéise aonair maidir lena gcomhar le OCSS OSFN i gcomhthéacs gearán a láimhseáil (e.g. stór slán a fhorbairt chun gearáin agus doiciméid fhreagrúla a chomhroinnt; agus cumarsáid shlán idir na gníomhaireachtaí ábhartha). Eiseoidh DPRC rialacha níos mionsonraithe sna míonna amach romhainn freisin maidir le gearáin a láimhseáil agus maidir le gnéithe nós imeachta eile.

Glacadh roinnt beart breise san Aontas Eorpach agus sna Stáit Aontaithe chun an pobal i gcoitinne a chur ar an eolas, agus chun gearáin a chur isteach agus a láimhseáil. Áirítear leis sin glacadh nóta faisnéise ag EDPB maidir leis an sásra sásaimh nua 84 , foirm ghearáin theimpléid (atá beartaithe lena haistriú agus lena foilsiú ag gach ÚCS ina dteangacha náisiúnta) 85 agus rialacha nós imeachta lena rialófar an comhar idir údaráis mhaoirseachta náisiúnta agus rúnaíocht EDPB. 86 Ar an gcaoi chéanna, d’fhoilsigh Oifig an Stiúrthóra Faisnéise Náisiúnta Ceisteanna Coitianta agus bileog eolais maidir leis an sásra sásaimh nua, agus bhí sí rannpháirteach i ngníomhaíochtaí múscailte feasachta poiblí 87 .

Thairis sin, le bliain anuas, d’oibrigh an Bord Eorpach um Chosaint Sonraí agus údaráis ábhartha de chuid na Stát Aontaithe i ndlúthchomhar le chéile maidir le roinnt gnéithe oibríochtúla. Go háirithe, mar a deimhníodh le linn an chruinnithe athbhreithnithe, chuir siad bealach cumarsáide criptithe i bhfeidhm chun gearáin ó údaráis náisiúnta san Aontas a tharchur chuig rúnaíocht an Bhoird Eorpaigh um Chosaint Sonraí, ó rúnaíocht an Bhoird Eorpaigh um Chosaint Sonraí chuig OCSS OSFN agus chuig Oifig na Roinne Dlí agus Cirt um Príobháideachas agus Saoirsí Sibhialta, agus idir OCSS OSFN agus údaráis eile ar thaobh na Stát Aontaithe (e.g. DPRC). Ina theannta sin, mhínigh OCSS OSFN gur cuireadh nósanna imeachta inmheánacha breise i bhfeidhm maidir le comhar gníomhaireachtaí faisnéise aonair le OCSS OSFN a mhéid a bhaineann le gearáin a láimhseáil.

Agus ar deireadh, chuir an Oifig um Príobháideachas agus Saoirsí Sibhialta, a thugann tacaíocht riaracháin do DPRC, in iúl freisin go n‑oibríonn DPRC faoina líne bhuiséid thiomnaithe féin agus go bhfuil soláthar aige de na saoráidí riachtanacha chun a chúraimí a dhéanamh, lena n‑áirítear ríomhairí slána, ríomhairí glúine slána, teileafóin, etc. Ina theannta sin, mar a cheanglaítear le OF 14086, rinne an Roinn Tráchtála na bearta is gá, lena n‑áirítear trí chainéal cumarsáide criptithe le OCSS OSFN a chur ar bun, chun taifead a choinneáil ar bun de na gearáin cháilitheacha uile a fuarthas. Rachaidh an Roinn Tráchtála i dteagmháil go tréimhsiúil le OCSS OSFN féachaint ar scaoileadh ó rúnaicmiú faisnéis a bhaineann le gearán aonair. Más amhlaidh a scaoileadh, tabharfaidh an Roinn Tráchtála fógra ina leith don duine aonair lena mbaineann, ionas go mbeidh sé nó sí in ann rochtain a fháil ar an bhfaisnéis sin.

Tráth an chruinnithe athbhreithnithe, ní raibh aon ghearán faighte ag údaráis mhaoirseachta an Aontais agus, dá bhrí sin, níor tionscnaíodh an sásra sásaimh nua go fóill.

3.CONCLÚID

Bunaithe ar an bhfaisnéis a bailíodh le linn an chéad athbhreithnithe seo, tagann an Coimisiún ar an gconclúid go bhfuil na struchtúir agus na nósanna imeachta is gá curtha i bhfeidhm ag údaráis na Stát Aontaithe chun a áirithiú go bhfeidhmeoidh an Creat Príobháideachais Sonraí go héifeachtach. Sa chomhthéacs sin, is mór ag an gCoimisiún an comhar an-mhaith le húdaráis na Stát Aontaithe chun an t‑athbhreithniú a dhéanamh.

Cé gur díríodh sa chéad athbhreithniú sin ar a fhíorú an bhfuil eilimintí bunaitheacha uile an chreata i bhfeidhm, tar éis bliain amháin oibríochta níl ach taithí theoranta ann ar chur i bhfeidhm praiticiúil na gcoimircí a bhaineann le próiseáil sonraí ag cuideachtaí deimhnithe agus le rochtain ar shonraí ag údaráis phoiblí. Dá bhrí sin, déanfaidh an Coimisiún dlúthfhaireachán ar fhorbairtí ábhartha sna míonna agus sna blianta amach romhainn, agus aird ar leith á tabhairt ar na rudaí seo a leanas: (1) na tuarascálacha ó PCLOB atá ar na bacáin maidir le cur chun feidhme OF 14086 agus feidhmiú an tsásra sásaimh faisnéise comharthaí, go háirithe DPRC; (2) leasuithe breise a d’fhéadfaí a dhéanamh ar Roinn 702 FISA; agus (3) ainmniú agus ceapadh comhaltaí chuig PCLOB chun folúntais atá le teacht a líonadh.

Thairis sin, chun feidhmiú leanúnach agus éifeachtach a áirithiú, measann an Coimisiún go bhfuil tábhacht leis an méid seo a leanas:

-Mar a fógraíodh ag an gcruinniú athbhreithnithe, go mbainfeadh an Roinn Tráchtála úsáid níos mó as na huirlisí éagsúla a sholáthraítear in CPS chun faireachán a dhéanamh ar chomhlíontacht cuideachtaí leis na Prionsabail agus chun éilimh bhréagacha rannpháirtíochta a bhrath.

-Go ndéanfadh an Coimisiún Trádála Fheidearálach tuilleadh forbartha ar a chur chuige réamhghníomhach maidir le comhlíontacht cuideachtaí deimhnithe le Prionsabail CPS a imscrúdú agus a fhorfheidhmiú; agus

-Go ndéanfadh an Roinn Tráchtála, an Choimisiún Trádála Feidearálach agus údaráis cosanta sonraí an Aontais ionstraimí treorach coiteanna a fhorbairt maidir leis na príomhcheanglais faoi Phrionsabail CPS, e.g. maidir le sonraí acmhainní daonna agus aistrithe ar aghaidh.

I bhfianaise thoradh sin an athbhreithnithe agus mar a bheartaítear in aithris 211 den chinneadh leordhóthanachta, measann an Coimisiún gurb iomchuí an chéad athbhreithniú tréimhsiúil eile a dhéanamh tar éis 3 bliana. Leis sin, ba cheart go mbeifí in ann níos mó taithí a fháil ar chur chun feidhme praiticiúil CPS agus na forbairtí thuasluaite a bheidh le teacht a chur san áireamh. Dá bhrí sin, i gcomhréir le hAirteagal 3(4) den chinneadh leordhóthanachta, rachaidh an Coimisiún i gcomhairle leis an mBord Eorpach um Chosaint Sonraí agus leis an gCoiste a bunaíodh faoi Airteagal 93(1) den Rialachán Ginearálta maidir le Cosaint Sonraí maidir le tréimhsiúlacht athbhreithnithe amach anseo.

(1)

Cinneadh Cur Chun Feidhme (AE) 2023/1795 ón gCoimisiún an 10 Iúil 2023 de bhun Rialachán (AE) 2016/679 ó Pharlaimint na hEorpa agus ón gComhairle maidir leis an leibhéal leormhaith cosanta sonraí pearsanta faoi Chreat Príobháideachais Sonraí AE-SAM.

(2)

Sheol an Coimisiún ceistneoir chuig naoi n‑eagraíocht neamhrialtasacha (Human Rights Watch, American Civil Liberties Union, Consumer Federation of America, Center for Digital Democracy, New America Open Technology Institute, Access Now, Electronic Frontier Foundation, Electronic Privacy Information Center, Center for Democracy and Technology) inar díríodh ar fhorbairtí ábhartha i gcreat dlíthiúil na Stát Aontaithe, sásraí formhaoirseachta agus forfheidhmiúcháin, agus feidhmiú sásraí sásaimh. Tháinig seirbhísí an Choimisiúin agus ionadaithe EDPB le chéile ar líne freisin leis na heagraíochtaí neamhrialtasacha sin an 9 Iúil 2024.

(3)

Sheol an Coimisiún ceistneoir chuig naoi gcomhlachas trádála (Software & Information Industry Association, U.S. Chamber of Commerce, Information Technology Industry Council, the Software Alliance, Centre for Information Policy Leadership, Interactive Advertising Bureau, United States Council for International Business, Computer and Communications Industry Association, Engine), inar díríodh ar thaithí cuideachtaí CPS-dheimhnithe, go háirithe an próiseas deimhniúcháin, bearta a rinneadh chun Prionsabail CPS a chomhlíonadh, sásraí chun déileáil le hiarrataí agus gearáin ó dhaoine aonair, etc.

(4)

 Gheofar an t‑aiseolas a fuarthas ag an nasc seo a leanas: https://ec.europa.eu/info/law/better-regulation/have-your-say/initiatives/14379-EU-US-Data-Privacy-Framework-report-of-the-Commission-on-how-the-frame-is-function_ga .

(5)

Eagraíodh an cruinniú athbhreithnithe de réir topaice, agus chuir údarás ábhartha na Stát Aontaithe, ionadaí ábhartha an Aontais nó eagraíocht ábhartha an Aontais tús le gach pointe ar leith ar an gclár oibre le cur i láthair gairid air agus bhí seisiún ceisteanna agus freagraí mionsonraithe ann ina dhiaidh sin. Cumhdaíodh ‘gnéithe tráchtála’ an chreata (i.e. cur i bhfeidhm agus forfheidhmiú ceanglas a bhfuil feidhm acu maidir le cuideachtaí CPS-dheimhnithe) ar an gcéad lá, agus pléadh saincheisteanna a bhaineann le rochtain rialtais ar shonraí pearsanta ar an dara lá.

(6)

Tháinig ionadaithe ón gCoimisiún agus ón mBord Eorpach um Chosaint Sonraí le chéile ar an 12 Meitheamh agus ar an 10 Iúil 2024 chun ullmhú don athbhreithniú, an t‑ionchur a fuarthas a phlé agus chun na gnéithe a dteastaíonn bailiú faisnéise agus soiléiriú breise ina leith a shainaithint.

(7)

Roinn I.2 d’Iarscríbhinn I a ghabhann leis an gcinneadh leordhóthanachta.

(8)

Iarscríbhinn III a ghabhann leis an gcinneadh leordhóthanachta.

(9)

Sa tréimhse choibhéiseach, bhí deimhniú faighte ag 2 400 cuideachta faoin Sciath Príobháideachta.

(10)

  https://www.dataprivacyframework.gov/program-articles/How-to-Join-the-Data-Privacy-Framework-(DPF)-Program-(part%E2%80%931) .  

(11)

  https://www.dataprivacyframework.gov/key-requirements  

(12)

Sásraí um réiteach díospóidí san earnáil phríobháideach trína ndéantar gearáin agus díospóidí gach duine aonair a imscrúdú agus a réiteach go gasta gan aon chostas ar an duine aonair.

(13)

Roinn I, Mír 3 d’Iarscríbhinn I a ghabhann leis an gcinneadh leordhóthanachta.

(14)

Féach Iarscríbhinn III a ghabhann leis an gcinneadh leordhóthanachta. D’fhéadfadh éilimh bhréagacha teacht chun cinn, mar shampla, i gcás ina maíonn cuideachta go bhfuil sí rannpháirteach sa Chreat Príobháideachais Sonraí agus nár chuir tús leis an bpróiseas deimhniúcháin riamh, nó a chuir tús leis an bpróiseas ach nár chuir i gcrích é nó a lig dá deimhniú dul in éag.

(15)

Mar shampla, maidir le haistrithe ar aghaidh, trí úsáid a bhaint as an bhféidearthacht faoi Phrionsabal 3(b) den Chreat Príobháideachais Sonraí achoimre nó cóip ionadaíoch d’fhorálacha príobháideachais ábhartha conarthaí a iarraidh le haghaidh aistrithe ar aghaidh.

(16)

Féach Roinn 2.4 den chinneadh leordhóthanachta.

(17)

Tá sé d’oibleagáid ar eagraíochtaí CPS comhoibriú in imscrúdú agus i réiteach gearáin ag Údarás Cosanta Sonraí nuair a bhaineann sé le próiseáil sonraí acmhainní daonna arna mbailiú i gcomhthéacs caidreamh fostaíochta nó nuair a chuir an eagraíocht lena mbaineann isteach go deonach ar fhormhaoirseacht ag ÚCSanna.

(18)

ANA - https://www.ana.net/content/show/id/accountability-dpf-consumers ;  
Cláir Náisiúnta BBB - https://assets.bbbprograms.org/docs/default-source/eu-privacy-shield/dpf_periodicalreport_072024.pdf ; ICDR – AAA - https://go.adr.org/rs/294-SFS-516/íomhánna/Sonraí%20Príobháideachas%20Creat%20IRM%20Clár%20Tuarascáil%202023-2024%20FINAL.pdf?leagan=0 ;  
Comhlachas Insights - https://www.insightsassociation.org/Portals/INSIGHTS/Insights% 20Comhlachas% 20DPF% 20Seirbhísí% 20Clár% 202024% 20Bliantúil% 20Tuarascáil_Final_1.pdf ;

JAMS - https://www.jamsadr.com/files/Uploads/Documents/2024-Annual-Report-DPF-Cases.pdf ;  
Seirbhísí DPF Iontaobhas Príobháideachta -  https://privacytrust.com/fserve/PrivacyTrust_Dispute_Resolution_Report_2023_2024.pdf ;  
Réiteach Díospóidí TRUSTe -  https://trustarc.com/wp-content/uploads/2024/07/2024-Independent-Recourse-Mechanism-Annual-Report.pdf ;  
Verasafe - https://verasafe.com/wp-content/uploads/2020/06/VeraSafe-DPF-Dispute-Resolution-Program-Annual-Report-2024.pdf

(19)

Go gairid tar éis dháta an chruinnithe athbhreithnithe, thug suíomh gréasáin CPS le fios go raibh Údarás Cosanta Sonraí de chuid an Aontais mar Shásra maidir le Ceart Cúitimh ag 1511 den 2892 rannpháirtí.

(20)

An 17 Aibreán 2024, ghlac an Bord Eorpach um Chosaint Sonraí na Rialacha Nós Imeachta le haghaidh ‘Painéal Neamhfhoirmiúil ÚCS an Aontais’ de réir Chreat Príobháideachais Sonraí AE-SAM. Is féidir teacht orthu anseo: https://www.edpb.europa.eu/system/files/2024-04/dpf_rules-of-procedure_informal-panel-dpas_en.pdf .  

(21)

  https://www.edpb.europa.eu/our-work-tools/our-documents/other-guidance/eu-us-data-privacy-framework-template-complaint-form_en .  

(22)

  https://www.edpb.europa.eu/our-work-tools/our-documents/other-guidance/eu-us-data-privacy-framework-faq-european-individuals_en .  

(23)

  https://www.edpb.europa.eu/our-work-tools/our-documents/other-guidance/eu-us-data-privacy-framework-faq-european-businesses_en .  

(24)

  https://go.adr.org/DPF_Arbitrator_Bios.html .  

(25)

  https://go.adr.org/rs/294-SFS-516/images/IC.DR-AAA_EU-US_DPF_IarscríbhinnI_Arbitration_Rules.pdf.  

(26)

https://go.adr.org/rs/294-SFS-516/images/Code_of_Conduct_for_Arbitrators_Appointed_to_EU-US_DPF_ AnnexI_Arbitrations.pdf .  

(27)

Féach e.g.  https://www.dataprivacyframework.gov/US-Businesses . 

(28)

  https://commission.europa.eu/law/law-topic/data-protection/international-dimension-data-protection/eu-us-data-transfers_ga . 

(29)

  https://www.federalregister.gov/documents/2024/03/01/2024-04573/preventing-access-to-americans-bulk-sensitive-personal-data-and-united-states-government-related .

(30)

Áirítear orthu sin, mar a mhol an tArd-Aighne i Réamhfhógra maidir le Ceapadh Rialacha Beartaithe a eisíodh an 3 Bealtaine 2024, an tSín, Cúba, Hong Cong agus Macao, an Iaráin, an Chóiré Thuaidh, agus Veiniséala. Féach  https://www.federalregister.gov/documents/2024/03/05/2024-04594/national-security-division-provisions-garding-access-toamericans-bulk-sensitive-personal-data-agus  

(31)

  https://www.federalregister.gov/documents/2023/11/01/2023-24283/safe-secure-and-trustworthy-development-and-use-of-artificial-intelligence .

(32)

Cé go bhfuil difríochtaí i gceist le ‘próifíliú’ ó Stát go Stát, is é an sainmhíniú ginearálta ar phróifíliú gur uathphróiseáil d’aon chineál í a dhéantar ar shonraí pearsanta chun meastóireacht, anailís nó tuar a dhéanamh ar ghnéithe pearsanta a bhaineann le staid eacnamaíoch, sláinte, roghanna pearsanta, ábhair spéise, iontaofacht, iompar, suíomh nó gluaiseachtaí duine nádúrtha sainaitheanta nó in-sainaitheanta. De ghnáth is tomhaltóirí iad ar féidir leo diúltú do phróifíliú. Tá reachtaíocht maidir le próifíliú forbartha ag na Stáit seo a leanas: Colorado (Colo. Rev. Stat. Ann. § 6-1-1306), Connecticut (Conn. Gen. Stat. Ann. § 42-518), Delaware (Del. Code Ann. tit. 6, § 12D-104), Florida (Fla. Stat. Ann. § 501.705), Indiana (Ind. Code Ann. § 24-15-3-1), Kentucky (Ky. Rev. Stat. Ann. § 367.3615), Maryland (An tAcht um Príobháideacht Sonraí Maryland Online 2024, arna achtú an 9 Bealtaine 2024), Minnesota (Minn. Stat. Ann. § 325O.07), Montana (Mont. Code Ann. § 30-14-2808), Nebraska (Neb. Rev. Stat. Ann. § 87-1107), New Hampshire (N.H. Rev. Stat. Rev. Stat. Ann. § 507-H:4), New Jersey (N.J. Stat. Stat. Ann. § 56:8-166.8), Oregon (Or. Rev. Stat. Ann. § 646A.574), Rhode Island (Acht Rhode Island um Thrédhearcacht Sonraí agus um Chosaint Príobháideachta, a achtaíodh 29 Meitheamh, 2024), Tennessee (Tenn. Code Ann. § 47-18-3304), Texas (Tex. Bus. & Com. Code Ann. § 541.051), agus Virginia (Va. Code Ann. § 59.1-577).

(33)

  https://files.consumerfinance.gov/f/documents/cfpb_joint-statement-enforcement-against-discrimination-bias-automated-systems_2023-04.pdf .  

(34)

  https://www.ftc.gov/legal-library/browse/cases-proceedings/2023190-rite-aid-corporation-ftc-v .

(35)

Féach e.g. ordú ón gCoimisiún Trádála Feidearálach le déanaí in aghaidh X-Mode maidir le Faisnéis Íogair faoi Shuíomh a Dhíol agus a Chomhroinnt ( https://www.ftc.gov/system/files/ftc_gov/pdf/X-ModeSocialDecisionandOrder.pdf ) agus in aghaidh Monument maidir le Sonraí Sláinte Íogaire a nochtadh do Thríú Páirtithe chun Críoch Margaíochta ( https://www.ftc.gov/system/files/ftc_gov/pdf/MonumentOrderFiled.pdf ).

(36)

Mar shampla, d’fhógair an Coimisiún Trádála Feidearálach imscrúdú le déanaí as ar eascair cás dlí in aghaidh TikTok agus a mháthairchuideachta, Bytedance, as sárú líomhnaithe ar dhlí príobháideachais leanaí. Líomhnaítear nár chomhlíon an dá chuideachta an ceanglas maidir le fógra a thabhairt agus toiliú tuismitheora a fháil sula mbailítear faisnéis phearsanta ó leanaí faoi bhun 13 bliana d’aois agus sula n‑úsáidtear í ( https://www.ftc.gov/news-events/news/press-releases/2024/08/ftc-investigation-leads-lawsuit-against-tiktok-bytedance-flagrantly-violating-childrens-privacy-law ).

(37)

Féach an forbhreathnú ar ghníomhaíochtaí forfheidhmiúcháin a rinneadh le déanaí in ‘The FTC 2023 Privacy and Data Security Update’: https://ec.europa.eu/commission/presscorner/detail/ga/mex_24_1307 .

(38)

 Féach https://ec.europa.eu/commission/presscorner/detail/ga/mex_24_1307. Mar thoradh ar chruinniú mhí an Mhárta 2024, cinneadh sraith seisiún téamach a reáchtáil. Reáchtáladh an chéad cheann i mí Iúil 2024 agus díríodh ar uirlisí a fhorbairt ar féidir leo tacaíocht a thabhairt d’fhiontair bheaga agus mheánmhéide dlíthe príobháideachais a chomhlíonadh.

(39)

Ar na bearta eile is féidir a dhéanamh faoi FISA i ndáil le sonraí a aistrítear ón Aontas tá faireachas leictreonach pearsantaithe (Roinn 105 FISA), cuardaigh fhisiceacha (Roinn 302 FISA), rollaí diallaithe nó gairis gaistithe agus rianúcháin a úsáid (Roinn 402 FISA) agus taifid ghnó a bhailiú ó chuideachtaí áirithe (iompróirí coiteanna, saoráidí cóiríochta poiblí, saoráidí cíosa feithiclí nó saoráidí stórála, Roinn 501 FISA). Déantar mionanailís ar na bunúis dlí éagsúla sin sa chinneadh leordhóthanachta (aithrisí 142-152).

(40)

Féach roinn 3.2.1.2 den chinneadh leordhóthanachta chun tuilleadh faisnéise a fháil.

(41)

Áirítear ar na cuspóirí/aidhmeanna dlisteanacha sin, mar shampla, cosaint ar spiaireacht, sabaitéireacht, feallmharú, nó gníomhaíochtaí faisnéise eile arna ndéanamh ag rialtas, eagraíocht nó duine eachtrach nó thar a gceann nó le cúnamh uathu; cosaint ar an sceimhlitheoireacht, gialla a thógáil, agus daoine aonair a choinneáil i mbraighdeanas arna dhéanamh ag rialtas , eagraíocht nó duine eachtrach nó thar a gceann.

(42)

Roinn 2(b)(iii) d’Ordú Feidhmiúcháin 14086

(43)

Féach https://www.intel.gov/ic-on-the-record-database/results/oversight/1278-odni-releases-ic-procedures- implementation-new-safeguardsin-executive-order-14086 , a foilsíodh an 3 Iúil 2023.

(44)

  https://www.intelligence.gov/ic-on-the-record-database/results/1307-scaoileadh-de-dhoiciméid a bhaineann le-the-2023-fisa-section-702-deimhnithe . 

(45)

Cuireann na nósanna imeachta sin teorainn le bailiú sonraí i ndáil le cuspóir sonrach faisnéise eachtraí, cuireann siad srian le rochtain ar bhunachair sonraí ina stóráiltear faisnéis a fuarthas faoi Roinn 702 den Acht um Fhaireachas Faisnéise Eachtraí (lena n‑áirítear trí rialuithe rochtana) agus forchuireann siad teorainneacha le faisnéis den sórt sin a úsáid, a choinneáil agus a scaipeadh.

(46)

  https://www.intel.gov/foreign-intelligence-surveillance-act .

(47)

Roinn 22 RISAA.

(48)

Roinn 23 RISAA.

(49)

Roinn 2(b)(ii)(A)(2), (3) agus (10) OF 14086.

(50)

Roinn 25 RISAA.

(51)

  https://www.justice.gov/opa/media/1348621/dl?inline . Féach cinneadh 2022 FISC ( https://www.intel.gov/assets/documents/702%20Documents/declassified/2022-FISC-ECSP-OPINION.pdf ) agus an rialú ón gCúirt Athbhreithniúcháin um Fhaireachas Faisnéise Eachtraí lena seastar leis an gcinneadh sin ( https://www.intel.gov/assets/documents/702%20Documents/declassified/2023_FISC-R_ECSP_Opinion.pdf ). 

(52)

Ina theannta sin, thug RISAA roinnt athruithe isteach i ndáil le faireachas leictreonach pearsantaithe traidisiúnta de bhun Roinn 105 FISA (ar bhonn bharántas FISC a eisítear i gcás ina gcomhlíontar caighdeán cúise dóchúla). Anois ceanglaítear ráiteas faoi mhionn a thugann údar leis an tuairim go gcomhlíontar coinníollacha Roinn 105 FISA (Roinn 6(a) RISAA) a bheith ag gabháil le hiarratas ó ghníomhaireacht faisnéise chuig an Ard-Aighne ar ordú chun faireachas leictreonach pearsantaithe a dhéanamh. Cuireadh síneadh le fad féideartha an fhaireachais leictreonaigh i ndáil le cumhachtaí eachtracha nó gníomhairí cumhachtaí eachtracha ó 120 lá go 1 bhliain (Roinn 6(g) RISAA).

(53)

Roinn 2(d) RISAA.

(54)

Roinn 3(a) RISAA.

(55)

Roinn 3(b) RISAA. I gcás inar gá, mar gheall ar imthosca práinneacha, is féidir le Stiúrthóir an FBI cinneadh a dhéanamh maidir le heisceacht ar an bhforáil sin, cinneadh nach mór a chur in iúl don Chomhdháil.

(56)

Ar mhaithe le soiléireacht, ní dhéanann na leasuithe sin difear do stádas ná do ról na n‑abhcóidí speisialta os comhair DPRC, mar a dheimhnigh na Stáit Aontaithe ag an gcruinniú athbhreithnithe.

(57)

Roinn 5(b) RISAA.

(58)

Ceanglaítear le Roinn 18 go sonrach ionadaíocht ó lasmuigh den Chomhdháil.

(59)

  https://www.dni.gov/files/CLPT/documents/2024_ASTR_for_CY2023.pdf.  

(60)

  https://www.justice.gov/nsd/media/1350236/dl?inline . 

(61)

D’fhan na figiúirí sin cobhsaí den chuid is mó i gcomparáid leis an mbliain tuairiscithe roimhe sin (2022). I gcomparáid leis sin, in 2022 rinneadh 317 n‑iarratas deiridh le FISC chun faireachán leictreonach agus/nó cuardaigh fhisiceacha a dhéanamh chun críoch faisnéise eachtraí. Bhí líon iomlán na ndaoine ar díríodh orthu le haghaidh orduithe um fhaireachán leictreonach idir 0 agus 499. Rinne an FBI 9103 iarraidh litreacha slándála náisiúnta ar fhaisnéis faoi dhaoine nach daoine de chuid na Stát Aontaithe iad in 2022 (gan iarrataí ar fhaisnéis rannpháirtí amháin a áireamh). Foinse: https://irp.fas.org/agency/doj/fisa/2022rept.pdf  

(62)

  https://transparencyreport.google.com/user-data/us-national-security .

(63)

  https://transparency.meta.com/reports/government-data-requests/country/US/ .

(64)

  https://transparencyreport.google.com/user-data/us-national-security .

(65)

Féach mar shampla roinn 2.4 de OF 12333 maidir le teicnící bailithe.

(66)

Féach aithris 40 den chinneadh leordhóthanachta.

(67)

Féach aithris 38 den chinneadh leordhóthanachta.

(68)

https://www.ftc.gov/news-events/news/press-releases/2024/01/ftc-order-prohibits-data-broker-x-mode-social-outlogic-selling-sensitive-location-data.

(69)

  https://www.dni.gov/files/ODNI/documents/CAI/Commercially-Available-Information-Framework-May2024.pdf . Tá sé de cheangal ar ghníomhaireachtaí faisnéise an Creat a chomhlíonadh ó mhí Lúnasa 2024 i leith.

(70)

Bíonn Ardchigire ag gach gníomhaireacht faisnéise, Ardchigire atá neamhspleách go reachtúil agus freagrach as iniúchtaí agus imscrúduithe a dhéanamh a bhaineann leis na gníomhaíochtaí a dhéanann an ghníomhaireacht lena mbaineann chun críoch slándála náisiúnta. Bíonn rochtain aige ar gach ábhar ábhartha (lena n‑áirítear ábhar rúnaicmithe), trí subpoena más gá, agus féadfaidh sé fianaise a ghlacadh. Déanann Ardchigirí cásanna sáruithe coiriúla amhrasta a tharchur lena n‑ionchúiseamh agus déanann siad moltaí do cheannairí gníomhaireachta maidir le gníomhaíocht cheartaitheach. Cé nach mbíonn a gcuid moltaí ceangailteach, is gnách go ndéantar a dtuarascálacha, lena n‑áirítear tuarascálacha maidir le gníomh leantach (nó leis an easpa gníomh leantach) a phoibliú agus a sheoladh chuig an gComhdháil. Ina leith sin, féach fonóta 136 den chinneadh leordhóthanachta maidir le ról an Ardchigire.

(71)

  https://oig.nsa.gov/reports/Article/3609957/semiannual-report-to-congress-1-april-2023-to-30-september-2023/ .

(72)

  https://documents.pclob.gov/prod/Documents/EventsAndPress/834a1977-f420-4b2a-ae93-8a522b2c7c74/Trans-Atlantic%20Data%20Privacy%20Framework%20EO%20press%20release%20(FINAL)%20-%20Completed%20508%20-%2010202022.pdf .

(73)

Is gníomhaireacht neamhspleách é an Bord Maoirseachta um Príobháideachas agus Saoirsí Sibhialta a bhfuil freagrachtaí uirthi i réimse na mbeartas frithsceimhlitheoireachta agus a gcur chun feidhme, d’fhonn príobháideachas agus saoirsí sibhialta a chosaint. Is féidir leis rochtain a fháil ar an bhfaisnéis ábhartha uile (lena n‑áirítear faisnéis rúnaicmithe), agallaimh a dhéanamh agus fianaise a chloisteáil. Féadfaidh sé moltaí a eisiúint chuig údaráis forfheidhmithe an dlí agus na húdaráis faisnéise, agus tuairiscíonn sé go rialta don Chomhdháil agus don Uachtarán. Cuirtear a thuarascálacha ar fáil go poiblí a mhéid is féidir.

(74)

  https://www.pclob.gov/OversightProjects/Details/1115 .

(75)

  https://documents.pclob.gov/prod/Documents/OversightReport/8ca320e5-01d3-4d6a-8106-3384aad6ff31/2023%20PCLOB%20702%20Report%20-%20Nov%2017%202023%20-%201446.pdf .

(76)

Tugann an Coimisiún dá aire gur ionchorpraíodh cuid de na moltaí sin mar chuid de RISAA, lena n‑áirítear an moladh maidir le bailiú eolais nó an moladh maidir le ról shaineolaithe FISC (amici) a neartú.

(77)

  https://www.pclob.gov/OversightProjects .

(78)

  https://documents.pclob.gov/prod/Documents/EventsAndPress/deb9cd13-12af-4250-998e-a520a2419a6b/PCLOB%20nominee%20press%20release%206-13-24.pdf .

(79)

Aithrisí 176-194 den chinneadh leordhóthanachta.

(80)

  https://www.justice.gov/opa/pr/attorney-general-merrick-b-garland-announces-judges-data-protection-review-court .

(81)

Roinn 3(d)(A) EO 14086.

(82)

  https://www.justice.gov/opcl/dprc-resources .

(83)

https://www.dni.gov/files/documents/ICD/ICD_126-Implementation-Procedures-for-SIGINT-Redress-Mechanism.pdf

(84)

  https://www.edpb.europa.eu/our-work-tools/our-documents/other-guidance/information-note-data-protection-framework-redress_ga .

(85)

  https://www.edpb.europa.eu/our-work-tools/our-documents/other-guidance/template-complaint-form-us-office-director-national_ga .

(86)

  https://www.edpb.europa.eu/our-work-tools/our-documents/other-guidance/rules-procedure-data-protection-framework-redress_ga .

(87)

  https://www.dni.gov/files/CLPT/documents/Fact_Sheets/The_Role_of_the_ODNI_CLPO_FAQs.pdf agus https://www.dni.gov/files/CLPT/documents/Fact_Sheets/Data_Privacy_Framework.pdf .